Jesaya
28 Marjea ma mahkota* na dibangga-banggahon* akka parmabuk na sian Epraim,+
Kota na di atas ni rura na subur, inganan ni akka halak na mabuk dibahen anggur,
Ai na lao salpu nama haulion ni mahkotana i, dos songon bunga na naeng malos!
2 Ida ma! Suruon ni Jahowa ma sasahalak na gogo jala na jago.
Disappatton Ibana ma mahkota i massai gogo tu tano on,
Dos songon udan es na mardongan ronggur na gogo dohot alogo halisuksung,
Jala songon udan na doras na mambahen banjir na mardongan sillam.
3 Didege-dege nama mahkota i di toru ni pat,+
Akka mahkota na dibangga-banggahon* ni akka parmabuk na sian Epraim.
4 Nang pe di atas ni rura na subur kota i,
Alai gabe songon bunga na naeng malos nama haulionna,
Jala gabe songon parbue ni hau ara na parjolo malamun andorang so musim panas nama i,
Disi diida halak, pittor diputikkon ma i jala diboddutton.
5 Di ari i, Jahowa Pamimpin ni Akka Tentara* i gabe songon mahkota hamuliaon dohot songon hiasan ni ulu na uli di akka bangsona na tinggal dope.+ 6 Bahenonna ma akka hakim i mangadili marhite cara na sittong. Jala Ibana ma na gabe Silehon gogo tu akka halak na mangusir akka musu na ro tu gerbang.+
7 Dohot do nasida gabe lilu alani anggur,
Siinumon na maralkohol mambahen nasida mirdong.
Malim dohot panurirang* nungnga lilu alani alkohol,
Dang boi be nasida marpikkiran na denggan* alani anggur,
Mirdong ma nasida alani siinumon na maralkohol,
Parnidaan ni nasida pe mambahen nasida gabe lilu,
Gabe marpilitan ma nasida mambahen keputusan tikki mangadilii.+
8 Gok uta-uta do meja ni nasida,
Dang adong inganan na so hona uta-uta.
9 Dohonon ni nasida ma, “Tu ise do diajarhon ibana parbinotoan i?
Jala tu ise do naeng dipatorang ibana barita i?
Na songon poso-poso na baru sirang susu do hita di ibana?
Na songon dakdanak na baru sae manusu do hita di ibana?
10 Ai didok ibana do, ‘Ihutton paretta on dung i paretta an, ihutton paretta on dung i paretta an,
Tali di ginjang ni tali, tali di ginjang ni tali,*+
Otik dison, otik disan.’”
11 Marhite halak na gagap* dohot halak na makkatai di bahasa na asing ma Ibana makkatai tu bangso on.+ 12 Hea do didok Debata tu nasida, “On ma inganan lao maradi. Lok ma maradi halak na loja dison, on do inganan lao mambahen hamu margogo muse.” Alai dang olo nasida manangihon hata i.+ 13 Ai songon on do didok roha ni nasida hata ni Jahowa i:
“Ihutton paretta on dung i paretta an, ihutton paretta on dung i paretta an,
Tali di ginjang ni tali, tali di ginjang ni tali,*+
Otik dison, otik disan.”
Alani i, tikki mardalan nasida,
Tartuktuk ma nasida jala tunggaling tu pudi
Lukka ma nasida, tarjorat, jala ditakkup.+
14 Alani i, tangihon hamu ma hata ni Jahowa, hamu ale siginjang roha,
Hamu ale akka pamimpin ni bangso on na di Jerusalem,
15 Didok hamu do,
Molo ro banjir na balga,
Dang na lao sahat i tu hami
Ai gabus do hubahen hami inganan parlinggomannami,
Jala martabuni do hami di na so sittong.”+
16 Alani i, songon on ma didok Jahowa Tuan Natumimbul i,
“Hupeakkon do di Sion batu naung diuji gabe fondasi,+
Manang ise na porsea di ibana dang na lao busisaon.+
Ro ma udan es pasudahon parlinggomanmuna, i ma gabus i,
Jala hona banjir ma ingananmuna martabuni i.
Molo ro banjir na balga,
Hancur ma hamu bahenonna.
Molo dung mabiar, attusan ni nasida ma aha naung binege ni nasida.”*
20 Ai podoman i pe papendekku do gabe inganan ni nasida peak,
Jala hurang bidang do kain na ditonun i lao gabe salimut.
21 Ai ro nama Jahowa songon na masa di Dolok Perazim,
Bahenonna ma dos songon na masa di rura na jonok tu Gibeon,+
Asa boi dibahen Ibana akka ulaonna, i ma akka ulaonna na so somal.
Asa dipasaut Ibana akka ulaonna, i ma akka ulaonna na palongang roha.+
22 Saonari unang leas rohamuna,+
Asa unang lam gomos pangikkatmuna i,
Ai nungnga hubege sian Tuan Natumimbul Jahowa Pamimpin ni Akka Tentara i,
Naung ditottuhon Ibana lao pamatehon sude penduduk ni luat i.*+
23 Patinggil hamu ma pinggolmuna jala tangihon ma soarakku,
Parrohahon jala tangihon hamu ma hatakku.
24 Ai ganup ari do partani mambajak tanona?
Torus do disarsari ibana tanona jala dang disabur ibana boni tu tano i?+
25 Ai molo dung dipadosdos ibana tano na dibajak i,
Saburonna do boni ni jintan na birong* dohot jintan na bottar,
Jala suanonna do gandum, sekoi, dohot barli* di ingananna be
27 Ai dang papan na dipakke lao mardege+ dibahen lao manghancurhon jintan na birong,
Jala dang dipakke roda ni padati lao mandege-dege jintan na bottar.
Alai anggo jintan na birong, diattuki do i pakke hau.
Jala jintan na bottar mamakke tukkot.
28 Tikki mardege gandum halak di inganan pardegean,
Torus do i didege-dege ibana sappe lamot?
Daong, dang didege-dege i sappe lamot.+
Tikki dipakke ibana roda ni padati na ditarik hoda lao mardege gandum,
Pastihononna do asa unang sappe hancur gandum i.+