4 Musa
3 Akka on ma pinoppar ni si Aron dohot si Musa tikki na makkatai Jahowa tu si Musa di Dolok Sinai.+ 2 Akka on ma anak ni si Aron: siakkanganna si Nadab, dung i si Abihu,+ si Eleasar,+ dohot si Itamar.+ 3 Akka i ma anak ni si Aron. Nasida do na dipillit* jala na dilantik lao marhobas gabe malim.+ 4 Alai nungnga mate si Nadab dohot si Abihu di jolo ni Jahowa, jala dang adong anak ni nasida. Ai tikki di Gurun Sinai, dipelehon nasida do pelean di jolo ni Jahowa, alai dang diihutton nasida tudu-tudu songon na didok di patik tikki mangalehon pelean i.+ Molo si Eleasar+ dohot si Itamar,+ toktong do marhobas gabe malim rap dohot si Aron bapak ni nasida.
5 Didok Jahowa ma muse tu si Musa, 6 “Suru ma marga Lepi i+ ro, asa jongjong nasida di jolo ni si Aron malim i. Nasida ma na lao mangurupi+ si Aron. 7 Ikkon ulahonon ni nasida do tanggung jawab ni nasida tu si Aron dohot tu sude halak Israel i di jolo ni kemah parpunguan. Ikkon diulahon nasida do akka ulaon na di tabernakel. 8 Nasida ma na ikkon mangurus sude peralatan+ ni kemah parpunguan i. Jala ikkon diulahon nasida do tanggung jawab ni nasida tu halak Israel i, marhite mangulahon akka ulaon na di tabernakel.+ 9 Papulik ma halak Lepi sian halak Israel. Ai nasida do na dipillit lao mangurupi si Aron dohot akka anakna.+ 10 Lantik ma si Aron dohot akka anakna lao mangulahon tugas ni akka malim.+ Manang ise halak na asing* na ro tu labbung ni inganan na badia i, ikkon dipamate do ibana.”+
11 Dung i didok Jahowa ma muse tu si Musa, 12 “Hupillit do halak Lepi sian tonga-tonga ni halak Israel, lao gabe gatti ni sude anak siakkangan* ni halak Israel.+ Alani i, gabe appunakku ma halak Lepi. 13 Appunakku do sude akka na parjolo tubu.+ Tikki hupamate sude anak siakkangan ni halak Mesir,+ dohot anak ni binatang ni nasida na parjolo tubu, gabe hupapulik* do di Au anak siakkangan ni halak Israel, dohot anak ni binatang ni nasida na parjolo tubu.+ Appunakku do i sudena. Au do Jahowa.”
14 Dung i, makkatai ma muse Jahowa dohot si Musa di Gurun Sinai.+ Didok ma, 15 “Bahen ma daftar ni akka pinoppar ni si Lepi mangihutton marga dohot keluarga na sian pihak ni bapak ni nasida. Daftar ma mulai sian na marumur sabulan tu ginjang.”+ 16 Didaftar si Musa ma nasida songon na diparettahon Jahowa. 17 Akka on ma goar ni anak ni si Lepi: si Gerson, si Kohat, dohot si Merari.+
18 Akka anak ni si Gerson, i ma si Libni dohot si Simei.+ Goar ni nasida ma na dipakke gabe goar ni keluarga ni pinoppar ni nasida.
19 Akka anak ni si Kohat, i ma si Amram, si Ishar, si Hebron, dohot si Usiel.+ Goar ni nasida ma na dipakke gabe goar ni keluarga ni pinoppar ni nasida.
20 Akka anak ni si Merari, i ma si Mahli+ dohot si Musi.+ Goar ni nasida ma na dipakke gabe goar ni keluarga ni pinoppar ni nasida.
Akka i ma keluarga ni halak Lepi mangihutton keluarga ni pihak bapak ni nasida.
21 Sian pinoppar ni si Gerson, adong keluarga Libni+ dohot keluarga Simei. Nasida ma akka keluarga na sian pinoppar ni si Gerson. 22 Godang ni bawa na didaftar mulai umur sabulan tu ginjang, i ma 7.500 halak.+ 23 Sude keluarga na sian pinoppar ni si Gerson markemah di pudi ni tabernakel,+ na di sabola barat. 24 Pamimpin ni keluarga pihak bapak na sian pinoppar ni si Gerson, i ma si Eliasap anak ni si Lael. 25 Tanggung jawab ni akka pinoppar ni si Gerson+ di kemah parpunguan, i ma mangurus tabernakel, kain kemah+ dohot sude panutupna,+ tire*+ na di pintu ni kemah parpunguan, 26 tire pembatas+ na di alaman, tire+ na di gerbang ni alaman na di sakaliling ni tabernakel dohot langgatan, akka tali ni kemah i, dohot sude akka ulaon na hombar tusi.
