2 Samuel

20 Adong do disi sahalak bawa na jahat na margoar si Syeba.+ Halak Benjamin do ibana, anak ni si Bikri. Di tikki i, diombus ibana ma tarompet na sian tanduk+ jala didok ibana ma, “Dang keluargatta si Daud i. Jala dang adong dapotta manang aha sian anak ni si Isai i.+ Alani i hamu halak Israel, somba hamu ma debatamuna* be!”+ 2 Gabe lao ma sude halak Israel maninggalhon Raja Daud, jala diihutton nasida ma si Syeba anak ni si Bikri.+ Alai anggo halak Juda, toktong do diihutton nasida raja i mulai sian Sunge Jordan sahat tu Jerusalem.+

3 Dung sahat Raja Daud di istanana di Jerusalem,+ dipapinda ibana ma gundik na sappulu na ditadikkon ibana lao mangurus istana i tu sada jabu.+ Adong do halak na manjaga jabu i. Jala tinggal di jabu i do nasida torus sahat tu na mate. Diparade si Daud do torus sipanganon di nasida. Alai dang hea be si Daud mangulahon seks dohot nasida.+ Dos songon halak na mabalu ma akka gundikna i, hape mangolu dope suami ni nasida.

4 Didok Raja Daud ma tu si Amasa,+ “Papungu ma sude halak Juda tu jolokku di bagasan na tolu ari on. Jala ho pe, ikkon dohot do ro.” 5 Dipapungu si Amasa ma sude halak Juda. Alai tarlambat do ibana ro, nungnga jolo lewat tikki naung ditottuhon ni raja i. 6 Didok raja i ma tu si Abisai,+ “Olo do ussusa hita bahenon ni si Syeba+ anak ni si Bikri i sian na binahen ni si Absalom.+ Alani i, boan ma akka tentarakki mangalele ibana. Sotung sanga lari ibana tu akka kota na marbenteng, gabe dang dapotta be ibana.” 7 Kaluar ma sian Jerusalem sude tentara ni si Joab,+ pamimpin ni akka pengawal ni si Daud,*+ dohot sude tentara na gogo. Lao ma nasida mangalele si Syeba anak ni si Bikri. 8 Tikki sahat nasida di jonok ni batu na balga na di Gibeon,+ ro ma si Amasa+ mandapotton nasida. Tikki i, marbaju porang do si Joab. Jala gattung do podangna di ikat pinggangna. Alai madabu ma podangna i tikki mardalan ibana.

9 Didok si Joab ma tu si Amasa, “Sehat do ho?” Dung i ditiop si Joab ma janggut ni si Amasa mamakke tangan kananna, hira naeng diumma ibana ma si Amasa. 10 Dang diparrohahon si Amasa podang na ditiop ni si Joab. Ditikkam si Joab ma butuha ni si Amasa,+ gabe sabur ma isi ni butuhana tu tano. Pittor mate do si Amasa, dang pola dipaduahali si Joab manikkam ibana. Dung i lao ma si Joab dohot si Abisai adekna i mangalele si Syeba anak ni si Bikri.

11 Jongjong ma sahalak sian tentara ni si Joab i di labbungna. Didok ibana ma, “Manang ise na marpihak tu si Joab dohot tu si Daud, diihutton ma si Joab!” 12 Tikki i, peak do bakke ni si Amasa i margulu-gulu mudar di tonga dalan. Gabe so ma sude tentara lao mangida bakke i. Mangida i, disarat tentara ni si Joab i ma bakke ni si Amasa sian dalan i jala ditutup mamakke kain. 13 Dung disarat tentara ni si Joab i bakke ni si Amasa i sian dalan, diihutton sude tentara i ma si Joab mangalele si Syeba+ anak ni si Bikri.

14 Dibolus si Syeba do sude huta ni halak Israel jala sahat ma ibana di Abel Bet-maaka.+ Marpungu ma sude pinoppar ni si Bikri jala diihutton nasida ma si Syeba masuk tu kota i.

15 Ro ma si Joab dohot akka tentarana* tu Abel Bet-maaka. Ala martembok do kota i, gabe dipajongjong nasida ma tembok na sian tano di luar ni kota i. Dung i, digali nasida ma tano na di toru ni tembok i asa ruppak tembok i. 16 Adong ma sahalak borua na marbisuk di kota i. Jou-jou ma ibana sian tembok ni kota i, didok ibana ma, “Tangihon hamu jo au! Tangihon hamu! Suru hamu jo si Joab ro tuson asa makkatai au tu ibana.” 17 Dung ro si Joab, disukkun borua i ma tu ibana, “Ho do si Joab?” Dialusi ibana ma, “Ido.” Didok borua i ma, “Tangihon ma jolo hata ni naposomon.” Didok si Joab ma, “Olo.” 18 Didok borua i ma, “Najolo somal do didok halak, ‘Molo adong halak na marsoal, lok ma lao nasida tu kota Abel manjalo poda’ asa sae parsoalan ni nasida. 19 Ai kota na rikkot do on di Israel. Halak na tinggal dison pe marroha dame do jala setia. Au ma sahalak sian nasida. Alai boasa ma naeng diruppakkon ho kota on? Boasa ma naeng pamateonmu bangso* ni Jahowa?”+ 20 Didok si Joab ma, “Daong! Dang na lao manegai kotamuna on au. 21 Dang i tujuannami. Alai na songon on do: Adong sahalak bawa sian inganan na mardolok-dolok di Epraim+ na mangalo Raja Daud ro tu hutamuna on. Goarna si Syeba,+ anak ni si Bikri. Molo dipasahat hamu ibana tu hami, lao pe hami sian on.” Dung i didok borua i ma, “Husappatton pe uluna tu ho sian tembok ni kota on!”

22 Pittor lao ma borua na marbisuk i mandapotton pangisi ni kota i. Jala makkatai ma ibana tu nasida. Diponggol nasida ma ulu ni si Syeba anak ni si Bikri jala disappatton ma i tu si Joab. Dung i diombus si Joab ma tarompet na sian tanduk. Ditinggalhon nasida ma kota i jala mulak ma akka tentara i tu jabuna be.+ Si Joab pe mulak ma tu Jerusalem mandapotton raja.

23 Tikki i, si Joab do pamimpin ni sude tentara ni Israel.+ Jala si Benaya+ anak ni si Jehoyada+ do pamimpin ni akka pengawal ni si Daud.*+ 24 Si Adoram+ do pamimpin ni akka halak na dipangido lao karejo tu raja i, jala si Jehosapat+ anak ni si Ahilud do na gabe juru tulis. 25 Si Sepa do na gabe sekretaris jala si Sadok+ dohot si Abiatar+ do na gabe malim. 26 Jala si Ira halak Jair do pejabat na untimbo pangkatna* di harajaon ni si Daud.