NEHEMIA

1 On ma hata ni si Nehemia*+ anak ni si Hakalia: Di istana Susan*+ do au di bulan Kislew* di taon na paduapuluhon. 2 Tikki i, ro ma si Hanani+ sada sian haha anggikku rap dohot akka bawa na sian Juda. Husukkun ma tu nasida taringot halak Jahudi na mulak tu luat i+ dohot taringot kota Jerusalem. 3 Dialusi nasida ma, “Susa do ngolu ni akka halak na mulak tu luat i jala na tinggal di provinsi i.+ Jala maila do nasida ala maruppak+ dope tembok ni Jerusalem i jala nungnga tartutung akka gerbangna.”+

4 Dung hubege hata ni nasida i, hundul ma au huhut tangis. Manang na piga ari sai marsak do au jala marpuasa.+ Dung i martangiang ma au tu Debata na di surgo. 5 Hudok ma, “Ale Jahowa Debata na di surgo, Debata na marhuaso jala na sangap do Ho. Sai dipasaut Ho do janjim, jala dipatuduhon Ho do holong ni roham* tu akka halak na makkaholongi Ho jala na mangulahon parettam.+ 6 Sai tangihon jala tatap ma tangiang ni naposomon na martangiang tu Ho sadari on. Arian nang borngin+ sai hutangiakkon do halak Israel. Huakkui do dosa ni sude halak Israel tu Ho. Ai nungnga mardosa be au dohot bangsokku.*+ 7 Nungnga hubahen hami na jahat di jolom.+ Ai dang huoloi hami akka parettam, aturanmu, dohot hukum na dilehon Ho tu si Musa naposom.+

8 “Sai ingot ma paretta* na pinaboam tu si Musa naposom. Didok Ho do tu ibana, ‘Molo dang setia hamu, bahenokku ma marserak hamu di tonga-tonga ni bangso na asing.+ 9 Alai molo mulak hamu tu Au jala dioloi hamu parettakku, papunguokku ma hamu+ nang pe marserak hamu sahat tu ujung ni langit. Jala boanokku ma hamu sian i tu inganan na hupillit lao parohon sangap tu goarhu.’+ 10 Naposom jala bangsom do nasida. Dipakke Ho do gogom dohot huasom na balga i lao paluahon* nasida.+ 11 Ale Jahowa, tangihon ma tangiang ni naposomon dohot tangiang ni akka naposom na pasangappon* goarmu. Bahen ma asa marhasil au sadari on jala asa asi roha ni raja on tu au.”+

Au do pangurus siinumon ni raja di tikki i.+

2 Di bulan Nisan* taon na paduapuluhon+ Raja Artasasta mamaretta,+ nungnga diparade anggur di jolona. Hubuat ma i jala hulehon tu raja i.+ Saleleng on, dang hea au marsak diida ibana. 2 Alani i didok raja i ma tu au, “Boasa marsak ho? Hape so na marsahit ho. Huida hira na adong do dipikkiri ho.” Gabe mabiar ma au alani i.

3 Hudok ma tu raja i, “Sai ganjang ma umur ni raja i! Boha ma dang marsak au, ai maruppak dope kota inganan ni kuburan ni akka oppukku. Jala nungnga tartutung akka gerbangna.”+ 4 Didok raja i ma tu au, “Jadi aha ma na naeng bahenonmu?” Satokkin i, pittor martangiang ma au tu Debata na di surgo.+ 5 Hudok ma tu raja i, “Molo lomo roha ni raja i jala olo raja i mangoloi pangidoan ni naposomon, paloas ma au lao tu Juda, asa hupature kota inganan ni kuburan ni akka ompukki.”+ 6 Tikki i, hundul do ratu di labbung ni raja i. Didok raja i ma tu au, “Sadia leleng ho disi? Andigan ma ho mulak?” Jadi diloas raja i ma au lao,+ jala hupaboa ma sadia leleng au disi.+

7 Dung i hudok ma tu raja i, “Molo lomo roha ni raja i, bahen ma surat na lao lehonokku tu akka gubernur ni akka luat na di Bariba ni Sunge,*+ asa diloas nasida au lewat sahat tu Juda. 8 Jala bahen ma muse surat na lao lehonokku tu si Asap panjaga ni tombak ni raja i, asa dilehon ibana tu au akka hau. Dung i pakkeonku ma akka hau i mambahen gerbang ni Benteng+ ni Bagas Joro. Pakkeonku ma muse akka hau i mambahen tembok ni kota+ dohot mambahen jabu inganakku.” Dilehon raja ma surat i tu au,+ ai diurupi Debatakku do au.+

9 Disuru raja do muse akka pamimpin ni tentara dohot akka tentara na marhoda mandongani au. Dung i, hujuppangi ma akka gubernur ni luat na di Bariba ni Sunge jala hulehon ma surat ni raja i tu nasida. 10 Diboto si Sambalat+ halak Horon dohot si Tobia+ pejabat ni halak Ammon+ ma taringot i. Gabe jut ma roha ni nasida ala adong na mangurupi halak Israel.

11 Ujungna, sahat ma au di Jerusalem jala disi ma au saleleng tolu ari. 12 Tikki borngin, lao ma au rap dohot piga-piga halak. Dang hupaboa tu manang ise pe aha tudu-tudu na dilehon Debata tu au* na ikkon siulahonokku di Jerusalem. Holan halode na huhunduli do na huboan hami. 13 Kaluar ma au borngin i sian Gerbang Rura.+ Mamolus ma au sian jolo ni Mata Mual Ulok na Balga* sahat tu Gerbang Inganan ni Abu.*+ Hupareso ma tembok ni Jerusalem naung maruppak i dohot akka gerbangna naung tartutung i.+ 14 Sian i, mamolus ma au tu Gerbang Mata Mual+ sahat tu Kolam ni Raja. Alai dang boi halode na huboan i mamolus sian i alani soppitna. 15 Nang pe songon i, hutorusson do pardalanakku di borngin i sahat tu rura*+ lao mamareso tembok i. Dung i mulak ma au tu Gerbang Rura jala mulak tu jabukku.

16 Dang diboto akka pejabat daerah+ tudia au lao jala aha na huulahon. Ai dang hupaboa manang aha tu halak Jahudi, tu akka malim, tu akka halak na sangap, tu akka pejabat daerah, dohot tu akka parkarejo na asing. 17 Ujungna hudok ma tu nasida, “Nungnga diida hamu hasusaan na masa tu hita. Nungnga maruppak kota Jerusalem jala nungnga tartutung akka gerbangna. Beta, tapajongjong ma tembok ni Jerusalem asa unang maila be hita alani i.” 18 Hupaboa ma tu nasida songon dia Debatakku mangurupi au.+ Jala hupaboa ma tu nasida aha na nidok ni raja tu au.+ Gabe didok nasida ma, “Beta, tapajongjong ma.” Dung i masipatoguan ma nasida* lao mangulahon ulaon na denggan i.+

19 Dibege si Sambalat halak Horon, si Tobia+ pejabat ni halak Ammon,+ dohot si Gesem halak Arab i+ ma taringot i. Direhe-rehei+ jala dileai nasida ma hami. Didok nasida ma, “Ai aha do na binahenmuna on? Na naeng mangalo do hamu tu raja i?”+ 20 Alai hudok ma tu nasida, “Debata na di surgo do na lao mangurupi hami.+ Jala hami do naposona na lao pajongjokkon tembok i. Alai anggo hamu, dang adong urusanmuna tu Jerusalem, dang parsidohot hamu tu sejarah ni Jerusalem, jala dang adong hakmuna disi.”+

3 Dung i, dipajongjong Sintua Malim Eliasib+ dohot akka donganna malim ma Gerbang Biru-Biru+ jala dibahen ma akka pintuna. Dipabadia+ nasida ma i sahat tu Menara Mea+ dohot Menara Hananel.+ 2 Di labbung ni nasida, halak Jeriko+ ma na paturehon tembok i. Jala di labbung ni halak Jeriko, si Sakur anak ni si Imri ma na paturehon tembok i.

3 Dipajongjong akka anak ni si Hasena ma Gerbang Dekke.+ Dibahen nasida ma kusenna,+ jala dibahen nasida ma akka pintu, akka garendel, dohot akka palangna. 4 Di labbung ni nasida, si Meremot+ anak ni si Uria pahoppu ni si Hakos ma na paturehon tembok i. Di labbung ni si Meremot, si Mesulam+ anak ni si Berekia pahoppu ni si Mesezabeel ma na paturehon tembok i. Jala di labbung ni si Mesulam, si Sadok anak ni si Baana ma na paturehon tembok i. 5 Di labbung ni si Sadok, halak Tekoa+ ma na paturehon tembok i. Alai dang olo akka halak na sangap na disi dohot paturehon tembok i. Ai dang olo nasida patutoru diri ni nasida jala dang olo nasida diatur-atur akka pengawas ni ulaon i.

6 Dipature si Joyada anak ni si Pasea dohot si Mesulam anak ni si Besodeya ma Gerbang Kota Tua.+ Dibahen nasida ma kusenna, jala dibahen nasida ma akka pintu, akka garendel, dohot akka palangna. 7 Di labbung ni nasida, si Melatia halak Gibeon i+ dohot si Jadon halak Meronot i ma na paturehon tembok i. Halak Gibeon dohot halak Mispa+ do nasida. Jala gubernur ni luat na di Bariba ni Sunge*+ do pamimpin ni halak Gibeon dohot halak Mispa. 8 Di labbung ni nasida, si Usiel anak ni si Harhaya ma na paturehon tembok i. Sahalak tukkang mas do ibana. Jala di labbungna, si Hanania sibahen miak na angur i ma na paturehon tembok i. Dipasang nasida do akka batu alam lao mambahen dalan sian Jerusalem sahat tu Tembok na Bidang.+ 9 Di labbung ni si Hanania, si Repaya anak ni si Hur ma na paturehon tembok i. Ibana do pamimpin ni satonga luat ni Jerusalem. 10 Di labbung ni si Repaya, si Jedaya anak ni si Harumap ma na paturehon tembok na di jolo ni jabuna. Jala di labbung ni si Jedaya, si Hantus anak ni si Hasabneya ma na paturehon tembok i.

