3 MUSA

1 Sian kemah parpunguan i,+ dijou Jahowa ma si Musa, ninna ma, 2 “Songon on ma dok tu halak Israel, ‘Molo adong sian hamu na naeng mamboan binatang na dipiaro lao gabe pelean tu Jahowa, boi ma diboan hamu lombu, manang hambing, manang biru-biru.+

3 “‘Molo naeng lehononmuna lombu gabe pelean situtungon, ikkon lombu jantan do lehononmuna jala na sehat.+ Ikkon sian ias ni rohamuna+ do hamu mamboan i tu jolo ni Jahowa, di pintu ni kemah parpunguan i. 4 Ikkon bahenonmuna do tanganmuna tu ulu ni binatang na lao gabe pelean situtungon i. Molo dibahen hamu songon i, dijalo ma peleanmuna jala disesa ma dosamuna.

5 “‘Dung i, ikkon diseat do lombu jantan i di jolo ni Jahowa. Akka malim+ pinoppar ni si Aron ma na mamelehon mudar ni lombu i, jala dipispisson ma i tu sakaliling ni langgatan+ na adong di jonok ni pintu kemah parpunguan. 6 Ikkon dikuliti do binatang na lao gabe pelean situtungon i jala dipotong gabe piga-piga bagian.+ 7 Dukkon i, diboan akka malim pinoppar ni si Aron ma gara ni api tu langgatan i,+ jala disusun ma akka soban di ginjangna. 8 Dipeakkon nasida ma tu ginjang ni soban naung galak i akka jagal ni binatang i, dohot ma i uluna nang tabo-tabona.*+ 9 Ikkon disussi do usus dohot pat* ni lombu i. Ditutung malim ma i di langgatan asa nakkok timusna. Ai i do pelean na ditutung dohot api. Jala uap ni pelean situtungon i palashon roha ni Jahowa.+

10 “‘Molo biru-biru manang hambing do na lao dilehon gabe pelean situtungon,+ ikkon jantan jala na sehat do dilehon.+ 11 Ikkon diseat do i di jolo ni Jahowa, di labbung ni langgatan i di sabola utara. Jala dipispisson akka malim pinoppar si Aron ma mudar ni binatang i tu sakaliling ni langgatan i.+ 12 Ikkon dipotong ma binatang na lao dipelehon i gabe piga-piga bagian. Dung i, dipeakkon malim ma akka jagal ni binatang i, dohot ma i uluna nang tabo-tabona* tu ginjang ni soban naung galak na di langgatan i. 13 Ikkon disussi do usus dohot pat* ni binatang i. Diboan malim ma i sude jala ditutung di langgatan asa nakkok timusna. Ai i do pelean na ditutung dohot api. Jala uap ni pelean situtungon on palashon roha ni Jahowa.

14 “‘Molo naeng lehononna pidong gabe pelean situtungon tu Jahowa, ikkon lehononna ma anduhur manang anak ni darapati.+ 15 Dipelehon malim ma pidong i di langgatan, jala disilbakkon ma saotik rukkungna. Ikkon dipatiris do mudar ni pidong i tu dinding ni langgatan i. Dung i ditutung ma pidong i di langgatan, asa nakkok timusna. 16 Ikkon dibolokkon do ibbulu dohot buriranna* tu labbung ni langgatan na di sabola timur, i ma inganan ni abu.*+ 17 Dibola ma pidong i sian holang-kolang ni habongna na dua i, alai unang sappe ponggol. Ditutung malim ma pidong i di ginjang ni soban na galak na di langgatan i, asa nakkok timusna. Ai i do pelean na ditutung dohot api. Jala uap ni pelean situtungon i palashon roha ni Jahowa.

2 “‘Molo adong halak naeng mangalehon pelean sipanganon*+ tu Jahowa, ikkon lehononna do topung na halus. Diusehon ma miak tu topung i jala dibahen ma haminjon* tu atasna.+ 2 Dilehon ibana ma i tu akka malim pinoppar ni si Aron. Buaton ni malim ma sappohul topung na halus na marcampur miak dohot haminjon i. Ditutung ma i di langgatan asa nakkok timusna. On ma na gabe tanda naung dipelehon sude pelean i tu Debata.+ Ai on do pelean na ditutung dohot api jala uapna palashon roha ni Jahowa. 3 Gabe appuna ni si Aron dohot akka pinopparna ma sisa ni pelean sipanganon i.+ Bagian na massai badia do i,+ ai sian pelean na tu Jahowa na ditutung dohot api do i dibuat.

4 “‘Molo naeng dilehon hamu roti na dipanggang gabe pelean sipanganon, bahen ma roti i sian topung na halus. Bahen ma roti na so marragi na marbentuk golang na marcampur dohot miak, manang roti na tipis na so marragi na diolesi dohot miak.+

5 “‘Molo di tuangan na datar do dibahen hamu pelean sipanganon i,+ ikkon sian topung na halus do i dibahen hamu, dang marragi, jala dicampur dohot miak. 6 Diponggoli ma i gabe piga-piga bagian, jala diusehon ma miak tu atasna.+ I ma pelean sipanganon.

7 “‘Molo di panci do diloppa pelean sipanganon i, ikkon sian topung na halus do i dibahen hamu, jala dicampur dohot miak. 8 Boan hamu ma pelean sipanganon i tu malim, asa diboan ibana i tu langgatan. Dung i, dipelehon ibana ma i tu Jahowa. 9 Buaton ni malim ma deba sian pelean i lao ditutung di langgatan asa nakkok timusna. On ma na gabe tanda naung dipelehon sude pelean i tu Debata.+ Ai on do pelean na ditutung dohot api jala uapna palashon roha ni Jahowa.+ 10 Gabe appuna ni si Aron dohot akka pinopparna ma sisa ni pelean sipanganon i. Bagian na massai badia do i, ai dibuat sian pelean na tu Jahowa na ditutung dohot api do i.+

11 “‘Unang pelehon pelean sipanganon na marragi tu Jahowa.+ Unang lehon hamu manang aha pe na marcampur dohot ragi manang sari buah* gabe pelean na ditutung dohot api tu Jahowa.

12 “‘Boi do i dipelehon hamu tu Jahowa gabe pelean sian hasil panen na parjolo.+ Alai dang boi i ditutung di langgatan lao mambahen uap na palashon roha ni Debata.

13 “‘Ikkon bahenonmuna do sira tu ganup pelean sipanganon i. Unang sappe lupa hamu mambahen sira. Ai sira do na paingotton hamu tu parjanjian na dibahen hamu dohot Debata. Alani i, ganup diboan hamu pelean, ikkon bahenonmuna do sira.+

14 “‘Molo diboan hamu hasil panen na parjolo gabe pelean sipanganon tu Jahowa,+ lehon ma hasil ladang na baru* dipanen, na dipanggang, jala na diduda gabe topung na kasar. 15 Usehon ma miak tu pelean i jala bahen ma haminjon tu atasna. On ma pelean sipanganon. 16 Buaton ni malim ma deba topung na kasar na marcampur miak i dohot sude haminjonna. Ditutung ma i di langgatan asa nakkok timusna. On ma na gabe tanda naung dipelehon sude pelean i tu Debata.+ Ai on do pelean na ditutung dohot api tu Jahowa.

3 “‘Molo adong naeng mangalehon lombu gabe pelean pardamean*+ tu Jahowa, boi do lehononna lombu jantan manang boru-boru. Alai ikkon na sehat do dilehon. 2 Ikkon dibahen ibana ma tanganna tu ulu ni lombu i, jala diseat ma lombu i di jolo ni pintu kemah parpunguan. Dung i, ikkon dipispisson akka malim pinoppar ni si Aron ma mudar ni binatang i tu sakaliling ni langgatan i. 3 Deba sian pelean pardamean i, ikkon ditutung dohot api gabe pelean tu Jahowa.+ Akka on ma bagian na lao dipelehon i: tabo-tabo+ na manutupi usus dohot tabo-tabo na lokkot di usus, 4 ginjalna na dua i dohot sude tabo-tabona, dohot tabo-tabo na di ate-atena.+ 5 Ditutung akka malim pinoppar ni si Aron ma pelean i di langgatan. Ditutung ma i di atas ni pelean situtungon na ditutung di ginjang ni soban na galak di langgatan i.+ On ma pelean na ditutung dohot api, jala uapna palashon roha ni Jahowa.+

6 “‘Molo adong naeng mangalehon hambing manang biru-biru gabe pelean pardamean tu Jahowa, boi do lehononna jantan manang boru-boru. Alai ikkon na sehat do dilehon.+ 7 Molo biru-biru jantan na poso do na lao dipelehon, boan ma i tu jolo ni Jahowa. 8 Ikkon dibahen ibana ma tanganna tu ulu ni biru-biru i, jala diseat ma biru-biru i di jolo ni pintu kemah parpunguan. Dung i, ikkon dipispisson akka malim pinoppar ni si Aron ma mudar ni binatang i tu sakaliling ni langgatan i. 9 Tabo-tabo na sian pelean pardamean i, ikkon ditutung do dohot api gabe pelean tu Jahowa.+ Akka on ma na dipelehon: ihurna na godang tabo-tabona na jonok tu tanggurungna, tabo-tabo na manutupi usus, tabo-tabo na lokkot di usus, 10 ginjalna na dua i dohot sude tabo-tabona, dohot tabo-tabo na di ate-atena.+ 11 Dung i ditutung malim ma i sude di langgatan asa nakkok timusna. On ma sipanganon* na dipelehon gabe pelean na ditutung dohot api tu Jahowa.+

12 “‘Molo hambing do na lao dipelehon, diboan ma i tu jolo ni Jahowa. 13 Ikkon dibahen ibana ma tanganna tu ulu ni hambing i, jala diseat ma hambing i di jolo ni pintu kemah parpunguan. Dung i, ikkon dipispisson akka malim pinoppar ni si Aron ma mudar ni binatang i tu sakaliling ni langgatan i. 14 Akka on ma na dipelehon gabe pelean na ditutung tu Jahowa: tabo-tabo na manutupi usus, tabo-tabo na lokkot di usus,+ 15 ginjalna na dua i dohot sude tabo-tabona, dohot tabo-tabo na di ate-atena. 16 Ikkon ditutung malim ma i sude di langgatan asa nakkok timusna. On ma sipanganon* na dipelehon gabe pelean na ditutung dohot api tu Debata jala uapna palashon rohana. Jadi sude tabo-tabo appuna ni Jahowa do i.+

17 “‘Manang didia pe hamu maringanan, on ma peraturan na marlakku saleleng ni lelengna tu hamu dohot tu pinopparmuna: Dang boi allangonmuna tabo-tabo manang mudar+ ni manang aha pe.’”

4 Dung i, didok Jahowa ma muse tu si Musa, 2 “Dokkon ma tu halak Israel, ‘Molo adong halak na so sengaja mangulahon dosa,+ manang dang sengaja mangalanggar paretta ni Jahowa, on ma na ikkon ulahononna:

3 “‘Molo malim naung dilantik*+ do na mardosa,+ jala gabe dohot bangso i marsala alani ibana, ikkon pelehononna do tu Jahowa sada lombu jantan na poso jala na sehat, lao gabe pelean hasesaan ni dosa na binahenna i.+ 4 Ikkon diboan ibana do lombu i tu jolo ni Jahowa di pintu kemah parpunguan.+ Ikkon dibahen ibana do tanganna tu ulu ni lombu i, dung i diseat ma lombu i di jolo ni Jahowa.+ 5 Ikkon buaton ni malim naung dilantik*+ i do deba mudar ni lombu i, jala diboan ma i masuk tu bagasan ni kemah parpunguan. 6 Disornoppon malim i ma jari-jarina tu mudar i,+ jala dipispisson ma mudar i pitu hali di jolo ni Jahowa,+ di jolo ni tire na di inganan na badia i. 7 Didaisson ibana ma muse mudar i tu akka tanduk na di langgatan inganan manutung dupa na angur,+ na di jolo ni Jahowa, di bagasan ni kemah parpunguan i. Jala mudar ni lombu na deba nai, diusehon ibana ma tu toru ni langgatan inganan ni pelean situtungon+ na adong di jolo ni pintu kemah parpunguan.

8 “‘Ikkon buatonna do muse sude tabo-tabo ni lombu na dilehon gabe pelean hasesaan ni dosa i, dohot ma i tabo-tabo na manutupi ususna, tabo-tabo na lokkot di ususna, 9 ginjalna na dua i dohot sude tabo-tabona, dohot tabo-tabo na di ate-atena.+ 10 Ikkon bahenon ni malim i do sudena i dos songon na dibahen tu lombu jantan na dilehon gabe pelean pardamean.*+ Dung i ditutung malim ma i sude di langgatan inganan ni manutung pelean situtungon, asa nakkok timusna.

11 “‘Alai kulitna, sibukna, uluna, patna,* ususna, kotoranna,+ 12 dohot sude na asing ikkon diboan do tu luar ni perkemahan, tu inganan naung ditottuhon,* i ma tu inganan ni pambuangan ni abu.* Ikkon tutungon ni malim do i sude di ginjang ni soban na galak,+ na di inganan pambuangan ni abu.

13 “‘Molo sude halak Israel gabe marsala ala dang sengaja nasida mangulahon dosa,+ jala dang diboto nasida naung dilanggar nasida paretta ni Jahowa,+ 14 alai ujungna gabe diboto nasida naung mardosa nasida, ikkon boanon ni nasida ma sada lombu jantan na poso. Diboan ma i tu jolo ni kemah parpunguan i gabe pelean hasesaan ni dosa. 15 Di jolo ni Jahowa, dibahen akka pangituai* ni bangso Israel ma tangan ni nasida tu ulu ni lombu i, jala diseat ma i di jolo ni Jahowa.

16 “‘Ikkon boanon ni malim naung dilantik* i ma deba mudar ni lombu i tu bagasan ni kemah parpunguan. 17 Disornoppon malim i ma jari-jarina tu mudar i, jala dipispisson ma mudar i pitu hali di jolo ni tire i, di jolo ni Jahowa.+ 18 Didaisson ibana ma muse mudar i tu akka tanduk ni langgatan+ na di jolo ni Jahowa, i ma na di bagasan ni kemah parpunguan. Jala mudar na deba nai, diusehon ibana ma tu toru ni langgatan inganan ni pelean situtungon na adong di pintu kemah parpunguan.+ 19 Ikkon buatonna do sude tabo-tabo ni lombu i jala ditutung di langgatan asa nakkok timusna.+ 20 Ikkon bahenon ni malim i do tu lombu i dos songon na dibahen ibana tu lombu na dipelehon ibana tikki ibana mardosa. Songon i ma na ikkon diulahon malim i lao mambahen bangso i mardame muse dohot Debata.+ Jala disesa ma dosa ni nasida. 21 Ikkon boanonna do lombu i tu luar ni perkemahan. Dung i, tutungonna ma i songon manutung lombu na dipelehon tikki mardosa ibana.+ On ma pelean hasesaan ni dosa ni bangso i.+

22 “‘Molo adong pamimpin+ na mangulahon dosa jala gabe marsala, ala dang sengaja mangalanggar sada sian patik ni Jahowa, 23 manang molo adong na paboahon tu ibana naung mardosa ibana ala mangalanggar paretta ni Debata, ikkon boanonna do sada hambing jantan na poso jala na sehat gabe pelean. 24 Ikkon dibahen ibana do tanganna tu ulu ni hambing i, dung i diseat ma hambing i di jolo ni Jahowa, di inganan maneat binatang pelean situtungon.+ On ma pelean hasesaan ni dosa. 25 Disornoppon malim ma jari-jarina tu mudar ni binatang pelean hasesaan ni dosa i. Didaisson ibana ma mudar i tu akka tanduk+ na di langgatan inganan manutung pelean situtungon. Dung i, diusehon ma muse mudar na deba nai tu toru ni langgatan i.+ 26 Tutungonna ma sude tabo-tabo ni binatang i di langgatan, asa nakkok timusna dos songon tabo-tabo ni binatang na dipelehon gabe pelean pardamean.+ Songon i ma na ikkon diulahon malim i lao mambahen pamimpin i mardame muse dohot Debata. Jala disesa ma dosana.

27 “‘Molo adong sahalak sian bangso i na mangulahon dosa jala gabe marsala, ala dang sengaja mangalanggar sada sian patik ni Jahowa,+ 28 manang molo adong na paboahon tu ibana naung mardosa ibana ala mangalanggar paretta ni Debata, ikkon boanonna do sada hambing boru-boru na poso jala na sehat gabe pelean alani dosana i. 29 Ikkon dibahen ibana do tanganna tu ulu ni binatang na lao dipelehon i, dung i diseat ma binatang i di inganan maneat binatang pelean situtungon.+ 30 Disornoppon malim ma jari-jarina tu mudar ni binatang i. Didaisson ibana ma mudar i tu akka tanduk na di langgatan inganan manutung pelean situtungon. Dung i, diusehon ibana ma muse mudar na deba nai tu toru ni langgatan i.+ 31 Ikkon buatonna do sude tabo-tabona+ dos songon na dibahen ibana tu tabo-tabo ni binatang na dilehon gabe pelean pardamean.+ Ditutung ibana ma i sude di langgatan asa nakkok timusna jala uapna palashon roha ni Jahowa. Songon i ma na ikkon diulahon malim i lao mambahen halak na mardosa i mardame muse dohot Debata. Jala disesa ma dosana.

32 “‘Alai molo biru-biru do na lao lehononna gabe pelean hasesaan ni dosa, ikkon boanonna do sada biru-biru boru-boru na poso jala na sehat. 33 Ikkon dibahen ibana do tanganna tu ulu ni binatang na lao dipelehon i. Dung i, diseat ma binatang i gabe pelean hasesaan ni dosa di inganan maneat binatang pelean situtungon.+ 34 Disornoppon malim ma jari-jarina tu mudar ni binatang i. Didaisson ibana ma mudar i tu akka tanduk na di langgatan inganan manutung pelean situtungon.+ Dung i, diusehon ibana ma muse mudar na deba nai tu toru ni langgatan i. 35 Ikkon buatonna do sude tabo-tabona dos songon na dibahen ibana tu tabo-tabo ni biru-biru jantan na dilehon gabe pelean pardamean. Ditutung ibana ma i sude di langgatan, di atas ni pelean na ditutung dohot api tu Jahowa.+ Songon i ma na ikkon diulahon malim i lao mambahen halak na mardosa i mardame muse dohot Debata. Jala disesa ma dosana.+

5 “‘Molo adong halak na mangida donganna manang mamboto donganna mangulahon dosa, ibana ma na gabe saksi.+ Molo adong boa-boa* na mandok asa ro saksi i lao paboahon taringot na masa i, alai dang olo ro saksi i lao paboahon, mardosa ma ibana jala ikkon dihukum do ibana alani salana i.

2 “‘Molo adong halak na manjama manang aha pe na ramun,* songon bakke ni binatang na jinak, bakke ni binatang na liar, dohot bakke ni binatang na mangissir,*+ gabe ramun jala marsala do ibana nang pe dang sengaja ibana manjama i. 3 Manang, molo adong halak na so sengaja manjama sasahalak na ramun,+ manang dang sengaja maniop manang aha pe na mambahen sasahalak i ramun, dohot ma i jolma, sala do ibana disi nang pe dung di pudian ni ari diboto ibana i.

4 “‘Molo adong sasahalak na marsumpa naeng mangulahon na denggan manang na jahat, alai dang jolo dipikkiri ibana i, hape di pudian ni ari gabe manolsoli ibana, marsala do ibana disi.*+

5 “‘Molo adong halak na mangulahon sada pe sian ulaon na sala i, ikkon diakkui+ ibana do dosana i. 6 Ikkon boanonna do pelean hasalaan tu Jahowa alani dosa na niulahonna i.+ Ikkon boanonna do sada biru-biru boru-boru na poso, manang sada hambing boru-boru na poso lao gabe pelean hasesaan ni dosa. Dung i, pangidoon ni malim ma tu Debata asa disesa dosana.

7 “‘Molo dang tarlehonna biru-biru manang hambing, ikkon boanonna do tu Jahowa dua anduhur manang dua anak ni darapati+ gabe pelean hasalaan alani dosana i. Sada ma na gabe pelean hasesaan ni dosa jala na sada nai ma na gabe pelean situtungon.+ 8 Ikkon lehononna ma i tu malim. Dung i, dipelehon malim i ma parjolo pelean hasesaan ni dosa. Disilbakkon malim i ma saotik rukkung ni pidong i, alai dang sappe ponggol. 9 Dipispisson malim ma deba mudar ni pidong i tu dinding ni langgatan i, jala mudar na deba nai dipasombu do tiris tu toru ni langgatan i.+ On ma pelean hasesaan ni dosa. 10 Dung i, dipelehon malim ma muse pidong na sada nai gabe pelean situtungon. Dipelehon ma i mangihutton aturan naung ditottuhon.+ Songon i ma dibahen malim i lao mambahen halak na marsala i mardame dohot Debata. Jala disesa ma dosana.+

11 “‘Molo dang tarlehonna dua anduhur manang dua anak ni darapati, ikkon boanonna do saparsappulu epa*+ topung na halus gabe pelean hasesaan ni dosa. Dang boi bahenonna miak manang haminjon* tu topung i, ai pelean hasesaan ni dosa do i. 12 Diboan ibana ma i tu malim. Dung i, dibuat malim ma sappohul topung na halus i gabe tanda naung dipelehon sude pelean i tu Debata. Ditutung ma i di langgatan, di atas ni pelean na ditutung dohot api tu Jahowa. On ma pelean hasesaan ni dosa. 13 Songon i ma dibahen malim i lao mangido tu Debata asa disesa dosa ni halak na mangulahon sada sian dosa na dipaboa nakkin. Dung i disesa Debata ma dosana.+ Jala dos songon pelean sipanganon*+ do sisa ni topung na dipelehon i, gabe appuna ni akka malim do.’”+

14 Didok Jahowa ma muse tu si Musa, 15 “Molo adong halak na so setia ala dang sengaja mangalanggar patik ni Debata taringot tu akka na badia appuna ni Jahowa,*+ ikkon boanonna do sada biru-biru jantan na sehat gabe pelean hasalaan tu Jahowa.+ Ditottuhon malim i ma piga sekel* perak arga ni binatang i, mangihutton ukkuran sekel na dipakke di inganan na badia.*+ 16 Dung i ikkon lehononna do muse gatti rugi tu akka malim, ala nungnga mangalanggar patik ni Debata taringot tu akka na badia, jala ikkon ditambai ibana do muse 20 persen sian i.+ Dipelehon akka malim ma biru-biru jantan i gabe pelean hasalaan,+ asa mardame halak na marsala i tu Debata. Dung i disesa ma dosana.+

17 “Molo adong halak na mangulahon dosa ala dang sengaja mangalanggar patik ni Jahowa, marsala do ibana disi jala ikkon dihukum do ibana alani hasalaanna i.+ 18 Ikkon dilehon ibana do sada biru-biru jantan na sehat lao gabe pelean hasalaan mangihutton arga naung ditottuhon.+ Dung i, dipangido malim ma tu Debata asa disalpuhon dosana i, i ma dosa na so sengaja diulahon ibana. Jala disesa Debata ma dosana i. 19 I ma pelean hasalaan. Marsala do ibana ala nungnga mardosa tu Jahowa.”

