Panguhum
14 Dung i lao ma si Simson tu Timna, jala diida ibana ma disi sahalak borua Palistim.* 2 Mulak ma ibana sian i, jala didok ma tu omakna dohot tu bapakna, “Adong huida sahalak borua Palistim di Timna. Lomo rohakku tu ibana. Alap ma ibana gabe istrikku.” 3 Alai didok omakna dohot bapakna ma, “Na so boi be luluanmu borua sian keluargatta dohot sian bangsotta?+ Boasa pola ikkon buatonmu istrim sian halak Palistim na so marsunat i?” Didok si Simson ma tu bapakna, “Ikkon ibana do di au, ai tu ibana do lomo rohakku.” 4 Dang diboto omakna dohot bapakna, Jahowa do na manogu-nogu si Simson mambahen keputusan sisongon i. Ai dilului Debata do tikki na pas lao mangalo halak Palistim. Alana dirajai halak Palistim do halak Israel di tikki i.+
5 Alani i, borhat ma si Simson, omakna, dohot bapakna tu Timna. Dung sahat ibana di ladang anggur na di Timna, ro ma sada singa* na marauang mandapotton ibana. 6 Dung i dibahen Jahowa ma lam gogo si Simson marhite tondi parbadiana.+ Gabe diribak dua ibana ma singa i songon na mangaribakkon anak ni hambing. Holan tanganna do dipakke ibana mangaribakkon i. Alai dang dipaboa ibana na masa i tu omakna dohot tu bapakna. 7 Dung i lao ma si Simson jala makkatai ma ibana tu borua i. Ai lomo dope rohana tu borua i.+
8 Tikki naeng mulak si Simson mamboan borua i tu jabuna,+ lao ma ibana muse mangida bakke ni singa i. Diida ibana ma nungnga godang loba* dohot madu di bakke ni singa i. 9 Dibuat ibana ma madu i pakke tanganna jala diallang ma i huhut mardalan. Tikki pajuppang ibana tu omakna dohot bapakna, dilehon ma deba madu i tu nasida jala diallang nasida ma i. Alai dang dipaboa si Simson na sian bakke ni singa do dibuat ibana madu i.
10 Dijuppangi bapak ni si Simson ma borua i, jala dibahen si Simson ma pesta disi. Ai songon i do hasomalan ni akka doli-doli di tikki i. 11 Dung sahat si Simson disi, dilehon ma tu ibana 30 doli-doli na gabe pandonganina. 12 Didok si Simson ma tu nasida, “Adong hubahen teka-teki. Molo boi dialusi hamu i di bagasan pitu ari on andorang so salpu dope pesta on, lehonokku ma tu hamu 30 abit linen dohot 30 pasang pakkean. 13 Alai molo dang boi dialusi hamu, ikkon lehononmuna ma tu au 30 abit linen dohot 30 pasang pakkean.” Didok nasida ma, “Paboa ma teka-tekimi, asa hubege hami.” 14 Didok ibana ma tu nasida,
“Sian na mangallang, kaluar ma sipanganon,
Jala sian na gogo, kaluar ma na tonggi.”+
Nungnga salpu tolu ari, alai dang boi dope dialusi nasida. 15 Di ari na paopatton, didok nasida ma tu istri ni si Simson, “Elek ma jolo suamimi,+ asa dipaboa ibana alus ni teka-teki i. Molo dang, tutungonnami nama hamu sude na adong di rumah tangga ni bapakmu. Ai na lao mangarampok hami do hamu umbahen na digokkon hamu hami tuson?” 16 Sai tangis ma istri ni si Simson di jolona. Huhut didok, “Dang holong hape roham tu au. Sogo do roham tu au.+ Dibahen ho teka-teki tu bangsokku, alai dang dipaboa ho alusna tu au.” Didok si Simson ma tu ibana, “Haru tu omakku dohot tu bapakku dang hupaboa! Boasa ma ikkon paboaokku tu ho?” 17 Alai, sai tangis ma ibana di jolo ni si Simson sahat tu ari na papituhon. Ujungna di ari na papituhon, dipaboa si Simson ma tu ibana, ai sai dipaksa ibana do si Simson paboahon alusna. Dung i dipaboa istrina i ma alus ni teka-teki i tu bangsona.+ 18 Alani i, di ari na papituhon andorang so bonom mataniari, didok akka halak na di kota i ma tu si Simson,
“Aha ma na uttonggi sian madu?
Jala aha ma na umgogo sian singa?”+
Didok si Simson ma tu nasida,
19 Dibahen Jahowa ma lam gogo si Simson marhite tondi parbadiana.+ Lao ma ibana tu Askelon+ jala dipamate ibana ma 30 bawa disi. Dibuat ibana ma pakkean ni nasida, jala dilehon ibana ma i tu akka halak na mangalusi teka-tekina.+ Dung i mulak ma ibana tu jabu ni bapakna mardongan muruk.
20 Di pudian ni ari dilehon ma istri ni si Simson+ tu bawa na asing, i ma sahalak sian pandongani ni si Simson hian.+