11 Dipadenggan si Malkia anak ni si Harim+ dohot si Hasub anak ni si Pahat-moab+ ma tembok i di bagian na asing. Jala dipadenggan nasida ma muse Menara Pamanggangan.+ 12 Di labbung ni nasida, si Sallum anak ni si Hallohes rap dohot akka boruna ma na paturehon tembok i. Ibana do pamimpin ni satonga luat ni Jerusalem.

13 Dipadenggan si Hanun dohot halak Sanoa+ ma Gerbang Rura.+ Jala dibahen nasida ma akka pintu, akka garendel, dohot akka palangna. Dipature nasida ma muse tembok i sahat tu Gerbang Inganan ni Abu,+ na ganjangna 1.000 asta.* 14 Dipadenggan si Malkia anak ni si Rekab ma Gerbang Inganan ni Abu. Jala dibahen ibana ma akka pintu, akka garendel, dohot akka palangna. Ibana do pamimpin ni luat Bet-hakkerem.+

15 Dipadenggan si Sallum anak ni si Kalhose ma Gerbang Mata Mual.+ Dibahen ibana ma atapna, akka pintu, akka garendel, dohot akka palangna. Dipadenggan ibana do muse Kolam Panampungan ni Aek+ na di labbung ni Taman ni Raja,+ sahat tu Tangga+ turun-turunan na sian Kota ni si Daud.+ Pamimpin ni luat Mispa+ do si Sallum.

16 Di labbungna, si Nehemia anak ni si Asbuk ma na paturehon tembok na di jolo ni Kuburan ni si Daud*+ sahat tu kolam+ naung dibangun, jala sahat ma muse tu Jabu ni Akka Tentara. Si Nehemia do pamimpin ni satonga luat Bet-zur.+

17 Di labbungna, akka halak Lepi ma na paturehon tembok i. Akka halak Lepi i, i ma si Rehum anak ni si Bani. Di labbungna, si Hasabya pamimpin ni satonga luat Keila+ ma na paturehon tembok na di luatna. 18 Jala di labbungna, i ma si Bawai anak ni si Henadad, pamimpin ni satonga luat Keila.

19 Di labbungna, si Eser anak ni si Jesua+ ma na paturehon tembok na di jolo ni nakkok-nakkohan na lao tu Gudang Panimpanan ni Sinjata. Jonok do gudang i tu Tiang Panukkol.+ Pamimpin ni luat Mispa do si Eser.

20 Di labbungna, si Baruk anak ni si Sabai+ ma na paturehon tembok i, mulai sian Tiang Panukkol sahat tu dalan na lao tu jabu ni Sintua Malim Eliasib.+ Dibahen ibana do sian nasa gogona lao paturehon tembok i.

21 Di labbungna, si Meremot+ anak ni si Uria pahoppu ni si Hakos ma na paturehon tembok i. Dipature ibana do tembok i mulai sian dalan na lao tu jabu ni si Eliasib sahat tu ujung ni jabuna i.

22 Di labbungna, akka malim na di luat* Jordan+ ma na paturehon tembok i. 23 Di labbung ni nasida, si Benjamin dohot si Hasub ma na paturehon tembok na di jolo ni jabu ni nasida. Jala di labbung ni si Benjamin dohot si Hasub, si Azaria anak ni si Maaseya pahoppu ni si Anania ma na paturehon tembok na jonok tu jabuna. 24 Di labbung ni si Azaria, si Binnui anak ni si Henadad ma na paturehon tembok di bagian na asing, mulai sian jabu ni si Azaria sahat tu Tiang Panukkol,+ jala sahat ma muse tu sudut ni tembok ni kota i.

25 Di labbungna, si Palal anak ni si Usai ma na paturehon tembok na di jolo ni Tiang Panukkol dohot menara ni Istana ni Raja.+ Jonok do bagian parginjang ni menara i tu Alaman ni Panjaga.+ Jala di labbungna, si Pedaya anak ni si Paras+ ma na paturehon tembok i.

26 Dohot do akka halak na martugas di bagas joro*+ na tinggal di Opel+ padenggatton tembok i. Dipadenggan nasida do i sahat tu jolo ni Gerbang Aek+ na di sabola timur. Jala dipadenggan nasida do muse i sahat tu menara na mangalewati batas ni tembok i.

27 Di labbung ni nasida, dipadenggan halak Tekoa+ ma tembok i mulai sian jolo ni menara na mangalewati batas ni tembok i sahat tu tembok ni Opel.

28 Dipadenggan akka malim ma tembok na di jolo ni jabu ni nasida be, i ma na di ginjang ni Gerbang Hoda.+

29 Di labbung ni nasida, si Sadok+ anak ni si Immer ma na padenggatton tembok na di jolo ni jabuna.

Jala di labbungna, si Semaya anak ni si Sekania ma na padenggatton tembok i. Panjaga Gerbang Timur+ do si Semaya.

30 Di labbungna, si Hanania anak ni si Selemia dohot si Hanun anak ni si Salap na paonomhon ma na paturehon tembok i di bagian na asing.

Jala di labbungna, si Mesulam+ anak ni si Berekia ma na padenggatton tembok na di jolo ni jabuna.*

31 Di labbungna, si Malkia ma na padenggatton tembok i sahat tu jabu ni akka halak na martugas di bagas joro*+ dohot sahat tu jabu ni akka partiga-tiga, i ma na di jolo ni Gerbang Pemeriksaan, jala sahat ma muse i tu akka ruangan parginjang na di sudut ni tembok ni kota.

32 Akka tukkang mas dohot akka partiga-tiga ma na padenggatton tembok na di holang-kolang ni akka ruangan parginjang i dohot Gerbang Biru-biru.+

4 Dibege si Sambalat+ ma na dipadenggan hami tembok i. Gabe muruk jala jut ma rohana.* Sai direhe-rehei ibana ma halak Jahudi. 2 Didok si Sambalat ma di jolo ni haha anggina dohot di jolo ni tentara ni Samaria, “Aha do na lao bahenon ni halak Jahudi na so margellok on? Na dirippu nasida do tolap nasida mangulahon i? Na lao mangalehon pelean do nasida? Na dirippu nasida do boi nasida pajongjokkon tembok i di bagasan sadari? Na dirippu nasida do boi dope pakkeon batu na mosok jala na maropuk na sian tembok na maruppak i?”+

3 Tikki i, jongjong do si Tobia+ halak Ammon i+ di labbung ni si Sambalat. Didok ibana ma, “Molo adong anjing hutan* manjakkit tu tembok na dipajongjong ni nasida i, pasti maruppak do tembok i.”

4 Alani i martangiang ma au, hudok ma, “Ale Debatanami, tangihon ma hata ni nasida na mangarehei hami.+ Sai bahen ma mulak tu nasida* rehe-rehe ni nasida i.+ Pasahat ma nasida tu musu ni nasida, jala bahen ma nasida diboan musu ni nasida tu luat na asing. 5 Sai ida ma hajahaton ni nasida jala unang ma sesa dosa ni nasida sian jolom.+ Ai nungnga dileai nasida akka halak na pajongjokkon tembok i.”

6 Ditorusson hami ma pajongjokkon tembok i sappe marsada sude tembok i. Jala nungnga satonga timbo ni tembok i. Ai dilehon bangso i do rohana lao mangulahon i.

7 Dung i dibege si Sambalat, si Tobia,+ halak Arab,+ halak Ammon, dohot halak Asdod+ ma na ditorusson hami pajongjokkon tembok ni Jerusalem jala nungnga ditutup hami akka na marlubang. Alani i, gabe muruk ma nasida. 8 Jala marsakkap ma nasida naeng ro marporang mangalo halak na di Jerusalem asa gaor kota i. 9 Alai martangiang ma hami tu Debatanami, jala hubahen hami ma asa adong halak na marjaga arian nang borngin.

10 Ro muse ma halak Juda mandok, “Nungnga palojahu akka parkarejo i, hape godang nai dope akka batu na sian tembok na maruppak i. Dang na tolap be hita pajongjokkon tembok i.”

11 Jala sai didok musunami do, “Masuk ma hita tu tonga-tonga ni nasida andorang so diboto jala diida nasida hita. Dung i tapamate ma nasida asa so ulaon i.”

12 Adong do halak Jahudi na tinggal di jonok ni musunami. Molo ro nasida, sai* didok do tu hami, “Ro nama musutta i makkalilingi hita.”

13 Alani i hubahen ma asa adong halak sian ganup keluarga na marjaga di pudi ni tembok di inganan na so aman jala na datar. Marjaga ma nasida mamakke podang, tombak,* dohot panah. 14 Tikki huida mabiar bangso i, lao ma au mandapotton akka halak na sangap,+ pejabat daerah, dohot mandapotton halak na asing. Hudok ma tu nasida, “Unang ma mabiar hamu tu nasida.+ Ingot ma, na gogo jala na sangap do Jahowa.+ Bahen hamu ma sian nasa gogomuna lao manjaga haha anggimuna, gellengmuna, istrimuna, dohot jabumuna.”

15 Dung i diboto akka musu ma naung tarboto rencana ni nasida i jala nungnga sundat dibahen Debata na sittong rencana ni nasida. Alani i dipajongjong hami ma muse tembok i. 16 Mulai sian i, holan satonga ma akka parkarejokku na dohot pajongjokkon tembok i.+ Satonga nai marjaga ma nasida huhut maniop tombak, perisai, panah, dohot mamakke baju porang. Jala dohot do muse akka pejabat+ mangurupi* sude halak Juda 17 na pajongjokkon tembok i. Akka halak na mangangkat barang, holan sada ma tanganna karejo jala sada nai maniop sinjata. 18 Sude ma akka parkarejo mambahen podang di gottingna. Jala jongjong do di labbungku halak na martugas lao martarompet.+

19 Dung i hudok ma tu akka halak na sangap, tu akka pejabat daerah, dohot tu akka na asing, “Balga do ulaonta on jala ganjang do tembok na lao tapajongjong on. Alani i do gabe dao-dao hita. 20 Jadi molo dibege hamu soara ni tarompet, marpungu ma hamu tuson. Ai na lao marporang do Debata mangurupi hita.”+

21 Dung i hutorusson hami ma pajongjokkon tembok i, jala marjaga ma na satonga nai huhut maniop tombak. Hubahen hami ma songon i mulai sian manogot sahat tu na tarida bintang di bornginna i. 22 Hudok ma muse tu bangso i, “Lok ma marjaga akka bawa dohot akka parkarejona di Jerusalem tikki borngin. Nasida ma na manjaga hita tikki borngin jala karejo ma nasida tikki arian.” 23 Jadi dang hea sanga au manggatti abittu. Songon i nang haha anggikku, akka parkarejokku,+ dohot akka panjaga na mangihutton au. Sai torus do maniop sinjata tangan kanannami.

