Hesekiel

40 Di mula ni taon na paduapulu limahon dung di luat ni musu hami,+ i ma di taon na pasappulu opatton dung ditaluhon kota Jerusalem,+ di ari na pasappuluhon di bulan na parjolo, huhilala ma huaso ni Jahowa di ari i. Diboan Ibana ma au tu kota i.+ 2 Diboan ma au tu luat ni halak Israel marhite parnidaan na sian Debata. Dibahen Ibana ma jongjong au di sada dolok na massai timbo.+ Sian i, huida ma adong na songon kota di sabola selatan.

3 Tikki diboan Ibana au tusi, huida ma adong sahalak bawa na marhillong songon tombaga.+ Jongjong do bawa i di gerbang. Ditiop ibana do tali na sian linen dohot tukkot pangukkur.*+ 4 Didok bawa i ma tu au, “Ale anak ni jolma, manat ma parrohahon jala tangihon ma denggan. Parrohahon ma sude na hupatudu tu ho. Ai alani i do ho umbahen na huboan tuson. Jala paboa ma sude na niidami tu halak Israel.”+

5 Huida ma adong tembok di sakaliling ni bagas joro* i. Ditiop bawa i ma sada tukkot pangukkur na ganjangna onom asta (lobi do sabidang ni talapak ni tangan ganjang ni ganup sada asta).* Mulai ma diukkur ibana tembok i. Tobal ni tembok i nasa ganjang ni tukkot i. Jala timbo ni tembok i nasa ganjang ni tukkot i.

6 Dung i lao ma ibana tu gerbang na menghadap sabola timur.+ Nakkok ma ibana tu tanggana i. Diukkur ibana ma bidang ni ruangan na di labbung ni pintu masuk i. Bidangna sada tukkot. Jala bidang ni ruangan na di labbung ni pintu na sada nai pe sada tukkot. 7 Ganjang ni ganup ruangan ni panjaga,+ i ma sada tukkot. Jarak ni sada ruangan tu ruangan na sada nai, i ma lima asta. Adong do muse ruangan ni pintu masuk na di sapping ni terras ni gerbang na menghadap tu bagas joro. Bidangna sada tukkot.

8 Diukkur ibana ma muse terras ni gerbang na menghadap tu bagas joro, bidangna sada tukkot. 9 Dung i diukkur ibana ma muse ganjang ni terras i, ganjangna ualu asta. Diukkur ibana ma muse akka tiang na di sapping ni terras i, ukkuranna dua asta. Terras ni gerbang i menghadap tu bagas joro.

10 Adong do tolu ruangan di sabola kanan ni gerbang na di sabola timur i jala tolu nai di sabola kiri. Sarupa do ukkuran ni ganup ruangan i. Sarupa do muse ukkuran ni akka tiang na di sabola kiri dohot na di sabola kanan ni gerbang i.

11 Dung i diukkur ibana ma muse bidang ni ruangan na di labbung ni gerbang i. Bidangna di bagasan 10 asta jala bidangna sian luar 13 asta.

12 Ukkuran ni ganup ruangan ni panjaga na di sabola kiri dohot na di sabola kanan ni gerbang i, i ma onom asta. Di jolo ni ganup ruangan i, adong do muse ruangan sada asta nai, dibahen do pagar ni i.

13 Diukkur ibana ma muse gerbang i sian atap ni ruangan panjaga na di sabola kiri* tu atap ni ruangan panjaga na di sabola kanan, bidangna 25 asta. Marsiadop-adopan do pintu masuk ni ruangan na di sabola kiri tu pintu masuk ni ruangan na di sabola kanan.+ 14 Dung i diukkur ibana ma akka tiang na di sapping ni gerbang i, timbona 60 asta. Diukkur ibana do muse akka tiang na di sapping ni gerbang na di sakaliling ni alaman. 15 Mulai sian bagian jolo ni pintu masuk i sahat tu bagian jolo ni terras ni pintu masuk na menghadap tu bagas joro, ganjangna 50 asta.

