1 MUSA

1 Di mula ni mulana ditoppa Debata ma langit dohot tano.+

2 Kosong dope tano on jala dang adong dope agia aha. Ditutupi aek na bagas*+ do tano on jala massai golap. Mangullus do gogo ni Debata*+ tusan tuson di atas ni aek i.+

3 Didok Debata ma, “Jadi ma na tiur.” Jadi ma tutu na tiur i.+ 4 Dung i diida Debata ma, denggan do na tiur i. Alani i, dipapulik Ibana ma na tiur i sian na golap. 5 Digoari Debata ma na tiur i Arian jala na golap i Borngin.+ Salpu ma borngin jala torang ma ari muse, i ma ari na parjolo.

6 Dung i didok Debata ma, “Jadi ma ruangan na kosong,*+ na mambagi dua aek na di ginjang dohot aek na di toru.”+ 7 Songon i ma dibahen Debata mambagi dua aek i. Adong ma aek na tu ginjang, jala na deba nai toktong ma di toru. Dibahen Debata ma ruangan na kosong di holang-kolang ni aek na di ginjang dohot na di toru.+ Jala saut ma songon i. 8 Digoari Debata ma ruangan na kosong i Langit. Salpu ma borngin jala torang ma ari muse, i ma ari na paduahon.

9 Dung i didok Debata ma, “Pungu ma aek na di toru ni langit tu sada inganan, asa tarida tano na mahiang.”+ Saut ma songon i. 10 Digoari Debata ma tano na mahiang i Darat+ jala aek na pungu i Laut.+ Jala diida Debata ma denggan do i sude.+ 11 Dung i didok Debata ma, “Tubu ma ragam ni akka duhut-duhut, suan-suanan, dohot akka hau di tano on. Marbiji do akka parbue ni akka suan-suanan i nang akka hau i.” Jala saut ma songon i. 12 Tubu ma marragam duhut-duhut, suan-suanan,+ dohot hau di tano on. Marparbue jala marbiji ma akka suan-suanan nang hau i. Jala denggan do i diida Debata. 13 Salpu ma borngin jala torang ma ari muse, i ma ari na patoluhon.

14 Dung i didok Debata ma, “Gabe tarida ma akka panondang*+ di langit na manirang arian dohot borngin.+ Jala akka panondang i ma na gabe tanda na paboahon musim, ari, dohot taon.+ 15 Akka i ma na marsinondang di langit di atas ni tano on.” Jadi saut ma songon i. 16 Dung i dibahen Debata ma dua panondang na massai balga. Dibahen Debata ma panondang na umbalga marsinondang di tikki arian,+ jala na unggelleng marsinondang di tikki borngin. Jala dibahen Debata do muse akka bintang.+ 17 Dibahen Debata ma sudena i di langit lao manondangi tano on. 18 Marsinondang ma i di tikki arian dohot di tikki borngin lao manirang na tiur sian na golap.+ Jala diida Debata ma denggan do i sude. 19 Salpu ma borngin jala torang ma ari muse, i ma ari na paopatton.

20 Dung i didok Debata ma, “Jadi ma akka binatang* di bagasan aek. Jala jadi ma marragam akka binatang na habang di langit.”+ 21 Dung i ditoppa Debata ma akka binatang na massai balga na mangolu di laut. Ditoppa ma muse marragam binatang na boi mangolu di aek, dohot marragam binatang na boi habang. Jala diida Debata ma denggan do i sude. 22 Dung i dipasu-pasu Debata ma akka binatang i jala didok ma, “Marpinoppari ma hamu asa lam godang hamu jala gohi hamu ma laut i.+ Jala lam godang ma dohot akka binatang na habang di atas ni tano on.” 23 Salpu ma borngin jala torang ma ari muse, i ma ari na palimahon.

24 Dung i didok Debata ma, “Jadi ma marragam binatang na mangolu di tano on, i ma akka binatang na jinak, akka binatang na liar, dohot akka binatang na asing.”*+ Jala saut ma songon i. 25 Dung i dibahen Debata ma marragam akka binatang na liar dohot akka binatang na jinak di tano on. Jala dibahen ma akka binatang na asing di tano on. Jala diida Debata ma denggan do i sude.

26 Dung i didok Debata ma, “Tatoppa+ ma jolma na mirip songon hita,*+ jala na tudos+ songon hita, asa dirajai nasida akka dekke na di laut, akka binatang na habang di langit, akka binatang na jinak, dohot akka binatang na asing di tano on. Jala asa dirajai nasida saluhut akka na di tano on.”+ 27 Songon i ma Debata manoppa jolma i tudos songon Ibana. Ditoppa Ibana ma jolma i, bawa dohot borua.+ 28 Dung i dipasu-pasu Debata ma nasida jala didok ma, “Marpinoppari ma hamu asa lam godang hamu. Gohi hamu ma tano on+ jala rajai ma i.+ Rajai hamu ma+ akka dekke na di laut, akka binatang na habang di langit, dohot akka binatang na di tano on.”

29 Dung i didok Debata ma, “Hulehon do tu hamu akka suan-suanan* dohot akka hau na adong di tano on, jala hulehon do tu hamu ganup hau na marparbue* gabe sipanganonmuna.+ 30 Jala hulehon do akka duhut-duhut dohot suan-suanan gabe sipanganon+ ni binatang liar, binatang na habang di langit, dohot akka binatang na adong di tano on.” Jala saut ma songon i.

31 Dung i, diida Debata ma sude akka na binahenna i. Massai denggan do i sude.+ Salpu ma borngin jala torang ma ari muse, i ma ari na paonomhon.

2 Dung i sae ma sude ditoppa akka na di langit, akka na di tano on, dohot nasa isina.*+ 2 Jadi sae ma sude ulaon ni Debata andorang so ari papituhon. Dung i maradi ma Ibana sian sude ulaonna di ari papituhon.+ 3 Dipasu-pasu Debata ma ari papituhon i, jala dipabadia ma i. Ai di ari i do Ibana maradi sian sude ulaonna manoppa, i ma tikki manoppa sude lomo ni rohana.

4 On ma sejarah taringot songon dia langit dohot tano on ditoppa, i ma di ari tikki ditoppa Debata Jahowa* langit dohot tano on.+

5 Dang adong dope ramba manang suan-suanan na martunas. Ai dang dibahen Debata Jahowa dope udan tu tano on. Jala dang adong dope jolma na mangula tano on. 6 Jala naek ma uap ni aek sian toru ni tano lao mambahen tano i maraek.

7 Dung i dibuat Debata Jahowa ma orbuk+ sian tano i, jala dibahen ma i gabe jolma. Diombus Debata ma hosa+ tu igungna gabe mangolu ma jolma i.*+ 8 Dibahen Debata Jahowa ma sada taman di Eden,+ di sabola timur. Jala dibahen Ibana ma disi jolma na tinoppana i.+ 9 Dibahen Debata Jahowa ma tubu marragam hau sian tano i. Tubu do akka hau na denggan jala parbuena boi panganon. Jala di tonga-tonga ni taman i adong do hau hangoluan,+ dohot hau parbinotoan taringot na denggan dohot na roa.+

10 Adong do sunge na mengalir sian taman Eden lao mambahen taman i maraek. Tarbagi ma sian sunge i opat sunge nai.* 11 Goar ni sunge na parjolo i ma Pison. Sunge on ma na makkaliangi tano Hawila, inganan ni akka mas. 12 Denggan do mas sian i, jala adong do disi gota ni hau,* dohot batu* na arga. 13 Goar ni sunge na paduahon, i ma Gihon. Sunge on ma na makkaliangi tano Kus. 14 Goar ni sunge na patoluhon i ma Hidekel.*+ Sunge on mardalan tu sabola timur ni Asiria.+ Dung i sunge na paopatton i ma Sunge Euprat.+

15 Dibahen Debata Jahowa ma bawa i di Taman Eden, lao mangula jala mangurus taman i.+ 16 Diparettahon Debata Jahowa ma tu bawa i, “Boi do panganonmu akka parbue ni hau na di taman on.+ 17 Alai dang boi panganonmu parbue ni hau parbinotoan taringot tu na denggan dohot na roa. Unang pangan parbue ni hau i, molo dipangan ho sian i, mate+ do ho di ari i.”

18 Dung i, didok Debata Jahowa ma, “Dang denggan molo sai sahalak ni bawa i. Hubahen ma sasahalak na boi gabe donganna jala na boi mangurupi ibana.”+ 19 Nungnga dibahen Debata Jahowa akka binatang sian orbuk ni tano. Dibahen do akka binatang liar dohot akka binatang na habang di langit. Dung i, diboan Debata ma akka binatang i tu bawa i. Jala diida Debata ma songon dia bawa i manjou akka binatang i. Manang aha pe dijou bawa i goar ni binatang i, i ma na gabe goar ni binatang i.+ 20 Dibahen bawa i ma goar ni akka binatang na jinak, goar ni akka binatang na habang di langit, dohot goar ni akka binatang na liar. Alai molo bawa i, dang adong donganna na boi mangurupi ibana. 21 Dibahen Debata Jahowa ma bawa i modom massai renges. Tikki modom ibana, dibuat Debata ma sada rusukna, dung i ditutup ma muse pambuatanna i dohot sibukna. 22 Sian rusuk ni bawa i, dibahen Debata Jahowa ma sahalak borua. Dung i diboan Debata ma borua i tu bawa i.+

23 Didok bawa i ma,

24 Alani i, ikkon tadikkonon ni bawa ma omakna dohot bapakna, asa toktong rap* dohot istrina jala gabe sada daging ma nasida.+ 25 Jala toktong do dang marpakkean+ nasida na dua, alai dang maila nasida.

3 Ulok+ ma binatang na ummalo sian sude binatang liar na dibahen Debata Jahowa. Didok ulok i ma tu borua i, “Ate, tutu do didok Debata dang boi panganonmuna parbue ni akka hau na di taman on?”+ 2 Dialusi borua i ma, “Boi do panganonnami akka parbue ni hau na di taman on.+ 3 Alai molo parbue ni hau na di tonga-tonga ni taman i,+ didok Debata do, ‘Unang pangan parbue ni hau i jala unang jama hamu i, asa unang mate hamu.’” 4 Dung i didok ulok i ma tu borua i, “Dang tutu i, dang na lao mate hamu.+ 5 Ai na diboto Debata do sadari dipangan hamu parbue ni hau i, tarbukka ma matamuna.* Jala gabe songon Debata ma hamu mamboto na denggan dohot na roa.”+

6 Alani i sai dipanotnoti borua i ma hau i. Massai denggan do diida ibana hau i, jala bagak do parbuena diida. Gabe diputikkon ibana ma parbue ni hau i jala dipangan.+ Tikki rap ibana dohot suamina dilehon ibana ma i muse tu suamina. Jala dipangan suamina ma parbue ni hau i.+ 7 Dung i bukka ma mata* ni nasida na dua. Gabe diboto nasida ma na so marpakkean nasida. Dung i dibahen nasida ma pakkean ni nasida sian bulung ni hau ara lao manutupi gotting ni nasida.+

8 Tikki mangullus alogo,* dibege nasida ma soara ni Debata Jahowa di taman i.* Gabe martabuni ma nasida na dua sian Debata Jahowa. Martabuni ma nasida di akka hau na di taman i. 9 Sai dijou Debata Jahowa ma bawa i. Ninna ma, “Didia do ho?” 10 Ujungna dialusi bawa i ma, “Hubege do nian soaram di taman i. Alai mabiar do au, ala dang marpakkean au. Jadi martabuni ma au.” 11 Dung i didok Debata ma muse, “Ise na paboahon na so marpakkean ho?+ Naung dipangan ho do parbue ni hau na huorai panganonmi?”+ 12 Dialusi bawa i ma, “Borua na nilehonmu gabe donganki do na mangalehon parbue ni hau i tu au, gabe hupangan ma.” 13 Didok Debata Jahowa ma muse tu borua i, “Boasa dibahen ho songon i?” Dialusi borua i ma, “Ulok i do, dioto-otoi au, gabe hupangan ma.”+

14 Dung i didok Debata Jahowa ma tu ulok i,+ “Ala dibahen ho songon i, holan ho ma na hona bura sian sude akka binatang na jinak dohot na liar. Butuham nama bahenonmu lao mangissir di tano jala orbuk nama allangonmu saleleng ni ngolum. 15 Bahenokku ma marmusu+ ho+ dohot borua i.+ Jala bahenokku ma marmusu pinopparmu*+ dohot pinopparna.*+ Ropukon ni pinopparna i ma ulum+ jala turbingonmu* ma tumit ni patna.”+

16 Didok Debata ma tu borua i, “Massai haccit ma taononmu tikki hamil ho, jala haccit hilalaonmu tikki manubuhon anakkonmu. Sai naeng jonok ma ho tu suamim, jala rajaan ni suamim ma ho.”

17 Dung i didok Debata ma tu si Adam,* “Nungnga hudok tu ho,+ ‘Unang pangan parbue ni hau i.’ Alai ditangihon ho do istrim, gabe dipangan ho do parbue ni hau i. Alani ho, gabe hona bura ma tano on,+ jala porsuk ma taononmu lao mambuat hasilna.+ 18 Tubu ma akka ramba dohot suga-suga di tano i. Jala suan-suanan na tubu di tano i ma na gabe sipanganonmu. 19 Susa ma ho lao mangalului sipanganonmu,* sahat tu na mulak ho tu tano pambuatanmu hian.+ Ai sian tano* do ho jala mulak tu tano* do ho sogot.”+

20 Dibahen si Adam ma goar ni istrina si Hawa.* Alana ibana ma na gabe omak ni sude jolma na mangolu.+ 21 Dibahen Debata Jahowa ma pakkean+ na ganjang sian kulit ni binatang jala dilehon ma i tu si Adam dohot tu si Hawa. 22 Jadi didok Debata Jahowa ma, “Nungnga songon hita jolma i, mamboto na denggan dohot na roa.+ Asa unang dibuat nasida parbue ni hau hangoluan i+ jala gabe dipangan nasida, jala mangolu saleleng-lelengna nasida,—” 23 Diusir Debata Jahowa ma nasida sian Taman Eden+ lao mangula tano pambuatanna hian.+ 24 Dung diusir jolma i, dibahen Debata ma akka kerubim*+ di sabola timur ni Taman Eden i. Jala dibahen do muse disi podang na marapi jala na toktong marputar asa unang adong na ro tu hau hangoluan i.

4 Mangulahon seks ma si Adam dohot si Hawa istrina i. Hamil+ ma si Hawa jala tubu ma anakna si Kain.+ Dung i didok si Hawa ma, “Alani pangurupion ni Jahowa, nungnga hutubuhon* be sada anak.” 2 Tubu ma muse anakna, i ma si Abel.+

Si Abel marmahan biru-biru, alai molo si Kain mangula do. 3 Dung piga-piga leleng, diboan si Kain ma hasil na niulana i, jala dipelehon ma tu Jahowa. 4 Diboan si Abel ma anak ni biru-biruna na parjolo tubu.+ Dipelehon ma i rap dohot tabo-tabona. Lomo do roha ni Jahowa tu si Abel dohot tu peleanna i.+ 5 Alai dang lomo roha ni Debata mangida si Kain dohot peleanna. Alani i, murhing ma bohi ni si Kain jala muruk situtu ma ibana. 6 Dung i, didok Jahowa ma tu si Kain, “Boasa muruk ho? Boasa murhing bohim? 7 Molo muba ho, jala diulahon ho na denggan, gabe lomo do rohakku tu ho. Alai, molo dang muba ho jala dang diulahon ho na denggan, dipaima-ima dosa i ma ho di labbung ni pintu ni kemahmu, jala boddutonna ma ho. Alai, ikkon taluhononmu do i.”

8 Didok si Kain ma tu si Abel anggina i, “Beta ma hita tu ladang.” Dung sahat nasida di ladang, diattuk si Kain ma si Abel jala dipamate ma anggina i.+ 9 Dang sadia leleng, disukkun Jahowa ma tu si Kain, “Didia anggim si Abel?” Didok si Kain ma, “Dang huboto bah. Ai au huroha panjaga ni anggikki?” 10 Didok Debata ma muse, “Boasa dibahen ho songon i? Diboto ho do, mangangguki do mudar ni anggimi sian tano i jala sahat do i tu Au.+ 11 Alani i, hona bura ma ho jala usiron nama ho sian tano i. Ai di tano i do dipamate ho anggim jala diusehon ho mudarna.*+ 12 Molo diula ho tano i, dang na lao marhasil tano na niulami. Dang boi hot ho di sada inganan, sai lari ma ho sian sada inganan tu inganan na asing.” 13 Didok si Kain ma tu Jahowa, “Paborattu do hukuman na binahenmi tu au. 14 Saonari, nungnga diusir Ho au sian tano i, jala dang idaonmu be au. Toktong nama au lari sian sada inganan tu inganan na asing. Ai molo adong na pajuppang dohot au, pamateonna ma au.” 15 Alani i, didok Jahowa ma tu si Kain, “Attong molo songon i, manang ise na mambunu ho, ikkon dihukum ma ibana pitu hali loppit.”

Dung i, dibahen* Jahowa ma sada tanda di si Kain. Alani tanda i, molo adong na pajuppang dohot ibana dang pamateonna ibana. 16 Lao ma si Kain sian jolo ni Jahowa jala tinggal ma ibana di tano Pelarian* na di sabola timur ni Taman Eden.+

17 Mangulahon seks ma si Kain dohot istrina+ jala hamil ma istrina i. Ditubuhon ma anak jala digoari ma anakna i si Henok. Dipajongjong si Kain ma sada kota, jala dibahen ma goar ni kota i Henok, songon goar ni anakna i. 18 Tubu ma anak ni si Henok goarna si Irad. Anak ni si Irad si Mehuyael, anak ni si Mehuyael i ma si Metusael, jala anak ni si Metusael i ma si Lamek.

19 Adong dua istri ni si Lamek. Goar ni istrina na parjolo, i ma si Ada. Goar ni istrina na paduahon, i ma si Zilla. 20 Ditubuhon si Ada ma si Jabal. Si Jabal on ma halak na parjolo tinggal di kemah jala na mamiaro binatang. 21 Anggi ni si Jabal, i ma si Jubal. Si Jubal ma halak na parjolo mamakke harpa dohot suling. 22 Ditubuhon si Zilla ma si Tubal-kain. Si Tubal-kain ma halak na mambahen akka barang na sian tombaga dohot na sian bosi. Goar ni ibotona, i ma si Naama. 23 Dibahen si Lamek ma puisi on tu akka istrina, si Ada dohot si Zilla,

25 Mangulahon seks ma muse si Adam dohot istrina. Ditubuhon ibana ma sada anak, jala dibahen ma goarna si Set.*+ Ai didok ibana do, “Nungnga dilehon Debata be muse pinopparhu gatti ni si Abel, na dipamate ni si Kain i.”+ 26 Tubu ma anak ni si Set, dibahen ma goarna si Enos.+ Mulai tikki i, dijou akka jolma ma goar ni Jahowa.

5 On ma tarombo ni si Adam. Tikki ditoppa Debata si Adam, dibahen do ibana tudos songon Debata.+ 2 Ditoppa Ibana do bawa dohot borua.+ Tikki ditoppa nasida,+ dipasu-pasu Debata do nasida, jala didok ma nasida Jolma.*

3 Dung marumur 130 taon si Adam, tubu ma anakna jala mirip do anakna i tu ibana. Dibahen ma goarna si Set.+ 4 Dung tubu si Set, mangolu dope si Adam 800 taon nai. Jala maranak marboru do si Adam. 5 Dung i, mate+ ma si Adam. Tikki i marumur 930 taon ma ibana.

6 Dung marumur 105 taon si Set, tubu ma anakna jala dibahen ma goarna si Enos.+ 7 Dung tubu si Enos, mangolu dope si Set 807 taon nai. Jala maranak marboru do ibana. 8 Dung i, mate ma si Set. Tikki i marumur 912 taon ma ibana.

9 Dung marumur 90 taon si Enos, tubu ma anakna jala dibahen ma goarna si Kenan. 10 Dung tubu si Kenan, mangolu dope si Enos 815 taon nai. Jala maranak marboru do ibana. 11 Dung i, mate ma si Enos. Tikki i marumur 905 taon ma ibana.

12 Dung marumur 70 taon si Kenan, tubu ma anakna jala dibahen ma goarna si Mahalalel.+ 13 Dung tubu si Mahalalel, mangolu dope si Kenan 840 taon nai. Jala maranak marboru do ibana. 14 Dung i, mate ma si Kenan. Tikki i marumur 910 taon ma ibana.

15 Dung marumur 65 taon si Mahalalel, tubu ma anakna jala dibahen ma goarna si Jared.+ 16 Dung tubu si Jared, mangolu dope si Mahalalel 830 taon nai. Jala maranak marboru do ibana. 17 Dung i, mate ma si Mahalalel. Tikki i marumur 895 taon ma ibana.

18 Dung marumur 162 taon si Jared, tubu ma anakna jala dibahen ma goarna si Henok.+ 19 Dung tubu si Henok, mangolu dope si Jared 800 taon nai. Jala maranak marboru do ibana. 20 Dung i, mate ma si Jared. Tikki i marumur 962 taon ma ibana.

21 Dung marumur 65 taon si Henok, tubu ma anakna jala dibahen ma goarna si Metusalah.+ 22 Dung tubu si Metusalah, mangolu dope si Henok 300 taon nai. Maranak marboru do ibana. Jala toktong do diihutton si Henok dalan ni Debata na sittong.* 23 Dung i, mate ma si Henok jala marumur 365 taon ma ibana. 24 Toktong do diihutton si Henok dalan ni Debata na sittong.+ Dung i, dang adong be halak na hea mangida ibana, ai nungnga dibuat Debata ibana.+

25 Dung marumur 187 taon si Metusalah, tubu ma anakna jala dibahen ma goarna si Lamek.+ 26 Dung tubu si Lamek, mangolu dope si Metusalah 782 taon nai. Jala maranak marboru do ibana. 27 Dung i, mate ma si Metusalah. Tikki i marumur 969 taon ma ibana.

28 Dung marumur 182 taon si Lamek, tubu ma anakna. 29 Dibahen ibana ma goarna si Noak.*+ Ai didok do, “Dakdanak on ma na mangapuli hita di sude sitaononta. Ai loja do hita mangula tano na diburai+ Jahowa.” 30 Dung tubu si Noak, mangolu dope si Lamek 595 taon nai. Jala maranak marboru do ibana. 31 Dung i, mate ma si Lamek. Tikki i marumur 777 taon ma ibana.

32 Dung marumur 500 taon si Noak, tubu ma anakna. Goar ni anakna, i ma si Sem,+ si Ham,+ dohot si Japet.+

6 Lam godang ma jolma di tano on, jala tubu ma akka boru ni nasida. 2 Diida akka anak ni Debata* na sittong i+ ma akka boru ni jolma i. Uli do nasida. Alani i dipillit akka anak ni Debata i ma na dia lomo ni roha ni nasida, jala dibahen ma i gabe istrina. 3 Dung i, didok Jahowa ma, “Dang pasombuonku* be jolma i toktong mangolu.+ Ai nungnga mardosa nasida.* Alani i, 120 taon nai nama nasida mangolu.”+

4 Tikki i, adong do akka raksasa* di tano on. Jala saleleng di tikki i, mangulahon seks do akka anak ni Debata na sittong dohot akka boru ni jolma i. Tubu ma akka anak ni nasida, gabe bawa na massai gogo, jala tarbarita di tikki i.

5 Diida Jahowa ma nungnga massai jahat akka jolma di tano on. Jala holan akka na jahat ma na adong di roha nang di pikkiran ni nasida ganup tikki.+ 6 Marsak* ma Jahowa ala ditoppa Ibana jolma i di tano on. Jala massai haccit ma rohana.*+ 7 Dung i didok Jahowa ma, “Pamateonku nama jolma na hutoppa i sian tano on. Pamateonku ma nasida rap dohot binatang na jinak, binatang na habang di langit, dohot akka binatang na asing.* Ai marsak do rohakku dung hutoppa nasida.” 8 Alai las do roha ni Jahowa mangida si Noak.

9 On ma sejarah ni si Noak.

Halak na mangulahon na sittong+ do si Noak. Molo dibandingkon tu akka halak na mangolu di tikki i, dang adong diulahon si Noak na sala. Toktong do diihutton ibana dalan ni Debata na sittong i.+ 10 Adong do tolu anak ni si Noak. Goarna si Sem, si Ham, dohot si Japet.+ 11 Nungnga sega be portibi on di jolo ni Debata jala gok hajahaton do portibi on. 12 Tikki diida Debata portibi on, dibereng Ibana ma nungnga sega+ be portibi on jala nungnga sega be pangalaho ni sude jolma* na di tano on.+

13 Dung i didok Debata ma tu si Noak, “Nungnga hutottuhon be lao pamatehon nasa na mangolu di tano on. Ai gok hajahaton do tano on dibahen jolma i. Alani i, pamateonku ma sude nasida jala bahenokku ma sega tano on.+ 14 Alai bahen ma di ho sada parau* sian hau na denggan.+ Markamar-kamar ma bahen parau i jala lappis ma parau i sian bagasan dohot sian luar mamakke aspal.*+ 15 Songon on ma bahen parau i: Ganjangna 134 meter, bidangna 22 meter, jala timbona 13 meter.* 16 Hira-hira satonga meter* sian atap ni parau i, bahen ma jandelana* asa boi masuk mataniari. Dung i, bahen ma pintu ni parau i.+ Bahen ma tolu tingkat parau i, sada di ginjang, sada di tonga-tonga, jala sada di toru.

17 “Bahenokku ma banjir+ saluhut tano on lao pamatehon sude jolma dohot binatang* na marhosa na adong di toru ni langit. Ikkon mate do sude na adong di tano on.+ 18 Bahenokku ma parjanjian dohot ho. Masuk ma ho tu parau i rap dohot sude anakmu, istrim, dohot sude parumaenmu.+ 19 Pamasuk ma tu bagasan ni parau i sapasang be sian ganup ragam ni binatang,+ jantan dohot boru-boru,+ asa toktong mangolu akka binatang i rap dohot ho. 20 Jala pamasuk ma tu bagasan ni parau i sapasang be sian ganup ragam ni binatang na habang, sian ganup ragam ni binatang na jinak, dohot sian ganup ragam ni binatang na mangissir. Pamasuk ma i sude asa toktong akka binatang i rap mangolu+ dohot ho. 21 Papungu ma sude ragam ni sipanganon+ asa adong allangonmu dohot akka binatang i.”

22 Diulahon si Noak do sude paretta ni Debata i. Songon dia diparettahon Debata, songon i do diulahon+ si Noak.

7 Dung i didok Jahowa ma tu si Noak, “Masuk ma ho tu parau i rap dohot sude keluargam. Ai dang songon halak na mangolu di tikki on ho, toktong do diulahon ho na sittong di jolokku.+ 2 Buat ma pitu ekor* sian ganup ragam ni binatang na ias,*+ jantan dohot boru-boru. Jala buat ma muse dua ekor sian ganup ragam ni binatang na so ias, jantan dohot boru-boru. 3 Buat ma muse pitu ekor* sian ganup ragam ni binatang na habang di langit, jantan dohot boru-boru. Buat ma sude akka binatang i asa toktong mangolu jala marpinoppari di tano on.+ 4 Ai pitu ari nai, parookku nama udan+ tu tano on. Jala masa ma i 40 ari 40 borngin.+ Pamateonku ma sude na mangolu, akka na hutoppa i+ sian tano on.” 5 Dung i, diulahon si Noak ma sude na diparettahon Jahowa tu ibana.

6 Marumur 600 taon ma si Noak tikki dibahen Debata banjir* tano on.+ 7 Tikki so ro dope banjir i,+ nungnga masuk si Noak, akka anakna, istrina, dohot akka parumaenna tu parau i. 8 Songon i ma nang sude akka binatang na ias, akka binatang na so ias, akka binatang na habang, dohot akka binatang na mangissir di tano on.+ 9 Masuk ma nasida tu parau inganan ni si Noak i. Dua-dua ma akka binatang i masuk, jantan dohot boru-boru, songon na diparettahon Debata tu si Noak. 10 Pitu ari dukkon i, masa ma banjir di sude tano on.

11 Tikki marumur 600 taon si Noak, di ari na pasappulu pituhon di bulan na paduahon, use ma aek sian langit jala bukka ma akka pintu ni aek na di langit.+ 12 Dung i dobar ma udan saleleng 40 ari 40 borngin. 13 Di ari i, masuk ma si Noak tu parau i rap dohot anakna, si Sem, si Ham, si Japet,+ istrina, dohot tolu parumaenna.+ 14 Masuk ma nasida rap dohot sude ragam ni akka binatang na liar, na jinak, dohot na mangissir di tano on. Dohot do muse masuk sude ragam ni akka binatang na habang, akka pidong, dohot akka binatang na marhabong. 15 Ro be ma akka binatang i tu parau ni si Noak. Masuk be ma nasida dua-dua, i ma sude akka binatang na marhosa jala na mangolu. 16 Masuk ma sude akka binatang i tu parau, jantan dohot boru-boru sian sude ragam ni binatang. Ai songon i do diparettahon Debata tu si Noak. Dung masuk si Noak tu parau i, ditutup Jahowa ma pintu ni parau i.

17 Torus ma ro udan tu tano on saleleng 40 ari. Jala lam godang ma aek manutupi tano on, gabe tarangkat ma parau i jala mumbang ma parau i dao sian tano on. 18 Lam bagas ma aek i manutupi tano on, jala mumbang-umbang ma parau i di atas ni aek i. 19 Alani godang ni aek i di tano on, ditutupi aek ma akka dolok na timbo na adong di tano on.+ 20 Hira-hira onom satonga meter* ma aek i untimbo sian pussu ni akka dolok i.

21 Alani i, mate ma sude akka na mangolu* di tano on,+ i ma akka binatang na habang, na jinak, na liar, dohot akka binatang na mangissir, songon i nang sude jolma.+ 22 Mate do sude nasa na mangolu jala na marhosa+ na adong di darat. 23 Songon i ma Debata pamatehon nasa na mangolu di tano on, dohot ma i akka jolma, sude ragam ni binatang, akka binatang na mangissir, dohot akka binatang na habang di langit. Holan si Noak dohot akka na rap dohot ibana do na selamat.+ Asing ni nasida, mate do sude.+ 24 Dang moru aek i sian tano on saleleng 150 ari.+

8 Diparrohahon* Debata do si Noak dohot akka binatang na liar dohot na jinak na di parau i.+ Dibahen Debata ma mangullus alogo tu tano on. Gabe moru ma aek i. 2 Dang turun be udan sian langit, jala nungnga ditutup be akka pintu ni aek na di langit. Alani i, dang ro be udan.*+ 3 Dung 150 ari moru ma aek i. Lam leleng lam otik ma aek i. 4 Di ari na pasappulu pituhon di bulan na papituhon, so ma parau i di Dolok Ararat. 5 Lam leleng lam moru ma aek i. Jadi, di ari na parjolo di bulan na pasappuluhon, tarida ma pussu ni akka dolok.+

6 Dung salpu 40 ari, dibukka si Noak ma jandela+ ni parau i. 7 Dipalua si Noak ma sada burung gagak. Alai mulak-ulak do pidong i habang tu parau i saleleng so marsik aek i sian tano on.

8 Dung i, dipalua si Noak ma muse sada darapati lao mamereng atik naung marsik aek i manang dang. 9 Alai dang adong dapot ni darapati i ingananna lao songgop. Mulak ma muse darapati i tu parau i. Ai ditutupi aek dope sude tano on.+ Dibahen si Noak ma tanganna tu luar ni parau i, jala dipamasuk ma muse darapati i. 10 Dung pitu ari nai dipalua si Noak ma muse darapati i. 11 Tikki naeng borngin, mulak ma muse darapati i tu parau. Diida si Noak ma adong bulung ni jetun di baba ni darapati i! Alani i, gabe diboto si Noak ma nungnga lam moru aek i sian tano on.+ 12 Dipaima ibana ma muse pitu ari nai. Dung i, dipalua ibana ma muse darapati i. Alai dang mulak be darapati i.

13 Di ari na parjolo, di bulan na parjolo, tikki marumur 601 taon+ si Noak, lam marsik ma aek i. Dibukka si Noak ma atap ni parau i, jala dibereng ibana ma nungnga mahiang be tano i. 14 Di ari na paduapulu pituhon di bulan na paduahon nungnga mahiang situtu be tano on.

15 Dung i, didok Debata ma tu si Noak, 16 “Kaluar ma ho rap dohot istrim, sude anakmu, dohot sude parumaenmu sian parau i.+ 17 Palua ma sude akka binatang+ na binoanmi, akka binatang na habang, na jinak, na liar, dohot akka binatang na mangissir di tano. Palua ma akka binatang i asa maranaki, marpinoppari, jala asa lam godang* di tano on.”+

18 Kaluar ma si Noak rap dohot sude anakna,+ istrina, dohot sude parumaenna. 19 Dipalua ma sude binatang na adong di parau i, sude binatang na mangissir, sude binatang na habang, dohot sude binatang na asing na mangolu di tano on. Kaluar ma nasida sian parau i mangihutton ragamna be.+ 20 Dibahen si Noak ma sada langgatan+ tu Jahowa. Dibuat ibana ma piga-piga binatang na ias,* dohot piga-piga pidong na ias.+ Dung i, dibahen ibana ma i gabe pelean situtungon di langgatan i.+ 21 Las ma* roha ni Jahowa manganggo uap ni pelean na angur i. Didok Jahowa ma di bagasan rohana, “Dang buraakku be tano on+ holan alani pambahenan ni jolma. Ai sian mulai poso nasida, holan na jahat do di roha nang di pikkiran ni nasida.+ Dang pamateonku be nasa na mangolu songon naung hubahen i.+ 22 Mulai sian saonari, masa ma di tano on musim marsuan dohot musim panen, ari udan dohot logo ni ari, musim panas dohot musim dingin, arian dohot borngin.”+

9 Dung i dipasu-pasu Debata ma si Noak dohot sude anakna. Didok ma, “Marpinoppari ma hamu asa lam godang hamu. Jala gohi hamu ma tano on.+ 2 Habiaran ni sude binatang na di tano on ma hamu. Hupasahat ma sude tu tanganmuna* akka binatang na habang di langit, akka binatang na mangolu di darat, dohot akka dekke na di laut.+ 3 Nasa binatang na mangolu di tano on boi do allangonmuna.+ Dos songon akka suan-suanan na hulehon tu hamu, hulehon ma akka binatang i gabe sipanganonmuna.+ 4 Alai unang allang hamu jagal na adong dope mudarna.+ Ai mudarna i do hangoluanna.+ 5 Ikkon martanggung jawab do manang ise pe na mangusehon mudarmu. Molo binatang do na mangulahon i, ikkon mate do binatang i. Alai molo donganmu jolma do na mangulahon i, ikkon gararonna do i mamakke hosana sandiri.+ 6 Manang ise na mangusehon mudar ni jolma, ikkon usehonon ni jolma do mudarna.+ Ai tudos songon Debata do jolma i ditoppa.+ 7 Alai molo hamu, marpinoppari ma hamu, asa lam godang hamu jala gohi hamu ma tano on.”+

8 Dung i didok Debata ma tu si Noak dohot tu sude anakna i, 9 “Saonari bahenokku ma parjanjian tu hamu,+ tu pinopparmuna, 10 tu sude binatang* na kaluar sian parau i, dohot tu sude binatang na mangolu di tano on, i ma akka pidong, binatang na jinak dohot binatang na liar.+ 11 On ma parjanjiakku tu hamu: Dang bahenokku be banjir sisongon on lao pamatehon nasa na mangolu.* Jala dang bahenokku be banjir sisongon on lao manegai tano on.”+

12 Dung i, didok Debata ma muse, “On ma tanda ni parjanjian na hubahen tu hamu, tu sude binatang* na rap dohot hamu, dohot tu sude pinopparmuna. 13 Bahenokku ma pelangi* di langit. Jala on ma na gabe tanda ni parjanjiakku tu nasa na mangolu di tano on. 14 Molo hubahen ombun tu atas ni tano on, tarida ma pelangi di atas ni tano on. 15 Ingotokku ma parjanjian na hubahen i. Parjanjian naung hubahen tu hamu dohot tu sude na mangolu. Jala dang bahenokku be banjir tu tano on lao pamatehon sude binatang dohot sude jolma.+ 16 Molo tarida pelangi di langit, idaokku ma i. Jala ingotokku ma parjanjian na hubahen tu sude jolma dohot tu sude binatang* na di tano on, i ma parjanjian na saleleng ni lelengna i.”