5 Alai mangangguki ma akka bawa dohot istri ni nasida alani halak Jahudi na asing.+ 2 Adong ma na mandok, “Godang do anak dohot borunami. Ikkon adong do sipanganonnami asa boi hami mangolu.” 3 Adong ma muse mandok, “Nungnga hugadis hami ladang, ladang anggur, dohot jabunami tikki dang adong sipanganonnami.” 4 Na asing muse mandok, “Nungnga hugadehon hami ladang dohot ladang anggurnami asa adong manggarar pajak tu raja.+ 5 Nang pe na marhaha maranggi hami, jala sarupa do gellengnami tu gelleng ni nasida, alai ikkon gabe hatoban do anak dohot borunami. Jala nungnga adong deba borunami na gabe hatoban.+ Alai dang tarbahen hami manang aha, ai nungnga gabe appuna ni halak be ladang dohot ladang anggurnami.”

6 Gabe muruk situtu ma au mambege angguk-angguk dohot hata ni nasida i. 7 Jadi hupikkir-pikkiri ma i jala hupaboa tu akka pejabat dohot tu pejabat daerah. Hudok ma tu nasida, “Boasa ma pabungahon hepeng hamu tu haha anggimuna?”+

Alani i, husuru ma nasida sude marpungu. 8 Hudok ma tu nasida, “Nungnga hubahen hami sian nasa gogonami lao manuhor haha anggitta halak Jahudi sian bangso na asing. Alai saonari naeng gadisonmuna do muse nasida?+ Jala ikkon tuhoronnami do muse nasida?” Sip ma nasida sude, jala dang taralusi nasida be au. 9 Dung i hudok ma muse, “Dang denggan na binahenmuna on. Ikkon dihabiari hamu do Debatanta,+ asa unang dileai musutta hita. 10 Au pe, papinjappon hepeng dohot sipanganon do tu nasida. Songon i nang haha anggikku dohot akka parkarejokku. Alai dang marbunga dibahen hami i. Alani i, unang be pabungahon hamu na dipinjam nasida.+ 11 Sadari on, paulak hamu ma sude na dipabungahon hamu tu nasida. Paulak hamu ma ladang,+ ladang anggur, ladang jetun, dohot jabu ni nasida. Jala paulak hamu ma bunga ni hepeng, sipanganon, anggur na baru, dohot bunga ni miak tu nasida. Ai dipabungahon hamu do i saporsen* tu nasida.”

12 Jadi, didok akka pejabat dohot pejabat daerah i ma, “Hupaulak hami pe i sude, jala dang hupangido hami be manang aha tu nasida. Huulahon hami pe sude na nidokmi.” Dung i, hujou ma akka malim jala husuru ma nasida marsumpa di jolo ni akka malim i. 13 Hupaspasson ma abittu* jala hudok ma, “Songon on ma bahenon ni Debata na sittong tu halak na so mangulahon sumpana. Buaton ni Debata ma jabuna dohot artana sappe dang adong be na tinggal di ibana.” Sude ma halak na marpungu i mandok, “Amen.”* Dipuji nasida ma Jahowa jala diulahon nasida ma songon janji ni nasida i.

14 Saleleng 12 taon ma au gabe gubernur+ di luat Juda, i ma sian taon na paduapuluhon+ sahat tu taon na patolupulu duahon+ Raja Artasasta+ mamaretta. Saleleng mamaretta au, dang hea hubuat sipanganon na ditottuhon raja gabe bagian ni gubernur,+ songon i nang haha anggikku. 15 Alai susa do akka rakyat dibahen akka gubernur na mamaretta andorang so au. Dipangido nasida do 40 sekel* perak lao manuhor roti dohot anggur ganup ari. Dohot do muse akka pegawai ni gubernur manusai rakyat. Alai dang hubahen songon i.+ Ai mabiar do au tu Debata.+

16 Dohot do au karejo mambangun tembok i rap dohot sude parkarejokku. Alai dang adong dipangido hami ladang sian nasida.+ 17 Adong do 150 halak Jahudi dohot akka pejabat daerah na rap mangan dohot au. Jala adong do muse akka halak na sian bangso na asing na rap dohot hami. 18 Ganup ari husuru do asa diparade sada lombu, onom biru-biru na dumenggan, dohot akka pidong lao allangonnami. Jala husuru do asa diparade godang anggur siinumon na marragam sahali sappulu ari. Alai nang pe songon i, dang hea hupangido sipanganon na ditottuhon raja gabe bagian ni gubernur. Ai nungnga pagodangku tugas ni rakyat i. 19 Ale Debatakku sai ingot ma au jala pasu-pasu ma au. Ai nungnga godang na hubahen tu bangso on.+

6 Dung i, dibege si Sambalat, si Tobia,+ si Gesem halak Arab i,+ dohot akka musunami na asing ma naung sae dipajongjong hami tembok i.+ Jala dibege nasida ma naung ditutup sude tembok na marlubang. (Tikki i dang hubahen dope pintu ni akka gerbang.)+ 2 Pittor disuru si Sambalat dohot si Gesem ma halak manjuppangi au. Didok ma, “Beta, taatur ma tikkitta asa pajuppang hita di sada huta di Rura Ono.”+ Hape naeng mambahen jea do nasida tu au. 3 Alani i, husuru ma halak mandok tu nasida, “Dang boi au ro. Adong karejokku na penting saonari. Gabe so do annon ulaon on molo lao au.” 4 Opat hali ma didok nasida songon i tu au, alai sai sarupa do alussu tu nasida.

5 Dung i disuru si Sambalat ma parkarejona manjuppangi au palimahalihon. Didok ma muse songon i jala dilehon ma surat na so marsegel tu au. 6 Songon on ma isi ni surat i: “Nungnga dibege akka bangso na naeng mangalo do ho dohot halak Jahudi.+ Alani i do umbahen na dipajongjong ho tembok i. Songon i do muse didokkon si Gesem.+ Jala adong na paboahon tu hami, na naeng ho nama raja ni halak Jahudi. 7 Dipillit ho do muse akka panurirang* lao mandok songon on tu saluhut Jerusalem, ‘Nungnga adong be saonari raja di Juda!’ Nungnga dibege rajatta on. Alani i, ro ma ho asa tahatai taringot on.”

8 Alai, husuru ma halak mandok tu ibana, “Dang tutu na nidokmi. Na makkarangi hata do ho.” 9 Ai sude do nasida pabiar-biarhon hami. Didok nasida do, “Dang na lao tolap nasida* pajongjokkon tembok i. Dang na lao sae be i.”+ Alani i martangiang ma au asa barani.*+

10 Dung i lao ma au tu jabu ni si Semaya anak ni si Delaya pahoppu ni si Mehetabel. Tikki i dang boi ibana kaluar sian jabuna. Didok ibana ma tu au, “Beta, martabuni ma hita di bagas joro di jabu ni Debata na sittong. Takucci ma pintuna. Ai ro nama nasida pamatehon ho. Pamateonna ma ho tikki borngin.” 11 Alai hudok ma, “Boasa pola ikkon martabuni au? Dang gabe mate au haroa molo masuk tu bagas joro i?+ Dang olo au masuk tusi!” 12 Dung i huboto ma dang Debata na manuru ibana mandok songon i. Alai didok ibana pe songon i tu au, ala na dilehon si Tobia dohot si Sambalat+ do hepeng tu ibana. 13 Nungnga dilehon hepeng tu ibana lao pabiar-biarhon au jala asa mambahen au mardosa. Naeng bahenon ni nasida do roa goarhu asa adong dalan ni nasida paleahon au.

14 Alani i martangiang ma au, “Ale Debatakku, sai ingot ma pambahenan ni si Tobia+ dohot si Sambalat on. Sai ingot ma muse pambahenan ni si Noaja panurirang borua i dohot sude akka panurirang na sai pabiar-biarhon au.”

15 Sae ma tembok i dipajongjong di bagasan 52 ari, i ma di ari na paduapulu limahon di bulan Elul.*

16 Dung dibege akka musunami jala diida akka bangso na di sakalilingnami naung sae tembok i, gabe maila situtu ma nasida.+ Diboto nasida ma na diurupi Debatanami do hami pasaehon ulaon on. 17 Di tikki i, godang do surat na dikirim akka pejabat+ ni Juda tu si Tobia. Jala dibalos si Tobia do akka surat ni nasida i. 18 Godang do halak Juda naung marjanji marpihak tu si Tobia. Ai hela ni si Sekania anak ni si Arah do ibana.+ Adong do muse anakna na margoar si Johohanan mangoli tu boru ni si Mesulam+ anak ni si Berekia. 19 Sai na denggan do dihatahon nasida taringot si Tobia tu au. Jala sai dipaboa nasida do tu si Tobia aha na hudok. Dung i dikirim si Tobia do akka surat asa mambahen au mabiar.+

7 Dung sae tembok i dipajongjong,+ hubahen ma akka pintuna.+ Dung i dilehon ma tugas tu akka panjaga gerbang,+ akka parende,+ dohot halak Lepi.+ 2 Hupillit ma si Hanani+ sahalak sian haha anggikku gabe pengawas di Jerusalem. Rap dohot ibana, i ma si Hanania kepala panjaga Benteng.+ Halak na boi dihaporseai do si Hanania jala ibana do na umbiar tu Debata na sittong+ sian akka halak na asing i. 3 Dung i hudok ma tu nasida, “Unang bukka hamu pintu gerbang ni Jerusalem i sahat tu na las ari. Tikki marjaga panjaga ni gerbang i, ikkon ditutup jala ikkon digarendel nasida do pintu i. Jala suru ma pangisi ni Jerusalem asa marjaga di pos jaga dohot di jolo ni jabuna be.” 4 Balga do kota Jerusalem i. Dang godang jolma na tinggal disi+ jala dang adong dope akka jabu na dipajongjong.