16 Adong do jandela di akka ruangan ni panjaga dohot akka tiang na di sabola kiri dohot kanan ni gerbang i. Dang sarupa ukkuran ni kusen+ ni jandela i. Umbalga do na di bagasan sian na di luar. Adong do muse jandela di sabola kiri dohot di sabola kanan ni terras i. Jala diukir do gambar ni hau palem+ di akka tiang i.

17 Diboan ibana ma au muse tu alaman na di luar ni bagas joro. Huida ma adong 30 ruang makan.*+ Dibangun do akka ruangan i di atas ni lante na dibahen di sakaliling ni alaman i. 18 Bidang ni lante na di sapping ni gerbang i sarupa do tu ganjang ni gerbang i. On ma lante partoru.

19 Diukkur ibana ma sadia ganjang* holang-kolang ni jolo ni gerbang partoru tu jolo ni gerbang parginjang na di alaman na di bagasan. Ganjangna 100 asta. Songon i do muse ganjangna molo diukkur sian gerbang na di sabola timur dohot na di sabola utara.

20 Adong do gerbang di alaman luar ni bagas joro i na menghadap tu utara. Diukkur ibana ma ganjang dohot bidang ni gerbang i. 21 Adong do tolu ruangan ni panjaga di sabola kiri dohot di sabola kanan ni gerbang i. Sarupa do ukkuran ni akka tiangna dohot terrasna tu ukkuran ni tiang dohot terras na di gerbang na parjolo i. Ganjangna 50 asta jala bidangna 25 asta. 22 Ukkuran ni jandelana, terrasna, dohot gambar ni hau palemna,+ sarupa tu ukkuran na adong di gerbang na di sabola timur. Ikkon jolo dinakkohi jolma do pitu anak ni tanggana i asa boi masuk tu gerbang i. Jala adong do terras di jolo ni tangga i.

23 Adong do gerbang di alaman na di bagasan i. Gerbang i adong di bariba ni gerbang na di sabola utara. Gerbang na asing adong di bariba ni gerbang sabola timur. Diukkur ibana ma sadia ganjang holang-kolang ni gerbang na sada tu gerbang na di baribana, ganjangna 100 asta.

24 Dung i diboan ibana ma au tu sabola selatan. Huida ma adong sada gerbang di sabola selatan i.+ Diukkur ibana ma akka tiang dohot terrasna. Sarupa do ukkuranna tu akka na adong di gerbang na asing i. 25 Adong do jandela di sabola kiri dohot di sabola kanan ni gerbang i, songon i nang di terrasna i. Sarupa do akka jandelana tu akka jandela na di gerbang na asing. Ganjang ni gerbang i 50 asta jala bidangna 25 asta. 26 Adong do pitu anak ni tangga lao tu gerbang i+ jala adong do terras di jolona. Adong do gambar ni hau palem di akka tiang na di sabola kiri dohot na di sabola kanan ni terras i.

27 Adong do gerbang na menghadap tu sabola selatan di alaman na di bagasan i. Diukkur ibana ma sadia ganjang holang-kolang ni gerbang i tu gerbang na di sabola selatan. Ganjangna 100 asta. 28 Diboan ibana ma au masuk tu alaman na di bagasan. Mardalan ma hami sian gerbang na di selatan i. Sarupa do ukkuranna tu ukkuran ni gerbang na asing. 29 Sarupa do ukkuran ni akka ruangan panjagana, akka tiangna, dohot terrasna songon na asing. Adong do akka jandela di sabola kiri dohot di sabola kanan ni gerbang i, dohot di terrasna. Ganjang ni gerbang i 50 asta jala bidangna 25 asta.+ 30 Adong do terras ni sude gerbang na di alaman na di bagasan i. Ganjangna 25 asta jala bidangna 5 asta. 31 Akka terrasna i menghadap tu alaman luar. Jala adong do gambar ni hau palem di akka tiang+ na di sabola kiri dohot di sabola kanan ni terras i. Adong ualu anak ni tangga na ikkon dinakkohi tu gerbang i.+

32 Dung i diboan ibana ma au tu alaman na di bagasan i sian gerbang na di sabola timur. Diukkur ibana ma gerbangna i, jala sarupa do ukkuranna tu na asing. 33 Sarupa do ukkuran ni akka ruangan panjagana, akka tiangna, dohot terrasna songon na asing. Adong do akka jandela di sabola kiri dohot di sabola kanan ni gerbang i, dohot di terrasna. Ganjang ni gerbang i 50 asta jala bidangna 25 asta. 34 Akka terrasna i menghadap tu alaman luar. Jala adong do gambar ni hau palem di akka tiang na di sabola kiri dohot di sabola kanan ni terras i. Adong ualu anak ni tangga lao dinakkohi tu gerbang i.