17 Didok Debata ma muse tu si Noak, “Pelangi on ma tanda ni parjanjian na hubahen tu sude binatang dohot tu sude jolma na di tano on.”+

18 On ma akka anak ni si Noak na kaluar sian parau i, si Sem, si Ham, dohot si Japet.+ Tubu ma anak ni si Ham jala dibahen ma goarna si Kanaan.+ 19 Bawa do tolussa anak ni si Noak i. Jala sian pinoppar ni nasida do sude jolma na manggohi tano on.+

20 Martani do si Noak, jala manuan anggur ma ibana. 21 Tikki diinum si Noak anggurna i mabuk ma ibana. Dung i modom ma ibana di kemahna dang marpakkean. 22 Diida si Ham bapak ni si Kanaan i ma na so marpakkean bapakna. Dipaboa ma i tu si Sem dohot tu si Japet. 23 Dung i, dibuat si Sem dohot si Japet ma sada jubah. Dipaherbang nasida ma i tu bahu ni nasida, ditiop nasida ma i huhut mardalan pudi masuk tu kemah i. Diulosi nasida ma bapakna i, alai dipadao nasida do mata ni nasida, asa unang diida nasida na so marpakkean bapakna i.

24 Dung sadar si Noak, diboto ibana ma pambahenan ni anakna siappudan i. 25 Didok si Noak ma,

“Hona bura ma si Kanaan.+

Gabe hatoban* ni akka abangna ma ibana.”+

26 Dung i didok ibana ma muse,

Jala si Kanaan ma tong na gabe hatobanna.”

28 Dung salpu banjir* i,+ mangolu dope si Noak 350 taon nai. 29 Dung i mate ma si Noak tikki marumur 950 taon ibana.

10 On ma akka pinoppar ni anak ni si Noak, i ma si Sem,+ si Ham, dohot si Japet. Dung salpu banjir* i,+ tubu ma akka anak ni nasida. 2 Akka anak ni si Japet, i ma si Gomer,+ si Magog,+ si Madai, si Javan, si Tubal,+ si Mesek,+ dohot si Tiras.+

3 Akka anak ni si Gomer, i ma si Askenas,+ si Ripat, dohot si Togarma.+

4 Akka anak ni si Javan, i ma si Elisya,+ si Tarsis,+ si Kittim,+ dohot si Dodanim.

5 Lao ma akka pinopparna i tu godang inganan. Maringanan ma nasida di akka pulo mangihutton bahasana be, margana be, dohot bangsona be.

6 Akka anak ni si Ham, i ma si Kus, si Misraim,+ si Put,+ dohot si Kanaan.+

7 Akka anak ni si Kus, i ma si Seba,+ si Hevila, si Sabta, si Raama,+ dohot si Sabteka.

Jala akka anak ni si Raama, i ma si Syeba dohot si Dedan.

8 Tubu ma anak ni si Kus, i ma si Nimrod. Si Nimrod ma pamimpin na parjolo na massai gogo di tano on. 9 Parburu na massai jago do si Nimrod, alai dialo ibana do Jahowa. Alani i do didok halak, “Songon si Nimrod parburu na massai jago na mangalo Jahowa i.” 10 Akka kota na parjolo dirajai ibana, i ma Babel,+ Erik,+ Akkad, dohot Kabne na di luat Sinear.+ 11 Sian luat i ma ibana lao tu Asiria.+ Dipajongjong ibana ma kota Ninive,+ Rehobot-Ir, Kala, 12 dohot Resen, kota na di holang-kolang ni Ninive dohot Kala: I ma kota na balga i.*

13 Tubu ma anak ni si Misraim, i ma si Lud,+ si Anam, si Lehab, si Naptuhim,+ 14 si Patrusim,+ si Kasluhim (ompu ni halak Palistim),+ dohot si Kaptorim.+

15 Tubu ma akka anak ni si Kanaan, i ma si Sidon+ dohot si Het.+ Si Sidon do siakkangan. 16 Si Kanaan do muse ompu ni halak Jebus,+ halak Amori,+ halak Girgasi, 17 halak Hevi,+ halak Arki, halak Sini, 18 halak Arwad,+ halak Semari, dohot halak Hamat.+ Dung i, lao ma akka pinoppar ni si Kanaan i tu godang inganan. 19 Parbatasan ni huta ni akka pinoppar ni si Kanaan, i ma mulai sian Sidon sahat tu Gerar+ na jonok tu Gasa,+ sahat tu Sodom, Gumora,+ Adma, dohot Zeboim+ na jonok tu Lasa. 20 Akka i ma pinoppar ni si Ham mangihutton margana, bahasana, hutana, dohot bangsona.

21 Tubu do nang anak ni si Sem. Si Sem ma ompu ni akka pinoppar ni si Heber.+ Jala si Sem do anggi ni si Japet siakkangan i.* 22 Akka anak ni si Sem, i ma si Elamit,+ si Assur,+ si Arpaksad,+ si Lud, dohot si Aram.+

23 Akka anak ni si Aram, i ma si Us, si Hul, si Geter, dohot si Mas.

24 Tubu ma anak ni si Arpaksad. Dibahen ma goarna si Sela.+ Tubu ma anak ni si Sela jala dibahen ma goarna si Heber.

25 Adong dua anak ni si Heber. Na sada goarna si Peleg.*+ Ai di tikki ni si Peleg i do tarbagi akka bangso* di tano on. Na sada nai goarna si Joktan.+

26 Akka anak ni si Joktan, i ma si Almodad, si Salep, si Hasarmawet, si Jera,+ 27 si Hadoram, si Usal, si Dikla, 28 si Hobal, si Abimael, si Syeba, 29 si Opir,+ si Hevila, dohot si Jobab. Akka on ma sude anak ni si Joktan.

30 Huta ni nasida mulai sian Mesa sahat tu Separ, i ma huta na di dolok na di sabola timur.

31 Akka i ma pinoppar ni si Sem mangihutton margana, bahasana, hutana, dohot bangsona.+

32 On ma keluarga ni akka anak ni si Noak mangihutton marga dohot bangso ni nasida. Dung salpu banjir i, lao ma akka pinopparna i tu godang inganan, jala pinoppar ni nasida ma akka bangso na adong di tano on.+

11 Di tikki i, holan sada do bahasa na dipakke jolma di tano on. Jala dos do akka hata* na dipakke nasida. 2 Tikki lao akka jolma tu sabola timur, juppang nasida ma rura na massai bidang di luat Sinear.+ Laos maringanan ma nasida disi. 3 Dung i, didok nasida ma sama nasida, “Beta tabahen ma batu bata.” Dipakke nasida ma batu bata i lao mambahen tembok gatti ni batu, jala dilokkotton nasida ma i pakke aspal. 4 Didok nasida ma muse, “Beta tabangun ma sada kota dohot sada menara na timbona sahat tu langit, asa unang pola lao hita tu luat na asing di tano on. Jala asa tarbarita goarta.”+

5 Diparrohahon Jahowa ma akka jolma jala diida Ibana ma kota dohot menara na dibangun nasida i. 6 Dung i didok Jahowa ma, “Ida ma, boi pe nasida marsada mambahen i, ala sada do bahasa+ ni nasida. Satokkin nai, manang aha pe lomo ni roha ni nasida pasti boi do pasauton ni nasida. 7 Beta, tabahen+ ma sursar bahasa ni nasida, asa unang marsiattusan nasida.” 8 Songon i ma cara ni Jahowa mambahen nasida lao sian kota i, asa lao nasida tu sude luat di tano on.+ Ujungna dang ditorusson nasida be mambangun kota i. 9 Alani i ma dibahen goar ni kota i Babel.*+ Ai disi do dibahen Jahowa sursar bahasa ni sude jolma na di tano on. Jala sian i do dibahen Jahowa lao jolma i tu sude luat di tano on.

10 On ma akka pinoppar ni si Sem.+

Dua taon dung salpu banjir i, tubu ma anak ni si Sem. Dibahen ma goarna si Arpaksad.+ Tikki i, marumur 100 taon ma si Sem. 11 Dung tubu si Arpaksad, mangolu dope si Sem 500 taon nai. Jala maranak marboru do ibana.+

12 Dung marumur 35 taon si Arpaksad, tubu ma anakna. Dibahen ma goarna si Sela.+ 13 Dung tubu si Sela, mangolu dope si Arpaksad 403 taon nai. Jala maranak marboru do ibana.

14 Dung marumur 30 taon si Sela, tubu ma anakna. Dibahen ma goarna si Heber.+ 15 Dung tubu si Heber, mangolu dope si Sela 403 taon nai. Jala maranak marboru do ibana.

16 Dung marumur 34 taon si Heber, tubu ma anakna. Dibahen ma goarna si Peleg.+ 17 Dung tubu si Peleg, mangolu dope si Heber 430 taon nai. Jala maranak marboru do ibana.

18 Dung marumur 30 taon si Peleg, tubu ma anakna. Dibahen ma goarna si Reu.+ 19 Dung tubu si Reu, mangolu dope si Peleg 209 taon nai. Jala maranak marboru do ibana.

20 Dung marumur 32 taon si Reu, tubu ma anakna. Jala dibahen ma goarna si Serug. 21 Dung tubu si Serug, mangolu dope si Reu 207 taon nai. Jala maranak marboru do ibana.

22 Dung marumur 30 taon si Serug, tubu ma anakna jala dibahen ma goarna si Nahor. 23 Dung tubu si Nahor, mangolu dope si Serug 200 taon nai. Jala maranak marboru do ibana.

24 Dung marumur 29 taon si Nahor, tubu ma anakna. Jala dibahen ma goarna si Tera.+ 25 Dung tubu si Tera, mangolu dope si Nahor 119 taon nai. Jala maranak marboru do ibana.

26 Dung marumur 70 taon si Tera, tubu ma anakna. Goar ni akka anakna i, i ma si Abram,+ si Nahor,+ dohot si Haran.

27 On ma akka pinoppar ni si Tera.

Anak ni si Tera, i ma si Abram, si Nahor, dohot si Haran. Anak ni si Haran, i ma si Lot.+ 28 Tikki mangolu dope si Tera, mate ma si Haran. Mate ma ibana di kota Ur+ di huta ni halak Kasdim,+ huta hatubuanna i. 29 Mangoli ma si Abram, songon i nang si Nahor. Goar ni istri ni si Abram si Sarai,+ goar ni istri ni si Nahor si Milka,+ i ma boru ni si Haran bapak ni si Jiska. 30 Alai dang adong anak ni si Sarai ala mandul+ do ibana.

31 Lao ma si Tera sian kota Ur, huta ni halak Kasdim i tu luat Kanaan.+ Diboan ibana do si Abram anakna i, si Lot pahoppuna+ na sian si Haran, dohot parumaenna si Sarai istri ni si Abram i. Ujungna sahat ma nasida di kota Haran+ jala maringanan ma nasida disi. 32 Mate ma si Tera di Haran. Tikki i marumur 205 taon ma ibana.

12 Didok Jahowa ma tu si Abram, “Lao ma ho sian hutami. Tadikkon ma jabu ni bapakmu dohot keluargam. Jala lao ma ho tu luat na lao hupatudu tu ho.+ 2 Bahenokku ma pinopparmu gabe bangso na bolon, pasu-pasuokku ma ho, bahenokku ma goarmu tarbarita, jala dapotan pasu-pasu ma akka halak alani ho.+ 3 Pasu-pasuokku do halak na mamasu-masu ho, buraakku ma halak na mamburai ho,+ jala dapotan pasu-pasu do sude keluarga na di tano on alani ho.”+

4 Lao ma si Abram songon na nidok ni Jahowa i. Dohot do si Lot borhat sian Haran. Tikki i, marumur 75 taon ma si Abram.+ 5 Diboan si Abram do istrina si Sarai,+ si Lot anak ni abangna,+ dohot sude akka barang na dipapungu nasida.+ Diboan si Abram do muse tu Kanaan akka hatoban na rap dohot nasida tikki di Haran.+ Dung sahat nasida di Kanaan, 6 didalani si Abram ma luat i. Sahat ma ibana di huta Sikem+ inganan ni akka hau na balga na digoari More.+ Tikki i, di luat i do halak Kanaan maringanan. 7 Dipataridahon Jahowa ma dirina tu si Abram, jala didok ma, “On ma tano+ na lao lehonokku tu pinopparmu.”*+ Dung i, dipajongjong si Abram ma disi sada langgatan tu Jahowa, i ma Debata na pataridahon dirina tu ibana. 8 Di pudian ni ari, pinda ma ibana tu huta na di dolok na di sabola timur ni Betel.+ Dipajongjong ibana ma kemahna di holang-kolang ni Betel dohot Ai+ (Betel di sabola barat jala Ai di sabola timur). Dipajongjong ibana ma muse disi sada langgatan tu Jahowa+ jala dipuji ibana ma goar ni Jahowa.+ 9 Dung i, dibukka si Abram ma muse kemahna i jala lao ma ibana muse tu arah Negeb.+ Saleleng di pardalanan, markemah do ibana torus sian sada inganan tu inganan na asing.

10 Masa ma haraparon di luat i. Lao ma si Abram tu Mesir jala disi ma ibana tinggal piga-piga leleng.+ Ai susa hian do dihilala nasida alani haraparon i.+ 11 Dung naeng sahat di Mesir, didok si Abram ma tu istrina si Sarai, “Ida ma, massai uli do rupam.+ 12 Molo diboto halak Mesir na istrikku ho, bunuonna ma au, alai pasombuonna do ho mangolu. 13 Alani i, dok ma tu nasida na ibotokku do ho, asa burju nasida tu au jala dang pamateonna au.”*+

14 Dung sahat si Abram di Mesir, diida halak Mesir ma borua na rap dohot ibana i jala massai uli do rupana diida nasida. 15 Songon i nang akka pejabat ni si Firaun, diida nasida do borua i. Jala dipuji-puji nasida do ibana di jolo ni si Firaun. Alani i, gabe diboan ma borua i tu istana ni si Firaun. 16 Burju ma si Firaun tu si Abram alani borua i. Dilehon ibana ma tu si Abram biru-biru, lombu, halode jantan dohot halode boru-boru, unta, dohot hatoban bawa nang hatoban borua.+ 17 Alai alani si Sarai istri+ ni si Abram i, dibahen Jahowa ma sahit na posi tu si Firaun, tu keluargana, dohot tu akka naposona. 18 Dung i didok si Firaun ma tu si Abram, “Boasa dibahen ho songon on tu au? Boasa dang dipaboa ho na istrim do ibana? 19 Boasa didok ho na ibotom+ ibana? Nungnga naeng hubuat ibana gabe istrikku. Saonari, boan ma istrimon jala lao ma ho!” 20 Dung i, disuru si Firaun ma akka halak manaruhon si Abram, si Sarai, dohot sude na di ibana.+

13 Borhat ma si Abram sian Mesir tu Negeb.+ Borhat ma ibana rap dohot istrina, si Lot, dohot sude na adong di ibana. 2 Mamora situtu do si Abram. Godang do binatang na dipiaro ibana, jala godang do perak dohot masna.+ 3 Lao ma si Abram sian Negeb tu Betel. Saleleng di pardalanan, markemah do ibana torus sian sada inganan tu inganan na asing. Sahat ma ibana di huta na di holang-kolang ni Betel dohot Ai.+ Hea do dipajongjong ibana kemah disi. 4 Jala hea do dibahen ibana langgatan disi. Dung i, dipuji si Abram ma goar ni Jahowa.

5 Si Lot na rap dohot si Abram i pe, adong do biru-biruna, lombuna, dohot kemahna. 6 Godang situtu do arta ni si Abram dohot si Lot. Dang siat be luat i di nasida. Alani i, dang boi be nasida rap di luat i. 7 Hea do marbadai parmahan ni si Abram dohot parmahan ni si Lot. (Di tikki i rap tinggal do halak Kanaan dohot halak Perisi di luat i.)+ 8 Didok si Abram ma tu si Lot,+ “Na markeluarga do hita. Unang ma nian marbadai akka parmahanku dohot parmahanmu. 9 Unang ma rap tinggal be hita. Pillit ma inganan na dia lomo ni roham di luat on. Molo tu kiri ho, tu kanan ma au. Molo tu kanan ho, tu kiri ma au.” 10 Ditatap si Lot ma rura Jordan+ sahat tu Zoar.+ Godang do aek di inganan i, songon taman ni Jahowa*+ do luat i, jala songon tano Mesir (tikki so ditutung Jahowa kota Sodom dohot Gumora). 11 Dipillit si Lot ma sude inganan na di rura Jordan. Dipapinda ibana ma kemahna tu sabola timur. Jadi dang rap tinggal be ibana dohot si Abram. 12 Di luat Kanaan do si Abram tinggal. Molo si Lot, di akka kota na jonok tu rura Jordan.+ Ujungna dipajongjong ibana ma kemahna jonok tu kota Sodom. 13 Massai jahat do halak Sodom. Diulahon nasida do dosa na balga tu Jahowa.+

14 Dung ditadikkon si Lot si Abram, didok Jahowa ma tu si Abram, “Tatap ma sian ingananmon tu sabola utara dohot tu selatan, tu sabola timur dohot tu barat. 15 Sude tano na niidami, lao lehonokku do i tu ho dohot tu pinopparmu. Jala gabe appunamuna ma i saleleng ni lelengna.+ 16 Massai godang do bahenokku pinopparmu, dang taretong alani godangna. Bahenokku do nasida songon orbuk ni tano, na so taretong ni jolma.+ 17 Saonari, lao ma ho, dalani ma sude inganan na di luat i. Ai lao lehonokku do i sude tu ho.” 18 Toktong do si Abram pinda sian sada inganan tu inganan na asing jala tinggal di kemah. Lao ma ibana tu Mamre+ jala tinggal ma ibana di jonok ni akka hau na balga na di Hebron.+ Dibahen ibana ma disi sada langgatan tu Jahowa.+

14 Di tikki i, si Amrapel raja ni Sinear,+ si Ariok raja ni Ellasar, si Kedorlaomer+ raja ni Elamit,+ dohot si Tidal raja ni Gojim, 2 marporang dohot si Bera raja ni Sodom,+ si Birsa raja ni Gumora,+ si Sinab raja ni Adma, si Semeber raja ni Zeboim,+ dohot raja ni Bela manang Zoar. 3 Marpungu ma nasida sude di Rura* Siddim,+ i ma Laut Sira.*+

4 Nungnga 12 taon raja na lima i tunduk tu si Kedorlaomer. Alai di taon na pasappulu toluhon, mangalo ma nasida. 5 Di taon na pasappulu opatton, lao ma si Kedorlaomer rap dohot akka raja na mandongani ibana manaluhon halak Repaim di Asterot-karnaim, halak Susim di Ham, halak Emim+ di Sawe-kiriataim, 6 dohot halak Hori+ na tinggal di Dolok Seir+ sahat tu El-paran na di gurun. 7 Mulak ma nasida tu En-mispat, i ma Kades+ jala ditaluhon nasida ma sude huta ni halak Amalek.+ Ditaluhon nasida do muse halak Amori+ na tinggal di Hazezon-tamar.+

8 Ro ma raja ni Sodom rap dohot raja ni Gumora, raja ni Adma, raja ni Zeboim, dohot raja ni Bela manang Zoar dohot akka tentarana lao marporang di Rura* Siddim. 9 Ro do nasida lao mangalo si Kedorlaomer raja ni Elamit, si Tidal raja ni Gojim, si Amrapel raja ni Sinear, si Ariok raja ni Ellasar,+ lima raja mangalo opat raja. 10 Lari ma akka raja ni Sodom dohot Gumora i. Hape godang do di Rura* Siddim i akka lubang na marisi miak ter. Tikki lari akka raja i, madabu ma nasida tu lubang i. Alai anggo na asing i, lari do nasida tu akka huta na di dolok. 11 Monang do raja na opat i. Dibuat nasida ma sude arta dohot sipanganon ni halak Sodom dohot Gumora i. Dung i lao ma nasida.+ 12 Diboan nasida do si Lot anak ni abang ni si Abram na tinggal di Sodom+ di tikki i. Diboan nasida do sude artana. Dung i, ditorusson nasida ma muse pardalanan ni nasida.

13 Adong ma sahalak na malua ro paboahon sude na masa i tu si Abram halak Heber i. Tikki i, si Abram tinggal* di jonok ni akka hau na balga appuna ni si Mamre halak Amori i.+ Abang* ni si Eskol dohot si Aner+ do si Mamre. Jala nungnga marjanji nasida dohot si Abram asa masiurupan nasida. 14 Dung dibege si Abram na ditakkup keluargana i,+ dipapungu ibana ma akka parkarejo na tubu di jabuna. Adong ma 318 halak parkarejona i jala nungnga tarlatik nasida. Dung i, lao ma nasida mangalele musu sahat tu Dan.+ 15 Tikki borngin, dibagi ibana ma akka parkarejona i. Diserang nasida ma akka musuna i jala ditaluhon. Dilele nasida do musu i sahat tu Hoba na di sabola utara ni Damaskus. 16 Dapot ni ibana do godang arta sian i. Dipalua ibana do si Lot keluargana i, akka borua, dohot akka halak na asing.

17 Dung talu si Kedorlaomer dohot akka raja na mandongani ibana, mulak ma si Abram. Ro ma raja Sodom manjuppangi ibana di Rura* Sawe, i ma Rura Raja.+ 18 Ro do si Melkisedek+ raja ni Salem+ mamboan roti dohot anggur. Ibana do malim ni Debata Natumimbul i.+

19 Dipangido ibana ma asa dipasu-pasu Debata si Abram. Didok ma,

Dung i, dilehon si Abram ma tu ibana saparsappulu sian sude na dapotna i.+

21 Didok raja ni Sodom ma tu si Abram, “Buat ma sude arta i di ho, alai paulak ma akka jolma i tu au.” 22 Didok si Abram ma tu raja ni Sodom i, “Marsumpa ma au* di jolo ni Jahowa Debata Natumimbul i, na manoppa langit dohot tano on. 23 Tung na so jadi buatokku manang aha sian artam nanggo sada bonang manang sada tali ni solop pe, asa unang dohononmu, ‘Au do na mambahen si Abram mamora.’ 24 Dang adong buatokku manang aha pe, asing ni na diallang akka bawa na poso i. Alai taringot tu akka bawa na rap lao dohot au, i ma si Aner, si Eskol, dohot si Mamre,+ paloas ma nasida mambuat bagian ni nasida.”

15 Dung salpu sudena i, mandapot parnidaan ma si Abram. Didok Jahowa ma tu ibana, “Unang mabiar+ ho Abram. Jagaokku do ho.*+ Jala massai balga do upa jaloonmu.”+ 2 Dialusi si Abram ma, “Ale Jahowa Tuan Natumimbul, so adong anakku. Gabe tu si Elieser+ halak Damaskus i nama sude artakkon. Jadi tu aha ma upa na nilehonmi?” 3 Didok si Abram ma muse, “Ai so dilehon Ho dope pinoppar di au.+ Gabe tu sahalak sian parkarejo* na di jabukkon nama sude artakku.” 4 Didok Jahowa ma tu si Abram, “Dang ibana na lao manean artam, anakmu* sandiri do na lao manean artami.”+

5 Dung i disuru Debata ma si Abram kaluar, jala didok ma, “Ida ma langit an. Molo tolap do ho, etong ma akka bintang i.” Didok Ibana ma muse, “Songon i ma godang ni pinopparmu haduan.”+ 6 Porsea do si Abram tu Jahowa.+ Alani i, didok Debata do ibana mangulahon na sittong.*+ 7 Dung i didok Debata ma muse, “Au do Jahowa na mamboan ho kaluar sian Ur kota ni halak Kasdim, lao mangalehon tano on tu ho gabe appunam.”+ 8 Didok si Abram ma muse, “Ale Jahowa Tuan Natumimbul, sian dia ma botookku na lao gabe appunakku on sude?” 9 Dialusi Debata ma, “Boan ma tu Au sada lombu,* sada hambing boru-boru, dohot sada biru-biru jantan na marumur tolu taon. Boan ma muse sada anduhur dohot sada anak ni pidong darapati.” 10 Dibuat ibana ma akka binatang i jala dipotong gabe dua bagian. Digattukkon ibana ma satonga di sabola kiri jala na satonga nai di sabola kanan. Alai dang dohot dipotong dua pidong i. 11 Alani i, gabe marroan ma akka pidong pangallang bakke tu bakke ni akka binatang i. Alai sai diusir si Abram do akka pidong i.

12 Dung naeng bonom mataniari, renges ma si Abram modom. Marnipi ma ibana. Di nipina i holom situtu ma diida ibana di humaliangna jala mabiar ma ibana. 13 Didok Debata ma tu si Abram, “On ma na lao masa tu akka pinopparmu, na lao tinggal ma nasida di luat ni halak na asing, jala bahenon ni halak na disi ma nasida gabe hatoban. Dibahen ma nasida susa saleleng 400 taon.+ 14 Alai hukumokku ma bangso na mambahen nasida gabe hatoban.+ Dung i, kaluar ma nasida sian i mamboan godang arta.+ 15 Alai anggo ho, dame do ngolum, ganjang do umurmu, jala molo mate ho, dikuburhon ma ho songon akka ompum.+ 16 Alai mulak do muse sundut na paopatton sian pinopparmi tu luat on.+ Alana dang juppang dope tikkina lao manguhum halak Amori.”+

17 Dung bonom mataniari, massai holom ma ari. Tarida ma sada tungku na martimus dohot sada obor na galak, lewat sian holang-kolang ni akka binatang na dipotong i. 18 Di ari i, dibahen Jahowa ma parjanjian tu si Abram.+ Didok ma, “Tu pinopparmu do lehonokku luat on+ mulai sian sunge na di Mesir sahat tu Sunge Euprat, sunge na balga i:+ 19 i ma tano ni halak Keni,+ halak Kenaz, halak Kadmoni, 20 halak Het,+ halak Perisi,+ halak Repaim,+ 21 halak Amori, halak Kanaan, halak Girgasi, dohot tano ni halak Jebus.”+

16 Dang adong dope anak+ ni si Sarai, istri ni si Abram i. Adong do hatobanna borua na sian Mesir, goarna si Hagar.+ 2 Dung i, didok si Sarai ma tu si Abram, “Tangihon ma jo au. Dang dipaloas Jahowa au marianakkon. Saonari, modom ma ho rap dohot hatobankon. Atik boha boi ditubuhon ibana dakdanak di au.”+ Dioloi si Abram do hata ni si Sarai i. 3 Dung sappulu taon si Abram tinggal di luat Kanaan, dilehon si Sarai ma si Hagar, i ma hatobanna halak Mesir i gabe istri ni si Abram. 4 Modom ma si Abram dohot si Hagar, jala hamil ma ibana. Dung diboto si Hagar naung hamil ibana, gabe leas ma rohana mangida si Sarai.

5 Didok si Sarai ma tu si Abram, “Alani ho do umbahen na susa au dibahen si Hagar. Au do na mangalehon hatobanki.* Hape dung diboto naung hamil ibana, leas ma rohana mangida au. Jahowa ma na patuduhon ise na sittong, au do manang na ho.” 6 Didok si Abram ma tu si Sarai, “Ai hatobanmu do ibana. Lomom ma bahen manang aha tu ibana.” Dung i, susa ma si Hagar dibahen si Sarai. Alani i, lari ma si Hagar.

7 Di pudian ni ari, ro ma suru-suruan ni Jahowa manjuppangi si Hagar di mata mual na di dalan lao tu Sur,+ i ma na di gurun. 8 Didok suru-suruan i ma tu si Hagar, “Ai na sian dia do ho Hagar, hatoban ni si Sarai? Naeng tudia do ho?” Dialusi si Hagar ma, “Na lari do au sian si Sarai tuanki.” 9 Didok suru-suruan ni Jahowa i ma muse, “Mulak ma ho tu tuanmi, jala paunduk ma roham mangoloi ibana.” 10 Didok suru-suruan ni Jahowa i ma, “Bahenokku ma massai godang pinopparmu, jala dang taretong alani godangna.”+ 11 Didok suru-suruan ni Jahowa i ma muse, “Hamil do ho nuaeng, jala bawa do anakmi. Molo dung tubu ibana, bahen ma goarna si Ismael.* Ai nungnga dibege Jahowa angguk-anggukmi. 12 Gabe songon halode na liar* ma ibana. Aloonna ma sude jolma, jala sude ma jolma mangalo ibana. Jala sai pulik do ingananna sian sude haha anggina.”*

13 Dung i, dipuji si Hagar ma Jahowa na makkatai tu ibana. Didok ma, “Ho do Debata na boi mangida saluhutna.”+ Didok ibana do muse, “Nungnga huida be Ibana na mangida au i.” 14 Alani i ma digoari sumur i Beer-lahai-roi.* (Di holang-kolang ni Kades dohot Bered do sumur i.) 15 Ditubuhon si Hagar ma sada anak di si Abram, jala dibahen si Abram ma goarna si Ismael.+ 16 Marumur 86 taon ma si Abram tikki ditubuhon si Hagar si Ismael.

17 Tikki marumur 99 taon si Abram, dipatuduhon Jahowa ma muse dirina tu ibana. Didok ma tu si Abram, “Au do Debata Pargogo na So Hatudosan. Toktong ma ulahon lomo ni rohakku jala toktong ma ulahon na sittong. 2 Bahenokku ma parjanjian dohot ho,+ jala bahenokku ma massai godang situtu pinopparmu.”+

3 Dung i marsomba ma si Abram, jala didok Debata ma muse tu ibana, 4 “Nungnga hubahen parjanjian dohot ho,+ jala bahenokku ma ho gabe ama ni godang bangso.+ 5 Dang si Abram* be goarmu. Alai si Abraham* nama, ai bahenokku nama ho gabe ama ni godang bangso. 6 Bahenokku ma massai godang situtu pinopparmu, sian pinopparmu do ro akka bangso dohot akka raja.+

7 “Pasautokku ma parjanjian naung hubahen tu ho+ dohot tu sude pinopparmu. Gabe parjanjian na saleleng ni lelengna ma i tu ho sahat tu pinoppar ni pinopparmu. Au ma na gabe Debatam dohot Debata ni pinopparmu. 8 Lehonokku ma tu ho dohot tu pinopparmu sude luat ingananmu manoppang+ on. Lehonokku ma sude luat Kanaan on gabe appuna ni pinopparmu saleleng ni lelengna. Jala Au ma gabe Debata ni nasida.”+

9 Didok Debata ma muse tu si Abraham, “Ho pe, ikkon ingotonmu do toktong parjanjian naung hubahen tu ho dohot tu pinopparmu sahat tu saleleng ni lelengna. 10 On ma parjanjian naung hubahen dohot hamu, na ikkon ulahononmu dohot pinopparmu: Ikkon disunat+ do sude bawa na adong di tonga-tongamuna. 11 Ikkon disunat* do hamu jala i ma na gabe tanda ni parjanjiakku tu hamu.+ 12 Ikkon disunat do bawa naung marumur ualu ari.+ Jala ikkon disunat do manang ise pe bawa na tubu di jabum, dohot manang ise pe na so pinopparmu, manang na dituhor sian bangso na asing. Marlakku do on sahat tu pinoppar ni pinopparmu. 13 Ikkon disunat do manang ise pe bawa na tubu di jabum, jala manang ise pe bawa na tinuhormu.+ On ma tanda di dagingmuna na patuduhon marlakku do parjanjiakku tu hamu saleleng ni lelengna. 14 Manang ise bawa na so olo disunat* ikkon dipamate do. Ai nungnga dilanggar ibana parjanjian naung hubahen.”

15 Dung i didok Debata ma tu si Abraham, “Unang be jou goar ni istrimi si Sarai.*+ Ai si Sara* nama goarna saonari. 16 Pasu-pasuokku ma ibana jala bahenokku ma asa ditubuhon ibana sada anak di ho.+ Pasu-pasuokku ma ibana, jala sian pinopparna ma ro akka bangso dohot akka raja.” 17 Marsomba ma si Abraham. Mekkel ma ibana jala didok ma di bagasan rohana,+ “Ai dia ma boi marianakkon bawa naung marumur 100 taon! Jala songon dia ma boi si Sara manubuhon anak, hape nungnga 90 taon umurna?”+

18 Didok si Abraham ma muse tu Debata na sittong, “Sai anggiat ma dipasu-pasu Ho si Ismael!”+ 19 Didok Debata ma, “Si Sara istrimi do na lao manubuhon anak di ho. Jala ikkon bahenonmu do goar ni anakmi si Isak.*+ Bahenokku ma parjanjian dohot ibana, jala marlakku do i tu pinopparna saleleng-lelengna.+ 20 Alai hutangihon do pangidoanmu taringot tu si Ismael i. Alani i, pasu-pasuokku do ibana jala bahenokku do massai godang situtu pinopparna. Bahenokku do ibana bapak ni 12 pamimpin, jala bahenokku do ibana gabe bangso na bolon.+ 21 Alai bahenokku ma parjanjian dohot si Isak,+ na ditubuhon si Sara di tikki sisongon on di taon na ro.”+

22 Dung sae Debata makkatai, ditinggalhon Ibana ma si Abraham. 23 Di ari i, disunat* si Abraham ma si Ismael anakna i, dohot sude bawa na tubu di rumah tanggana dohot na dituhor ibana. Disunat ibana do sude bawa na di rumah tanggana i songon naung didok Debata tu ibana.+ 24 Marumur 99 taon ma si Abraham tikki disunat.*+ 25 Jala marumur 13 taon ma si Ismael anakna i tikki disunat.*+ 26 Laos di ari i, disunat ma si Abraham dohot si Ismael anakna i. 27 Disunat ma rap dohot ibana sude bawa na di rumah tanggana, sude bawa na tubu di jabuna, dohot na dituhor sian bangso na asing.