5 Dilehon Debata do tu au tudu-tudu asa papunguhon akka pejabat, pejabat daerah, dohot akka rakyat mangihutton tarombo ni nasida be.+ Dung i dapottu ma bukku tarombo ni akka halak na parjolo mulak sian tawanan. Jala songon on ma isi ni bukku i:

6 On ma halak Jahudi na sian akka provinsi na mulak tu huta ni nasida be di Jerusalem dohot di Juda.+ Ai ditawan Raja Nebukadnesar+ na sian Babel do nasida.+ 7 Akka halak na mulak rap dohot si Serubabel,+ i ma si Jesua,+ si Nehemia, si Azaria, si Raamya, si Nahamani, si Mordahai, si Bilsan, si Mispar, si Bigpai, si Nehum, dohot si Baana.

On ma godang ni halak Israel na mulak i:+ 8 sian pinoppar ni si Paras 2.172 halak. 9 Sian pinoppar ni si Sepatia 372 halak. 10 Sian pinoppar ni si Arah+ 652 halak. 11 Sian pinoppar ni si Pahat-moab+ na sian si Jesua dohot na sian si Joab+ 2.818 halak. 12 Sian pinoppar ni si Elamit+ 1.254 halak. 13 Sian pinoppar ni si Jattu 845 halak. 14 Sian pinoppar ni si Sakai 760 halak. 15 Sian pinoppar ni si Binnui 648 halak. 16 Sian pinoppar ni si Bebai 628 halak. 17 Sian pinoppar ni si Asgad 2.322 halak. 18 Sian pinoppar ni si Adonikam 667 halak. 19 Sian pinoppar ni si Bigpai 2.067 halak. 20 Sian pinoppar ni si Adin 655 halak. 21 Sian pinoppar ni si Ater na sian si Hiskia 98 halak. 22 Sian pinoppar ni si Hasum 328 halak. 23 Sian pinoppar ni si Bisia 324 halak. 24 Sian pinoppar ni si Harip 112 halak. 25 Sian pinoppar* ni si Gibeon+ 95 halak. 26 Halak Betlehem dohot halak Netopa 188 halak. 27 Halak Anatot+ 128 halak. 28 Halak Bet-asmapet 42 halak. 29 Halak Kiriat-jearim,+ halak Kepira, dohot halak Beerot+ 743 halak. 30 Halak Rama dohot halak Geba+ 621 halak. 31 Halak Mikhmas+ 122 halak. 32 Halak Betel+ dohot halak Ai+ 123 halak. 33 Halak Nebo na asing 52 halak. 34 Sian pinoppar ni si Elamit na asing 1.254 halak. 35 Sian pinoppar ni si Harim 320 halak. 36 Sian pinoppar ni si Jeriko 345 halak. 37 Sian pinoppar ni si Lod, si Hadid, dohot si Ono+ 721 halak. 38 Jala sian pinoppar ni si Sena 3.930 halak.

39 Godang ni akka malim na mulak:+ Sian pinoppar ni si Jedaya na sian keluarga ni si Jesua 973 halak. 40 Sian pinoppar ni si Immer 1.052 halak. 41 Sian pinoppar ni si Pashur+ 1.247 halak. 42 Jala sian pinoppar ni si Harim+ 1.017 halak.

43 Godang ni halak Lepi na mulak:+ Sian pinoppar ni si Jesua sian keluarga ni si Kadmiel+ anak ni si Hodewa 74 halak. 44 Godang ni akka parende:+ Sian pinoppar ni si Asap+ 148 halak. 45 Godang ni akka panjaga pintu:+ Sian pinoppar ni si Sallum, si Ater, si Talmon, si Akkub,+ si Hatita, dohot si Sobai 138 halak.

46 On ma akka halak na martugas di bagas joro:*+ pinoppar ni si Siha, si Hasupa, si Tabaot, 47 si Keros, si Sia, si Padon, 48 si Lebana, si Hagaba, si Salmai, 49 si Hanan, si Gidel, si Gohar, 50 si Reaya, si Resin, si Nekoda, 51 si Gasam, si Usa, si Pasea, 52 si Bisia, si Meunim, si Nepusim, 53 si Bakbuk, si Hakupa, si Harhur, 54 si Baslit, si Mehida, si Harsa, 55 si Barkos, si Sisera, si Tama, 56 si Nesia, dohot pinoppar ni si Hatipa.

57 On ma pinoppar ni parkarejo ni si Salomo:+ pinoppar ni si Sotai, si Soperet, si Perida, 58 si Jaala, si Darkon, si Gidel, 59 si Sepatia, si Hatil, si Rokeret-hasebaim, dohot pinoppar ni si Amon. 60 Godang ni sude halak na martugas di bagas joro*+ dohot akka pinoppar ni parkarejo ni si Salomo, i ma 392 halak.

61 On ma akka halak na ro sian Tel-mela, Tel-harsa, Kerub, Addon, dohot sian Immer. Alai dang boi dipatudu nasida na tutu do nasida manang ompu ni nasida pinoppar ni halak Israel.+ 62 Sian pinoppar ni si Delaya, si Tobia, dohot si Nekoda 642 halak. 63 Na sian akka malim: pinoppar ni si Habai, si Hakos,+ dohot pinoppar ni si Barsilai. Goar ni simatua dolina do na dipakke si Barsilai. Ai si Barsilai+ halak Gilead i do simatua dolina. 64 Alai dung dilului nasida goar ni nasida di tarombo ni akka malim, dang tarsurat goar ni nasida disi. Alani i, dang boi nasida didok malim.*+ 65 Jala diorai gubernur*+ do nasida mangallang bagian na massai badia+ paima adong malim na boi manukkun tu Debata mamakke Urim dohot Tumim.*+

66 Jadi 42.360 halak ma godang ni nasida sude.+ 67 Asing ni i, adong dope 7.337 halak hatoban bawa dohot borua.+ Jala adong dope 245 halak parende bawa dohot borua.+ 68 Adong do 736 godang ni hoda ni nasida, jala 245 ma godang ni halode ni nasida na balga.* 69 Adong do muse 435 godang ni unta ni nasida, jala 6.720 ma godang ni halode ni nasida na gelleng.

70 Dilehon piga-piga pamimpin ni nasida na sasaompu ma sumbangan tu ulaon i.+ Dohot do muse gubernur* mangalehon sumbangan 1.000 drakhma* mas, 50 makkuk, dohot 530 jubah ni akka malim.+ 71 Adong ma muse pamimpin ni nasida na sasaompu na mangalehon sumbangan tu ulaon i. Dilehon nasida ma 20.000 drakhma mas dohot 2.200 mina* perak. 72 Jala dilehon sude rakyat ma 20.000 drakhma mas, 2.000 mina perak, dohot 67 jubah ni akka malim.

73 Tinggal ma akka malim di akka kota ni nasida. Songon i nang halak Lepi, akka panjaga gerbang, akka parende,+ deba bangso i, akka halak na martugas di bagas joro,* dohot sude halak Israel.+ Di bulan na papituhon,+ nungnga tinggal halak Israel di kota ni nasida be.+

8 Marpungu ma sude bangso i di tano lapang na di jolo ni Gerbang Aek.+ Didok nasida ma tu si Esra+ panalin* i asa mamboan bukku Patik ni si Musa,+ i ma bukku na marisi paretta ni Jahowa tu halak Israel.+ 2 Alani i, di ari na parjolo di bulan na papituhon+ diboan Malim Esra ma Patik i tu jolo ni bangso i.+ Marpungu do akka bawa, borua, dohot sude halak na boi mangattusi na binege ni nasida. 3 Dung i gogo ma dijahahon+ si Esra bukku i tu akka bawa, borua, dohot tu akka halak na mangattusi. Dijahahon ibana ma i di tano lapang di jolo ni Gerbang Aek, mulai sian manogot sahat tu tonga ari. Jala ditangihon bangso i do tikki dijahahon+ bukku Patik i. 4 Di tikki i, adong do dibahen panggung na sian hau lao tu acara i. Jongjong ma si Esra panalin* i disi. Jala jongjong ma di sabola kananna si Matitia, si Sema, si Anaya, si Uria, si Hilkia, dohot si Maaseya. Di sabola kirina, i ma si Pedaya, si Misael, si Malkia,+ si Hasum, si Hasbadana, si Sakaria, dohot si Mesulam.

