4 Musa

31 Dung i, didok Jahowa ma tu si Musa, 2 “Bunu ma halak Midian i,+ baloshon+ ma na binahen ni nasida tu halak Israel. Dung diulahon ho i, mate nama ho.”*+

3 Makkatai ma si Musa tu bangso i. Didok ma, “Parade ma akka bawa sian tonga-tongamuna lao marporang mangalo halak Midian. Baloshon hamu ma pambahenan ni halak Midian i songon na didok Jahowa. 4 Parade ma 1.000 tentara sian ganup marga ni Israel lao marporang.” 5 Sian marribu halak Israel+ diparade ma 1.000 halak sian ganup marga. Alani i, gabe 12.000 ma bawa na diparade lao marporang.

6 Disuru si Musa ma lao 1.000 tentara sian ganup marga lao marporang. Borhat ma nasida rap dohot si Pinehas+ anak ni Malim Eleasar. Ibana do na mamboan akka barang na badia dohot akka tarompet na dipakke lao mambahen tanda.+ 7 Maju ma nasida marporang mangalo halak Midian songon na diparettahon Jahowa tu si Musa. Dibunu nasida ma sude akka bawa. 8 Asing ni i, dipamate nasida do lima raja ni Midian, i ma si Evi, si Rekem, si Zur, si Hur, dohot si Reba. Dibunu nasida do muse si Bileam+ anak ni si Beor pakke podang. 9 Alai diboan nasida do akka borua dohot dakdanak ni halak Midian. Dibuat nasida do muse akka lombu, hambing, biru-biru, sude binatang na dipiaro, dohot sude arta ni halak Midian i. 10 Ditutung nasida ma sude kota na diingani halak Midian dohot sude perkemahan ni nasida.* 11 Ditakkup nasida ma akka jolma na disi, diboan nasida ma sude arta ni halak Midian i, dohot akka binatang ni nasida. 12 Dung i diboan nasida ma akka jolma na ditakkup i tu si Musa, tu Malim Eleasar dohot tu jolo ni bangso Israel. Diboan do muse arta dohot akka binatang ni halak Midian i. Diboan nasida ma i tu perkemahan na di Gurun Moab+ na di bariba ni Sunge Jordan, na di jonok ni kota Jeriko.

13 Dung i ro ma si Musa, Malim Eleasar, dohot sude pamimpin ni halak Israel manjuppangi nasida tu luar ni perkemahan. 14 Alai muruk ma si Musa tu akka bawa na dipillit gabe pamimpin ni akka tentara i, i ma pamimpin ni na sasaribu dohot pamimpin ni na sasaratus na mulak sian parporangan i. 15 Didok si Musa ma tu nasida, “Boasa dipasombu hamu mangolu akka borua? 16 Ai nasida do na manggoda halak Israel alani hata ni si Bileam. Dibahen nasida do halak Israel dang setia+ tu Jahowa jala gabe manomba debata Peor.+ Alani i do umbahen na masa sahit na posi tu bangso ni Jahowa.+ 17 Saonari bunu hamu ma sude dakdanak bawa dohot sude borua na hea mangulahon seks dohot bawa. 18 Alai anggo anak boru na so hea dope mangulahon seks dohot bawa, pasombu hamu ma mangolu.+ 19 Saleleng pitu ari, ikkon di luar ni perkemahan do hamu markemah. Sude halak naung mambunu dohot na manjama bakke ni halak na hona bunu,+ ikkon pabadiahon dirina+ di ari na patoluhon dohot di ari na papituhon. Ikkon ulahononmuna do i rap dohot akka jolma na binoanmuna i. 20 Ikkon dipabadia hamu do sude baju, sude barang na sian kulit, sude barang na sian hau, dohot sude barang na dibahen sian ibbulu ni hambing.”

21 Dung i didok Malim Eleasar ma tu akka tentara na lao marporang i, “On ma patik naung ditottuhon Jahowa marhite si Musa, 22 ‘Holan mas, perak, tombaga, bosi, timah putih, timah hitam, 23 dohot sude barang na tahan api do na ikkon ditutung asa gabe badia. Alai ikkon dipabadia do i muse dohot aek na dipakke tu ulaon pabadiahon.+ Jala sude barang na so tahan api ikkon disussi dohot aek. 24 Di ari na papituhon, ikkon disussi hamu do bajumuna, asa unang ramun* be hamu. Dukkon i, boi ma hamu masuk tu perkemahan.’”+