18 Dung i, dipatuduhon Jahowa+ ma dirina tu si Abraham di jonok ni akka hau na balga di Mamre.+ Arian do tikki i, jala mohop hian do ari. Hundul do si Abraham di pintu masuk ni kemahna. 2 Dang dao sian i, diida si Abraham ma adong tolu bawa jongjong.+ Pittor marlojong ma ibana mandapotton nasida jala marsomba ma ibana. 3 Dung i didok ibana ma, “Ale Jahowa, molo lomo do roham mangida au, singgah ma jo Ho tu inganan ni naposomon. 4 Paloas ma dibuat aek saotik asa disussi patmuna i.+ Alai maradi ma jo hamu di toru ni hau on. 5 Ala nungnga ro hamu tu inganakkon, huparade ma di hamu roti, asa margogo hamu muse lao manorusson pardalananmuna.” Dialusi nasida ma, “Mauliate. Bahen ma songon na nidokmi.”

6 Pittor marlojong ma si Abraham mandapotton si Sara tu kemah, jala didok ma, “Hatop, buat ma tolu sea* topung na denggan i, adon ma i jala bahen ma roti.” 7 Marlojong ma muse si Abraham tu inganan ni lombuna. Dipillit ibana ma sada lombu jantan na poso jala na sehat. Dilehon ibana ma i tu parkarejona na hatop paradehon i. 8 Dibuat ibana ma muse mentega, susu, dohot lombu naung diloppa i. Diparade ma i tu jolo ni nasida. Mangan ma nasida jala jongjong do si Abraham di jonok ni nasida di toru ni hau i.+

9 Disukkun nasida ma, “Didia istrim si Sara?”+ Dialusi ibana ma, “Di kemah.” 10 Adong ma sian nasida mandok, “Di taon na ro, di tikki sisongon on, ro dope Au muse. Jala tubuhonon ni si Sara ma sada anak.”+ Dibege si Sara do i, ai di pudina do si Sara di pintu masuk ni kemah i. 11 Nungnga matua si Abraham dohot si Sara.+ Jala nungnga pagodangku umur ni si Sara lao marianakkon.*+ 12 Mekkel ma si Sara di bagasan rohana jala didok ma, “Nungnga kariput au jala nungnga matua tuanku. Tutu do boi hilalaonku las ni roha sisongon i?”+ 13 Didok Jahowa ma tu si Abraham, “Boasa mekkel si Sara i jala didok ibana, ‘Ai dia ma boi au manubuhon anak? Nga matua au.’ 14 Adong na so tarbahen ni Jahowa?+ Di taon na ro, di tikki sisongon on, ro dope Au muse. Jala tubuhonon ni si Sara ma sada anak.” 15 Alai ala mabiar si Sara didok ma, “Dang na mekkel au!” Gabe didok Ibana ma, “Mekkel do ho nakkin.”

16 Tikki naeng borhat akka bawa i, diida nasida ma doppak Sodom.+ Dohot do si Abraham mardalan manaruhon nasida. 17 Didok Jahowa ma, “Dang bahenokku buni sian si Abraham manang aha pe na lao bahenokku.+ 18 Sai na bahenokku do pinoppar ni si Abraham gabe bangso na bolon jala na gogo. Dapotan pasu-pasu ma saluhut bangso alani ibana.+ 19 Nungnga hupajonok dirikku tu si Abraham. Alani i, parettahononna ma tu anakna dohot tu sude pinopparna, asa diihutton nasida dalan ni Jahowa marhite mangulahon na sittong dohot na tigor.+ Ai molo diulahon nasida i, pasauton ni Jahowa ma akka naung dijanjihon i tu si Abraham.”

20 Dung i didok Jahowa ma, “Massai balga do dosa ni halak Sodom dohot Gumora,+ jala nungnga hubege angguk-angguk ni akka halak na susa alani nasida.+ 21 Alani i, ro nama Au asa huida,+ tutu do manang na dang songon i jahat ni pangalaho ni nasida, songon angguk-angguk ni akka jolma i.”

22 Dung i lao ma dua sian akka bawa i tu Sodom. Alai toktong do Jahowa+ rap dohot si Abraham. 23 Dipajonok si Abraham ma dirina jala didok, “Ate, naeng pamateonmu do halak na sittong rap dohot halak na jahat?+ 24 Autsugari ma adong 50 halak na mangulahon na sittong di kota i, pamateonmu do nasida sude? Dang olo Ho manesa dosa ni akka halak na di kota i, alani na 50 halak na mangulahon na sittong i? 25 Dang tarbahen Ho pamatehon halak na sittong rap dohot halak na jahat. Dang mungkin sarupa upa ni halak na mangulahon na sittong dohot upa ni halak na mangulahon na jahat.+ Dang tarbahen Ho i!+ Ai toktong do sittong na binahen ni Hakim ni saluhut tano on.”+ 26 Didok Jahowa ma, “Molo adong 50 halak na mangulahon na sittong di kota Sodom, sesaokku do dosa ni sude halak di kota i alani na 50 halak i.” 27 Dialusi si Abraham ma, “Ale Jahowa, holan orbuk dohot abu do nian au, alai paloas ma jo au manukkun muse tu Ho. 28 Autsugari ma moru lima halak sian na 50 i, pamateonmu do sude halak na di kota i ala moru lima halak?” Didok Debata ma, “Daong. Dang pamateonku halak na di kota i alani na 45 halak i.”+

29 Disukkun si Abraham ma muse, “Boha molo holan 40 halak?” Didok Debata ma, “Dang pamateonku akka halak di kota i alani na 40 halak i.” 30 Dung i didok si Abraham ma muse, “Ale Jahowa, unang ma muruk Ho.+ Paloas ma au manukkun muse: Boha molo holan 30 halak?” Dialusi Ibana ma, “Dang pamateonku nasida molo adong do 30 halak disi.” 31 Didok ibana ma muse, “Ale Jahowa paloas ma au manukkun muse: Boha ma molo holan 20 halak na adong disi?” Didok Ibana ma, “Dang pamateonku nasida alani na 20 halak i.” 32 Ujungna didok ibana ma, “Ale Jahowa, unang ma muruk Ho, paloas ma au makkatai apala sahali nai pe: Boha molo holan sappulu halak do na adong disi?” Dialusi Ibana ma, “Dang pamateonku nasida alani na sappulu halak i.” 33 Dung sae Jahowa makkatai dohot si Abraham, lao ma Ibana+ jala mulak ma si Abraham tu ingananna.

19 Dung naeng borngin, sahat ma suru-suruan na dua i di kota Sodom. Tikki i, hundul do si Lot di gerbang ni kota i. Diida si Lot ma nasida, lao ma ibana mandapotton nasida, jala marsomba ma ibana.+ 2 Didok ibana ma, “Ale tuan, tu jabu ni naposomon ma hamu marborngin asa disussi hami patmuna. Tibu ma hamu dungo manogot asa ditorusson hamu pardalananmuna.” Didok nasida ma, “Dang pola, di lapangan ni kota on ma hami modom.” 3 Alai sai dielek-elek si Lot ma nasida. Ujungna dohot ma nasida tu jabuna. Diparade ibana ma sipanganon, dipanggang ma roti na so marragi, dung i mangan ma nasida.

4 Tikki so modom dope nasida, dihaliangi akka bawa na di kota Sodom i ma jabu i. Disi ma sude akka bawa parhuta i, na poso dohot na matua. 5 Gogo ma soara ni nasida manjou si Lot. Didok ma, “Didia akka bawa na ro tu jabumon? Boan ma nasida kaluar asa mangulahon seks hami dohot nasida.”+

6 Kaluar ma si Lot manjuppangi nasida tu jolo ni pintu. Dung i, ditutup ibana ma pintu ni jabuna. 7 Didok ibana ma, “Ale akka dongan, tolong ma jo unang ulahon hamu na jahat. 8 Adong do dua borukku na so hea dope mangulahon seks. Nasida ma huboan tu hamu, jala bahen ma lomomuna tu nasida. Alai unang hahua hamu akka bawa i, ai na martamu do nasida tu jabukkon.”*+ 9 Didok nasida ma, “Tu sada an ma ho!” Jala didok ma muse, “Na manoppang do ho di kota on. Barani nai ho manguhumi hami! Umhaccit dope bahenonnami tu ho sian tu bawa na dua i.” Dung i dionjar nasida ma si Lot, maju ma nasida naeng manegai pintu i. 10 Sian bagasan ni jabu i, ditarik bawa na dua i ma tangan ni si Lot, asa masuk ibana tu jabu jala ditutup ma pintu i. 11 Dibahen nasida ma mapitung akka bawa na di luar i, mulai sian na poso sahat tu na matua. Alani i, loja ma akka jolma i mangalului pintu ni jabu i.

12 Didok bawa i ma tu si Lot, “Adong dope keluargam na asing dison? Molo adong dope dison helam, anakmu, borum, manang keluargam na asing, boan ma nasida kaluar sian kota on! 13 Naeng dihancurhon nama kota on. Ai nungnga dibege Jahowa angguk-angguk ni halak, alani hajahaton ni halak di kota on.+ Alani i do disuru Jahowa hami manghancurhon kota on.” 14 Lao ma si Lot manjuppangi akka bawa* na lao marhasohotan dohot akka boruna. Sai didok ibana ma tu nasida, “Hatop! Lao ma hamu sian inganan on. Naeng dihancurhon Jahowa nama kota on!” Alai dirippu nasida do na margait-gait si Lot. Alani i, dang porsea nasida tu si Lot.+

15 Tikki naeng bissar mataniari, didok akka suru-suruan i ma tu si Lot, “Hatop! Boan ma istrim dohot borum na dua i, asa unang mate hamu. Ai naeng dihancurhon nama kota on alani dosana!”+ 16 Dipaleleng-leleng si Lot do na borhat i. Alai asi do roha ni Jahowa tu ibana.+ Ditiop bawa na dua i ma tanganna, tangan ni istrina, dohot tangan ni boruna na dua i. Diboan ma nasida kaluar sian kota i.+ 17 Dung sahat nasida diboan tu pinggir ni kota i, didok bawa na dua i ma, “Lao ma hamu, asa mangolu hamu! Unang ida hamu tu pudi.+ Jala unang maradi hamu manang na didia pe di rura on!+ Lao ma hamu tu huta na di dolok asa unang dohot hamu mate!”

18 Dung i didok si Lot ma, “Ale Jahowa, unang ma suru hami lao tusi! 19 Tolong ma jo au! Tutu do nian, nungnga dipatudu Ho asi ni roham tu au naposomon, jala nungnga dipatuduhon Ho haburjuonmu* tu au umbahen na mangolu dope au.+ Alai dang tolap au lao tu huta na di dolok i. Ai mabiar situtu do au hona jea jala gabe mate.+ 20 Tolong ma, tu kota na gelleng na jonok an ma au lao. Boi do au lari tusi? Paloas ma au tusi asa mangolu au.” 21 Didok Ibana ma tu si Lot, “Denggan ma i. Huoloi pe pangidoanmi.+ Dang pola huhancurhon kota na nidokmi.+ 22 Hatop! Lari ma ho tusan. Ai dang boi hubahen manang aha molo so sahat dope ho tusi!”+ Alani i ma digoari kota i Zoar.*+

23 Nungnga bissar mataniari tikki sahat si Lot di Zoar. 24 Diparo Jahowa ma udan belerang dohot api tu kota Sodom dohot Gumora. Sian langit do ro udan i, sian Jahowa.+ 25 Dihancurhon Ibana ma akka kota i dohot sude huta na di rura i, dohot ma i akka jolma na tinggal disi nang akka suan-suanan.+ 26 Tikki i, di pudi ni si Lot do istrina i mardalan. Alai diida istri ni si Lot i ma tu pudi, gabe batu sira ma ibana.+

27 Tibu ma si Abraham dungo jala lao ma ibana tu sada inganan. Di inganan i do ibana hea makkatai dohot Jahowa.+ 28 Diida si Abraham ma doppak Sodom dohot Gumora dohot tu sude luat na adong di rura i. Diida ibana ma nakkok timus na massai hapal sian luat i songon timus na sian tungku na balga.+ 29 Dang lupa Debata tu hata naung pinaboana tu si Abraham. Alani i, tikki naeng dihancurhon Debata akka kota i, disuru Debata do si Lot lao sian kota i. Ai disi hian do ibana tinggal.+

30 Di pudian ni ari, lao do si Lot dohot boruna na dua i sian Zoar. Lao do nasida tu huta na di dolok.+ Ai mabiar do ibana tinggal di Zoar.+ Ujungna, gabe tinggal di sada gua ma ibana rap dohot akka boruna i. 31 Dung i didok boruna siakkangan i ma tu na siappudan i, “Nungnga matua bapa i, jala dang adong bawa di luat on na mangalap hita gabe istrina, songon hasomalan ni akka halak di tano on. 32 Beta, talehon ma anggur inumon ni bapa i. Dung i modom ma hita rap dohot ibana asa adong pinopparta sian ibana.”

33 Borngin i, sai dilehon nasida ma bapakna i minum anggur sahat tu na mabuk. Masuk ma boruna siakkangan i, jala modom ma ibana rap dohot bapakna. Alai dang diboto si Lot naung modom boruna i rap dohot ibana.* 34 Marsogotna i, didok siakkangan i ma tu adekna, “Nungnga rap modom au dohot bapa na bodari. Borngin on, talehon ma ibana muse minum anggur. Dung i, masuk ma ho, jala rap modom ma ho dohot ibana, asa adong pinoppar ni bapa i.” 35 Di borngin i, dilehon nasida ma muse godang anggur inumon ni bapakna i. Dung i, masuk ma boruna siappudan i, jala rap modom dohot bapakna. Alai dang diboto si Lot naung modom boruna i rap dohot ibana.* 36 Hamil ma boru ni si Lot na dua i sian ama ni nasida. 37 Tubu ma anak ni boruna siakkangan i, dibahen ma goarna si Moab.+ Ibana ma bapak ni halak Moab na adong sahat tu sadari on.+ 38 Tubu ma muse anak ni boruna siappudan i. Dibahen ma goarna si Ben-ammi. Ibana ma bapak ni halak Ammon+ na adong sahat tu sadari on.

20 Dipapinda+ si Abraham ma kemahna tu luat Negeb. Jala tinggal ma ibana di huta na di holang-kolang ni Kades+ dohot Sur.+ Tikki tinggal* si Abraham di Gerar,+ 2 didok ibana do muse na ibotona+ do si Sara. Alani i, disuru si Abimelek raja ni Gerar ma halak asa mamboan si Sara tu jolona.+ 3 Di sada borngin, ro ma Debata tu nipi ni si Abimelek. Didok ma, “Anggo ho, ikkon mate do ho ala dibuat ho borua i.+ Ai nungnga muli borua i jala adong do suamina.”+ 4 Alai dang dihahua si Abimelek dope si Sara.* Gabe didok ibana ma, “Ale Jahowa, pamateonmu ma sada bangso hape so marsala nasida? 5 Ai bawa i do na mandok na ibotona borua i, jala borua i pe didok do na itona bawa i. Dang na lao mangulahon na jahat au tu ibana, jala dang huboto na sala na huulahon i.” 6 Didok Debata na sittong i ma tu ibana di nipina, “Huboto do dang naeng mangulahon na jahat ho. Alani i ma huabbati ho, asa unang dihahua ho ibana jala asa unang mardosa ho tu Au. 7 Saonari, paulak ma istri ni bawa i. Ai panurirang*+ do bawa i. Dung i tangiakkononna ma ho+ asa unang mate ho. Molo dang dipaulak ho borua i, ikkon mate do ho dohot sude na adong di rumah tanggam.”

8 Tibu ma si Abimelek dungo manogotna i. Dijou ibana ma sude parkarejona jala dipaboa ibana ma nipina i. Gabe mabiar situtu ma nasida sude. 9 Dijou si Abimelek ma si Abraham jala ninna ma, “Boasa dibahen ho songon on tu hami? Ai aha haroa salakku tu ho umbahen naeng bahenonmu au dohot bangsokkon mardosa na balga? Dang sittong na niulahonmi.” 10 Dung i didok si Abimelek ma muse tu si Abraham, “Boasa ma dibahen ho songon i?”+ 11 Didok si Abraham ma, “Na hurippu do dang adong halak na mabiar tu Debata di inganan on. Gabe didok rohakku ma, ‘Pamateon ni nasida nama au jala buatonna ma istrikki.’+ 12 Alai tutu do ibotokku ibana. Ai saama do hami, alai dang saina. Jala na hubuat do ibana gabe istrikku.+ 13 Tikki disuru Debata au maninggalhon jabu ni bapakku,+ jala lao tu huta ni halak, hudok do tu ibana, ‘Patudu ma holong ni roham* tu au. Manang na tudia pe hita lao, dokkon ma tu ganup halak na ibotom do au.’”+

14 Dung i, dilehon si Abimelek ma biru-biru, lombu, akka parkarejona bawa dohot borua tu si Abraham. Jala dipaulak ibana ma si Sara istri ni si Abraham i. 15 Didok si Abimelek ma muse, “Boi do ho tinggal di tanokkon. Pillit ma didia lomo ni roham.” 16 Didok ibana ma tu si Sara, “Hulehon do 1.000 logam perak tu ibotom.+ On ma na gabe bukti* tu sude halak na rap dohot ho, na ias do ho. Jala on ma tanda tu sude halak na so diulahon ho na sala.” 17 Dung i, martangiang ma si Abraham tu Debata na sittong. Dipamalum Debata ma si Abimelek, istrina, dohot akka hatobanna borua. Alani i, boi ma nasida marianakkon. 18 Ai nungnga dibahen Jahowa mandul* sude borua na adong di rumah tangga ni si Abimelek alani si Sara istri ni si Abraham.+

21 Songon na nidok ni Jahowa i, diingot Ibana do si Sara. Dipasaut Jahowa do janjina taringot tu si Sara.+ 2 Hamil+ ma si Sara jala ditubuhon ibana ma sada anak di si Abraham. Tikki i nungnga matua si Abraham. Tubu do anakna i di tikki naung ditottuhon Debata.+ 3 Dibahen si Abraham ma goar ni anakna na ditubuhon si Sara i si Isak.+ 4 Disunat si Abraham ma si Isak anakna i dung marumur ualu ari, songon na diparettahon Debata tu ibana.+ 5 Marumur 100 taon ma si Abraham tikki tubu si Isak. 6 Dung i, didok si Sara ma, “Nungnga dibahen Debata au mekkel. Jala mekkel ma sude halak na mambege i rap dohot au.”* 7 Didok ibana ma muse, “Ai ise ma huroha na porsea na boi si Sara, istri ni si Abraham manusui dakdanak? Alai saonari, nungnga hutubuhon be sada anak di ibana dung matua ibana.”

8 Lam balga ma anakna i jala dang manusu be. Laos di ari i, dibahen si Abraham ma pesta na balga. 9 Alai diida si Sara ma na sai direhei anak ni si Hagar+ halak Mesir i si Isak.+ (Anak na ditubuhon si Hagar di si Abraham.) 10 Didok si Sara ma tu si Abraham, “Palao ma hatoban borua i dohot anakna i. Ai dang adong bagian ni anak ni hatoban i sian artam. Ai anakku si Isak do na gabe ahli waris!”*+ 11 Alai dang lomo roha ni si Abraham mambege hata ni si Sara taringot tu anakna i.+ 12 Didok Debata ma tu si Abraham, “Unang pola sogo roham tu si Sara alani hatana i taringot tu anakmi dohot hatoban borua i. Tangihon ma ibana.* Ai sian si Isak do pinoppar* na dijanjihon i tu ho.+ 13 Jala bahenokku do sian anak ni hatoban borua i+ sada bangso.+ Ai anakmu do tong ibana.”

14 Manogotna i, tibu ma si Abraham dungo. Dibuat ibana ma roti dohot inganan ni aek na sian kulit. Dilehon ibana ma i tu si Hagar. Jala dipeakkon ma i tu bahuna. Disuru si Abraham ma ibana lao rap dohot anakna i.+ Lao ma si Hagar jala didalani ibana ma gurun na jonok tu Ber-seba.+ 15 Dung habis aek na binoanna i, dionjarhon ibana ma dakdanak i tu toru ni ramba-ramba. 16 Dung i, lao ma ibana agak dao sian i. Hundul ma ibana jala didok ma, “Dang tahan au mangida dakdanak i mate.” Sai tangis ma si Hagar di ingananna hundul i.

17 Dibege Debata ma soara ni dakdanak na tangis i.+ Dijou suru-suruan ni Debata ma si Hagar sian langit. Didok ma,+ “Boasa tangis ho Hagar? Unang mabiar ho. Nungnga dibege Debata be soara ni anakmi. 18 Lao ma ho, alap ma dakdanak i jala togu ma ibana. Ai bahenokku nama ibana gabe bangso na balga.”+ 19 Dibukka Debata ma mata ni si Hagar. Gabe diida ibana ma adong sada sumur. Lao ma ibana tusi, diisi ibana ma inganan ni aek na sian kulit i, jala dilehon ma anakna i minum. 20 Lam magodang ma dakdanak i+ jala sai didongani Debata do ibana. Tinggal di gurun do ibana jala gabe pemanah binatang. 21 Di Gurun Elaparan+ do ibana tinggal, jala dibuat omakna do borua sian Mesir gabe istrina.

22 Di tikki i, ro ma si Abimelek dohot si Pikol pamimpin ni tentarana mandapotton si Abraham. Didok si Abimelek ma, “Sai diurupi Debata do ho manang aha pe diulahon ho.+ 23 Saonari, marsumpa ma ho tu au di jolo ni Debata, na so olo ho manipu au, anakku, dohot akka pinopparhu. Alai ikkon patuduhononmu do burju ni roham* tu au dohot tu sude halak di ingananmon dos songon burju ni rohakku tu ho.”+ 24 Didok si Abraham ma, “Olo, marsumpa pe au.”

25 Alai disukkun si Abraham ma tu si Abimelek taringot tu sumur na dirampas ni akka parkarejo ni si Abimelek.+ 26 Dialusi si Abimelek ma, “Dang huboto ise na mangulahon i. Ai dang hea dipaboa ho i. Jala on dope hubege taringot i.” 27 Dibuat si Abraham ma biru-biru dohot lombu, jala dilehon ma i tu si Abimelek. Dung i dibahen nasida na dua ma sada parjanjian. 28 Tikki dipapulik si Abraham pitu anak ni biru-biruna na boru-boru, 29 didok si Abimelek ma tu si Abraham, “Boasa dipapulik ho anak ni biru-biru na pitu on?” 30 Dialusi si Abraham ma, “Ikkon jaloonmu do anak ni biru-biru boru-boru na pitu on. On ma gabe tanda na patuduhon au do na manggali sumur on.” 31 Alani i ma digoari inganan i Ber-seba.*+ Ai disi do nasida na dua mambahen sumpa. 32 Songon i ma nasida na dua mambahen parjanjian+ di Ber-seba. Dukkon i, mulak ma si Abimelek dohot si Pikol pamimpin ni tentarana i tu luat ni halak Palistim.+ 33 Dung i, disuan si Abraham ma sada hau tamariska di Ber-seba. Disi, dipuji ibana ma goar ni Jahowa,+ Debata na manoktong i.+ 34 Leleng do si Abraham tinggal* di tano ni halak Palistim.+

22 Dung i, diuji+ Debata na sittong i ma si Abraham. Didok ma, “Abraham!” Dialusi si Abraham ma, “Aha i Tuan?” 2 Didok Ibana ma, “Lao ma ho, boan ma si Isak+ anakmu na sasada i, haholongan ni rohami.+ Lao ma hamu tu Moria.+ Pelehon ma ibana gabe pelean situtungon di dolok na lao hupatudu tu ho.”

3 Tibu ma dungo si Abraham manogotna i. Dibola ibana ma akka hau na lao pakkeonna manutung pelean i. Diparade ibana ma halodena. Jala diboan ibana ma si Isak dohot dua hatobanna. Dung i lao ma nasida tu inganan na lao dipatudu Debata na sittong i tu ibana. 4 Dung di ari na patoluhon, boi ma diida si Abraham inganan i sian na dao. 5 Didok si Abraham ma tu hatobanna i, “Dison ma hamu paimahon hami. Lok ma dison halode on. Lao ma jo au dohot anakkon tusan lao marsomba tu Debata. Dung i, mulak pe hami muse tuson.”

6 Dibuat si Abraham ma soban na lao dipakke manutung pelean i jala dibahen ma i tu bahu ni si Isak. Diboan si Abraham ma muse gara ni api dohot piso. Dung i mardalan ma nasida na dua. 7 Didok si Isak ma tu si Abraham, “Bapa!” Dialusi si Abraham ma, “Aha i anakku?” Didok si Isak ma muse, “Nungnga taboan gara ni api dohot soban, alai didia do biru-biru na lao tapelehon i?” 8 Didok si Abraham ma, “Debata do annon na paradehon i anakku. Ibana do na paradehon biru-biru na lao gabe pelean situtungon i.”+ Dung i, ditorusson nasida ma muse mardalan.

9 Ujungna, sahat ma nasida di inganan na dipatudu Debata na sittong i. Dibahen si Abraham ma sada langgatan disi, jala disusun ibana ma akka soban i di ginjang ni langgatan i. Diikkat ibana ma tangan dohot pat ni si Isak. Jala dipeakkon ma si Isak di ginjang ni soban i.+ 10 Dung i, dibuat si Abraham ma piso lao maneat anakna i.+ 11 Dijou suru-suruan ni Jahowa ma ibana sian langit. Didok ma, “Abraham! Abraham!” Dialusi si Abraham ma, “Aha i Tuan?” 12 Didok suru-suruan i ma, “Unang pamate dakdanak i, jala unang hahua ibana. Saonari nungnga huboto be, dihabiari ho do hape Debata, ai rade do ho mangalehon anakmi, anakmu na sasada i tu Au.”+ 13 Diida si Abraham ma tu jolo. Adong ma sada biru-biru jantan na sakkot tandukna di ramba-ramba. Dibuat ibana ma biru-biru i jala dibahen ma i gabe pelean situtungon. Dipelehon ibana ma i gatti ni anakna i. 14 Dibahen si Abraham ma goar ni inganan i Jahowa-jireh.* Alani i do jotjot didok halak, “Paradeonna do i di dolok ni Jahowa.”+

15 Dijou suru-suruan ni Jahowa ma muse si Abraham sian langit, 16 didok ma, “Songon on do didok Jahowa,+ ‘Marsumpa ma Au marhite dirikku sandiri, ala nungnga diulahon ho songon on, jala rade do ho mangalehon anakmi, anakmu na sasada i,+ 17 pasu-pasuokku ma ho, jala bahenokku ma massai godang situtu pinopparmu* songon godang ni bintang di langit, dohot pasir di topi ni laut.+ Jala buaton ni pinopparmu ma akka kota* ni musuna.+ 18 Mandapot pasu-pasu ma sude bangso di tano on alani pinopparmu.+ Ai nungnga dioloi ho hatakku.’”+

19 Dung i, didapotton si Abraham ma akka hatobanna i. Rap mulak ma nasida tu Ber-seba+ jala torus do disi si Abraham tinggal.

20 Dukkon i, adong ma na paboahon tu si Abraham, didok ma, “Nungnga tubu be anak ni si Nahor abangmi sian si Milka.+ 21 Si Us ma siakkangan, dung i si Bus, si Kemuel bapak ni si Aram, 22 si Kesed, si Haso, si Pildas, si Jidlap, dohot si Betuel.”+ 23 Ualu ma anak ni si Milka na ditubuhon di si Nahor abang ni si Abraham. Tubu ma boru ni si Betuel, jala dibahen ma goarna si Rebekka.+ 24 Adong do gundik ni si Nahor, goarna si Reuma. Adong do anakna sian i, i ma si Teba, si Gaham, si Tahas, dohot si Maaka.

23 Dung marumur 127 taon si Sara, mate ma ibana.+ 2 Di Kiriat-arba+ di Hebron,+ di luat Kanaan+ do si Sara mate. Lungun situtu do roha ni si Abraham jala sai diandungi ibana do si Sara. 3 Dung i, ditinggalhon si Abraham ma bakke ni istrina i. Lao ma ibana mandapotton akka halak Het,+ didok ibana ma tu nasida, 4 “Panoppang do au di hutamuna on,+ alai lehon ma jo hutuhor tanomuna i lao kuburan ni istrikku.” 5 Dialusi halak Het i ma si Abraham, 6 “Ale tuannami, pamimpin na pinillit ni Debata* do ho di hami.+ Alani i, kuburhon ma istrimi di kuburan na dumenggan na adong di tanonami on. Sude do hami marlas ni roha mangalehon i tu ho.”

7 Jongjong ma si Abraham jala dipaunduk ma uluna tu halak Het,+ pangisi ni huta i. 8 Didok ibana ma tu nasida, “Molo lomo do rohamuna hukuburhon istrikku dison, dokkon hamu ma tu si Epron anak ni si Zohar 9 asa dijual ibana gua Makpelah na di topi ni ladangna i. Pangido hamu ma asa dijual ibana i tu au di jolomuna, manang sadia pe taho argana.+ Gabe au ma nappunasa i, jala hubahen ma i gabe tano kuburan.”+

10 Tikki i, disi do si Epron rap hundul dohot halak Het i. Dialusi si Epron halak Het i ma si Abraham di jolo ni halak Het na asing dohot akka halak na masuk tu gerbang ni kota i.+ Didok ibana ma, 11 “Ale tuan, tangihon ma au. Hulehon pe ladang i dohot gua na adong disi tu ho. Di jolo ni bangsokkon ma hulehon i tu ho. Kuburhon ma istrimi disi.” 12 Dipaunduk si Abraham ma muse uluna di jolo ni pangisi ni kota i. 13 Didok si Abraham ma tu si Epron di jolo ni akka jolma i, “Tangihon ma pangidoakkon, hutuhor pe sude ladangmi jala hugarar ma i dohot perak. Jalo ma i asa hukubur istrikku disi.”

14 Dung i, dialusi si Epron ma si Abraham, 15 “Ale tuan, tangihon ma jo au. Holan 400 sekel* perak do arga ni tano i, alai unang pola pikkirhon i. Kuburhon ma istrimi disi.” 16 Dung dibege si Abraham hata ni si Epron i, ditimbang ibana ma perak 400 sekel.* Ai nasa i do didok si Epron di jolo ni akka halak Het i. Ditimbang ibana do i mangihutton ukuran na somal dipakke akka partiga-tiga.+ 17 Songon i ma si Epron manggadis tanona na di Makpelah na jonok tu Mamre. Digadis ma ladang, gua, dohot sude hau na di topi ni ladang i 18 tu si Abraham. Digadis ibana do i di jolo ni akka halak Het, dohot di jolo ni akka halak na masuk tu gerbang ni kota i. 19 Dung i, dikuburhon si Abraham ma si Sara di sada gua na di ladang na di Makpelah, jonok ni Mamre, di Hebron, di luat Kanaan. 20 Songon i ma halak Het mangalehon tano ni nasida gabe tano kuburan appuna ni si Abraham. Dilehon nasida do ladang dohot gua i tu ibana.+

24 Nungnga matua situtu be si Abraham, jala dipasu-pasu Jahowa do ibana di sude ulaonna.+ 2 Di sada tikki, dijou si Abraham ma parkarejona na uttua na adong di rumah tanggana, na mangurus sude artana.+ Didok ma tu ibana, “Marjanji ma ho tu au,* 3 jala marsumpa ma ho di jolo ni Jahowa, Debata Sitoppa langit dohot tano on, na so buatonmu boru ni halak Kanaan, i ma inganakku nuaeng, gabe istri ni anakku si Isak.+ 4 Alai lao ma ho tu hutakku, tu inganan ni akka keluargakku.+ Boan ma sian i sahalak borua na lao gabe istri ni anakku si Isak.”

5 Didok parkarejona i ma, “Alai boha ma molo dang olo borua i huboan tuson? Boi do boanokku muse anakmi tu huta i?”+ 6 Alai didok si Abraham ma tu ibana, “Manang sadihari pe, dang boi boanonmu anakki tusi.+ 7 Ai nungnga diboan Jahowa Debata Sitoppa langit au kaluar sian jabu ni bapakku, sian huta ni akka keluargakku+ tu luat on. Jala nungnga marsumpa+ Ibana tu au lao mangalehon luat on+ tu pinopparhu.+ Alani i, suruonna do suru-suruanna lao mangurupi ho,+ asa dapotmu borua sian i lao gabe istri ni anakku.+ 8 Molo dang olo borua i diboan ho tuson, malua ma ho sian parjanjian on. Alai sotung diboan ho anakki tusan.” 9 Marjanji ma parkarejona i tu si Abraham jala marsumpa ma ibana na lao ulahononna sude pangidoan ni si Abraham.+

10 Dibuat parkarejona i ma sappulu unta dohot akka barang na denggan appuna ni tuanna i. Dung i, lao ma ibana tu huta ni si Nahor di Mesopotamia. 11 Adong do sumur di luar ni kota i. So ma ibana disi asa maradi akka unta i. Nungnga botari ibana sahat disi. Somalna, ro do akka borua mangalap aek sian i di tikki sisongon i. 12 Didok ibana ma, “Ale Jahowa Debata ni tuanku si Abraham, urupi ma au asa marhasil ulaonku sadari on, jala patudu ma holong ni roham* tu tuanku si Abraham. 13 Saonari jongjong do au di sumur on. Satokkin nai, ro nama akka boru ni parhuta on mangalap aek. 14 Dohonokku ma tu sahalak sian anak boru i, ‘Lehon ma au minum sian inganan ni aekmi.’ Molo didok ibana, ‘Olo, minum ma ho jala hubuat pe aek inumon ni akka untami,’ ibana ma borua na dipillit Ho di si Isak naposomi. Molo masa on, huboto ma nungnga dipatudu Ho holong ni roham* tu tuanku.”

15 Dang sae dope ibana martangiang, nungnga ro si Rebekka. Diboan ibana do gucci inganan ni aekna di bahuna. Si Rebekka, i ma boru ni si Betuel.+ (Si Betuel, i ma anak ni si Milka+ dohot si Nahor+ abang ni si Abraham.) 16 Massai bagak do anak boru i, perawan do ibana, jala dang hea dope mangulahon seks dohot bawa. Turun ma ibana tu sumur i, diisi ma inganan ni aekna i, dung i nakkok ma ibana muse. 17 Pittor marlojong ma parkarejo ni si Abraham i mandapotton anak boru i. Jala didok ibana ma, “Dia ma jo saotik aek na di guccimi lao inumokku.” 18 Didok borua i ma, “Na ma tuan, minum ma tuan.” Pittor dipaturun ibana ma guccina i sian bahuna, jala ditiop ibana ma i tikki minum parkarejo ni si Abraham i. 19 Dung sae ibana minum, didok borua i ma, “Hubuat pe aek tu akka untamon, asa minum nasida sappe puas.” 20 Adong do disi bak, jala sian i do akka binatang minum. Alani i, pittor diusehon ma aek na sian guccina i tu bak i. Dung i, marlojong ma ibana muse tu sumur mangalap aek i. Torus ma dibahen ibana songon i sahat tu na puas sude unta i minum. 21 Sai sip do parkarejo ni si Abraham i jala longang do ibana mamparrohahon na binahen ni borua i. Sai dipikkiri ibana ma, naung dibahen Jahowa do marhasil ulaonna i manang na dang.