5 Dibukka si Esra ma bukku i di jolo ni bangso i. Sude do boi mangida ibana ala untimbo do ingananna jongjong sian nasida. Tikki dibukka bukku i, jongjong ma sude natorop i. 6 Dung i dipuji si Esra ma Jahowa Debata na sittong jala na marmulia. Sude ma bangso i mandok, “Amen!* Amen!”+ huhut ma nasida mangangkat tangan ni nasida be. Marsinggang ma nasida marsomba tu Jahowa sappe dais bohi ni nasida tu tano. 7 Tikki jongjong dope bangso i, adong ma halak Lepi na patorakkon Patik i tu nasida.+ Akka halak Lepi i, i ma si Jesua, si Bani, si Serebia,+ si Jamin, si Akkub, si Sabetai, si Hodia, si Maaseya, si Kelita, si Azaria, si Josabad,+ si Hanan, dohot si Pelaya. 8 Torus ma gogo dijahahon nasida bukku Patik ni Debata na sittong i. Takkas do i dipatorang jala dipaboa lapatanna. Gabe boi ma nasida mangurupi bangso i mangattusi patik naung dijahahon i.+

9 Tangis do bangso i tikki dibege nasida hata na adong di bukku Patik i. Alani i didok si Nehemia gubernur* i, Malim Esra+ panalin* i, dohot halak Lepi na mangajari bangso i ma, “Unang ma marsak hamu jala unang ma sai tangis. Ai ari na badia do sadari on di Jahowa Debatamuna.”+ 10 Dung i didok si Nehemia ma tu nasida, “Pangan hamu ma sipanganon na tabo jala inum hamu ma anggur na manis. Lehon ma deba+ tu akka halak na so adong sipanganonna dohot siinumonna. Ai badia do sadari on di Tuanta i. Unang ma marsak hamu, ai dilehon Jahowa do las ni roha na mambahen hamu togu.”* 11 Dung i dipapos halak Lepi ma roha ni bangso i. Didok ma, “Unang be sai tangis hamu! Ai ari na badia do sadari on. Jala unang be marsak hamu.” 12 Dung i mangan jala minum anggur ma bangso i. Dibagi nasida ma sipanganon i deba tu na asing. Massai las do roha ni nasida+ ala diattusi nasida do hata naung dipaboa na adong di bukku Patik i.+

13 Di ari na paduahon, marpungu ma pamimpin ni bangso i na sasaompu, akka malim, dohot halak Lepi makkalilingi si Esra panalin* i. Lomo do roha ni nasida asa lam mangattusi Patik i. 14 Diboto nasida ma molo di Patik i, adong do paretta ni Jahowa na dipasahat si Musa tu halak Israel. Dipaboa disi ikkon tinggal do nasida di sopo-sopo* saleleng perayaan di bulan na papituhon.+ 15 Ikkon dibahen do boa-boa tu sude kota ni nasida+ dohot tu sude luat na di Jerusalem. On ma boa-boa i, “Lao ma hamu tu dolok-dolok jala buat ma ratting na marbulung sian hau jetun, hau pinus, hau mirtel dohot hau palem. Jala buat hamu ma muse ratting na marbulung sian hau na asing lao mambahen sopo-sopo songon na tarsurat i.”

16 Dung i diulahon bangso i ma i. Diboan nasida ma akka ratting na marbulung i lao mambahen sopo-sopo di nasida. Dibahen nasida ma i di atap dohot di alaman ni jabu ni nasida be. Jala dibahen nasida ma i muse di alaman ni jabu ni Debata na sittong,+ di tano lapang na di Gerbang Aek,+ manang di tano lapang na di Gerbang Epraim.+ 17 Sude ma halak na mulak sian tawanan i mambahen sopo-sopo jala disi ma nasida tinggal. Massai las do roha ni nasida.+ Ai dang hea be halak Israel mangulahon ulaon sisongon i mulai sian tikki ni si Josua+ anak ni si Nun sahat tu sadari i. 18 Jala ganup ari do bukku na marisi Patik ni Debata na sittong i+ dijahahon, mulai sian ari na parjolo sahat tu ari parpudi. Dibahen nasida do perayaan i saleleng pitu ari. Marpungu ma nasida di ari na paualuhon, songon na didok di Patik i.+

9 Marpungu ma halak Israel di ari na paduapulu opatton di bulan na papituhon. Marpuasa ma nasida jala dibahen ma orbuk tu ulu ni nasida huhut marabit goni.+ 2 Dipapulik akka pinoppar ni halak Israel ma diri ni nasida sian sude bangso na asing.+ Jongjong ma nasida mangakkui dosa ni nasida dohot dosa ni ompu ni nasida.+ 3 Jongjong ma nasida jala gogo ma dijahahon bukku Patik+ na sian Jahowa Debata ni nasida i saleleng tolu jom.* Dung i, diakkui nasida ma muse dosa ni nasida saleleng tolu jom huhut marsomba tu Jahowa Debata ni nasida.

4 Jongjong ma si Jesua, si Bani, si Kadmiel, si Sebania, si Buni, si Serebia,+ si Bani, dohot si Hanani di panggung+ na diparade tu halak Lepi. Jala gogo ma soara ni nasida manjou Jahowa Debata ni nasida. 5 Didok si Jesua, si Kadmiel, si Bani, si Hasabneya, si Serebia, si Hodia, si Sebania, dohot si Petahia halak Lepi i ma tu nasida, “Jongjong ma hamu jala puji ma Jahowa Debatamuna sahat tu saleleng ni lelengna.+ Ale Debata, loas ma nasida mamuji goarmu na badia i. Ai tama do goarmu dipuji jala dipasangap.

6 “Ale Jahowa, dang adong Debata na songon Ho.+ Ho do na manoppa langit. Tutu, Ho do na manoppa sude langit dohot nasa isina,* na manoppa tano on dohot nasa isina, jala na manoppa laut dohot nasa isina. Dijaga Ho do i sude asa toktong mangolu. Jala sude do na di langit* marsomba tu Ho. 7 Ho do Jahowa Debata na sittong. Ho do na mamillit si Abram+ jala na mamboan ibana kaluar sian Ur+ kota ni halak Kasdim. Dung i dibahen Ho ma goarna gabe si Abraham.+ 8 Diida Ho do na setia ibana tu Ho.+ Alani i dibahen Ho ma parjanjian dohot ibana. Lao lehononmu do tu ibana dohot tu pinopparna+ tano ni halak Kanaan, halak Het, halak Amori, halak Perisi, halak Jebus, dohot halak Girgasi. Jala dipasaut Ho do janjimi ala tigor do Ho.

9 “Diida Ho do sitaonon ni ompunami di Mesir,+ jala ditangihon Ho do angguk-angguk ni nasida di Laut Merah. 10 Diboto Ho do ginjang ni roha+ ni halak Mesir mangalo naposom. Alani i, dibahen Ho do akka tanda halongangan* lao manghukum si Firaun, akka naposona, dohot sude rakyatna.+ Dibahen Ho do gabe ditanda halak goarmu sahat tu sadari on.+ 11 Dibola dua Ho do laut i di jolo ni nasida. Gabe koring ma laut i jala boi ma nasida lewat.+ Dibahen Ho do akka na mangalele nasida lonong tu laut na bagas, songon na manappatton batu tu laut na margalumbang.+ 12 Ditogu-togu Ho do nasida tikki arian mamakke ombun.* Jala tikki borngin dibahen Ho do api,* asa torang dalan na lao sidalanan ni nasida.+ 13 Turun do Ho tu Dolok Sinai+ jala makkatai do Ho sian surgo.+ Dilehon Ho do akka parettam, hukum na tigor, patik na sittong,* dohot aturan na denggan.+ 14 Dipatandahon Ho do ari Sabatmu na badia i tu nasida.+ Dilehon Ho do akka parettam, aturan, dohot patikmu marhite naposom si Musa. 15 Dilehon Ho do roti sian surgo tikki male nasida.+ Jala dipakaluar Ho do aek sian dolok batu tikki mauas nasida.+ Disuru Ho do nasida masuk jala manaluhon luat i songon naung dijanjihon Ho tu nasida.

16 “Alai ginjang do roha ni akka ompunami+ jala sijogal rukkung do nasida.+ Dang ditangihon nasida akka parettam. 17 Dang olo nasida manangihon.+ Dang diingot nasida akka tanda halongangan na binahenmu. Sijogal rukkung do nasida jala dipillit nasida do pamimpin asa mulak muse tu Mesir+ gabe hatoban. Alai Debata na rade manalpuhon hasalaan do Ho, na burju, jala parasi roha. Lambat do Ho tarrimas jala gok do holong*+ na pinatudum. Dang olo Ho manadikkon nasida.+ 18 Nang pe dibahen nasida patung lombu na sian logam jala didok nasida do, ‘On do Debatamuna na mamboan hamu kaluar sian Mesir.’+ Jala dang dipasangap nasida Ho, 19 alai toktong do dipatudu Ho asi ni roham. Dang ditadikkon Ho nasida di gurun.+ Toktong do dibahen Ho ombun di tikki arian na manogu-nogu nasida jala api tikki borngin asa torang dalan na lao sidalanan ni nasida.+ 20 Dilehon Ho do tondi parbadiam asa mangattusi nasida.+ Sai dilehon Ho do manna tu nasida+ jala dilehon Ho do aek tikki mauas nasida.+ 21 Sai dilehon Ho do sipanganon ni nasida saleleng 40 taon di gurun.+ Dang hahurangan nasida. Dang sega pakkean ni nasida+ jala dang bongkak pat ni nasida.

22 “Dilehon Ho do akka harajaon dohot akka bangso tu nasida jala dibagi-bagihon Ho do i.+ Gabe boi ma nasida mambuat luat Sihon+ na nirajaan ni si Hesbon+ dohot luat Og+ na nirajaan ni si Basan. 23 Dibahen Ho do nasida marpinoppari gabe songon godang ni akka bintang di langit.+ Diboan Ho do nasida tu tano naung dijanjihon Ho tu ompu ni nasida asa disi nasida tinggal.+ 24 Gabe boi ma pinoppar ni nasida mambuat tano i.+ Ai ditaluhon Ho do halak Kanaan+ na tinggal di luat i di jolo ni nasida. Jala dipasahat Ho do akka raja dohot akka pangisi ni luat i tu tangan ni nasida. Gabe boi ma halak Israel mangulahon lomo ni roha ni nasida. 25 Jala boi do dibuat nasida akka kota na marbenteng+ dohot tano na subur.+ Diingani nasida do akka jabu na marisi godang arta. Dibuat nasida do muse sumur naung digali, ladang anggur, ladang jetun,+ akka hau na godang parbuena, jala boi ma nasida mangallang i sude sappe butong jala mokmok. Las do roha ni nasida alani burjumi.