6 Didok Jahowa ma muse tu si Musa, 2 “Molo adong halak na mangulahon dosa jala dang setia tu Jahowa,+ ala mangoto-otoi donganna taringot tu barang na dititippon tu ibana,+ manang manakko barang ni donganna i, manang mangakkali donganna, 3 manang molo dapotna barang ni donganna na mago, alai dang diakkui ibana, jala marsumpa ibana na so diulahon ibana songon i,+ on ma na ikkon diulahon ibana: 4 Molo nungnga diulahon ibana songon i jala marsala, ikkon paulakonna do barang na tinakkona i, barang na dibuat ala manipu manang mangoto-otoi, barang na dititippon tu ibana, manang barang na mago na dapotna i, 5 manang barang na dapotna ala mambahen sumpa palsu. Asing ni i, ikkon lehononna do gatti rugi tu sude barang i,+ jala ikkon ditambai ibana do muse 20 persen sian arga ni barang i. Jala ikkon lehononna do i tu nappuna barang i disi tarboto ibana marsala. 6 Ikkon boanonna do tu malim sada biru-biru jantan na sehat jala naung ditottuhon argana gabe pelean hasalaan tu Jahowa.+ 7 Dung i, dipangido malim ma tu Jahowa asa disalpuhon dosana i, jala disesa Debata ma sude hasalaanna i.”+

8 Dung i didok Jahowa ma muse tu si Musa, 9 “Parettahon ma songon on tu si Aron dohot akka anakna, ‘Songon on ma patik taringot tu pelean situtungon:+ Ikkon ditutung do pelean situtungon di atas ni langgatan mulai sian borngin sahat tu manogot. Jala ikkon toktong do galak api ni langgatan i. 10 Dung i, ikkon dipakke malim do jubah na sian linen,+ dohot celana pendek* na sian bonang linen.+ Jala ikkon dibolokkon ibana do abu*+ panutungan ni pelean situtungon na sian langgatan i tu labbung ni langgatan i. 11 Digatti ibana ma muse bajuna,+ jala diboan ibana ma abu i tu inganan naung ditottuhon* di luar ni perkemahan.+ 12 Ikkon toktong do galak api ni langgatan i, jala dang boi mittop. Ganup manogot, ikkon ditutung malim do soban+ di langgatan i, jala disusun ma di atasna pelean situtungon. Dung i, ikkon ditutung ibana do sude tabo-tabo na sian pelean pardamean* di ginjang ni pelean situtungon i, asa nakkok timusna sian langgatan i.+ 13 Ikkon toktong do galak api ni langgatan i, jala dang boi mittop.

14 “‘On ma patik taringot tu pelean sipanganon:*+ Ikkon boanon ni anak ni si Aron do pelean tu jolo ni Jahowa tu jolo ni langgatan i. 15 Sahalak sian malim ikkon mambuat sappohul topung na halus na marcampur miak. Dibuat ma muse sude haminjon* na di atas ni topung pelean sipanganon i. Dung i ditutung ma i di langgatan asa nakkok timusna. On ma na gabe tanda naung dipelehon sude pelean i tu Jahowa, jala uapna palashon rohana.+ 16 Ikkon allangon ni si Aron dohot akka anakna do sisa ni topung i.+ Dibahen ma i gabe roti na so marragi jala diallang ma i di sada inganan na badia, di alaman ni kemah parpunguan.+ 17 Ikkon gabe roti na so marragi do topung i bahenonna.+ Sian pelean na ditutung dohot api, hulehon do i gabe bagian ni nasida.+ Alani i massai badia do i,+ dos songon pelean hasesaan ni dosa dohot pelean hasalaan. 18 Ganup bawa sian pinoppar ni si Aron ikkon mangallang i.+ Ai i do bagian ni nasida dohot pinopparna sian pelean na ditutung dohot api tu Jahowa. Jala marlakku do i saleleng ni lelengna.+ Manang aha pe na dais tu pelean i gabe badia do.’”

19 Dung i, didok Jahowa ma muse tu si Musa, 20 “On ma na ikkon toktong dipelehon si Aron dohot akka anakna tu Jahowa tikki adong sahalak sian nasida dilantik* gabe sintua ni malim:+ Ikkon dipelehon nasida do saparsappulu epa*+ topung halus gabe pelean sipanganon.+ Satonga pelean i dipelehon tikki manogot, jala na satonga nai dipelehon tikki borngin. 21 Ikkon dicampur do topung i dohot miak di atas ni tuangan na datar.+ Molo dung denggan tarcampur miak dohot topung i, bagi ma i gabe piga-piga bagian. Dung i, panggang ma i gabe pelean sipanganon. Jala uap ni roti i palashon roha ni Jahowa. 22 Manang ise sian pinoppar ni si Aron na dilantik* gabe sintua ni malim+ ikkon mangalehon pelean sisongon i. Jala marlakku do aturan on saleleng ni lelengna: Sude pelean on ikkon ditutung tu Jahowa, asa nakkok timusna. 23 Sude pelean sipanganon na dilehon malim ikkon ditutung do sude, dang adong na boi diallang.”

24 Dung i didok Jahowa ma muse tu si Musa, 25 “Songon on ma dokkon tu si Aron dohot tu akka anakna, ‘On ma patik taringot tu pelean hasesaan ni dosa:+ Ikkon di jolo ni Jahowa do diseat binatang na lao gabe pelean hasesaan ni dosa,+ i ma di inganan maneat binatang pelean situtungon. Massai badia do i. 26 Ikkon allangon ni malim na mamelehon pelean i do i+ di sada inganan na badia, di alaman ni kemah parpunguan.+

27 “‘Gabe badia do manang aha pe na dais tu pelean i. Jala molo mambirsak mudar ni pelean i tu baju ni sasahalak, ikkon sussionna do bajuna i di sada inganan na badia. 28 Molo hudon tano do na dipakke lao mangarobus pelean i, ikkon diputtarhon do hudon i. Alai, molo hudon na sian tombaga do na dipakke mangaloppa, ikkon digosok jala disussi do hudon i sappe ias.

29 “‘Sude bawa naung gabe malim ikkon mangallang i.+ Ai massai badia do i.+ 30 Alai molo diboan do deba mudar ni binatang i tu bagasan ni kemah parpunguan, lao mambahen ibana mardame dohot Debata, dang boi allangonna jagalna.+ Ikkon ditutung do sudena i.

7 “‘On ma patik taringot pelean hasalaan:+ Massai badia do pelean on. 2 Ikkon di inganan maneat binatang na gabe pelean situtungon i do diseat binatang na dipelehon gabe pelean hasalaan. Mudarna+ ikkon dipispisson tu sakaliling ni langgatan i.+ 3 Sude tabo-tabo+ ni binatang i ikkon dipelehon, dohot ma i ihur ni binatang i na godang tabo-tabona, tabo-tabo na manutupi ususna, 4 ginjalna na dua i dohot sude tabo-tabona, dohot tabo-tabo na di ate-atena.+ 5 Ikkon ditutung malim do i sude di langgatan asa nakkok timusna. Ai on do pelean na ditutung dohot api tu Jahowa.+ On ma pelean hasalaan. 6 Sude bawa naung gabe malim ikkon mangallang i,+ jala ikkon diallang do i di sada inganan na badia. Ai massai badia do i.+ 7 Marlakku do aturan ni pelean hasesaan ni dosa tu pelean hasalaan. Jagal ni binatang i gabe bagian ni malim. Ai malim i do na mamelehon i tu Debata lao mambahen pardamean.+

8 “‘Tikki dipelehon malim pelean situtungon na binoan ni sasahalak, kulit ni binatang i+ ma na gabe bagian ni malim i.

9 “‘Sude pelean sipanganon* na dipanggang manang na diloppa di panci manang di tuangan na datar,+ gabe bagian ni malim na mamelehon ma i. Ai akka i do bagianna.+ 10 Alai sude pelean sipanganon na dicampur dohot miak+ manang na so dicampur dohot miak,+ gabe appuna ni akka anak ni si Aron. Dos do dibahen sude bagian ni nasida.

11 “‘Molo naeng mangalehon pelean pardamean*+ sasahalak tu Jahowa, on ma patik na ikkon ulahononna. 12 Molo naeng lehononna do pelean i lao mandok mauliate tu Debata,+ ikkon dohot do lehononna pelean hamauliateon. Lehononna ma roti na so marragi na marbentuk golang jala na dicampur dohot miak, roti na tipis na so marragi na diolesi dohot miak, dohot roti na marbentuk golang na dibahen sian topung na halus na dicampur dohot miak. 13 Ikkon boanonna do roti na marragi na marbentuk golang rap dohot pelean pardamean lao patuduhon hamauliateonna. 14 Ikkon lehononna do sada sian ganup ragam ni roti i tu Jahowa gabe bagian na badia. On ma na gabe bagian ni malim na mamispisson mudar ni binatang pelean pardamean i.+ 15 Jagal na sian pelean pardamean lao patuduhon hamauliateon i, ikkon dipangan di ari tikki ibana mangalehon pelean i. Dang boi i disippan sahat tu manogot.+

16 “‘Molo dilehon ibana peleanna ala dibahen ibana sada sumpa,+ manang dilehon ibana sian na nionjar ni rohana,+ ikkon allangonna do i di ari tikki diboan ibana pelean i. Jala molo adong na tinggal, boi dope allangonna marsogotna i. 17 Molo adong dope na tinggal jagal i di ari na patoluhon, ikkon ditutung ma i di api.+ 18 Alai molo adong na mangallang jagal ni binatang pelean pardamean i di ari na patoluhon, dang marlapatan be peleanna i. Dang lomo be rohakku tu halak na mangalehon pelean i. Ai magigi nama Au mangida jagal ni binatang i, jala ikkon martanggung jawab do ibana alani hasalaanna.+ 19 Molo dais jagal i tu na ramun,* unang be allang hamu. Ikkon ditutung do i dohot api. Holan halak na so ramun do na boi mangallang jagal na dipelehon.

20 “‘Jala molo adong halak na ramun na mangallang jagal ni pelean pardamean na dilehon tu Jahowa, ikkon dipamate do ibana.+ 21 Molo adong halak na manjama na ramun, dohot ma i jolma,+ binatang na ramun,+ dohot manang aha pe na ramun jala na dihagigihon,+ dung i diallang ibana jagal ni pelean pardamean na tu Jahowa, ikkon dipamate do ibana.’”

22 Dung i didok Jahowa ma muse tu si Musa, 23 “Dokkon ma tu halak Israel, ‘Dang boi allangonmuna tabo-tabo+ ni lombu jantan, manang tabo-tabo ni biru-biru jantan, manang tabo-tabo ni hambing. 24 Unang allang hamu tabo-tabo ni binatang na mate dibahen binatang buas, manang tabo-tabo ni binatang na mate sandiri. Alai boi do i pakkeonmuna tu akka ulaon na asing.+ 25 Molo adong na mangallang tabo-tabo ni binatang na ditutung gabe pelean tu Jahowa, ikkon dipamate do ibana.

26 “‘Manang didia pe hamu maringanan, dang boi allangonmuna mudar+ ni manang aha pe, dohot ma i mudar ni pidong manang mudar ni binatang na asing. 27 Ikkon dipamate+ do manang ise na mangallang mudar.’”

28 Dung i, didok Jahowa ma muse tu si Musa, 29 “Songon on ma dokkon tu halak Israel, ‘Manang ise na mamboan pelean pardamean tu Jahowa ikkon lehononna do deba sian peleanna i tu Jahowa.+ 30 Ikkon tanganna sandiri do na mangalehon tabo-tabo ni binatang i. Jala ikkon ditutung do tabo-tabo+ i dohot api tu Jahowa. Lehononna do muse andora ni binatang i. Dung i, diayun-ayunhon ma i tu pudi dohot tu jolo gabe pelean+ tu Jahowa. 31 Ditutung akka malim ma tabo-tabo ni binatang i di langgatan asa nakkok timusna.+ Alai anggo andora ni binatang i gabe appuna ni si Aron dohot akka anakna.+

32 “‘Jala ikkon lehononmuna do sian pelean pardamean i, pat ni binatang na sabola kanan tu malim lao gabe bagian na badia.+ 33 Manang ise malim pinoppar ni si Aron na mamelehon mudar dohot tabo-tabo ni binatang pelean pardamean i, bagianna ma pat ni binatang na sabola kanan.+ 34 Jadi sian pelean pardamean na dilehon halak Israel, lehonokku ma andora na diayunhon i tu si Aron malim i dohot akka anakna. Jala lehonokku do muse pat na gabe bagian na badia i tu nasida. On ma peraturan na marlakku saleleng ni lelengna tu halak Israel.+

35 “‘Sian pelean na ditutung dohot api tu Jahowa, akka on ma na gabe bagian ni si Aron dohot akka anakna, dung diboan nasida tu Jahowa lao marhobas gabe malim.+ 36 Diparettahon Jahowa ma tu halak Israel asa dilehon nasida akka bagian i tu si Aron dohot tu akka anakna di ari tikki nasida dilantik* gabe malim.+ On ma peraturan na marlakku saleleng ni lelengna tu halak Israel.’”

37 On ma patik taringot tu pelean situtungon,+ pelean sipanganon,+ pelean hasesaan ni dosa,+ pelean hasalaan,+ pelean tikki dilantik akka malim,+ dohot pelean pardamean.+ 38 Songon i do diparettahon Jahowa tu si Musa di Dolok Sinai.+ Tikki i, disuru do halak Israel asa mangalehon pelean tu Jahowa di Gurun Sinai.+

8 Dung i, didok Jahowa ma muse tu si Musa, 2 “Jou ma si Aron dohot akka anakna,+ jala boan ma akka baju ni malim i,+ miak na badia,*+ lombu jantan na gabe pelean hasesaan ni dosa, dua biru-biru jantan, dohot karanjang inganan ni roti na so marragi.+ 3 Suru ma nasida marpungu di jolo ni pintu kemah parpunguan.”

4 Diulahon si Musa do paretta ni Jahowa i. Jala marpungu ma nasida sude di jolo ni pintu kemah parpunguan. 5 Dung i didok si Musa ma tu akka halak na marpungu i, “Akka on do paretta ni Jahowa na ikkon taulahon.” 6 Dijou si Musa ma si Aron dohot akka anakna jala diparidi* ma nasida.+ 7 Dipakkehon si Musa ma jubah+ tu si Aron, jala diikkatton ma ikat pinggangna.+ Dung i, dipakkehon ma muse rompi na ganjang+ dohot baju epod.+ Jala diikkatton ibana ma muse ikat pinggang+ ni baju epod i asa gomos. 8 Dung i, dipasang ibana ma muse panutup ni andora*+ tu baju epod i, jala dipamasuk ibana ma Urim* dohot Tumim*+ tu bagasan ni panutup ni andora i. 9 Dibahen si Musa ma muse sorban+ tu ulu ni si Aron. Jala dibahen ibana ma lempengan mas na tipis jala na marhillong tu sorban i. Ai i do tanda na badia na patuduhon naung dipapulik si Aron lao marhobas tu Debata.+ Diulahon si Musa do i songon na diparettahon Jahowa tu ibana.

10 Dung i dibuat si Musa ma miak na badia jala dipispisson ma i tu tabernakel dohot tu sude na adong di bagasanna+ lao pabadiahon sudena i. 11 Dibuat ibana ma muse deba miak i, jala dipispisson ma i pitu hali tu langgatan dohot tu akka peralatanna, tu bak dohot tu panukkolna lao pabadiahon sudena i. 12 Ujungna diusehon ibana ma deba miak na badia i tu ulu ni si Aron. Dilantik* ma si Aron jala dipapulik lao marhobas tu Debata.+

13 Dijou si Musa ma akka anak ni si Aron tu labbungna. Dipakkehon ibana ma jubah tu nasida, dibahen ma ikat pinggangna, jala dibahen ma panutup ni ulu ni nasida.+ Ai songon i do paretta ni Jahowa tu si Musa.

14 Dung i, diboan si Musa ma lombu jantan na lao gabe pelean hasesaan ni dosa i, jala dipeakkon si Aron dohot akka anakna ma tangan ni nasida di ulu ni lombu i.+ 15 Diseat si Musa ma lombu i jala disornoppon ibana ma jari-jarina tu mudar+ ni binatang i. Dung i didaisson si Musa ma mudar i tu sude tanduk na di langgatan asa badia langgatan i. Alai mudar na deba nai diusehon ibana tu toru ni langgatan i. Songon i ma ibana pabadiahon langgatan i, asa boi dipakke lao mangalehon pelean. 16 Dibuat si Musa ma sude tabo-tabo na di ususna, tabo-tabo na di ate-atena, ginjalna na dua i dohot tabo-tabona. Dung i ditutung si Musa ma i di langgatan asa nakkok timusna.+ 17 Alai anggo kulitna, sibukna, dohot kotoranna ditutung do di luar ni perkemahan+ songon na diparettahon Jahowa tu si Musa.

18 Diboan si Musa ma muse sada biru-biru jantan na lao gabe pelean situtungon i. Dipeakkon si Aron dohot akka anakna ma tangan ni nasida tu ulu ni biru-biru i.+ 19 Diseat si Musa ma biru-biru i jala dipispisson ma mudarna tu sakaliling ni langgatan i. 20 Diseat si Musa ma biru-biru i gabe piga-piga bagian. Dung i ditutung ma i rap dohot uluna nang tabo-tabona* asa nakkok timusna. 21 Disussi si Musa ma ususna dohot patna.* Dung i ditutung ibana ma sudena i di langgatan asa nakkok timusna. On ma na gabe pelean situtungon jala uapna i palashon roha ni Debata. I ma pelean na ditutung dohot api tu Jahowa songon na diparettahon Jahowa tu si Musa.

22 Dung i dibuat si Musa ma muse biru-biru jantan na sada nai, jala dipeakkon si Aron dohot akka anakna ma tangan ni nasida tu ulu ni biru-biru i.+ Ai on do biru-biru na dipelehon tikki dilantik akka malim.+ 23 Diseat si Musa ma biru-biru i, jala dibuat ibana ma deba mudarna. Didaisson ma i tu pinggol ni si Aron na di sabola kanan, tu jempol ni tangan kananna, dohot tu jempol ni patna sabola kanan. 24 Dijou ibana ma muse akka anak ni si Aron asa ro tu labbungna. Jala didaisson ma deba mudar i tu pinggol ni nasida na di sabola kanan, tu jempol ni tangan kanan ni nasida, dohot tu jempol ni pat ni nasida na di sabola kanan. Jala dipispisson si Musa ma mudar na deba nai tu sakaliling ni langgatan i.+

25 Dibuat si Musa ma muse tabo-tabo ni biru-biru jantan i, ihurna na godang tabo-tabona, tabo-tabo na di ususna, tabo-tabo na di ate-atena, ginjalna na dua i dohot tabo-tabona, songon i nang patna sabola kanan.+ 26 Dibuat si Musa ma muse roti sian karanjang inganan ni roti na so marragi na di jolo ni Jahowa. Dibuat ibana ma sada roti na so marragi na marbentuk golang,+ sada roti na marbentuk golang na diolesi dohot miak,+ dohot sada roti na tipis. Dipeakkon ibana ma i sude di ginjang ni tabo-tabo i dohot pat ni biru-biru i na sabola kanan. 27 Dung i, dipeakkon si Musa ma i sude tu tangan ni si Aron dohot tu tangan ni akka anakna, jala diayun-ayunhon nasida ma i tu pudi dohot tu jolo gabe pelean tu Jahowa. 28 Dibuat si Musa ma i muse sian tangan ni nasida. Ditutung ibana ma i di langgatan, di atas ni pelean situtungon, asa nakkok timusna. On ma pelean na dilehon tikki dilantik akka malim, jala uapna palashon roha ni Debata. Akka on ma pelean na ditutung dohot api tu Jahowa.

29 Dibuat si Musa ma muse andora ni biru-biru i, jala diayun-ayunhon ma i tu pudi dohot tu jolo gabe pelean tu Jahowa.+ Andora ni biru-biru i ma na gabe bagian ni si Musa tikki dilantik akka malim. Ai songon i do paretta ni Jahowa tu si Musa.+

30 Dibuat si Musa ma saotik miak na badia+ dohot saotik mudar sian langgatan i. Dipispisson ma i tu si Aron dohot tu akka anakna, songon i nang tu pakkean ni nasida. Songon i ma ibana papulikkon si Aron dohot akka anakna lao marhobas tu Debata+ jala lao pabadiahon pakkean ni nasida.+

31 Dung i, didok si Musa ma tu si Aron dohot tu akka anakna, “Robus+ ma jagal ni biru-biru i di pintu kemah parpunguan. Allang ma jagal i rap dohot roti na sian karanjang na dipakke tikki pelantikan. Ikkon allangonmuna do i, ai songon i do diparettahon tu au.+ 32 Molo adong jagal dohot roti na so habis diallang, tutung hamu ma i.+ 33 Unang lao hamu sian pintu ni kemah parpunguan saleleng pitu ari, sahat tu na sae hamu dilantik. Ai pitu ari lelengna acara pelantikanmuna lao gabe malim.+ 34 Jahowa do na marsuru hita mangulahon sude na taulahon sadari on asa mardame hamu dohot Debata.+ 35 Toktong ma hamu di pintu ni kemah parpunguan i arian nang borngin saleleng pitu ari.+ Ikkon ulahononmuna do sude na diparettahon Jahowa tu hamu,+ asa unang mate hamu. Ai songon i do diparettahon Ibana tu au.”