22 Dung sae akka unta i minum, dilehon parkarejo ni si Abraham i ma tu anak boru i sada anting na lao dipakke tu igung. Sian mas do anting i jala boratna satonga sekel.* Dilehon do muse dua golang sian mas, boratna sappulu sekel.* 23 Disukkun parkarejo ni si Abraham i ma, “Ai boru ni ise do ho? Adong do kamar di jabu ni bapakmu lao inganannami marborngin?” 24 Dialusi ibana ma, “Boru ni si Betuel+ do au, si Betuel anak ni si Milka dohot si Nahor.”+ 25 Didok anak boru i ma muse, “Adong do inganan lao marborngin di jabunami. Jala godang do durame dohot sipanganon ni unta di jabunami.” 26 Dung i, marsomba ma parkarejo ni si Abraham i di jolo ni Jahowa. 27 Didok ibana ma, “Pinuji ma Jahowa Debata ni tuanku si Abraham, na toktong patuduhon holong ni rohana* tu tuanku. Jala sai dipasaut Ibana do akka janjina tu tuanki. Nungnga diurupi Jahowa au asa boi ro tu jabu ni abang ni tuanki.”

28 Marlojong ma anak boru i mulak tu jabu ni omakna jala dipaboa ma sude na masa i. 29 Adong do ito ni si Rebekka, goarna si Laban.+ Marlojong ma si Laban tu sumur i mandapotton parkarejo ni si Abraham. 30 Nungnga diida si Laban anting na di igung ni ibotona dohot golang na di tanganna i. Jala nungnga dipaboa si Rebekka tu ibana hata ni parkarejo ni si Abraham. Alani i, pittor marlojong ma ibana tu sumur i, ai disi dope parkarejo ni si Abraham i dohot akka untana. 31 Didok si Laban ma, “Beta ma hita tu jabunami. Ai halak na dipasu-pasu Jahowa do ho. Unang be sai dison hamu. Nungnga diparade hami ingananmu di jabunami dohot inganan ni akka untami.” 32 Dohot ma parkarejo ni si Abraham i tu jabu ni si Laban. Dipaturun ibana* ma akka na diboan ni unta i. Dilehon ma durame dohot sipanganon na asing tu unta i. Dibuat ibana ma muse aek lao manussi pat ni parkarejo ni si Abraham i dohot pat ni akka halak na dohot mandongani ibana. 33 Alai tikki diparade sipanganon tu jolona, didok parkarejo ni si Abraham i ma, “Dang mangan au saleleng so hudok hatakkon.” Gabe didok si Laban ma, “Attong, paboa ma.”

34 Didok ibana ma, “Parkarejo ni si Abraham do au.+ 35 Massai godang do pasu-pasu ni Jahowa tu tuanku, jala dibahen do ibana mamora situtu. Godang do biru-biruna, lombuna, mas dohot perak, unta dohot halode, parkarejo bawa dohot parkarejo borua.+ 36 Asing ni i, dung matua+ si Sara istri ni tuanki, ditubuhon ibana do sada anak di tuanku. Jala tu ibana do lehonon ni tuanki sude artana.+ 37 Alani i, disuru ibana do au marsumpa. Didok ibana do tu au, ‘Unang ma buat boru ni halak Kanaan inganakku tinggal nuaeng gabe istri ni anakku si Isak.+ 38 Alai lao ma ho tu huta ni bapakku, tu inganan ni akka keluargakku.+ Boan ma sian i sahalak borua na lao gabe istri ni anakku.’+ 39 Hudok ma tu tuanki, ‘Alai boha ma molo dang olo borua i huboan tuson?’+ 40 Didok tuanki ma, ‘Nungnga huihutton toktong akka dalan ni Jahowa.+ Suruonna do suru-suruanna+ mandongani ho jala mangurupi ho asa marhasil ulaonmu. Alani i, ikkon sian keluargakku manang sian keluarga ni bapakku+ do buatonmu borua na lao gabe istri ni anakku. 41 Alai molo nungnga pajuppang ho dohot keluargakku, jala dang dipaloas nasida diboan ho anak boru i, malua ma ho sian sumpa i.’+

42 “Sadari on, tikki ro au tu sumur i, martangiang ma au. Hudok ma, ‘Ale Jahowa Debata ni tuanku si Abraham, urupi ma au asa marhasil ulaonkon. 43 Saonari jongjong do au di sumur on. Dohonokku ma tu sahalak sian anak boru+ na ro mangalap aek i, “Lehon ma au minum sian inganan ni aekmi.” 44 Jala molo didok ibana tu au, “Olo, minum ma ho jala hubuat pe aek inumon ni akka untami,” ibana ma borua na dipillit Ho, ale Jahowa di anak ni tuanki.’+

45 “Dang sae dope au martangiang, nungnga ro si Rebekka. Diboan ibana do gucci inganan ni aekna di bahuna. Turun ma ibana mambuat aek sian sumur i. Jala hudok ma tu ibana, ‘Lehon ma jo aekmi inumokku.’+ 46 Pittor dipaturun ibana ma guccina i sian bahuna, jala didok ma, ‘Na ma, minum ma ho.+ Jala hubuat pe aek tu akka untamon.’ Dung i, minum ma au jala dilehon ibana ma minum akka unta i. 47 Husukkun ma muse ibana, ‘Ai boru ni ise do ho?’ dialusi ibana ma, ‘Boru ni si Betuel do au, si Betuel anak ni si Milka dohot si Nahor.’ Dung hubege i, hupasang ma anting di igungna dohot golang di tanganna.+ 48 Dung i, marsomba ma au di jolo ni Jahowa jala hupuji ma Jahowa Debata ni tuanku si Abraham.+ Ai Ibana do na mangurupi au asa boi pajuppang dohot pahoppu ni abang ni tuanki, asa boi hubuat ibana di anakna i. 49 Saonari, paboa hamu ma, na olo do hamu manang na dang patuduhon holong ni rohamuna* jala mambahen na denggan tu tuanki. Molo dang olo hamu, asa huboto manang aha na lao huulahon muse.”*+

50 Dung i didok si Laban dohot si Betuel ma, “Na ro sian Jahowa do on. Alani i, dang tardok hami tu ho olo manang na dang.* 51 Di jolom do si Rebekka. Boan ma ibana gabe istri ni anak ni tuanmi, songon na nidok ni Jahowa i.” 52 Dung dibege parkarejo ni si Abraham i hata ni nasida, pittor marsomba ma muse ibana di jolo ni Jahowa. 53 Dilehon ibana ma muse akka barang na sian mas, perak, dohot akka pakkean tu si Rebekka. Dilehon do muse akka barang na arga tu ibotona dohot tu omak ni si Rebekka. 54 Dung i mangan jala minum ma ibana rap dohot akka halak na mandongani ibana. Jala marborngin ma nasida disi.

Tikki dungo nasida manogotna i, didok ibana ma, “Paloas ma au mulak tu tuanki.” 55 Alai didok iboto ni si Rebekka dohot omakna ma, “Paloas ma jo si Rebekka tinggal dison sappulu ari nai. Dung i lao pe hamu.” 56 Alai didok parkarejo ni si Abraham i ma, “Unang ma abbati hamu au mulak. Ai nungnga marhasil ulaonku dibahen Jahowa. Paloas ma au lao mulak tu tuanku.” 57 Gabe didok nasida ma, “Attong tajou ma si Rebekka, asa tasukkun ibana.” 58 Dijou nasida ma si Rebekka jala didok ma, “Olo do ho lao rap dohot halak on?” Didok si Rebekka ma, “Olo do au.”

59 Dung i dipaloas nasida ma si Rebekka,+ dohot parorotna*+ hian borhat rap dohot parkarejo ni si Abraham dohot akka donganna i. 60 Didok nasida ma hata na denggan tu si Rebekka. Ninna ma, “Ale ito, sai anggiat ma marjuta pinopparmu. Jala sai anggiat ma dibuat akka pinopparmi akka kota* ni halak na marsogo ni roha tu nasida.”+ 61 Nakkok ma si Rebekka dohot akka hatobanna borua tu unta, jala diihutton nasida ma parkarejo ni si Abraham i. Songon i ma parkarejo ni si Abraham i mamboan si Rebekka.

62 Ro ma si Isak sian arah Beer-lahai-roi.+ Ai nungnga di Negeb+ ibana tinggal. 63 Tikki naeng borngin, lao ma si Isak mardalan-dalan di ladang, lao mamikkiri na adong di rohana.+ Dung i, diida ibana ma adong akka unta ro mandapotton ibana! 64 Diida si Rebekka do muse si Isak, alani i pittor turun ma ibana sian unta i. 65 Didok ibana ma tu parkarejo i, “Ai ise do bawa na di ladang i na mardalan mandapotton hita?” Didok parkarejo i ma, “Tuanku do i.” Gabe dibuat si Rebekka ma kain panutup ni uluna lao manutupi bohina. 66 Dipaboa parkarejo ni si Abraham i ma tu si Isak sude na niulahonna i. 67 Dung i diboan si Isak ma si Rebekka tu kemah ni omakna si Sara.+ Songon i ma ibana mambuat si Rebekka gabe istrina. Jatuh cinta do si Isak tu ibana+ jala dang lungun be roha ni si Isak ala naung mate i omakna.+

25 Mangoli ma muse si Abraham. Goar ni istrina i ma si Ketura. 2 Tubu ma anakna. Goarna si Zimran, si Joksan, si Medan, si Midian,+ si Isbak, dohot si Syuah.+

3 Tubu ma anak ni si Joksan, goarna si Syeba dohot si Dedan. Tubu ma anak ni si Dedan.

Goarna si Assusim, si Letusim, dohot si Leummim.

4 Tubu ma anak ni si Midian, goarna si Epah, si Eper, si Hanok, si Abida, dohot si Elda.

Akka on ma pinoppar ni si Ketura.

5 Di pudian ni ari, dilehon si Abraham ma sude artana tu si Isak.+ 6 Alai tu akka anakna na sian akka gundikna, holan hadiah do dilehon si Abraham. Jala tikki mangolu dope ibana, disuru ibana do lao akka anakna i tu luat na di sabola timur, asa dao nasida sian si Isak.+ 7 Leleng ni si Abraham mangolu, i ma 175 taon. 8 Dung i, tos ma hosana jala mate ma ibana. Dikuburhon ma ibana songon akka ompuna i.* Nungnga massai matua ibana tikki na mate i. Jala saleleng ngoluna massai sonang do dihilala ibana. 9 Dikuburhon si Isak dohot si Ismael ma ibana di gua na di Makpelah na di ladang ni si Epron anak ni si Zohar halak Het i, i ma gua na di jonok ni Mamre.+ 10 Nungnga dituhor si Abraham ladang i sian halak Het. Disi do ibana dikuburhon rap dohot si Sara istrina i.+ 11 Dung mate si Abraham, toktong do dipasu-pasu Debata si Isak.+ Jala tinggal di jonok ni Beer-lahai-roi+ do si Isak.

12 On ma sejarah ni si Ismael+ anak ni si Abraham, tubu ni si Hagar+ halak Mesir i, hatoban ni si Sara.

13 On ma akka goar ni anak ni si Ismael, goar ni akka pinopparna: na siakkangan i ma si Nebayot,+ dung i si Kedar,+ si Adbeel, si Mibsam,+ 14 si Misma, si Duma, si Masa, 15 si Hadad, si Tema, si Jetur, si Napis, dohot si Kademah. 16 Akka i ma goar ni anak ni si Ismael. Jala nasida gabe pamimpin ni 12 marga.+ Goar ni nasida do na gabe goar ni huta dohot goar ni perkemahan* ni nasida. 17 Dung marumur 137 taon si Ismael, tos ma hosana jala mate ma ibana. Dung i, dikuburhon ma ibana songon akka ompuna.* 18 Huta na diingani nasida, i ma mulai sian Hevila+ sahat tu Asiria. Hevila i ma huta na jonok tu Sur+ dohot tu Mesir. Jala tinggal do nasida di jonok ni keluarga ni nasida.*+

19 On ma sejarah ni si Isak, anak ni si Abraham.+

Tubu ma anak ni si Abraham. Dibahen ma goarna si Isak. 20 Marumur 40 taon ma si Isak tikki dibuat ibana si Rebekka gabe istrina, i ma iboto ni si Laban halak Aram i. Boru ni si Betuel+ halak Aram na sian Padan-aram do si Rebekka. 21 Mandul do istri ni si Isak i. Alani i, torus ma si Isak martangiang tu Jahowa. Jala ditangihon Jahowa do tangiangna. Gabe hamil ma si Rebekka. 22 Dung i, masitunjangan ma anakna i di bagasan butuhana.+ Didok ibana ma, “Molo songon on do haccitna, tu aha ma au mangolu?” Gabe martangiang ma ibana tu Jahowa lao mamboto boasa masa songon i tu ibana. 23 Didok Jahowa ma tu si Rebekka, “Adong dua anakmu bawa di kandunganmi.+ Jala sian nasida ma ro dua bangso.+ Umgogo do na sada sian na sada nai,+ jala siakkangan ma hatoban ni sianggian.”+

24 Dung i partus ma ibana jala kembar do anakna i! 25 Kaluar ma anakna siakkangan. Marrara do sude dagingna songon halak na mamakke abit na maribbulu.+ Dibahen nasida ma goarna si Esau.*+ 26 Kaluar ma muse adekna, ditiop ibana do tumit ni si Esau.+ Alani i, dibahen ma goarna si Jakkob.*+ Marumur 60 taon ma si Isak tikki na tubu i anakna.

27 Lam magodang ma anakna na dua i. Parburu na jago+ do si Esau, jala jotjot do ibana kaluar lao marburu. Alai anggo si Jakkob, unlomo do rohana tinggal di kemah,+ jala diulahon ibana do na sittong. 28 Umholong do roha ni si Isak tu si Esau. Ai lomo do roha ni si Isak mangallang binatang na diburu si Esau. Alai molo si Rebekka, umholong do rohana tu si Jakkob.+ 29 Tikki mangaloppa bubur kacang si Jakkob, baru mulak marburu do si Esau. Tikki i, loja situtu do dihilala si Esau. 30 Didok si Esau ma tu si Jakkob, “Dia jo saotik* bubur kacang merahmi.* Hatop! Nga loja au!”* Alani i do dibahen goarna si Edom.*+ 31 Dialusi si Jakkob ma, “Hulehon pe i tu ho, alai jual ma hak ni anak siakkangan i tu au!”+ 32 Dialusi si Esau ma, “Olo. Ai nga naeng mate au alani malena! Aha ma gunana di au hak anak siakkangan i?” 33 Didok si Jakkob ma, “Marsumpa ma jolo ho tu au!” Marsumpa ma si Esau, jala dijual ibana ma hakna gabe anak siakkangan i tu si Jakkob.+ 34 Dung i, dilehon si Jakkob ma roti dohot bubur kacang i tu si Esau. Mangan ma si Esau, minum, dung i lao ma ibana muse. Songon i ma si Esau patuduhon na leas rohana tu hakna gabe anak siakkangan.

26 Dung i masa ma haraparon di luat i, songon na hea masa di tikki ni si Abraham.+ Alani i, lao ma si Isak tu Gerar mandapotton si Abimelek raja ni halak Palistim. 2 Tikki di Gerar nasida, dipatuduhon Jahowa ma dirina tu si Isak. Didok ma, “Unang lao ho tu Mesir. Alai lao ma ho tu luat na hupatuduhon tu ho. 3 Di luat on ma ho tinggal gabe panoppang.+ Sai na donganakku do ho jala pasu-pasuokku. Lehonokku do sude luat on tu ho dohot tu pinopparmu.+ Ai na lao pasautokku do sude naung hea hujanjihon tu bapakmu si Abraham.+ Ai hudok do tu ibana, 4 ‘Bahenokku ma massai godang situtu pinopparmu songon godang ni bintang di langit.+ Lehonokku ma sude luat on tu pinopparmu,+ jala dapotan pasu-pasu ma sude bangso di tano on alani pinopparmu.’+ 5 Pasautokku do sudena i, ala sai dioloi si Abraham do hatakku, jala sai diulahon ibana do pangidoakku, parettakku, aturanku, dohot patikku.”+ 6 Alani i, toktong ma si Isak tinggal di Gerar.+

7 Bagak situtu+ do si Rebekka i, alani i sai disukkun akka bawa na di huta i ma taringot tu si Rebekka. Alai didok si Isak do na ibotona+ si Rebekka i. Ai mabiar do ibana dipamate akka halak na di huta i ibana ala naeng mambuat si Rebekka istrina i. 8 Di sada tikki, manatap-natap ma si Abimelek raja ni halak Palistim i sian jandelana. Diida ibana ma si Isak mesra hian* dohot si Rebekka.+ 9 Dijou si Abimelek ma si Isak, jala didok ma tu ibana, “Istrim do hape ibana! Alai boasa didok ho na ibotom ibana?” Didok si Isak ma, “Na mabiar do au dibunu halak alani ibana.”+ 10 Didok si Abimelek ma muse, “Boasa dibahen ho songon i tu hami?+ Boha ma molo adong halak na asing mangulahon seks dohot istrimi? Gabe mardosa ma hami alani ho!”+ 11 Dibahen si Abimelek ma sada paretta tu sude rakyatna. Didok ma, “Ikkon dipamate do manang ise pe na mangulahon na jahat tu bawa on dohot tu istrina!”

12 Disabur si Isak ma boni di ladangna. Di taon i, dapotna ma 100 hali loppit hasilna. Ai dipasu-pasu Jahowa do ibana.+ 13 Mamora ma si Isak. Lam godang ma artana jala mamora situtu ma ibana. 14 Lam godang ma biru-biruna, lombuna, dohot akka hatobanna.+ Alani i, gabe late ma roha ni halak Palistim mangida ibana.

15 Dibuat halak Palistim ma tano lao manutup sude sumur ni si Abraham, i ma sumur na dibahen parkarejo ni si Abraham tikki mangolu dope si Abraham.+ 16 Dung i, didok si Abimelek ma tu si Isak, “Pinda ma hamu sian on, ai nungnga unggodang hamu sian hami.” 17 Alani i, pinda ma si Isak sian i. Dibahen ma kemahna di Rura* Gerar+ jala disi ma ibana maringanan. 18 Digali si Isak ma muse akka sumur naung binahen ni si Abraham hian. Ai nungnga ditutup halak Palistim sumur i dung mate si Abraham.+ Dibahen si Isak do goar ni sumur i sarupa songon goar na binahen ni bapakna.+

19 Digali parkarejo ni si Isak ma akka sumur di rura* i, jala dapot ni nasida ma sada sumur na ias aekna. 20 Alai didok akka parmahan na di Gerar i ma na appuna ni nasida sumur i. Alani i, marbada ma nasida dohot parmahan ni si Isak. Gabe dibahen si Isak ma goar ni sumur i Esek.* Ai marbada do nasida dohot ibana alani sumur i. 21 Dung i, digali nasida ma muse sumur na asing. Alai marbada do muse nasida. Gabe dibahen ibana ma muse goar ni sumur i Sitna.* 22 Pinda ma ibana sian i. Digali ibana ma muse sumur na asing. Jala dang marbada be nasida alani i. Dibahen ibana ma goar ni sumur i Rehobot.* Dung i didok ibana ma, “Saonari nungnga dilehon Jahowa be tu hita inganan na bidang, jala nungnga dibahen hita lam godang.”+

23 Dukkon i, pinda ma ibana tu Ber-seba.+ 24 Borngin i, dipatuduhon Jahowa ma dirina tu si Isak. Didok ma, “Au do Debata na disomba bapakmu si Abraham.+ Unang ho mabiar,+ ai na donganakku do ho. Pasu-pasuokku do ho jala bahenokku do godang pinopparmu, alani janjikku tu si Abraham naposokki.”+ 25 Alani i, dibahen si Isak ma sada langgatan disi jala dipuji ma goar ni Jahowa.+ Dibahen ibana ma kemahna+ jala digali akka parkarejona ma sumur disi.

26 Di pudian ni ari, ro ma si Abimelek sian Gerar mandapotton si Isak. Diboan ibana do si Ahuzat penasehatna, dohot si Pikol pamimpin ni akka tentarana.+ 27 Didok si Isak ma tu nasida, “Boasa ro hamu mandapotton au? Ai sogo do rohamuna tu au, jala diusir hamu do au sian hutamuna.” 28 Dialusi nasida ma, “Nungnga takkas diida hami, sai didongani Jahowa do ho.+ Alani i, tabahen ma parjanjian+ jala marsumpa ma ho tu hami, 29 na so bahenonmu na jahat tu hami. Ai hami pe dang hea dibahen hami na jahat tu ho, burju do hami tu ho, jala denggan do ho dipaborhat hami. Diida hami do na dipasu-pasu Jahowa ho.” 30 Dung i, diparade si Isak ma godang sipanganon di nasida. Mangan ma nasida jala minum. 31 Manogotna i, tibu ma nasida dungo. Marsumpa ma nasida tu si Isak jala si Isak pe marsumpa ma tu nasida.+ Dung i dipaborhat si Isak ma nasida di bagasan dame.

32 Di ari i, ro ma akka parkarejo ni si Isak, dipaboa nasida ma naung juppang ni nasida aek di sumur na digali nasida i.+ 33 Dibahen si Isak ma goar ni sumur i Seba. Alani i do gabe digoari huta i Ber-seba+ sahat tu sadari on.

34 Tikki marumur 40 taon si Esau dibuat ibana do dua boru ni halak Het gabe istrina. Na sada goarna si Judit boru ni si Beeri, na sada nai goarna si Basemat boru ni si Elon.+ 35 Gabe marsak do si Isak dohot si Rebekka alani nasida.+

27 Nungnga matua si Isak jala dang boi be marnida. Dijou ibana ma si Esau+ anak siakkanganna i. Didok ma, “Esau, anakku!” Dialusi si Esau ma, “Aha i bapa!” 2 Didok si Isak ma muse, “Nungnga matua au. Tokkin nai mate nama au. 3 Alani i, buat ma panahmu jala lao ma ho marburu. Boan ma di au sada binatang liar na diburumi.+ 4 Parade ma sipanganon na tabo, silomo ni rohakku jala boan ma i asa hupangan. Dung i, pangidookku ma tu Debata asa dipasu-pasu ho, bissan mangolu dope au.”

5 Alai dibege si Rebekka do tikki si Isak makkatai dohot si Esau anakna i. Alani i, dung lao si Esau marburu tu harangan,+ 6 didok si Rebekka ma tu si Jakkob anakna i,+ “I pe hubege bapakmu dohot abangmu si Esau makkatai. Didok bapakmu do, 7 ‘Boan ma binatang na diburumi, jala parade ma sipanganon na tabo di au. Dung i, pangidookku ma tu Jahowa asa dipasu-pasu ho, bissan mangolu dope au.’+ 8 Alani i anakku, parrohahon ma hatakkon jala ulahon ma.+ 9 Lao ma ho tu inganan ni hambingta. Buat ma dua anak ni hambing na dumenggan, asa huloppa sipanganon na tabo lomo ni roha ni bapakmu. 10 Lehon ma i panganon ni bapakmu. Dung i, pangidoonna ma tu Debata asa dipasu-pasu ho, bissan mangolu dope ibana.”

11 Alai didok si Jakkob ma tu si Rebekka omakna i, “Alai maribbulu+ do si Esau, hape au daong. 12 Boha ma molo dijama bapa au?+ Dirippu ibana ma na mangoto-otoi ibana au jala dang pangidoonna be asa dipasu-pasu Debata au. Gariada, buraanna ma au.” 13 Dung i didok omakna ma tu ibana, “Unang pola mabiar ho anakku. Molo diburai ho, au pe na manaon i. Saonari ulahon ma na hudok i.”+ 14 Lao ma ibana, dibuat ibana ma anak ni hambing i jala dilehon ma i tu omakna. Diloppa omakna ma anak ni hambing i tabo songon lomo ni roha ni bapakna. 15 Dung i, dibuat si Rebekka ma baju ni si Esau na dumenggan na adong di jabuna. Dipakkehon ibana ma i tu si Jakkob.+ 16 Dibahen si Rebekka do muse kulit ni hambing na maribbulu i tu tangan ni si Jakkob dohot tu rukkungna.+ 17 Dung i, diboan ibana ma roti dohot sipanganon na niloppana i. Dilehon ma i tu si Jakkob.+

18 Didapotton si Jakkob ma bapakna ninna ma, “Bapa!” Dialusi ma, “Aha i anakku? Ai ise do ho tahe? Si Esau do manang si Jakkob?” 19 Dialusi si Jakkob ma, “Si Esau do au, anak siakkanganmi.+ Nungnga huboan be pangidoanmi. Saonari hundul ma ho bapa. Jala pangan ma jagal na huburu on. Dung i pangido ma tu Debata asa dipasu-pasu au.”+ 20 Didok si Isak ma tu anakna i, “Ai hatop ma i dapotmu anakku?” Dialusi si Jakkob ma, “Ai diurupi Debata Jahowa do au.” 21 Didok si Isak ma tu si Jakkob, “Pajonok ma tuson anakku, asa boi hujama ho. Asa huboto na tutu do ho si Esau, manang na dang.”+ 22 Dipajonok si Jakkob ma tu si Isak. Dung i, dijama si Isak ma ibana, jala didok ma, “Soaram songon soara ni si Jakkob do. Alai tanganmu songon tangan ni si Esau.”+ 23 Dang diboto si Isak na si Jakkob do na di labbungna i. Ai tikki dijama ibana tanganna, maribbulu do tanganna i songon tangan ni si Esau. Alani i, dipangido si Isak ma asa dipasu-pasu Debata si Jakkob.+

24 Dung i, disukkun si Isak ma muse, “Tutu do ho anakku si Esau?” Dialusi si Jakkob ma, “I do bapa, au do on.” 25 Didok si Isak ma, “Dia ma huallang jagal ni binatang na diburumi, asa hupangido tu Debata asa dipasu-pasu ho.” Diboan si Jakkob ma jagal i dohot anggur. Diallang si Isak ma i jala diinum. 26 Dung i, didok si Isak ma tu ibana, “Pajonok ma tu au anakku, jala umma ma au.”+ 27 Dipajonok ibana ma tu si Isak jala diumma ibana ma bapakna i. Dianggo si Isak ma uap ni pakkeanna,+ jala dipangido si Isak ma asa dipasu-pasu Debata ibana. Didok ma,

“Angur ni anakki songon angur ni ladang na dipasu-pasu Jahowa. 28 Sai anggiat ma dilehon Debata na sittong i nambur na sian langit,+ dohot tano na subur di tano on+ tu ho, asa marlipat ganda sipanganon* dapotmu sian ladangmu jala gok ma anggurmu.+ 29 Oloan ni akka halak ma ho jala unduk ma akka bangso tu ho. Ho ma na gabe tuan ni akka haha anggim jala unduk ma akka pinoppar ni omakmu tu ho.+ Hona bura ma halak na mamburai ho, jala dipasu-pasu ma halak na mangido tu Debata asa dipasu-pasu ho.”+

30 Dung dipangido si Isak asa dipasu-pasu Debata si Jakkob, lao ma si Jakkob. Dang sadia leleng, mulak ma si Esau abangna i sian parburuanna.+ 31 Tabo do diloppa si Esau jagal na diburuna i. Jala diboan ma i tu jolo ni bapakna. Didok ibana ma, “Hundul ma ho bapa, allang ma jagal na huburu on, jala pangido ma tu Debata asa dipasu-pasu au.” 32 Didok si Isak ma, “Ise do ho?” Dialusi si Esau ma, “Au do on, si Esau anak siakkanganmi.”+ 33 Tarsonggot ma si Isak jala busisaon ma ibana, didok ma, “Attong, ise do na lao marburu jala na mangalehon jagalna i tu au? Nungnga huallang nakkin tikki so ro dope ho tuson. Nungnga hupangido asa dipasu-pasu Debata ibana, jala di ibana nama toktong pasu-pasu i!”

34 Dung dibege si Esau hata ni bapakna i, gogo ma ibana tangis jala haccit situtu ma rohana. Didok ibana ma tu bapakna, “Bapa, tolong ma bapa, pangido ma asa dohot au dipasu-pasu Debata!”+ 35 Alai didok si Isak ma, “Ai nungnga digabusi adekmi au, asa boi dapotna pasu-pasu i. Hape lao tu ho hian do i.” 36 Didok si Esau ma, “Patut ma goarna si Jakkob.* Nungnga dua hali dibuat ibana bagianku.+ Na parjolo, dibuat ibana do hakku gabe anak siakkangan.+ Saonari, dibuat ibana do muse pasu-pasu na lao tu au hian!”+ Didok ibana do muse, “Bapa, dang boi be pangidoonmu tu Debata asa dohot au dipasu-pasu?” 37 Alai didok si Isak ma, “Nungnga hubahen ibana gabe tuanmu,+ jala nungnga hudok asa gabe hatobanna sude haha anggina. Jala nungnga hupasu-pasu ibana asa marlipat ganda dapotna sipanganon sian hasil ni ladangna dohot anggurna.+ Dang adong be na boi lehonon ni bapa tu ho ale anakku.”

38 Didok si Esau ma tu bapakna, “Dang adong be apala sada nai pasu-pasu na boi pangidoonmu tu Debata asa dilehon tu au? Tolong ma jo bapa, pangido ma asa dohot au dipasu-pasu.” Dung i, mangangguki ma si Esau.+ 39 Didok si Isak ma,

“Dang subur tano di ingananmu sogot, jala dang turun nambur sian langit tu ingananmi.+ 40 Ikkon pakkeonmu ma podangmu saleleng ngolum,+ jala unduk ma ho mangoloi ibana.+ Alai molo dang tahan be ho, boi do ho malua sian ibana.”+

41 Dukkon i, sogo hian ma roha ni si Esau tu si Jakkob ala gabe tu si Jakkob do pasu-pasu i.+ Didok si Esau ma di bagasan rohana, “Tokkin nai mate nama bapakki.*+ Molo dung mate ibana, pamateonku ma si Jakkob.” 42 Adong ma na paboahon sakkap ni si Esau i tu si Rebekka. Dijou si Rebekka ma si Jakkob jala didok ma, “Bereng! Marsakkap do si Esau abangmi pamatehon ho lao mambalos pambahenanmi. 43 Alani i anakku, saonari ulahon ma hatakkon. Lao ma ho tu Haran tu jabu ni tulangmu si Laban.+ 44 Disi ma ho sahat tu na malum roha ni abangmi, 45 sahat tu na lupa ibana tu pambahenanmi, jala dang muruk be ibana tu ho. Dung i husuru pe halak mangalap ho sian i. Dang olo au molo mate hamu na dua di bagasan sadari.”

46 Dukkon i, sai didok si Rebekka ma tu si Isak, “Susa do ngolukku alani boru ni halak Het i.+ Molo dibuat si Jakkob do boru ni halak Het, boru ni bangso on gabe parumaenku, tumagon nama au mate.”+

28 Dijou si Isak ma si Jakkob, jala dipangido ma tu Debata asa dipasu-pasu ibana. Didok si Isak ma, “Sotung dibuat ho boru ni halak Kanaan on gabe istrim.+ 2 Lao ma ho tu Padan-aram tu jabu ni si Betuel oppungmi.* Buat ma boru ni tulangmu*+ si Laban gabe istrim. 3 Pasu-pasuon ni Debata Pargogo na So Hatudosan i ma ho, jala bahenonna ma massai godang pinopparmu, jala bahenonna ma ho gabe ompu ni godang bangso.+ 4 Lehononna do tu ho dohot tu pinopparmu pasu-pasu na dijanjihon Debata tu si Abraham.+ Ho nama nappuna tano on, tano ingananmu manoppang on, i ma tano naung dilehon Debata tu si Abraham.”+

5 Dipaborhat si Isak ma si Jakkob lao tu Padan-aram mandapotton si Laban, anak ni si Betuel halak Aram i.+ Si Laban, i ma iboto ni si Rebekka,+ omak ni si Jakkob dohot si Esau.

6 Diida si Esau do tikki dipangido si Isak tu Debata asa dipasu-pasu si Jakkob. Jala diboto ibana do na disuru bapakna si Jakkob lao tu Padan-aram mangalului borua gabe istrina. Diboto si Esau do muse na diorai bapakna si Jakkob mambuat boru ni halak Kanaan gabe istrina.+ 7 Jala diboto ibana do muse na dioloi si Jakkob hata ni omakna dohot bapakna i, jala na borhat ibana tu Padan-aram.+ 8 Sian i, diattusi si Esau ma na so lomo roha ni si Isak bapakna i mangida boru ni halak Kanaan.+ 9 Didapotton si Esau ma si Ismael anak ni si Abraham. Dibuat ibana ma si Mahalat gabe istrina, i ma iboto ni si Nebayot anak ni si Ismael. Hape di tikki i, nungnga dua istri ni si Esau.+

10 Lao ma si Jakkob sian Ber-seba, jala torus ma ibana mardalan tu Haran.+ 11 Ujungna, sahat ma ibana di sada inganan. Tikki i, nungnga bonom mataniari. Diparade ibana ma disi ingananna lao marborngin, dibuat ibana ma sada batu gabe bantalna, jala disi ma ibana modom.+ 12 Dung i, marnipi ma si Jakkob. Diida ibana ma adong sada tangga. Timbo ni tangga i mulai sian tano on sahat tu langit. Diida ibana do naek turun akka suru-suruan sian tangga i.+ 13 Diida ibana ma Jahowa adong di ujung ni tangga i. Jala didok ma tu si Jakkob,

“Au do Jahowa Debata ni oppungmu si Abraham, dohot Debata ni si Isak.+ Lao lehonokku do tu ho dohot tu pinopparmu tano ingananmu modom on.+ 14 Songon orbuk ni tano on ma godang ni pinopparmu.+ Marserak ma nasida tu barat, tu timur, tu utara, dohot tu selatan. Jala mandapot pasu-pasu ma sude bangso na di tano on alani ho dohot alani pinopparmu.+ 15 Sai na donganakku do ho, jala jagaokku* do ho manang na tudia pe ho lao. Boanokku do ho mulak tu luat on.+ Dang tadikkonokku ho jala pasautokku do sude na hujanjihon i tu ho.”+

16 Dungo ma si Jakkob, jala didok ibana ma, “On dope huboto, inganan ni Jahowa do on hape.” 17 Mabiar jala longang ma ibana. Didok ibana ma, “Dang songon inganan na biasa hape inganan on. Inganan na badia do on! Dison do hape jabu ni Debata,+ jala on ma gerbang tu surgo.”+ 18 Tibu ma si Jakkob dungo manogotna i. Dibuat ibana ma batu na dipakke gabe bantalna i. Disusun ma batu i gabe batu parningotan. Jala diusehon ma miak tu ginjangna.+ 19 Dibahen ibana ma goar ni inganan i Betel.* Hape najolo, Lus+ do goar ni inganan i.