26 “Alai dang unduk nasida jala dialo nasida do Ho.+ Dang dioloi nasida Patikmi. Dipamate nasida do akka panurirangmi* na pasingotton nasida asa mulak tu Ho, jala dang dipasangap nasida Ho.+ 27 Alani i, dipasahat Ho ma nasida tu musu na mambahen nasida susa.+ Alai ditangihon Ho do sian surgo angguk-angguk ni nasida tikki susa.+ Alani asi ni roham, dilehon Ho do akka halak na paluahon nasida sian musu ni nasida.+

28 “Alai dung malua, mulak do muse nasida mangulahon na jahat di jolom.+ Dipasahat Ho ma nasida tu tangan ni musu na mangarajai nasida.*+ Dung i dipangido nasida ma muse asa diurupi Ho nasida.+ Jala ditangihon Ho do i sian surgo. Sai dipalua Ho do nasida alani asi ni roham na balga i.+ 29 Nang pe dipasingot Ho nasida asa diihutton muse Patikmi, alai ginjang do roha ni nasida jala dang ditangihon akka parettam.+ Mardosa do nasida muse, dialo nasida do akka aturanmu. Hape molo dioloi nasida aturanmu dapot ni nasida ma hangoluan.+ Dipajogal nasida do rukkung ni nasida, jala dang olo nasida manangihon. 30 Sai sabar do Ho tu nasida+ saleleng martaon-taon. Dipasingot Ho do nasida marhite akka panurirangmu na ditogu-togu tondi parbadia. Alai dang olo nasida manangihon. Ujungna dipasahat Ho ma nasida tu tangan ni bangso na di luat i.+ 31 Alani asi ni roham, dang diripasson Ho+ jala dang ditadikkon Ho nasida. Ai Debata na burju jala na marasi ni roha do Ho.+

32 “Saonari ale Debatanami, Debata Natumimbul, na marhuaso, na massai sangap, na sai pasautton janjina jala na patuduhon holong ni roha,*+ ingot ma akka sitaononnami, akka rajanami, akka pejabatnami,+ akka malimnami,+ akka panurirangnami,+ akka ompunami, dohot sude naposom mulai sian tikki ni akka raja ni Asiria+ sahat tu sadari on. 33 Sai sittong do ulaonmu jala setia do Ho. Masa pe on tu hami alani hajahatonnami do i.+ 34 Dang diulahon akka rajanami, akka pejabat, akka malim, dohot akka ompunami Patikmi. Dang diparrohahon nasida akka parettam manang sipaingotmu, nang pe nungnga dipasingot Ho nasida. 35 Tikki mamaretta pe raja ni nasida, sai dilehon Ho do akka na denggan tu nasida. Dilehon Ho do tu nasida tano na bidang jala na subur. Alai tong do dang olo nasida manomba Ho+ jala dang muba nasida sian ulaon ni nasida na jahat. 36 Saonari hatoban do hami.+ Hatoban di tano na nilehonmu tu akka ompunami. Dilehon Ho do i najolo tu nasida asa boi nasida mangallang hasilna jala makkilala akka na denggan. 37 Alani dosanami, ditottuhon Ho do akka raja na asing lao mangarajai hami. Gabe tu nasida do hasil na godang i.+ Lomo-lomo ni nasida do tu hami* dohot tu akka binatang na dipiaro hami. Marsak situtu do hami alani i.

38 “Alani i, dibahen hami ma sada parjanjian+ na tarsurat. Dimateraihon jala diakkui akka pejabatnami, akka halak Lepi, dohot akka malimnami do parjanjian on.”+

10 Akka on ma halak na mangakkui jala na mambahen materai+ di parjanjian i:

9 Sian halak Lepi, i ma si Jesua anak ni si Azanya, si Binnui sian keluarga ni si Henadad, si Kadmiel,+ 10 si Sebania, si Hodia, si Kelita, si Pelaya, si Hanan, 11 si Mika, si Rehob, si Hasabya, 12 si Sakur, si Serebia,+ si Sebania, 13 si Hodia, si Bani, dohot si Beninu.

14 Sian akka pamimpin ni bangso i, i ma si Paras, si Pahat-moab,+ si Elamit, si Jattu, si Bani, 15 si Buni, si Asgad, si Bebai, 16 si Adonia, si Bigpai, si Adin, 17 si Ater, si Hiskia, si Azur, 18 si Hodia, si Hasum, si Bisia, 19 si Harip, si Anatot, si Nebai, 20 si Magpias, si Mesulam, si Hesir, 21 si Mesezabeel, si Sadok, si Jadua, 22 si Pelatia, si Hanan, si Anaya, 23 si Hosea, si Hanania, si Hasub, 24 si Hallohes, si Pilha, si Sobek, 25 si Rehum, si Hasabna, si Maaseya, 26 si Ahia, si Hanan, si Anan, 27 si Malluk, si Harim, dohot si Baana.

28 Sude ma bangso i, i ma akka malim, halak Lepi, panjaga gerbang, akka parende, akka na martugas di bagas joro,* sude halak na papulikkon dirina sian bangso na asing lao mangihutton Patik ni Debata na sittong,+ istri ni nasida, anak ni nasida, boru ni nasida, sude halak na mangattusi sumpa i,* 29 haha anggi ni nasida, dohot akka halak na sangap, marsada ni roha lao mambahen sumpa. Marsumpa ma nasida, sai dihukum Debata ma nasida molo dang mangihutton Patik ni Debata na sittong, na dilehon marhite si Musa naposo ni Debata na sittong i. Jala hona hukum ma nasida molo dang diulahon sude paretta ni Jahowa Tuanta i, akka hukumna, dohot akka aturanna. 30 Dang lehononnami borunami tu akka halak di luat on. Jala dang buatonnami boru ni nasida lao tu anaknami.+

31 Molo ro nasida manggadis akka barang dohot hasil panen ni nasida di ari Sabat, dang tuhoronnami i di ari Sabat+ manang di ari na badia+ na asing pe. Jala di taon na papituhon+ dang ulaonnami tano i jala sesaonnami ma utang ni manang ise pe.+

32 Asing ni i, marjanji do hami lao mangalehon sapartolu sekel* lao tu ulaon di jabu* ni Debatanami ganup taon.+ 33 Dipakke ma i muse lao mambahen roti pelean,+ pelean sipanganon* na somal,+ pelean situtungon di ari Sabat+ dohot di akka bulan baru.+ Dipakke ma i muse lao tu perayaan naung ditottuhon,+ tu pelean na badia, tu pelean hasesaan ni dosa+ na gabe pardamean tu halak Israel, dohot tu sude ulaon na adong di jabu ni Debatanami.

34 Jala dibahen hami ma undi lao manottuhon andigan do na sasaompu sian akka malim, halak Lepi, dohot sian bangso i mamboan soban tu jabu ni Debatanami ganup taon. Lao ditutung do soban i di langgatan ni Jahowa Debatanami songon na disuratton di Patik i.+ 35 Boanonnami ma muse hasil panen na parjolo sian tanonami dohot parbue ni hau na parjolo sian marragam hau ganup taon tu jabu ni Jahowa.+ 36 Boanonnami ma muse anak siakkangannami dohot na parjolo tubu sian akka binatangnami.+ Jala boanonnami ma muse anak ni lombu, hambing, dohot biru-biru na parjolo tubu, songon naung tarsurat di Patik i. Boanonnami ma i tu jabu ni Debatanami, tu akka malim na marhobas di jabu ni Debatanami.+ 37 Boanonnami ma topung na kasar na sian hasil panen na parjolo,+ akka sumbangan, akka parbue ni hau,+ anggur na baru, dohot miak.+ Boanonnami ma i tu akka malim na adong di akka gudang* di jabu ni Debatanami.+ Jala boanonnami ma muse tu halak Lepi+ saparsappulu sian hasil ni tano na niulanami. Alana nasida do na manjalo saparsappulu i sian sude kota pertaniannami.

38 Ikkon didongani sahalak malim pinoppar ni si Aron do akka halak Lepi na papunguhon saparsappulu sian naung ditottuhon i. Jala ikkon boanon ni halak Lepi ma saparsappulu sian saparsappulu naung diboan i tu akka ruangan* na adong di gudang di jabu ni Debatanami.+ 39 Tu akka gudang* i do diboan halak Israel dohot pinoppar ni halak Lepi sumbangan+ sipanganon, anggur na baru, dohot miak.+ Disi do muse disippan akka barang na sian bagas joro. Jala disi do tinggal akka malim na lao marhobas, akka sijaga gerbang, dohot akka parende. Nungnga dibahen hami keputusan di bagas rohanami, ikkon diparrohahon hami do akka ulaon di jabu ni Debatanami.+

11 Tinggal ma akka pejabat ni bangso i di Jerusalem.+ Dung i dibahen bangso i ma undi+ lao manottuhon sada sian ganup sappulu keluarga asa tinggal di Jerusalem, kota na badia i. Alai molo na sia nai tinggal ma di kota na asing. 2 Jala dipuji bangso i do akka halak na olo tinggal di Jerusalem.

3 On ma akka pamimpin ni provinsi na tinggal di Jerusalem. (Sude halak Israel na asing, akka malim, halak Lepi, halak na martugas di bagas joro,*+ dohot akka pinoppar ni parkarejo ni si Salomo+ tinggal di akka kota na asing na di luat Juda. Ganup halak tinggal di ingananna be di kota ni nasida.+

4 Jala adong do deba halak Juda dohot halak Benjamin na tinggal di Jerusalem.) Sian pinoppar ni halak Juda, i ma si Ataya. Bapak ni si Ataya, i ma si Usia. Bapak ni si Usia, i ma si Sakaria. Bapak ni si Sakaria, i ma si Amaria. Bapak ni si Amaria, i ma si Sepatia. Bapak ni si Sepatia, i ma si Mahalalel. Pinoppar ni si Peres+ do si Mahalalel. 5 Dohot do muse si Maaseya anak ni si Baruk. Bapak ni si Baruk, i ma si Kalhose. Bapak ni si Kalhose, i ma si Hazaya. Bapak ni si Hazaya, i ma si Adaya. Bapak ni si Adaya, i ma si Joyarib. Bapak ni si Joyarib, i ma si Sakaria. Pinoppar ni si Sela do si Sakaria. 6 Sude pinoppar ni si Peres na tinggal di Jerusalem godangna 468 halak. Akka tentara na jago do nasida.

