2 Samuel
19 Adong ma na paboahon tu si Joab, “Sai mangandungi do raja i jala lungun situtu do rohana alani si Absalom.”+ 2 Las do roha ni sude tentara ni si Daud ala monang* nasida di ari i. Alai dung dibege nasida sai mangandungi raja i alani anakna na mate i, gabe lungun ma roha ni nasida sude. 3 Martabuni-tabuni ma nasida masuk tu kota i,+ songon akka tentara na maila ala lari sian parporangan. 4 Ditutup raja i do bohina jala gogo do ibana mangandungi. Sai didok ma, “Absalom, anakku! Anakku Absalom, anakku!”+
5 Dung i didapotton si Joab ma raja i tu jabuna. Didok si Joab ma, “Nungnga maila be sude tentaram dibahen ho sadari on. Hape alani nasida do umbahen na mangolu dope ho, akka anakmu,+ akka borum,+ akka istrim, dohot akka gundikmu+ sahat tu saonari. 6 Dihaholongi ho do halak na marsogo ni roha tu ho. Alai, sogo do roham tu halak na makkaholongi ho. Takkas ma dipatuduhon ho sadari on, na so adong lapatan ni akka pamimpin ni tentaram dohot akka tentarami di ho. Molo huida sian caramon, umlas do roham autsugari mate hami sude, alai mangolu ma nian si Absalom anakmi. 7 Saonari lao ma ho, papos ma roha ni akka parkarejomi. Marsumpa ma au di jolo ni Jahowa, molo dang dipapos ho roha ni nasida, dang adong be na marpihak tu ho borngin on. Molo pola masa i, on ma hasusaan na ubborat di ngolum mulai sian haposoonmu.” 8 Lao ma raja i jala hundul ma ibana di gerbang ni kota i. Adong ma halak na paboahon naung hundul raja i di gerbang. Dung i marroan ma sude halak mandapotton raja.
Alai anggo halak Israel, nungnga lari tu jabu ni nasida be.+ 9 Marsoali ma sude halak na sian sude marga ni Israel. Didok nasida ma sama nasida, “Raja Daud do na paluahon hita sian akka musutta,+ jala ibana do na paluahon hita sian halak Palistim. Alai saonari, nungnga lari be ibana manadikkon hutatta on alani si Absalom.+ 10 Hape si Absalom na tapillit gabe rajatta i pe,+ nungnga mate di parporangan.+ Jadi, boasa dang adong na tabahen lao mangalap raja i?”
11 Disuru Raja Daud ma halak mandok tu Malim Sadok+ dohot tu Malim Abiatar,+ “Dokkon hamu ma tu akka pangituai* ni marga Juda,+ ‘Boasa ma gabe parjolo halak Israel mamikkiri naeng mangalap raja i mulak tu istanana? Hape ikkon hamu do nian na parjolo ro mangalap raja i. 12 Hamu do haha anggikku jala samudar do hita.* Boasa ma dang marna ro hamu mangalap au?’ 13 Dung i dokkon ma tu si Amasa,+ ‘Ikkon bahenokku do ho gabe pamimpin ni tentarakku lao manggattihon si Joab.+ Sai borat ma au dihukum Debata molo dang huulahon i. Ai samudar do hita.’”
14 Las do roha ni sude halak Juda mambege hata ni Raja Daud i. Gabe disuru nasida ma halak mandok tu raja i, “Mulak ma ho ale rajanami. Jala boan ma sude parkarejomi.”
15 Mulak ma raja i jala sahat ma ibana di Sunge Jordan. Tikki i, nungnga ro halak Juda tu Gilgal+ lao manomu-nomu raja i jala lao mandongani ibana menyeberang sian Sunge Jordan. 16 Dung i, si Simei+ anak ni si Gera halak Benjamin na sian Bahurim i pe, hatop do ro dohot halak Juda manjuppangi Raja Daud. 17 Jala ro do si Simei rap dohot 1.000 halak na sian Benjamin. Asing ni i, ro do si Siba+ parkarejo ni keluarga ni si Saul rap dohot 15 anakna bawa dohot 20 halak parkarejona. Parjolo do nasida sahat di Sunge Jordan sian raja i. 18 Menyeberang ma si Siba* sian Sunge Jordan i. Ai naeng boanonna do keluarga ni raja menyeberang sian Sunge Jordan jala naeng ulahononna do manang aha pe na pinangido ni raja. Alai andorang so menyeberang raja i, marsinggang ma si Simei anak ni si Gera i di jolo ni raja. 19 Didok si Simei ma tu Raja Daud, “Unang ma hukum au rajanami alani hasalaanki. Unang ma paingot-ingot akka na sala na binahen ni naposomon tu ho,+ tikki na lao i ho sian Jerusalem. Sesa ma i sian roham rajanami. 20 Ai huboto do naung mardosa au, ale rajanami. Alani i do, sian sude pinoppar ni si Josep, au do na parjolo ro manjuppangi ho sadari on.”
