1 Kronika

4 Akka anak ni si Juda, i ma si Peres,+ si Hezron,+ si Karmi, si Hur,+ dohot si Sobal.+ 2 Anak ni si Sobal, i ma si Reaya. Anak ni si Reaya, i ma si Jahat. Akka anak ni si Jahat, i ma si Ahumai dohot si Lehad. Akka on ma keluarga ni halak Zora.+ 3 Akka anak ni bapak ni si Etam,*+ i ma si Jisreel, si Isma, si Idbas (goar ni ito ni nasida, i ma si Hasselponi), 4 si Penuel bapak ni si Gedor, dohot si Eser bapak ni si Husa. Akka on ma pinoppar ni si Hur,+ anak siakkangan ni si Eprata. Si Hur do bapak ni si Betlehem.+ 5 Adong dua istri ni si Ashur+ bapak ni si Tekoa,+ i ma si Hela dohot si Naara. 6 On ma akka anak ni si Naara: si Ahusam, si Heper, si Temeni, dohot si Haahasfari. 7 Akka anak ni si Hela, i ma si Seret, si Ishar, dohot si Etam. 8 Akka anak ni si Kos, i ma si Anub dohot si Hasobeba. Si Kos do muse ompu ni akka pinoppar ni si Aharlel anak ni si Harum.

9 Ussangap do si Jabes sian sude haha anggina. Dibahen omakna pe goarna si Jabes* ala didok omakna do, “Susa do huhilala tikki manubuhon ibana.” 10 Martangiang ma si Jabes tu Debata ni Israel. Didok ibana ma, “Ale Debata, pasu-pasu ma au jala urupi ma au mambahen lam bidang tanokku. Sai dongani ma au jala unang ma bahen au marjea, asa unang susa au!” Alani i, dipasaut Debata ma na pinangidona i.

11 Abang ni si Suha do si Kelub. Anak ni si Kelub, i ma si Mehir. Anak ni si Mehir, i ma si Eston. 12 Akka anak ni si Eston, i ma si Betrapa, si Pasea, dohot si Tehinna. Anak ni si Tehinna, i ma si Ir-nahas. On ma akka halak Reka. 13 Akka anak ni si Kenas, i ma si Otniel+ dohot si Seraya. Anak ni si Otniel, i ma si Hatat. 14 Anak ni si Meonotai, i ma si Opra. Anak ni si Seraya, i ma si Joab. Si Joab do ompu ni halak Ge-harasim,* i ma akka halak na malo martukkang.

15 Anak ni si Jepune do si Kaleb. Akka anak ni si Kaleb,+ i ma si Iru, si Elah, dohot si Naam. Anak ni si Elah, i ma si Kenas. 16 Akka anak ni si Jehaleleel, i ma si Sip, si Sipa, si Tiria, dohot si Asarel. 17 Akka anak ni si Esra, i ma si Jeter, si Mered, si Eper, dohot si Jalon. Hamil ma borua i* jala ditubuhon ibana ma si Miryam, si Sammai, dohot si Isba bapak ni si Estemoa. 18 Akka on ma anak ni si Mered sian si Bitia boru ni si Firaun. Adong do istri ni si Mered na halak Jahudi. Ditubuhon ibana ma si Jered bapak ni si Gedor, si Heber bapak ni si Soko, dohot si Jekutiel bapak ni si Sanoa.

19 Akka anak ni si Hodia, i ma bapak ni si Keila halak Garmi dohot si Estemoa halak Maakat. Ito ni si Naham do istri ni si Hodia. 20 Akka anak ni si Simon, i ma si Amnon, si Rinna, si Ben-hanan, dohot si Tilon. Akka anak ni si Ishi, i ma si Sohet dohot si Ben-sobet.