20 Dung i, marsumpa ma si Jakkob didok ma, “Ale Debata, molo sai didongani Ho do au, dijaga Ho au di pardalanakku, jala dilehon Ho roti sipanganokku dohot pakkeanku, 21 jala molo boi au mulak tu jabu ni bapakku di bagasan dame, botookku ma Ho do Debatakku, ale Jahowa. 22 Batu parningotan on ma na gabe jabum.+ Jala sai na lehonokku do saparsappulu sian sude na nilehonmi tu au.”

29 Dung i, ditorusson si Jakkob ma pardalananna tu luat na di sabola timur. 2 Diida ibana ma adong sumur di gurun. Adong do batu na balga manutup sumur i. Somalna sian sumur i do akka biru-biru minum. Tikki i, adong tolu punguan biru-biru di jonok ni sumur i. 3 Molo dung pungu sude biru-biru i, digulikkon akka parmahan ma batu na manutup sumur i. Dilehon nasida ma minum biru-biru i, dung i ditutup nasida ma muse sumur i.

4 Disukkun si Jakkob ma akka parmahan i, “Ale akka dongan, pardia do hamu?” Didok nasida ma, “Sian Haran+ do hami.” 5 Didok si Jakkob ma muse, “Ditanda hamu do tahe si Laban+ pahoppu ni si Nahor?”+ Didok nasida ma, “Hutanda hami.” 6 Didok si Jakkob ma muse, “Boha do kabarna?” Didok nasida ma, “Sehat do ibana. An ma boruna, na mamboan biru-biru i! Si Rahel+ do goarna.” 7 Didok si Jakkob ma, “Arian dope nuaeng, dang tikkina dope mamboan biru-biru tu kandang. Pasombu ma minum biru-biru i, dung i lehon ma mangan.” 8 Didok nasida ma, “Ikkon jolo pungu do sude biru-biru i dison asa boi hugulikkon hami batu na manutup sumur i. Dung i, hulehon hami ma minum akka biru-biru i.”

9 Tikki makkatai dope nasida, ro ma si Rahel mamboan akka biru-biru ni bapakna. Ai parmahan do ibana. 10 Dung i, diida si Jakkob ma si Rahel boru ni si Laban tulangna i dohot akka biru-biruna. Pittor digulikkon si Jakkob ma batu na manutup sumur i, jala dilehon ma minum akka biru-biru i. 11 Dung i, diumma si Jakkob ma si Rahel jala gogo ma ibana tangis. 12 Dipaboa si Jakkob ma tu si Rahel na markeluarga dope nasida sian bapakna. Ai anak ni si Rebekka do si Jakkob. Pittor marlojong ma si Rahel jala dipaboa ma i tu bapakna.

13 Tikki dibege si Laban+ taringot tu si Jakkob anak ni ibotona i, pittor marlojong ma ibana mandapotton si Jakkob. Dihaol ibana ma si Jakkob, diumma jala diboan tu jabuna. Dung i, dipaboa si Jakkob ma tu si Laban sude na masa tu ibana. 14 Didok si Laban ma tu si Jakkob, “Samudar do hita.”* Dung i, tinggal ma si Jakkob disi saleleng sabulan.

15 Didok si Laban ma tu si Jakkob, “Nang pe markeluarga hita,+ alai molo diurupi ho au ikkon lehonokku do upam.+ Alani i, paboa ma aha lehonokku tu ho.” 16 Adong do dua boru ni si Laban. Si Lea ma na siakkangan, jala si Rahel ma siappudan.+ 17 Dang bagak mata ni si Lea. Alai anggo si Rahel, bagak jala uli do rupana. 18 Lomo do roha ni si Jakkob tu si Rahel. Alani i, didok ibana ma tu si Laban, “Molo olo tulang mangalehon si Rahel+ tu au, olo pe au karejo mangurupi ho saleleng pitu taon.” 19 Didok si Laban ma, “Denggan ma i bere. Ai tumagon do hulehon ibana tu ho sian apala tu halak na asing. Alani i, dison ma ho.” 20 Karejo ma si Jakkob saleleng pitu taon asa boi dapotna si Rahel.+ Alai dang pola leleng i di ibana alani holongna tu si Rahel.

21 Didok si Jakkob ma tu si Laban, “Nungnga dapot be tikkina, lehon ma borumi gabe istrikku, asa marhasohotan hami.”* 22 Dung i, dibahen si Laban ma pesta jala diundang ibana do sude halak na di huta i. 23 Alai borngin i, si Lea do dilehon si Laban tu si Jakkob. Dung i mangulahon seks ma nasida. 24 Dilehon si Laban do muse si Zilpa hatobanna i tu si Lea. Ibana ma na gabe hatoban ni si Lea.+ 25 Manogotna i, diboto si Jakkob ma si Lea do hape donganna sapodoman! Alani i, didok ibana ma tu si Laban, “Boasa dibahen ho songon on tu au tulang? Ai karejo pe au tu ho, asa lehononmu do si Rahel tu au. Boasa digabusi ho au tulang?”+ 26 Didok si Laban ma, “Dang somal di inganannami on parjolo muli sianggian sian siakkangan. 27 Rap ma jo ho dohot borukkon saminggu on. Dung i, hulehon pe anggina i tu ho. Alai ikkon karejo do ho pitu taon nai tu au.”+ 28 Dioloi si Jakkob do hata ni tulangna i. Rap ma ibana dohot si Lea saleleng saminggu i. Dung i dilehon si Laban ma si Rahel gabe istri ni si Jakkob. 29 Asing ni i, dilehon si Laban do muse si Bilha+ hatobanna i gabe hatoban ni si Rahel.+

30 Mangulahon seks ma si Jakkob dohot si Rahel. Umholong do roha ni si Jakkob tu si Rahel sian tu si Lea. Dung i, karejo do si Jakkob pitu taon nai tu si Laban.+ 31 Diida Jahowa ma na umholong roha ni si Jakkob tu si Rahel sian tu si Lea.* Dibahen Ibana ma boi si Lea hamil,*+ alai mandul do si Rahel.+ 32 Hamil ma si Lea, tubu ma anakna jala dibahen ma goarna si Ruben.*+ Ai didok ibana do, “Nungnga diida Jahowa be sitaonokki.+ Saonari holong nama roha ni suamikku tu au.” 33 Hamil ma muse si Lea, tubu ma anakna, jala dibahen ma goarna si Simeon.*+ Ai didok ibana do, “Nungnga ditangihon Jahowa be au, ai dang holong roha ni suamikku tu au. Alani i do dilehon Ibana muse anakkon di au.” 34 Hamil ma ibana muse jala tubu ma anakna. Dibahen ma goarna si Lepi.*+ Ai didok ibana do, “Saonari sai naeng jonok nama suamikki tu au, ai nungnga hutubuhon be tolu anak di ibana.” 35 Hamil ma muse ibana, tubu ma anakna. Dibahen ma goarna si Juda.*+ Ai didok ibana do, “Saonari, pujiokku nama Jahowa.” Dung i, dang hamil be ibana manang na piga-piga leleng.

30 Ala dang adong ditubuhon si Rahel anak di si Jakkob, gabe cemburu ma ibana tu kakakna. Sai didok ibana ma tu si Jakkob, “Lehon ma anak di au, molo dang, mate nama au.” 2 Alani i, muruk situtu ma si Jakkob tu si Rahel. Didok ibana ma, “Ai au huroha Debata? Au huroa na mambahen ho dang boi marianakkon?”* 3 Didok si Rahel ma, “Attong, buat ma si Bilha hatobankon.+ Modom ma ho rap dohot ibana, asa ditubuhon ibana dakdanak di au. Atik boha boi au gabe sahalak ina marhite ibana.” 4 Dilehon ibana ma si Bilha hatobanna i gabe istri ni si Jakkob. Dung i mangulahon seks ma si Jakkob dohot si Bilha.+ 5 Hamil ma si Bilha jala ditubuhon ibana ma anak di si Jakkob. 6 Dung i didok si Rahel ma, “Debata do hakim di au jala nungnga ditangihon ibana be tangiakku. Dilehon ibana do sada anak di au.” Alani i, dibahen ma goar ni dakdanak i si Dan.*+ 7 Hamil ma muse si Bilha hatoban ni si Rahel i. Jala tubu ma anak ni si Jakkob na paduahon sian ibana. 8 Didok si Rahel ma, “Nungnga satonga mate au margulat mangalo kakakku. Alai monang do au!” Alani i do dibahen goar ni anakna i si Naptali.*+

9 Ala dang marianakkon be si Lea sahat tu tikki i, dilehon ibana ma si Zilpa hatobanna i gabe istri ni si Jakkob.+ 10 Ditubuhon si Zilpa hatoban ni si Lea ma sada anak di si Jakkob. 11 Didok si Lea ma, “Maruttung nai au!” Alani i ma dibahen goar ni anakna i si Gad.*+ 12 Tubu ma muse anak ni si Jakkob na paduahon sian si Zilpa hatoban ni si Lea i. 13 Dung i didok si Lea ma, “Las ni rohakki! Sude ma borua mandok au marlas ni roha.”+ Alani i ma digoari ibana anakna i si Aser.*+

14 Tikki musim panen mardalan-dalan ma si Ruben+ di ladang. Adong ma dapotna buah dudaim.* Dilehon ibana ma i tu omakna si Lea. Alai didok si Rahel ma tu si Lea, “Lehon ma jo di au deba buah dudaim na binoan ni anakmi.” 15 Didok si Lea ma tu si Rahel, “Nungnga dibuat ho suamikku.+ Saonari, naeng buatonmu dope muse dudaim ni anakku?” Dialusi si Rahel ma, “Molo dilehon ho di au dudaim ni anakmi, borngin on hupaloas pe ho rap modom dohot si Jakkob.”

16 Botarina i, mulak ma si Jakkob sian ladang. Didapotton si Lea ma ibana jala ninna ma, “Borngin on, au do donganmu modom. Ai nungnga hugarar ho dohot buah dudaim ni anakku.” Alani i, mangulahon seks ma si Jakkob dohot ibana di borngin i. 17 Ditangihon Debata do tangiang ni si Lea. Hamil ma ibana jala ditubuhon ma anak na palimahon di si Jakkob. 18 Didok si Lea ma, “Nungnga dilehon Debata be upa di au. Ai nungnga hulehon hatobanku tu suamikku.” Alani i ma digoari anakna i si Isasar.*+ 19 Hamil ma muse si Lea jala ditubuhon ibana ma anak na paonomhon di si Jakkob.+ 20 Dung i didok si Lea ma, “Nungnga dilehon Debata di au silehon-lehon na massai denggan. Gabe lam diargai suamikki nama au.+ Ai nungnga hutubuhon onom anak bawa+ di ibana.” Alani i ma digoari anakna i si Zebulon.*+ 21 Dukkon i, ditubuhon ibana ma muse sada boru. Dibahen ma goarna si Dina.+

22 Ujungna, diingot Debata ma si Rahel. Dialusi Debata ma tangiangna jala dibahen ma ibana boi hamil.*+ 23 Hamil ma ibana jala tubu ma anakna. Didok ibana ma, “Nungnga diparrohahon Debata be au asa unang marlea di jolo ni jolma!”+ 24 Alani i ma dibahen ibana goar ni anakna i si Josep.*+ Jala didok ibana do, “Nungnga dilehon Jahowa be muse sada anak di au.”

25 Dung tubu si Josep, didok si Jakkob ma tu si Laban, “Paloas ma au mulak tu hutakku mandapotton keluargakku.+ 26 Paloas ma au lao rap dohot akka istri dohot anakku. Ai nungnga karejo au tu ho asa boi dapottu nasida.”+ 27 Didok si Laban ma, “Molo boi, unang ma lao ho. Ai nungnga huida akka tanda na patuduhon alani ho do umbahen na dipasu-pasu Jahowa au.” 28 Didok si Laban ma muse, “Manang aha pe upa na dipangido ho sian au, lehonokku do i tu ho.”+ 29 Dialusi si Jakkob ma, “Takkas do diboto tulang, songon dia lojakku mangurupi ho jala songon dia au manjaga akka binatang appunami.+ 30 Andorang so ro au, saotik dope artam. Alai saonari, nungnga lam godang. Ai dung ro au, dipasu-pasu Jahowa do tulang. Alai, saonari keluargakku nama sarihonokku.”+

31 Didok si Laban ma, “Attong, aha ma lehonokku tu ho?” Dialusi si Jakkob ma, “Unang pola tulang. Hujaga pe muse sude akka binatang appunami. Alai lehon ma pangidoakkon.+ 32 Saonari, beta ma taida sude hambing dohot biru-biru ni tulang i. Pasisi ma sude biru-biru na marbolang-bolang dohot na marbintik-bintik. Pasisi ma sude biru-biru jantan na poso na marwarna coklat. Jala pasisi ma sude hambing boru-boru na marbolang-bolang dohot na marbintik-bintik. Mulai saonari, gabe upakku ma sude hambing dohot biru-biru na sisongon i.+ 33 Di ari na naeng ro, boi do botoonmu na jujur au manang dang, tikki ro ho mangida sude hambing dohot biru-biru bagianku. Molo adong di au hambing boru-boru na so marbolang-bolang dohot na so marbintik-bintik, na hutakko ma i sian tulang. Jala molo adong biru-biru jantan na poso na so marwarna coklat, na hutakko ma i sian tulang.”

34 Didok si Laban ma, “Olo denggan ma i. Taulahon ma songon na didokmi.”+ 35 Di na sadari i, dipasisi si Laban ma sude hambing boru-boru dohot hambing jantan na marbolang-bolang dohot na marbintik-bintik. Dipasisi ibana ma sude hambing na marbintik na bottar. Dipasisi ibana ma muse sude biru-biru jantan na poso na coklat. Jala disuru si Laban ma akka anakna mangurus i. 36 Diboan si Laban ma biru-biru dohot hambing i tu sada inganan. Tolu ari ma lelengna ibana mardalan asa sahat tu inganan i. Alai diparmahan si Jakkob do hambing dohot biru-biru ni si Laban na tinggal i.

37 Dibuat si Jakkob ma akka dakka ni hau storaks, hau almond, dohot hau platanus. Dikupas ibana ma kulit ni hau i, gabe holan na bottar ni hau i ma na tarida. 38 Dung i, dipeakkon ibana ma akka hau na dikupas i di jolo ni akka binatang i tikki ro nasida minum. Dipeakkon ma i di bak inganan panginuman ni binatang i. Dipeakkon ibana do i disi asa di jolo ni akka hau i akka binatang i kawin.

39 Kawin ma hambing dohot biru-biru i di jolo ni akka hau na dikupas i. Maranak ma akka binatang i, jala tubu ma anakna na marloreng-loreng, marbintik-bintik, dohot marbolang-bolang. 40 Dipasisi si Jakkob ma akka anak ni binatang i. Dibahen ibana ma tu jolo ni akka binatang ni si Laban i akka binatang na marloreng dohot binatang na warna coklat. Dung i, dipasisi ibana ma sude binatang appunana sian appuna ni si Laban. 41 Tikki naeng kawin akka binatang na gogo i, pittor dibahen si Jakkob ma akka hau na dikupas i tu bak inganan panginuman i. Alani i, kawin ma akka binatang i tikki diida akka hau i. 42 Alai tikki binatang na gale na lao kawin, dang dipeakkon ibana akka hau na dikupas i disi. Alani i, akka binatang na gale ma na gabe appuna ni si Laban, jala binatang na gogo ma appuna ni si Jakkob.+

43 Lam tamba ma arta ni si Jakkob. Lam godang ma hambingna, biru-biru, halode, dohot untana. Jala godang do hatobanna bawa dohot borua.+

31 Di pudian ni ari, diboto si Jakkob ma hata ni akka anak ni si Laban. Didok nasida do, “Nungnga dibuat si Jakkob be sude arta ni bapakta. Sude hamoraonna i, sian arta ni bapakta do.”+ 2 Diida si Jakkob ma bohi ni si Laban, jala diboto ibana ma dang songon na parjolo i be burjuna.+ 3 Ujungna, didok Jahowa ma tu si Jakkob, “Mulak ma ho tu huta ni bapakmu mandapotton keluargam.+ Sai na donganakku do ho.” 4 Dung i, disuru si Jakkob ma halak mandok tu si Rahel dohot tu si Lea asa ro nasida tu ladang, tu ingananna marmahan. 5 Jala didok ma tu nasida,

“Huparrohahon, dang songon na parjolo i be burju ni bapak i tu au.+ Alai sai didongani Debata na disomba ni bapakku do au.+ 6 Diboto hamu do kan, sian nasa gogokku do hubahen lao karejo mangurupi bapak i.+ 7 Sai diakkali do au, jala nungnga sappulu hali digatti ibana upakku. Alai dang dipasombu Debata au susa. 8 Molo didok bapak, ‘Hambing dohot biru-biru na marbintik ma upam,’ gabe marbintik ma sude anak ni hambing dohot biru-biru na tubu. Alai molo didok ibana muse, ‘Na marbolang-bolang ma upam,’ gabe na marbolang-bolang ma sude anak ni hambing dohot biru-biru na tubu i.+ 9 Alani i, Debata do na mambahen au marhasil. Ibana do na mambuat akka binatang i sian bapakmuna jala dilehon ma i tu au. 10 Dung tikkina lao kawin akka binatang i, marnipi ma au. Sude hambing jantan na kawin tu hambing boru-boru i, i ma hambing jantan na marbintik-bintik dohot na marbolang-bolang.+ 11 Dung i, didok suru-suruan ni Debata na sittong i ma tu au di bagasan nipikku, ‘Jakkob!’ Hualusi ma, ‘Aha i Tuan?’ 12 Didok Ibana* do muse, ‘Nungnga huida be sude na binahen ni si Laban tu ho.+ Alani i, ida ma! Na marbintik-bintik dohot na marbolang-bolang do sude hambing jantan na kawin tu hambing boru-boru i. 13 Au do Debata na sittong na hea manjuppangi ho di Betel.+ Tikki i, diusehon ho do miak tu batu parningotan na binahenmi jala marsumpa do ho tu Au.+ Saonari, lao ma ho, mulak ma ho tu huta hatubuanmu.’”+

14 Didok si Rahel dohot si Lea ma tu si Jakkob, “Dang adong be tinggal manang aha lehonon ni bapa gabe warisan di hami. 15 Songon halak na asing do hami dibahen ibana. Digadis ibana do hami jala nungnga dipahabis ibana hepeng tuhornami i.+ 16 Sude arta na dibuat Debata sian bapa i, hita do nappunasa i dohot ianakkotta.+ Alani i, ulahon ma sude na diparettahon Debata tu ho.”+

17 Dung i borhat ma si Jakkob. Disuru ibana ma akka anakna dohot akka istrina nakkok tu unta.+ 18 Lao ma nasida tu Kanaan tu huta ni si Isak bapakna i.+ Diboan ibana do sude binatang appunana, sude arta naung dipapungu ibana,+ dohot sude binatang na dipapungu ibana di Padan-aram.

19 Tikki lao si Laban manggusting ibbulu ni biru-biruna, ditakko si Rahel ma patung terapim*+ ni bapakna.+ 20 Asing ni i, malo do si Jakkob, dang dipaboa ibana tu si Laban halak Aram i na naeng borhat nama ibana. 21 Lao ma si Jakkob, diboan ibana ma sude na adong di ibana. Ditaripari nasida ma Sunge Euprat,+ jala lao ma nasida doppak huta na di inganan na mardolok-dolok di Gilead.+ 22 Tolu ari dukkon i, adong ma halak na paboahon tu si Laban naung lao si Jakkob. 23 Ditogihon si Laban ma akka keluargana mangalumba si Jakkob. Pitu ari dukkon i, juppangna ma si Jakkob di huta na di inganan na mardolok-dolok di Gilead. 24 Bornginna i,+ ro ma Debata tu nipi ni si Laban halak Aram i.+ Didok ma tu ibana, “Sotung kasar hatam tu si Jakkob.”*+

25 Tikki i, markemah do si Jakkob di huta na di dolok Gilead. Jala dang dao sian inganan i kemah ni si Laban dohot keluargana. Dung i, ro ma si Laban mandapotton si Jakkob. 26 Didok si Laban ma tu si Jakkob, “Boasa dibahen ho songon on tu au? Boasa dioto-otoi ho au jala diboan ho akka borukku lao? Diboan ho do nasida songon mamboan halak na sian parporangan. 27 Boasa dioto-otoi ho au? Sipsip do ho lao jala dang dipaboa ho tu au. Molo dipaboa ho hian tu au, paborhatokku ma ho di bagasan las ni roha. Marende ma hami, marrebana, jala marharpa lao paborhatton hamu. 28 Hape laos so dipaloas ho do au mangumma akka pahoppukki* dohot akka borukki. Haotoon do na binahenmi. 29 Sasittongna, boi do hubahen na jahat tu hamu. Alai na bodari ro do Debata na disomba bapakmu tu au, jala didok do, ‘Sotung kasar hatam tu si Jakkob.’+ 30 Huboto do alani sihol ni roham do umbahen na mulak ho tu huta ni bapakmu. Alai boasa ma takkoonmu akka patung na husomba i?”+

31 Dialusi si Jakkob ma si Laban, “Na mabiar do au tulang, buatonmu muse akka borumi sian au. 32 Saonari, di jolo ni akka keluargatta on, pareso ma akka barang na huboan on. Molo adong appunam disi buat ma. Dang pasombuon mangolu halak na manakko patungmi.” Alai dang diboto si Jakkob naung ditakko si Rahel akka patung i. 33 Lao ma si Laban tu kemah ni si Jakkob, tu kemah ni si Lea, dohot tu kemah ni hatoban ni nasida na dua i.+ Alai dang adong dapotna patung i disi. Dung sian kemah ni si Lea, masuk ma si Laban tu kemah ni si Rahel. 34 Hape nungnga dibuat si Rahel hian akka patung i jala dipamasuk tu palano* ni untana. Hundul ma ibana di ginjang ni palano i. Alani i, tikki dilului si Laban patung i di sude kemah ni nasida, dang adong dapot ni si Laban patung i. 35 Dung i didok si Rahel ma tu bapakna, “Unang ma muruk ho bapa. Dang tolap au jongjong di jolom, ai datang bulan do au.”*+ Sai manat ma dilului si Laban, alai dang dapotna patung terapim i.+

36 Muruk ma si Jakkob jala didok ma tu si Laban, “Aha huroha salakku jala aha huroha dosakku? Boasa sai dilele ho au songon na mangalele parjahat? 37 Nungnga dipareso tulang sude akka barangku. Adong do dapot ni tulang na niluluanmi? Molo adong bahen ma dison, di jolo ni keluargakku dohot di jolo ni keluarga ni tulang, asa nasida na patuduhon ise hita na sittong. 38 Nungnga 20 taon au karejo di jolo ni tulang. Dang hea adong hambing manang biru-birum na keguguran.+ Jala dang hea hubuat biru-biru jantan appuna ni tulang lao allangokku. 39 Molo adong binatang na diallang binatang buas,+ pittor hugatti do i. Dang hea hupatudu i tu tulang. Molo adong na manakko binatang i arian manang borngin, pittor dipangido tulang do asa gattiokku i. 40 Hutaon do las ni ari di arianna i, ngali ni ari di bornginna i, jala jotjot do au dang modom.+ 41 Nungnga 20 taon au tinggal di jabu ni tulang, 14 taon ma au karejo asa boi dapottu borum na dua i. Jala 6 taon ma au manjaga akka binatang appuna ni tulang. Alai sappulu hali ma digatti tulang upakku.+ 42 Autsugari dang didongani Debata ni bapakku+ au, i ma Debata ni si Abraham dohot Debata na dihabiari+ si Isak, pasombuon ni tulang do au lao, jala dang adong lehonon ni tulang boanokku manang aha. Alai nungnga diida Debata hasusaakki dohot lojakku karejo. Alani i do dipasingot Debata tulang na bodari.”+

43 Dialusi si Laban ma si Jakkob, “Borukku do nasida, jala pahoppukku do akka dakdanak i. Akka binatang i pe, appunakku do i sude. Sude na binerengmi appunakku do i dohot appuna ni akka borukkon. Alani i, dang mungkin bahenokku nasida susa. 44 Saonari tabahen ma parjanjian na gabe songon parningotan di au dohot ho.” 45 Alani i, dibuat si Jakkob ma sada batu jala dibahen ma i gabe batu parningotan.+ 46 Didok si Jakkob ma tu keluargana, “Papungu hamu ma akka batu!” Dipapungu nasida ma batu i jala disusun. Dung i mangan ma nasida disi. 47 Dibahen si Laban ma goarna Jegar-sahaduta* alai Galed* do goarna dibahen si Jakkob.

48 Didok si Laban ma, “Batu na disusun on ma na gabe parningotan di au dohot di ho sadari on.” Alani i do dibahen goarna Galed,+ 49 dohot Menara Inganan ni Panjaga. Ai didok ibana do, “Sai anggiat ma Jahowa na toktong mamparrohahon au dohot ho tikki marsirang hita. 50 Molo disusai ho akka borukki jala molo mangoli ho muse, ingot ma nang pe dang diida jolma i, diida Debata do i. Ai Ibana do na gabe saksi di hita.” 51 Didok si Laban ma muse tu si Jakkob, “Ida ma batu na disusun on, batu parningotan na hupajongjong on ma na gabe tanda ni parjanjiatta. 52 Batu na disusun dohot batu parningotan on ma na gabe saksi di hita.+ Tung na so jadi lewat au sian on lao mambahen na jahat tu ho. Suang songon i nang ho, tung na so jadi lewat ho sian on lao mambahen na jahat tu au. 53 Debata ni si Abraham,+ dohot Debata ni si Nahor, Debata ni bapak ni nasida ma na gabe hakim di hita.” Dung i, marsumpa ma si Jakkob di jolo ni Debata na dihabiari si Isak bapakna i.+

54 Dipelehon si Jakkob ma sada binatang tu Debata di dolok i. Ditogihon ibana ma akka keluargana asa rap mangan. Dung i, marborngin ma nasida di dolok i. 55 Tibu ma dungo si Laban manogotna i. Diumma ibana ma akka pahoppuna* i+ dohot akka boruna i. Dipangido ibana ma tu Debata asa dipasu-pasu nasida.+ Dung i mulak ma si Laban tu jabuna.+

32 Tikki di pardalanan si Jakkob, ro ma akka suru-suruan ni Debata mandapotton ibana. 2 Tikki diida si Jakkob nasida, didok ibana ma, “Perkemahan ni Debata do on!” Alani i, dibahen ibana ma goar ni inganan i Mahanaim.*

3 Tikki i, di Seir+ do si Esau, di huta ni halak Edom.+ Disuru si Jakkob ma piga-piga halak lao parjolo mandapotton si Esau. 4 Didok si Jakkob ma tu nasida, “Songon on ma dok tu tuanku si Esau, ‘On ma hata ni naposom si Jakkob, “Saleleng on tinggal dohot si Laban do au.*+ 5 Saonari nungnga adong be lombukku, halode, biru-biru, dohot akka hatobanku bawa nang borua.+ Hupaboa pe on tuan, asa las do roham manjalo au.”’”

6 Mulak ma akka halak na disuru si Jakkob i, didok ma, “Nungnga pajuppang be hami dohot si Esau abangmi. Di pardalanan do ibana nuaeng lao manjuppangi ho. Adong do 400 halak na rap dohot ibana.”+ 7 Mabiar situtu ma si Jakkob jala marsak.+ Dibagi ibana ma akka halak na rap dohot ibana, songon i nang akka biru-biruna, hambing, lombu, dohot akka untana. Dibagi ibana ma i gabe dua kelompok. 8 Didok ibana ma, “Molo ro si Esau mangalo kelompok na sada, boi dope lari kelompok na sada nai.”

9 Martangiang ma si Jakkob. Didok ma, “Ale Jahowa Debata ni ompukku si Abraham, dohot Debata ni bapakku si Isak, Ho do na manuru au mulak tu hutakku, tu huta ni keluargakku. Jala marjanji do Ho lao mangalehon akka na denggan tu au.+ 10 Dang patut nian au manjalo sude holong* dohot burju ni roha na pinatudumi tu au naposomon.+ Tikki hutaripari Sunge Jordan, holan sada tukkot do na adong di au. Hape saonari, nungnga massai godang keluargakku, jala boi do sappe dua kelompok hami.+ 11 Alani i, mangido ma au tu Ho,+ palua ma au sian si Esau abangki. Ai mabiar do au molo ro ibana mangalo au.+ Sotung dihahua ibana akka borua dohot akka dakdanak on. 12 Hape nungnga didok Ho, ‘Sai na lehonokku do akka na denggan tu ho. Bahenokku do massai godang pinopparmu, songon pasir di topi ni laut na so taretong godangna.’”+

13 Marborngin ma si Jakkob disi. Dipillit ibana ma akka binatang lao dilehon tu si Esau abangna i. Akka on ma na dilehon ibana:+ 14 hambing boru-boru 200, hambing jantan 20, biru-biru boru-boru 200, biru-biru jantan 20, 15 unta boru-boru rap dohot anakna 30, lombu boru-boru 40, lombu jantan 10, halode boru-boru 20, dohot halode jantan 10.+

16 Dibagi ibana ma akka binatang i gabe piga-piga bagian, jala dipasahat ma i tu akka parkarejona. Didok si Jakkob ma tu akka parkarejona i, “Parjolo ma hamu manaripar sian au. Bahen hamu ma jarak ni sada punguan tu punguan na asing.” 17 Didok si Jakkob ma tu parkarejona na parjolo lao,* “Molo pajuppang ho dohot abangku si Esau, jala disukkun tu ho, ‘Ise do tuanmu? Na lao tudia do hamu? Jala appuna ni ise do sude binatang on?’ 18 Dokkon hamu ma, ‘Si Jakkob do tuannami, naposomi. Hadiah ni ibana do on tu tuanku si Esau.+ Jala di pudinami do ibana mardalan.’” 19 Didok ibana do muse songon i tu parkarejona na manjaga punguan na paduahon, na patoluhon, dohot punguan na asing. Didok ibana ma, “Songon i ma dokkon hamu molo pajuppang hamu dohot si Esau. 20 jala dokkon hamu ma muse, ‘Di pudinami do si Jakkob naposomi mardalan.’” Ai didok roha ni si Jakkob do, ‘Molo parjolo hulehon hadiah on tu ibana, tottu las ma rohana.+ Jala dang sogo be rohana mangida au tikki pajuppang hami.’ 21 Parjolo ma akka parkarejona na mamboan hadiah i manaripar. Alai anggo si Jakkob di kemah dope marborngin tikki i.

22 Dungo ma ibana tonga borngin jala diboan ibana ma istrina na dua i,+ hatobanna borua na dua i,+ dohot anakna bawa na 11 i. Diboan ibana ma nasida tu inganan na so bagas aekna di Sunge Jabok+ asa boi nasida manaripar. 23 Diboan ma nasida sude dohot artana manaripari sunge* i.

24 Tikki sahalak ni si Jakkob, ro ma sahalak bawa* mandapotton ibana. Margulat ma nasida sahat tu naeng bissar mataniari.+ 25 Tikki diida bawa i na so tolap ibana manaluhon si Jakkob, ditiop ibana ma pakkal ni hae-hae ni si Jakkob. Gabe meret ma pakkal ni hae-hae ni si Jakkob tikki na margulat i nasida.+ 26 Didok bawa i ma, “Palua ma au, ai nungnga naeng bissar mataniari.” Didok si Jakkob ma, “Dang paluaokku ho molo so jolo dipasu-pasu ho au.”+ 27 Didok bawa i ma, “Ise do goarmu?” Didok ibana ma, “Si Jakkob.” 28 Didok bawa i ma, “Mulai saonari, dang si Jakkob be goarmu. Alai si Israel* nama.+ Ai nungnga margulat ho dohot Debata+ nang dohot jolma jala ho do na monang.” 29 Didok si Jakkob ma tu bawa i, “Paboa ma tu au ise goarmu.” Alai didok bawa i ma, “Tu aha botoonmu goarhu?”+ Dung i, dipasu-pasu bawa i ma si Jakkob. 30 Alani i, dibahen si Jakkob ma goar ni inganan i Peniel.*+ Ai didok ibana do, “Nungnga huida bohi ni Debata, alai toktong do au mangolu.”+

31 Nungnga bissar mataniari tikki ditinggalhon si Jakkob huta Penuel.* Haccit* do patna tikki mardalan alani pakkal ni hae-haena i.+ 32 Alani i, dang somal halak Israel sahat tu saonari mangallang urat na adong di hae-hae ni binatang, i ma na adong di sendi ni hae-hae i. Ai nungnga dijama bawa i urat na di sendi ni hae-hae ni si Jakkob.

33 Sian na dao, diida si Jakkob ma nungnga ro si Esau rap dohot 400 halak na mandongani ibana.+ Gabe dilehon ibana ma akka anakna i tu si Lea, tu si Rahel, dohot tu hatoban borua na dua i.+ 2 Dibahen si Jakkob ma hatoban borua na dua i di jolo, rap dohot akka anakna.+ Dung i, ro ma si Lea dohot akka anakna+ mangihutton nasida. Di pudina, ro ma si Rahel+ dohot si Josep. 3 Lao ma si Jakkob tu jolo ni nasida sude, parjolo ma ibana mardalan. Marsomba ma ibana pitu hali* huhut mardalan mandapotton abangna i.

4 Alai marlojong ma si Esau mandapotton si Jakkob. Dihaol ibana ma si Jakkob, diumma, jala tangis ma nasida na dua. 5 Tikki diida si Esau akka borua dohot dakdanak i, disukkun ibana ma, “Ai ise do halak on?” Didok si Jakkob ma, “Nasida ma akka anak na nilehon ni Debata tu au naposomon.”+ 6 Alani i, ro ma hatoban borua na dua i rap dohot akka anakna. Marsomba ma nasida. 7 Ro ma muse si Lea rap dohot akka anakna, marsomba ma nasida. Dung i, ro ma si Josep dohot si Rahel, jala marsomba ma nasida.+

8 Didok si Esau ma, “Nungnga pajuppang au nakkin dohot akka rombongan na disurumi. Ai lao tu aha do i sude?”+ Didok si Jakkob ma, “Asa las do roha ni tuan mangida au tikki pajuppang hita.”+ 9 Didok si Esau ma, “Nungnga godang artakku anggia.+ Buat ma i muse, di ho ma i.” 10 Alai didok si Jakkob ma, “Unang ma songon i tuan, jalo ma. Molo las do roham mangida au, jalo ma hadiah na hulehon i. Huboan pe i, asa boi do huida bohim. Tikki huida bohim, songon na mangida bohi ni Debata do au. Ai denggan do dijalo tuan au.+ 11 Jalo ma hadiah na huboan i.+ Ai nungnga dipasu-pasu Debata au, jala dang adong na hurang di au.”+ Sai dielek-elek si Jakkob do asa olo si Esau manjalo hadiah i.