36 Diulahon si Aron dohot akka anakna do sude na diparettahon Jahowa tu si Musa.

9 Di ari na paualuhon,+ dijou si Musa ma si Aron, akka anak ni si Aron, dohot akka pangituai* ni halak Israel. 2 Didok ibana ma tu si Aron, “Buat ma sada anak ni lombu lao gabe pelean hasesaan ni dosam.+ Jala buat ma sada biru-biru jantan na sehat lao gabe pelean situtungon. Dung i, pelehon ma i di jolo ni Jahowa. 3 Jala songon on ma dokkon tu halak Israel, ‘Buat hamu ma sada hambing jantan lao gabe pelean hasesaan ni dosa. Buat hamu ma muse sada anak ni lombu dohot sada biru-biru jantan na poso lao gabe pelean situtungon. Ikkon na sehat do pelean i jala marumur sataon. 4 Buat ma sada lombu jantan dohot sada biru-biru jantan lao gabe pelean pardamean.*+ Pelehon ma sudena i di jolo ni Jahowa. Pelehon ma muse pelean sipanganon*+ na marcampur dohot miak. Ai sadari on patuduon ni Jahowa ma dirina tu hamu.’”+

5 Diboan nasida ma sude na nidok ni si Musa i tu jolo ni kemah parpunguan. Ro ma nasida sude jongjong di jolo ni Jahowa. 6 Didok si Musa ma tu nasida, “Disuru Jahowa do hamu lao mangulahon on sude. Ai naeng patuduon ni Jahowa do hasangaponna tu hamu.”+ 7 Dung i didok si Musa ma tu si Aron, “Lao ma ho tu langgatan i. Pelehon ma pelean hasesaan ni dosam+ dohot pelean situtungonmu. Pangido ma tu Debata asa disesa dosam+ dohot dosa ni keluargam. Dung i pelehon ma pelean ni bangso i+ jala pangido ma tu Debata asa disesa dosa ni nasida.+ Ai songon i do paretta ni Jahowa.”

8 Pittor lao ma si Aron tu langgatan. Diseat ibana ma anak ni lombu i gabe pelean hasesaan ni dosana sandiri.+ 9 Dilehon akka anak ni si Aron ma mudar+ ni lombu i tu si Aron. Disornoppon si Aron ma jari-jarina tu mudar i. Didaisson ibana ma mudar i tu akka tanduk na di langgatan i. Jala mudar na deba nai diusehon ibana ma tu toru ni langgatan i.+ 10 Dibuat ibana ma tabo-tabo ni lombu i, ginjalna, dohot tabo-tabo na di ate-atena lao gabe pelean hasesaan ni dosa. Ditutung ibana ma i di langgatan asa nakkok timusna songon na diparettahon Jahowa tu si Musa.+ 11 Alai dibuat ibana do sibuk dohot kulitna, jala ditutung ma i di luar ni perkemahan.+

12 Dung i diseat si Aron ma binatang na gabe pelean situtungon i. Dilehon akka anakna ma mudar ni binatang i tu ibana. Dipispisson ibana ma i tu sakaliling ni langgatan.+ 13 Dilehon akka anakna ma muse jagal ni pelean situtungon naung diseati i, dohot ma uluna. Dung i ditutung ibana ma sude di langgatan asa nakkok timusna. 14 Disussi ibana ma usus dohot pat* ni binatang i jala ditutung di ginjang ni pelean situtungon na di langgatan asa nakkok timusna.

15 Dung i dipelehon ibana ma pelean ni bangso i. Dibuat ibana ma hambing na lao gabe pelean hasesaan ni dosa ni bangso i. Diseat ibana ma i jala dipelehon dos songon pelean hasesaan ni dosa na binahenna na parjolo. 16 Dibuat ibana ma muse binatang na lao gabe pelean situtungon. Dung i, dipelehon ibana ma i mangihutton aturan naung dibahen.+

17 Dipelehon ibana ma muse pelean sipanganon.+ Dibuat ibana ma sappohul sian pelean sipanganon i jala ditutung ma i di langgatan asa nakkok timusna. On ma tamba ni pelean situtungon na dilehon di tikki manogot.+

18 Dung i diseat si Aron ma lombu jantan dohot biru-biru jantan na gabe pelean pardamean ni bangso i. Dilehon anak ni si Aron ma mudar ni binatang i tu ibana. Dipispisson ibana ma i tu sakaliling ni langgatan i.+ 19 Dibuat nasida do muse tabo-tabo ni lombu i,+ ihurna na godang tabo-tabona, tabo-tabo na manutupi ususna, ginjalna dohot sude tabo-tabona, dohot tabo-tabo na di ate-atena.+ 20 Dipeakkon nasida ma i sude di andora ni akka binatang i. Dung i ditutung si Aron ma sude tabo-tabo i di langgatan asa nakkok timusna.+ 21 Alai andora ni binatang i dohot patna sabola kanan, diayun-ayunhon si Aron ma tu jolo dohot tu pudi gabe pelean na diayun-ayunhon di jolo ni Jahowa. Ai songon i do na dipaboa si Musa.+

22 Nungnga sae be dipelehon si Aron pelean hasesaan ni dosa, pelean situtungon, dohot pelean pardamean i. Diangkat ibana ma tanganna doppak bangso i jala dipangido ibana ma asa dipasu-pasu Debata nasida.+ Dung i turun ma ibana sian langgatan i. 23 Masuk ma si Musa dohot si Aron tu kemah parpunguan. Dung kaluar nasida, dipangido nasida ma tu Debata asa dipasu-pasu bangso i.+

Dipatudu Jahowa ma hasangaponna tu bangso i.+ 24 Diparo Jahowa ma api+ jala ditutung ma sude pelean situtungon dohot akka tabo-tabo na di langgatan. Tikki diida bangso i na masa i, marsurak ma nasida jala marsomba.+

10 Di pudian ni ari, ro ma akka anak ni si Aron, i ma si Nadab dohot si Abihu.+ Dibuat nasida ma inganan ni gara ni api jala ditutung nasida ma dupa+ di atasna. Hape dang adong diparettahon Jahowa asa dibahen nasida songon i. Alani i dang songon na didok di patik i be pelean ni nasida i.+ 2 Diparo Jahowa ma api jala ditutung ma nasida na dua.+ Mate ma nasida di jolo ni Jahowa.+ 3 Dung i didok si Musa ma tu si Aron, “Songon on do hata ni Jahowa, ‘Manang ise na ro tu labbungku,+ ikkon diingot do na badia Au. Jala ikkon dipasangap bangso i do Au.’” Alai sai sip ma si Aron.

4 Dijou si Musa ma si Misael dohot si Elsapan anak ni si Usiel,+ bapa uda ni si Aron. Didok ma tu nasida, “Boan hamu ma bakke ni keluargamuna on. Boan ma i sian jolo ni inganan na badia on tu luar ni perkemahan.” 5 Jadi ro ma nasida, dibuat nasida ma bakke i. Tikki i, lokkot dope baju ni malim di bakke i. Diboan nasida ma bakke i tu luar ni perkemahan songon na diparettahon si Musa.

6 Didok si Musa ma tu si Aron dohot tu anakna na asing, i ma si Eleasar dohot si Itamar, “Unang pasombu hamu dang tarurus obukmuna. Jala unang ribak hamu bajumuna+ asa unang mate hamu, jala asa unang muruk Debata tu bangso i. Lok ma bangso Israel dongan sabangsomuna i na mangandungi halak na dipamate Jahowa i dohot api. 7 Ikkon toktong do hamu di pintu ni kemah parpunguan asa unang mate hamu. Ai nungnga dipillit* hamu mamakke miak na badia* ni Jahowa.”+ Jadi diulahon nasida ma na nidok ni si Musa i.

8 Didok Jahowa ma tu si Aron, 9 “Tikki masuk ho dohot akka anakmu tu kemah parpunguan on, sotung diinum hamu anggur manang siinumon na maralkohol,+ asa unang mate hamu. On ma peraturan na marlakku saleleng ni lelengna tu hamu dohot tu sude pinopparmu. 10 Peraturan on dibahen asa adong imbar ni na badia dohot na ramun,* dohot imbar ni na ias dohot na so ias.+ 11 Jala asa boi diajarhon hamu tu halak Israel sude paretta na dilehon Jahowa marhite si Musa.”+

12 Didok si Musa ma tu si Aron dohot tu akka anakna na mangolu i, i ma si Eleasar dohot si Itamar, “Buat hamu ma sisa ni pelean sipanganon* na ditutung dohot api tu Jahowa. Bahen ma i gabe roti na so marragi jala allang ma i di labbung ni langgatan.+ Ai roti na massai badia do i.+ 13 Sian pelean na ditutung tu Jahowa i ma na gabe bagianmu dohot akka anakmu. Allang ma i di sada inganan na badia.+ Ai i do na diparettahon Debata tu au. 14 Sian pelean pardamean* na dilehon halak Israel, allang hamu ma andora na sian pelean na diayunhon dohot pat ni binatang na gabe bagian na badia.+ Ai i do na dilehon gabe bagianmuna dohot pinopparmuna. Allang hamu ma i rap dohot anakmuna nang borumuna+ di sada inganan na so ramun. 15 Boanon ni halak Israel do pat na gabe bagian na badia i, andora sian pelean na diayunhon, rap dohot tabo-tabo na sian pelean na ditutung dohot api. Diboan nasida do i lao diayun-ayunhon tu jolo dohot tu pudi gabe pelean di jolo ni Jahowa. Andora dohot pat ni binatang i ma na gabe bagianmuna dohot pinopparmuna saleleng ni lelengna.+ Ai songon i do na diparettahon Jahowa.”

16 Sai dilului si Musa ma hambing na gabe pelean hasesaan ni dosa i.+ Hape nungnga ditutung sude. Muruk ma ibana tu si Eleasar dohot tu si Itamar, i ma akka anak ni si Aron na mangolu i dope. Didok ibana ma, 17 “Boasa dang diallang hamu pelean hasesaan ni dosa i? Ai massai badia do i jala nungnga dilehon i lao allangonmuna di sada inganan na badia.+ Dilehon do i tu hamu asa boi ditanggung hamu dosa ni bangso i jala asa boi dipangido hamu disesa dosa ni nasida di jolo ni Jahowa. 18 Ikkon allangonmuna hian do i di inganan na badia.+ Ai dang diboan dope mudarna tu bagasan ni inganan na badia. Songon i do na diparettahon tu au.” 19 Didok si Aron ma tu si Musa, “Nungnga dipelehon nasida be pelean hasesaan ni dosa dohot pelean situtungon di jolo ni Jahowa sadari on.+ Alai alani na masa on, dang huallang i. Ai molo huallang i, las dope roha ni Jahowa mangida au?” 20 Dung dibege si Musa alus ni si Aron i, diattusi ibana ma boasa dibahen si Aron songon i.

11 Dung i, didok Jahowa ma tu si Musa dohot tu si Aron, 2 “Songon on ma dokkon tu halak Israel, ‘Sian binatang na mangolu di darat, akka on ma na boi allangonmuna:+ 3 Boi do allangonmuna sude binatang na marngalu,* na bola dua kukuna jala sappe sirang kukuna i.

4 “‘Alai dang boi allangonmuna binatang na holan marngalu, manang holan na bola dua kukuna. Uppamana unta, marngalu do ibana alai dang bola dua kukuna. Jadi binatang na ramun* do unta i.+ 5 Asing ni i, marmut.*+ Marngalu do nian ibana alai dang bola dua kukuna. Jadi, binatang na ramun do marmut i. 6 Dung i kelinci,* nang pe marngalu ibana alai dang bola dua kukuna. Jadi binatang na ramun do kelinci i. 7 Dung i babi,+ nang pe bola dua kukuna, alai dang marngalu. Jadi binatang na ramun do babi. 8 Sotung dipangan hamu jagalna, manang dijama hamu bakkena. Ai binatang na ramun do sudena i.+

9 “‘Akka binatang na boi allangonmuna na mangolu di aek, di laut manang di sunge, i ma binatang na adong sisikna dohot siripna.+ 10 Alai ikkon magigi do hamu tu sude binatang na so adong siripna dohot sisikna, i ma akka binatang na mangolu di laut dohot di sunge. Dohot ma i sude binatang na gelleng* manang sude binatang na asing na mangolu di aek na so adong siripna dohot sisikna. 11 Ikkon magigi do hamu tu sude binatang i. Unang pangan hamu i,+ jala ikkon magigi do hamu tu bakkena. 12 Ikkon magigi do hamu tu sude na mangolu di aek na so adong siripna dohot sisikna.

13 “‘Ikkon magigi do hamu tu akka binatang na habang on, jala dang boi panganonmuna: lali,+ rajawali siallang dekke, lali na birong siallang bakke,+ 14 lali na merah, dohot sude ragam ni lali na birong, 15 sude ragam ni burung gagak, 16 burung unta, burung hantu, burung camar, sude ragam ni burung falkon, 17 burung hantu na gelleng, burung pecuk padi, burung hantu na pinggolna ganjang, 18 angsa, burung pelikan, pidong siallang bakke, 19 burung bangau,* sude ragam ni burung kuntul, burung hupo, dohot kelelawar. 20 Jala ikkon magigi do hamu mangida sude binatang na marhabong jala na boi mardalan.

21 “‘Boi do allangonmuna sude binatang na gelleng na marhabong, na mardalan, jala na adong patna lao mangakkat-akkat. 22 Akka on ma na boi allangonmuna: sude ragam ni sihapor*+ dohot jangkrik. 23 Alai ikkon magigi do hamu tu sude binatang na asing na gelleng na marhabong, jala na mardalan. 24 Boi do akka binatang i mambahen hamu ramun. Ai manang ise na manjama bakke ni binatang i, gabe ramun ma ibana sahat tu na bonom mataniari.+ 25 Manang ise na manjama bakke ni binatang i, ikkon disussi ibana do bajuna.+ Jala ramun ma ibana sahat tu na bonom mataniari.

26 “‘Ramun do sude binatang na so marngalu, na bola dua kukuna alai dang sappe sirang kukuna i. Gabe ramun do manang ise na manjama binatang i.+ 27 Ramun do sude binatang na opat patna jala tajom kukuna.* Manang ise na manjama bakke ni binatang i gabe ramun ma ibana sahat tu na bonom mataniari. 28 Manang ise na mamboan bakke ni binatang i, ikkon disussi do bajuna.+ Jala ramun ma ibana sahat tu na bonom mataniari.+ Jadi ikkon ramun do di hamu sude binatang i.

29 “‘Ikkon ramun do di hamu sude binatang na gelleng na markelompok-kelompok na mangolu di darat, i ma bagudung tano, bagudung,+ dohot sude ragam ni kadal, 30 cicak, komodo, salamander,* cicak pasir, dohot bunglon. 31 Sude binatang i, ikkon ramun do di hamu.+ Jala manang ise na manjama bakkena, ramun ma ibana sahat tu na bonom mataniari.+

32 “‘Molo madabu bakke ni binatang i tu akka barang dohot ma i barang na sian hau manang sian kulit, dohot baju, nang abit goni, gabe ramun ma akka barang i. Ikkon dipamasuk do barang na ramun i tu aek, jala gabe ramun do i sahat tu na bonom mataniari. Dung pe i, dang ramun barang i. 33 Molo madabu bakke ni binatang i tu hudon tano, ikkon diputtarhon do i. Ai gabe ramun do sude na dipamasuk tu hudon i.+ 34 Ramun do sude sipanganon, molo hona aek na sian hudon tano i tu sipanganon i. Jala siinumon manang aha pe na di bagasan hudon tano i gabe ramun do. 35 Molo madabu bakke ni binatang i tu barang manang aha pe, gabe ramun do barang i. Molo madabu bakke i tu oven manang tu tungku ni api, ikkon diputtarhon do i. Ai gabe ramun do i sude jala toktong do i ramun. 36 Molo madabu bakke i tu mata mual manang tu lubang panampungan ni aek, dang ramun aek na adong disi. Alai manang ise na manjama bakke i gabe ramun do. 37 Molo madabu bakke ni binatang i tu boni na so disabur dope, dang ramun boni i. 38 Alai molo nungnga maraek boni i jala madabu bakke ni binatang i tusi, gabe ramun ma boni i.

39 “‘Manang ise na manjama bakke ni binatang na boi allangon, gabe ramun ma ibana sahat tu na bonom mataniari.+ 40 Manang ise na mangallang bakke ni binatang i, ikkon disussi ibana do bajuna. Jala gabe ramun ma ibana sahat tu na bonom mataniari.+ Manang ise na mamboan bakke ni binatang i, ikkon disussi ibana do bajuna. Jala gabe ramun ma ibana sahat tu na bonom mataniari. 41 Ikkon magigi do hamu tu sude binatang na gelleng na adong di darat.+ Dang boi allangonmuna binatang i. 42 Unang allang hamu binatang manang aha pe na gelleng na manjirir mamakke butuhana, na mardalan mamakke opat patna, manang na godang patna. Ikkon magigi do hamu tu sude binatang i.+ 43 Unang bahen hamu gabe magigi Debata tu hamu alani akka binatang na gelleng i. Jala unang bahen hamu gabe ramun dirimuna manang dang ias alani akka binatang i.+ 44 Ai Au do Jahowa Debatamuna.+ Alani i, ikkon toktong do hamu ias jala badia.+ Ai badia do Au.+ Jadi, unang bahen hamu dirimuna gabe ramun alani akka binatang na gelleng i. 45 Ai Au do Jahowa na mamboan hamu kaluar sian Mesir lao patuduhon na Au do Debatamuna.+ Alani i, ikkon badia do hamu.+ Ai badia do Au.+

46 “‘Akka i ma patik taringot tu binatang na habang, na mangolu di aek, na mangolu di darat, dohot binatang na gelleng na mangolu di darat. 47 Patik i dibahen, asa boi dipaimbar hamu binatang na ramun dohot na ias. Binatang na boi dipangan dohot binatang na so boi dipangan.’”+

12 Didok Jahowa ma muse tu si Musa, 2 “Dok ma tu halak Israel, ‘Molo adong sahalak borua na hamil jala tubu anakna bawa, gabe ramun* ma ibana saleleng pitu ari, dos songon tikki ibana datang bulan.+ 3 Di ari na paualuhon ikkon disunat+ do anakna i. 4 Jala saleleng 33 ari nai, ikkon paiason ni borua i do dirina alani mudar i. Saleleng so salpu ari i, dang boi jamaonna manang aha pe na badia jala dang boi ibana masuk tu inganan na badia.

5 “‘Alai molo borua do na tubu i, ramun ma ibana saleleng 14 ari, dos songon tikki ibana datang bulan. Jala saleleng 66 ari nai, ikkon toktong do paiasonna dirina alani mudar i. 6 Molo dung salpu ari paiasson diri ala nungnga ditubuhon anak manang boru, ikkon boanonna do sada biru-biru jantan na marumur sataon manang hurang lao gabe pelean situtungon.+ Ikkon boanonna do muse sada darapati manang sada anduhur lao gabe pelean hasesaan ni dosa. Diboan ibana ma i tu pintu kemah parpunguan jala dilehon tu malim. 7 Dipelehon malim ma i di jolo ni Jahowa. Jala dipangido ibana ma asa mardame borua i tu Debata jala gabe ias ma ibana sian mudarna na kaluar i. On ma patik na marlakku tu borua na manubuhon sada anak manang boru. 8 Alai molo dang tolap ibana mangalehon biru-biru, ikkon boanonna do dua anduhur manang dua anak ni darapati.+ Sada gabe pelean situtungon jala sada nai gabe pelean hasesaan ni dosa. Dung i, dipangido malim ma asa mardame borua i tu Debata jala gabe ias ma ibana.’”

13 Dung i didok Jahowa ma muse tu si Musa dohot tu si Aron, 2 “Molo adong di kulit ni sasahalak benjolan, koreng, manang adong bintik-bintik na boi mambahen ibana marsahit kusta,*+ ikkon diboan do ibana tu Malim Aron, manang tu sahalak sian anakna naung gabe malim.+ 3 Ikkon dipareso malim do infeksi na di kulitna i. Molo gabe bottar do ibbulu ni kulit na hona infeksi i jala gabe masuk tu bagasan kulitna i, na hona sahit kusta do i. Ikkon dipareso malim ma ibana jala paboaonna ma tu godang halak naung ramun* na marsahit i. 4 Molo marwarna bottar do bintik-bintik na di kulitna i, dang muba gabe bottar ibbuluna i, jala infeksina i holan di kulitna i do dang sahat tu bagasan, ikkon dipapulik malim ma ibana sian na asing saleleng pitu ari.+ 5 Dung i, dipareso malim ma ibana di ari na papituhon. Molo sarupa dope infeksina i jala dang rarat tu sude kulitna, ikkon dipapulik malim do ibana muse pitu ari nai.

