4 Musa
32 Massai godang situtu do binatang na dipiaro pinoppar ni si Ruben+ dohot pinoppar ni si Gad.+ Denggan situtu do diida nasida luat Jaser+ dohot luat Gilead lao gabe inganan ni nasida marmahan. 2 Alani i, dijuppangi nasida ma si Musa, Malim Eleasar, dohot akka pamimpin ni bangso i. Didok nasida ma, 3 “Nungnga huida hami luat Atarot, Dibon, Jaser, Nimra, Hesbon,+ Eleale, Sebam, Nebo,+ dohot Beon.+ 4 Akka luat na ditaluhon Jahowa do i di jolo ni halak Israel.+ Denggan do luat i gabe inganannami marmahan. Ai godang situtu do binatang na dipiaro+ hami tuan.” 5 Didok nasida ma muse, “Molo denggan do di roha ni tuan, lehon ma akka luat i gabe appunanami. Jala unang pola suru hami manaripari Sunge Jordan on.”
6 Dung i didok si Musa ma tu akka pinoppar ni si Gad dohot tu pinoppar ni si Ruben, “Denggan do di rohamuna haha anggimuna lao marporang, hape hamu tinggal dison? 7 Boasa dibahen hamu gabe mabiar halak Israel manaripar tu luat na dijanjihon Jahowa i? 8 Songon i do na dibahen akka ompumuna, tikki husuru nasida mangida luat i sian Kades-barnea.+ 9 Tikki nakkok nasida tu Rura* Eskol+ jala diida luat i, dibahen nasida do marmetmet ni roha halak Israel. Gabe dang olo bangso i masuk tu luat na lao lehonon ni Jahowa.+ 10 Gabe muruk situtu ma Jahowa di tikki i, jala marsumpa ma Ibana songon on,+ 11 ‘Dang adong nanggo sahalak pe na kaluar sian Mesir, na marumur 20 taon tu ginjang na boi masuk tu luat na hujanjihon+ tu si Abraham, si Isak, dohot tu si Jakkob.+ Ai dang diihutton nasida Au sian nasa roha ni nasida. 12 Holan si Kaleb+ anak ni si Jepune halak Kenaz i dohot si Josua+ anak ni si Nun do na boi mangida luat i. Ai diihutton nasida do Jahowa sian nasa roha ni nasida.’+ 13 Di tikki i, muruk situtu do Jahowa tu halak Israel. Dibahen Ibana ma marhaliang-haliang nasida di gurun saleleng 40 taon,+ sappe mate sude nasida* na mangulahon na jahat i di jolo ni Jahowa.+ 14 Saonari, naeng dohot ma hamu mangulahon dosa songon akka ompumuna i, na mambahen muruk muse Jahowa tu bangso Israel. 15 Molo dang diihutton hamu Ibana, tinggalhononna ma muse bangso on di gurun. Jala alani hamu gabe hancur ma sude bangso on.”
16 Di pudian ni ari, ro ma muse nasida mandapotton si Musa. Didok nasida ma, “Paloas ma hami mambahen akka kandang* ni binatangnami dison dohot akka kota tu akka ianakkonnami. 17 Alai dohot pe hami lao marporang.+ Jala torus pe hami di jolo ni halak Israel sahat tu na diboan hami nasida tu inganan ni nasida. Lok ma tinggal akka ianakkonnami di akka kota na martembok, asa unang diganggu akka pangisi ni luat on nasida. 18 Jala dang mulak hami tu jabunami, saleleng so dapot ni halak Israel luat parbagianan ni nasida be.+ 19 Dang pola be buatonnami tano parbagianan ni halak Israel na di bariba ni Sunge Jordan. Ai nungnga hujalo hami tano parbagianannami na di sabola timur ni Sunge Jordan on.”+
20 Didok si Musa ma tu nasida, “Attong molo songon i, bahen hamu ma songon on: Parade hamu ma dirimuna di jolo ni Jahowa lao marporang.+ 21 Taripari hamu ma Sunge Jordan di jolo ni Jahowa. Molo dung diusir Jahowa akka musuna sian jolona jala ditaluhon Ibana luat i sian jolona,+ 22 boi ma hamu mulak.+ Dang pola be marsala hamu di jolo ni Jahowa dohot di jolo ni halak Israel. Jala dukkon i loason ni Jahowa ma luat i gabe appunamuna.+ 23 Alai molo dang diulahon hamu i, mardosa ma hamu di jolo ni Jahowa. Taononmuna ma akibat ni dosamuna i. 24 Pajongjong hamu ma akka kota lao tu ianakkonmuna dohot akka kandang ni binatangmuna.+ Alai ikkon diulahon hamu do janjimuna i.”
