Jeremia
9 Autsugari ma ulukkon mata mual,
Jala matakku gabe paccur ni ilu!+
Mangandungi nama au arian nang borngin
Lao mangandungi bangsokku naung hona bunu i.
2 Autsugari ma adong inganan lao marborngin appunakku di gurun lao tu akka halak na mardalani!
Tinggalhonokku ma bangsokku, lao ma au sian nasida,
Jala punguan ni penghianat do nasida.
3 Nungnga rade dila ni nasida lao margabus,
Dos songon panah naung lekkuk, naung rade lao ditembakkon.
“Holan na manipu do di luat i,+ dang adong halak na setia.
Lam jahat do nasida jala dang diparrohahon nasida Au,”+ ninna Jahowa.
4 “Hamu sude, manat ma ganup halak tu donganmuna,
Unang ma porsea hamu tu keluargamuna.
5 Ganup halak manipu donganna,
Dang adong na makkatahon na sittong.
Dipasomal-somal nasida do dila ni nasida makkatahon gabus,+
Habis do gogo ni nasida holan lao mangulahon na sala.
6 Di tonga-tonga ni akka panipu do nasida* tinggal.
Alani i do dang olo nasida mananda Au,” ninna Jahowa.
7 Alani i songon on ma hata ni Jahowa Pamimpin ni Akka Tentara* i,
8 Makkatahon gabus do dila ni nasida dos songon anak panah na parohon hamatean.
Marhite pamanganna, dihatahon sasahalak do tu donganna taringot hadameon,
Alai anggo di bagasan rohana, na jahat do direncanahon.”
9 Didok Jahowa ma, “Alani sude pangalaho ni nasida i, patut do kan hukumokku nasida?
Patut do kan balosokku pangalaho ni bangso sisongon i?+
10 Hutangisi jala huandungi ma akka dolok,
Huendehon ma ende andung-andung alani inganan panjappalan na di tombak,
Nungnga habis be hona tutung sudena asa unang adong be halak na lewat
Dang tarbege be soara ni binatang na dipiaro.
Nungnga habang be akka pidong, jala nungnga lari be akka binatang buas, nungnga lao be nasida dao.+
11 Bahenokku ma Jerusalem i gabe inganan ni akka batu+ na martimbun-timbun, dohot inganan ni anjing hutan,+
Bahenokku ma tano na di kota Juda tarulang jala dang adong be na mangingani.+
12 Ise ma halak na malo na boi mangattusi on?
Tu ise ma Jahowa makkatai asa ibana muse na paboahon i tu na asing?
Boasa hancur luat on?
Boasa harsang luat on songon gurun?
Gabe so adong nanggo sahalak pe na mamolus sian i?”
13 Dialusi Jahowa ma, “Ai dang dijalo nasida patik naung hulehon i tu nasida. Dang diihutton nasida i jala dang diulahon nasida hatakku.* 14 Gariada marjugul do nasida lao mangihutton lomo ni roha ni nasida sandiri.+ Disomba nasida do akka patung Baal dos songon na niajarhon ni akka ompu ni nasida.+ 15 Alani i didok Jahowa Pamimpin ni Akka Tentara Debata ni Israel i ma, ‘Bahenokku ma bangso on mangallang suan-suanan na paet jala manginum aek na marraccun.+ 16 Bahenokku ma nasida marserak di tonga-tonga ni akka bangso na so ditanda nasida dohot akka ompu ni nasida.+ Parookku ma podang lao mangalele nasida sahat tu na mate nasida sude.’+
17 Songon on do hata ni Jahowa Pamimpin ni Akka Tentara i,
‘Parrohahon hamu ma aha na masa.
Jou hamu ma akka borua na malo mangendehon ende andung-andung,+
Jala pangido hamu ma ro akka borua na malo mangandungi,
18 Asa hatop nasida ro lao mangendehon ende andung-andung di hita,
Asa sai maneteki ilu sian matatta,
Jala maraburan ilu+ sian matatta.
19 Ai nungnga tarbege soara ni andung-andung sian Sion+ na mandok,
“Nungnga dihancurhon be hami!
Nungnga tung marlea hami!
Ai nungnga ditinggalhon hami be luatnami, nungnga diruppakkon nasida be jabunami.”+
20 Ale akka borua, tangihon ma hata ni Jahowa.
Jalo hamu ma hata na kaluar sian pamanganna.
Ajarhon hamu ma ende andung-andung on tu akka borumuna,
Jala ajarhon hamu ma ende andung-andung i+ tu akka donganmuna.
21 Ai dos songon musu, ro do hamatean i sian akka jandelatta.
Nungnga masuk be i sian akka menaratta na marbenteng.
Dibuat nasida do akka dakdanak sian dalan
Jala akka doli-doli sian lapangan.’+
22 Dokkon ma, ‘Songon on do hata ni Jahowa,
“Marserakan ma bakke ni akka jolma dos songon kotoran di atas ni tano,
Dos songon batang ni gandum na baru disabi akka panabi
Dang adong na papunguhon i.”’”+
23 Songon on do hata ni Jahowa,
“Unang ma diasakkon halak na marbisuk habisukonna,+
Unang ma diasakkon halak na gogo hagogoonna,
Jala unang ma diasakkon halak na mora hamoraonna.”+
24 “Alai manang ise na naeng marbalga ni roha, ikkon marbalga ni roha do ibana.
Marbalga ni roha ma ibana ala nungnga adong pangattusionna dohot parbinotoanna taringot tu Au.+
Jala marbalga ni roha ma ibana alani Au, ai Au do Jahowa Debata na patuduhon holong na manoktong,* hasittongan, dohot hatigoran di tano on.+
Akka i do na mambahen las rohakku,”+ ninna Jahowa.
25 Didok Jahowa ma, “Ida ma! Na lao ro ma tikkina, hukumokku ma sude halak na marsunat, alai sasittongna dang marsunat nasida.+ 26 Nasida, i ma halak Mesir,+ halak Juda,+ halak Edom,+ halak Ammon,+ halak Moab+ jala sude halak na tinggal di gurun naung mancukkur jabbangna sappe habis.+ Ai dang marsunat sude bangso i jala sude halak Israel dang paiasson roha ni nasida na jahat i.”+