6 “Dung i, dipareso malim ma muse ibana di ari na papituhon. Molo nungnga mulai muba muse warna ni kulitna i songon na biasa, jala dang rarat sahitna i, paboaon ni malim ma tu godang halak na so ramun ibana,+ berarti na korengan do kulitna i. Ikkon disussi na marsahit i ma pakkeanna, dung i ias ma ibana. 7 Alai molo rarat do korengna* i dung dipareso malim ibana, jala nungnga didok malim tu akka halak na so ramun ibana, ikkon ro do muse ibana manjuppangi malim. 8 Dipareso malim ma ibana, jala molo tutu do rarat korengna i, berarti nungnga hona kusta ibana. Paboaon ni malim ma muse tu godang halak na ramun do ibana.+

9 “Molo adong halak na hona kusta, ikkon diboan do ibana tu jolo ni malim. 10 Ikkon dipareso malim do ibana.+ Molo adong benjolan na bottar di kulitna, jala gabe bottar ibbulu na di benjolan i, jala adong lukka disi,+ 11 berarti nungnga parah sahit kustana. Ikkon paboaon ni malim do tu godang halak na ramun halak na marsahit i. Dang porlu papulikon ni malim ibana sian halak na asing+ lao mamareso ibana, ai nungnga takkas ibana ramun. 12 Molo diida malim nungnga rarat be sahit kustana i tu sude dagingna, mulai sian uluna sahat tu patna, 13 ikkon paresoon ni malim do muse ibana. Molo tutu do naung rarat kustana i tu sude dagingna, ikkon paboaon ni malim ma tu godang halak na so bali be sahitna i tu halak na asing.* Ai nungnga bottar be sude kulitna, alani i dang ramun na marsahit i. 14 Alai molo adong lukka di kulitna i, gabe ramun ma ibana. 15 Dung diida malim adong lukka, paboaon ni malim ma tu godang halak na ramun do na marsahit i.+ Ai ramun do lukka i jala sahit kusta do i.+ 16 Alai molo malum do lukkana i,* ikkon ro do ibana muse manjuppangi malim. 17 Ikkon dipareso malim ma ibana,+ jala molo mulak bottar kulit na lukka i, paboaon ni malim ma tu godang halak na so ramun ibana.

18 “Molo bisulon sasahalak jala malum bisulna i, 19 hape gabe adong benjolan na bottar muse di bekas ni bisulna i, manang bintik-bintik na bottar campur na merah, ikkon patuduonna do i tu malim. 20 Ikkon dipareso malim do ibana.+ Molo gabe bottar do ibbulu na di benjolan i, jala infeksina nungnga masuk tu bagasan, dang holan di kulitna, berarti nungnga tubu sahit kusta di bekas ni bisul i. Ikkon paboaon ni malim ma tu godang halak na ramun do ibana. 21 Alai molo dung dipareso malim ibana, dang muba ibbuluna i gabe bottar, dang sahat infeksina i tu bagasan ni kulitna, jala warnana nungnga mulai mulak songon na biasa, ikkon papulikon ni malim do ibana sian halak na asing saleleng pitu ari.+ 22 Dukkon i molo rarat do infeksina i tu sude dagingna, ikkon paboaon ni malim ma tu godang halak, na ramun ibana. Ai sahit kusta do i. 23 Alai molo dang rarat bintik-bintik i, berarti alani bisul i do i marrara,* ikkon paboaon ni malim ma tu godang halak na so ramun ibana.+

24 “Molo adong lukka ni sasahalak ala hona tutung, jala adong di lukkana i bintik-bintik na bottar manang bintik-bintik na bottar campur na merah, 25 ikkon paresoon ni malim do sahitna i. Molo gabe bottar do ibbulu na di lukka i, jala masuk infeksina i tu bagasan dang holan di kulitna, berarti nungnga tubu kusta di lukkana i. Alani i, ikkon paboaon ni malim ma tu godang halak na ramun ibana. Ai nungnga hona kusta ibana. 26 Alai molo dung dipareso malim ibana jala diida dang adong muba ibbuluna gabe bottar, infeksina holan di kulitna, jala nungnga mulai mulak warnana songon na biasa, ikkon dipapulik malim do ibana sian halak na asing saleleng pitu ari.+ 27 Di ari papituhon ikkon paresoon ni malim do ibana. Molo rarat do bintik-bintikna i tu sude dagingna, ikkon paboaon ni malim do tu godang halak na ramun na marsahit i. Ai sahit kusta do i. 28 Alai molo dang rarat bintik-bintikna i, jala nungnga mulai mulak warnana songon na biasa, berarti holan na bongkak alani lukana i do i. Ikkon paboaon ni malim ma tu godang halak na so ramun ibana, ai bongkak alani na hona tutung i do i.

29 “Molo adong bawa manang borua na hona infeksi uluna manang osang-osangna,* 30 ikkon dipareso malim ma infeksina i.+ Molo dang holan di kulitna i infeksina alai masuk do tu bagasan, jala gabe warna kuning manang gabe otik janggut manang obukna na hona infeksi i, berarti nungnga adong infeksi di ulu manang di osang-osangna i. Ikkon dipaboa malim ma tu godang halak na ramun ibana. Ai kusta do na di ulu manang na di osang-osangna i. 31 Alai molo diida malim holan di kulitna i do infeksina i, jala dang adong obuk manang janggut na birong disi, ikkon dipapulik malim ma ibana sian halak na asing saleleng pitu ari.+ 32 Dung i dipareso malim ma muse ibana di ari na papituhon. Molo dang rarat infeksina i, dang adong obuk manang janggut na warna kuning, jala holan di kulitna i do infeksina, 33 ikkon dicukkur ma obuk manang janggutna i, alai dang boi dicukkur na hona infeksi i. Dung i, ikkon dipapulik malim ma ibana sian halak na asing saleleng pitu ari.

34 “Ikkon dipareso malim ma muse infeksina i di ari na papituhon. Molo dang rarat infeksi na di uluna dohot na di osang-osangna i, jala molo holan di kulitna do infeksina i, ikkon paboaon ni malim ma tu godang halak na so ramun na marsahit i. Ikkon disussi ibana do bajuna jala dang ramun be ibana. 35 Alai molo rarat do infeksina i dung didok malim tu godang halak na so ramun ibana, 36 ikkon paresoon ni malim do ibana muse. Molo tutu do naung rarat infeksina i, dang pola be paresoon ni malim atik na adong obukna manang janggutna na muba gabe warna kuning. Ai nungnga takkas na ramun ibana. 37 Alai molo dung dipareso malim dang rarat infeksina i, jala tubu do disi obuk manang janggut na birong, berarti nungnga malum infeksina i. Dang ramun be ibana. Ikkon dipaboa malim ma tu godang halak na so ramun ibana.+

38 “Molo marbintik-bintik na bottar kulit ni sahalak bawa manang borua, 39 ikkon dipareso malim ma ibana.+ Molo pudar do warna ni bintik-bintik na bottar i, berarti bintik-bintik biasa do i, jala dang sahit na posi. Alani i, dang ramun ibana.

40 “Molo rontok obuk ni sahalak bawa jala gabe botak, dang na ramun ibana. 41 Molo rontok obuk ni sahalak bawa di bagian jolo jala gabe botak salaksapna i, dang ramun ibana. 42 Alai molo adong tubu lukka na warna bottar marcampur na merah di uluna na botak i manang di salaksapna, on patuduhon nungnga tubu kusta di uluna manang di salaksapna i. 43 Ikkon paresoon ni malim do ibana. Molo gabe bongkak do infeksi na di uluna manang na di salaksapna i, gabe marwarna bottar marcampur na merah infeksina i, jala gabe songon sahit kusta di kulit, 44 nungnga hona kusta be ibana jala gabe ramun. Ikkon paboaon ni malim ma tu godang halak naung ramun ibana alani kusta na di uluna i. 45 Jadi manang ise na hona kusta, ikkon diribak ma pakkeanna. Ikkon dipasombu do obukna dang tarurus. Jala ikkon ditutupi ibana do babana* huhut mandok, ‘Ramun, ramun!’ 46 Ramun ma ibana saleleng marsahit kusta. Ala ramun do ibana, ikkon pulik do ingananna sian halak na asing, i ma di luar ni perkemahan.+

47 “Molo hona kusta baju na sian wol, manang baju na sian linen, 48 manang bonang na lao ditonun mamakke bonang wol manang linen, manang bahan na sian kulit, jala manang aha pe na dibahen sian kulit, 49 jala gabe marwarna kuning campur na ijo sudena i, manang gabe adong bintik-bintik na merah di baju, di bahan na sian kulit, di bonang na lao ditonun, manang akka barang na sian kulit, berarti nungnga hona kusta be i sude. Alani i, ikkon diboan do i tu jolo ni malim. 50 Ikkon dipareso malim ma sahit i. Barang na hona kusta i, ikkon dipapulik sian halak na asing saleleng pitu ari.+ 51 Di ari na papituhon, dipareso malim ma bintik-bintik i. Molo rarat do sude bintik-bintik i di baju, di bonang na lao ditonun, manang di bahan na sian kulit (manang aha pe taho na dibahen sian kulit), berarti kusta na ganas do i. Alani i, ramun do sude barang i.+ 52 Ikkon ditutung malim do baju i, bonang wol manang linen na lao ditonun i, manang barang aha pe taho na dibahen sian kulit naung hona sahit kusta i. Ikkon ditutung do i, ai nungnga hona kusta na ganas tusi.

53 “Alai molo dung dipareso malim bintik-bintik i, jala dang rarat tu baju, tu bonang na lao ditonun i, manang tu akka barang na dibahen sian kulit, 54 suruon ni malim ma asa disussi akka barang na hona kusta i. Dung i, dipapulik ma i sian halak na asing saleleng pitu ari nai. 55 Molo dung ias disussi sude barang i, ikkon paresoon ni malim do i muse. Molo disi dope kustana i ramun ma barang i, nang pe dang rarat kustana i tu sude barang i. Ikkon ditutung do i, ai nungnga sega barang i dibahen kusta i sian bagasan dohot sian luar.

56 “Alai molo gabe pudar warna ni bintik-bintik i dung disussi ias akka barang i, ikkon diribak malim do bagian na hona kusta i sian baju i, manang sian bahan na sian kulit, manang sian bonang na lao ditonun i. 57 Alai molo tarida do muse bintik-bintik i di bagian na asing sian baju, manang bonang na lao ditonun, manang bahan na sian kulit, berarti nungnga rarat kusta i. Ikkon ditutung do barang manang aha pe na hona kusta.+ 58 Alai molo gabe mago do kusta i dung disussi baju i, manang bonang na lao ditonun i, manang bahan na sian kulit i, ikkon disussi do i muse. Dung i dang ramun be akka barang i.

59 “Akka i ma patik taringot tu sahit kusta na adong di baju na sian bonang wol manang linen, manang na di bonang na lao ditonun, manang di akka barang na dibahen sian kulit. Dibahen do i asa diboto malim barang na dia na ramun manang na so ramun. Ai ikkon paboaonna do i tu godang halak.”

14 Dung i, didok Jahowa ma muse tu si Musa, 2 “On ma patik na ikkon ihuttonon ni halak na marsahit kusta* tikki ro ibana manjuppangi malim, i ma di ari tikki lao dipaboa na so ramun* be ibana.+ 3 Ikkon lao do malim tu luar ni perkemahan mamareso ibana. Jala molo nungnga malum kustana i, 4 suruon ni malim ma ibana mamboan dua pidong na so ramun, hau ares, bonang na merah, dohot hisop.* Dipakke ma i sude lao pabadiahon ibana.+ 5 Suruon ni malim ma muse asa diseat sada pidong i di ginjang ni hudon tano na marisi aek na ias. 6 Dung i, dibuat ma pidong na sada nai jala disornoppon ma tu mudar ni pidong naung di seat i. Disornoppon ma i rap dohot hau ares, bonang na merah dohot hisop. 7 Dipispisson malim ma mudar i pitu hali tu halak na lao paiasson diri sian kusta. Dung i paboaon ni malim ma tu godang halak na so ramun be ibana. Jala paluaon ni malim ma pidong na mangolu i.+

8 “Ikkon disussi halak na paiasson diri i ma bajuna, dicukkur obukna dohot sude ibbuluna, jala ikkon maridi do ibana. Dung i, dang ramun be ibana jala boi ma ibana masuk tu perkemahan. Alai saleleng pitu ari, ikkon di luar ni kemahna do ibana tinggal. 9 Di ari na papituhon, ikkon dicukkur ibana do sude obukna, janggutna, dohot alisna. Ikkon disussi ibana do muse bajuna jala ikkon maridi do ibana. Dung i, dang ramun be ibana.

10 “Di ari na paualuhon, ikkon boanonna do dua biru-biru jantan na poso dohot sada biru-biru boru-boru.+ Ikkon na sehat do i jala marumur sataon manang hurang. Ikkon boanonna do muse tolu parsappulu epa* topung na halus na dicampur dohot miak gabe pelean sipanganon,*+ dohot sada log* miak.+ 11 Ikkon malim do na mamboan ibana rap dohot sude peleanna i tu jolo ni Jahowa, i ma tu jolo ni pintu ni kemah parpunguan. Malim na mamboan ibana, i ma malim na paboahon ibana dang ramun be. 12 Ikkon dipelehon malim i do sada biru-biru jantan na poso i gabe pelean hasalaan,+ rap dohot sada log miak. Diayun-ayunhon ibana ma i tu pudi dohot tu jolo gabe pelean na diayunhon tu Jahowa.+ 13 Ikkon diseat do biru-biru jantan na poso i di sada inganan na badia. Ikkon diseat do i di inganan maneat binatang na gabe pelean hasesaan ni dosa dohot pelean situtungon.+ Dos songon pelean hasesaan ni dosa, bagian ni malim do pelean hasalaan i.+ Alani i, massai badia do i.+

14 “Dibuat malim ma deba mudar ni binatang na gabe pelean hasalaan i. Didaisson ibana ma i tu pinggol sabola kanan ni halak na paiasson diri i, tu jempol ni tangan kananna, dohot tu jempol ni patna na sabola kanan. 15 Dibuat malim ma saotik miak na sada log i,+ jala dibahen ma i tu talapak ni tanganna sabola kiri. 16 Disornoppon malim i ma jari-jari ni tanganna na sabola kanan tu talapak ni tanganna na sabola kiri i. Dung i, dipispisson ibana ma miak i pitu hali tu jolo ni Jahowa. 17 Didaisson malim i ma muse miak na deba nai na di tanganna i tu pinggol sabola kanan ni halak na paiasson diri i, tu jempol ni tangan kananna, dohot tu jempol ni patna na sabola kanan, songon tikki ibana mandaisson mudar na sian pelean hasalaan i. 18 Dibahen malim ma muse miak na tinggal di talapak ni tanganna i tu ulu ni halak na paiasson diri i. Ai ikkon bahenon ni malim do songon i asa disesa sude dosa ni halak na paiasson diri i di jolo ni Jahowa.+

19 “Ikkon dipelehon malim do binatang na gabe pelean hasesaan ni dosa,+ asa disesa Debata dosa ni halak na ramun i, jala asa unang gabe ramun be ibana. Dung i, ikkon diseat malim do binatang na gabe pelean situtungon. 20 Ikkon dipelehon malim do pelean situtungon dohot pelean sipanganon+ di atas ni langgatan. Jala ikkon dipangido malim do tu Debata asa disesa dosa ni halak na ramun i.+ Dung i, dang ramun be ibana.+

21 “Alai molo pogos do ibana jala dang tolap mangalehon i, ikkon boanonna do sada biru-biru jantan na poso lao gabe pelean hasalaan. Ikkon diayun-ayunhon do i lao mangido tu Debata asa disesa dosana. Ikkon boanonna do muse saparsappulu epa* topung na halus na dicampur dohot miak lao gabe pelean sipanganon, sada log miak, 22 dohot dua anduhur manang dua anak ni darapati hombar tu na tolap lehononna. Sada pidong i dibahen gabe pelean hasesaan ni dosa, jala na sada nai gabe pelean situtungon.+ 23 Ikkon boanonna do sudena i tu malim di ari na paualuhon.+ Boanonna ma i tu jolo ni Jahowa di pintu ni kemah parpunguan, ai di ari i do paboaon ni malim na so ramun be ibana.+

24 “Dibuat malim ma biru-biru jantan na poso i na gabe pelean hasalaan+ dohot miak na sada log i. Jala diayun-ayunhon ma i tu pudi dohot tu jolo gabe pelean na diayunhon di jolo ni Jahowa.+ 25 Diseat malim ma biru-biru jantan i na dibahen gabe pelean hasalaan. Dibuat malim ma deba mudar ni binatang i. Didaisson ma i tu pinggol sabola kanan ni halak na paiasson diri i, tu jempol ni tangan kananna, dohot tu jempol ni patna na sabola kanan.+ 26 Diusehon malim ma saotik miak i tu talapak ni tanganna sabola kiri.+ 27 Dipispisson malim ma miak na di talapak ni tangan kirina i pitu hali di jolo ni Jahowa mamakke jari-jari ni tangan kananna. 28 Didaisson malim ma muse miak na deba nai na di tanganna i tu pinggol sabola kanan ni halak na paiasson diri i, tu jempol ni tangan kananna, dohot tu jempol ni patna na sabola kanan, songon tikki ibana mandaisson mudar na sian pelean hasalaan i. 29 Dibahen malim ma muse miak na tinggal di talapak ni tanganna tu ulu ni halak na paiasson diri i. Ai ikkon bahenon ni malim do songon i lao mangido tu Jahowa asa disesa sude dosa ni halak na paiasson diri i.

30 “Ikkon dipelehon malim do sada anduhur manang sada anak ni darapati hombar tu na tolap lehononna,+ 31 i ma na tolap lehononna gabe pelean hasesaan ni dosa, jala na sada nai gabe pelean situtungon.+ Lehononna ma i sude rap dohot pelean sipanganon. Jala pangidoon ni malim ma tu Jahowa asa disesa sude dosa ni halak na paiasson diri i.+

32 “Akka i ma patik na ikkon diihutton halak na marsahit kusta, na so tolap mangalehon pelean songon na somal lao paiasson dirina.”

33 Dung i didok Jahowa ma tu si Musa dohot tu si Aron, 34 “Molo dung sahat hamu di luat Kanaan,+ i ma luat na lao hulehon gabe appunamuna,+ jala disi adong sada jabu na hupasombu hona kusta,+ 35 ikkon ro do nappunasa jabu i manjuppangi malim. Jala dohononna ma, ‘Adong huida na songon kusta di tembok ni jabukku.’ 36 Ikkon suruon ni malim do asa dipakosong jabu i andorang so ro ibana mamareso. Molo dang dipakosong nasida jabu i, dohonon ni malim ma tu godang halak, na ramun do sude na adong di jabu i. Dukkon i pe asa ro malim mamareso jabu i. 37 Molo dung dipareso malim tembok ni jabu i, jala diida ibana adong bintik-bintik na ijo marcampur na kuning manang bintik-bintik na merah di tembok i, jala nungnga sahat tu bagasan ni tembok i bintik-bintikna i, dang holan di permukaan be, 38 ikkon kaluar ma malim i sian jabu i jala ditutup ma jabu i saleleng pitu ari.+

39 “Dipareso malim ma muse jabu i di ari na papituhon. Molo nungnga rarat bintik-bintik na di tembok ni jabu i, 40 ikkon diparettahon malim ma asa dibongkar akka batu na hona bintik-bintik i. Dung i, dibolokkon ma i tu luar ni kota, tu inganan mambolokkon akka na ramun. 41 Ikkon disuru ibana do muse asa dikikis sude dinding ni jabu i sian bagasan. Dibolokkon ma simin palester naung dikikis i tu luar ni kota, tu inganan mambolokkon akka na ramun. 42 Dung i dipasang nasida ma muse batu na baru tu tembok naung dibongkar i. Dipasang ma i mamakke simin* na baru. Jala ikkon dipalester do jabu i.

43 “Molo tarida muse bintik-bintik i dung dibongkar akka batu i, dikikis jala dipalester dinding ni jabu i, 44 ikkon ro do muse malim mamareso jabu i. Molo nungnga rarat bintik-bintik i di jabu i, berarti kusta na ganas do i.+ Gabe ramun ma jabu i. 45 Suruon ni malim ma asa dibongkar jabu i, mulai sian batuna, hauna, palesterna, dohot siminna. Ikkon dibolokkon do i sude tu luar ni kota, tu inganan mambolokkon akka na ramun.+ 46 Saleleng ditutup jabu i, dang boi manang ise pe masuk tu jabu i.+ Ai manang ise na masuk tusi, gabe ramun ma ibana sahat tu na bonom mataniari.+ 47 Jala manang ise pe na modom manang mangan di jabu i, ikkon disussi do bajuna.

48 “Alai molo dung dipareso malim jabu i, jala diida dang rarat bintik-bintik i dung dipalester, paboaon ni malim ma tu godang halak, na so ramun be jabu i. Ai nungnga mago bintik-bintik i. 49 Buaton ni malim ma dua pidong, hau ares, bonang na merah, dohot hisop.*+ Dipakke ma i sude tu ulaon pabadiahon jabu i.* 50 Diseat ma sada pidong i di ginjang ni hudon tano na marisi aek na ias. 51 Dung i, dibuat ma muse pidong na sada nai jala disornoppon ma i tu mudar ni pidong naung diseat i. Disornoppon ma i rap dohot hau ares, bonang na merah, dohot hisop. Dipispisson malim ma mudar i pitu hali tu jabu i.+ 52 Dipakke malim do mudar ni pidong, aek na ias, pidong na mangolu, hau ares, hisop, dohot bonang na merah lao pabadiahon jabu i.* 53 Dung i dipalua malim ma pidong na mangolu i. Songon i ma cara ni malim pabadiahon jabu i* jala dang ramun be jabu i.

54 “Akka i ma patik taringot tu sahit kusta, na hona infeksi di uluna manang di osang-osangna,+ 55 baju na hona kusta+ manang jabu na hona kusta,+ 56 taringot tu benjolan, koreng, dohot bintik-bintik.+ 57 Dibahen do i asa boi ditottuhon dia na ramun dohot na so ramun.+ Akka i ma patik taringot tu kusta.”+

15 Didok Jahowa ma muse tu si Musa dohot tu si Aron, 2 “Dok ma songon on tu halak Israel, ‘Molo adong sahalak bawa na marsahit jala kaluar cairan na songon nanah sian alat kelaminna,* gabe ramun* do ibana alani i.+ 3 Molo sai kaluar cairan i sian alat kelaminna, manang molo gabe soppol alat kelaminna i alani cairan i, toktong do ibana ramun.

