Hesekiel
45 “‘Tikki dibagi hamu tano i lao gabe parbagiananmuna,+ ikkon disumbangkon hamu do deba tano i tu Jahowa gabe bagian na badia.+ Ganjang ni tano i, ikkon 25.000 asta* jala bidangna ikkon 10.000 asta.+ Sude tano* i gabe bagian na badia. 2 Di bagasan ni tano parbagianan i, parade ma tano na bentukna persegi, 500 asta hali 500 asta.*+ Parade ma i lao gabe inganan na badia. Di sakaliling ni tano i ikkon adong do inganan panjappalan bidangna 50 asta.+ 3 Ikkon ukkuronmu do tano i, ikkon adong do ganjangna 25.000 asta jala bidangna 10.000 asta. Disi do bahenon bagas joro i, i ma inganan na massai badia. 4 Gabe bagian na badia ma tano i na lao dilehon tu akka malim,+ tu akka na marhobas di bagas joro di jolo ni Jahowa.+ Di tano i ma dibangun jabu ni nasida dohot bagas joro inganan na badia i.
5 “‘Adong do tano na ganjangna 25.000 asta jala bidangna 10.000 asta.+ Tano i ma na gabe bagian ni halak Lepi, i ma akka halak na marhobas di bagas joro i. Dapot ni nasida do muse 20 ruang makan+ lao gabe appuna ni nasida.
6 “‘Ikkon lehononmuna do muse tano ganjangna 25.000 asta jala bidangna 5.000 asta na lao dibahen gabe kota.+ Bagian on ma na lao appuna ni sude halak Israel. Dos do ganjang ni on tu tano na badia na disumbangkon i.
7 “‘Adong do tano parbagianan ni pamimpin di sabola barat dohot di sabola timur. Tano i adong di sapping ni tano na dilehon gabe sumbangan na badia dohot tano na dilehon gabe kota. Ganjang ni tano na sian parbatasan na di sabola barat sahat tu parbatasan na di sabola timur, dos do tu ganjang ni tano parbagianan ni sada sian marga ni Israel.+ 8 Tano i ma na gabe appuna ni ibana di Israel. Alani i, dang kejam be akka pamimpin tu bangsokku.+ Bagion ni nasida nama tano i tu halak Israel mangihutton marga ni nasida.’+
9 “Songon on do hata ni Jahowa Tuan Natumimbul i, ‘Ale akka pamimpin ni Israel, nungnga pagodangku be ulaonmuna na jahat i!’
“‘Paso hamu ma hajahaton dohot ulaonmuna na kejam i. Ulahon hamu ma na sittong dohot na tigor.+ Unang be buat hamu arta ni bangsokki,’+ ninna Jahowa Tuan Natumimbul i. 10 ‘Ikkon pakkeonmuna do timbangan na sittong, ukkuran epa* na sittong, dohot ukkuran bat* na sittong.+ 11 Ikkon ditottuhon do sadia godang ukkuran epa dohot bat. Sada bat ikkon dos do tu saparsappulu homer.* Jala sada epa dos tu saparsappulu homer. Homer ma patokan lao mangukkur. 12 Sada sekel*+ dos tu 20 gera.* Jala 20 sekel ditamba 25 sekel, ditamba 15 sekel dos tu sada mane.’*
13 “‘On ma na ikkon disumbangkon hamu: Saparonom epa sian ganup sada homer gandum. Jala saparonom epa sian ganup sada homer barli.* 14 Ikkon diukkur mamakke ukkuran bat do miak na disumbangkon. Sada bat dos tu saparsappulu kor.* Sappulu bat dos tu sada homer. Ai sappulu bat do sada homer. 15 Sian akka binatang na dipiaro halak Israel, ganup sian 200 biru-biru, ikkon dipelehon nasida do sada. Sudena i dilehon gabe pelean sipanganon,*+ pelean situtungon,+ dohot pelean pardamean.*+ Ikkon dilehon do i asa disesa dosa ni bangso i,’+ ninna Jahowa Tuan Natumimbul i.
16 “‘Ikkon disumbangkon+ sude halak na di luat i do sudena i tu pamimpin ni Israel. 17 Ai pamimpin i do na martanggung jawab mangurus pelean situtungon,+ pelean sipanganon,+ dohot pelean siinumon saleleng masa perayaan,+ perayaan bulan baru, ari Sabat,+ dohot sude perayaan na ditottuhon tu halak Israel.+ Ibana ma na paradehon pelean hasesaan ni dosa, pelean sipanganon, pelean situtungon, dohot pelean pardamean na lao dibahen asa disesa dosa ni halak Israel i.’
18 “Songon on ma hata ni Jahowa Tuan Natumimbul i, ‘Di ari na parjolo di bulan na parjolo, ikkon buatonmu do sada lombu jantan na poso jala na sehat. Dung i ikkon pabadiaonmu do inganan na badia i.*+ 19 Buaton ni malim ma saotik mudar sian pelean hasesaan ni dosa i. Dung i didaisson ibana ma i tu tiang ni pintu ni bagas joro,+ tu opat sudut ni tingkat na patoluhon na di langgatan i, dohot tu tiang ni pintu gerbang ni alaman na di bagasan. 20 Songon i do na ikkon diulahon hamu di ari na papituhon di bulan i alani sasahalak na mangulahon dosa na so sengaja, manang alani sasahalak na mamboto naung mardosa ibana di pudian ni ari.+ Ikkon diulahon hamu do songon i asa badia bagas jorokki.*+
21 “‘Di ari na pasappulu opatton, di bulan na parjolo, ikkon dibahen hamu do Perayaan Paska.+ Ikkon mangallang roti na so marragi do hamu saleleng pitu ari.+ 22 Di ari i, ikkon diparade pamimpin do sada lombu jantan na poso, lao gabe pelean hasesaan ni dosana sandiri dohot dosa ni sude halak na di luat i.+ 23 Saleleng pitu ari di perayaan i, ikkon diparade ibana do pitu lombu jantan na poso jala na sehat, dohot pitu biru-biru jantan na sehat. Ikkon dipelehon do ganup ari sada lombu jantan dohot sada biru-biru jantan lao gabe pelean situtungon tu Jahowa.+ Jala ikkon dipelehon do muse ganup ari sada hambing jantan lao gabe pelean hasesaan ni dosa. 24 Lao gabe pelean sipanganon, ikkon diparade do sada epa topung tu ganup sada lombu jantan na poso. Jala sada epa topung tu ganup biru-biru jantan. Dung i, diparade do sada hin* miak tu ganup sada epa topung.
25 “‘Di ari na pasappulu limahon di bulan na papituhon, saleleng pitu ari di perayaan i,+ ikkon diulahon ibana do ulaon na sarupa. Ikkon diparade ibana do pelean hasesaan ni dosa, pelean situtungon, pelean sipanganon, dohot miak.’”