4 Musa
9 Di bulan na parjolo+ di taon na paduahon, dung kaluar halak Israel sian Mesir, makkatai ma muse Jahowa tu si Musa di Gurun Sinai. Didok ma, 2 “Ikkon diparade halak Israel do pelean Paska+ di tikki naung ditottuhon.+ 3 Diparade ma i dung bonom mataniari* di ari na pasappulu opatton di bulan on. Ai di tikki i do ari na ditottuhon i. Ikkon diparade do i mangihutton aturan dohot cara naung ditottuhon.”+
4 Alani i, dipaboa si Musa ma tu halak Israel asa diparade pelean Paska. 5 Diparade nasida ma pelean Paska i di ari na pasappulu opatton di bulan na parjolo dung bonom mataniari.* Diparade nasida ma pelean i di Gurun Sinai. Diulahon halak Israel do i dos songon na diparettahon Jahowa tu si Musa.
6 Alai, adong ma piga-piga halak na ramun* ala dijama bakke ni jolma.+ Alani i, dang boi diparade nasida pelean Paska di ari i. Gabe ro ma nasida tu jolo ni si Musa dohot tu jolo ni si Aron di ari i.+ 7 Didok nasida ma, “Tutu, nungnga ramun hami ala nungnga manjama bakke ni halak na mate. Alai, na so boi be hami mangalehon pelean tu Jahowa rap dohot halak Israel di ari na ditottuhon i?”+ 8 Didok si Musa ma tu nasida, “Paima hamu ma dison, asa husukkun tu Jahowa manang na songon dia didok Ibana taringot tu hamu.”+
9 Didok Jahowa ma tu si Musa, 10 “Songon on ma dokkon tu halak Israel, ‘Molo adong sian hamu manang sian pinopparmuna na ramun ala manjama bakke ni halak na mate,+ manang na lao tu inganan na dao, ikkon toktong do paradeon ni nasida pelean Paska tu Jahowa. 11 Ikkon diparade nasida do pelean i di ari na pasappulu opatton di bulan na paduahon+ dung bonom mataniari.* Ikkon diallang ma i rap dohot roti na so marragi dohot sayur na paet.+ 12 Dang boi ditinggalhon nasida pelean i lao tu manogot.+ Jala dang boi maponggol dibahen nasida nanggo sada pe holi-holi ni pelean i.+ Ikkon diparade nasida do i mangihutton aturan naung ditottuhon taringot tu Paska. 13 Alai molo adong halak na so paradehon pelean Paska i, hape dang ramun ibana jala dang na lao ibana tu na dao, ikkon dipamate do ibana.+ Ai dang dilehon ibana pelean tu Jahowa di tikki naung ditottuhon. Alani i, ikkon martanggung jawab do ibana tu dosana i.
14 “‘Ikkon dohot do halak na sian bangso na asing na rap tinggal dohot hamu paradehon pelean Paska tu Jahowa.+ Ikkon dibahen nasida do i mangihutton aturan dohot cara naung ditottuhon taringot tu ari Paska.+ Alani i, sarupa do aturan na marlakku tu hamu dohot tu halak na sian bangso na asing na rap tinggal dohot hamu.’”+
15 Dung sae tabernakel i dipasang,+ ditutupi ombun ma tabernakel i, i ma kemah inganan ni poti na marisi patik i. Alai molo dung borngin, tarida ma ombun i songon api di atas ni tabernakel i sahat tu manogot.+ 16 Songon i ma torus na masa di atas ni tabernakel i. Tikki arian, adong ma ombun na manutupi tabernakel i, alai dung borngin songon api ma ombun i.+ 17 Manang sadihari pe ombun i naek sian atas ni tabernakel i, pittor borhat ma halak Israel.+ Jala manang didia pe so ombun i, disi ma halak Israel markemah.+ 18 Molo didok Jahowa pinda halak Israel, pinda ma nasida. Jala molo disuru Jahowa nasida markemah, markemah ma nasida.+ Saleleng di atas ni tabernakel ombun i, ikkon toktong do nasida markemah disi. 19 Molo saleleng piga-piga ari ombun i di atas ni tabernakel, oloan ni halak Israel do paretta ni Jahowa, dang pinda nasida sian inganan i.+ 20 Olo do saleleng piga-piga ari ombun i di atas ni tabernakel. Alani i, molo disuru Jahowa nasida toktong markemah, toktong ma nasida markemah. Jala molo disuru Jahowa nasida pinda, pinda ma nasida. 21 Olo do holan saborngin ombun i disi. Molo naek ombun i manogotna i, ikkon borhat do nasida. Manang sadihari pe ombun i naek, arian manang na borngin, ikkon borhat do nasida.+ 22 Olo do ombun i di atas ni tabernakel i saleleng dua ari, sabulan, manang lobi. Sadia leleng pe ombun i disi, ikkon toktong do halak Israel markemah disi jala dang borhat sian i. Alai molo naek ombun i, ikkon borhat do nasida. 23 Molo disuru Jahowa nasida markemah, markemah ma nasida. Jala molo disuru Jahowa nasida pinda, pinda ma nasida. Toktong do dioloi halak Israel Jahowa marhite mangulahon sude paretta na dipasahat Jahowa tu si Musa.