4 “‘Manang didia pe bawa na marsahit i hundul manang modom, gabe ramun do hundulan manang podomanna i. 5 Manang ise na manjama podoman ni bawa i, ikkon disussi do bajuna, ikkon maridi do ibana jala gabe ramun ma ibana sahat tu na bonom mataniari.+ 6 Manang ise na hundul di hundulan ni bawa na marsahit i, ikkon disussi do bajuna, ikkon maridi do ibana, jala gabe ramun ma ibana sahat tu na bonom mataniari. 7 Manang ise na manjama bawa na marsahit i, ikkon disussi do bajuna, ikkon maridi do ibana, jala gabe ramun ma ibana sahat tu na bonom mataniari. 8 Molo hona tijur ni bawa na marsahit i tu halak na so ramun, ikkon disussi do bajuna, ikkon maridi do ibana, jala gabe ramun ma ibana sahat tu na bonom mataniari. 9 Sude palano* na dihunduli bawa na marsahit i, gabe ramun do. 10 Manang ise na manjama barang na dihunduli bawa na marsahit i, gabe ramun ma ibana sahat tu na bonom mataniari. Manang ise na mangangkat barang i, ikkon disussi do bajuna, ikkon maridi do ibana, jala gabe ramun ma ibana sahat tu na bonom mataniari. 11 Molo dijama bawa na marsahit i halak na asing+ hape dang disussi dope tanganna, ikkon disussi halak na dijama i do bajuna, ikkon maridi do ibana, jala gabe ramun ma ibana sahat tu na bonom mataniari. 12 Molo dijama bawa na marsahit i akka barang na sian tano liat, ikkon diputtarhon do barang i. Jala molo dijama bawa i akka barang na sian hau, ikkon disussi do barang i.+

13 “‘Molo nungnga malum sahitna i jala dang kaluar be cairan na songon nanah i, ikkon disussi ibana do bajuna, jala ikkon maridi do ibana dung salpu pitu ari. Dung i pe asa dang ramun be ibana.+ 14 Di ari na paualuhon, ikkon boanonna ma dua anduhur manang dua anak ni darapati+ tu jolo ni Jahowa, tu jolo ni pintu kemah parpunguan. Jala dilehon ibana ma i tu malim. 15 Dung i dipelehon malim ma sada pidong i gabe pelean hasesaan ni dosa, jala na sada nai gabe pelean situtungon. Dipangido malim ma tu Jahowa asa disesa dosa ni bawa i jala asa unang ramun be ibana.

16 “‘Molo kaluar do air mani ni sahalak bawa, ikkon maridi do ibana jala gabe ramun ma ibana sahat tu na bonom mataniari.+ 17 Molo hona air manina i tu baju manang tu bahan na sian kulit, ikkon disussi do barang i. Jala ramun do akka barang i sahat tu na bonom mataniari.

18 “‘Molo dikaluarhon sahalak bawa air manina tikki mangulahon seks dohot sahalak borua, ikkon maridi do nasida. Jala gabe ramun ma nasida na dua sahat tu na bonom mataniari.+

19 “‘Molo kaluar mudar ni sahalak borua ala datang bulan ibana, gabe ramun ma ibana saleleng pitu ari.+ Jala ramun do manang ise pe na manjama ibana sahat tu na bonom mataniari.+ 20 Saleleng ramun borua i ala na datang bulan i, gabe ramun do sude ingananna modom. Jala gabe ramun do sude manang aha pe na dihunduli ibana.+ 21 Manang ise na manjama podoman ni borua i, ikkon disussi do bajuna, ikkon maridi do ibana, jala gabe ramun ma ibana sahat tu na bonom mataniari. 22 Manang ise na manjama barang na dihunduli borua i, ikkon disussi do bajuna, ikkon maridi do ibana, jala gabe ramun ma ibana sahat tu na bonom mataniari. 23 Molo hundul borua i di podoman manang di na asing, jala adong halak na manjama i, gabe ramun ma na manjama i sahat tu na bonom mataniari.+ 24 Molo mangulahon seks sahalak bawa dohot ibana, jala hona mudar ni haidna i tu bawa i,+ gabe ramun ma bawa i saleleng pitu ari. Jala manang didia pe bawa i modom, gabe ramun ma podomanna i.

25 “‘Molo kaluar mudar ni borua saleleng piga-piga ari,+ hape dang i dope tikkina datang bulan,+ manang molo sai kaluar dope mudar ni sahalak borua, hape nungnga ikkon sae hian tikkina datang bulan, ramun ma ibana. Ramun ma ibana saleleng kaluar mudar i, dos songon tikki ibana datang bulan. 26 Manang didia pe borua i modom, gabe ramun ma podomanna i.+ Jala manang didia pe ibana hundul, gabe ramun ma hundulanna i saleleng kaluar mudarna i, dos songon tikki datang bulan ibana. 27 Manang ise na manjama akka barang i, ikkon disussi do bajuna, ikkon maridi do ibana, jala gabe ramun ma ibana sahat tu na bonom mataniari.+

28 “‘Alai molo dang kaluar be mudarna i, ikkon paimaonna do salpu pitu ari nai asa dang ramun be ibana.+ 29 Di ari na paualuhon, ikkon boanonna ma dua anduhur manang dua anak ni darapati+ tu malim di jolo ni pintu kemah parpunguan.+ 30 Dung i dipelehon malim ma sada pidong i gabe pelean hasesaan ni dosa, jala na sada nai gabe pelean situtungon. Dipangido malim ma tu Jahowa asa disesa dosa ni borua i jala asa unang ramun be ibana.+

31 “‘Songon i ma carana hamu manjaga halak Israel i asa toktong badia, asa unang mate nasida ala dibahen nasida ramun tabernakelhu na adong di tonga-tonga ni nasida.+

32 “‘Akka i ma patik na ikkon diulahon molo kaluar cairan na songon nanah sian sahalak bawa, molo gabe ramun sahalak bawa ala kaluar air manina,+ 33 molo ramun sahalak borua ala datang bulan ibana,+ molo sai kaluar cairan ni sahalak bawa, manang sai kaluar mudar ni sahalak borua,+ jala molo mangulahon seks sahalak bawa dohot borua na ramun.’”

16 Makkatai ma Jahowa tu si Musa dung mate anak ni si Aron na dua i, i ma anakna na mate ala ro tu adopan ni Jahowa.+ 2 Didok Jahowa ma tu si Musa, “Dok ma tu si Aron abangmi asa unang lomo-lomona masuk tu Inganan na Massai Badia+ na di balik ni tire i,+ i ma na di jolo ni tutup ni poti inganan ni patik i, asa unang mate ibana.+ Ai patuduhonokku do dirikku di bagasan ombun+ di atas ni tutup ni poti i.+

3 “On ma na ikkon boanon ni si Aron molo masuk ibana tu Inganan na Massai Badia: sada lombu jantan na poso lao gabe pelean hasesaan ni dosa+ dohot sada biru-biru jantan lao gabe pelean situtungon.+ 4 Ikkon pakkeonna do jubah na badia sian bonang linen na halus,+ celana pendek* na sian bonang linen+ lao manutupi hailaonna,* ikat pinggang na sian linen,+ dohot sorban na sian linen.+ Akka i ma baju ni malim.*+ Ikkon maridi do ibana+ jala ikkon dipakke ibana do sudena i.

5 “Ikkon jaloonna do sian bangso Israel+ dua hambing jantan na poso lao gabe pelean hasesaan ni dosa, dohot sada biru-biru jantan lao gabe pelean situtungon.

6 “Ikkon pelehonon ni si Aron do lombu jantan lao gabe pelean hasesaan ni dosa. Dung i, disesa Debata ma dosana+ dohot dosa ni keluargana.

7 “Dung i boanonna ma hambing na dua i tu jolo ni Jahowa, di jolo ni pintu kemah parpunguan. 8 Dilempar si Aron ma undi lao manottuhon dia do hambing na lao dipelehon tu Jahowa, jala dia do hambing na lao mamboan dosa ni bangso i.* 9 Dung i diboan si Aron ma hambing naung ditottuhon tu Jahowa marhite undi i.+ Dipelehon ma i gabe pelean hasesaan ni dosa. 10 Alai hambing na sada nai naung ditottuhon lao mamboan dosa ni bangso i,* ikkon diboan do tu jolo ni Jahowa. Diboan do i asa disesa dosa ni bangso i. Dung i dipalua ma hambing i tu gurun.+

11 “Ikkon diboan si Aron do lombu jantan na lao gabe pelean hasesaan ni dosa. Dipangido ibana ma asa disesa dosana dohot dosa ni keluargana. Dung i, diseat ibana ma lombu i gabe pelean hasesaan ni dosa.+

12 “Ikkon dibuat si Aron do gara ni api+ sian langgatan+ na di jolo ni Jahowa. Jala ikkon dibuat ibana do muse dua pohul dupa na angur.+ Dung i, diboan ma i tu balik ni tire i.+ 13 Ikkon dibahen ibana do muse dupa i tu ginjang ni gara ni api na di jolo ni Jahowa,+ asa ditutupi timus ni dupa i tutup ni poti i,+ i ma poti inganan ni Patik.+ Ikkon dibahen ibana do songon i asa unang mate ibana.

14 “Ikkon dibuat si Aron do deba mudar ni lombu i.+ Dibahen ma jari-jarina lao mamispisson mudar i. Dipispisson ma i pitu hali di jolo ni tutup ni poti i di sabola timur.+

15 “Ikkon diseat ibana do hambing na gabe pelean hasesaan ni dosa i, i ma hambing na dipelehon lao manesa dosa ni bangso i.+ Ikkon diboan ibana do mudar ni hambing i tu balik ni tire i.+ Jala ikkon dipispisson ibana do mudar+ ni hambing i di jolo ni tutup ni poti i, dos songon na dibahen ibana tu mudar ni lombu i.

16 “Ikkon dipabadia si Aron do Inganan na Massai Badia i sian akka ulaon na ramun,* sian hasalaan, dohot sian dosa.+ Jala ikkon dibahen ibana do muse songon i tu kemah parpunguan, i ma kemah na di tonga-tonga ni bangso Israel na mangulahon na ramun.

17 “Unang adong na masuk tu kemah parpunguan i saleleng di bagasan Inganan na Massai Badia i si Aron. Unang adong na ro tusi sahat tu na kaluar si Aron sian i. Ai di tikki i do dipangido si Aron tu Debata asa disesa dosana, dosa ni keluargana,+ dohot dosa ni bangso i.+

18 “Dung kaluar ibana sian i, lao ma ibana tu langgatan,+ tu jolo ni Jahowa. Dipabadia ibana ma langgatan i. Dibuat ma deba mudar ni lombu i dohot mudar ni hambing i. Dung i, didaisson ma i tu sude tanduk na di langgatan i. 19 Ikkon dipispisson ibana do mudar i pitu hali tu langgatan i mamakke jarina. Dipispisson do i lao pabadiahon langgatan i sian akka ulaon na ramun na diulahon bangso i.

20 Dung sae dipabadia+ ibana Inganan na Massai Badia i, kemah parpunguan, dohot langgatan,+ diboan ibana ma hambing na mangolu i.+ 21 Ikkon dipeakkon si Aron ma tanganna na dua i tu ulu ni hambing i. Dung i dipaboa ibana ma sude hasalaan ni bangso Israel dohot sude dosa ni nasida. Dos ma i songon na mameakkon dosa ni nasida tu ulu ni hambing i.+ Dung i dilehon ibana ma hambing i tu halak naung ditottuhon* lao mamboan hambing i tu gurun. 22 Ikkon paluaonna do hambing i asa diboan hambing i sude hasalaan+ ni bangso i tu gurun.+

23 “Dung i masuk ma si Aron tu kemah parpunguan. Dibukka ibana ma baju linen na dipakke ibana tikki masuk tu Inganan na Massai Badia. Ditinggalhon ibana ma baju i di kemah parpunguan i. 24 Ikkon maridi do ibana+ di sada inganan na badia. Dung i dipakke ma bajuna+ jala dipelehon ma pelean situtungonna+ dohot pelean situtungon appuna ni bangso i.+ Dipangido ibana ma tu Debata asa disesa dosana dohot dosa ni bangso i.+ 25 Jala ikkon ditutung ibana do tabo-tabo ni binatang na dipelehon gabe pelean hasesaan ni dosa i di langgatan, asa nakkok timusna.

26 “Ikkon maridi do halak na mamboan hambing i, i ma hambing na mamboan dosa ni bangso i.*+ Jala ikkon disussi ibana do bajuna. Dung i pe asa boi ibana masuk tu perkemahan.

27 “Ikkon diboan malim do lombu jantan dohot hambing na gabe pelean hasesaan ni dosa i tu luar ni perkemahan. Mudarna i do na diboan tu Inganan na Massai Badia asa disesa dosa ni nasida. Ikkon ditutung do kulit ni binatang i, jagalna, dohot kotoranna di luar ni perkemahan.+ 28 Ikkon disussi halak na manutung i do bajuna jala ikkon maridi do ibana. Dung i pe asa boi ibana masuk tu perkemahan.

29 “On ma peraturan na marlakku tu hamu saleleng ni lelengna: Di ari na pasappuluhon bulan na papituhon, ikkon dipatudu hamu do na manolsoli hamu alani dosamuna.* Di ari i unang adong na karejo,+ halak Israel nang halak sian bangso na asing na tinggal rap dohot hamu. 30 Di ari i ma hamu mardame dohot Debata.+ Disesa ma dosamuna jala gabe ias ma hamu di jolo ni Jahowa.+ 31 Ai i do ari Sabat, ari lao maradi. Ikkon dipatudu hamu do na manolsoli hamu alani dosamuna.+ I ma peraturan na marlakku saleleng ni lelengna.

32 “Manang ise malim na dipillit*+ jala dilantik gabe malim+ manggattihon bapakna,+ ibana ma na mangido hasesaan ni dosa tu Debata. Ikkon dipakke ibana do baju linen,+ i ma baju ni malim.*+ 33 Ikkon dipabadia ibana do inganan na badia,+ kemah parpunguan,+ dohot langgatan.+ Jala ikkon dipangido ibana do asa disesa dosa ni akka malim, dohot dosa ni bangso i.+ 34 On ma peraturan na marlakku tu hamu saleleng ni lelengna.+ Sahali sataon ikkon dipangido malim do tu Debata asa disesa sude dosa ni halak Israel.”+

Diulahon si Aron do sudena i songon na diparettahon Jahowa tu si Musa.

17 Didok Jahowa ma muse tu si Musa, 2 “Dok ma tu si Aron, tu akka anakna, dohot tu sude halak Israel, ‘On ma paretta ni Jahowa:

3 “‘“Molo adong halak Israel na maneat lombu, manang biru-biru, manang hambing di perkemahan manang di luar ni perkemahan, 4 jala dang diboan ibana binatang i tu jolo ni pintu kemah parpunguan lao dipelehon tu Jahowa di jolo ni tabernakel ni Jahowa, gabe marsala ma ibana. Ai nungnga dilanggar ibana patik ni Debata tikki maneat binatang i. Alani i, ikkon dipamate do ibana. 5 Paretta on dibahen asa unang diseat bangso Israel be binatang di inganan na asing. Alai ikkon diboan nasida do i tu jolo ni Jahowa di pintu ni kemah parpunguan. Ikkon dilehon nasida do binatang i tu malim, jala dipelehon ma i gabe pelean pardamean* tu Jahowa.+ 6 Dung i dipispisson malim ma mudar ni binatang i tu langgatan ni Jahowa na di jolo ni pintu kemah parpunguan. Ditutung malim ma tabo-tabona asa nakkok timusna, jala uapna palashon roha ni Jahowa.+ 7 Alani i dang lehonon ni halak Israel be pelean tu debata na so sittong na songon hambing,*+ na disomba nasida.+ On ma peraturan na marlakku tu hamu dohot tu pinopparmuna saleleng ni lelengna.”’

8 “Dokkon ma tu nasida, ‘Molo adong halak Israel manang halak sian bangso na asing na tinggal rap dohot hamu, naeng mangalehon pelean manang pelean situtungon, 9 alai dang diboan tu jolo ni pintu kemah parpunguan asa dipelehon tu Jahowa, ikkon dipamate do ibana.+

10 “‘Molo adong halak Israel manang halak sian bangso na asing na tinggal rap dohot hamu, mangallang mudar ni manang aha pe,+ dang jalookku be ibana. Jala pamateonku ma ibana. 11 Ai di mudar i do ngolu ni nasa na mangolu.+ Jala nungnga hutottuhon ikkon tu langgatan i+ do dibahen mudar i asa disesa dosamuna. Marhite ngolu na adong di mudar i boi ma disesa dosamuna.+ 12 I do alana boasa hupaboa on tu halak Israel, “Unang adong sian hamu na mangallang mudar. Akka halak sian bangso na asing na rap tinggal dohot hamu+ pe, dang boi mangallang mudar.”+

13 “‘Molo adong halak Israel manang halak na sian bangso na asing na rap tinggal dohot hamu na marburu binatang manang pidong na boi allangon, ikkon diusehon do mudar ni binatang i+ jala ikkon ditutup ma i dohot tano. 14 Ai di mudar i do ngolu ni nasa na mangolu. Di mudar i do hangoluanna. Alani i hudok ma tu bangso Israel, “Unang allang hamu mudar ni manang aha pe. Ai di mudar i do ngolu ni nasa na mangolu. Ikkon dipamate do manang ise na mangallang mudar.”+ 15 Molo adong halak Israel manang halak sian bangso na asing na mangallang jagal ni binatang na mate sandiri, manang na mate dibahen binatang buas,+ ikkon maridi do ibana, ikkon disussi do bajuna jala ramun* ma ibana sahat tu na bonom mataniari.+ Dung i pe asa dang ramun be ibana. 16 Alai molo dang maridi ibana jala dang disussi bajuna, ibana ma na martanggung jawab tu hasalaanna i.’”+

18 Didok Jahowa ma muse tu si Musa, 2 “Dok ma tu halak Israel i, ‘Au do Jahowa Debatamuna.+ 3 Unang tiru hamu pangalaho ni halak na di Mesir ingananmuna hian. Unang ihutton hamu pangalaho ni halak Kanaan, i ma luat na lao silehonokku tu hamu.+ Jala unang ihutton hasomalan ni nasida. 4 Alai toktong ma oloi patikku jala ulahon parettakku.+ Au do Jahowa Debatamuna. 5 Ikkon ulahononmuna do patik dohot parettakku. Manang ise na mangulahon patik, mangolu ma ibana.+ Au do Jahowa.

6 “‘Unang adong sian hamu na mangulahon seks dohot* keluargana na samudar.+ Au do Jahowa. 7 Unang hamu mangulahon seks dohot bapakmuna, jala unang hamu mangulahon seks dohot omakmuna. Ai omakmuna do ibana. Alani i unang hamu mangulahon seks dohot omakmuna.

8 “‘Unang hamu mangulahon seks dohot istri ni bapakmuna.+ Ai na pailahon bapakmuna do hamu disi.

9 “‘Unang hamu mangulahon seks dohot itomuna, i ma boru ni bapakmuna manang boru ni omakmuna, nang pe samudar hamu manang na dang dohot ibana.+

10 “‘Unang hamu mangulahon seks dohot boru ni anakmuna manang boru ni borumuna. Ai na pailahon dirimuna do hamu disi.

11 “‘Unang hamu mangulahon seks dohot boru ni istri ni bapakmuna, ai pinoppar ni bapakmuna do i. Alani i, itomuna do i.

12 “‘Unang hamu mangulahon seks dohot ito ni bapakmuna. Ai samudar dope ibana dohot bapakmuna.+

13 “‘Unang hamu mangulahon seks dohot kakak manang adek ni omakmuna. Ai samudar dope ibana dohot omakmuna.

14 “‘Unang dipaila hamu abang manang adek ni bapakmuna marhite mangulahon seks dohot istri ni nasida. Ai inang tua manang inang udamuna do nasida.+

15 “‘Unang hamu mangulahon seks dohot parumaenmuna.+ Ai istri ni anakmuna do ibana, alani i unang hamu mangulahon seks dohot ibana.

16 “‘Unang hamu mangulahon seks dohot istri ni abangmuna manang istri ni adekmuna.+ Ai na pailahon abang manang adekmuna do hamu disi.

17 “‘Unang hamu mangulahon seks dohot boru ni istrimuna.+ Jala unang hamu mangulahon seks dohot pahoppu ni istrimuna i, sian anakna manang sian boruna. Ai keluargana do i. Jala ulaon ni halak na so umboto ila do molo dibahen hamu songon i.

18 “‘Unang buat kakak ni istrim manang anggina gabe istrimuna na paduahon.+ Unang hamu mangulahon seks dohot ibana tikki mangolu dope istrimuna i.

19 “‘Unang hamu mangulahon seks dohot borua na datang bulan. Ai ramun* do ibana di tikki i.+

20 “‘Unang hamu mangulahon seks dohot istri ni donganmuna. Ai ramun do hamu molo diulahon hamu songon i.+

21 “‘Unang ma olo hamu mamelehon anakmuna tu debata Molok.+ Unang dibahen hamu gabe marlea goarhu.+ Ai Au do Jahowa.

22 “‘Unang hamu mangulahon seks dohot bawa songon tu borua.+ Ai magigi do Debata tu ulaon i.

23 “‘Unang adong bawa na mangulahon seks dohot binatang, ramun do ibana molo diulahon i. Jala unang adong borua na mangulahon seks dohot binatang,+ ai na mangalanggar aturan naung ditottuhon Debata do ibana disi.