12 Dung i, didok si Esau ma, “Beta, lao ma hita sian on. Au pe na mardalan di jolomuna.” 13 Alai didok si Jakkob ma, “Ale tuan, gelleng dope akka dakdanak on.+ Jala ikkon jagaokku do akka biru-biru dohot lombu na manusui akka anakna. Holan sadari pe nasida hatop mardalan, mate nama sude binatang on. 14 Parjolo ma ho lao tuan. Huihutton pe ho sahat tu Seir+ ingananmi. Alai nanget-nanget do hami mardalan sian pudi, mangihutton pardalan ni dakdanak dohot akka binatang na huboan on.” 15 Didok si Esau ma, “Attong, lok ma dison tinggal piga-piga naposokkon mandongani hamu.” Alai didok si Jakkob ma, “Dang pola tuan. Holan denggan pe au dijalo ho, nungnga las situtu rohakku.” 16 Di ari i, mulak ma si Esau tu Seir.

17 Borhat ma si Jakkob tu Sukot.+ Dipajongjong ibana ma jabuna disi jala dibahen ibana do kandang tu akka binatang na binoanna i. Alani i do dibahen ibana goar ni inganan i Sukot.*

18 Dung sian Padan-aram,+ lao ma si Jakkob tu kota Sikem+ na di luat Kanaan.+ Dipajongjong ibana ma kemahna di jonok ni kota i. 19 Dituhor ibana ma tano sian anak ni si Hemor bapak ni si Sikem. Arga ni tano i 100 hepeng logam perak.+ Disi ma dipajongjong ibana kemahna. 20 Dibahen si Jakkob ma sada langgatan disi jala dibahen ibana ma goarna, “Debata do Debata ni Israel”.+

34 Adong do boru ni si Jakkob sian si Lea,+ goarna si Dina. Jotjot do ibana mardongan dohot akka anak boru na di kota i.+ 2 Jala adong do sahalak bawa di kota i na sai mangida si Dina. Goar ni bawa i si Sikem, anak ni si Hemor halak Hevi,+ pamimpin ni kota i. Dilarihon ibana do si Dina jala diperkosa. 3 Sai holan tu si Dina do pikkiran ni si Sikem. Ai nungnga jatuh cinta ibana tu si Dina boru ni si Jakkob i. Alani i, sai dirayu ibana ma si Dina* asa olo tu ibana. 4 Ujungna didok si Sikem ma tu si Hemor+ bapakna i, “Bapa, buat ma anak boru i gabe istrikku.”

5 Nungnga diboto si Jakkob naung diperkosa si Dina. Alai tikki i di ladang dope akka anakna marmahan. Alani i, dang dipaboa ibana i manang na tu ise pe sahat tu na mulak nasida. 6 Dang sadia leleng, ro ma si Hemor bapak ni si Sikem mandapotton si Jakkob. 7 Dung dibege akka anak ni Jakkob na masa i, pittor mulak ma nasida sian ladang. Haccit situtu do roha ni nasida jala muruk. Ai na mangaleai Israel do na binahen ni si Sikem i. Diperkosa ibana do si Dina boru ni si Jakkob.+ Ulaon na jahat do na binahenna i.+

8 Didok si Hemor ma tu nasida, “Holong do roha ni anakku si Sikem tu borumi. Lehon ma ibana gabe istri ni anakku. 9 Martondong ma hita. Lehon hamu ma borumuna gabe istri ni anaknami, jala hulehon hami pe akka borunami gabe istri ni anakmuna.+ 10 Pillit hamu ma didia hamu naeng tinggal di kota on. Boi do hamu martiga-tiga jala toktong tinggal dison.” 11 Dung i, didok si Sikem ma tu bapak ni si Dina dohot tu akka iboto ni si Dina, “Lehon ma pangidoakki, hulehon pe manang aha na dipangido hamu. 12 Manang sadia pe taho dipangido hamu sinamotna, manang aha pe hadiah na dipangido hamu sian au,+ lehonokku do i. Asal ma dilehon hamu borumuna i gabe istrikku.”

13 Ala nungnga diperkosa si Sikem iboto ni nasida si Dina, margabus ma akka anak ni si Jakkob mangalusi si Sikem dohot si Hemor. 14 Didok nasida ma, “Dang boi di hami songon i. Dang boi dilehon hami ibotonami tu halak na so marsunat.*+ Ai pattang do i di hami. 15 Alai boi do lehononnami pangidoanmuna i, asal ma olo hamu songon hami. Sude bawa na adong di hamu ikkon disunat.+ 16 Molo diulahon hamu i, lehononnami ma borunami tu hamu. Jala buatonnami ma borumuna di hami. Dison pe hami tinggal jala gabe sada bangso ma hita. 17 Alai molo dang olo hamu disunat, buatonnami ma borunami i jala lao ma hami sian on.”

18 Denggan do i di si Hemor+ dohot di si Sikem anakna i.+ 19 Alani holongna tu boru ni si Jakkob i, pittor diulahon ibana do pangidoan ni akka anak ni si Jakkob.+ Si Sikem do na ussangap di keluarga ni bapakna.

20 Lao ma si Hemor dohot anakna si Sikem tu gerbang ni kota i.+ Didok ma tu akka bawa na di kota i, 21 “Lomo do roha ni halak on mardongan dohot hita. Alani i, tapaloas ma nasida tinggal jala martiga-tiga di hutatta on. Ai bolak dope inganan on jala siat do nasida dison. Molo olo hita manjalo nasida, boi ma buatotta boru ni nasida. Jala nasida pe buaton ni nasida ma borutta.+ 22 Alai asa olo nasida tinggal dison jala gabe sada bangso dohot hita, ikkon disunat ma hita songon nasida. Ikkon disunat do sude bawa na adong dison.+ 23 Molo taoloi pangidoan ni nasida i gabe artatta ma arta ni nasida. Gabe appunatta ma binatang ni nasida. Alani i, taoloi ma pangidoan ni nasida i, asa olo nasida tinggal dohot hita.” 24 Setuju do sude na di gerbang ni kota i tu hata ni si Hemor dohot si Sikem anakna i. Alani i, disunat ma sude akka bawa na disi.

25 Dung tolu ari, tikki haccit dope dihilala nasida, ro ma dua anak ni si Jakkob, abang ni si Dina,+ i ma si Simeon dohot si Lepi tu kota i. Diboan nasida ma podang, alai dang curiga halak na di kota i tu nasida. Dipamate nasida ma sude bawa na disi.+ 26 Dibunu nasida ma si Hemor dohot si Sikem anakna i mamakke podang. Dibuat nasida ma si Dina sian jabu ni si Sikem. Dung i, lao ma nasida sian kota i. 27 Ro ma muse akka anak ni si Jakkob na asing tu kota i. Diida nasida ma akka bawa naung dipamate i. Dipambuati nasida ma akka arta ni halak na disi, ala naung diperkosa i iboto ni nasida.+ 28 Dibuat nasida do hambing, biru-biru, lombu, halode, sude na adong di kota i dohot na di ladang. 29 Dibuat nasida do sude arta, dakdanak, dohot akka istri ni bawa na di kota i. Diboan nasida do sude arta na adong di jabu ni nasida.

30 Didok si Jakkob ma tu si Simeon dohot tu si Lepi,+ “Diparo hamu do jea na massai balga tu au. Alani hamu, gabe sogo ma roha ni* halak Kanaan dohot halak Perisi na tinggal di luat on tu au bapakmuna on. Ai saotik do hita. Tottu marpungu nama nasida sude lao pamatehon au bapakmuna on dohot sude keluargatta.” 31 Alai didok nasida ma, “Attong boasa dibahen nasida ibotonami songon boru-boru na so hasea?”*

35 Dung i, didok Debata ma tu si Jakkob, “Lao ma ho tu Betel+ jala tinggal ma ho disi. Bahen ma disi sada langgatan tu Au, tu Debata na sittong, na patuduhon dirina tu ho tikki na lari i ho sian abangmu si Esau.”+

2 Didok si Jakkob ma tu keluargana dohot tu sude halak na rap dohot ibana, “Bolokkon hamu ma akka patung* na adong di tonga-tongamuna.+ Paias hamu ma dirimuna jala gatti ma bajumuna. 3 Lao ma hita tu Betel. Ai bahenokku ma disi sada langgatan tu Debata na sittong, na mangalusi tangiakku di tikki au susa, jala na sai mandongani au manang tudia pe au lao.”+ 4 Alani i, dilehon nasida ma sude akka patung dohot anting-anting ni nasida tu si Jakkob. Dung i, ditanom* si Jakkob ma i di toru ni hau na balga na jonok tu Sikem.

5 Saleleng di pardalanan, dibahen Debata ma mabiar akka halak na adong di jonok ni kota i tu nasida. Alani i, dang adong na barani mangalo akka anak ni si Jakkob. 6 Ujungna, sahat ma si Jakkob dohot sude halak na rap dohot ibana di Lus,+ i ma Betel na di luat Kanaan. 7 Dibahen si Jakkob ma disi sada langgatan. Dibahen ma goar ni inganan i El-betel.* Ai disi do hea dipatuduhon Debata dirina tu si Jakkob tikki lari ibana sian abangna.+ 8 Dang sadia leleng mate ma si Debora+ parorot ni si Rebekka hian. Dikubur ma ibana di jonok ni Betel di toru ni hau ek.* Alani i do dibahen si Jakkob goar ni inganan i Alon-bakut.*

9 Tikki di pardalanan sian Padan-aram, dipatudu Debata ma muse dirina tu si Jakkob jala dipasu-pasu ma ibana. 10 Didok Debata ma tu ibana, “Si Jakkob+ do goarmu. Alai saonari si Israel nama goarmu.” Mulai sian i, dijou Debata ma ibana si Israel.+ 11 Didok Debata ma muse tu ibana, “Au do Debata Pargogo na So Hatudosan.+ Marpinoppari ma ho asa lam godang pinopparmu. Gabe bapak ni godang bangso ma ho.+ Jala sian pinopparmu* ma ro akka raja.+ 12 Lehonokku ma tu ho tano naung hulehon tu si Abraham dohot tu si Isak, jala lehonokku do i muse tu pinopparmu.”+ 13 Dung sae nasida makkatai, ditinggalhon Debata ma si Jakkob.

14 Dibahen si Jakkob ma sada batu parningotan di inganan ni ibana makkatai dohot Debata. Diusehon ibana ma anggur na gabe pelean tu Debata jala diusehon ibana do muse miak tu atas ni batu i.+ 15 Toktong do Betel+ dibahen ibana goar ni ingananna makkatai dohot Debata i .

16 Borhat ma nasida sian Betel. Tikki dao dope nasida sian Eprata naeng partus ma si Rahel. Alai maol do ditubuhon ibana anakna i. 17 Dung lam haccit dihilala si Rahel didok bidanna i ma, “Unang pola mabiar ho Rahel, ai bawa do na tubu on.”+ 18 Di na lao tos i hosana (ala naeng mate nama ibana), dibahen ibana ma goar ni anakna i si Ben-oni.* Alai dijou bapakna do anakna i si Benjamin.*+ 19 Mate ma si Rahel jala dikubur ma ibana di dalan na tu Eprata na di Betlehem.+ 20 Dibahen si Jakkob ma batu na balga di atas ni kuburan ni si Rahel. Jala disi do batu i sahat tu saonari.

21 Dung i, lao ma si Israel sian i jala dibahen ibana ma kemahna di bariba ni Menara Eder. 22 Tikki di luat i si Israel tinggal, rap modom ma si Ruben dohot si Bilha gundik ni bapakna. Sahat do barita i tu si Israel.+

Adong do 12 anak ni si Jakkob bawa. 23 Akka on ma anak na ditubuhon si Lea, si Ruben+ anak siakkangan ni si Jakkob, dung i si Simeon, si Lepi, si Juda, si Isasar, dohot si Zebulon. 24 Anakna sian si Rahel, i ma si Josep dohot si Benjamin. 25 Anakna sian si Bilha hatoban borua ni si Rahel, i ma si Dan dohot si Naptali. 26 Anakna sian si Zilpa hatoban borua ni si Lea, i ma si Gad dohot si Aser. Akka i ma anak ni si Jakkob na tubu di Padan-aram.

27 Ujungna, sahat ma si Jakkob di huta ni bapakna si Isak. Sahat ma ibana di Mamre+ di Kiriat-arba, di Hebron. Hea do si Abraham dohot si Isak manoppang+ di huta i. 28 Jadi saleleng 180 taon ma si Isak mangolu.+ 29 Tos ma hosana jala mate ma si Isak. Dikuburhon ma ibana songon akka ompuna i.* Nungnga massai matua ibana tikki na mate i. Jala saleleng ngoluna massai sonang do dihilala ibana. Dung i dikuburhon si Esau dohot si Jakkob anakna i ma ibana.+

36 On ma akka pinoppar ni si Esau manang si Edom.+

2 Boru ni halak Kanaan do dibuat si Esau gabe istrina, i ma si Ada+ boru ni si Elon halak Het,+ dohot si Aholibama+ boru ni si Ana pahoppu ni si Zibeon halak Hevi. 3 Dung i, dibuat ibana ma muse si Basemat+ boru ni si Ismael iboto ni si Nebayot+ gabe istrina.

Akka i ma anak ni si Esau na tubu di luat Kanaan. 6 Diboan si Esau ma akka istrina, anakna, boruna, dohot sude na adong di rumah tanggana. Diboan ibana do muse akka binatang dohot arta na dipapungu+ ibana di luat Kanaan. Ditinggalhon ibana ma si Jakkob jala pinda ma ibana tu luat na asing.+ 7 Dang boi be nasida rap tinggal di inganan i,* ai nungnga pagodangku arta ni nasida. Jala dang cukkup be luat i gabe inganan ni akka binatang ni nasida. 8 Lao ma si Esau tu huta na di inganan na mardolok-dolok di Seir+ jala disi ma ibana tinggal. Si Esau do si Edom.+

9 On ma sejarah ni si Esau bapak ni halak Edom, na tinggal di inganan na mardolok-dolok di Seir.+

10 On ma akka anak ni si Esau: si Ada istri ni si Esau manubuhon si Elipas, si Basemat istrina na asing manubuhon si Reguel.+

11 Anak ni si Elipas, i ma si Teman,+ si Omar, si Zepo, si Gatam, dohot si Kenas.+ 12 Adong do gundik ni si Elipas anak ni si Esau, goarna si Timna. Ditubuhon ibana do si Amalek.+ Akka i ma pahoppu ni si Ada istri ni si Esau.

13 Anak ni si Reguel i ma si Nahat, si Jara, si Samma, dohot si Missa. Akka i ma pahoppu ni si Basemat+ istri ni si Esau.

14 Anak ni si Esau sian si Aholibama i ma si Jehus, si Jalam, dohot si Kora. Si Aholibama, i ma boru ni si Ana, pahoppu ni si Zibeon.

15 Akka on ma kepala suku sian pinoppar ni si Esau:+ akka kepala suku na sian anak ni si Elipas anak siakkangan ni si Esau, i ma si Teman, si Omar, si Zepo, si Kenas,+ 16 si Kora, si Gatam, dohot si Amalek. Akka i ma kepala suku na sian pinoppar ni si Elipas+ na di luat Edom. Jala akka i ma pahoppu ni si Ada.

17 Akka on ma anak ni si Reguel, anak ni si Esau: si Nahat, si Jara, si Samma, dohot si Missa. Nasida ma na gabe kepala suku sian pinoppar ni si Reguel di luat Edom.+ Jala nasida do pahoppu ni si Basemat istri ni si Esau.

18 Akka on ma anak ni si Aholibama istri ni si Esau: si Jehus, si Jalam, dohot si Kora. Nasida ma na gabe kepala suku sian pinoppar ni si Aholibama boru ni si Ana.

19 Akka i ma anak ni si Esau na laos digoari si Edom.+ Nasida ma na gabe kepala suku.

20 Akka on ma anak ni si Seir halak Hori penduduk asli ni luat i:+ si Lotan, si Sobal, si Zibeon, si Ana,+ 21 si Dison, si Eser dohot si Disan.+ Nasida ma na gabe kepala suku sian pinoppar ni si Seir halak Hori di luat Edom.

22 Akka anak ni si Lotan i ma si Hori, dohot si Hemam. Iboto ni si Lotan do si Timna.+

23 Akka on ma anak ni si Sobal: si Alpan, si Manahat, si Ebal, si Sepo, dohot si Onam.

24 Akka on ma anak ni si Zibeon:+ si Aya dohot si Ana. Si Ana do na parjolo sahali mangida mata mual air panas tikki marmahan halode ni bapakna ibana.

25 Akka on ma pinoppar ni si Ana: goar ni anakna si Dison jala goar ni boruna si Aholibama.

26 Akka on ma anak ni si Dison: si Hamran, si Esban, si Itran, dohot si Heran.+

27 Akka on ma anak ni si Eser: si Bilhan, si Zaawan, dohot si Akan.

28 Akka on ma anak ni si Disan: si Us dohot si Aran.+

29 On ma akka kepala suku ni halak Hori: si Lotan, si Sobal, si Zibeon, si Ana, 30 si Dison, si Eser, dohot si Disan.+ Nasida ma kepala suku ni halak Hori di luat Seir.

31 On ma akka raja na mamaretta di luat Edom+ tikki dang adong dope raja ni halak Israel.+ 32 Si Bela anak ni si Beor ma na mamaretta di kota Dinhaba na di Edom. 33 Dung mate si Bela, si Jobab anak ni si Jara na sian huta Bosra ma na manggattihon ibana gabe raja. 34 Dung mate si Jobab, si Husam na sian luat ni halak Teman ma na manggattihon ibana gabe raja. 35 Dung mate si Husam, si Hadad anak ni si Bedad ma na manggattihon ibana gabe raja. Goar ni kotana Apit. Si Hadad do na manaluhon halak Midian+ na di luat Moab. 36 Dung mate si Hadad, si Samla na sian huta Masreka ma na manggattihon ibana gabe raja. 37 Dung mate si Samla, si Saul na sian huta Rehobot na di jonok ni sunge i ma na manggattihon ibana gabe raja. 38 Dung mate si Saul, si Baal-hanan anak ni si Akbor ma na manggattihon ibana gabe raja. 39 Dung mate si Baal-hanan anak ni si Akbor, si Hadar ma na manggattihon ibana gabe raja. Goar ni kotana Pahi, jala goar ni istrina si Mehetabel boru ni si Materet pahoppu ni si Mesahab.

40 Akka goar ni kepala suku na sian pinoppar ni si Esau do na dibahen gabe goar ni keluarga dohot goar ni inganan ni nasida. Goar ni nasida, i ma si Timna, si Alpa, si Jete,+ 41 si Aholibama, si Elah, si Pinon, 42 si Kenas, si Teman, si Mibzar, 43 si Magdiel, dohot si Iram. Akka i ma goar ni kepala suku na sian pinoppar ni si Esau. Jala mangihutton goar ni nasida do dibahen goar ni akka inganan ni nasida di luat i.+ Nasida ma sude pinoppar ni si Esau bapak ni halak Edom.+

37 Toktong do si Jakkob tinggal di tano Kanaan. Disi hian do bapakna maringanan.*+

2 On ma sejarah ni si Jakkob.

Tikki marumur 17 taon si Josep,+ manjaga biru-biru+ do ibana rap dohot akka anak ni si Bilha+ dohot si Zilpa+ istri ni bapakna. Sai dipaboa si Josep do tu bapakna akka na roa na dibahen akka abangna i. 3 Sian sude akka anakna,+ tu si Josep do na umholong roha ni si Israel. Ai nungnga matua ibana tikki tubu si Josep. Dibahen ibana do sada jubah* na massai bagak jala dilehon ma i tu si Josep. 4 Tikki diida akka abangna na umholong roha ni bapakna tu si Josep, gabe sogo ma roha ni nasida tu si Josep. Jala sai kasar do nasida makkatai tu ibana.

5 Di sada tikki, marnipi ma si Josep jala dipaboa ibana ma i tu akka abangna.+ Alani i, gabe lam sogo ma roha ni nasida tu ibana. 6 Didok si Josep ma tu nasida, “Bege hamu ma, asa hupaboa nipikkon. 7 Mangikkat gandum ma hita di ladang. Dung i jongjong ma gandum na huikkat i. Gandum na diikkat hamu pe jongjong do jala makkaliangi gandum na huikkat i. Marsomba do gandummuna i tu gandum na huikkat i.”+ 8 Alani hatana i dohot nipina i, gabe lam sogo ma roha ni akka abangna tu ibana. Ai didok nasida do, “Maksudmu, gabe ho ma rajanami?”+

9 Dung i, marnipi ma muse si Josep jala dipaboa ibana do i tu akka abangna. Didok ibana ma, “Marnipi do au muse. Di nipikki marsomba do tu au mataniari, bulan, dohot 11 bintang.”+ 10 Dung i dipaboa si Josep ma i tu bapakna dohot tu akka abangna. Dipissang bapakna ma si Josep. Didok ma, “Ai aha do maksud ni nipimi? Jadi ninna roham, ro ma au, omakmu, dohot akka abangmu marsomba tu jolom?” 11 Gabe lam sogo ma roha ni akka abangna i tu si Josep.+ Alai sai dipikkiri bapakna i do nipi ni si Josep i.

12 Di sada tikki, lao ma akka abangna i mamboan hambing dohot biru-biru ni bapakna tu inganan na jonok tu Sikem.+ 13 Didok si Israel ma tu si Josep, “Lao ma jo ho amang tu jonok ni Sikem. Disi do akka abangmu nuaeng marmahan hambing dohot biru-biru.” Didok si Josep ma, “Olo bapa. Lao pe au!” 14 Didok si Israel ma tu si Josep, “Lao ma jo ho tusan, ida ma jo akka abangmu. Ida ma jo akka hambing dohot biru-biru i. Dung i mulak ma ho paboahon kabar ni nasida tu au.” Lao ma si Josep sian Rura Hebron+ tu arah Sikem. 15 Dung i adong ma sahalak bawa na mangida si Josep lulu-lulu di luat i. Didok bawa i ma, “Ai ise na niluluanmu?” 16 Didok si Josep ma, “Na mangalului akka abangku do au, na marmahan hambing dohot biru-biru. Diboto amang do didia nasida?” 17 Didok bawa i ma, “Nungnga lao nasida. Hubege, tu Dotan do nasida lao.” Dung i, lao ma si Josep mandapotton akka abangna i. Jala pajuppang ma nasida di Dotan.

18 Tikki diida nasida si Josep sian na dao, dilului nasida ma cara lao mambunu ibana. 19 Didok nasida ma sama nasida, “Bereng! Nungnga ro be siparnipi i.+ 20 Beta, tabunu ma ibana jala tapamasuk tu lubang ni aek. Dung i, tadok ma naung diallang binatang buas ibana asa taida jo, saut do nipina i manang na dang.” 21 Tikki dibege si Ruben i,+ dilului ibana ma cara asa unang dipamate si Josep. Didok ibana ma, “Unang ma tapamate ibana.”+ 22 Didok si Ruben ma muse, “Unang pola pamate ibana,*+ jala unang hahua hamu ibana.+ Sappatton hamu ma ibana tu lubang ni aek na di tombak i.” Didok si Ruben pe songon i, asa unang dipamate do si Josep jala asa boi ibana mulak muse tu bapakna.

23 Dung sahat si Josep di inganan ni akka abangna i, dibukka akka abangna i ma jubah ni si Josep. Tikki i, jubah na massai bagak i do na dipakke ibana.+ 24 Diboan nasida ma ibana sian i. Dung i disappatton tu lubang ni aek. Alai tikki i, dang adong aek di lubang i.

25 Tikki mangan nasida, diida nasida ma rombongan ni halak Ismael+ lewat sian i. Sian Gilead do nasida naeng lao tu Mesir. Akka unta ni nasida mamboan gota na angur,* miak balsam,* dohot kulit ni hau.*+ 26 Didok si Juda ma tu abangna dohot tu adekna, “Aha ma gunana di hita molo tabunu+ anggitta i jala tatabunihon na tabahen i? 27 Beta, tajual ma ibana+ tu halak Ismael i. Unang pola tahahua ibana. Dung i muse, anggitta do ibana jala samudar dope hita.” Setuju do akka haha anggina tu hatana i. 28 Tikki lewat halak Ismael*+ partiga-tiga i, diangkat nasida ma si Josep sian lubang ni aek i. Dijual nasida ma si Josep tu halak Ismael i 20 logam perak.+ Jala diboan ma ibana tu Mesir.

29 Dang sadia leleng, lao ma si Ruben tu lubang i. Dang disi be si Josep diida ibana. Gabe diribak ibana ma pakkeanna. 30 Tikki dijuppangi si Ruben akka adekna i, didok ibana ma tu nasida, “Dang disi be dakdanak i! Boha nama bahenokku?”

31 Dung i, diseat nasida ma sada hambing jantan. Dibuat nasida ma jubah ni si Josep i jala disornoppon tu mudar ni hambing i. 32 Disuru nasida ma halak mamboan jubah i tu bapakna. Jala disuru ma asa didok songon on, “Dapotnami jubah on. Ida ma jo! Appuna ni anakmu do on, manang na dang.”+ 33 Dipareso ibana ma jubah i, jala ninna ma, “I do, jubah ni anakku do on! Nungnga dipamate binatang buas be ibana jala nungnga diallang be si Josep anakki!” 34 Diribak si Jakkob ma abitna. Dibahen ibana ma abit goni tu gottingna jala mangandungi* ma ibana saleleng piga-piga ari. 35 Ro ma sude akka anakna dohot boruna mangapuli ibana. Alai dang olo ibana diapuli. Ai didok ibana do, “Mangandungi nama au torus alani anakki, sahat tu na mate au!”*+ Sai mangandungi ma bapakna i alani si Josep.

36 Dung sahat di Mesir, dijual halak Ismael i ma si Josep tu si Potipar, pejabat istana ni si Firaun+ jala kepala ni akka pengawal.+

38 Dang sadia leleng, ditinggalhon si Juda ma akka abangna dohot adekna. Dibahen ibana ma kemahna di jonok ni inganan ni si Hira halak Adullam i. 2 Adong do diida si Juda sahalak borua halak Kanaan,+ goarna si Sua. Dibuat ibana ma borua i gabe istrina, jala mangulahon seks ma nasida. 3 Hamil ma istrina i, tubu ma anakna jala dibahen ma goarna si Er.+ 4 Hamil ma ibana muse, tubu ma anakna jala dibahen ma goarna si Onan. 5 Tubu ma muse anakna. Dibahen ma goarna si Sela. Tikki na tubu i si Sela, di Aksib+ do si Juda.

6 Di pudian ni ari dibuat si Juda ma sahalak borua gabe istri ni si Er anak siakkanganna i. Goar ni borua i si Tamar.+ 7 Alai sai dibahen si Er anak siakkangan ni si Juda i do sogo roha ni Jahowa. Alani i, dipamate Jahowa ma ibana. 8 Didok si Juda ma tu si Onan, “Kawin ma ho dohot istri ni abangmu na mabalu i. Ulahon ma tanggung jawabmu tu ibana. Ai ho do anggi ni suamina na mate i. Mangulahon seks ma hamu asa adong pinoppar ni abangmi.”+ 9 Alai diboto si Onan do dang na lao gabe pinopparna dibahen anakna na lao tubu i.+ Alani i, tikki mangulahon seks ibana dohot istri ni abangna na mabalu i, dibolokkon ibana do air manina tu tano. Alani i, dang adong saut pinoppar ni abangna na mate i.+ 10 Sogo do roha ni Jahowa tu pambahenan ni si Onan i. Alani i, dipamate Debata ma ibana.+ 11 Didok si Juda ma tu si Tamar parumaenna i, “Mulak ma ho tu jabu ni bapakmu. Disi ma ho sahat tu na balga anakku si Sela. Jala unang ma muli ho manang na tu ise pe.” Ai didok si Juda do di bagasan rohana, ‘Sotung mate annon anakki songon abangna i.’+ Ujungna, mulak ma si Tamar tu jabu ni bapakna.

12 Dung piga-piga leleng, mate ma istri ni si Juda boru ni si Sua.+ Dung salpu lungun ni rohana, lao ma si Juda rap dohot si Hira halak Adullam i+ tu Timna.+ Disi do digusting ibbulu ni biru-biruna. 13 Adong do halak na paboahon i tu si Tamar. Didok ma, “Lao do simatuam tu Timna lao manggusting ibbulu ni biru-biruna.” 14 Tikki i, dipakke si Tamar do baju na patuduhon ibana mabalu. Alani i tikki dibege barita i, dibukka si Tamar ma bajuna i. Ditutup ibana ma uluna jala dipakke ibana ma salendang lao manutupi dirina. Hundul ma ibana di gerbang ni kota Enaim. Sian kota i do dalan tu Timna. Ai diboto si Tamar do naung balga si Sela, alai dang marna dilehon gabe suamina.+

15 Tikki diida si Juda borua i, dirippu ibana do si Tamar i sahalak boru-boru na so hasea. Ai ditutup si Tamar do bohina. 16 Didapotton si Juda ma ibana tu pinggir ni dalan i. Jala ninna ma, “Olo do ho rap modom dohot au?” Ai dang diboto si Juda na parumaenna i.+ Didok borua i ma, “Aha ma lehononmu tu au molo olo au modom dohot ho?” 17 Didok si Juda ma, “Hukirim pe annon sada anak ni hambing tu ho.” Didok borua i ma, “Alai tinggalhon ma di au tanda na patuduhon pasautonmu do janjimi.” 18 Didok si Juda ma muse, “Attong aha ma tinggalhonokku di ho?” Didok si Tamar ma, “Lehon ma tu au cincin cap,+ tali, dohot tukkot na di tanganmi.” Dilehon si Juda ma i sude tu ibana. Mangulahon seks ma nasida jala hamil ma si Tamar. 19 Dukkon i, lao ma si Tamar. Dibukka ibana ma salendangna i jala dipakke ma muse baju na patuduhon na mabalu ibana.

20 Disuru si Juda ma donganna halak Adullam i+ manaruhon anak ni hambing i. Jala disuru ibana do halak Adullam i manjalo barang jaminan na dilehon ibana tu borua i. Alai dang juppang ni donganna i borua i. 21 Disukkun halak Adullam i ma parhuta i. Didok ma, “Didia do tahe boru-boru na so hasea* na jotjot hundul di dalan na lao tu Enaim on?” Didok nasida ma, “Dang hea adong boru-boru na so hasea dison.” 22 Mulak ma halak Adullam i jala didok ma tu si Juda, “Dang juppangku borua i. Jala didok parhuta i, dang adong boru-boru na so hasea disi.” 23 Didok si Juda ma, “Lok ma di ibana akka barang i. Unang pola talului be ibana asa unang dipaila halak hita. Pokokna, nungnga ditaruhon anak ni hambing i, ibana do na so disi.”

24 Hira-hira tolu bulan dukkon i, adong ma na mandok tu si Juda, “Nungnga gabe boru-boru na so hasea be si Tamar parumaenmi. Ai hamil do ibana saonari.” Didok si Juda ma, “Boan ma ibana tu luar ni kota jala tutung ma ibana.”+ 25 Tikki diboan ibana tu luar, disuru ma halak mandok tu simatuana, “Nungnga hamil au dibahen halak nappunasa barang on.” Didok ibana ma muse, “Pareso ma jo amang appuna ni ise do cincin cap, tali, dohot tukkot on.”+ 26 Dung dipareso si Juda akka barang i, didok ibana ma, “Ibana do na sittong, au do na sala. Ai dang hulehon si Sela anakki gabe suamina.”+ Mulai sian i, dang mangulahon seks be si Juda dohot si Tamar parumaenna i.

27 Dung dapot tikkina, tubu ma anakna, jala kembar do anakna i. 28 Tikki naeng partus si Tamar, kaluar ma sada tangan ni poso-posona i. Pittor dibuat bidan ma bonang na merah jala diikkatton ma i tu tangan ni poso-poso i. Ai didok ibana do, “On do na parjolo tubu.” 29 Disi ditarik poso-poso i tanganna tu bagasan, kaluar ma poso-poso na sada nai. Didok bidan i ma, “Boasa diribak ho bortian ni omakmu?” Alani i, dibahen ma goarna si Peres.*+ 30 Dung i tubu ma abangna. Ikkat do bonang na merah di tanganna. Alani i, dibahen ma goarna si Jara.+

39 Sahat ma si Josep di Mesir.+ Halak Ismael i+ do na mamboan ibana tusi. Dung i, dijual ma ibana tu si Potipar,+ pejabat istana ni si Firaun jala kepala ni akka pengawal. 2 Dibahen ma ibana karejo di jabu ni tuanna halak Mesir i. Sai didongani Jahowa do ibana.+ Alani i, marhasil do sude na diulahon ibana. 3 Diida tuanna i do na didongani Jahowa ibana jala sai marhasil sude ulaonna dibahen Jahowa.

4 Lam lomo ma roha ni si Potipar tu si Josep. Pos situtu ma rohana tu si Josep. Dipillit ma ibana gabe pengawas di jabu ni si Potipar, jala dipasahat do sude arta ni si Potipar tu ibana. 5 Mulai sian i, dipasu-pasu Jahowa ma sude ulaon na adong di jabu ni halak Mesir i alani si Josep. Jala dipasu-pasu Jahowa do sude na adong di jabuna dohot na di ladangna.+ 6 Alani i, dipasahat si Potipar do sude artana tu si Josep. Dang adong be na porlu dipikkirhon ibana, asing ni sipanganon na lao diparade di jolona. Lam magodang ma si Josep jala ganteng do ibana.

7 Dang sadia leleng, lomo ma roha ni istri ni tuanna i mangida si Josep. Didok ibana ma, “Beta, modom ma ho rap dohot au.” 8 Alai ditolak si Josep do pangidoanna i. Didok ibana do, “Nungnga dipasahat tuanki be sude artana tu au jala pos situtu do rohana tu au. 9 Holan tu au do dilehon tuanki sude artana. Alani i, au do na marhuaso di jabu on. Alai anggo ho inang, dang dipasahat ibana tu au. Ai istrina do ho. Jadi tung bahenokku ma na jahat asa mardosa au tu Debata? Ai ulaon na jahat do i.”+

10 Ganup ari do dirayu istri ni si Potipar i si Josep. Alai dang hea olo si Josep modom rap dohot ibana manang padua-dua dohot ibana. 11 Di sada tikki, ro ma si Josep naeng karejo tu jabu i, hape dang adong nanggo sahalak pe parkarejo di jabu i. 12 Ditarik istri ni si Potipar i ma baju ni si Josep. Didok ibana ma, “Beta, modom ma ho rap dohot au!” Lari ma si Josep, jala ditadikkon ma bajuna disi. 13 Tikki diida istri ni si Potipar i na lari si Josep, jala ditinggalhon bajuna di ibana, 14 marsurak ma istri ni si Potipar i. Dijou ibana ma akka parkarejona. Didok ma tu nasida, “Asa marlea do hita umbahen na diboan halak Heber i tuson. Ai naeng diperkosa ibana do au. Uttung do marsurak au sagogo ni gogona. 15 Alani gogo ni soarakki, lari ma ibana jala ditinggalhon ibana ma bajuna.” 16 Sai di labbungna do dibahen baju ni si Josep i, sahat tu na mulak si Potipar tuanna i.

