1 Samuel
22 Dung i lao ma si Daud sian i+ jala martabuni ma ibana di Gua Adullam.+ Tikki diboto haha anggina dohot sude keluarga ni bapakna na martabuni ibana disi, ro ma nasida mandapotton ibana. 2 Marroan ma sude halak na susa, na marutang, dohot na marsak mandapotton si Daud. Adong ma hira-hira 400 halak godang ni nasida. Jala si Daud ma na gabe pamimpin ni nasida.
3 Sian i, lao ma si Daud mandapotton raja ni Moab+ tu Mispe. Didok ibana ma tu raja i, “Paloas ma omakku dohot bapakku rap tinggal dohot ho, sahat tu na huboto aha na lao bahenon ni Debata tu au.” 4 Dipasahat si Daud ma nasida tu raja ni Moab. Saleleng di inganan partabunian+ si Daud, disi ma nasida tinggal.
5 Di pudian ni ari, didok Panurirang* Gad+ ma tu si Daud, “Unang be sai di inganan partabunianmon ho. Lao ma ho sian on tu huta ni marga Juda.”+ Dung i, lao ma si Daud sian i tu tombak na di Heret.
6 Diboto si Saul ma didia si Daud dohot akka tentarana martabuni. Di tikki i, di Gibea+ do si Saul. Hundul do ibana huhut maniop tombakna* di toru ni hau tamariska na adong di sada dolok. Jala dihaliangi akka tentarana do ibana. 7 Didok si Saul ma tu akka tentarana i, “Hamu halak Benjamin, tangihon hamu ma au. Dirippu hamu lehonon ni anak ni si Isai i+ tu hamu ladang dohot porlak anggur? Dirippu hamu pillitonna hamu gabe pamimpin ni na sasaribu dohot pamimpin ni na sasaratus?+ 8 Nungnga marsakkap hamu sude mangalo au! Laos so adong sian hamu na paboahon tu au naung mambahen parjanjian anakku tu anak ni si Isai!+ Laos so adong sian hamu na mamikkirhon pakkilalaakku! Jala dang dipaboa hamu tu au, tikki sipsip anakku manogihon parkarejokku mangalo au songon na masa saonari.”
9 Tikki i, disi do si Doeg+ halak Edom i. Ibana do pamimpin ni akka parkarejo ni si Saul na disi. Didok ibana ma tu si Saul,+ “Huida do anak ni si Isai i ro tu Nob manjuppangi si Ahimelek, anak ni si Ahitub.+ 10 Disukkun si Ahimelek do tu Jahowa aha na ikkon sibahenon ni si Daud. Jala dilehon ibana do roti tu si Daud dohot podang ni si Goliat halak Palistim i.”+ 11 Alani i, dijou si Saul ma Malim Ahimelek anak ni si Ahitub i dohot sude malim na sian keluarga ni bapakna na adong di Nob. Jadi ro ma nasida sude mandapotton raja.
12 Didok si Saul ma, “Ale Ahimelek anak ni si Ahitub, tangihon jo hatakkon!” Dialusi si Ahimelek ma, “Olo, hutangihon pe tuan.” 13 Didok si Saul ma, “Boasa diurupi ho anak ni si Isai i mangalo au? Dilehon ho do roti dohot podang tu ibana. Jala disukkun ho do tu Debata aha na lao sibahenonna! Saonari, nungnga dialo ibana au jala naeng ro do ibana marporang mangalo au.” 14 Didok si Ahimelek ma tu raja i, “Setia do si Daud tu ho jala dang adong parkarejom na songon ibana.+ Ai helam+ do ibana ale raja, jala ibana do pamimpin ni pengawalmu. Asing ni i, dipasangap akka halak na di istana do ibana.+ 15 Tutu, husukkun do tu Debata taringot aha na lao sibahenonna, alai dang holan sahali on hubahen songon i tu ibana.+ Jala dang hea ro tu pikkiranku lao mangalo tuan! Unang ma hukum naposomon dohot keluarga ni bapakku. Ai dang huboto manang aha taringot na masa i!”+
16 Alai didok raja i ma, “Ikkon mate do ho+ Ahimelek. Sude keluarga ni bapakmu+ pe ikkon mate do.” 17 Dung i, didok raja i ma tu akka pengawal na jongjong di labbungna, “Pamate hamu ma akka malim ni Jahowa on. Ai nungnga marpihak nasida tu si Daud! Nang pe diboto nasida na lari si Daud sian au, dang dipaboa nasida i tu au!” Alai dang olo akka pengawal ni raja i mambunu akka malim ni Jahowa i. 18 Gabe didok raja ma tu si Doeg+ halak Edom i,+ “Ho ma na pamatehon akka malim i.” Pittor dipamate si Doeg ma nasida. Di ari i, dipamate ibana ma 85 malim.*+ Jala holan sahalakna do na mangulahon i. 19 Lao ma muse ibana tu kota Nob,+ i ma huta ni akka malim i. Dipamate ibana do sude pangisi ni kota i mamakke podang. Dipamate ibana do bawa, borua, dakdanak, poso-poso, lombu, halode, dohot biru-biru na disi.
20 Adong ma sada anak ni si Ahimelek, anak ni si Ahitub, na margoar si Abiatar.+ Lari do ibana tikki i, gabe dang dohot ibana dipamate. Dung i, ro ma ibana mandapotton si Daud. 21 Didok si Abiatar ma tu si Daud, “Nungnga dipamate si Saul be akka malim ni Jahowa.” 22 Didok si Daud ma tu si Abiatar, “Huboto do na lao masa i.+ Ai tikki i, huida do si Doeg halak Edom i disi jala ibana do na paboahon i tu si Saul. Martanggung jawab pe au tu ho, ai alani au do mate sude keluarga ni bapakmu. 23 Alani i, dison ma ho. Unang ho mabiar, aman do ho dison. Manang ise na naeng pamatehon ho, ikkon jolo pamateonna do au.”+