2 Samuel

18 Dietong si Daud ma sude halak na mandongani ibana. Dung i, dipillit ibana ma akka pamimpin ni na sasaribu dohot pamimpin ni na sasaratus.+ 2 Dibagi si Daud ma gabe tolu punguan akka tentarana i. Punguan na parjolo dipimpin* si Joab.+ Punguan na paduahon dipimpin si Abisai,+ abang ni si Joab anak ni si Seruya.+ Jala punguan na patoluhon dipimpin si Ittai+ halak Gat. Dung dibagi si Daud nasida, didok ibana ma, “Dohot do au lao rap dohot hamu.” 3 Didok nasida ma, “Unang ma dohot ho tuan.+ Alai suru ma halak sian kota on lao mangurupi hami. Ai molo lari pe hami, dang parduli nasida. Molo mate pe satonga sian hami, dang parduli nasida. Ai ummarga do ho sian 10.000 tentara.”+ 4 Dialusi raja i ma nasida, “Molo songon i do na denggan di rohamuna, oloakku do i.” Jongjong ma raja i di gerbang, jala borhat ma sude punguan ni tentara na sasaribu dohot na sasaratus. 5 Diparettahon Raja i ma tu si Joab, tu si Abisai, dohot tu si Ittai, “Asi ma rohamuna tu au, unang ma pamate hamu si Absalom anak haholongakki.”+ Sude do tentara i mambege hata ni si Daud tu akka pamimpin i.

6 Kaluar ma sude tentara i sian kota lao mangalo tentara ni Israel. Marporang ma nasida di Tombak Epraim.+ 7 Ditaluhon tentara ni si Daud+ ma tentara ni Israel.+ Godang do halak na mate di ari i. Adong do 20.000 halak na mate i. 8 Lam rarat ma parporangan i tu sude tombak i. Jala unggodang do na mate di Tombak Epraim i sian na mate alani podang.

9 Pajuppang ma si Absalom dohot akka tentara ni si Daud. Lari ma si Absalom marhalode* jala lewat ma halodena i sian toru ni hau na balga. Hape sakkot ma obuk ni si Absalom di dakka ni hau i, gabe gattung ma ibana di hau i. Alai lari do halodena i. 10 Dung i, adong ma sasahalak mangida i jala dipaboa ma tu si Joab.+ Didok ibana ma, “Huida do gattung si Absalom di hau na balga.” 11 Didok si Joab ma tu bawa na mangida i, “Molo diida ho do ibana, boasa dang pittor dipamate ho ibana disi? Molo diulahon ho i, lehonokku do tu ho sappulu hepeng logam perak dohot sada ikat pinggang.” 12 Alai didok bawa i ma tu si Joab, “Tung pe dilehon ho 1.000 hepeng logam perak tu au, dang olo au mangalo anak ni raja i. Ai takkas do hubege hami didok raja i tu ho tuan, tu si Abisai, dohot tu si Ittai na so boi pamateonmuna si Absalom.+ 13 Ai molo diboto raja i na so huoloi parettana* jala hupamate si Absalom, dang adong bahenonmu lao mambela au.” 14 Didok si Joab ma tu bawa i, “Suda tikkikku marsoal dohot ho!” Tikki i, mangolu dope si Absalom jala gattung di hau na balga. Dibuat si Joab ma tolu tombakna,* lao ma ibana mandapotton si Absalom jala ditullang ma jantungna. 15 Dung i ro ma sappulu halak siboan sinjata ni si Joab mandapotton si Absalom. Diattuk nasida ma si Absalom sappe mate.+ 16 Diombus si Joab ma tarompet na sian tanduk asa unang dilele tentara ni nasida be tentara ni Israel. Ujungna, mulak ma akka tentarana i. 17 Dibuat nasida ma bakke ni si Absalom i jala disappatton tu lubang na balga na adong di tombak i. Ditimbun nasida ma lubang i dohot akka batu na balga.+ Dung i, lari ma sude halak Israel tu jabu ni nasida be.