17 Didok istri ni si Potipar i do muse songon i tu si Potipar. Didok ibana ma, “Diboto ho do, marlea do au dibahen parkarejo halak Heber na binoanmi. 18 Alai tikki marsurak au gogo, lari ma ibana tu luar, ditinggalhon ibana ma bajuna di labbungkon.” 19 Dung dibege si Potipar hata ni istrina i taringot tu si Josep, muruk situtu ma ibana. 20 Diboan tuanna i ma si Josep tu penjara, inganan ni akka tahanan ni raja. Gabe disi ma si Josep dihurung.+

21 Alai toktong do didongani Jahowa si Josep jala sai dipatudu do holongna* tu ibana. Dibahen do asa lomo roha ni kepala penjara i tu si Josep.+ 22 Disuru kepala penjara i ma ibana gabe pengawas ni sude tahanan na di penjara i. Si Josep ma na mangatur karejo ni sude tahanan i.+ 23 Pos do roha ni kepala penjara i di sude ulaon na dipasahat ibana tu si Josep. Ai didongani Jahowa do si Josep, jala dibahen Jahowa do marhasil sude ulaonna.+

40 Dang sadia leleng, sogo ma roha ni raja ni Mesir dibahen pangurus siinumonna+ dohot pangurus sipanganonna. 2 Muruk ma si Firaun tu pejabatna na dua i, i ma pangurus siinumonna dohot pangurus sipanganonna.+ 3 Dipamasuk ma nasida tu penjara na di jabu ni kepala ni akka pengawal.+ Laos disi do si Josep dipenjarahon.+ 4 Disuru kepala ni akka pengawal i ma si Josep mandongani nasida jala mangalehon akka na porlu di nasida.+ Dipenjara i ma nasida piga-piga leleng.*

5 Di tikki borngin, marnipi ma pangurus siinumon dohot pangurus sipanganon na di penjara i. Jala dang sarupa arti nipi ni nasida. 6 Dung manogot, ro ma si Josep manjuppangi nasida. Diida ibana ma marsak nasida na dua. 7 Disukkun ibana ma nasida, “Boasa songon na marsak hamu na dua sadari on?” 8 Dialusi nasida ma, “Marnipi hami na dua na bodari. Alai dang adong na boi paboahon arti ni nipi i.” Didok si Josep ma, “Holan Debata do na boi paboahon arti ni nipi.+ Paboa hamu ma tu au nipimuna i.”

9 Didok pangurus siinumon i ma tu si Josep, “Di nipikki, adong huida sada bona ni anggur, 10 jala tolu dakkana. Martunas do muse hau anggur i, marbunga, dung i marparbue. Pittor malamun do parbuena i. 11 Tikki i, hutiop do galas ni si Firaun. Hubuat ma anggur i jala huporos ma tu galasna. Dung i hulehon ma i tu si Firaun.” 12 Didok si Josep ma tu ibana, “On ma arti ni nipimi: Dakka na tolu i lapatanna, tolu ari. 13 Tolu ari nai, paluaon ni si Firaun ma tuan. Paulakonna ma muse jabatanmi tu ho.+ Lehononmu ma muse raja minum songon na somal diulahon tuan najolo.+ 14 Alai molo dung denggan ngolum, ingot ma au tuan. Patudu ma holong ni roham* tu au, jala paboa ma taringot au tu Raja Firaun asa dipalua au sian on. 15 Sasittongna na diculik do au sian huta ni halak Heber.+ Jala dung di Mesir pe au, dang adong na sala na huulahon umbahen na dipamasuk au tu penjara.”*+

16 Denggan do arti nipi ni pangurus siinumon i dipaboa si Josep. Alani i, didok pangurus sipanganon i ma tu si Josep, “Au pe marnipi do. Huhutti do tolu karanjang roti na bottar di atas ni ulukku. 17 Di karanjang parginjang do sude roti na lao dilehon tu si Firaun. Hape ro ma akka pidong mangallang roti na di karanjang i.” 18 Dialusi si Josep ma, “On ma arti ni nipimi: Karanjang na tolu i lapatanna, tolu ari. 19 Tolu ari nai, diponggol si Firaun nama ulu ni tuan. Digattung nama tuan di sada tiang. Dung i, ro ma akka pidong lao mangallang bakke ni tuan.”+

20 Tolu ari dukkon i, marulang tahun ma si Firaun.+ Dibahen si Firaun do pesta jala diundang do sude pegawaina. Dipakaluar ibana do pangurus siinumon dohot pangurus sipanganon. Jala diboan do nasida tu jolo ni akka pegawaina i. 21 Dipaulak si Firaun ma muse jabatan ni pangurus siinumon i, jala toktong ma ibana na mangalehon siinumon ni raja. 22 Alai digattung si Firaun do pangurus sipanganon i. Masa ma i sude songon na nidok ni si Josep.+ 23 Alai dang hea diingot pangurus siinumon i si Josep, lupa do ibana tu si Josep.+

41 Dung salpu dua taon, marnipi ma si Firaun.+ Di nipina i, jongjong ma ibana di pinggir ni Sunge Nil. 2 Diida ibana ma pitu lombu na bagak jala na mokmok kaluar sian Sunge Nil. Mangallang ramba ma akka lombu i di pinggir ni sunge i.+ 3 Kaluar ma muse pitu lombu na roa jala na kurus sian Sunge Nil. Ro ma akka lombu i tu akka lombu na mokmok na di pinggir ni Sunge Nil i. 4 Diboddut akka lombu na roa jala na kurus i ma akka lombu na bagak jala na mokmok i. Dung i, tarsunggul ma Raja Firaun.

5 Alai tarpodom ma ibana muse jala marnipi. Di nipina i, adong ma pitu kambiur gandum na kaluar sian sada batang. Bagak jala padat do gandum i.+ 6 Dung i, tubu ma muse pitu kambiur gandum na kurus jala na malos alani alogo na mohop na sian timur. 7 Diboddut akka biur na kurus i ma pitu gandum na bagak jala na padat i. Tarsunggul ma si Firaun, gabe diboto ibana ma na marnipi ibana.

8 Manogotna i, busisaon ma si Firaun alani nipina i. Dijou ibana ma sude datu dohot akka halak na malo di Mesir. Dipaboa ibana ma nipina i tu nasida. Alai dang adong na boi paboahon artina tu ibana.

9 Ro ma pangurus siinumon tu si Firaun, jala didok ma, “Ale tuan, sadari on hupaboa ma tu ho dosakku. 10 Hea do ho tuan muruk tu au dohot tu pangurus sipanganon. Alani i, dibahen ho ma hami tu penjara na di jabu ni kepala ni akka pengawal.+ 11 Tikki borngin, marnipi ma hami na dua. Jala asing be do artina.+ 12 Adong do di penjara i sada doli-doli halak Heber. Parkarejo ni kepala ni akka pengawal i+ do ibana. Tikki dipaboa hami nipinami i tu ibana,+ boi do dipaboa ibana arti ni nipinami i. 13 Jala saut do sude songon na nidokna i. Dipaulak ho do muse jabatanku, jala digattung do donganki.”+

14 Disuru si Firaun ma halak manjou si Josep.+ Alani i, pittor dipalua ma si Josep sian penjara.*+ Dicukkur si Josep ma obukna dohot janggutna, jala digatti ibana ma abitna. Dung i, lao ma ibana mandapotton Raja Firaun. 15 Didok si Firaun ma tu si Josep, “Adong nipikku, alai dang adong na boi paboahon artina. Hubege sian halak, boi do ho paboahon arti ni nipi.”+ 16 Didok si Josep ma tu si Firaun, “Dang au ale tuan! Debata do na lao paboahon barita na denggan tu Raja Firaun.”+

17 Didok si Firaun ma, “Di nipikki, jongjong ma au di pinggir ni Sunge Nil. 18 Huida ma pitu lombu na bagak jala na mokmok kaluar sian Sunge Nil. Mangallang ramba do akka lombu i di pinggir ni sunge i.+ 19 Dung i, kaluar ma muse pitu lombu na roa, na kurus, jala na karempengon sian Sunge Nil. Dang hea dope huida lombu na songon i roana di Mesir. 20 Diboddut akka lombu na roa jala na massai kurus i ma akka lombu na mokmok i. 21 Alai dung diallang nasida lombu i, dang tamba balga ni lombu i. Roa dope akka lombu i, kurus songon na parjolo. Dung i, tarsunggul ma au.

22 “Marnipi ma au muse. Adong ma pitu kambiur gandum na kaluar sian sada batang. Bagak jala padat do gandum i.+ 23 Tubu ma muse pitu kambiur gandum na kurus, na kisut, jala na malos alani alogo na mohop na sian timur. 24 Diboddut akka biur na kurus i ma pitu gandum na bagak jala na padat i. Hupaboa ma i tu akka datu,+ alai dang adong sian nasida na boi paboahon artina tu au.”+

25 Didok si Josep ma tu si Firaun, “Sarupa do arti nipi ni tuan na dua i. Ai nungnga dipaboa Debata na sittong tu raja i na lao bahenonna.+ 26 Pitu lombu na mokmok i lapatanna, pitu taon. Jala pitu taon do tong lapatan ni pitu biur ni gandum na bagak i. Jadi sarupa do arti ni nipim na dua i. 27 Jala sarupa do arti ni lombu na kurus jala na roa i, tu pitu biur ni gandum na kisut jala na malos alani alogo na mohop na sian timur i. Artina, masa nama haraparon saleleng pitu taon. 28 Alani i, songon na hudok i nakkin: Nungnga dipaboa Debata na sittong i be tu raja i aha na lao sibahenonna.

29 “Saleleng pitu taon, godang situtu ma sipanganon di sude luat na di Mesir. 30 Alai dukkon i, masa ma haraparon saleleng pitu taon. Gabe lupa do akka jolma na hea godang sipanganon di Mesir. Ai dang adong be sipanganon di luat i alani haraparon i.+ 31 Dang diingot halak be godang ni sipanganon na hea adong di luat i. Ai massai posi do haraparon na lao masa di tikki i. 32 Umbahen dua hali pe raja i marnipi, lapatanna nungnga ditottuhon Debata na sittong be na lao masa i, jala satokkin nai nama masa i bahenon ni Debata na sittong i.

33 “Saonari, pillit ma sahalak bawa na malo jala na marbisuk. Bahen ma ibana gabe pengawas di sude luat na di Mesir on. 34 Pillit ma muse akka pengawas na asing di Mesir. Nasida ma na papunguhon saparlima sian hasil na niula ni akka halak na di Mesir saleleng pitu taon. Ai saleleng pitu taon i, godang situtu do sipanganon.+ 35 Saleleng godang situtu sipanganon di Mesir, ikkon papunguon ni nasida do hasil panen na di luat i. Ikkon disippan do i tu akka gudang ni raja na dibahen di akka kota, jala ikkon dijaga do i.+ 36 Alani i, tikki masa haraparon saleleng pitu taon, sipanganon na disippan i ma na gabe siallangon ni sude na mangolu di Mesir. Jadi molo masa pe haraparon i, dang mate rakyat ni luat on.”+

37 Denggan situtu do pandapot ni si Josep i di roha ni si Firaun dohot di sude pegawaina. 38 Didok si Firaun ma tu akka pegawaina i, “Dang adong be dapot hita jolma na asing na dumenggan sian si Josep. Ai halak na diurupi tondi ni Debata do ibana.” 39 Didok si Firaun ma muse tu si Josep, “Ala nungnga dipaboa Debata be sude tu ho, dang adong be jolma na ummalo jala na umbisuk sian ho. 40 Alani i, hupillit ma ho gabe pengawas di jabukku. Jala ikkon oloan ni sude rakyat do sude parettam.+ Holan alani tahta ni harajaokkon nama umbahen na untimbo au sian ho.” 41 Didok si Firaun ma muse, “Saonari, hupillit ma ho gabe pengawas ni sude luat na di Mesir.”+ 42 Dipalua si Firaun ma cincin cap sian tanganna jala dipamasuk tu jari-jari ni si Josep. Dilehon ibana ma muse pakkeon ni si Josep abit na sian linen. Jala dilehon ibana do muse kalung na sian mas tu si Josep. 43 Asing ni i, disuru do si Josep mamakke kareta ni raja na paduahon. Jala disuru do halak mardalan di jolona huhut mandok, “Avrekh!”* Songon i ma Raja Firaun mambahen si Josep gabe pengawas di sude luat na di Mesir.

44 Didok raja i ma muse tu si Josep, “Au do nian raja, alai dang boi nanggo sahalak pe di sude luat Mesir on mambahen manang aha molo dang ho na paloasson.”+ 45 Dung i, dibahen si Firaun ma goar ni si Josep gabe si Zopenat-paneah. Dilehon do muse si Asnat+ boru ni si Potipera malim na di huta On* gabe istri ni si Josep. Mulai sian i, gabe pengawas ma si Josep* di sude luat na di Mesir.+ 46 Marumur 30 taon+ ma si Josep tikki ro ibana tu jolo ni* si Firaun raja ni Mesir i.

Dung i, lao ma si Josep sian jolo ni si Firaun jala didalani ibana ma sude luat na di Mesir. 47 Saleleng pitu taon, godang situtu do sipanganon di luat i. Ai massai godang do hasil na niula ni nasida. 48 Saleleng pitu taon i, dipapungu si Josep ma akka hasil ni ladang na di Mesir. Disippan ibana do i di akka kota. Adong do gudang di ganup kota lao manippan hasil panen na adong di luat i. 49 Torus ma dipapungu si Josep sipanganon i. Massai godang ma sipanganon i, godangna songon pasir na di laut. Alani godangna, dang ditimbang nasida be sipanganon i.

50 Andorang so ro haraparon i, tubu ma dua anak ni si Josep+ sian si Asnat boru ni si Potipera malim na di huta On.* 51 Dibahen si Josep ma goar ni anak siakkanganna si Manasse.*+ Ai didok ibana do, “Nungnga dibahen Debata au lupa tu sitaonokku, dohot tu sihol ni rohakku tu akka keluarga ni bapakku.” 52 Dibahen ibana do goar ni anakna na paduahon si Epraim.*+ Ai didok ibana do, “Nungnga dibahen Debata au marpinoppar di tano hasusaakki.”+

53 Saleleng pitu taon i godang situtu do sipanganon di Mesir.+ Alai dung salpu i, 54 masa ma haraparon saleleng pitu taon songon na nidok ni si Josep.+ Di sude luat na di tano on masa do haraparon. Alai nang pe songon i, adong do sipanganon* di sude luat di Mesir.+ 55 Susa ma sude halak na di Mesir alani haraparon i. Sai dielek-elek akka halak ma si Firaun asa dilehon sipanganon tu nasida.+ Didok si Firaun ma, “Lao ma hamu tu si Josep, jala ulahon ma manang aha na nidokna tu hamu.”+ 56 Masa do haraparon i tu sude luat na di tano on.+ Jala lam susa do halak di Mesir. Alani i, dibukka si Josep ma gudang panippanan ni sipanganon i. Jala dijual ibana ma sipanganon i tu halak Mesir.+ 57 Ro do halak sian sude luat na di tano on tu Mesir lao manuhor sipanganon sian si Josep. Ai tung massai susa do sude halak di tano on alani haraparon i.+

42 Dung diboto si Jakkob adong sipanganon di Mesir,+ didok ibana ma tu ianakkonna, “Ai boasa sai holan na so hamu?” 2 Didok si Jakkob ma muse, “Hubege, adong do sipanganon di Mesir. Lao ma hamu tusan, tuhor ma sipanganon di hita, asa unang mate hita alani haraparon on.”+ 3 Alani i, lao ma akka abang ni si Josep na sappulu i+ tu Mesir manuhor sipanganon. 4 Alai dang disuru si Jakkob si Benjamin+ adek ni si Josep i lao rap dohot akka abangna. Ai didok si Jakkob do, “Atik boha manang na mahua ibana, gabe mate annon.”+

5 Sahat do haraparon i tu luat Kanaan. Alani i, lao ma akka anak ni si Israel dohot halak na asing tu Mesir manuhor sipanganon.+ 6 Si Josep do halak na marhuaso di sude luat na di Mesir.+ Jala ibana do na manjual sipanganon i tu sude halak na ro sian sude luat na di tano on.+ Ro ma akka abang ni si Josep i jala marsomba ma nasida tu jolona.+ 7 Dung diida si Josep akka abangna i, pittor ditanda ibana do nasida. Alai ditabunihon si Josep do ise ibana.+ Kasar do hatana tu nasida, didok ma, “Ai pardia do hamu?” Dialusi nasida ma, “Sian Kanaan do hami tuan, naeng manuhor sipanganon do hami ro tuson.”+

8 Ditanda si Josep do sude abangna i, alai dang ditanda nasida si Josep. 9 Diingot si Josep ma akka nipina taringot tu akka abangna i.+ Didok ibana ma, “Mata-mata do hamu! Na mangalului dalan do hamu lao mangalo hutanami on!” 10 Didok nasida ma, “Daong tuannami. Na lao manuhor sipanganon do akka hatobanmon ro tuson. 11 Saama do hami sude. Halak na burju do hami. Dang mata-mata hatobanmon tuan.” 12 Alai didok si Josep ma, “Dang toho i! Na mangalului dalan do hamu lao mangalo hutanami on!” 13 Didok nasida ma, “Saama do hami sude,+ 12 halak do hami na marhaha maranggi.+ Di huta Kanaan do bapaknami. Tinggal do adeknami siappudan+ di Kanaan, jala na sada nai dang adong be.”+

14 Alai didok si Josep ma, “Anggo di au, mata-mata do hamu! 15 Huuji ma jo hamu, jujur do hamu manang na dang: Songon pastina si Firaun mangolu,* tung na so boi hamu mulak sian on molo so diboan hamu adekmuna siappudan i tuson.+ 16 Mulak ma sahalak sian hamu lao mangalap adekmuna i. Alai dipenjara ma na deba nai. Sian i huboto ma sittong do hatamuna i manang na dang. Molo dang tutu hatamuna i, songon pastina si Firaun mangolu, berarti mata-mata do hamu.” 17 Dipenjarahon ma nasida sude saleleng tolu ari.

18 Dung tolu ari, didok si Josep ma tu nasida, “Mabiar do au tu Debata na sittong. Alani i, molo naeng mangolu hamu, ikkon oloanmuna do sude pangidoakku. 19 Molo sittong do na nidokmuna i, lok ma dison dipenjara sahalak sian hamu. Alai mulak ma na asing asa adong na mamboan sipanganon tu keluargamuna, asa unang haraparon nasida.+ 20 Dung i, boan hamu ma adekmuna siappudan i tu au. Sian i, botookku ma sittong do hatamuna i jala dang pamateonku hamu.” Dioloi nasida ma hata ni si Josep i.

21 Didok nasida ma sama nasida, “Hukuman do on tu hita ala nungnga tabahen na so denggan tu adekta i.+ Taida do marsak ibana, jala sai dielek-elek do hita asa asi rohatta tu ibana, alai dang tatangihon. Alani i ma susa hita saonari.” 22 Didok si Ruben ma, “Ai nungnga hudok tu hamu asa unang tahahua dakdanak i. Alai dang ditangihon hamu.+ Saonari, ikkon martanggung jawab do hita, ai nungnga tausehon mudarna.”+ 23 Tikki i, marhite penerjemah do si Josep makkatai tu nasida. Alani i, dirippu nasida do dang diattusi si Josep hata ni nasida i. 24 Lao ma si Josep sian i jala tangis ma ibana.+ Dang sadia leleng, ro ma muse si Josep mandapotton nasida. Ditarik ma si Simeon+ jala diikkat ma ibana di jolo ni nasida.+ 25 Dung i diparettahon si Josep ma asa diisi gok sipanganon i tu akka karung ni nasida. Disuru do muse asa dipamasuk hepeng ni nasida i tu karung ni nasida be. Dung i dilehon do muse sipanganon ni nasida saleleng di pardalanan. Songon i ma dibahen akka parkarejona i tu nasida.

26 Dibahen nasida ma akka karung i tu halode ni nasida. Dung i, borhat ma nasida. 27 Dung sahat di inganan marborngin, adong ma sahalak sian nasida naeng mangalehon mangan halode. Dibukka ibana ma karung i, jala diida ibana ma adong hepeng di karung i. 28 Pittor dipaboa ibana ma i tu na asing. Didok ma, “Bereng ma, dipaulak do hepengku. Dibahen do i tu karung na huboan on!” Gabe busisaon ma nasida, mabiar jala didok nasida ma sama nasida, “Boasa ma dibahen Debata songon on tu hita?”

29 Dung sahat di Kanaan, dipaboa nasida ma sude na masa i tu si Jakkob bapak ni nasida. Ninna ma, 30 “Kasar do hata ni halak na marhuaso di Mesir i tu hami.+ Ditudu ibana do hami mata-mata. 31 Alai didok hami ma tu ibana, ‘Halak na burju do hami. Dang mata-mata hami.+ 32 Saama do hami sude, 12 halak do hami na marhaha maranggi.+ Di huta Kanaan do bapaknami. Tinggal do adeknami siappudan di Kanaan,+ jala na sada nai dang adong be.’+ 33 Alai didok na marhuaso di Mesir i ma, ‘Molo sittong do na nidokmuna i, lok ma dison sahalak sian hamu.+ Alai mulak ma na asing asa adong na mamboan sipanganon tu keluargamuna, asa unang haraparon nasida.+ 34 Dung i, boan ma adekmuna siappudan i tuson, asa huboto dang na mata-mata hamu alai halak na burju do hamu. Molo diulahon hamu i, hupaulak pe muse keluargamuna on. Jala hupaloas pe hamu manuhor sipanganon sian on.’”

35 Tikki dipakaluar nasida sude isi ni karung i, diida si Jakkob ma di karung ni nasida be do hepeng ni nasida. Alani i, gabe mabiar ma nasida sude. 36 Didok si Jakkob ma tu nasida, “Alani hamu do umbahen na mago akka anakki!+ Nungnga mago si Josep,+ mago muse si Simeon.+ Saonari, naeng boanonmuna muse si Benjamin. Boasa ma masa on sude tu au?” 37 Alai didok si Ruben ma, “Bapa, paloas ma huboan ibana, au pe na martanggung jawab, hujaga pe ibana. Molo dang huboan ibana mulak,+ pamate ma anakku na dua i.”+ 38 Alai didok si Jakkob ma, “Daong, dang huloas anakki lao dohot hamu. Ai nungnga mate abangna, holan sahalakna nama.+ Molo manang na mahua jala mate annon ibana di dalan, mate nama au bahenonmuna.*+ Ai sahat tu na matua lungun nama rohakku.”+

43 Lam susa ma halak di Kanaan alani haraparon i.+ 2 Habis ma sipanganon na dituhor nasida sian Mesir i.+ Alani i, didok bapakna ma, “Lao ma hamu amang. Tuhor hamu ma muse sipanganon di hita.” 3 Alai didok si Juda ma, “Takkas do didok bawa i, ‘Sotung ro be hamu tuson molo so diboan hamu adekmuna i.’+ 4 Jadi, molo dipaloas bapa do diboan hami ibana, lao pe hami manuhor sipanganon i. 5 Alai molo dang dipaloas bapa diboan hami ibana, dang lao hami. Ai takkas do didok bawa i, ‘Sotung ro be hamu tuson molo so diboan hamu adekmuna i.’”+ 6 Dung i didok si Israel+ ma, “Boasa ma pola paboaonmuna tu bawa i na adong dope adekmuna? Gabe susa do au dibahen hamu.” 7 Dialusi nasida ma, “Ai na disukkun bawa i do taringot hami dohot keluarganami. Didok ibana do, ‘Mangolu dope bapakmuna? Adong dope haha anggimuna na asing?’ Dipaboa hami ma tu ibana na sasittongna.+ Dia ma diboto hami na lao suruonna hami mamboan adeknami i tusan.”+

8 Didok si Juda ma muse tu si Israel bapakna i, “Paloas ma ibana lao rap dohot hami.+ Molo dang, mate nama hami,+ bapa, dohot akka ianakkonnami+ alani haraparon on. 9 Au pe na martanggung jawab tu ibana, pasti selamat do ibana.*+ Molo dang huboan ibana mulak tuson, mardosa ma au tu ho bapa saleleng ni lelengna. 10 Autsugari dang tapaleleng-leleng, nungnga pola dua hali hami lao.”

11 Alani i, didok bapakna ma tu nasida, “Attong molo ikkon songon i do, boan hamu ma hasil ni ladang na dumenggan sian luat on. Boan hamu ma miak balsam,*+ madu, gota na angur,* kulit ni hau,*+ dohot kacang.* Pamasuk hamu ma i tu tasmuna, jala lehon hamu ma i gabe hadiah+ tu bawa i. 12 Boan hamu ma hepeng dua hali loppit godangna, jala paulak ma hepeng na dibahen tu karungmuna i.+ Ai na silap do ra nasida tikki i. 13 Boan ma adekmuna on, jala lao ma hamu manjuppangi bawa i. 14 Anggiat ma dibahen Debata Pargogo na So Hatudosan i asi roha ni bawa i tu hamu. Sai anggiat ma dipalua ibana si Simeon dohot si Benjamin. Molo ikkon mago do muse annon anakkon, nungnga siap be au disi!”+

15 Alani i, diboan nasida ma hadiah i, hepeng dua hali loppit godangna, jala diboan nasida ma si Benjamin. Borhat ma nasida tu Mesir jala didapotton nasida ma muse si Josep.+ 16 Tikki diida si Josep na diboan nasida do si Benjamin, didok ma tu parkarejo na di jabuna, “Boan ma nasida tu jabukku asa rap mangan hami arian on. Seat ma sada binatang jala parade ma sipanganon.” 17 Diboan parkarejo i ma nasida tu jabu ni si Josep, jala pittor diulahon ma sude paretta ni si Josep i.+ 18 Tikki diboan nasida tu jabu ni si Josep, mabiar ma nasida. Didok ma, “Alani hepeng na dipaulak tu karungta i do umbahen na diboan hita tuson. Saonari takkupon ni nasida nama hita, buatonna ma halodetta, jala bahenonna ma hita gabe hatoban!”+

19 Alani i, didapotton nasida ma parkarejo na di jabu ni si Josep. Makkatai ma nasida di pintu masuk ni jabu i. 20 Didok nasida ma, “Sattabi ma jo tuan, tikki parjolo sahali ro hami tuson, lao manuhor sipanganon do hami.+ 21 Hape tikki sahat hami di inganan marborngin, dibukka hami ma karung i. Diida hami ma disi do sude hepengnami i, di ganup karungnami be.+ On ma hepeng i, buat hamu ma. 22 Ai dang diboto hami ise na mambahen hepeng i tu karungnami tikki i.+ Jala saonari diboan hami do hepeng lao manuhor sipanganon.” 23 Didok parkarejo i ma tu nasida, “Dang pola boha i, tenang ma hamu. Nungnga hujalo be hepengmuna i. Debatamuna dohot Debata ni bapakmuna do na mambahen hepeng i tu karungmuna.” Dung i, dipaulak ibana ma si Simeon tu nasida.+

24 Dung i, diboan parkarejo i ma nasida masuk tu jabu ni si Josep. Dilehon ma aek lao manussi pat ni nasida. Jala dilehon do mangan akka halode ni nasida. 25 Dipaboa do tu nasida na lao ro si Josep arian i lao mangan rap dohot nasida.+ Alani i, diparade nasida ma hadiah+ na lao tu si Josep i. 26 Ro ma si Josep tu jabu i. Dilehon nasida ma hadiah i, jala marsomba ma nasida tu ibana.+ 27 Dung i, disukkun si Josep ma kabar ni nasida jala didok ma, “Boha do kabar ni bapakmuna na dipaboa hamu tikki i? Mangolu dope ibana?”+ 28 Dialusi nasida ma, “Mangolu dope bapa i tuannami. Sehat do ibana.” Dung i, marsomba ma nasida tu jolona.+

29 Tikki diida si Josep adekna si Benjamin donganna saina i,+ didok ma tu nasida, “Ai on do adekmuna siappudan na pinaboamuna i?”+ Jala didok ibana ma muse, “Sai dipasu-pasu Debata ma ho anakku.” 30 Ala diida si Josep adekna i, pittor lao ma si Josep. Ai dang tartaonna be lungun ni rohana mangida adekna i. Dilului ibana ma inganan na buni, masuk ma ibana tu sada ruangan jala tangis ma ibana disi.+ 31 Dung tenang dihilala ibana, marsuap ma ibana jala didapotton ma muse nasida. Didok ma, “Parade ma sipanganon i.” 32 Dibahen ma sipanganon tu meja ni si Josep. Dung i, dibahen ma muse tu meja ni akka haha anggina i. Jala dibahen do muse tu meja ni halak Mesir i. Asing-asing be do meja ni nasida. Ai magigi do halak Mesir rap mangan sameja dohot halak Heber.+

33 Disuru ma nasida hundul di jolo ni si Josep. Jojor do dibahen parhundul ni nasida, mulai sian siakkangan+ sahat tu siappudan mangihutton umur ni nasida.* Marsiberengan ma nasida jala longang. 34 Sai dilehon si Josep do sipanganon na adong di mejana tu meja ni akka haha anggina i. Dilehon do sipanganon i tu si Benjamin lima hali loppit gumodang sian akka abangna.+ Mangan minum ma nasida rap dohot ibana, sahat tu na butong nasida.

44 Didok si Josep ma tu parkarejo na di jabuna i, “Isi ma sipanganon tu karung ni nasida. Lehon ma nasa na tarboan ni nasida. Jala bahen ma hepeng ni nasida i tu karung ni nasida be.+ 2 Alai bahen ma galassu na sian perak i tu karung ni siappudan i. Jala pamasuk ma tusi hepeng na diboan ibana manuhor sipanganon i.” Dung i, diulahon parkarejona i ma songon na nidok ni si Josep.

3 Dung torang ari manogotna i, diboan nasida ma halode ni nasida jala borhat ma nasida. 4 Tikki dang dao dope nasida lao sian kota, didok si Josep ma tu parkarejo na di jabuna i, “Hatop! Lao ma jo ho! Juppangi ma jo nasida! Molo dung juppangmu dok ma, ‘Boasa dibahen hamu na jahat balos ni na denggan? 5 Ai boasa dibuat hamu galas ni tuanku na sian perak i? Galas i do dipakke ibana minum dohot mangida akka na lao masa. Ulaon na jahat do na binahenmuna on.’”

6 Dung i lao ma parkarejona i mandapotton nasida jala didok ma tu nasida songon i. 7 Alai dialusi nasida ma, “Boasa didok tuan songon i? Dang mungkin bahenon ni akka hatobanmon songon i. 8 Haru hepeng na dapot sian karungnami i pe huboan hami do muse sian Kanaan.+ Jadi dia ma mungkin naeng takkoonnami perak manang mas sian jabu ni tuan i. 9 Songon on ma i tuan, manang ise hami na mambuat barang i, pamate ma. Jala sude hami na tinggal gabe hatoban ni tuan ma.” 10 Dialusi ibana ma, “Denggan ma i. Alai lok ma holan na mambuat barang i na gabe hatobanku. Ai dang adong sala ni na deba nai.” 11 Pittor dipaturun ma karung ni nasida, jala ganup ma nasida mambukka karungna be. 12 Manat ma dilului ibana karung i, mulai sian karung ni siakkangan sahat tu karung ni siappudan. Ujungna, dapotna ma galas i di karung ni si Benjamin.+

13 Diribak be ma baju ni nasida. Dipanaek nasida ma karung i tu halode ni nasida. Dung i mulak ma muse nasida tu kota. 14 Dung sahat si Juda+ dohot akka haha anggina di jabu ni si Josep, disi dope si Josep juppang ni nasida. Pittor marsomba ma nasida tu jolo ni si Josep.+ 15 Didok si Josep ma tu nasida, “Boasa dibahen hamu songon on tu au? Na so diboto hamu do na boi au mamboto akka na lao masa?+ Alani i, boi do dapottu akka na hulului.” 16 Dialusi si Juda ma, “Dang adong be na boi hudok hami tuan. Dang adong be na boi hubahen hami lao patuduhon na so marsala hami. Ai nungnga dipatudu Debata na sittong i na sala hami.+ Alani i, gabe hatobanmu ma hami tuan, hami dohot halak na tardapot mamboan galas i di karungna!” 17 Alai didok si Josep ma, “Dang mungkin bahenokku songon i! Holan halak na tardapot mamboan galas i ma na gabe hatobanku.+ Alai na asing mulak ma tu bapakmuna di bagasan dame.”

18 Lam dipajonok si Juda ma tu labbung ni si Josep, ninna ma, “Ale tuan, songon si Firaun do ho di au.+ Hupangido ma tu ho, tangihon ma jo hatakkon. Unang ma jo muruk ho tu hatobanmon. 19 Tikki disukkun ho hami tuan, ‘Mangolu dope bapakmuna, manang adong dope haha anggimuna na asing?’ 20 Dialusi hami ma, ‘Mangolu dope bapaknami alai nungnga matua. Jala adong do tubu adeknami dung matua bapaknami i.+ Adong do dua halak nasida na saina. Alai nungnga mate abangna i.+ Holan sahalakna nama na mangolu.+ Jala massai holong do roha ni bapaknami tu ibana.’ 21 Dung i, didok tuan ma tu akka hatobanmon, ‘Boan ma jo ibana tuson, asa huida.’+ 22 Alai didok hami ma tu tuan, ‘Dang boi lao adeknami i sian bapaknami. Molo lao adeknami i, mate nama bapaknami.’+ 23 Dung i didok tuan ma tu hami hatobanmon, ‘Sotung ro be hamu tuson molo so diboan hamu adekmuna i.’+

24 “Alani i, mulak ma hami jala dipaboa hami ma hata ni tuan i tu bapaknami. 25 Dang sadia leleng didok bapaknami ma, ‘Lao ma hamu amang, tuhor hamu ma muse sipanganon di hita.’+ 26 Didok hami ma, ‘Dang boi be hami lao tusi molo so diboan hami adeknami siappudan i. Ai dang boi be hami manjuppangi ibana molo so diboan hami adeknami i.’+ 27 Alai didok bapa ma, ‘Takkas do diboto ho, holan dua do anak ditubuhon omakmi di au.+ 28 Na sada nungnga dipamate binatang buas jala nungnga diallang be ibana.+ Ai sahat tu sadari on dang hea be huida ibana. 29 Molo diboan hamu anakku na sada nai on sian jolokku, boha ma molo manang na mahua ibana annon di dalan? Molo mate ibana, matua marsak+ nama au bahenonmuna sahat tu na mate.’*+

30 “Dos songon makkaholongi dirina do holong ni bapaknami tu anakna on. Alani i, molo mulak hami dang diboan hami adeknami on, 31 jala tikki diida ibana dang diboan hami adeknami i, mate nama ibana. Mate marsak ma bapaknami na matua i* alani hami hatobanmon. 32 Au do na martanggung jawab tu bapakku taringot tu dakdanak i. Ai hudok do, ‘Molo dang huboan ibana mulak tuson, mardosa ma au tu ho bapa saleleng ni lelengna.’+ 33 Alani i tuan, lok ma au na tinggal dison gabe hatobanmu. Alai paloas ma adekki mulak dohot akka abangna. 34 Songon dia ma bahenokku mulak molo so huboan adekki? Ai dang tartaon au mangida sitaonon ni bapaknami i molo so huboan adeknami i!”

