Panguhum
7 Manogotna i hatop ma dungo si Jerubbaal, i ma si Gidion.+ Rap do ibana dohot akka tentarana. Markemah ma nasida di jonok ni Mata Mual Harod. Di tikki i, markemah do halak Midian di rura ni Dolok More na di sabola utara. 2 Alai didok Jahowa ma tu si Gidion, “Magodangku do tentaramon pakkeonku manaluhon halak Midian.+ Molo talu annon halak Midian, gabe ginjang ma roha ni halak Israel. Dohonon ni nasida ma tu Au, ‘Ai hami do na paluahon hami.’+ 3 Saonari, dok ma tu nasida, ‘Manang ise na mabiar jala na hitir-hitir alani biarna, mulak ma ibana tu jabuna.’”+ Dung i didok si Gidion ma songon i lao manguji nasida. Alani i, mulak ma 22.000 halak jala holan 10.000 halak ma na tinggal.
4 Alai didok Jahowa ma muse tu si Gidion, “Pagodangku dope nasida. Suru ma nasida lao tu mual, asa hupillit* disi dia tentara na boi mandongani ho. Molo hudok, ‘Dohot do on,’ dohot ma ibana mandongani ho. Alai molo hudok, ‘Dang dohot on,’ dang dohot ibana mandongani ho.” 5 Dung i disuru si Gidion ma akka tentara i tu mual.
Didok Jahowa ma tu si Gidion, “Manang ise halak na manginum aek sian tanganna* papulik ma i sian akka halak na manukkap lao manginum aek.” 6 Adong ma 300 halak na minum sian tanganna, jala na asing nai manukkap do lao minum.
7 Didok Jahowa ma muse tu si Gidion, “Paluaokku ma hamu marhite 300 tentara na manginum aek sian tanganna, jala pasahatonku ma halak Midian tu tanganmu.+ Alai suru ma na asing i mulak.” 8 Disuru si Gidion ma sude halak Israel i mulak. Alai dipangido do sipanganon dohot tarompet na sian tanduk i sian nasida. Holan 300 tentara i do na tinggal. Tikki i, markemah do halak Midian di rura na di toru ni nasida.+
9 Di borngin i, didok Jahowa ma tu si Gidion, “Dungo ma ho. Lao ma ho tu perkemahan ni nasida jala marporang ma hamu mangalo nasida. Ai nungnga hupasahat nasida tu tanganmu.+ 10 Alai, molo mabiar do ho lao marporang, lao ma ho rap dohot si Pura pangurupimi tu perkemahan ni nasida. 11 Bege ma na didok nasida. Dung i gabe barani ma ho* mangalo nasida.” Alani i, lao ma si Gidion dohot si Pura pangurupina i tu jonok ni perkemahan ni musu ni nasida.
12 Massai godang do halak Midian, halak Amalek, dohot halak na sian Timur+ di rura i songon godang ni sihapor.* Dang taretong godang ni unta ni nasida+ songon godang ni pasir di topi ni laut. 13 Dung sahat si Gidion disi, dibege ibana ma adong sahalak bawa na paboahon nipina tu donganna. Ninna ma, “Marnipi au. Adong huida sada roti barli* na bulat na marguling tu perkemahan ni halak Midian. Gogo do ditombom roti i kemah i.+ Gabe maruppak ma i jala rata sahat tu tano.” 14 Dung i dialusi donganna i ma, “Podang ni si Gidion+ anak ni si Joas halak Israel i do i. Ai nungnga dipasahat Debata halak Midian dohot sude perkemahanna tu tanganna.”+
15 Dung dibege si Gidion nipi i dohot lapatanna,+ marsomba ma ibana tu Debata. Dung i mulak ma ibana tu perkemahan ni halak Israel. Didok ma, “Borhat ma hita, ai nungnga dipasahat Jahowa perkemahan ni halak Midian tu tanganmuna.” 16 Dibagi ibana ma na 300 tentara i gabe tolu punguan. Dilehon ibana ma tu sude tentara i tarompet na sian tanduk+ dohot gucci na balga na marisi obor. 17 Didok ibana ma tu nasida, “Parrohahon hamu ma na huulahon molo dung jonok au tu perkemahan i, jala ulahon hamu ma songon na hubahen. 18 Molo dung tarbege soara ni tarompettu dohot akka halak na rap dohot au, ombus hamu ma tarompetmuna di sakaliling ni perkemahan i. Jala marsurak ma hamu mandok, ‘Podang ni Jahowa dohot podang ni si Gidion!’”
19 Dung tonga borngin, sahat ma si Gidion rap dohot 100 halak na mandongani ibana di jonok ni perkemahan i. Tikki i, baru margatti dope na manjaga perkemahan i.* Diombus nasida ma tarompet na sian tanduk+ jala diputtarhon ma gucci na balga na di tangan ni nasida.+ 20 Gabe sude ma na tolu punguan i mangombus tarompetna be na sian tanduk i jala mamuttarhon gucci na balga i. Tangan kiri ni nasida mangangkat obor jala tangan kananna maniop tarompet na sian tanduk i. Marsurak ma nasida mandok, “Podang ni Jahowa dohot podang ni si Gidion!” 21 Di tikki i, jongjong do nasida di inganan ni nasida be makkaliangi perkemahan i. Alai marlojongi ma akka tentara ni musu huhut marsurak.+ 22 Torus ma diombus tentara na 300 halak i tarompetna. Dibahen Jahowa ma akka tentara ni musu na di perkemahan i masipamatean mamakke podang.+ Gabe lari ma akka tentara ni musu i sahat tu Bet-sitta, tu Zerera, jala sahat tu topi ni Abel-mehola+ na jonok tu Tabbat.
23 Dipapungu ma akka tentara ni Israel na sian marga Naptali, Aser, dohot sude marga Manasse.+ Jala dilele nasida ma halak Midian. 24 Disuru si Gidion ma halak manjuppangi pangisi ni sude huta di inganan na mardolok-dolok di Epraim, “Turun ma hamu mangalo halak Midian. Lao ma hamu tu Bet-bara dohot tu Sunge Jordan. Ikkon parjolo do hamu sahat sian nasida asa unang boi nasida manaripar sian i.” Dung i marpungu ma sude halak Epraim jala lao ma nasida tu Bet-bara dohot tu Sunge Jordan. 25 Ditakkup nasida do dua pamimpin ni halak Midian, i ma si Oreb dohot si Seb. Dipamate nasida do si Oreb di sada batu na balga, jala digoari ma i Batu Oreb.+ Dipamate nasida do muse si Seb di inganan pamoroan ni anggur. Digoari ma i Inganan Pamoroan Anggur Seb. Torus do dilele nasida halak Midian,+ jala diboan nasida do ulu ni si Oreb dohot si Seb tu si Gidion. Tikki i di jonok ni Sunge Jordan do si Gidion.