25 Didok pinoppar ni si Gad dohot pinoppar ni si Ruben ma tu si Musa, “Huulahon hami pe songon na nidokmi tuan. 26 Lok ma tinggal di akka kota na di Gilead akka ianakkonnami, istrinami, hambing, biru-biru, lombu, dohot sude binatang na hupiaro hami.+ 27 Alai anggo hami, akka bawa na rade marporang di jolo ni Jahowa,+ borhat pe hami manaripar songon na nidok ni tuan i.”
28 Alani i dibahen si Musa ma sada paretta taringot nasida. Dipaboa ma i tu Malim Eleasar, tu si Josua anak ni si Nun, dohot tu akka pamimpin keluarga pihak bapak ni sude marga ni halak Israel. 29 Didok si Musa ma tu nasida, “Molo borhat pinoppar ni si Gad dohot pinoppar ni si Ruben manaripari Sunge Jordan rap dohot hamu, jala rade nasida marporang di jolo ni Jahowa, dung i ditaluhon akka jolma na di luat i di jolomuna, ikkon lehononmuna do luat na di Gilead gabe parbagianan ni nasida.+ 30 Alai molo dang rade nasida marporang jala dang manaripar nasida rap dohot hamu, ikkon tinggal do nasida rap dohot hamu di Kanaan.”
31 Didok pinoppar ni si Gad dohot pinoppar ni si Ruben ma, “Manang aha pe didok Jahowa, songon i do ulahononnami. 32 Rade pe hami marporang dohot manaripar tu luat Kanaan di jolo ni Jahowa.+ Alai, luat na di sabola timur ni Sunge Jordan on do na gabe parbagianannami.” 33 Dilehon si Musa ma parbagianan ni pinoppar ni si Gad, pinoppar ni si Ruben,+ dohot satonga marga Manasse,+ i ma anak ni si Josep i. Dilehon ibana ma tu nasida tano na di akka kota na di harajaon ni si Sihon+ raja ni halak Amori, dohot harajaon ni si Og+ raja ni Basan. Jala dilehon do muse akka kota na di sakaliling ni harajaon i.
34 Dipajongjong pinoppar ni si Gad ma kota Dibon,+ Atarot,+ Aroer,+ 35 Atarot-sopan, Jaser,+ Jogbehat,+ 36 Bet-nimra,+ dohot Bet-haran.+ Akka i ma kota na martembok. Jala dipajongjong nasida do muse kandang na sian batu inganan ni binatang ni nasida. 37 Jala dipajongjong pinoppar ni si Ruben do kota Hesbon,+ Eleale,+ Kiriataim,+ 38 Nebo,+ Baal-meon+ (nungnga digatti akka goarna), dohot Sibna. Digatti nasida do goar ni akka kota na dipajongjong nasida i.
39 Lao ma pinoppar ni si Mahir+ anak ni si Manasse tu Gilead. Ditaluhon nasida ma luat i jala dipalao ma halak Amori na adong disi. 40 Dilehon si Musa ma luat na di Gilead tu pinoppar ni si Mahir anak ni si Manasse. Jala disi ma nasida tinggal.+ 41 Lao ma muse si Jair anak ni si Manasse manaluhon akka perkemahan na di huta na di Gilead. Dibahen ibana ma goar ni akka kota i Hawot-jair.*+ 42 Lao ma si Nobah jala ditaluhon ma luat Kenat dohot akka kota na di sakalilingna. Dibahen ibana ma goarna Nobah songon goarna sandiri.