45 Dang tartaon ni si Josep be lungun ni rohana+ dung dibege ibana hata ni abangna i. Disuru ibana ma kaluar sude akka parkarejona. Holan ibana dohot akka haha anggina ma na tinggal disi. Dung i dipaboa ibana ma ise ibana na sasittongna.+

2 Gogo ma tangis si Josep. Alani gogona, gabe dibege halak Mesir i dohot halak na di jabu ni si Firaun ma soarana. 3 Didok si Josep ma tu nasida, “Si Josep do au. Mangolu dope bapa?” Tarsonggot ma nasida mambege i jala dang taralusi nasida be hatana i. 4 Alani i didok si Josep ma, “Pajonok hamu ma tuson.” Dipajonok nasida ma tu ibana.

Dung i didok si Josep ma muse, “Au do on si Josep adekmuna i. Au do na dijual hamu tu halak Mesir i.+ 5 Saonari, unang pola marsak hamu. Jala unang pola salahon hamu manang na ise pe ala dijual hamu au tuson. Ai Debata do na manuru au parjolo lao sian hamu, asa boi hamu toktong mangolu.+ 6 Ai padua taonhon dope haraparon na masa di luat on.+ Jala saleleng lima taon nai dope i masa. Saleleng masa i, dang adong na mangula dohot na lao dipanen di tano on. 7 Alani i ma disuru Debata parjolo au lao sian hamu, asa dipalua Ibana hamu marhite cara na massai hebat. Marhite i, boi ma hamu toktong mangolu dohot akka pinopparmuna di tano on.+ 8 Dang hamu na mambahen au sahat tuson, alai Debata na sittong i do. Dipillit Ibana do au gabe kepala penasehat,* dohot pengawas jabu ni si Firaun, jala gabe pengawas ni sude luat di Mesir.+

9 “Hatop! Mulak ma hamu. Dokkon hamu ma tu bapa i, ‘Songon on do hata ni anakmu si Josep, “Nungnga dipillit Debata be au gabe pengawas ni sude luat na di Mesir.+ Hatop ma ho ro mandapotton au.+ 10 Di luat na di Gosen+ ma bapa tinggal asa jonok hita. Disi ma hamu rap dohot akka anakmu, pahoppum, akka lombum, hambingmu, biru-birum, dohot sude na adong di bapa. 11 Ai lima taon nai masa haraparon i. Alani i, huparade pe sipanganon di bapa,+ di keluarga ni bapa, dohot di sude na adong di bapa asa unang gabe lam susa hamu.”’ 12 Takkas do diida hamu abang dohot ho Benjamin adekku, na tutu do au sandiri na makkatai tu hamu.+ 13 Alani i, paboa hamu ma tu bapa taringot tu hasangapokku di Mesir on dohot sude na niidamuna. Jadi, hatop ma boan hamu bapa i tuson.”

14 Dung i dihaol si Josep ma adekna si Benjamin i, jala tangis ma ibana. Tangis ma si Benjamin huhut ma dihaol ibana si Josep abangna i.+ 15 Diumma ibana do sude abangna i jala tangis do nasida. Dung i, makkata-hatai ma nasida.

16 Adong ma halak na paboahon barita i tu si Firaun. Didok ma, “Nungnga ro be akka haha anggi ni si Josep.” Las do roha ni si Firaun dohot sude pegawaina mambege i. 17 Dung i didok si Firaun ma tu si Josep, “Paboa ma tu akka haha anggimi, asa dibahen akka barang i tu halode i jala mulak tu Kanaan. 18 Lok ma dialap nasida bapakmuna i dohot sude keluargamuna asa ro tuson. Hulehon pe sude akka na denggan di Mesir on tu nasida. Jala hulehon pe hasil na dumenggan sian luat on+ gabe sipanganon ni nasida. 19 Jala dok ma tu nasida,+ asa diboan akka padati+ sian Mesir on lao mamboan akka dakdanak, dohot istri ni nasida tuson. Jala dok ma asa diboan nasida bapakmuna tuson mamakke padati i.+ 20 Jala unang pola marsak hamu mamikkiri artamuna,+ ai appunamuna do sude na dumenggan na adong di sude luat di Mesir on.”

21 Diulahon akka anak ni si Israel do songon i. Songon paretta ni si Firaun i, dilehon si Josep do akka padati tu nasida. Jala dilehon do akka na porlu di nasida saleleng di pardalanan. 22 Dilehon si Josep do sada be baju na baru tu nasida. Alai anggo tu si Benjamin dilehon do lima baju na baru dohot 300 logam perak.+ 23 Dung i, dilehon ibana do muse akka on tu bapakna: sappulu halode lao mamboan akka barang na denggan sian Mesir, sappulu halode boru-boru lao mamboan gandum,* roti, dohot sipanganon na asing lao allangon ni bapakna saleleng di pardalanan. 24 Dipaborhat si Josep ma akka abangna dohot adekna i. Tikki borhat nasida didok si Josep ma, “Sotung marbadai hamu saleleng di pardalanan.”+

25 Lao ma nasida sian Mesir jala sahat ma nasida di huta ni bapakna di Kanaan. Didapotton nasida ma si Jakkob bapakna i. 26 Didok nasida ma, “Mangolu dope si Josep bapa. Saonari ibana do na marhuaso di sude luat di Mesir!”+ Alai dang adong didok si Jakkob manang aha. Ai dang porsea ibana tu hata ni nasida.+ 27 Dipaboa nasida ma sude hata ni si Josep. Jala diida si Jakkob ma akka padati na dilehon si Josep lao mamboan ibana, gabe las situtu ma rohana. 28 Didok si Israel ma, “Olo, nungnga porsea be au! Mangolu dope hape si Josep anakki! Saonari, ikkon lao do au mangida ibana andorang so mate au!”+

46 Borhat ma si Israel. Diboan ibana do sude keluargana dohot akka artana. Dung sahat ibana di Ber-seba,+ dilehon ibana ma pelean tu Debata na disomba ni bapakna si Isak.+ 2 Di tikki borngin, mandapot parnidaan ma si Israel. Didok Debata ma tu ibana, “Jakkob, Jakkob!” Didok ibana ma, “Aha i tuan?” 3 Didok Debata ma, “Au do Debata na sittong, Debata ni bapakmu.+ Unang pola mabiar ho lao tu Mesir. Ai bahenokku do ho gabe bangso na bolon disi.+ 4 Donganakku do ho sahat tu Mesir, boanokku do ho muse mulak tuson,+ jala si Josep do na manutup matam tikki mate ho.”*+

5 Dung i, borhat ma si Jakkob sian Ber-seba. Jala akka padati na dilehon si Firaun i do dipakke anakna i mamboan si Jakkob, akka anak ni nasida, dohot akka istri ni nasida. 6 Diboan nasida do lombu, halode, dohot akka biru-biru ni nasida. Diboan nasida do muse akka barang naung dipapungu nasida saleleng di Kanaan. Songon i ma si Jakkob borhat tu Mesir rap dohot sude pinopparna. 7 Diboan ibana do sude pinopparna tu Mesir, mulai sian anakna, boruna, pahoppuna bawa, dohot pahoppuna borua.

8 Akka on ma anak ni si Israel manang na digoari si Jakkob, na borhat tu Mesir:+ Si Ruben+ ma anak siakkangan ni si Jakkob.

9 Akka anak ni si Ruben, i ma si Hanok, si Pallu, si Hezron, dohot si Karmi.+

10 Akka anak ni si Simeon,+ i ma si Jemuel, si Jamin, si Ohad, si Jakin, si Zohar, dohot si Saul+ anak ni sahalak borua Kanaan.

11 Akka anak ni si Lepi,+ i ma si Gerson, si Kohat, dohot si Merari.+

12 Akka anak ni si Juda,+ i ma si Er, si Onan, si Sela,+ si Peres,+ dohot si Jara.+ Alai nungnga mate si Er dohot si Onan tikki di Kanaan dope nasida.+

Akka anak ni si Peres, i ma si Hezron, dohot si Hamul.+

13 Akka anak ni si Isasar, i ma si Tola, si Puwa, si Iob, dohot si Simron.+

14 Akka anak ni si Zebulon,+ i ma si Sered, si Elon, dohot si Jalel.+

15 Akka i ma pinoppar ni si Lea. Ditubuhon ibana do anak dohot sada boru di si Jakkob di Padan-aram. Goar ni boruna, i ma si Dina.+ Jadi 33 halak ma sude pinoppar ni si Jakkob sian si Lea, bawa dohot borua.

16 Akka anak ni si Gad,+ i ma si Sipion, si Haggi, si Suni, si Esbon, si Eri, si Arod, dohot si Areli.+

17 Akka anak ni si Aser,+ i ma si Innah, si Isha, si Ispi, dohot si Beria. Goar ni boruna si Serah.

Akka anak ni si Beria, i ma si Heber dohot si Malkiel.+

18 Akka i ma pinoppar ni si Zilpa,+ hatoban ni si Laban na dilehon tu boruna si Lea. Jadi 16 halak ma sude pinoppar ni si Jakkob sian si Zilpa.

19 Akka anak ni si Jakkob sian istrina si Rahel, i ma si Josep+ dohot si Benjamin.+

20 Akka anak ni si Josep na tubu di Mesir, i ma si Manasse,+ dohot si Epraim.+ Nasida ma anak ni si Josep na ditubuhon si Asnat+ boru ni si Potipera malim na di huta On.*

21 Akka anak ni si Benjamin,+ i ma si Bela, si Beker, si Asbel, si Gera,+ si Naaman, si Ehi, si Roseh, si Muppin, si Hupim,+ dohot si Ared.+

22 Jadi 14 halak ma pinoppar ni si Jakkob sian si Rahel.

23 Anak* ni si Dan,+ i ma si Husyim.+

24 Akka anak ni si Naptali,+ i ma si Jazeel, si Guni, si Yezer, dohot si Shillem.+

25 Akka i ma pinoppar ni si Bilha, hatoban ni si Laban na dilehon tu boruna si Rahel. Jadi pitu halak ma sude pinoppar ni si Jakkob sian si Bilha.

26 Jadi 66 halak ma sude pinoppar ni si Jakkob na dohot tu Mesir asing ni akka parumaenna.+ 27 Akka anak ni si Josep na tubu di Mesir, i ma dua halak. Alani i, 70 halak ma akka keluarga ni si Jakkob na ro tu Mesir.+

28 Disuru si Jakkob ma asa parjolo si Juda+ lao mandapotton si Josep. Ibana ma na paboahon naung borhat nasida tu Gosen. Dung sahat nasida di Gosen,+ 29 disuru si Josep ma asa diparade karetana. Dung i, lao ma ibana manjuppangi bapakna si Israel di Gosen. Tikki pajuppang nasida, pittor dihaol si Josep ma bapakna i jala leleng do ibana sai tangis.* 30 Didok si Israel ma tu si Josep, “Molo tung pe mate au saonari, nungnga rade be au. Ai nungnga huida be ho jala mangolu do ho hape.”

31 Didok si Josep ma tu haha anggina i dohot tu sude rumah tangga ni bapakna i, “Lao ma jo au manjuppangi si Firaun,+ asa hupaboa tu ibana naung ro haha anggikku dohot sude rumah tangga ni bapakku sian Kanaan mandapotton au.+ 32 Hupaboa ma tu ibana na parmahan+ do hamu, na manjaga akka binatang.+ Hupaboa pe tu ibana na diboan hamu do hambing, biru-biru, lombu, dohot sude artamuna tuson.+ 33 Molo dijou si Firaun hamu jala disukkun ibana aha karejomuna, 34 dokkon hamu ma, ‘Akka parmahan do hatobanmon mulai sian na poso. Ai nungnga songon i ulaonnami mulai sian akka ompunami.’+ Molo didok hamu songon i, paloason ni si Firaun ma hamu tinggal di luat Gosen.+ Ai magigi do halak Mesir mangida parmahan ni biru-biru.”+

47 Lao ma si Josep mandapotton si Firaun.+ Didok ma, “Nungnga ro be bapakku dohot akka haha anggikku sian Kanaan. Di Gosen+ do nasida saonari. Diboan nasida do hambing, biru-biru, lombu, dohot sude na adong di nasida.” 2 Dipillit si Josep ma lima halak sian haha anggina i, jala diboan ma nasida tu jolo ni si Firaun.+

3 Disukkun si Firaun ma tu nasida, “Aha do karejomuna?” Dialusi nasida ma, “Marmahan biru-biru do hami hatobanmon, songon akka ompunami.”+ 4 Didok nasida ma muse tu si Firaun, “Na lao manoppang do hami di luat on.+ Ai dang adong be di Kanaan inganan lao marmahan akka biru-biru, hambing, dohot lombu ni hatobanmon. Posi situtu do haraparon na masa di Kanaan.+ Alani i asi ma roham, paloas ma hami tinggal di luat na di Gosen.”+ 5 Didok si Firaun ma tu si Josep, “Nungnga ro be bapakmu dohot haha anggim mandapotton ho. 6 Ho do na marhuaso di sude luat na di Mesir on. Bahen ma nasida tinggal di luat na dumenggan na adong di luat on.+ Bahen ma nasida tinggal di luat na di Gosen. Molo adong diboto ho sian nasida na malo marmahan, suru ma ibana manjaga akka binatang appunakku.”

7 Diboan si Josep ma si Jakkob tu jolo ni si Firaun, jala dipangido si Jakkob ma tu Debata asa dipasu-pasu si Firaun. 8 Disukkun si Firaun ma tu si Jakkob, “Nungnga sadia umurmu?” 9 Didok si Jakkob ma, “Nungnga 130 taon umurhu. Saleleng ngolukku susa do au,+ jala marpinda-pinda* do au songon akka ompukku. Alai ungganjang do umur ni nasida sian umurhu.”+ 10 Dung i, dipangido si Jakkob ma tu Debata asa dipasu-pasu si Firaun. Dukkon i, lao ma ibana sian jolo ni raja i.

11 Songon paretta ni si Firaun, dibahen si Josep ma bapakna dohot haha anggina tinggal di Mesir. Dilehon ma tu nasida tano na dumenggan na adong di luat Ramses,+ jala gabe appuna ni nasida ma tano i. 12 Torus do dilehon si Josep sipanganon* ni bapakna, haha anggina, dohot sude rumah tangga ni bapakna. Dilehon ibana do i mangihutton godang ni anakkon ni ganup keluarga.

13 Massai posi do haraparon i di sude luat na di Mesir dohot di sude luat na di Kanaan. Alani i, dang adong be sipanganon* di sude luat. Jala gale-gale ma sude jolma alani haraparon i.+ 14 Ro do sude halak na di luat Kanaan dohot na di luat Mesir manuhor sipanganon sian si Josep.+ Dipapungu si Josep ma sude hepeng ni nasida, jala diboan ma i tu jabu ni si Firaun. 15 Ujungna, habis ma sude hepeng di Mesir dohot di Kanaan. Ro ma halak Mesir tu jolo ni si Josep, ninna ma, “Lehon ma di hami sipanganon! Pasombuonmu do hami mate holan ala so adong be hepengnami?” 16 Didok si Josep ma, “Molo nungnga habis hepengmuna, boan ma akka binatang na adong di hamu, asa hulehon sipanganon tu hamu gattina.” 17 Diboan nasida ma akka binatang na dipiaro nasida tu si Josep. Diboan nasida do hoda, biru-biru, hambing, lombu, dohot halode. Dung i, dilehon si Josep ma sipanganon tu nasida. Saleleng na sataon i, sai dilehon si Josep do sipanganon tu nasida gatti ni binatang ni nasida.

18 Dung marujung na sataon i, ro ma muse nasida di taon na mangihut tu jolo ni si Josep. Didok nasida ma, “Dang adong na hutabunihon hami sian ho tuan. Takkas do diboto tuan, nungnga habis be hepengnami, jala nungnga hulehon hami tu ho sude binatang na hupiaro hami. Holan dagingnami dohot tanonami nama na tinggal di hami. 19 Pasombuon ni tuan ma hami mate jala tarulang tanonami i? Tuhor ma hami dohot tanonami. Jala lehon ma sipanganon gattina. Gabe hatoban ni si Firaun pe taho hami jala lok ma ibana nappuna tanonami i. Lehon ma tu hami boni ni suan-suanan, asa unang mate hami jala asa unang tarulang tanonami i.” 20 Dituhor si Josep ma sude tano ni halak Mesir i. Alani posi ni haraparon i, sude do halak Mesir manjual ladangna. Alani i, appuna ni si Firaun ma sude tano na di Mesir i.

21 Dung i disuru si Josep ma sude halak na di huta-huta pinda tu kota na di Mesir.+ 22 Holan tano ni akka malim ma na so dituhor si Josep.+ Ai dilehon si Firaun do sipanganon ni akka malim i. Alani i, dang dijual akka malim i tano ni nasida. 23 Dung i, didok si Josep ma muse tu halak i, “Nungnga hutuhor be hamu dohot tanomuna. Alani i gabe appuna ni si Firaun ma hamu dohot tanomuna i. Saonari buat hamu ma boni on jala suan hamu ma i di ladang. 24 Molo dung panen, lehon ma 20 persen hasilna i tu si Firaun.+ Jala 80 persen nai pakke hamu ma gabe boni tu ladang, lao allangonmuna, ianakkonmuna, dohot allangon ni sude rumah tanggamuna.” 25 Didok nasida ma, “Nungnga diselamatton ho hami.+ Sai anggiat ma las roha ni tuan mangida hami, jala bahen ma hami gabe hatoban ni si Firaun.”+ 26 Dibahen si Josep ma sada aturan: Ikkon lehonon ni nasida do 20 persen sian hasil ladangna tu si Firaun. Marlakku do aturan i di Mesir sahat tu sadari on. Holan tano ni akka malim ma na so appuna ni si Firaun.+

27 Toktong do si Israel dohot akka keluargana tinggal di Gosen+ na di Mesir. Marpinoppari ma nasida disi jala lam godang.+ 28 Dung di Mesir mangolu dope si Jakkob 17 taon nai. Alani i, gabe 147 taon ma umur ni si Jakkob.+

29 Tikki naeng mate si Israel,+ dijou ibana ma si Josep. Didok ma, “Molo holong do roham tu au bapakmon, marsumpa* ma jo ho na patuduonmu do holong ni roham* tu au, jala na toktong do dioloi ho hatakku, tung na so jadi kuburonmu au di Mesir on.+ 30 Molo mate au,* boan ma au sian Mesir on, kuburhon ma au tu kuburan ni akka ompukku.”+ Dialusi si Josep ma, “Olo bapa. Hubahen pe na nidokmi.” 31 Didok si Jakkob ma, “Attong marsumpa ma ho tu au.” Marsumpa ma si Josep.+ Dung i, marsomba ma si Jakkob tu Debata di podomanna.*+

48 Dung sadia leleng, adong ma na mandok tu si Josep, “Nungnga lam gale be bapakmi.” Alani i, lao ma si Josep mandapotton bapakna jala diboan ibana do anakna na dua i, si Manasse dohot si Epraim.+ 2 Dipaboa halak ma tu si Jakkob na ro si Josep. Alani i, dibahen si Israel do sian nasa gogona asa boi hundul di podomanna i. 3 Didok si Jakkob ma tu si Josep,

“Nungnga dipatudu Debata Pargogo na So Hatudosan i dirina tu au di Lus na di luat Kanaan. Jala dipasu-pasu Ibana do au.+ 4 Didok Ibana do muse, ‘Bahenokku ma ho marpinoppari jala lam godang ma pinopparmi. Bahenokku ma ho gabe bapak ni godang bangso,+ jala lehonokku ma tano on tu akka pinopparmu. Nasida ma nappunasa tano i saleleng ni lelengna.’+ 5 Gabe anakku ma anakmu na dua i, na tubu di Mesir andorang so ro dope au tu Mesir on.+ Gabe anakku ma si Epraim dohot si Manasse dos songon si Ruben dohot si Simeon.+ 6 Alai molo na tubu dukkon nasida, anakmu ma i. Jala jaloon ni anakmi ma tano parbagianan ni nasida sian tano parbagianan ni si Epraim dohot si Manasse.+ 7 Tikki ro au sian Padan-aram,* mate do omakmu si Rahel+ di labbungku di Kanaan. Jala dao nai dope sian i tu Eprata.+ Alani i, hukubur ma ibana di dalan na tu Eprata, i ma Betlehem.”+

8 Dung i, diida si Israel ma akka anak ni si Josep i. Didok ma, “Ai ise do halak on?” 9 Didok si Josep ma, “Akka anakku do nasida. Nasida ma na dilehon Debata tu au di Mesir on.”+ Didok si Israel ma, “Boan ma nasida tu labbungkon, asa hupangido pasu-pasu tu Debata di nasida.”+ 10 Ala nungnga matua, nungnga rambonon be* si Israel jala dang takkas be diida ibana manang aha. Disuru si Josep ma akka anakna i tu labbung ni si Israel. Dung i, diumma si Israel ma nasida jala dihaol. 11 Didok si Israel ma tu si Josep, “Dang hurippu be boi huida bohim.+ Hape saonari, diloas Debata dope au mangida akka pinopparmu.” 12 Disuru si Josep ma akka anakna i hehe sian labbung ni si Israel. Dung i, marsomba ma ibana tu jolo ni bapakna i.

13 Diboan si Josep ma muse anakna na dua i tu labbung ni si Israel. Ditiop si Josep ma si Epraim+ di sabola kanan, jala si Manasse+ di sabola kiri. Dibahen si Josep ma si Epraim di sabola kiri ni si Israel. Jala si Manasse di sabola kanan ni si Israel. 14 Dibahen si Israel ma tanganna sabola kanan tu ulu ni si Epraim. Hape sianggian do ibana. Jala dibahen si Israel ma tangan kirina tu si Manasse, hape siakkangan do si Manasse.+ Alai sengaja do dibahen si Israel songon i. 15 Dipangido si Israel ma tu Debata asa dipasu-pasu si Josep.+ Didok ibana ma,

17 Diida si Josep do na sai dibahen si Israel tangan kananna tu ulu ni si Epraim. Sogo ma rohana. Gabe naeng dipapinda ibana ma tangan ni bapakna i sian ulu ni si Epraim tu ulu ni si Manasse. 18 Didok si Josep ma, “Unang ma bahen songon i bapa. On do anakku siakkangan.+ Tu uluna ma bahen tangan kananmi.” 19 Alai dang olo bapakna i. Didok ma, “Huboto do i anakku. Huboto do i. Ai si Manasse pe gabe bangso na balga do haduan. Alai, umbalga do adekna i sian ibana.+ Jala pinoppar ni adekna i pe songon godang ni akka bangso do godangna.”+ 20 Alani i, dipangido si Israel ma tu Debata asa dipasu-pasu nasida.+ Didok ma,

Songon i ma si Israel mambahen si Epraim umbalga sian si Manasse.

21 Didok si Israel ma tu si Josep, “Satokkin nai, mate nama au.+ Alai sai donganan ni Debata do hamu, jala boanonna do hamu mulak muse tu tano ni akka ompumuna.+ 22 Hulehon do unggodang tano bagianmu sian akka haha anggim. Hulehon do sabagian unggodang tu ho sian nasida. Lehonokku ma tu ho tano na hubuat sian halak Amori i, na hubuat mamakke podang dohot panah.”

49 Dijou si Jakkob ma akka anakna. Didok ma, “Marpungu ma hamu, asa hupaboa akka na lao masa tu hamu di ari na naeng ro. 2 Hamu akka anak ni si Jakkob, marpungu ma hamu. Tangihon hamu ma hata ni si Israel, tangihon hamu ma hata ni bapakmuna.

3 “O Ruben,+ ho do anakku siakkangan,+ ho do hagogookku, jala ho do pinopparhu na parjolo tubu.* Ho do na ussangap jala na umgogo. 4 Alai dang ussangap ho sian akka anggim. Ai songon aek na margalumbang do ho, na so parduli tu manang aha pe. Ai modom do ho rap dohot istri ni bapakmu.*+ Ido, modom do ibana rap dohot istri ni bapakna. Tutu do diulahon ibana songon i!

5 “Molo si Simeon dohot si Lepi, abang adek do.+ Dipakke nasida do sinjata ni nasida lao pamatehon halak.+ 6 Sai unang ma mardongan au dohot nasida, jala unang ma dohot au tu punguan ni nasida. Ai tarrimas do nasida jala pamatehon jolma.+ Diseat nasida do urat ni pat ni lombu lao pasonakkon roha ni nasida. 7 Hona bura ma muruk ni nasida i alani jorbutna, jala hona bura ma rimas ni nasida i alani kejamna.+ Marserak ma nasida bahenokku di luat ni si Jakkob, jala tarsar ma nasida di sude luat ni Israel.+

8 “Alai anggo ho Juda,+ pujion ni akka haha anggim ma ho.+ Talu do bahenonmu akka musum.*+ Jala marsomba do akka anak ni bapakmu tu jolom.+ 9 Ale Juda, anak ni singa do ho.+ Dung diallang ho mangsa na ditakkup ho, mulak do ho. Modom-modom ma ibana jala dipasonang-sonang dirina songon singa. Ise be na barani mandungoi ibana? Ai singa do ibana. 10 Dang adong na lao mambuat tukkot harajaon i sian Juda.+ Jala dang adong na lao mambuat tukkot pamarettaon sian holang-kolang ni patna sahat tu na ro Silo.*+ Ai oloan ni sude bangso do ibana.+ 11 Diikkatton ibana ma halodena tu hau anggur. Jala anak ni halodena tu hau anggur na undenggan. Disussi ibana ma bajuna tu aek anggur, jala disussi ibana ma abitna tu aek anggur na merah songon mudar. 12 Merah do matana alani anggur, jala bottar do ngingina alani susu.

13 “Anggo si Zebulon,+ tinggal di topi ni laut do,+ di pelabuhan ni akka kapal. Jala sahat do batas ni ingananna tu luat na doppak Sidon.+

14 “Halode na gogo* do si Isasar,+ halode na boi modom huhut mamboan dua palano di tanggurungna. 15 Denggan do diida ibana inganan na lao gabe ingananna i jala uli do luat i. Ditarehon ma tanggurungna* lao mamboan boban, jala olo do ibana karejo songon hatoban.

16 “Sada sian marga ni halak Israel do si Dan+, jala ibana ma na lao gabe hakim tu bangso Israel.+ 17 Gabe ulok na di pinggir ni dalan ma si Dan, ulok na martanduk na adong di topi ni dalan na manurbing tumit ni hoda. Alani i, madabu* ma halak na di hoda i tu pudi.+ 18 Hupaima do asa dipalua Ho au, ale Jahowa.

19 “Serangon ni akka pangarampok ma si Gad,+ alai marbalik do ibana mangalo nasida sian pudi.+

20 “Godang situtu do sipanganon* ni si Aser+ jala boi do lehononna raja mangan.+

21 “Rusa boru-boru na hatop marlojong do si Naptali.+ Jala dohononna do akka hata na uli.+

22 “Dakka ni hau na marparbue do si Josep,+ dakka ni hau na marparbue na tubu di labbung ni mata ni aek. Jala akka dakka ni hau i untimbo sian tembok. 23 Alai sogo do roha ni akka pemanah tu ibana, torus do ibana dialo jala dipanah.+ 24 Alai nungnga siap tanganna mamanah,+ gogo do tanganna i, jala hatop do tanganna mamanah.+ Ai adong do na gogo mangurupi si Jakkob. Parmahan do ibana jala dolok batu ni Israel. 25 Ibana* do hadiah na sian Debata na disomba ni bapakna. Marale-ale do ibana dohot Pargogo na So Hatudosan i. Ibana ma na lao mangurupi ho. Pasu-pasuon ni Debata do ho marhite pasu-pasu na ro sian ginjang dohot pasu-pasu na ro sian toru ni tano.+ Jala pasu-pasuonna ma ho asa godang anakmu dohot akka binatang na dipiaro ho. 26 Dumenggan do pasu-pasu ni bapakmu sian hasil ni akka dolok na adong saleleng ni lelengna, jala ummuli do i sian akka dolok-dolok na adong saleleng ni lelengna.+ Jala si Josep ma na toktong manjalo sude pasu-pasu i.* Ai ibana do naung tarpillit sian sude haha anggina.+

27 “Songon serigala do si Benjamin+ na mangaribakkon musuna.+ Tikki manogot, diallang ibana ma mangsa na ditakkup ibana, jala tikki borngin dibagi-bagi ibana ma akka barang na dapotna sian musu.”+

28 Nasida ma marga ni Israel na 12 i. Jala akka i ma pasu-pasu na pinangido ni bapakna lao tu nasida. Dipangido ibana do pasu-pasu i hombar tu na ikkon jaloon ni ganup anakna i.+

29 Dung i, diparettahon si Israel ma tu nasida, “Satokkin nai, mate nama au.*+ Alani i, kuburhon ma au di kuburan ni akka ompukku na di gua na adong di ladang ni si Epron halak Het i.+ 30 Gua i adong di ladang Makpelah na jonok tu Mamre, na di luat Kanaan. Si Abraham do na manuhor ladang i sian si Epron halak Het i. Dituhor ibana do i lao mambahen tano kuburan. 31 Disi do dikuburhon si Abraham dohot istrina si Sara.+ Dikuburhon do muse disi si Isak+ dohot istrina si Rebekka. Jala disi do hukubur si Lea. 32 Sian akka anak ni si Het do dituhor ladang dohot gua i.”+

33 Dung sae dipaboa si Jakkob pangidoanna i tu akka anakna i, modom ma ibana di podomanna. Tos ma hosana jala mate ma ibana songon akka ompuna i.*+

50 Pittor dihaol si Josep ma bapakna,+ diumma jala sai tangis ma ibana. 2 Disuru si Josep ma akka parkarejona, i ma akka pangubati asa diawetton*+ bakke ni bapakna i. Dung i, diawetton akka pangubati i ma bakke ni si Israel. 3 Saleleng 40 ari ma nasida mangulahon i. Ai ikkon songon i do lelengna asa boi awet bakke i. Jala sai diandungi halak Mesir i do si Israel saleleng 70 ari.

4 Dung salpu nasida marlungun ni roha, makkatai ma si Josep tu akka pejabat* ni si Firaun. Didok ma, “Molo lomo do rohamuna mangida au, tolong ma jo pasahat pangidoakkon tu si Firaun, 5 ‘Andorang so mate bapakku,+ disuru ibana do au marsumpa+ asa hukubur ibana di tano kuburan naung diparade ibana+ di luat Kanaan.+ Alani i, paloas ma au lao makkuburhon bapakku. Molo nungnga huulahon i, pittor mulak pe au.’” 6 Didok si Firaun ma, “Lao ma ho, kuburhon ma bapakmi songon sumpami+ tu ibana.”

7 Dung i, lao ma si Josep mangubur bapakna i. Lao ma ibana rap dohot sude pegawai ni si Firaun, akka pejabat tinggi+ istana,* dohot sude pejabat tinggi na di Mesir. 8 Borhat do muse sude na di rumah tangga ni si Josep, akka haha anggina, dohot na di rumah tangga ni bapakna.+ Holan akka dakdanak, dohot akka binatang na dipiaro nasida do na tinggal di luat na di Gosen. 9 Diihutton akka na markareta hoda+ dohot akka na marhoda do nasida. Alani i, massai godang ma rombongan ni nasida i. 10 Dung sahat nasida di inganan pardegean na di Atad, na di luat Jordan, sai tangis ma nasida jala mangandungi saleleng pitu ari. 11 Diida halak Kanaan na di luat i do nasida di inganan pardegean na di Atad. Tikki diida nasida mangandungi, didok ma, “Ai tung massai lungun do huroa roha ni halak Mesir on!” Alani i ma dibahen nasida goar ni inganan na di luat Jordan i Abel-misraim.*

12 Diulahon akka anak ni si Jakkob i do sude pangidoanna i.+ 13 Diboan nasida do si Jakkob tu luat Kanaan. Dikuburhon nasida do ibana di gua na di ladang Makpelah, na di labbung ni Mamre. Si Abraham do na manuhor ladang i sian si Epron halak Het. Dituhor ibana do i lao gabe kuburan.+ 14 Dung sae dikuburhon bapakna i, mulak ma si Josep tu Mesir rap dohot haha anggina, dohot sude halak na lao rap dohot ibana makkubur bapakna i.

15 Dung mate si Jakkob, didok akka abang ni si Josep i ma, “Boha do molo sogo dope roha ni si Josep tu hita? Boha do molo dibalos ibana tu hita sude hajahaton na tabahen tu ibana?”+ 16 Disuru nasida ma halak mandok tu si Josep, “Songon on do hata ni bapa, andorang so mate ibana: 17 ‘Songon on ma dok hamu tu si Josep, “Hupangido ma tu ho, sesa ma hasalaan dohot dosa ni akka abangmi. Ai nungnga dibahen nasida ho susa.”’ Alani i sesa ma hasalaannami, akka naposo ni Debata na disomba ni bapakmu.” Gabe tangis ma si Josep mambege hata ni nasida i. 18 Ro ma haha anggina i, marsomba ma nasida tu jolo ni si Josep jala didok nasida ma, “Bahen ma tu hami manang aha lomo ni roham. Ai hatobanmu do hami!”+ 19 Didok si Josep ma tu nasida, “Unang pola mabiar hamu. Ai dang Debata au, na boi manguhumi hamu. 20 Tikki i, na jahat do dibahen hamu tu au.+ Alai songon na taida saonari, digatti Debata do na jahat i gabe na denggan, lao paluahon godang halak.+ 21 Alani i, unang pola mabiar hamu. Paradeokku do torus sipanganon di hamu dohot di ianakkonmuna.”+ Songon i ma si Josep paposson roha ni nasida asa unang mabiar.

22 Toktong do si Josep tinggal di Mesir rap dohot sude rumah tangga ni bapakna. Jala 110 taon ma leleng ni si Josep mangolu. 23 Sanga do diida si Josep pahoppu ni si Epraim.*+ Songon i nang akka anak ni pahoppuna si Mahir,+ anak ni si Manasse. Songon anakna sandiri do nasida di si Josep.* 24 Ujungna didok si Josep ma tu akka haha anggina, “Satokkin nai, mate nama au. Alai sai diparrohahon Debata do hamu sahat tu ari na naeng ro.+ Boanonna do hamu kaluar sian on, tu luat naung dijanjihon Ibana tu si Abraham, tu si Isak, dohot tu si Jakkob.+ Marsumpa do Ibana mandokkon i tu nasida.” 25 Didok si Josep ma tu akka anak ni si Israel, “Sai diparrohahon Debata do hamu sahat tu ari na naeng ro. Alani i, marsumpa ma hamu tu au, na lao boanonmuna do holi-holikku sian on.”+ 26 Dung marumur 110 taon si Josep, mate ma ibana. Dung i, diawetton+ nasida ma bakkena jala dipamasuk tu poti.