7 Sian pinoppar ni halak Benjamin, i ma si Sallu+ anak ni si Mesulam. Bapak ni si Mesulam, i ma si Joed. Bapak ni si Joed, i ma si Pedaya. Bapak ni si Pedaya, i ma si Kolaya. Bapak ni si Kolaya, i ma si Maaseya. Bapak ni si Maaseya, i ma si Itiel. Bapak ni si Itiel, i ma si Jesaya. 8 Dohot do muse keluarga ni si Gabbai dohot si Salai. Godang ni nasida sude 928 halak. 9 Si Joel anak ni si Sikri ma pengawas ni nasida, jala si Juda anak ni si Hassenuna ma wakil ni si Joel di kota i.

10 Sian akka malim: si Jedaya anak ni si Joyarib, si Jakin,+ 11 dohot si Seraya. Bapak ni si Seraya, i ma si Hilkia. Bapak ni si Hilkia, i ma si Mesulam. Bapak ni si Mesulam, i ma si Sadok. Bapak ni si Sadok, i ma si Merayot. Jala bapak ni si Merayot, i ma si Ahitub.+ Sahalak pamimpin ni jabu* ni Debata na sittong do si Seraya. 12 Dohot do muse haha anggi ni nasida na karejo di jabu i. Godang ni nasida sude, i ma 822 halak. Dohot do muse si Adaya anak ni si Jeroham. Bapak ni si Jeroham, i ma si Pelaya. Bapak ni si Pelaya, i ma si Amzi. Bapak ni si Amzi, i ma si Sakaria. Bapak ni si Sakaria, i ma si Pashur. Bapak ni si Pashur,+ i ma si Malkia. 13 Dohot do muse haha anggina dohot akka pamimpin ni nasida na sasaompu. Godang ni nasida sude, i ma 242 halak. Dohot do muse si Amassai anak ni si Azarel. Bapak ni si Azarel, i ma si Aksai. Bapak ni si Aksai, i ma si Mesilemot. Bapak ni si Mesilemot, i ma si Immer. 14 Halak na jago jala na barani do akka haha anggina. Godang ni nasida sude, i ma 128 halak. Si Sabdiel do pamimpin ni nasida jala sian keluarga na sangap do ibana.

15 Sian halak Lepi: si Semaya+ anak ni si Hasub. Bapak ni si Hasub, i ma si Asrikam. Bapak ni si Asrikam, i ma si Hasabya. Bapak ni si Hasabya, i ma si Buni. 16 Dohot do muse si Sabetai+ dohot si Josabad.+ Nasida ma na sian akka pamimpin ni halak Lepi. Jala nasida ma na mengawasi akka ulaon na diulahon di luar ni jabu ni Debata na sittong. 17 Dung i si Matania+ anak ni si Mika. Bapak ni si Mika, i ma si Sabdi. Bapak ni si Sabdi, i ma si Asap.+ Si Matania do na manguluhon ende puji-pujian dohot na pasahatton puji-pujian tikki martangiang.+ Wakilna, i ma si Bakbukya, dung i si Abda anak ni si Samua. Bapak ni si Samua, i ma si Galal. Bapak ni si Galal, i ma si Jedutun.+ 18 Godang ni halak Lepi di kota na badia i, i ma 284 halak.

19 Akka panjaga gerbang, i ma si Akkub, si Talmon,+ dohot haha anggi ni nasida. Godang ni nasida sude, i ma 172 halak.

20 Alai molo halak Israel na asing, akka malim, dohot halak Lepi, maringanan di kota na asing na adong di luat Juda do nasida, di tano parbagianan ni nasida be. 21 Si Siha dohot si Gispa do pengawas ni na martugas di bagas joro.*+ Jala di Opel+ do tinggal akka na martugas di bagas joro i.*

22 Pengawas ni halak Lepi na tinggal di Jerusalem, i ma si Usi anak ni si Bani. Bapak ni si Bani, i ma si Hasabya. Bapak ni si Hasabya, i ma si Matania.+ Bapak ni si Matania, i ma si Mika. Pinoppar ni si Asap parende i do si Usi. Si Usi do na mengawasi ulaon di jabu ni Debata na sittong. 23 Adong do peraturan dibahen raja+ lao mangatur kebutuhan ni akka parende di ulaon ni nasida ganup ari. 24 Jala si Petahia ma na gabe penasehat ni raja taringot tu ulaon ni akka bangso i. Bapak ni si Petahia, i ma si Mesezabeel na sian keluarga ni si Jara anak ni si Juda.

25 On ma akka huta dohot ladang di sakaliling ni nasida: Deba halak Juda tinggal di Kiriat-arba+ dohot di akka kota di sakalilingna, di Dibon dohot di akka kota di sakalilingna, di Jekabseel+ dohot di akka huta na disi, 26 di Jesua, di Molada,+ di Bet-palet,+ 27 di Hasar-sual,+ di Ber-seba dohot di akka kota di sakalilingna, 28 di Ziklag,+ di Mekona dohot di akka kota di sakalilingna, 29 di En-rimmon,+ di Zora,+ di Jarmut, 30 di Sanoa,+ di Adullam dohot di akka huta na disi, di Lakis+ dohot di akka ladangna, di Azeka+ dohot di akka kota di sakalilingna. Tinggal ma nasida di Ber-seba sahat tu Rura Hinnom.+

31 Akka halak Benjamin tinggal ma di Geba,+ di Mikhmas, di Haya, di Betel+ dohot di akka kota di sakalilingna, 32 di Anatot,+ di Nob,+ di Anania, 33 di Hazor, di Rama,+ di Gitaim, 34 di Hadid, di Zeboim, di Naballat, 35 di Lod, dohot di Ono,+ i ma rura inganan ni akka partukkang. 36 Piga-piga punguan ni halak Lepi dohot halak Juda disuru ma tinggal di Benjamin.

12 On ma akka malim dohot halak Lepi na mulak tu Jerusalem rap dohot si Serubabel+ anak ni si Sealtiel+ dohot si Jesua:+ si Seraya, si Jeremia, si Esra, 2 si Amaria, si Malluk, si Hantus, 3 si Sekania, si Rehum, si Meremot, 4 si Iddo, si Ginnetoi, si Abia, 5 si Mijamin, si Maadia, si Bilga, 6 si Semaya, si Joyarib, si Jedaya, 7 si Sallu, si Amok, si Hilkia, dohot si Jedaya. Akka on ma pamimpin ni malim dohot haha anggi ni nasida di tikki ni si Jesua.

8 Akka halak Lepi, i ma si Jesua, si Binnui, si Kadmiel,+ si Serebia, si Juda, dohot si Matania.+ Si Matania dohot haha anggina ma na manguluhon ende puji-pujian. 9 Si Bakbukya dohot si Uni haha anggi ni nasida ma na jongjong di jolo ni nasida tikki mangulahon tugas jaga.* 10 Anak ni si Jesua, i ma si Joyakim. Anak ni si Joyakim, i ma si Eliasib.+ Anak ni si Eliasib, i ma si Joyada.+ 11 Anak ni si Joyada, i ma si Jonatan. Anak ni si Jonatan, i ma si Jadua.

12 Di tikki ni si Joyakim, akka on ma malim na gabe pamimpin ni na sasaompu: sian keluarga ni si Seraya,+ i ma si Meraya; sian keluarga ni si Jeremia, i ma si Hanania; 13 sian keluarga ni si Esra,+ i ma si Mesulam; sian keluarga ni si Amaria, i ma si Johohanan; 14 sian keluarga ni si Melihu, i ma si Jonatan; sian keluarga ni si Sebania, i ma si Josep; 15 sian keluarga ni si Harim,+ i ma si Adna; sian keluarga ni si Merayot, i ma si Helkai; 16 sian keluarga ni si Iddo, i ma si Sakaria; sian keluarga ni si Gineton, i ma si Mesulam; 17 sian keluarga ni si Abia,+ i ma si Sikri; sian keluarga ni si Minyamin, i ma . . . ;* sian keluarga ni si Moaja, i ma si Piltai; 18 sian keluarga ni si Bilga,+ i ma si Samua; sian keluarga ni si Semaya, i ma si Jehonatan; 19 sian keluarga ni si Joyarib, i ma si Matenai; sian keluarga ni si Jedaya,+ i ma si Usi; 20 sian keluarga ni si Salai, i ma si Kallai; sian keluarga ni si Amok, i ma si Heber; 21 sian keluarga ni si Hilkia, i ma si Hasabya; sian keluarga ni si Jedaya, i ma si Netaneel.

22 Mulai sian tikki ni si Eliasib, si Joyada, si Johanan, si Jadua+ sahat tu na mamaretta si Darius raja ni Persia, disurat do goar ni akka malim dohot pamimpin ni halak Lepi na sasaompu.

23 Disurat do goar ni akka pamimpin ni halak Lepi na sasaompu di bukku sejarah taringot na masa di tikki i sappe tu na masa di tikki ni si Johanan anak ni si Eliasib. 24 On ma pamimpin ni halak Lepi: si Hasabya, si Serebia, dohot si Jesua+ anak ni si Kadmiel.+ Jongjong do akka haha anggi ni nasida di jolo ni nasida lao mangendehon ende puji-pujian dohot mandok mauliate tu Debata. Ai songon i do paretta ni si Daud+ naposo ni Debata na sittong i. Jongjong ma sada punguan di labbung ni punguan na asing. 25 Si Matania,+ si Bakbukya, si Obaja, si Mesulam, si Talmon, dohot si Akkub+ do na martugas manjaga gerbang.+ Nasida do na manjaga akka gudang na jonok tu gerbang i. 26 Akka on ma na martugas di tikki ni si Joyakim anak ni si Jesua+ pahoppu ni si Josadak, di tikki ni si Nehemia gubernur i, dohot di tikki ni Malim Esra+ panalin* i.

