Panguhum
16 Di sada tikki, lao ma si Simson tu Gasa. Diida ibana ma disi sahalak boru-boru na so hasea, laos masuk ma ibana tu jabu ni boru-boru i. 2 Dung i adong ma na paboahon tu halak Gasa, “Nungnga ro si Simson tuson.” Dikalilingi nasida ma inganan i jala martabuni ma nasida saborngin manipat di gerbang ni kota. Dang adong diulahon nasida manang aha di borngin i, ai didok nasida do, “Dung torang pe ari asa tapamate ibana.”
3 Alai sahat tu tonga borngin do si Simson modom disi. Dungo ma ibana di tonga borngin i, diuppat ibana ma pintu gerbang ni kota i rap dohot tiangna na dua i dohot sordakna. Dipundak ibana ma i jala diboan tu pussu ni dolok na di jolo ni Hebron.
4 Dung piga-piga leleng, holong ma roha ni si Simson tu sahalak borua na margoar si Delila.+ Ibana tinggal di Rura* Sorek. 5 Dung i ro ma akka pamimpin ni halak Palistim mandapotton borua i. Didok nasida ma, “Elek ma ibana+ jala sukkun ma aha na mambahen ibana gabe massai gogo, asa boi ikkatonnami jala taluhononnami ibana. Ganup halak pe sian hami mangalehon 1.100 hepeng perak tu ho.”
6 Dung i didok si Delila ma tu si Simson, “Paboa ma jo tu au, boasa massai gogo ho? Aha do na boi pakkeon lao manali jala manaluhon ho?” 7 Didok si Simson ma, “Molo diikkat ho au mamakke tali ni panah na baru,* gabe gale ma au songon na asing.” 8 Dilehon akka pamimpin ni halak Palistim i ma pitu tali ni panah na baru tu si Delila. Jala dipakke si Delila ma i mangikkat si Simson. 9 Dung i martabuni ma halak Palistim di sada kamar, jala didok si Delila ma, “Nungnga ro halak Palistim Simson!” Digotap si Simson ma tali i, songon manggotap tali rami naung tartutung.+ Jala dang diboto nasida boasa massai gogo ibana.
10 Didok si Delila ma tu si Simson, “Nungnga dioto-otoi* ho au, jala digabusi ho au. Saonari, paboa ma jo tu au, aha do na boi pakkeon manali ho?” 11 Didok si Simson ma tu si Delila, “Molo adong na mangikkat au mamakke tali na baru, na so hea dope dipakke, gabe gale ma au songon na asing.” 12 Alani i, dibuat si Delila ma akka tali na baru jala dipakke ma i mangikkat si Simson. Didok si Delila ma, “Nungnga ro halak Palistim Simson!” (Tikki i, martabuni do halak Palistim di sada kamar.) Digotap si Simson ma tali i songon na manggotappon bonang.+
13 Didok si Delila ma tu si Simson, “Sai dioto-otoi ho do au jala sai digabusi ho do au.+ Paboa ma jo tu au, aha do na boi pakkeon manali ho?” Didok si Simson ma tu ibana, “Dandan* ma obukku na pitu kepang i mamakke bonang tonun.” 14 Dibahen si Delila ma songon i jala dipagomos ma i dohot hau-hau. Dung i didok ibana ma, “Nungnga ro halak Palistim Simson!” Dungo ma si Simson, dipalua ibana ma hau-hau i dohot bonang tonun i sian obukna.
15 Gabe didok si Delila ma tu ibana, “Sai didok ho do holong roham tu au,+ hape dang tutu holong roham tu au. Nungnga tolu hali au dioto-otoi ho jala laos so dipaboa ho do tu au boasa gogo hian ho.”+ 16 Alai ganup ari do sai mardandi si Delila jala sai dipaksa ibana do si Simson paboahon i. Alani i, dang tahan be si Simson.+ 17 Ujungna, dipaboa si Simson ma sude na di rohana tu si Delila. Didok ma, “Dang hea digusting obukku, ai nungnga gabe Nasir* au tu Debata mulai sian tubu.*+ Molo digusting obukku, mago ma gogokku. Gabe gale ma au songon na asing.”
