Ulaon ni Apostel

20 Dung salpu na gaor i, dijou si Paulus ma akka sisean i. Dipatogu ibana ma nasida jala dipaboa ma na naeng lao nama ibana. Dung i, borhat ma ibana tu Makedonia. 2 Lao ma ibana tu akka huta na disi jala dilehon ibana do akka hata na patoguhon roha ni akka sisean na di huta i. Dung i sahat ma ibana di Junani. 3 Saleleng tolu bulan ma ibana disi. Alai tikki naeng markapal ibana tu Siria, dibege ibana ma naung dibahen halak Jahudi+ rencana lao mambunu ibana. Alani i diputusson ibana ma asa lewat sian Makedonia ibana tikki mulak. 4 Didongani si Sopater anak ni si Pirus na sian Berea do ibana, si Aristarkus+ dohot si Sekundus na sian Tessalonik, si Gayus na sian Derbe, si Timoteus,+ jala si Tikikus+ dohot si Tropimus+ na sian Provinsi Asia. 5 Parjolo do nasida borhat jala dipaima nasida ma hami di Troas. 6 Alai dung salpu Perayaan Roti na So Marragi,+ markapal ma hami sian Pilippi. Dung lima ari di pardalanan, pajuppang ma hami dohot nasida di Troas jala pitu ari ma hami disi.

7 Di ari parjolo di minggu i, tikki marpungu hami lao mangan, mulai ma si Paulus makkatai tu nasida. Jala torus do ibana makkatai sahat tu tonga borngin, ala naeng borhat nama ibana marsogotna i. 8 Godang do lampu dipagalak di kamar parginjang inganannami marpungu i. 9 Adong ma sahalak doli-doli na margoar si Eutikus na hundul di jandela. Tikki makkatai dope si Paulus, mondok-ondok ma ibana laos tarpodom. Gabe madabu ma ibana sian tingkat tolu jala nungnga mate ibana tikki diangkat. 10 Dung i turun ma si Paulus. Manukkap ma ibana di atas ni doli-doli i jala dihaol,+ didok ma, “Unang pola marsak hamu, nungnga mangolu ibana muse.”+ 11 Dung i nakkok ma si Paulus muse tu ginjang jala mulai ma nasida mangan.* Ditorusson ibana ma muse makkatai sahat tu manogotna. Dung i borhat ma ibana. 12 Mangolu do doli-doli i diboan nasida mulak jala massai las do roha ni nasida.

13 Parjolo ma hami nakkok tu kapal jala borhat tu Asos. Alai anggo si Paulus mardalan pat do ro tusi. Sian i ma diboan hami si Paulus markapal songon tudu-tudu na dilehon ibana tu hami. 14 Dung didapotton ibana hami di Asos, rap ma hami markapal jala borhat tu Metilene. 15 Marsogotna i, torus ma hami markapal jala sahat di bariba ni Pulo Kios. Marsogotna i so ma hami satokkin di Samos jala marsogotna i muse sahat ma hami di Miletus. 16 Nungnga didok si Paulus hian asa markapal hami torus jala dang pola maradi di Epesus,+ asa unang pola habis tikki di Provinsi Asia. Ai naeng hatop do ibana sahat di Jerusalem,+ molo boi andorang so Perayaan Pentakosta.

17 Alai sian Miletus, disuru si Paulus ma halak tu Epesus manjou akka sintua na di huria i. 18 Dung sahat nasida, didok si Paulus ma, “Takkas do diboto hamu songon dia ngolukku di tonga-tongamuna mulai sian na sahat au di Provinsi Asia on.+ 19 Mardongan serep ni roha+ dohot ilu-ilu, songon hatoban do au marhobas tu Tuhan* i. Jala godang do hasusaan na ro tu au sian halak Jahudi na jahat. 20 Nang pe songon i, dang hea hutahan dirikku lao paboahon akka na denggan tu hamu. Toktong do huajari hamu di jolo ni godang halak+ dohot sian jabu tu jabu.+ 21 Takkas do hupaboa tu halak Jahudi dohot tu halak Junani na ikkon muba nasida,+ ikkon manomba Debata, jala porsea tu Tuanta Jesus.+ 22 Alai marhite tondi parbadia, nungnga dijujui au lao tu Jerusalem, nang pe dang huboto aha na lao masa tu au disi. 23 Sasittongna di ganup kota, nungnga mulak-ulak dipaboa tu au marhite tondi parbadia na lao dipenjara au jala na lao manaon hasusaan.+ 24 Nang pe songon i dang penting di au ngolukku, asal ma boi huulahon sude ulaonku*+ jala hupasae ulaon naung hujalo sian Tuan Jesus, i ma paboahon barita na uli taringot tu asi ni roha ni Debata na massai balga i.

25 “Nungnga hupaboa be barita Harajaon i tu hamu sude. Alai saonari, huboto do dang na lao idaonmuna be bohikku. 26 Alani i, hudok ma tu hamu sadari on, dang martanggung jawab be au tu parmate ni manang ise pe*+ jala hamu ma na gabe saksina. 27 Ai dang hea hutahan dirikku lao paboahon tu hamu sude lomo ni roha ni Debata.+ 28 Parrohahon hamu ma dirimuna+ dohot sude punguan i. Ai marhite tondi parbadia, nungnga dipillit hamu gabe pengawas di nasida.+ Parmahani hamu ma huria ni Debata,+ ai nungnga ditobus nasida marhite mudar ni Anakna.+ 29 Huboto do, dung lao au ro ma akka serigala na jahat tu tonga-tongamuna.+ Jala kejam do nasida tu punguan i. 30 Jala sian tonga-tongamuna adong ma na mangajarhon ajaran na so sittong, asa gabe mandao akka sisean sian punguan i jala mangihutton nasida.+

31 “Alani i jaga ma hamu. Jala ingot hamu ma, saleleng tolu taon on+ torus do huajari hamu ganup marsada-sada arian nang borngin mardongan ilu-ilu. 32 Saonari pe, hupasahat ma hamu tu Debata dohot tu barita taringot asi ni rohana na massai balga i. Ai barita i do na mambahen hamu togu jala na mambahen hamu mandapot pasu-pasu* rap dohot sude halak na badia.+ 33 Dang hea dipangido rohakku perak manang mas, manang pakkean sian manang ise pe.+ 34 Diboto hamu do, tanganku sandiri do na hupakke lao paradehon na porlu di au+ dohot na porlu di akka halak na rap dohot au. 35 Hupatuduhon do sitiruon tu hamu marhite ringgas karejo songon naung hubahen on,+ ikkon urupanmuna do na gale. Ingot hamu ma hata ni Tuan Jesus na mandok, ‘Umlas do roha ni halak na mangalehon+ sian na manjalo.’”

36 Dung sae didok si Paulus sudena i, marsinggang ma ibana rap dohot nasida sude jala martangiang. 37 Tangis ma nasida sude, dihaol, jala diumma nasida ma si Paulus. 38 Massai lungun ma roha ni nasida tarlumobi ala didok si Paulus na so idaon ni nasida be ibana.+ Dung i ditaruhon nasida ma ibana tu kapal.