2 Samuel
13 Ia si Absalom anak ni si Daud, adong do ibotona na bagak, goarna si Tamar.+ Jala lomo do roha ni si Amnon+ anak ni si Daud tu ibana. 2 Anak boru dope si Tamar jala dang hea dope ibana mangulahon seks dohot manang ise pe. Marsak do si Amnon alani cintana tu si Tamar, sappe marsahit do ibana. Ai dang boi dibahen ibana manang aha tu si Tamar. 3 Adong do ale-ale ni si Amnon na margoar si Jehonadab,+ anak ni Simeah,+ abang ni si Daud. Halak na akkal situtu do ibana. 4 Didok ibana ma tu si Amnon, “Ai boasa marsak anak ni raja i ganup manogot? Paboa ma tu au aha na masa.” Didok si Amnon ma, “Lomo rohakku tu si Tamar iboto+ ni si Absalom anggikki.” 5 Didok si Jehonadab ma, “Modom ma ho di podomanmu jala bahen ma ho songon na marsahit. Tikki ro bapakmu mangida ho, dokkon ma tu ibana, ‘Suru ma si Tamar ro paradehon sipanganon* di au. Molo diparade ibana sipanganon* di jolokku, allangokku ma i.’”
6 Dung i, peak ma si Amnon di podoman songon halak na marsahit. Ro ma raja mangida ibana jala didok si Amnon ma, “Suru ma si Tamar ro, asa huida ibana mambahen dua kue di au jala allangokku ma i.” 7 Disuru si Daud ma halak mandapotton si Tamar di jabuna. Didok ma tu ibana, “Lao ma ho tu jabu ni itom si Amnon jala parade ma sipanganon* di ibana.” 8 Lao ma si Tamar tu jabu ni si Amnon jala diida ma peak ibana di podomanna. Dibuat si Tamar ma topung naung diadon jala diloppa ma kue di jolo ni si Amnon. 9 Dung i dibuat si Tamar ma kue i sian pangaloppaan i jala diparade di jolo ni si Amnon. Alai dang olo si Amnon mangallang i. Didok ibana ma, “Jolo suru jo kaluar sude jolma sian on.” Gabe kaluar ma sude jolma sian i.
10 Didok si Amnon ma tu si Tamar, “Boan ma sipanganon* i tu kamar asa huallang.” Diboan si Tamar ma kue na binahenna i tu kamar jala dilehon ma i tu si Amnon. 11 Tikki diboan si Tamar sipanganon i, pittor ditiop si Amnon ma tanganna jala didok ma, “Ro ma ho tuson ito, asa rap modom hita.” 12 Alai didok si Tamar ma, “Dang olo au! Unang paila au. Ai dang boi mangulahon songon i di Israel.+ Unang ma ulahon ulaon na parohon ila sisongon i.+ 13 Dang tarbereng au be annon sude jolma. Jala ho pe ito, gabe jolma na so hasea ma di Israel. Makkatai ma ho tu raja. Ai pos do rohakku na lehonon ni raja i do au di ho.” 14 Alai, dang ditangihon si Amnon hatana i. Ala umgogo do ibana, gabe diperkosa ma ibotona i. 15 Alai dung sae i, massai sogo ma roha ni si Amnon tu si Tamar. Gabe umbalga ma sogo ni rohana sian holong ni rohana hian. Didok ibana ma tu si Tamar, “Lao ma ho sian jabu on!” 16 Didok si Tamar ma, “Bah ito, palaoonmu ma au sian on? Unjahat do na binahenmon sian pambahenanmu nakkin tu au! Ai disuru ho do au lao.” Alai, dang ditangihon si Amnon hatana i.
17 Dijou si Amnon ma akka parkarejona jala didok ibana ma, “Boan ma kaluar boru-boru on sian jolokku, jala kucci ma pintu i.” 18 Diboan parkarejona i ma si Tamar kaluar jala dikucci ma pintu i. (Tikki i, dipakke si Tamar do rompi na ganjang,* na somal dipakke boru ni raja. Jala holan anak boru do na mamakke i.) 19 Dibahen si Tamar ma abu tu uluna,+ diribak ma abitna na bagak i, dibahen ma tanganna duassa tu uluna, jala mardalan ma ibana huhut tangis.