24 “‘Unang ulahon hamu sudena i, asa unang ramun hamu. Ai songon i do na diulahon akka bangso na lao hupalao sian jolomuna, na mambahen nasida gabe ramun.+ 25 Alani i, gabe ramun do luat i. Hukumokku ma nasida alani sala ni nasida. Jala sappattonokku* ma pangisi ni huta i tu luar ni luat i.+ 26 Alai ikkon toktong do ulahononmuna akka aturan dohot patik naung hutottuhon.+ Unang ulahon hamu nanggo sada pe sian ulaon na huhagigihon i, hamu rap dohot sude halak na sian bangso na asing na tinggal rap dohot hamu.+ 27 Ai akka i do na diulahon pangisi ni luat i andorang so hamu na tinggal disi.+ Alani i ma ramun luat i. 28 Molo dang diulahon hamu akka na ramun, dang husappatton hamu sian luat i, songon na lao bahenokku tu akka bangso pangisi ni luat i andorang so hamu. 29 Ikkon dipamate do halak na mangulahon akka ulaon na huhagigihon i. 30 Ikkon ulahononmuna do sude parettakku. Unang ulahon hamu nanggo sada pe hasomalan ni akka bangso na hea tinggal di luat i.+ Ai magigi do Au mangida i sude. Molo diulahon hamu parettakki, dang ramun hamu. Ai Au do Jahowa Debatamuna.’”

19 Dung i, didok Jahowa ma muse tu si Musa, 2 “Dok ma tu halak Israel, ‘Ikkon badia do hamu, ai badia do Au. Au do Jahowa Debatamuna.+

3 “‘Ikkon pasangaponmuna* do bapakmuna dohot omakmuna.+ Jala ikkon diulahon hamu do ari Sabat.+ Au do Jahowa Debatamuna. 4 Unang somba hamu akka debata na so marguna+ jala unang bahen hamu patung* gabe debatamuna.+ Ai Au do Jahowa Debatamuna.

5 “‘Molo naeng mangalehon pelean pardamean* hamu tu Jahowa,+ lehon hamu ma pelean i mangihutton cara na sittong asa dijalo peleanmuna i.+ 6 Ikkon allangonmuna do pelean i di ari tikki hamu mangalehon pelean i dohot marsogotna i. Molo adong dope na tinggal pelean i sahat tu ari na patoluhon, ikkon ditutung do i.+ 7 Molo adong na mangallang pelean i di ari na patoluhon, dang lomo be rohakku tu peleanna i, jala dang hujalo be i. 8 Manang ise na mangallang i, ikkon tanggungonna do akibatna. Ai nungnga dibahen ramun* pelean na badia na dilehon tu Jahowa. Alani i, ikkon dipamate do ibana.

9 “‘Tikki panen hamu di ladang, unang pola panen hamu sude akka na di pinggir ni ladangmuna jala unang pola buat hamu sisa ni panenmuna na tinggal.+ 10 Unang pola buat hamu parbue ni anggur na tinggal dope manang parbue ni anggur na madabu. Tinggalhon ma i, asa adong buaton ni halak na pogos*+ dohot halak na sian bangso na asing. Ai Au do Jahowa Debatamuna.

11 “‘Unang hamu manakko,+ unang hamu manipu,+ jala unang oto-otoi hamu donganmuna jolma. 12 Unang hamu mandok sumpa na so tutu di bagasan goarhu.+ Ai na mangaleai goarhu do hamu disi. Au do Jahowa Debatamuna. 13 Unang oto-otoi hamu donganmuna jolma,+ jala unang mangarampok hamu.+ Unang tahan hamu gaji ni parkarejo sahat tu marsogotna i.+

14 “‘Unang burai hamu* halak na nengel, jala unang bahen hamu abbat-abbat di jolo ni halak na mapitung.+ Ikkon mabiar do hamu tu Debatamuna,+ ai Au do Jahowa.

15 “‘Unang papeol hamu hukum tikki mangadili. Unang marpihak hamu tu sasahalak holan ala na pogos manang na mora ibana.+ Ikkon tigor do hamu tikki mangadili donganmuna.

16 “‘Unang lao hamu tusan tuson lao paboa-boahon na so sittong.+ Unang bahen hamu manang aha pe lao mambahen donganmuna mate.*+ Ai Au do Jahowa.

17 “‘Molo sogo rohamuna tu donganmuna, unang sippan di rohamuna.+ Alai ikkon marsitutu do hamu pasingotton ibana,+ asa unang dohot hamu martanggung jawab tu dosana.

18 “‘Unang balos+ pambahenan ni halak na jahat tu hamu, jala unang dendam hamu tu ibana. Alai, ikkon haholonganmuna do donganmuna jolma doshon dirimuna.+ Ai Au do Jahowa.

19 “‘Ikkon ihuttononmuna do akka aturan na hubahen on: Unang pakawin dua binatang na so sarupa jenisna. Unang suan dua boni na so sajenis di ladangmuna.+ Jala unang pakke hamu abit na dibahen sian dua jenis bonang.+

20 “‘Molo adong sahalak bawa mangulahon seks dohot hatoban borua na lao dilehon tu bawa na asing, alai dang ditobus dope ibana manang dibebasson, ikkon dihukum do nasida. Alai unang dipamate, ai dang bebas dope hatoban i. 21 Ikkon boanon ni bawa i do sada biru-biru jantan lao gabe pelean hasalaan tu Jahowa.+ Diboan ibana ma i tu jolo ni pintu kemah parpunguan. 22 Dipelehon malim ma biru-biru jantan na lao gabe pelean hasalaan i tu jolo ni Jahowa. Dipangido ibana ma tu Debata asa disesa dosa ni bawa i. Dung dibahen songon i, sesaon ni Debata ma dosa ni bawa i.

23 “‘Dung sahat hamu di luat na lao hulehon i tu hamu, suan hamu ma disi akka hau. Alai saleleng tolu taon, ikkon ramun do parbuena i di hamu jala dang boi allangonmuna. Alani i, unang allang hamu i. 24 Alai di taon na paopatton, badia ma sude parbue ni hau i. Las ma rohamuna mangalehon i sude gabe pelean tu Jahowa.+ 25 Di taon na palimahon, massai godang ma bahenokku parbuena jala boi ma i allangonmuna. Ai Au do Jahowa Debatamuna.

26 “‘Unang allang hamu manang aha pe na marcampur mudar.+

“‘Unang lao hamu tu peramal manang tu datu.+

27 “‘Unang cukkur obuk na di sakaliling ni ulumuna, manang unang gusting hamu ujung ni jenggotmuna.*+

28 “‘Unang seati hamu dagingmuna ala marsak hamu tikki adong na mate,+ jala unang bahen tato di dagingmuna. Ai Au do Jahowa.

29 “‘Unang bahen hamu borumuna gabe pelacur.+ Ai molo dibahen hamu songon i, na pailahon ibana do hamu disi. Jala gabe ramun ma luatmuna i alani akka ulaon ni boru-boru na so hasea dohot alani ulaon ni halak na so umboto ila.+

30 “‘Ikkon toktong do dirayahon hamu ari Sabat,+ jala ikkon toktong do sangap bahenonmuna* inganakku na badia. Ai Au do Jahowa.

31 “‘Unang jalo hamu pangurupion sian halak na boi makkatai tu halak na mate.+ Jala unang jalo hamu poda sian peramal.+ Ai molo diulahon hamu i gabe ramun do hamu. Au do Jahowa Debatamuna.

32 “‘Ikkon hormat do hamu tu halak na ubanon,+ jala ikkon sangap do bahenonmuna tu halak naung matua.+ Ikkon pasangaponmuna do Debatamuna.+ Ai Au do Jahowa.

33 “‘Molo adong halak na sian bangso na asing gabe panoppang di luatmuna, unang kejam hamu tu nasida.+ 34 Bahen hamu ma halak panoppang i songon halak Israel.+ Haholongi ma nasida doshon dirim. Ingot ma, hamu pe hea do gabe panoppang di Mesir.+ Au do Jahowa Debatamuna.

35 “‘Unang pakke hamu meter, timbangan, manang liter na so sittong.+ 36 Ikkon pakkeonmuna do timbangan na sittong, batu timbangan na sittong, ukkuran na sittong manuhat bahan na koring,* dohot ukkuran na sittong manuhat bahan na cair.*+ Au do Jahowa Debatamuna na mamboan hamu kaluar sian Mesir. 37 Ikkon oloanmuna jala ulahononmuna do sude aturan dohot sude patik naung hutottuhon i.+ Ai Au do Jahowa.’”

20 Didok Jahowa ma tu si Musa, 2 “Songon on ma dokkon tu halak Israel, ‘Ikkon dipamate do manang ise pe halak Israel dohot halak panoppang na tinggal di Israel na mangalehon anakna tu debata Molok.+ Ikkon didangguri do ibana pakke batu sappe mate. 3 Dang jalookku halak sisongon i jala pamateonku do ibana. Ai nungnga dilehon ibana anakna tu debata Molok. Dibahen ibana do ramun* inganakku na badia+ jala dibahen ibana marlea goarhu. 4 Molo adong halak na mangalehon anakna tu debata Molok, jala diida bangso i do na binahenna i, alai paula so diboto nasida, jala dang dipamate nasida ibana,+ 5 dang jalookku ibana dohot akka keluargana.+ Au sandiri ma na pamatehon ibana dohot sude halak na so setia na manomba Molok rap dohot ibana.*

6 “‘Molo adong halak na lao tu peramal+ dohot tu halak na boi makkatai tu na mate,+ i patuduhon na so setia* do ibana tu Au. Dang jalookku halak sisongon i, jala pamateonku do ibana.+

7 “‘Ikkon ias do hamu* jala badia.+ Ai Au do Jahowa Debatamuna. 8 Ikkon toktong do dioloi jala diulahon hamu parettakku.+ Ai Au do Jahowa na pabadiahon hamu.+

9 “‘Ikkon dipamate do manang ise pe na mamburai* omakna manang bapakna. Alani hasalaanna sandiri do umbahen na dipamate ibana.*+ Ai nungnga diburai ibana omakna manang bapakna.

10 “‘On ma hukum na marlakku tu bawa na mangulahon seks dohot istri ni halak: Ikkon dipamate do bawa na mangulahon seks dohot istri ni donganna. Bawa nang borua na mangulahon i,+ ikkon dipamate. 11 Molo adong sahalak bawa na mangulahon seks dohot istri ni bapakna, na pailahon+ bapakna do ibana disi. Ikkon dipamate do bawa nang borua i. Alani hasalaan ni nasida sandiri do umbahen na dipamate nasida.* 12 Manang ise bawa na mangulahon seks dohot parumaenna, ikkon dipamate do nasida na dua. Ai na mangalanggar aturan naung ditottuhon Debata do nasida disi. Alani hasalaan ni nasida sandiri do umbahen na dipamate nasida.*+

13 “‘Manang ise bawa na mangulahon seks dohot bawa, dos songon mangulahon seks dohot borua, magigi do Debata tu ulaon ni nasida i.+ Ikkon dipamate do nasida na dua. Alani hasalaan ni nasida sandiri do umbahen na dipamate nasida.*

14 “‘Molo adong sahalak bawa mangoli tu sahalak borua, jala mangulahon seks ibana tu omak ni borua i, ulaon na so patut* do i.+ Ikkon dipamate jala ditutung+ do bawa i, borua i, dohot omak ni borua i, asa unang adong be ulaon na so patut sisongon i di hamu.

15 “‘Molo adong bawa na mangulahon seks dohot binatang, ikkon dipamate do ibana dohot binatang i.+ 16 Molo adong borua na mangulahon seks dohot binatang,+ ikkon dipamate do borua i dohot binatang i. Ikkon dihukum do nasida. Alani hasalaan ni bawa dohot borua i do umbahen na dipamate nasida.*

17 “‘Molo adong sahalak bawa na mangulahon seks dohot itona, i ma boru ni bapakna manang boru ni omakna, jala nungnga masiberengan nasida telanjang, ulaon ni halak na so umboto ila do i.+ Ikkon dipamate do nasida di jolo ni godang halak. Ai nungnga dipaila* bawa i itona. Alani i, ikkon tanggungonna do akibatna.

18 “‘Molo adong sahalak bawa mangulahon seks dohot sahalak borua tikki datang bulan,+ ikkon dipamate do nasida na dua. Ai molo diulahon nasida songon i, na patuduhon na so dianggap nasida do badia mudar i.

19 “‘Unang ma adong sian hamu na mangulahon seks dohot kakak manang anggi ni omakmuna, manang namborumuna. Molo diulahon hamu i, na pailahon sisolhotmuna do hamu disi.+ Ai ikkon tanggungon ni nasida do akibat ni pambahenan ni nasida. 20 Molo adong sahalak bawa na mangulahon seks dohot istri ni bapa udana manang istri ni bapa tuana, na pailahon bapa udana manang bapa tuana do ibana disi.+ Ikkon martanggung jawab do nasida tu dosa ni nasida i. Mate ma nasida jala dang adong anak ni nasida. 21 Molo adong bawa na mangoli tu istri ni abangna manang tu istri ni adekna, magigi do Debata tu ulaon i.+ Ai nungnga dipaila* ibana abangna dohot adekna i. Alani i dang boi adong ianakkon ni nasida.

22 “‘Ikkon toktong do ulahononmuna+ akka aturan dohot patik na hutottuhon i,+ asa unang husappatton hamu sian luat na lao hulehon tu hamu gabe ingananmuna.+ 23 Unang ma ihutton hasomalan ni akka bangso na lao hupalao sian jolomuna.+ Ai diulahon nasida do sudena i, jala magigi do Au tu nasida.+ 24 Alani i do hea hudok tu hamu, “Buatonmuna ma luat i gabe appunamuna. Lehonokku do luat i tu hamu, i ma luat na godang susu dohot madu.+ Ai Au do Jahowa Debatamuna, naung papulikkon hamu sian bangso na asing.”+ 25 Ikkon boi do botoonmuna dia binatang na ramun dohot na ias, jala dia pidong na ramun dohot na so ramun.+ Ai nungnga hutottuhon na dia sian akka binatang, pidong, dohot binatang na mangissir di tano on na ramun. Alani i, unang bahen hamu gabe magigi Debata tu hamu alani akka binatang i.+ 26 Ikkon badia do hamu di jolokku, ai badia do Au.+ Au do Jahowa, jala Au do na papulikkon hamu sian akka bangso na asing asa boi hamu gabe appunakku.+

27 “‘Molo adong bawa manang borua na boi makkatai tu na mate manang na gabe peramal, ikkon dipamate do nasida.+ Ikkon didangguri do nasida pakke batu sappe mate. Alani hasalaan ni nasida sandiri do umbahen na dipamate nasida.’”*

21 Dung i didok Jahowa ma muse tu si Musa, “Dok ma songon on tu akka malim, i ma akka anak ni si Aron, ‘Unang dibahen malim ramun* dirina alani bakke ni halak na mate na di tonga-tonga ni bangsona.+ 2 Alai asing do molo na mate i keluargana, i ma omak, bapak, anak, boru, dohot haha anggina. 3 Molo ibotona do na mate i, anak boru, dang muli dope, jala rap tinggal dohot ibana,* boi do bahenonna ramun dirina. 4 Alai molo istri ni donganna sabangso do na mate i, unang ma dibahen ibana ramun dirina. Ai gabe dang badia be ibana alani i. 5 Dang boi digundul malim uluna,+ dang boi dicukkur jenggotna, manang dang boi diseati dagingna.*+ 6 Ikkon badia do nasida di jolo ni Debata,+ jala dang boi marlea goar ni Debata dibahen nasida.+ Ai nasida do na mangalehon pelean na ditutung dohot api tu Jahowa, i ma sipanganon* na dipelehon tu Debata. Alani i, ikkon badia do nasida.+ 7 Dang boi malim mangoli tu boru-boru na so hasea,+ tu borua na so perawan, manang tu borua na disirakkon suamina.+ Ai badia do malim i di jolo ni Debata. 8 Ikkon badia do etongon ni bangso Israel akka malim i.+ Ai malim do na mamelehon sipanganon* tu Debatamuna. Ikkon badia do nasida etongon ni bangso Israel. Ai Au do Jahowa na badia i. Au do na papulikkon hamu gabe bangso na badia.+

9 “‘Molo gabe pelacur boru ni sahalak malim, na paleahon dirina sandiri do ibana disi jala mangaleai bapakna. Alani i, ikkon dipamate do ibana jala ditutung.+

10 “‘Molo adong na gabe sintua ni malim sian haha anggina, i ma halak naung diusehon miak na badia* tu uluna,+ jala naung dilantik* lao mamakke baju malim,+ dang boi pasombuonna sursar obukna manang maribak bajuna.+ 11 Dang boi ibana jonok tu halak na mate,+ nang pe na mate i omakna manang bapakna, asa unang ramun ibana. 12 Dang boi kaluar ibana sian inganan na badia. Jala dang boi dibahen ibana ramun inganan na badia ni Debata.+ Ai di ibana do miak na badia, i ma tanda naung dipapulik ibana tu Debata.+ Au do Jahowa.

13 “‘Ikkon anak boru na perawan do buatonna gabe istrina.+ 14 Dang boi ibana mangoli tu na mabalu, na disirakkon, na so perawan, manang tu boru-boru na so hasea. Ikkon tu anak boru na perawan na sian bangsona i do ibana mangoli. 15 Dang boi bahenonna ramun pinopparna na adong di tonga-tonga ni bangso i.+ Au do Jahowa na pabadiahon ibana.’”

16 Didok Jahowa ma muse tu si Musa, 17 “Dok ma tu si Aron, ‘Manang ise pe sian pinopparmu na cacat, dang boi ibana mamelehon sipanganon* tu Debata. Marlakku do aturan on saleleng ni lelengna. 18 Manang ise na cacat dang boi ro, i ma halak na mapitung, na pincang, na cacat bohina,* na marsiganjangi tanganna manang patna, 19 na ponggol patna manang tanganna, 20 na bukkuk, na kerdil,* na cacat matana, na korengan,* na kurapon, manang na marsahit buah zakarna.+ 21 Sude bawa na cacat sian pinoppar ni Malim Aron dang boi mamelehon pelean na ditutung dohot api tu Jahowa. Ai cacat do ibana, alani i dang boi ibana ro mamelehon sipanganon* tu Debatana. 22 Alai boi do allangonna sipanganon na dipelehon tu Debata, sian akka na badia+ dohot na massai badia.+ 23 Dang boi ibana jonok tu tire+ manang tu langgatan.+ Ai cacat do ibana. Dang boi ramun bahenonna inganakku na badia i.+ Au do Jahowa na pabadiahon nasida.’”+

24 Jadi dipaboa si Musa ma i tu si Aron, tu akka anakna, dohot tu sude halak Israel.

22 Didok Jahowa ma muse tu si Musa, 2 “Paboa ma tu si Aron dohot tu akka anakna, asa manat nasida mangurus* akka na badia naung dipapulik halak Israel lao pelehononna tu Au.+ Jala unang gabe marlea dibahen nasida goarhu na badia i.+ Ai Au do Jahowa. 3 Dok ma tu nasida, ‘Manang ise pe sian pinopparmu na ramun* na ro tu labbung ni akka na badia, i ma naung dipapulik halak Israel lao lehononna tu Jahowa, ikkon dipamate do ibana.+ Marlakku do on sahat tu saleleng ni lelengna. Ai Au do Jahowa. 4 Manang ise sian pinoppar ni si Aron na marsahit kusta,*+ manang kaluar cairan na songon nanah sian alat kelaminna,+ dang boi allangonna akka na badia sahat tu na ias ibana.+ Songon i ma muse na marlakku tu halak na manjama halak na ramun ala manjama halak na mate,+ manang halak na kaluar air manina,+ 5 manang halak na manjama binatang na gelleng,*+ manang na manjama halak na ramun alani manang aha pe.+ 6 Manang ise pe na manjama akka na ramun i, ramun ma ibana sahat tu na bonom mataniari. Dang boi allangonna akka na badia jala ikkon maridi do ibana.+ 7 Alai dung bonom mataniari, dang ramun be ibana. Boi ma allangonna akka na badia. Ai sipanganonna do i.+ 8 Jala dang boi allangonna binatang na mate sandiri manang na mate diharat binatang buas, asa unang ramun ibana.+ Ai Au do Jahowa.

9 “‘Ikkon toktong do dioloi nasida parettakku, asa unang mardosa nasida jala mate ala mambahen ramun akka na badia i. Ai Au do Jahowa na pabadiahon nasida.

10 “‘Manang ise na so malim,* dang boi allangonna akka na badia.+ Songon i ma tong na marlakku tu akka parkarejo manang halak na asing na tinggal rap dohot malim. 11 Alai molo adong halak na dituhor malim mamakke hepengna sandiri, manang hatoban na tubu di jabu ni malim i, boi do ibana dohot mangallang sipanganon ni malim i.+ 12 Molo muli boru ni sahalak malim tu bawa na so malim,* dang boi ibana dohot mangallang pelean na badia na disumbangkon i. 13 Alai molo gabe mabalu boruna i manang disirakkon, jala dang adong anakkonna, dung i mulak ibana tu jabu ni bapakna, i ma ingananna tikki poso, boi do allangonna sipanganon ni bapakna i.+ Alai halak na so malim,* dang boi dohot mangallang i.

14 “‘Molo adong na so sengaja mangallang akka na badia, ikkon gattionna do i tu akka malim. Jala ikkon lehononna do muse tambana saparlima sian na badia i.+ 15 Alani i, dang boi bahenon ni nasida gabe ramun akka na badia i, i ma sumbangan ni halak Israel tu Jahowa.+ 16 Ai boi do gabe bahenon ni nasida marsala halak Israel jala dihukum molo diallang nasida akka na badia i. Au do Jahowa na pabadiahon nasida.’”

17 Didok Jahowa ma muse tu si Musa, 18 “Dokkon ma tu si Aron, tu akka pinopparna, dohot tu sude halak Israel, ‘Molo adong halak Israel manang halak na sian bangso na asing na tinggal rap dohot nasida naeng mangalehon pelean situtungon+ tu Jahowa alani janji naung dibahen ibana, manang naeng mangalehon pelean sian na nionjar ni rohana,+ 19 ikkon lehononna do lombu jantan,+ manang biru-biru jantan, manang hambing na sehat, asa dijalo Debata peleanna i. 20 Unang dipelehon manang aha pe na cacat,+ ai dang lomo roha ni Debata tu hamu molo dilehon hamu pelean sisongon i.

