2 Samuel
6 Dipapungu si Daud ma muse sude tentarana na umjago di Israel, godangna 30.000 halak. 2 Dung i, lao ma si Daud dohot sude tentarana i tu Baala-juda lao mambuat poti parpadanan ni Debata na sittong i.+ Di jolo ni poti parpadanan i, dijou akka halak do goar ni Jahowa Pamimpin ni Akka Tentara*+ na martahta di ginjang* ni akka kerubim.*+ 3 Dibuat nasida ma poti parpadanan ni Debata na sittong i sian jabu ni si Abinadab+ na di dolok-dolok. Alai dipamasuk nasida ma poti i tu gerobak na baru,+ na ditarik ni lombu. Dung i mardalan ma si Uzza dohot si Ahio akka anak ni si Abinadab mangiring-iring gerobak i.
4 Diboan nasida ma poti parpadanan ni Debata na sittong i sian jabu ni si Abinadab na adong di dolok-dolok. Jala mardalan do si Ahio di jolo ni poti i. 5 Dung i marpesta ma si Daud dohot sude halak Israel di jolo ni Jahowa. Dipakke nasida do sude alat musik na sian hau juniper, songon harpa, alat musik na martali,+ rebana,*+ simbal,*+ dohot akka alat musik na asing. 6 Alai tikki sahat nasida di inganan pardegean Nakon, naeng madabu ma poti parpadanan ni Debata na sittong i dibahen akka lombu i. Gabe ditiop si Uzza ma poti i.+ 7 Muruk situtu ma Jahowa tu si Uzza, jala dipamate Debata na sittong i ma ibana+ ala dang dioloi ibana patik ni Debata.+ Mate do ibana di labbung ni poti parpadanan ni Debata na sittong i. 8 Alai jut ma roha ni* si Daud ala muruk situtu Jahowa tu si Uzza. Gabe digoari ma inganan i Peres-uzza* sahat tu sadari on. 9 Laos di ari i gabe mabiar ma si Daud tu Jahowa.+ Didok ibana ma, “Boha nama bahenokku mamboan poti parpadanan ni Jahowa tu kotaku?”+ 10 Gabe dang olo be si Daud mamboan poti parpadanan ni Jahowa i tu Kota ni si Daud.+ Alai dibahen ibana ma i di jabu ni si Obed-edom+ halak Gat i.
11 Saleleng tolu bulan ma poti parpadanan ni Jahowa di jabu ni si Obed-edom halak Gat i. Sai dipasu-pasu Jahowa do si Obed-edom dohot sude na di jabuna.+ 12 Adong ma na mandok tu Raja Daud, “Dipasu-pasu Jahowa do keluarga ni si Obed-edom jala lam godang do artana, ala disi poti parpadanan ni Debata na sittong i.” Alani i, dialap si Daud ma poti parpadanan ni Debata na sittong i sian jabu ni si Obed-edom, jala marlas ni roha do ibana mamboan i tu Kota ni si Daud.+ 13 Dung onom lakka mardalan akka halak na mamboan+ poti parpadanan ni Jahowa i, dipelehon si Daud ma sada lombu jantan dohot sada binatang na mokmok.
14 Tikki i, dipakke* si Daud do baju epod na sian linen. Manortori do ibana di jolo ni Jahowa alani las ni rohana.+ 15 Diboan si Daud dohot sude halak Israel ma poti parpadanan+ ni Jahowa i. Tikki na mardalan i nasida, adong do na marsuraki alani las ni rohana.+ Jala adong do na mamakke tarompet sian tanduk.+ 16 Sahat ma poti parpadanan ni Jahowa di Kota ni si Daud. Diida si Mikhal+ boru ni si Saul ma sian jandela na marinjaki Raja Daud huhut manortori di jolo ni Jahowa. Gabe leas ma rohana mangida si Daud.+ 17 Dipeakkon nasida ma poti parpadanan ni Jahowa i di kemah naung dipajongjong si Daud hian.+ Dung i, dipelehon si Daud ma pelean situtungon+ dohot pelean pardamean*+ di jolo ni Jahowa.+ 18 Dung sae dipelehon si Daud pelean situtungon dohot pelean pardamean i, dipangido si Daud ma di bagasan goar ni Jahowa Pamimpin ni Akka Tentara i, asa dipasu-pasu bangso i. 19 Dibagihon si Daud ma kue golang-golang, kue kurma, dohot kue kismis tu sude halak Israel rakyatna i, tu bawa nang tu borua. Dung i, mulak ma nasida tu jabuna be.
20 Mulak ma si Daud tu jabuna jala mandok hata ma ibana tu keluargana. Ro ma si Mikhal boru ni si Saul+ mandapotton ibana, jala didok ma, “Dipasangap raja ni Israel do dirina sadari on. Dibahen raja i do dirina songon halak na oto di jolo ni akka hatoban borua ni parkarejona, dos songon halak na oto na mambukka bajuna di jolo ni natorop!”+ 21 Mambege i, didok si Daud ma tu si Mikhal, “Hubahen pe songon i, na lao tu Jahowa do i. Ibana do na mamillit au jala na mambahen au gabe pamimpin ni bangso Israel, bangso ni Jahowa i.+ Jala Ibana do na manolak bapakmu dohot sude pinopparna. Alani i, bahenokku dope ulaon sisongon on tu Jahowa. 22 Bahenokku dope unlea dirikku sian sadari on jala dang mararga di jolo ni jolma. Alai, sangap do au di jolo ni akka hatoban borua na nidokmi.” 23 Alani i ma dang marianakkon si Mikhal boru ni si Saul i+ sahat tu na mate.