Ulaon ni Apostel
22 “Hamu akka haha anggi dohot akka amanami, tangihon hamu ma jo hatorangankon.”+ 2 Dung dibege nasida si Paulus makkatai di bahasa Heber, lam hohom ma nasida. Didok si Paulus ma, 3 “Halak Jahudi do au,+ tubu di Tarsus na di Kilikia.+ Alai di kota on do au sikkola jala diajari si Gamaliel.+ Diajari do au mangihutton sude Patik na diihutton akka omputta.+ Dos songon hamu na pungu dison sadari on, hulehon do ngolukku lao marhobas tu Debata.+ 4 Hulelei do akka na mangihutton Dalan ni Tuan i jala hupamate. Hutakkup do akka bawa dohot borua jala hupamasuk tu penjara.+ 5 Takkas do i diboto sintua ni malim dohot sude pangituai.* Ai sian nasida do hujalo akka surat na lao boanokku tu akka donganta di Damaskus. Dung i, lao ma au tusi manakkup akka siihutton Dalan ni Tuan i jala mamboan nasida tu Jerusalem asa dihukum.
6 “Alai tikki di pardalanan au jala nungnga naeng sahat tu Damaskus, hira-hira di tonga ari, toppu ma ro cahaya sian langit tu sakalilingku.+ 7 Dabu ma au tu tano jala hubege ma soara na mandok, ‘Saulus, Saulus, boasa dibahen ho na haccit tu au?’ 8 Gabe nikku ma, ‘Ise do ho Tuan?’ Dialusi ibana ma, ‘Jesus halak Nasaret i do au, na disiksami.’ 9 Diida akka donganku do cahaya na ro i, alai dang dibege nasida soara ni na makkatai tu au. 10 Dung i hudok ma, ‘Aha ma sibahenokku Tuan?’ Didok Tuan i ma tu au, ‘Jongjong ma ho, lao ma ho tu Damaskus. Disi pe dipaboa tu ho aha na ikkon ulahononmu.’+ 11 Alai dang boi be huida manang aha, ai massai tiur do cahaya i. Gabe ditogu-togu akka donganku ma au sahat tu Damaskus.
12 “Dung i ro ma sahalak bawa na margoar si Ananias. Dihabiari ibana do Debata, diihutton do Patik i, jala sude do halak Jahudi na disi mamuji ibana. 13 Jongjong ma ibana di labbungku jala ninna ma, ‘Saulus, dongan, marnida ma ho muse!’ Laos satokkin i, boi ma au marnida jala hubereng ma ibana.+ 14 Didok ibana ma, ‘Nungnga dipillit Debata ni akka omputta ho asa diboto ho aha lomo ni rohana, asa diida ho Jesus na mangulahon na sittong i,+ jala asa dibege ho soarana. 15 Ai nungnga dipillit Jesus ho lao paboahon sude na diida ho dohot na dibege ho sian ibana.+ 16 Attong, aha dope na dipaima ho? Jongjong ma ho jala tardidi. Paias ma dirim sian akka dosam+ marhite manjou goar ni Jesus.’+
17 “Alai dung mulak au tu Jerusalem,+ tikki martangiang au di bagas joro, mandapot parnidaan ma au. 18 Di parnidaan i, huida ma Tuan Jesus jala didok ma tu au, ‘Hatop, kaluar ma ho sian Jerusalem. Ai dang ditangihon nasida akka na pinaboam taringot tu au.’+ 19 Hudok ma, ‘Tuan, takkas do diboto nasida na hudalani najolo akka sinagoga* lao manakkup dohot mamukkuli akka na porsea tu ho.+ 20 Asing ni i, tikki dipamate nasida si Stepanus saksimi, jongjong do au disi jala lomo do rohakku dipamate ibana. Jala au do na manjaga pakkean luar ni na mambunu i.’+ 21 Alai didok Tuan i ma tu au, ‘Borhat ma ho, ai suruokku ma ho tu akka bangso na di inganan na dao.’”+
22 Sahat tusi, ditangihon akka jolma i dope si Paulus. Alai dukkon i, marsurak ma nasida, “Pamate ma ibana! Dang loason mangolu jolma sisongon on!” 23 Marsuraki ma nasida, disappatton nasida ma pakkean luarna jala disappatton nasida ma orbuk tu ginjang.+ 24 Alai disuru komandan ni tentara i ma asa diboan si Paulus tu markas ni nasida. Disuru ma muse asa disukkuni nasida si Paulus huhut dilissingi, asa diboto komandan i alani aha sai didok akka jolma i ikkon dipamate si Paulus. 25 Alai dung ditali nasida ibana lao dilissingi, didok si Paulus ma tu perwira na jongjong disi, “Mangihutton hukum, boi do dilissingi sahalak warga negara Rom andorang so diadili dope ibana?”+ 26 Dung dibege perwira i hatana i, lao ma ibana paboahon i tu komandan ni tentara i, ninna ma, “Aha do na lao bahenonmu tu ibana? Ai warga negara Rom do hape ibana.” 27 Dung i didapotton komandan ni tentara i ma si Paulus jala ninna ma, “Tutu do ho warga negara Rom?” Dialusi ibana ma, “Tutu.” 28 Didok komandan ni tentara i ma, “Arga do hugarar asa boi au gabe warga negara Rom.” Didok si Paulus ma, “Alai anggo au, sian mulai tubu do au warga negara Rom.”+
29 Laos satokkin i, lao ma akka tentara na naeng manukkuni si Paulus i. Gabe mabiar ma komandan ni tentara i, ai nungnga diratte ibana si Paulus, hape warga negara Rom do ibana.+
30 Marsogotna i, dipalua komandan ni tentara i ma si Paulus jala disuru ma marpungu akka malim kepala* dohot sude anggota ni Sanhedrin,* ala naeng botoonna boasa bahenon ni halak Jahudi songon i tu si Paulus. Dung i diboan ma si Paulus tu jolo ni nasida.+