21 Anak* ni si Juda, i ma si Sela.+ Akka anak ni si Sela, i ma si Er bapak ni si Leka, si Laada bapak ni si Maresa, dohot akka pinoppar ni si Asbea, i ma akka partonun kain na halus. 22 Adong do muse anak ni si Sela, i ma si Jokim, halak Koseba, si Joas, dohot si Sarap. Akka boru Moab do istri ni nasida. Dohot do si Jasubi-lehem anak ni si Sela. Nungnga disurat on sian najolo. 23 Nasida do akka sitopa hudon na tinggal di Netaim dohot di Gedera. Tinggal disi do nasida jala parkarejo ni raja do nasida.

24 Akka anak ni si Simeon,+ i ma si Nemuel, si Jamin, si Jarib, si Jara, dohot si Saul.+ 25 Anak ni si Saul, i ma si Sallum. Anak ni si Sallum, i ma si Mibsam. Anak ni si Mibsam, i ma si Misma. 26 Anak ni si Misma, i ma si Hamul. Anak ni si Hamul, i ma si Sakur. Anak ni si Sakur, i ma si Simei. 27 Adong 16 anak ni si Simei jala 6 ma boruna. Unggodang do anakna sian anak ni haha anggina. Alai, dang adong sian keluarga ni nasida na godang ni anakna songon godang ni anak ni marga Juda.+ 28 Nasida tinggal di Ber-seba,+ di Molada,+ di Hasar-sual,+ 29 di Bilha, di Esem,+ di Tolad, 30 di Betuel,+ di Horma,+ di Ziklag,+ 31 di Bet-markabot, di Hazar-susim,+ di Bet-biri, dohot di Saraim. Akka on ma inganan ni nasida sahat tu na mamaretta si Daud.

32 Tinggal do muse nasida di lima kota na asing, i ma kota Etam, kota Ain, kota Rimmon, kota Tohen, dohot kota Asan.+ 33 Tinggal do nasida muse di sakaliling ni akka kota i sahat tu kota Baal. On ma tarombo ni nasida dohot akka inganan ni nasida. 34 Akka pinoppar ni si Simeon na asing, i ma si Mesobab, si Jamle, si Josa anak ni si Amasia, 35 si Joel, si Jehu anak ni si Josibia pahoppu ni si Seraya nini ni si Asiel, 36 si Eleonai, si Jaakoba, si Jesohaya, si Asaya, si Adiel, si Jesimiel, si Benaya, 37 dohot si Sisa. Bapak ni si Sisa, i ma si Sipi. Bapak ni si Sipi, i ma si Allon. Bapak ni si Allon, i ma si Jedaya. Bapak ni si Jedaya, i ma si Simri. Bapak ni si Simri, i ma si Semaya. 38 Nasida ma akka pamimpin di keluarga ni nasida. Jala lam martamba ma pinoppar ni akka ompu ni nasida. 39 Dung i lao ma nasida mangalului inganan parmahanan ni biru-biru ni nasida. Lao ma nasida tu dalan na lao tu Gedor, i ma na di sabola timur ni rura. 40 Dapot ni nasida ma inganan parmahanan na lomak jala na denggan. Halak Ham+ do najolo tinggal disi. Bidang do luat i, aman, jala dang adong na mangganggu. 41 Nasida ro tu luat i tikki mamaretta si Hiskia+ raja ni Juda. Dipamate nasida ma sude halak Ham dohot halak Meunim na tinggal disi, jala diruppakkon ma akka kemah ni halak Ham dohot halak Meunim i. Gabe nasida ma na tinggal disi, ala adong inganan parmahanan ni biru-biru disi.

42 Adong do 500 halak Simeon na lao tu Dolok Seir.+ Akka anak ni si Ishi ma na gabe pamimpin ni nasida, i ma si Pelatia, si Naearia, si Repaya, dohot si Usiel. 43 Di dolok i, adong do halak Amalek+ na lari tusi. Dipamate nasida ma halak Amalek i, gabe nasida ma na tinggal disi sahat tu saonari.