18 Tikki mangolu dope si Absalom, dipajongjong ibana ma sada tugu di ibana di Rura Raja.+ Ai didok ibana do, “Dang adong be siboan goar di au.+ Ai dang adong anakku bawa.” Dibahen ibana ma goar ni tugu i, Tugu Absalom, jala i do goarna sahat tu sadari on.

19 Didok si Ahimas+ anak ni si Sadok ma tu si Joab, “Paloas ma au marlojong mandapotton raja i, asa hupaboa on tu ibana. Ai nungnga dipalua Jahowa ibana sian akka musuna.”+ 20 Didok si Joab ma, “Anak ni raja i do na mate. Alani i, unang ma ho na lao paboahon barita i sadari on. Di ari na asing ma ho paboahon barita.”+ 21 Dijou si Joab ma sada bawa halak Kus.+ Didok ma tu ibana, “Lao ma ho mandapotton raja jala paboa ma sude na masa naung niidam.” Dung i, marsinggang ma bawa i di jolo ni si Joab jala marlojong ma ibana mandapotton raja. 22 Alai didok si Ahimas anak ni si Sadok i ma muse tu si Joab, “Manang boha pe, paloas ma jo au lao mangihutton halak Kus i.” Didok si Joab ma, “Boasa ikkon dohot ho paboahon i amang? Ai dang adong barita na lao paboaonmu.” 23 Alai didok ibana ma muse tu si Joab, “Manang boha pe na masa, ikkon lao do au.” Didok si Joab ma, “Attong lao ma ho!” Marlojong ma si Ahimas, jala dibolus ibana ma akka huta na di labbung ni Sunge Jordan. Gabe ibana ma na parjolo sian halak Kus i.

24 Tikki i, hundul-hundul do si Daud di holang-kolang ni dua gerbang ni kota, i ma gerbang na di bagasan dohot gerbang na di luar.+ Dung i nakkok ma sahalak panjaga+ tu tembok na di ginjang ni gerbang i. Diida ibana ma sahalak bawa marlojong. 25 Jou-jou ma panjaga i jala dipaboa ibana ma na niidana tu raja i. Didok raja ma, “Molo sahalakna do ro, na paboahon barita do i.” Dung lam jonok bawa na marlojong i, 26 diida panjaga i ma muse sahalak nai marlojong. Gabe didok panjaga i ma tu panjaga gerbang, “Ida ma! Adong sahalak nai ro marlojong.” Dialusi raja ma, “Sarupa do i, siboan barita do i.” 27 Didok panjaga i ma, “Songon parlojong ni si Ahimas+ anak ni si Sadok do huida halak na parjolo marlojong i.” Didok raja i ma, “Halak na burju do ibana, na mamboan barita na denggan do i.” 28 Didok si Ahimas ma tu raja i, “Adong barita na denggan!” Dung i, marsinggang ma si Ahimas tu jolo ni raja i jala ninna ma muse, “Pinuji ma Jahowa Debatam. Nungnga dipasahat Ibana be tu ho akka na mangalo ho rajanami.”+

29 Didok raja ma tu si Ahimas, “Sehat do anakku si Absalom i?” Dialusi si Ahimas ma, “Tikki disuru si Joab lao naposo ni raja i dohot au naposomon, massai gaor do huida disi. Alai dang huboto aha na masa.”+ 30 Didok raja ma, “Attong tu labbungkon ma jo ho jongjong.” Gabe jongjong ma si Ahimas di labbung ni raja.

31 Dung i sahat ma halak Kus i.+ Didok ibana ma tu raja, “Bege ma tuan barita na huboan on: Sadari on, nungnga dipalua Jahowa be ho sian tangan ni akka halak na mangalo ho.”+ 32 Didok raja i ma tu halak Kus i, “Sehat do anakku si Absalom i?” Didok halak Kus i ma, “Sai anggiat ma mate sude musu ni raja i dohot sude na mangalo tuan songon anakmu si Absalom!”+

33 Lungun situtu ma roha ni raja i mambege barita i. Nakkok ma ibana tu ruangan na di ginjang ni gerbang i jala sai tangis ma ibana. Huhut mardalan, sai didok ibana ma, “Absalom, anakku! Anakku Absalom, anakku! Boasa ma dang au na mate, ale Absalom anakku!”+