21 Didok si Abisai+ anak ni si Seruya+ ma, “Ikkon pamateon do si Simei on, ai nungnga diburai ibana halak na pinillit* ni Jahowa.”+ 22 Alai didok si Daud ma, “Dang urusanmuna i, hamu akka anak ni si Seruya.+ Boasa dialo hamu au sadari on? Au do raja ni Israel saonari. Alani i, dang adong halak Israel na boi dipamate sadari on.” 23 Dung i marsumpa ma Raja Daud tu si Simei jala didok ma, “Dang pamateon ho.”+
24 Ro ma si Mepiboset+ pahoppu ni si Saul i mandapotton raja. Dang disussi ibana patna, dang dicukkur ibana kumisna, jala dang disussi ibana abitna mulai sian na lao raja i sahat tu na mulak di bagasan dame. 25 Tikki ro si Mepiboset tu* Jerusalem manjuppangi raja i, didok raja i ma tu ibana, “Boasa dang dohot ho tikki i mandongani au Mepiboset?” 26 Didok ibana ma tu raja i, “Diboto ho do tuan, na pakpang do au.+ Alani i ma hudok tu parkarejokki asa diparade ibana* halodekku, asa lao au mandapotton raja i. Hape, dioto-otoi parkarejokki do au.+ 27 Jala margabus do ibana tu raja i taringot tu au.+ Alai songon suru-suruan ni Debata na sittong do ho, alani i bahen ma na denggan di roham. 28 Sasittongna boi do pamateonmu sude keluarga ni bapakku. Alai dibahen ho do naposomon rap mangan sameja dohot ho.+ Alani i, dang marhak be au mangido manang aha sian raja i.”
29 Didok raja i ma tu ibana, “Nga sae be i. Unang be torusson hatami. Nungnga hutottuhon, ikkon bagionmu nama tanomi tu si Siba.”+ 30 Didok si Mepiboset ma tu raja i, “Lok ma di si Siba sude tano i. Na penting, di bagasan dame mulak raja i tu istanana.”
31 Ro do si Barsilai+ halak Gilead i sian Regolim tu Sunge Jordan. Ai naeng paborhatonna do raja i menyeberang sian sunge i. 32 Nungnga matua si Barsilai, 80 taon ma umurna. Ibana do na paradehon sipanganon tu raja i tikki di Mahanaim.+ Ai na mora do ibana. 33 Didok Raja Daud ma tu si Barsilai, “Beta, dohot ma ho menyeberang, asa rap mangan ho dohot au di mejakku di Jerusalem.”+ 34 Alai dialusi si Barsilai ma, “Dang sadia leleng* nai be au mangolu. Boasa ma pola dohot au lao rap dohot raja i tu Jerusalem? 35 Gabe susa do annon raja i molo dohot au. Ai nungnga 80 taon umurhu.+ Dang boi be huhilala na sonang. Ai dang huboto be dai ni sipanganon dohot siinumon. Jala dang boi be hubege soara ni bawa manang borua na marende.+ 36 Jadi, unang ma pola bahen songon i tu naposomon rajanami. Holan boi pe hutaruhon raja i tu Sunge Jordan on, nungnga las rohakku. 37 Loas ma mulak naposomon, asa di hutakku au mate. Ai disi do dikubur omakku dohot bapakku.+ Alai loas ma si Kimkana naposokkon menyeberang rap dohot ho.+ Jala bahen ma tu ibana manang aha na denggan di roham.”
38 Didok raja i ma, “Olo. Huboan pe si Kimkana menyeberang rap dohot au. Hubahen pe na denggan tu ibana songon lomo ni roham. Jala bahenokku do manang aha na pinangido ni roham.” 39 Tikki naeng menyeberang raja i, diumma ibana ma si Barsilai.+ Didok raja i ma tu ibana, “Sai anggiat ma dipasu-pasu Debata ho.” Dung i, menyeberang ma raja i dohot sude halak na rap dohot ibana. Jala si Barsilai pe mulak ma tu hutana. 40 Tikki menyeberang raja i tu Gilgal,+ dohot do si Kimkana menyeberang. Sude ma halak Juda dohot satonga halak Israel mamboan raja i menyeberang.+
41 Dung i ro ma sude halak Israel mandapotton raja. Didok nasida ma, “Boasa ma sipsip haha angginami marga Juda i mamboan ho, ale rajanami? Boasa ma diboan nasida ho, sude keluargam, dohot sude parkarejom menyeberang sian Sunge Jordan?”+ 42 Didok sude halak Juda i ma, “Hubahen hami pe songon i, ala keluarganami do raja i.+ Boasa ma pola muruk hamu alani i? Ai na dirippu hamu adong sipanganon dilehon raja i tu hami? Manang adong dilehon ibana hadiah tu hami?”
43 Didok halak Israel ma tu halak Juda, “Adong do sappulu marga hami dison. Jadi hami do ummarhak tu Raja Daud on sian hamu. Boasa ma leas rohamuna tu hami? Ikkon hami do nian na parjolo mamboan raja i mulak.” Alai upposi do hata ni halak Juda i sian hata ni halak Israel i.*