21 “‘Molo adong na mamboan pelean pardamean+ tu Jahowa alani janji na dibahen ibana, manang naeng mangalehon pelean sian na nionjar ni rohana, ikkon lehononna do lombu, manang biru-biru, manang hambing na sehat, asa dijalo Debata pelean i. Unang adong cacat ni binatang i. 22 Unang adong sian pelean i na mapitung, na ponggol holi-holina, na tarseat dagingna, na kutilon, na korengon, manang na kurapon. Unang boan hamu binatang sisongon i tu Jahowa, manang unang dipelehon hamu sisongon i tu Jahowa di langgatan. 23 Boi do dipelehon hamu lombu jantan manang biru-biru na marsiganjangi patna, gabe pelean na dilehon sian na nionjar ni roha. Alai unang lehon hamu i gabe pelean alani janji na dibahen hamu. Ai dang jaloon ni Debata pelean i. 24 Dang boi dipelehon hamu tu Jahowa binatang naung cacat buah zakarna, na maropuk, manang naung dibuat buah zakarna. Dang boi dipelehon hamu binatang sisongon i di luatmuna. 25 Molo adong halak sian bangso na asing na mamboan pelean na cacat songon i, unang pelehon hamu i gabe sipanganon tu Debata. Ai nungnga sega peleanna i jala cacat. Dang las roha ni Debata tu hamu molo dipelehon pelean sisongon i.’”

26 Didok Jahowa ma muse tu si Musa, 27 “Molo tubu anak ni lombu jala jantan anakna i, songon i nang biru-biru dohot hambing, pasombu ma anakna i rap dohot indukna saleleng pitu ari.+ Alai molo nungnga ualu ari umurna manang lobi, boi do i dipelehon hamu gabe pelean na ditutung dohot api tu Jahowa. 28 Unang seat hamu lombu jantan manang biru-biru rap dohot anakna di bagasan sadari.+

29 “Molo dilehon hamu pelean lao gabe pelean hamauliateon tu Jahowa,+ lehon hamu ma pelean i mangihutton cara na sittong asa las roha ni Debata tu hamu. 30 Pangan hamu ma i di ari i. Unang tinggalhon hamu i sahat tu manogot.+ Au do Jahowa.

31 “Ikkon toktong do ulahononmuna sude parettakku.+ Ai Au do Jahowa. 32 Unang bahen hamu marlea goarhu na badia i.+ Ikkon badia do Au bahenonmuna di tonga-tonga ni halak Israel.+ Ai Au do Jahowa na pabadiahon hamu.+ 33 Huboan do hamu kaluar sian Mesir asa hupatudu na Au do Debatamuna.+ Au do Jahowa.”

23 Dung i, didok Jahowa ma muse tu si Musa, 2 “Songon on ma paboa tu halak Israel, ‘Nungnga ditottuhon Jahowa be akka perayaan na ikkon diulahon hamu.+ Paboa+ hamu ma i tu sude halak asa marpungu nasida lao manomba Debata di ari i. On ma akka perayaan i:

3 “‘Saleleng onom ari boi do hamu karejo. Alai di ari na papituhon, ari Sabat, di ari paradianan i,+ ikkon marpungu do hamu lao manomba Debata. Unang adong sian hamu na karejo. Manang didia pe hamu tinggal, ari Sabat tu Jahowa do ari i.+

4 “‘Paboa hamu ma akka perayaan naung ditottuhon Jahowa, i ma akka ari lao marpungu manomba Debata. On ma akka perayaan i: 5 Di ari pasappulu opatton, di bulan na parjolo,+ dung bonom mataniari,* i ma ari Paska+ tu Jahowa.

6 “‘Di ari na pasappulu limahon di bulan i, i ma Perayaan Roti na So Marragi tu Jahowa.+ Saleleng pitu ari, ikkon mangallang roti na so marragi do hamu.+ 7 Di ari na parjolo, ikkon marpungu do hamu manomba Debata.+ Dang boi hamu karejo di ari i. 8 Saleleng pitu ari, ikkon pelehononmuna do pelean na ditutung dohot api tu Jahowa. Jala di ari na papituhon, ikkon marpungu do hamu manomba Debata. Dang boi hamu karejo di ari i.’”

9 Didok Jahowa ma muse tu si Musa, 10 “Songon on ma dokkon tu halak Israel i, ‘Molo dung sahat hamu di luat na lao lehonokku tu hamu, jala molo dung dipanen hamu ladangmuna, ikkon lehononmuna do saikkat hasil panenmuna na parjolo+ tu malim.+ 11 Ikkon diayun-ayunhon malim do hasil panen i tu pudi dohot tu jolo gabe pelean tu Jahowa, asa las rohana tu hamu. Ikkon diayun-ayunhon malim do i sadari dung salpu ari Sabat. 12 Di ari tikki diayun-ayunhon malim hasil panenmuna i, ikkon lehononmuna do muse sada biru-biru jantan gabe pelean situtungon tu Jahowa. Ikkon na sehat do biru-biru i jala na marumur sataon. 13 Ikkon pelehononmuna do dua parsappulu epa* topung na halus na dicampur dohot miak gabe pelean sipanganon.* Ditutung ma i dohot api tu Jahowa, jala uapna palashon rohana. Jala lehononmuna do muse saparopat hin* anggur lao gabe pelean siinumon. 14 Dang boi allangonmuna roti, manang barli* na dipanggang, manang barli na baru dipanen molo so jolo dilehon hamu peleanmuna tu Debata. Manang didia pe hamu tinggal, marlakku do peraturan on tu hamu dohot tu pinopparmuna saleleng ni lelengna.

15 “‘Etong hamu ma pitu minggu* dung salpu sadari dukkon ari Sabat, i ma ari tikki diboan hamu hasil panen na lao gabe pelean na diayunhon.+ Ikkon pas do i pitu minggu sian ari i. 16 Etong ma sahat tu ari na palimapuluhon,+ i ma sadari dukkon minggu na papituhon.* Dung i boan ma pelean sipanganon na baru tu Jahowa.+ 17 Boan ma dua roti sian jabumuna lao gabe pelean na diayunhon. Bahen ma roti i sian dua parsappulu epa* topung na halus na dicampur dohot ragi, jala na dipanggang.+ On ma na gabe peleanmuna sian hasil panenmuna na parjolo tu Jahowa.+ 18 Lehon ma muse rap dohot roti i, pitu anak ni biru-biru na jantan, na sehat, jala na marumur sataon, sada lombu jantan na poso dohot dua biru-biru jantan.+ Lehon ma i rap dohot pelean sipanganon dohot pelean siinumon gabe pelean situtungon tu Jahowa. On ma pelean na ditutung dohot api jala uapna palashon roha ni Jahowa. 19 Boan ma muse sada anak ni hambing lao gabe pelean hasesaan ni dosa.+ Jala boan ma dua biru-biru jantan na marumur sataon gabe pelean pardamean.*+ 20 Diayun-ayunhon malim ma biru-biru na dua i rap dohot akka roti na sian hasil panen na parjolo i. Diayun-ayunhon ma i tu pudi dohot tu jolo lao gabe pelean na diayunhon di jolo ni Jahowa. Badia do sudena i di jolo ni Jahowa jala i ma na gabe bagian ni akka malim.+ 21 Di ari i, paboa ma tu sude halak,+ na ikkon marpungu nasida lao manomba Debata. Dang boi hamu karejo di ari i. Manang didia pe hamu tinggal, marlakku do peraturan on tu hamu dohot tu pinopparmuna saleleng ni lelengna.

22 “‘Tikki panen hamu di ladang, unang pola panen hamu sude akka na di pinggir ni ladangmuna jala unang pola buat hamu sisa ni panenmuna na tinggal.+ Tinggalhon ma i, asa adong buaton ni halak na pogos*+ dohot halak na sian bangso na asing.+ Ai Au do Jahowa Debatamuna.’”

23 Dung i, didok Jahowa ma muse tu si Musa, 24 “Songon on ma dokkon tu halak Israel, “Di ari na parjolo di bulan na papituhon, ikkon maradi do hamu sian sude karejomuna. Di ari i, makkuling ma soara ni tarompet lao paingotton na ikkon marpungu hamu di ari i manomba Debata.+ 25 Dang boi hamu karejo di ari i. Jala ikkon dilehon hamu do pelean na ditutung dohot api tu Jahowa.’”

26 Didok Jahowa ma muse tu si Musa, 27 “Alai di ari na pasappuluhon bulan na papituhon, i ma Ari Pardamean.*+ Ikkon marpungu do hamu lao manomba Debata, ikkon dipatudu hamu do na manolsoli hamu alani dosamuna,*+ jala ikkon dilehon hamu do pelean na ditutung dohot api tu Jahowa. 28 Dang boi hamu karejo di Ari Pardamean i. Ai di ari i do dipelehon malim pelean tu Jahowa Debatamuna asa disesa dosamuna.+ 29 Manang ise na so patuduhon na manolsoli dirina alani dosana* di ari i, ikkon dipamate do ibana.+ 30 Jala manang ise sian hamu na karejo di ari i, pamateon ni Debata do ibana. 31 Dang boi hamu karejo di ari i. Manang didia pe hamu tinggal, marlakku do peraturan on tu hamu dohot tu pinopparmuna saleleng ni lelengna. 32 Ari Sabat do ari i, i ma ari paradianan. Di ari na pasiahon di bulan i, dung bonom mataniari ikkon dipatudu hamu do na manolsoli rohamuna alani dosamuna.*+ Jala ikkon dirayahon hamu do ari Sabat i sian mulai bonom mataniari di ari i, sahat tu na bonom muse mataniari marsogotna i.”

33 Didok Jahowa ma muse tu si Musa, 34 “Songon on ma dokkon tu halak Israel, ‘Di ari na pasappulu limahon di bulan na papituhon, rayahon hamu ma Perayaan Pondok Daun.* Rayahon hamu ma i lao pasangappon Jahowa saleleng pitu ari.+ 35 Di ari na parjolo, ikkon marpungu do hamu lao manomba Debata, jala dang boi hamu karejo di ari i. 36 Saleleng pitu ari, ikkon dipelehon hamu do pelean na ditutung dohot api tu Jahowa. Jala di ari na paualuhon ikkon marpungu do hamu lao manomba Debata.+ Ai ari na badia do i. Di ari i, ikkon dipelehon hamu do pelean na ditutung dohot api tu Jahowa. Dang boi hamu karejo di ari i.

37 “‘Akka i ma perayaan+ lao pasangappon Jahowa na ikkon dipaboa hamu tu sude halak. Paboa ma i tu bangso i asa marpungu nasida lao manomba Debata+ di akka ari i. Ikkon dilehon hamu do akka pelean na ditutung dohot api di jolo ni Jahowa, i ma pelean situtungon,+ pelean sipanganon,+ dohot pelean siinumon.+ Pelehon ma i mangihutton tikki na ditottuhon ganup ari. 38 Lehon ma sudena i tu Jahowa. Ikkon pelehononmuna do i tamba ni pelean na dilehon hamu tikki ari Sabat ni Jahowa,+ pelean na dilehon hamu gabe silehon-lehonmuna,+ pelean na dilehon hamu ala mambahen janji,+ dohot pelean na dilehon hamu sian na nionjar ni rohamuna.+ 39 Di ari na pasappulu limahon di bulan na papituhon, dung sae hamu papunguhon hasil ladangmuna, bahen hamu ma perayaan lao pasangappon Jahowa saleleng pitu ari.+ Ari na parjolo sian perayaan i, i ma ari paradianan, jala songon i do tong ari na paualuhon.+ 40 Di ari na parjolo buat ma akka buah na dumenggan, bulung ni hau palem,+ akka dakka ni hau na godang bulungna, dohot akka dakka ni hau* na tubu di rura.* Marlas ni roha ma hamu+ di jolo ni Jahowa Debatamuna saleleng pitu ari.+ 41 Bahen hamu ma i gabe perayaan lao pasangappon Jahowa ganup taon di bulan na papituhon. Bahen ma i saleleng pitu ari.+ Marlakku do peraturan on tu hamu dohot tu pinopparmuna saleleng ni lelengna. 42 Tinggal ma hamu di sopo-sopo* saleleng pitu ari i.+ Sude halak Israel ikkon tinggal di sopo-sopo. 43 Molo dibahen hamu songon i, botoon ni pinopparmuna ma+ na husuru do halak Israel tinggal di sopo-sopo tikki huboan nasida kaluar sian Mesir.+ Au do Jahowa Debatamuna.’”

44 Dung i, dipaboa si Musa ma tu halak Israel akka perayaan na pasangappon Jahowa.

24 Dung i didok Jahowa ma muse tu si Musa, 2 “Suru ma halak Israel i asa mamboan miak jetun na murni. Bahen ma i gabe miak ni lampu* na di tabernakel asa torus galak lampuna.+ 3 Ikkon torus do bahenon ni si Aron galak lampu na di jolo ni tire, na di labbung ni poti inganan ni Patik na di kemah parpunguan i. Ikkon torus do galak lampu i di jolo ni Jahowa mulai sian borngin sahat tu manogot. Marlakku do peraturan on tu hamu dohot tu pinopparmuna saleleng ni lelengna. 4 Ikkon toktong do paresoon ni si Aron akka lampu na di inganan ni lampu,+ i ma na di inganan ni lampu na sian mas murni na di jolo ni Jahowa, asa toktong galak lampu i.

5 “Buat ma topung na halus. Bahen ma 12 roti na marbentuk golang jala panggang ma i. Pakke ma dua parsappulu epa* topung lao mambahen sada roti. 6 Susun ma roti i gabe dua baris, bahen ma onom roti martindi di sada baris.+ Bahen ma i di jolo ni Jahowa di ginjang ni meja na sian mas murni.+ 7 Bahen ma haminjon* na so dicampur tu ginjang ni ganup baris ni roti i. Dung i tutung ma haminjon i, lao gabe tanda naung dipelehon sude roti i+ gabe pelean na ditutung dohot api tu Jahowa. 8 Ganup ari Sabat ikkon bahenonna do roti i di jolo ni Jahowa.+ On ma parjanjiakku dohot halak Israel na marlakku saleleng ni lelengna. 9 Bagian ni si Aron dohot akka anakna+ ma roti i, jala ikkon diallang nasida do i di sada inganan na badia.+ Ai bagian na massai badia do i di akka malim, na dibuat sian pelean na ditutung dohot api tu Jahowa. Marlakku do peraturan on saleleng ni lelengna tu nasida.”

10 Adong ma sahalak bawa di perkemahan ni halak Israel, omakna halak Israel, bapakna halak Mesir.+ Marbadai ma bawa i dohot sahalak bawa halak Israel di perkemahan. 11 Diburai anak ni boru Israel i ma Debata jala dipalea-lea goarna.*+ Alani i diboan ma ibana tu si Musa.+ Goar ni omakna si Selomit, boru ni si Dibri na sian marga Dan. 12 Dihurung nasida ma ibana sahat tu na dipaboa Jahowa aha na ikkon bahenon ni nasida tu ibana.+

13 Dung i didok Jahowa ma tu si Musa, 14 “Boan ma halak na mamburai goarhi tu luar ni perkemahan. Jala suru ma sude halak na mambege hatana i mambahen tangan ni nasida tu ulu ni bawa i. Dung i, suru ma sude halak mandangguri ibana pakke batu.+ 15 Jala paboa ma tu halak Israel, ‘Manang ise na mamburai Debata, ikkon martanggung jawab do ibana tu dosana i. 16 Ikkon dipamate do sude halak na palea-leahon goar ni Jahowa.+ Ikkon sude do bangso i mandangguri ibana pakke batu. Dos songon na dibahen tu halak Israel, songon i ma dibahen molo adong halak sian bangso na asing na palea-leahon goar ni Debata, ikkon dipamate do ibana.

17 “‘Molo adong halak na mambahen donganna mate, ikkon dipamate do ibana.+ 18 Molo adong halak na pamatehon binatang na dipiaro donganna, ikkon lehononna do gatti rugi. Binatang gatti ni binatang.* 19 Molo adong halak na mambahen donganna marjea, songon dia dibahen ibana tu donganna i, ikkon songon i do bahenon tu ibana.+ 20 Molo ponggol dibahen ibana holi-holi, ikkon ponggol ma bahenon holi-holina, mata ma gatti ni mata, jala ngingi ma gatti ni ngingi. Songon dia cara ni ibana mambahen halak na asing marjea, ikkon songon i do dibahen tu ibana.+ 21 Halak na pamatehon binatang ikkon mangalehon gatti rugi,+ alai halak na pamatehon halak na asing ikkon dipamate.+

22 “‘Marlakku do aturan na hutottuhon i tu halak Israel dohot tu halak na sian bangso na asing na rap tinggal dohot hamu.+ Ai Au do Jahowa Debatamuna.’”

23 Makkatai ma si Musa tu halak Israel. Diboan nasida ma halak na mamburai Debata i tu luar ni perkemahan, jala didangguri nasida ma bawa i pakke batu.+ Diulahon halak Israel ma sude na diparettahon Jahowa tu si Musa.

25 Makkatai ma muse Jahowa tu si Musa di Dolok Sinai. Didok ma, 2 “Songon on ma dokkon tu halak Israel, ‘Molo dung sahat hamu di luat na lao hulehon i tu hamu,+ ikkon ulahononmuna do patik ni Jahowa taringot tu Sabat.+ Jala di tikki Sabat, dang boi diula hamu tano na di luat i. 3 Saleleng onom taon, suan hamu ma bibit ni suan-suanan di ladangmuna, ponggoli hamu ma ratting ni hau anggurmuna, jala panen hamu ma hasil ni ladangmuna.+ 4 Alai di taon na papituhon, unang ula hamu tano i. Ai Sabat tu Jahowa do taon i. Unang suan hamu manang aha di ladangmuna, manang unang ponggoli hamu akka ratting ni hau anggurmuna. 5 Dung sae musim panen, molo adong suan-suanan na tubu sandiri sian sisa panen i, dang boi dipanen* hamu parbuena. Jala unang panen hamu parbue ni hau anggur na so dipaias hamu rattingna i. Unang ula hamu tano i saleleng sataon. 6 Alai, boi do allangonmuna suan-suanan na tubu saleleng taon Sabat i. Jala boi do i allangon ni hatobanmuna, parkarejomuna, dohot akka halak na sian bangso na asing na tinggal rap dohot hamu. 7 Jala boi do i allangon ni binatang na dipiaro hamu, dohot akka binatang liar na adong di luatmuna. Sude hasil ni tano i boi do dipangan.

8 “‘Etong ma pitu taon Sabat, i ma pitu hali pitu taon. Sudena gabe 49 taon ma i. 9 Dung i di ari na pasappuluhon, di bulan na papituhon, di Ari Pardamean i,+ suru ma asa diombus tarompet na sian tanduk. Ikkon tarbege do soarana tu sude luat i. 10 Taon na badia do taon na palimapuluhon i. Ikkon dipaboa hamu do tu sude halak na adong haluaon tu sude pangisi ni luat i di taon i.+ Ai taon Yobel* ma i di hamu. Jaloon ni ganup halak ma muse arta naung dijual hian, jala manang ise na dijual gabe hatoban boi ma ibana mulak tu keluargana.+ 11 Taon na palimapuluhon i ma taon Yobel di hamu. Dang boi disuan hamu bibit ni suan-suananmuna manang dipanen hamu akka suan-suanan na tubu sandiri. Jala dang boi dipapungu hamu parbue ni hau anggur na so dipaias i rattingna.+ 12 Ai taon Yobel do taon i. Jala ikkon badia do i di hamu. Holan hasil ni ladang na tubu sandiri do na boi allangonmuna.+

13 “‘Di taon Yobel i, jaloon ni ganup halak ma muse arta naung dijual nasida hian.+ 14 Molo adong dijual hamu manang dituhor hamu manang aha sian donganmuna, unang bahen hamu rugi donganmuna i.+ 15 Molo dituhor hamu tano sian donganmuna, etong ma nungnga sadia leleng salpu taon Yobel. Ikkon tottuhononna ma arga ni tano i mangihutton piga hali nai hamu boi panen sahat tu taon Yobel na mangihut.+ 16 Hasil panen na sian tano i do na dijual ibana sasittongna. Alani i, molo leleng nai dope asa taon Yobel, boi do lam arga jualonna tano i. Alai molo satokkin nai nama asa taon Yobel, ikkon moru do bahenonna arga ni tano i. 17 Unang bahen hamu rugi donganmuna i.+ Ikkon habiaranmuna do Debatamuna.+ Ai Au do Jahowa Debatamuna.+ 18 Molo toktong do diulahon hamu parettakku dohot patik naung hutottuhon, dame ma ngolumuna di luat i.+ 19 Lehonon ni tano i ma hasilna,+ sappe puas ma hamu mangallang sipanganonmuna jala dame ma ngolumuna di luat i.+

20 “‘Alai molo sukkun-sukkun rohamuna, “Aha ma na lao allangonnami di taon na papituhon i, molo so adong na husuan hami manang dipanen hami?”+ 21 Pos ma rohamuna, lehonokku do pasu-pasu tu hamu di taon na paonomhon i. Cukkup do hasil panen na di taon i lao allangonmuna saleleng tolu taon.+ 22 Molo disuani hamu ladangmuna di taon na paualuhon i, adong dope hasil panen na di taon paonomhon i lao allangonmuna. Boi dope i allangonmuna sahat tu taon na pasiahon, sahat tu na panen hamu muse.

23 “‘Dang boi jualonmuna tano i gabe appuna ni halak saleleng ni lelengna.+ Ai appunakku do tano i.+ Songon halak na asing jala panoppang do hamu di Au.+ 24 Alani i, marhak do halak na manjual tanona manuhor tanona i muse. Marlakku do i di sude luatmuna.

