Josua
4 Dung menyeberang bangso i sian Sunge Jordan, didok Jahowa ma tu si Josua, 2 “Pillit ma 12 bawa sian bangso i, sahalak sian ganup marga.+ 3 Dokkon ma tu nasida, ‘Buat ma 12 batu sian tonga-tonga ni Sunge Jordan, inganan ni akka malim i jongjong.+ Boan ma akka i jala bahen ma di ingananmuna marborngin.’”+
4 Dung i dijou si Josua ma 12 bawa naung pinillitna i, sahalak sian ganup marga. 5 Jala didok si Josua ma tu nasida, “Lao ma hamu tu tonga-tonga ni Sunge Jordan i, tu jolo ni poti parpadanan ni Jahowa Debatamuna. Ganup ma hamu mambuat jala mamundak sada batu sian i mangihutton godang ni marga ni halak Israel. 6 Gabe tanda parningotan ma akka batu i di hamu. Molo disukkun gellengmuna* hamu haduan, ‘Boasa dibahen batu on dison?’+ 7 Dokkon ma tu nasida, ‘Ai gabe parningotan do akka batu on tu bangso Israel saleleng ni lelengna.+ Hea do dang mardalan aek ni Sunge Jordan tikki diboan poti parpadanan+ ni Jahowa menyeberang sian sunge i.’”
8 Dung i, diulahon halak Israel i ma paretta ni si Josua. Dibuat nasida ma 12 batu sian tonga-tonga ni Sunge Jordan, songon paretta ni Jahowa tu si Josua. Godang ni batu i dos songon godang ni marga ni halak Israel. Diboan jala dibahen ma batu i di inganan ni nasida marborngin.
9 Disusun si Josua ma muse 12 batu di tonga-tonga ni Sunge Jordan. Disusun ma i di inganan ni akka malim na mamboan poti parpadanan i jongjong.+ Jala disi dope akka batu i sahat tu saonari.
10 Sai jongjong do akka malim na mamboan poti parpadanan i di tonga-tonga ni Sunge Jordan. Jongjong do nasida sahat tu na sae diulahon paretta ni Jahowa tu bangso i na dipaboa marhite si Josua. Nungnga dipaboa si Musa hian sude paretta i tu si Josua. Tikki na jongjong i nasida, hatop ma bangso i menyeberang sian Sunge Jordan. 11 Dung sahat sude bangso i di bariba ni Sunge Jordan, menyeberang ma akka malim na mamboan poti parpadanan ni Jahowa i di jolo ni bangso i.+ 12 Alai marga Ruben, marga Gad, dohot satonga sian marga Manasse+ do na parjolo menyeberang sian marga na asing. Jala nungnga rade nasida lao marporang. Ai songon i do na diparettahon si Musa tu nasida.+ 13 Adong do hira-hira 40.000 tentara na rade marporang. Menyeberang do nasida sian sunge i di jolo ni Jahowa, jala lao ma nasida tu gurun na di Jeriko.
14 Di ari i, dibahen Jahowa ma sangap si Josua di jolo ni sude halak Israel.+ Dipasangap* bangso i ma si Josua saleleng ni ngoluna songon na binahen ni nasida tu si Musa.+
15 Dung i didok Jahowa ma tu si Josua, 16 “Suru ma akka malim na mamboan poti+ inganan ni Patik i kaluar sian Sunge Jordan.” 17 Didok si Josua ma tu akka malim, “Kaluar ma hamu sian Sunge Jordan i.” 18 Dung i kaluar ma akka malim na mamboan poti+ parpadanan ni Jahowa i sian tonga-tonga ni Sunge Jordan. Disi kaluar nasida sian sunge i, pittor mardalan ma muse aek ni Sunge Jordan i, jala balga do aekna sahat tu topi ni sunge i.+
19 Di ari na pasappuluhon di bulan na parjolo do bangso i menyeberang sian Sunge Jordan. Markemah ma nasida di Gilgal,+ di parbatasan ni Jeriko di sabola timur.
20 Dung i disusun si Josua ma di Gilgal 12 batu na dibuat sian Sunge Jordan.+ 21 Didok si Josua ma muse tu halak Israel, “Molo disukkun gellengmuna hamu haduan, ‘Boasa dibahen batu on dison?’+ 22 Dokkon ma tu nasida, ‘Hea do dipakoring aek ni Sunge Jordan asa boi mardalan halak Israel sian i.+ 23 Tikki i, dipakoring Jahowa Debatamuna do Sunge Jordan di jolo ni bangso Israel sahat tu na sae nasida menyeberang. Songon i do na hea diulahon Jahowa Debatamuna i di jolonami, dipakoring Ibana do Laut Merah sahat tu na sae hami menyeberang.+ 24 Diulahon Jahowa do i, asa sude halak di tano on mamboto na massai balga do huasona*+ jala asa toktong hamu mabiar tu Jahowa Debatamuna i.’”