25 Didok Jahowa ma muse tu si Musa, 26 “Bahen ma daftar ni akka barang dohot binatang na diboan hamu, jala etong ma sadia godang halak na ditakkup jala na diboan hamu i. Ulahon ma i rap dohot Malim Eleasar dohot akka pamimpin na sian keluarga pihak bapak ni bangso i. 27 Bagi dua hamu ma akka arta na diboan hamu i. Bagi ma sabagian tu akka tentara na marporang jala na sabagian nai tu akka halak Israel na deba nai.+ 28 Sian bagian ni akka tentara na dohot marporang i, ikkon buatonmu do bagian ni Jahowa. Buat ma sada* sian ganup 500 jolma gabe bagian ni Debata. Jala buat ma muse sada sian ganup 500 lombu, halode, biru-biru, dohot hambing. 29 Buat ma i sian bagian ni akka tentara na dohot marporang, jala lehon ma tu Malim Eleasar gabe sumbangan tu Jahowa.+ 30 Sian bagian ni halak Israel, buat ma sada sian ganup 50 bilangan ni jolma, halode, biru-biru, hambing, dohot sude binatang na dipiaro. Lehon ma i tu halak Lepi+ na martugas di tabernakel ni Jahowa.”+

31 Jadi diulahon si Musa dohot Malim Eleasar ma songon na diparettahon ni Jahowa tu si Musa. 32 Godang ni akka barang na sisa na diboan akka halak na marporang i, i ma 675.000 hambing dohot biru-biru, 33 lombu 72.000 ekor, 34 jala halode 61.000 ekor. 35 Godang ni akka borua na so hea dope mangulahon seks dohot bawa,+ i ma 32.000 halak. 36 Godang ni hambing dohot biru-biru na gabe bagian ni akka tentara na dohot marporang, i ma 337.500 ekor. 37 Godang ni hambing dohot biru-biru na gabe bagian ni Jahowa, i ma 675 ekor. 38 Godang ni lombu bagian ni nasida i ma 36.000 ekor. Jala 72 ekor ma na gabe bagian ni Jahowa. 39 Godang ni halode bagian ni nasida, i ma 30.500 ekor. Jala 61 ekor ma na gabe bagian ni Jahowa. 40 Godang ni jolma na gabe bagian ni nasida, i ma 16.000 halak. Jala 32 halak ma na gabe bagian ni Jahowa. 41 Dung i, dilehon si Musa ma i tu Malim Eleasar+ gabe sumbangan tu Jahowa, dos songon na diparettahon Jahowa tu si Musa.

42 On ma bagian ni halak Israel na dipapulik si Musa sian akka arta na binoan ni tentara na marporang i: 43 hambing dohot biru-biru 337.500 ekor, 44 lombu 36.000 ekor, 45 halode 30.500 ekor, 46 jala 16.000 ma akka jolma. 47 Sian bagian ni halak Israel, dibuat si Musa ma sada sian ganup 50 bilangan ni jolma dohot akka binatang. Dilehon ma i tu halak Lepi+ na martugas di tabernakel ni Jahowa,+ dos songon na diparettahon Jahowa tu si Musa.

48 Dung i ro ma akka bawa na dipillit gabe pamimpin ni akka tentara i, i ma pamimpin ni na sasaribu+ dohot pamimpin ni na sasaratus manjuppangi si Musa. 49 Didok nasida ma, “Nungnga dietong hami be tuan akka tentara na huboan hami marporang. Dang adong sahalak pe sian nasida na mago.+ 50 Alani i, naeng lehononnami ma akka barang na dapotnami gabe pelean tu Jahowa. Lehononnami ma akka barang na sian mas, golang ni pat, golang ni tangan, cincin cap, anting, dohot perhiasan na asing, lao mangido tu Jahowa asa disesa dosanami.”

51 Dung i dijalo si Musa dohot Malim Eleasar ma mas dohot sude perhiasan i sian nasida. 52 Godang ni mas na disumbangkon nasida tu Jahowa, i ma 16.750 sekel.* Pamimpin ni na sasaribu dohot pamimpin ni na sasaratus do na mangalehon i. 53 Dibuat akka tentara i ma bagian ni nasida be sian akka barang na binoan ni nasida i. 54 Dijalo si Musa dohot Malim Eleasar ma mas i sian pamimpin ni na sasaribu dohot pamimpin ni na sasaratus. Diboan nasida ma i tu kemah parpunguan asa gabe parningotan i tu halak Israel di jolo ni Jahowa.