20 Disukkun itona si Absalom+ ma si Tamar, “Si Amnon do na mambahen songon on tu ho? Unang pola paboa i tu manang ise pe. Ai itom do i.+ Unang pola marsak be ho.” Dung i, tinggal di jabu ni si Absalom ma si Tamar jala dang olo be ibana makkatai tu manang ise pe. 21 Tikki dibege Raja Daud na masa i, muruk situtu ma ibana.+ Alai dang olo ibana mambahen haccit roha ni si Amnon anakna i. Ai holong do rohana tu si Amnon ala anak siakkanganna do i. 22 Dang olo be si Absalom mangattoi si Amnon. Dang olo be ibana paboahon taringot na jahat manang na denggan. Ai nungnga sogo hian rohana+ mangida si Amnon, ala nungnga dipaila ibana si Tamar+ ibotona i.
23 Dung salpu dua taon, dijou si Absalom ma sude anak ni raja asa ro tu Baal-hazor na jonok tu Epraim.+ Dibahen ibana do pesta disi, ai manggusting ibbulu ni biru-biru do ibana di tikki i.+ 24 Dijuppangi si Absalom ma Raja Daud. Ninna ma, “Manggusting ibbulu ni biru-biru do naposomon nuaeng. Molo denggan di roha ni raja i, ro ma raja i dohot akka parkarejom.” 25 Didok raja i ma tu si Absalom, “Dang pola anakku. Molo ro hami sude, gabe susa do ho annon.” Nang pe sai dielek-elek si Absalom raja i dang olo bapakna i ro. Alai didok si Daud ma asa denggan ulaon i dibahen.* 26 Didok si Absalom ma, “Molo dang ro raja i, paloas ma abangku si Amnon lao rap dohot hami.”+ Didok raja i ma, “Boasa pola ikkon dohot ibana?” 27 Ala sai dielek-elek si Absalom ibana, gabe disuru raja i ma lao si Amnon dohot sude anak ni raja rap dohot ibana.
28 Didok si Absalom ma tu akka parkarejona, “Parrohahon hamu ma si Amnon i. Molo dung mabuk ibana alani anggur, dohonokku ma tu hamu, ‘Pamate si Amnon!’ Pittor pamate hamu ma ibana. Unang pola mabiar hamu. Ai au do na manuru hamu. Pos ma rohamuna jala barani ma hamu!” 29 Dipamate akka parkarejona i ma si Amnon songon paretta ni si Absalom. Pittor nakkok ma sude anak ni raja i tu akka halodena* jala lari ma nasida. 30 Tikki di pardalanan dope akka anak ni raja i, adong ma na mandok tu si Daud, “Nungnga dipamate si Absalom be sude anak ni raja i jala dang adong nanggo sahalak pe na mangolu.” 31 Mambege i, jongjong ma raja i, diribak ma abitna jala peak ma ibana di lante. Jala dohot do sude parkarejona na jongjong disi mangaribak pakkean ni nasida.
32 Ro ma si Jehonadab+ anak ni si Simeah+ abang ni si Daud i. Didok ma tu ibana, “Unang ma dirippu tuan naung mate sude anakmi. Holan si Amnon do na mate.+ Si Absalom do na manuru i. Ai nungnga direncanahon ibana hian i+ mulai sian na dipaila si Amnon itona+ si Tamar i.+ 33 Unang pola porsea* raja i tu hata ni halak na mandok naung mate sude anakmi. Ai holan si Amnon do na mate.”
34 Lari ma si Absalom.+ Dung i, diida panjaga ma godang jolma turun sian dolok. 35 Didok si Jehonadab+ ma tu raja i, “Ida ma! Nungnga mulak be sude anakmi ale raja, songon na hudok i.” 36 Dung sae didok si Jehonadab songon i, sahat ma akka anak ni raja i. Mangandungi ma nasida, gabe dohot ma raja i dohot akka parkarejona mangandungi alani lungun ni roha ni nasida. 37 Jala leleng do sai marsak si Daud di parmate ni anakna i. Alai lari do si Absalom mandapotton si Talmai+ anak ni si Amihud raja ni Gesur. 38 Saleleng tolu taon ma si Absalom tinggal di huta ni halak Gesur.+
39 Dung leleng, dang marsak be Raja Daud di parmate ni si Amnon i. Jala masihol ma ibana naeng pajuppang dohot si Absalom.