35 Dung i diboan ibana ma au masuk tu gerbang na di sabola utara.+ Diukkur ibana ma gerbang i, jala sarupa do ukkuranna tu na asing. 36 Sarupa do ukkuran ni akka ruangan panjagana, akka tiangna, dohot terrasna songon na asing. Adong do akka jandela di sabola kiri dohot di sabola kanan ni gerbang i. Ganjang ni gerbang i 50 asta jala bidangna 25 asta. 37 Akka tiangna menghadap tu alaman luar. Jala adong do gambar ni hau palem di akka tiang na di sabola kiri dohot di sabola kanan ni gerbang i. Adong ualu anak ni tangga lao dinakkohi tu gerbang i.

38 Adong do ruang makan di labbung ni akka tiang na di sabola kiri dohot kanan ni gerbang i. Adong do pintu masukna. Disi do disussi+ nasida akka na lao dilehon gabe pelean situtungon.

39 Adong do dua meja di sabola kiri ni terras ni gerbang i, jala dua nai muse di sabola kananna. Di meja i do diseat pelean situtungon,+ pelean hasesaan ni dosa,+ dohot pelean hasalaan.+ 40 Di dalan lao nakkok tu gerbang sabola utara, adong do dua meja di jolo ni pintu masukna i. Jala adong do dua meja di bagasan, di terras ni gerbang i. 41 Opat ma meja i di luar ni gerbang, jala opat nai di terras ni gerbang i. Ualu ma sude meja i. Disi do diseat akka binatang na lao dipelehon. 42 Opat meja dipakke gabe inganan maneat binatang na lao dibahen tu pelean situtungon. Sian batu na dipahat do dibahen meja i. Ganjang ni akka meja i sada satonga asta. Bidangna sada satonga asta, jala timbona sada asta. Adong do dibahen di akka meja i alat-alat lao maneat binatang na tu pelean situtungon dohot tu pelean na asing. 43 Sude jagal na lao dipelehon i dipeakkon di atas ni meja i. Adong do akka rak di sakaliling ni dinding ni ruangan i, ukkuranna sabidang talapak ni tangan.

44 Di luar ni gerbang na di bagasan i, adong do akka ruang makan na diparade tu akka parende.+ Akka ruangan i adong di alaman na di bagasan, na di labbung ni gerbang na di sabola utara na menghadap tu selatan. Di labbung ni gerbang na di sabola timur, adong do ruang makan. Ruangan i menghadap tu sabola utara.

45 Didok ibana ma muse tu au, “Ruang makan na menghadap tu sabola selatan i, diparade tu akka malim na martanggung jawab tu ulaon na di bagas joro.+ 46 Ruang makan na menghadap tu sabola utara i, diparade tu akka malim na martanggung jawab tu ulaon na di langgatan.+ Pinoppar ni si Sadok+ do nasida. Nasida do akka halak Lepi na ditugasson lao tu jolo ni Jahowa jala na marhobas tu Ibana.”+

47 Dung i diukkur ibana ma alaman na di bagasan i. Persegi do bentuk ni alaman i. Ganjangna 100 asta, jala bidangna 100 asta. Di jolo ni bagas joro i adong langgatan.

48 Dung i diboan ibana ma au tu bagasan terras ni bagas joro i.+ Diukkur ibana ma akka tiang na bolon di sapping ni terras i. Ganjangna lima asta, jala bidangna tolu asta. Sada ma i di sabola kiri jala sada nai di sabola kanan.

49 Ganjang ni terras i 20 asta jala bidangna 11* asta. Ikkon naik sian tangga ni bagas joro i do halak asa boi masuk tusi. Adong do muse akka tiang di labbung ni tiang na bolon i, sada di sabola kiri jala sada nai di sabola kanan.+