25 “‘Molo gabe pogos donganmuna jala gabe dijual ibana deba tanona, keluarga na unjonok tu ibana ma na marhak manobus tano i muse.+ 26 Alai molo dang adong keluarga ni ibana na unjonok na marhak manobus tano i, jala molo di pudian ni ari gabe adong hepengna manobus tano i, 27 ikkon dietong do sadia godang hasil panen naung dibuat mulai sian na dijual tano i. Dung i, diorui ma i tu arga ni tano i tikki dijual. Ikkon gararonna ma sisana tu halak na manuhor i.+

28 “‘Alai molo dang adong hepengna lao manobus tano i, gabe di halak na manuhor i ma tano i sahat tu taon Yobel.+ Alai ikkon paulakon ni na manuhor i do muse tano i tu ibana di taon Yobel. Ujungna, mulak ma muse tano i tu ibana.+

29 “‘Molo adong halak na manjual jabu na di kota na martembok, marhak do na manjual i manobus+ jabuna i muse di bagasan sataon dung dijual ibana jabu i. Holan di bagasan na sataon i do marlakku hakna i. 30 Alai molo dang ditobus ibana jabu na di kota na martembok i di bagasan na sataon i, gabe appuna ni na manuhor i dohot akka pinopparna ma jabu i salelengna. Jala dang paulakonna jabu i tu na manjual i di taon Yobel. 31 Alai jabu na di kota na so martembok, dietong do i dos songon ladang. Molo dijual jabu i, marhak do na manjual i manobus i muse manang na sadihari pe. Jala ikkon dipaulak do jabu i di taon Yobel.

32 “‘Alai anggo halak Lepi, toktong do nasida marhak manobus jabu na dijual nasida di akka kota ni nasida.+ 33 Molo dang ditobus jabu na dijual ni halak Lepi i, ikkon dipaulak do i di taon Yobel.+ Ai appuna ni halak Lepi do jabu na adong di akka kota ni nasida, na di tonga-tonga ni halak Israel.+ 34 Asing ni i, dang boi dijual nasida inganan panjappalan+ na adong di sakaliling ni kota ni nasida. Ai appuna ni nasida do i saleleng ni lelengna.

35 “‘Molo adong donganmuna na gabe pogos na maringanan jonok tu hamu, jala dang boi manggohi na porlu di ibana, ikkon urupanmuna do ibana.+ Urupi ma ibana dos songon hamu mangurupi halak na sian bangso na asing manang panoppang,+ asa boi toktong ibana mangolu rap dohot hamu. 36 Unang buat hamu bunga ni hepeng manang uttung sian ibana,+ asa boi toktong ibana mangolu rap dohot hamu. Ai ikkon habiaranmuna do Debatamuna.+ 37 Molo dipapinjamhon hamu hepeng tu donganmuna, unang marbunga bahen.+ Jala unang lehon sipanganon tu ibana lao mambuat uttung. 38 Au do Jahowa Debatamuna, na mamboan hamu kaluar sian Mesir+ jala na lao mangalehon luat Kanaan tu hamu. Alani i, botoonmuna ma Au do Debatamuna.+

39 “‘Molo adong donganmuna na maringanan jonok tu hamu gabe pogos, jala tarpaksa dijual ibana dirina tu hamu,+ unang suru ibana mangulahon karejo ni hatoban.+ 40 Alai bahen ma ibana songon parkarejo na digaji,+ dos songon halak panoppang. Jala holan sahat tu taon Yobel do ibana karejo dohot hamu. 41 Dung i ditinggalhon ma hamu. Lao ma ibana rap dohot ianakkonna mulak tu keluargana. Mulak ma ibana tu tano ni akka ompuna.+ 42 Sasittongna, hatobanku do nasida. Ai Au do na mamboan nasida kaluar sian Mesir.+ Alani i, dang boi nasida manjual diri ni nasida gabe hatoban. 43 Unang kejam hamu tu nasida.+ Ikkon habiaranmuna do Debatamuna.+ 44 Molo porlu di hamu hatoban bawa manang borua, tuhor ma i sian akka bangso na tinggal di sakalilingmuna. 45 Manang boi do tuhoronmuna anak ni halak na sian bangso na asing na tinggal rap dohot hamu+ lao gabe hatobanmuna. Manang boi do tuhoronmuna keluarga ni nasida na tubu di luatmuna. Gabe appunamuna do nasida. 46 Jala boi do lehononmuna nasida gabe warisan tu ianakkonmuna. Jala hatobanmuna ma nasida saleleng mangolu nasida. Alai molo tu halak Israel, donganmu sabangso i, dang boi hamu kejam tu nasida.+

47 “‘Alai molo gabe mamora halak sian bangso na asing manang halak panoppang na tinggal di luatmuna i, hape marpogos donganmu sabangso jala tarpaksa dijual ibana dirina tu halak na sian bangso na asing, manang tu halak panoppang i, manang tu keluarga ni halak na sian bangso na asing i, 48 toktong do adong hakna lao ditobus. Boi do sahalak sian haha anggina manobus ibana.+ 49 Manang boi do muse bapa tua manang bapa udana manobus ibana, manang anak ni bapa tua manang anak ni bapa udana, manang keluargana na samudar dohot ibana, manang boi do muse keluargana na asing manobus ibana.

“‘Manang, molo nungnga mamora ibana, boi do ibana manobus dirina sandiri.+ 50 Ikkon maretong do ibana dohot na manuhor ibana i. Etongon ni nasida ma piga taon mulai sian na dijual dirina sahat tu na juppang taon Yobel.+ Dung i ditottuhon nasida ma argana mangihutton godang ni akka taon i.+ Saleleng karejo ibana, ikkon songon parkarejo na digaji do ibana dibahen.+ 51 Ikkon tottuhonon ni nasida do argana mangihutton piga taon nai taon Yobel. Molo leleng nai asa sahat tu taon Yobel, ikkon unggodang ma lehononna hepeng lao manobus ibana. 52 Alai molo satokkin nai do dapot taon Yobel, ikkon etongonna ma sadia lehononna lao manobus ibana. Jala ummotik ma lehononna hepeng lao manobus ibana. 53 Ikkon songon parkarejo na digaji do ibana dibahen sian taon tu taon. Jala parrohahon hamu ma asa unang kejam halak na manuhor i tu ibana.+ 54 Alai molo dang tolap ibana lao manobus dirina songon peraturan naung dibahen i, di taon Yobel ma ibana malua.+ Malua ma ibana rap dohot ianakkonna.

55 “‘Sasittongna, hatobanku do halak Israel i. Ai Au do na mamboan nasida kaluar sian Mesir.+ Au do Jahowa Debatamuna.

26 “‘Unang bahen hamu akka debata na so marguna.+ Unang bahen hamu patung,*+ manang tugu sisombaon, jala unang bahen hamu di luatmuna batu na diukir+ lao disomba.+ Ai Au do Jahowa Debatamuna. 2 Ikkon ulahononmuna do ari Sabat jala ikkon sangap do bahenonmuna* inganakku na badia i. Ai Au do Jahowa.

3 “‘Molo toktong dioloi hamu akka aturanku, dioloi hamu parettakku, jala diulahon hamu sudena i,+ 4 parookku ma udan tu hamu di tikkina,+ asa dilehon tano i hasilna+ jala asa marparbue akka hau na di ladang. 5 Massai godang situtu ma hasil panenmuna. Mardege gandum dope hamu, nungnga dapot muse tikkina lao panen anggur. Tikki panen anggur dope hamu, nungnga dapot muse tikkina lao manuan bibit di ladang. Mangallang roti ma hamu sappe puas, jala dame ma ngolumuna di luat i.+ 6 Bahenokku ma dame luatmuna,+ jala boi do hamu sonang modom, dang mabiar tu manang aha pe.+ Ai padaookku do sian luatmuna i binatang buas jala dang adong halak na ro mangalo hamu mamakke podang. 7 Leleonmuna ma akka musumuna jala talu ma nasida bahenonmuna mamakke podang. 8 Leleon ni 5 halak ma na 100 halak. Jala leleon ni 100 halak ma na 10.000 halak. Talu ma musumuna bahenonmuna mamakke podang.+

9 “‘Pasu-pasuokku do hamu. Bahenokku ma massai godang situtu pinopparmuna.+ Jala pasautokku ma janji naung hubahen tu hamu.+ 10 Mangallang hasil panen na di taon na salpu i dope hamu, nungnga ikkon bolokkononmuna hasil panen na leleng i asa adong inganan ni hasil panen na baru. 11 Bahenokku ma tabernakelhu di tonga-tongamuna+ jala dang tadikkonokku hamu. 12 Sai na donganakku do hamu. Au ma na gabe Debatamuna+ jala hamu ma na gabe bangsokku.+ 13 Au do Jahowa Debatamuna na mamboan hamu kaluar sian Mesir. Alani i, dang gabe hatoban be hamu. Nungnga huponggolhon be auga* na mandondoni hamu. Jala dang mabiar be hamu hubahen tikki mardalan.*

14 “‘Alai molo dang ditangihon hamu Au, jala dang diulahon hamu sude parettakku,+ 15 jala molo dang olo hamu mangoloi akka aturanku,+ jala sogo roham tu akka patik na hutottuhon, jala gabe dang diulahon hamu sude parettakku, jala dilanggar hamu parjanjian naung hubahen i tu hamu,+ 16 on ma na lao bahenokku tu hamu: Hukumokku ma hamu. Bahenokku ma hamu hona sahit tuberkulosis* jala demam tinggi. Gabe kabur* ma matamuna, bahenokku ma suda gogomuna. Suanonmuna ma bibit di ladang alai dang allangonmuna hasilna. Ai diallang akka musu do hasil na niulamuna i.+ 17 Dang jalookku be hamu, jala taluhonon ni akka musu ma hamu.+ Sude halak na marsogo ni roha tu hamu mandege-dege hamu.+ Jala lari do hamu nang pe dang adong na mangalele hamu.+

18 “‘Molo sai toktong dope dang ditangihon hamu Au, pitu hali loppit nai ma bahenokku hukuman tu hamu alani dosamuna i. 19 Pasookku ma akka na mambahen ginjang rohamuna jala na mambahen jogal rohamuna. Bahenokku ma langitmuna i songon bosi,*+ jala tanomuna i songon tombaga.* 20 Marisuang ma gogomuna mangula, ala dang mangalehon hasil be tano i+ jala akka hau pe dang marparbue.

21 “‘Molo sai toktong dope mangalo hamu tu Au jala dang ditangihon hamu Au, pitu hali loppit nai ma bahenokku hukuman tu hamu alani dosamuna i. 22 Suruokku ma binatang buas ro tu tonga-tongamuna.+ Pamateonna ma akka anakkonmuna+ dohot binatang na dipiaro hamu. Gabe lam otik ma hamu na tinggal. Jala dang adong halak na mardalan di akka dalanmuna.+

23 “‘Molo nungnga hubahen songon i, hape toktong dope dang dioloi hamu sipasingotti+ jala toktong dope mangalo hamu tu Au, 24 alookku ma hamu jala bahenokku ma pitu hali loppit nai hukuman tu hamu alani dosamuna i. 25 Bahenokku ma musumuna mangalo hamu mamakke podang lao manghukum hamu. Ai dilanggar hamu do parjanjian na hubahen tu hamu.+ Molo ro hamu marpungu tu akka kotamuna, parookku ma sahit tu tonga-tongamuna.+ Jala pasahatonku ma hamu tu tangan ni musu.+ 26 Molo dung huhancurhon inganan panippanan* ni rotimuna,*+ holan saotik ma na tinggal. Sae do sada oven lao mamanggang roti na binahen ni sappulu borua. Ditimbang+ nasida ma roti i jala lehononna ma saotik be bagianmuna. Diallang hamu ma i, alai dang butong hamu bahenon ni i.+

27 “‘Molo nungnga hubahen songon i, hape toktong dope dang ditangihon hamu Au jala toktong dope mangalo hamu tu Au, 28 lam karas ma Au mangalo hamu+ jala bahenokku ma pitu hali loppit nai hukuman tu hamu alani dosamuna i. 29 Sappe bunuonmu ma anakmuna dohot borumuna jala allangonmu jagalna alani malena.+ 30 Ropukokku ma akka inganan panombaonmuna,*+ jala ruppakkonokku ma ingananmuna manutung dupa. Martimbun-timbun ma bahenokku bakkemuna di atas ni debatamuna na so mangolu i jala na huhagigihon* i.+ Tadikkonokku ma hamu, ai magigi do Au tu hamu.+ 31 Pasahatokku ma akka kotamuna asa dihancurhon,+ jala bahenokku ma sega ingananmuna manomba debatamuna. Jala dang lomo rohakku manganggo uap ni peleanmuna i. 32 Bahenokku ma tarulang luat i.+ Jala tarsonggot ma musumuna na tinggal disi mangida i.+ 33 Bahenokku ma hamu marserak tu tonga-tonga ni akka bangso.+ Parookku ma musu mangalo hamu pakke podang.+ Gabe tarulang ma luatmuna i+ jala hancur ma akka kotamuna.

34 “‘Saleleng gabe tahanan ni musu hamu, dipasombu ma tano i jala dang diula. Saleleng i, maradi ma tano i. Ai ikkon digarar tano i do utang taon Sabatna.+ 35 Saleleng tarulang luat i, maradi ma tano i. Ai tikki tinggal hamu disi dang dibahen hamu maradi tano i di tikki taon Sabat.

36 “‘Molo adong dope na mangolu na tinggal di luat ni akka musu,+ bahenokku ma nasida mabiar. Lari do nasida holan ala mambege soara ni bulung-bulung na habang. Marlojongi ma nasida songon na dilele musu. Jala madabu ma nasida hape so adong na mangalele.+ 37 Marsitomboman ma nasida songon halak na lari sian parporangan, hape so adong na mangalele nasida. Jala dang tolap nasida mangalo musu.+ 38 Mate ma hamu di luat ni akka bangso.+ Jala mate ma hamu sude di luat ni musumuna. 39 Molo adong pe na mangolu di luat ni akka musumuna,+ porsuk do taononna alani dosana. Porsuk do taonon ni nasida alani dosa ni akka ompuna.+ 40 Dung i diakkui nasida ma na marsala nasida,+ na so setia nasida dohot akka ompu ni nasida tu Au. Jala diakkui nasida ma naung dialo nasida Au jala dang setia nasida.+ 41 Alani i do hualo nasida+ jala huboan nasida tu luat ni musu.+

“‘Atik boha gabe muba roha ni nasida na jogal i+ gabe lambok dung ditaon nasida na haccit lao garar ni hasalaan ni nasida i. 42 Ingotokku ma parjanjian na hubahen dohot si Jakkob,+ parjanjian na hubahen tu si Isak,+ dohot parjanjian na hubahen dohot si Abraham,+ jala ingotokku ma luat na hujanjihon i. 43 Saleleng ditinggalhon nasida luat i, gabe tarulang ma tano i, songon na manggarar akka Sabatna+ ma tano i disi. Jala nasida pe, ikkon digarar nasida do hasalaan ni nasida. Ai dang dioloi nasida akka aturan na hubahen jala magigi do nasida tu akka parettakku.+ 44 Alai nang pe songon i, molo di luat ni musu pe nasida tinggal, dang torus tadikkonokku nasida.+ Dang torus bolokkonokku nasida manang pasombuonku gabe mate nasida sude. Ai molo hubahen songon i, na mangalanggar parjanjiakku+ do Au disi. Au do Jahowa Debata ni nasida. 45 Alani nasida, ingotokku ma parjanjian na hubahen tu akka ompu ni nasida,+ na huboan kaluar sian Mesir. Di jolo ni akka bangso,+ huboan do nasida kaluar sian i. Huboan do nasida lao patuduhon na Au do Debata ni nasida. Au do Jahowa.’”

46 Akka i ma aturan, paretta naung ditottuhon, dohot patik na dilehon Jahowa tu halak Israel. Dilehon do i marhite si Musa di Dolok Sinai.+

27 Dung i, didok Jahowa ma tu si Musa, 2 “Songon on ma dokkon tu halak Israel, ‘Molo adong halak na mambahen janji na sumurung+ lao mangalehon sasahalak tu Jahowa, gararonna ma hepeng naung ditottuhon hian lao gabe arga ni sasahalak i. 3 Arga ni sahalak bawa na marumur 20 sahat tu 60 taon, i ma 50 sekel* perak, mangihutton ukkuran sekel na dipakke di inganan na badia.* 4 Alai molo borua do ibana, argana 30 sekel. 5 Arga ni sahalak bawa na marumur 5 sahat tu 20 taon, i ma 20 sekel. Alai molo borua do ibana, 10 sekel ma argana. 6 Molo marumur sabulan sahat tu lima taon do bawa i, lima sekel perak ma argana. Alai molo borua do ibana, tolu sekel perak ma argana.

7 “‘Molo marumur 60 taon manang lobi do bawa i, 15 sekel ma argana. Alai molo borua do ibana 10 sekel ma argana. 8 Molo pogos do halak na mambahen janji i, jala dang tolap manggarar arga naung ditottuhon i,+ ikkon lao do ibana manjuppangi malim. Dung i, ditottuhon malim i ma argana sian na tolap gararonna.+

9 “‘Molo marjanji sasahalak naeng mangalehon binatang na boi gabe pelean tu Jahowa, manang aha pe binatang na lao dilehon i, gabe appuna ni Jahowa ma i.* 10 Dang boi gattionna binatang i. Na roa gatti ni na denggan, manang na denggan gatti ni na roa. Molo digatti ibana i, gabe duassa ma binatang i appuna ni Debata.* 11 Molo binatang na ramun*+ jala na so boi dipelehon tu Jahowa do binatang na lao lehononna i, ikkon boanonna ma i tu jolo ni malim. 12 Ditottuhon malim ma arga ni binatang i mangihutton sadia denggan manang sadia roa binatang i. Manang sadia pe ditottuhon malim i argana, nasa i ma arga ni binatang i. 13 Molo naeng ditobus ibana do binatang i, ikkon gararonna ma arga naung ditottuhon i, jala ikkon ditambai ibana do muse 20 persen sian argana i.+

14 “‘Molo adong halak na naeng mangalehon jabuna lao dipabadia tu Jahowa, ikkon ditottuhon malim do arga ni jabu i mangihutton sadia denggan manang sadia roa jabu i. Manang sadia pe ditottuhon malim i argana, nasa i ma arga ni jabu i.+ 15 Molo naeng ditobus halak na mangalehon i do muse jabu i, ikkon gararonna ma arga naung ditottuhon i, jala ikkon ditambai ibana do muse 20 persen sian argana i. Dung i, gabe ibana ma nappuna jabu i.

16 “‘Molo naeng dilehon sasahalak do deba sian ladangna tu Jahowa, ditottuhon ma argana mangihutton sadia godang boni na boi disuan di ladang i. Molo sada homer* barli* do bonina, ikkon gararonna ma 50 sekel perak. 17 Molo di taon Yobel+ do dilehon ibana ladangna i, dang muba arga ni ladang naung ditottuhon i. 18 Molo dung salpu do taon Yobel dilehon ibana ladang i, ikkon etongon ni malim ma arga ni ladang i mangihutton piga taon nai asa sahat tu taon Yobel na mangihut. Dung i, gabe moru ma argana sian arga naung ditottuhon i hian.+ 19 Molo naeng ditobus halak na mangalehon i do muse ladang i, ikkon gararonna ma arga naung ditottuhon i, jala ikkon ditambai ibana do muse 20 persen sian argana i. Dung i, gabe appunana ma ladang i. 20 Alai molo dang ditobus ibana ladang i, jala nungnga sanga dijual tu halak na asing, dang boi be tobusonna ladang i. 21 Di taon Yobel, dilehon ma ladang i tu Jahowa. Gabe badia ma i jala gabe appuna ni akka malim.+

22 “‘Molo ladang na dituhor do na lao lehonon ni sasahalak i tu Jahowa, jala dang na parbagiananna,+ 23 ikkon etongon ni malim ma arga ni ladang i mangihutton piga taon nai asa sahat tu taon Yobel na mangihut. Ikkon di ari i do lehononna arga naung ditottuhon i.+ Ai badia do i di Jahowa. 24 Di taon Yobel, mulak ma ladang i tu nappunasa ladang i hian, i ma na manjual ladang i.+

25 “‘Sude arga na ditottuhon i, dibahen mangihutton ukkuran sekel na dipakke di inganan na badia.* Dos tu 20 gera* ma sada sekel.

26 “‘Alai dang boi dilehon* anak ni binatang na parjolo tubu tu Jahowa. Ai mulai tubu, nungnga appuna ni Ibana hian sude binatang i.+ Mulai sian lombu manang biru-biru, nungnga appuna ni Jahowa hian i sude.+ 27 Molo binatang na ramun do binatang i, jala naeng ditobus, ikkon ditobus do i mangihutton arga naung ditottuhon. Ikkon ditambai ibana do muse 20 persen sian argana i.+ Alai molo dang ditobus binatang i, dijual ma i mangihutton arga naung ditottuhon i.

28 “‘Molo adong sasahalak na mangalehon appunana tu Jahowa lao saleleng ni lelengna,* dang boi be i dijual manang ditobus. Dang boi be jualonna manang tobusonna jolma, binatang, manang ladang na dilehonna i. Massai badia do di Jahowa sude na dilehon i.+ 29 Molo nungnga ditottuhon sasahalak lao dipamate, dang boi be ibana ditobus.+ Ikkon dipamate do ibana.+

30 “‘Saparsappulu+ sian hasil ni tano, manang hasil ni ladang, manang parbue ni hau, appuna ni Jahowa do i. Ai badia do i di Jahowa. 31 Molo naeng ditobus sasahalak na saparsappulu bagian i, ikkon ditobus do i mangihutton arga naung ditottuhon. Ikkon ditambai ibana do muse 20 persen sian argana i. 32 Appuna ni Jahowa do sada sian sappulu lombu, hambing, manang biru-biru. Tikki dietong binatang na lewat sian toru ni tukkot parmahan, binatang na pasappuluhon ma na gabe appuna ni Debata.* 33 Dang boi paresoon ni parmahan akka binatang i, lao mangida na denggan do binatang i manang na roa. Jala dang boi gattionna. Ai molo digatti ibana i, gabe duassa ma binatang i appuna ni Debata,*+ jala dang boi tobusonna.’”

34 Akka i ma paretta na dilehon Jahowa tu halak Israel marhite si Musa di Dolok Sinai.+