5 Musa
29 Asing ni parjanjian naung dibahen Jahowa dohot halak Israel di Horeb, diparettahon Ibana do muse tu si Musa, asa mambahen parjanjian tu halak Israel di Moab. Songon on ma isi ni parjanjian i.+
2 Dijou si Musa ma sude halak Israel i jala ninna ma, “Nungnga diida hamu be sude na dibahen Jahowa di Mesir. Diida hamu do songon dia dibahen Ibana tu si Firaun, tu akka parkarejona dohot tu sude halak di luat i.+ 3 Nungnga diida hamu akka hukuman* na dibahen Ibana, akka tanda na hebat, jala mukjizat na palongang roha.+ 4 Alai sahat tu sadari on, dang dilehon Jahowa tu hamu roha lao mangattusi, mata lao marnida, dohot pinggol lao mambege.+ 5 ‘Saleleng 40 taon hutogu-togu do hamu di gurun,+ dang sega pakkeanmuna jala dang sega solopmuna.+ 6 Dang diallang hamu roti jala dang diinum hamu anggur, manang siinumon na asing na maralkohol, asa diboto hamu Au do Jahowa Debatamuna.’ 7 Ujungna sahat ma hamu di inganan on. Ro ma si Sihon raja ni Hesbon+ dohot si Og raja ni Basan+ marporang mangalo hita. Alai tataluhon do nasida.+ 8 Dung i tabuat ma luat i. Talehon ma i gabe parbagianan ni marga Ruben, marga Gad, dohot satonga sian marga Manasse.+ 9 Alani i, oloi jala ulahon hamu ma na didok di parjanjian on, asa marhasil sude na diulahon hamu.+
10 “Sadari on, jongjong ma hamu sude di jolo ni Jahowa Debatamuna, hamu akka pamimpin ni marga, pangituai,* komandan, sude bawa ni halak Israel, 11 akka dakdanak, istrimuna,+ dohot akka halak na sian bangso na asing+ na rap tinggal dohot hamu, mulai sian halak na papunguhon soban sahat tu halak na manimba aek. 12 Dison do hamu saonari lao patuduhon na setuju hamu tu parjanjian na binahen ni Jahowa Debatamuna mardongan sumpa, i ma parjanjian na binahen ni Jahowa Debatamuna tu hamu sadari on.+ 13 Marhite parjanjian i, dipillit Ibana ma hamu sadari on gabe bangsona+ jala Ibana ma na gabe Debatamuna,+ songon janjina tu hamu jala songon sumpana tu akka ompumuna, i ma si Abraham,+ si Isak,+ dohot si Jakkob.+
14 “Dang holan tu hamu dibahen parjanjian na mardongan sumpa i, 15 alai dibahen do i tu akka halak na jongjong rap dohot hita sadari on di jolo ni Jahowa Debatanta, dohot tu halak na so rap dohot hita sadari on. 16 (Takkas do diboto hamu songon dia ngolutta tikki di Mesir najolo, jala songon dia hita mamolus sian tonga-tonga ni luat ni akka bangso.+ 17 Jala nungnga diida hamu sude akka barang dohot akka patung appuna ni nasida na dihagigihon,*+ na dibahen sian hau, batu, perak, dohot mas.) 18 Manat ma hamu, unang sappe adong bawa, borua, keluarga, manang marga na manimbil rohana lao manadikkon Jahowa Debatanta i, jala gabe lao manomba debata ni akka bangso i.+ Ai dos songon urat ni suan-suanan na paet jala na marracun do halak sisongon i.+
19 “Alai molo adong sasahalak na mambege sumpa i jala ginjang rohana, didok ibana di bagasan rohana, ‘Denggan do ngolukku nang pe lomo ni rohakku sandiri na huihutton,’ pasti mate do sude na adong di labbungna.* 20 Dang olo Jahowa manesa dosana.+ Gariada muruk situtu do Jahowa tu ibana. Bahenonna ma tu ibana sude bura na disurat di bukku on,+ jala pasti sesaon ni Jahowa do goarna sian toru ni langit on. 21 Papulikon ni Jahowa ma ibana sian sude marga ni halak Israel. Bahenonna ma ibana marjea, paroonna ma sude bura na didok di bagasan parjanjian naung tarsurat di bukku Patik on.
22 “Idaon ni akka pinoppar ni anakmu, dohot akka halak na sian bangso na asing na di luat na dao ma akka jea dohot hasusaan na dibahen Jahowa tu luat on. 23 Paroonna ma belerang, sira, dohot api. Alani i, dang boi be disabur boni di sude luat i, dang martunas suan-suanan disi, jala dang adong na tubu suan-suanan disi. Dos ma i songon na masa di Sodom dohot Gumora,+ di Adma dohot Zeboim,+ i ma luat na dihancurhon Jahowa ala ni murukna tu nasida. 24 Dohonon ni nasida dohot sude bangso ma, ‘Ai boasa dibahen Jahowa songon on tu luat on?+ Boasa muruk situtu Ibana?’ 25 Dialusi akka halak ma, ‘Ai dang diulahon nasida parjanjian na binahen ni nasida dohot Jahowa+ Debata ni akka ompu ni nasida, i ma parjanjian na binahen ni nasida tikki kaluar sian Mesir.+ 26 Lao do nasida manomba jala marsinggang tu akka debata na asing, i ma debata na so ditanda nasida na diorai Ibana lao sombaon ni nasida.*+ 27 Alani i, muruk situtu ma Jahowa tu luat i. Diparo Ibana ma sude bura na tarsurat di bukku i.+ 28 Nungnga massai muruk situtu Jahowa tu nasida. Dicabut ma nasida sian tano ni nasida jala disappatton tu luat na asing,+ inganan ni nasida saonari.’+
29 “Diboto Jahowa Debatanta i do sude rahasia.+ Alai nungnga dipaboa Ibana tu hita dohot tu pinopparta saleleng ni lelengna na dia lomo ni rohana lao paboaonna. Dibahen Ibana do songon i, asa taoloi sude isi ni Patik on.+