27 Sian pinoppar ni si Kohat, adong keluarga Amram, keluarga Ishar, keluarga Hebron, dohot keluarga Usiel. Nasida ma akka keluarga na sian pinoppar ni si Kohat.+ 28 Godang ni bawa na didaftar na marumur sabulan tu ginjang, i ma 8.600 halak. Nasida ma na martanggung jawab mangurus inganan na badia.+ 29 Sude keluarga na sian pinoppar ni si Kohat markemah di sabola selatan ni tabernakel.+ 30 Pamimpin ni keluarga pihak bapak na sian pinoppar ni si Kohat, i ma si Elisapan anak ni si Usiel.+ 31 Martanggung jawab do nasida lao mangurus poti inganan ni Patik,+ meja,+ inganan ni lampu,+ langgatan,+ akka peralatan+ na dipakke lao marhobas di inganan na badia, tire,*+ dohot sude ulaon na hombar tusi.+
32 Pamimpin ni halak Lepi, i ma si Eleasar+ anak ni si Aron malim i. Ibana ma na mangatur sude na martugas lao mangurus inganan na badia i.
33 Sian pinoppar ni si Merari, adong keluarga Mahli dohot keluarga Musi. Nasida ma akka keluarga na sian pinoppar ni si Merari.+ 34 Godang ni bawa na didaftar mulai umur sabulan tu ginjang, i ma 6.200 halak.+ 35 Pamimpin ni keluarga pihak bapak na sian pinoppar ni si Merari, i ma si Zuriel anak ni si Abihail. Sude keluarga na sian pinoppar ni si Merari markemah di sabola utara ni tabernakel.+ 36 Martanggung jawab do akka pinoppar ni si Merari lao mangurus sude rangka+ ni tabernakel, akka palangna,+ akka tiangna,+ alasna na marlubang, sude peralatanna,+ dohot sude ulaon na hombar tusi.+ 37 Jala nasida do muse na martanggung jawab lao mangurus akka tiang na adong di sakaliling ni alaman ni tabernakel i, rap dohot akka alasna na marlubang,+ patokna, dohot akka tali ni kemah i.
38 Si Musa, si Aron dohot akka anakna ma na markemah di jolo ni tabernakel na di sabola timur, doppak parbissar ni mataniari. Nasida ma na martanggung jawab mangurus inganan na badia i, lao manggattihon tugas ni halak Israel. Manang ise halak na asing* na ro tu labbung ni inganan na badia i, ikkon dipamate do ibana.+
39 Didaftarhon si Musa dohot si Aron ma sude bawa na sian marga Lepi na marumur sabulan tu ginjang songon paretta ni Jahowa. Didaftar do nasida mangihutton keluarga ni nasida. Godang ni nasida, i ma 22.000 halak.
40 Dung i didok Jahowa ma tu si Musa, “Daftar ma sude anak siakkangan ni halak Israel mulai sian na marumur sabulan tu ginjang.+ Etong ma sadia godang nasida jala bahen ma daftar ni akka goar ni nasida. 41 Dung i, papulik ma sude halak Lepi i lao di Au gatti ni anak siakkangan ni halak Israel.+ Jala papulik ma muse sude anak ni binatang ni halak Lepi na parjolo tubu, gatti ni anak ni binatang ni halak Israel na parjolo tubu.+ Ai Au do Jahowa.” 42 Dung i, didaftar si Musa ma sude anak siakkangan ni halak Israel. Ai songon i do na diparettahon Jahowa tu ibana. 43 Godang ni anak siakkangan ni halak Israel na didaftar goarna, na marumur sabulan tu ginjang, i ma 22.273 halak.
44 Dung i didok Jahowa ma tu si Musa, 45 “Papulik ma sude halak Lepi i gatti ni anak siakkangan ni halak Israel. Jala papulik ma sude anak ni binatang ni halak Lepi na parjolo tubu, gatti ni anak ni binatang ni halak Israel na parjolo tubu. Ai appunakku do halak Lepi i, Au do Jahowa. 46 Unggodang do anak siakkangan ni halak Israel sian halak Lepi.+ Unggodang do halak Israel i 273 halak. Alani i, lao manobus nasida,+ 47 ikkon papunguonmu ma lima sekel* lao gabe tobus ni sahalak.+ Jala sekel na dipakke mangihutton ukkuran sekel di inganan na badia.* Dos tu 20 gera* ma sada sekel.+ 48 Lehon ma hepeng i tu si Aron dohot tu akka anakna. Hepeng i ma na gabe tobus ni na 273 halak i.” 49 Jadi dipapungu si Musa ma hepeng i lao manobus na 273 halak i. 50 Dijalo ibana ma hepeng sian akka anak siakkangan ni halak Israel i. Godangna 1.365 sekel mangihutton ukkuran sekel na dipakke di inganan na badia. 51 Dung i dilehon si Musa ma hepeng tobusan i tu si Aron dohot tu akka anakna, songon na nidok ni Jahowa i. Ai songon i do paretta ni Jahowa tu si Musa.