Panguhum
21 Songon on do sumpa ni halak Israel di Mispa,+ “Dang boi adong sian hita na mangalehon boruna gabe istri ni halak Benjamin.”+ 2 Alani i lao ma halak Israel tu Betel,+ hundul ma nasida di jolo ni Debata na sittong. Sai tangis ma nasida jala mangandungi. 3 Didok nasida ma, “Ale Jahowa, Debata ni Israel, boasa ma ikkon masa sisongon on di Israel? Boasa ma ikkon mago sadari on sada marga sian bangso Israel?” 4 Marsogotna i hatop ma nasida dungo. Dipajongjong nasida ma sada langgatan, jala dipelehon ma disi pelean situtungon dohot pelean pardamean.*+
5 Tikki na marsumpa i halak Israel di Mispa, didok nasida do ikkon dipamate manang ise na so ro marpungu tu jolo ni Jahowa. Alani i ma didok nasida, “Ise do sian marga ni Israel na so ro marpungu tu jolo ni Jahowa?” 6 Marsak do halak Israel alani na masa tu halak Benjamin, dongan ni nasida sabangso i. Didok nasida ma, “Sadari on nungnga mago sada marga sian bangso Israel. 7 Songon dia ma bahenotta asa adong istri ni halak Benjamin na tading i? Ai nungnga marsumpa hita tu Jahowa,+ na so tupa adong sian hita mangalehon boruna gabe istri ni nasida.”+
8 Disukkun nasida ma, “Tikki na marpungu i hita di Mispa, ise do sian marga ni Israel na so ro tu jolo ni Jahowa?”+ Gabe tarboto ma dang adong nanggo sahalak pe sian Jabes-gilead na ro marpungu tu perkemahan ni nasida. 9 Ai dietong nasida do tikki i godang ni sude halak na ro i. Gabe diboto nasida ma dang adong nanggo sahalak pe sian pangisi ni huta Jabes-gilead na ro. 10 Alani i, disuru halak Israel na marpungu i ma 12.000 tentara na jago tu Jabes-gilead. Didok ma tu nasida, “Pamate hamu ma pangisi ni huta Jabes-gilead mamakke podang, dohot ma i akka borua nang dakdanak.+ 11 Ikkon pamateonmuna do sude bawa dohot sude borua naung hea mangulahon seks dohot bawa.” 12 Sian sude pangisi ni huta Jabes-gilead, adong ma 400 anak boru na so hea dope mangulahon seks dohot bawa. Diboan ma nasida tu Silo,+ na di luat Kanaan.
13 Dung i, disuru halak Israel ma halak mandapotton marga Benjamin di Dolok Rimmon,+ asa mardame nasida. 14 Alani i mulak ma halak Benjamin tu hutana. Dilehon halak Israel ma tu nasida akka borua na sian Jabes-gilead i.+ Hape unggodang do halak Benjamin sian akka borua i. 15 Gabe marsak ma halak Israel alani na masa tu marga Benjamin.+ Ai nungnga disirang Jahowa be marga Benjamin sian akka marga ni Israel na asing. 16 Didok akka pamimpin ni punguan i ma, “Songon dia ma bahenotta asa adong istri ni halak Benjamin na tading i? Ai nungnga mate sude borua ni halak Benjamin.” 17 Dialusi nasida ma, “Ikkon adong do tano parbagianan ni halak Benjamin na mangolu i dope, asa unang mago sada marga sian bangso Israel. 18 Alai dang boi lehonotta borutta gabe istri ni nasida. Ai nungnga marsumpa halak Israel, ‘Hona bura ma halak na mangalehon boruna gabe istri ni halak Benjamin.’”+
19 Didok nasida ma muse, “Ganup taon dibahen do perayaan tu Jahowa di Silo.+ Di sabola utara ni Betel do Silo, i ma na di sabola timur ni dalan nakkok-nakkohan na sian Betel tu Sikem, jala na di sabola selatan ni Lebona.” 20 Alani i, didok nasida ma tu halak Benjamin, “Lao ma hamu martabuni tu akka ladang anggur. 21 Molo diida hamu kaluar akka anak boru ni Silo manortori huhut marhaliang, kaluar ma hamu sian akka ladang anggur i. Larihon hamu ma akka anak boru i gabe istrimuna, jala mulak ma hamu tu tano ni halak Benjamin. 22 Molo ro bapak ni nasida manang iboto ni nasida mangalu-alu tu hami, dohononnami ma, ‘Asi ma rohamuna tu hami dohot tu nasida. Ai dang sae akka anak boru na tadapot sian parporangan i gabe istri ni nasida.+ Jala marsala do hamu molo dipamuli hamu borumuna tu nasida.’”+
23 Diulahon halak Benjamin ma songon i. Dilarihon nasida ma akka anak boru na manortori i jala dibahen ma gabe istri ni nasida. Dung i mulak ma nasida tu tano parbagianan ni nasida. Dipajongjong nasida ma muse kota i,+ jala disi ma nasida tinggal.
24 Sian i, mulak ma halak Israel tu tano parbagiananna be, tu donganna samarga, dohot tu keluargana.
25 Dang adong raja ni halak Israel di tikki i,+ gabe masibahen lomona be do ganup halak.