18 Dung pos roha ni si Delila naung dipaboa si Simson sude na di rohana, pittor dijou ibana ma akka pamimpin ni halak Palistim.+ Didok ibana ma, “Ro ma hamu saonari. Ai nungnga dipaboa si Simson be tu au sude na di rohana.” Dung i ro ma akka pamimpin ni halak Palistim i, laos diboan nasida do hepeng. 19 Dibahen si Delila ma si Simson modom di abinganna. Dukkon i, dijou si Delila ma halak manggusting obuk ni si Simson na pitu kepang i. Gabe boi ma dirajai si Delila ibana, ai nungnga mago gogona. 20 Didok si Delila ma, “Nungnga ro halak Palistim Simson!” Dungo ma si Simson. Dirippu ibana do na boi ibana lari jala malua songon tikki naung salpu i.+ Hape dang diboto ibana, nungnga ditadikkon Jahowa be ibana. 21 Ditakkup halak Palistim ma ibana jala dipulsikkon ma duassa matana. Diboan nasida ma ibana tu Gasa. Diikkat ma ibana dohot dua ratte na sian tombaga jala gabe panggiling ni gandum ma ibana di penjara. 22 Alai lam ganjang ma muse obukna i.+
23 Dung i, marpungu ma akka pamimpin ni halak Palistim. Marpesta ma nasida jala dilehon nasida ma godang pelean tu Dagon,+ debata ni nasida. Didok nasida ma, “Nungnga dipasahat debatanta be musutta tu hita, i ma si Simson!” 24 Tikki diida nasida ibana,* dipuji nasida ma debata ni nasida jala didok ma, “Nungnga dipasahat debata be musutta tu hita. Ai ibana do na manegai hutatta+ jala na mambunu godang donganta.”+
25 Las hian ma roha ni nasida. Didok nasida ma, “Boan ma si Simson tuson, asa taparekkeli ibana.” Diboan nasida ma si Simson sian penjara asa diparekkeli nasida ibana. Dipajongjong nasida ma ibana di holang-kolang ni akka tiang. 26 Didok si Simson ma tu dakdanak bawa na manogu ibana, “Togu jo au, asa boi hutiop akka tiang i jala mangussande tusi.” 27 (Tikki i, godang do jolma disi, bawa dohot borua. Sude pamimpin ni halak Palistim disi. Jala adong hira-hira 3.000 halak di atap na mangida jala na mamarekkeli si Simson.)
28 Dung i didok si Simson+ ma tu Jahowa, “Ale Jahowa Tuan Natumimbul, ingot ma au. Bahen ma au gogo,+ holan sahali on pe. Ale Debata, loas ma au mambalos halak Palistim on, nanggo apala balos ni sada sian matakkon.”+
29 Dijama si Simson ma dua tiang na di tonga-tonga ni bangunan i. Tangan kananna manjama sada tiang jala tangan kirina manjama tiang na sada nai. 30 Didok si Simson ma, “Lok ma mate au dohot halak Palistim on!” Dung i dionjar ibana ma akka tiang i sian nasa gogona. Gabe ruppak ma bangunan i manipa akka pamimpin dohot sude halak na disi.+ Alani i, unggodang ma na dipamate ibana tikki di parmatena i sian na dipamate ibana saleleng mangolu ibana.+
31 Ro ma akka haha anggina dohot sude keluarga ni bapakna mambuat bakkena. Diboan ma bakkena i jala dikuburhon di kuburan ni bapakna si Manoa,+ na di holang-kolang ni Zora+ dohot Estaol. Saleleng 20 taon ma si Simson gabe panguhum ni halak Israel.+