27 Dibahen ma pesta na patuduhon naung sae tembok Jerusalem i. Dilului nasida ma halak Lepi di sude inganan ni nasida tinggal. Dung i diboan ma halak Lepi i tu Jerusalem asa dohot nasida marpesta jala marlas ni roha. Diendehon nasida ma ende puji-pujian+ mamakke simbal,* alat musik na martali, dohot harpa. 28 Dipapungu ma akka parende naung tarlatik* na sian luat na di Jordan, sian sude luat na di sakaliling ni Jerusalem, sian akka huta ni halak Netopa,+ 29 sian Bet-gilgal,+ sian akka ladang na di Geba,+ dohot sian Asmapet.+ Ai nungnga maringanan akka parende i di sude huta di humaliang ni Jerusalem. 30 Dung i dipabadia akka malim dohot halak Lepi ma diri ni nasida, bangso i,+ akka gerbang,+ dohot tembok i.+

31 Dung i, huboan ma akka pejabat ni halak Juda tu atas ni tembok i. Hubahen ma akka parende gabe dua punguan lao mangendehon ende puji-pujian. Adong do akka punguan ni halak na mangihutton nasida. Mardalan ma sada punguan tu sabola kanan ni tembok i tu arah Gerbang Inganan ni Abu.*+ 32 Jala mardalan ma di pudi ni nasida si Hosaya, pejabat ni halak Juda, 33 si Azaria, si Esra, si Mesulam, 34 si Juda, si Benjamin, si Semaya, dohot si Jeremia. 35 Dohot ma muse deba pinoppar ni malim na martarompet+ mardalan di pudi ni nasida, i ma si Sakaria. Bapak ni si Sakaria, i ma si Jonatan. Bapak ni si Jonatan, i ma si Semaya. Bapak ni si Semaya, i ma si Matania. Bapak ni si Matania, i ma si Mikaya. Bapak ni si Mikaya, i ma si Sakur. Bapak ni si Sakur, i ma si Asap.+ 36 Dohot do muse akka haha anggina, i ma si Semaya, si Azarel, si Milalai, si Gilalai, si Mai, si Netaneel, si Juda, dohot si Hanani. Dipakke nasida do alat musik na dibahen si Daud+ naposo ni Debata na sittong i. Jala si Esra+ panalin* i ma na mardalan di jolo ni nasida. 37 Di Gerbang Mata Mual i,+ nakkok ma nasida tu Tangga+ ni Kota ni si Daud.+ Mamolus ma nasida sian nakkok-nakkohan na adong di tembok di ginjang ni Istana ni si Daud. Jala lao ma nasida tu Gerbang Aek+ na di sabola timur.

38 Punguan ni akka parende na asing na mangendehon ende puji-pujian mardalan ma tu sabola kiri.* Huihutton ma nasida rap dohot satonga ni akka halak na mangihutton nasida di ginjang ni tembok i. Mamolus ma hami sian Menara Pamanggangan+ sahat tu Tembok na Bidang.+ 39 Mamolus ma muse hami sian Gerbang Epraim+ sahat tu Gerbang Kota Tua+ dohot Gerbang Dekke.+ Jala mamolus ma hami sian Menara Hananel,+ Menara Mea, Gerbang Biru-Biru+ sahat tu Gerbang Panjaga.

40 Di ujungna, jongjong ma dua punguan ni akka parende i di jolo ni jabu ni Debata na sittong i. Jala jongjong ma au rap dohot satonga pejabat daerah, 41 Malim Eliakim, Malim Maaseya, Malim Minyamin, Malim Mikaya, Malim Eleonai, Malim Sakaria, dohot Malim Hanania. Nasida ma na mamakke tarompet. 42 Jala dohot do muse si Maaseya, si Semaya, si Eleasar, si Usi, si Johohanan, si Malkia, si Elamit, dohot si Eser. Gogo do soara ni akka parende i marende jala si Israhia do na mamimpin nasida.

43 Di tikki i godang do pelean na dilehon jala marlas ni roha do nasida.+ Ai Debata na sittong do na mambahen nasida marlas ni roha. Dohot do akka borua dohot dakdanak marlas ni roha.+ Gabe tarbege ma soara ni halak na marlas ni roha di Jerusalem i sahat tu inganan na dao.+

44 Adong do halak na dipillit lao manjaga akka gudang.+ Di gudang i do disippan akka sumbangan,+ hasil panen na parjolo,+ dohot saparsappulu+ naung ditottuhon lao boanon ni nasida. Jala di gudang i ma dipapungu hasil ladang na sian akka kota, na gabe bagian ni akka malim dohot halak Lepi,+ songon na tarsurat di Patik i.+ Marlas ni roha do akka halak na di Juda alani akka malim dohot halak Lepi na martugas i. 45 Denggan do diulahon nasida tugas na sian Debata i. Jala diulahon nasida do ulaon pabadiahon diri na ikkon diulahon nasida. Akka parende dohot panjaga gerbang pe dohot do mangulahon i songon paretta ni si Daud dohot paretta ni anakna si Salomo. 46 Mulai sian tikki ni si Daud dohot si Asap nungnga adong na manguluhon akka parende. Jala adong do dibahen akka ende puji-pujian lao mandok mauliate tu Debata.+ 47 Di tikki ni si Serubabel+ dohot di tikki ni si Nehemia, dilehon halak Israel do sumbangan na dihaporluhon akka parende+ dohot akka panjaga gerbang+ ganup ari. Jala dilehon nasida ma muse sumbangan tu halak Lepi.+ Dung i halak Lepi ma na mambagihon sumbangan i tu pinoppar ni si Aron.

13 Di ari i, dijahahon ma bukku patik ni si Musa di jolo ni bangso i.+ Adong ma dipaboa disi dang boi halak Ammon dohot halak Moab+ dietong gabe naposo ni Debata na sittong.+ 2 Ai najolo dang dilehon nasida tu halak Israel roti dohot aek. Digaji nasida do si Bileam asa mamburai halak Israel.+ Alai dibahen Debatanami ma bura i gabe pasu-pasu.+ 3 Dung dibege nasida Patik i, dipapulik nasida ma sude pinoppar ni bangso na asing sian halak Israel.+

4 Malim Eliasib+ hian do na manjaga akka gudang* di jabu* ni Debatanami.+ Martondong do ibana dohot si Tobia.+ 5 Dilehon ibana ma gudang na balga tu si Tobia. Di gudang i do najolo disippan pelean sipanganon,* haminjon,* akka peralatan, saparsappulu ni gandum, anggur na baru, dohot miak.+ Akka i do bagian ni halak Lepi,+ akka parende, panjaga gerbang, jala i do sumbangan tu akka malim.+

6 Tikki masa i sude, dang di Jerusalem au. Alana, lao do au manjuppangi si Artasasta+ raja ni Babilon i di taon na patolupulu duahon+ ibana mamaretta. Jala di pudian ni ari hupangido ma tu raja i asa dipaloas au lao. 7 Dung i sahat ma au di Jerusalem, jala huida ma akka na jahat na binahen ni si Eliasib.+ Dilehon ibana do sada gudang tu si Tobia+ na adong di alaman ni jabu ni Debata na sittong. 8 Massai jut do rohakku alani i. Gabe husappatton ma akka barang ni si Tobia tu luar ni gudang* i. 9 Dung i husuru ma asa dipaias akka gudang i. Hupaulak ma muse tusi akka peralatan ni jabu ni Debata na sittong,+ akka pelean sipanganon, dohot haminjon.+

10 Huboto ma muse dang dilehon be+ bagian ni halak Lepi.+ Alani i dang diulahon halak Lepi dohot akka parende be tugas ni nasida. Gabe lao do nasida tu ladang ni nasida be.+ 11 Alani i hupasingot ma akka pejabat daerah+ jala hudok ma, “Boasa dipasombu hamu dang diurus jabu ni Debata na sittong?”+ Dung i hupapungu ma akka halak Lepi jala husuru ma asa diulahon nasida muse tugas ni nasida be. 12 Diboan sude halak Juda ma saparsappulu+ ni gandum, anggur na baru, dohot miak tu akka gudang i.+ 13 Hupillit ma Malim Selemia, si Sadok panalin* i, dohot si Pedaya pinoppar ni halak Lepi gabe pengawas ni akka gudang. Si Hanan anak ni si Sakur pahoppu ni si Matania do na mangurupi nasida. Halak na boi dihaporseai do nasida sude. Jala martanggung jawab do nasida lao mambagihon akka sumbangan tu haha anggi ni nasida.

14 Ingot ma akka na hubahen+ ale Debatakku. Unang ma lupahon holong* na hupatudu tu jabum, dohot na hubahen lao mangaradoti ulaon na adong disi, ale Debatakku.+

15 Di tikki i, huida ma muse halak Juda mandege-dege anggur di inganan pardegean di ari Sabat.+ Jala huida ma nasida mamboan godang gandum mamakke halode. Diboan do muse anggur, parbue ni anggur, ara, dohot akka na asing tu Jerusalem di ari Sabat.+ Alani i gabe huorai ma nasida martiga-tiga di ari i.* 16 Jala dohot do halak Tirus na tinggal di kota i mamboan dekke dohot akka barang na lao digadis tu halak Juda na di Jerusalem tikki ari Sabat.+ 17 Jadi hupasingot ma akka halak na sangap na adong di Juda. Hudok ma tu nasida, “Boasa diulahon hamu na jahat on? Ai nungnga dilanggar hamu patik taringot tu Sabat. 18 Ai na so diingot hamu do na dibahen akka ompumuna najolo? Dibahen nasida do songon on, ujungna dibahen Debata ma hasusaan on tu hita dohot tu kota on. Saonari dilanggar hamu dope patik taringot tu Sabat,+ gabe lam muruk ma Debata tu Israel.”

19 Dung i andorang so borngin dope, husuru ma asa ditutup gerbang ni Jerusalem tikki so dimulai ari Sabat. Hudokkon ma muse asa dibukka gerbang i molo dung sae ari Sabat. Jala husuru ma akka pangurupikku manjaga gerbang i, asa unang adong halak na masuk sian i lao mamboan akka barang tikki ari Sabat. 20 Alani i piga-piga hali gabe marborngin do partiga-tiga, na manggadis akka barang di luar ni tembok Jerusalem. 21 Dung i hupasingot ma nasida jala hudok ma, “Boasa marborngin hamu di jolo ni tembok on? Molo dibahen hamu dope songon on, hupalao ma hamu.” Mulai sian i dang hea be nasida ro di ari Sabat.

22 Hudok ma muse tu halak Lepi asa sai dipabadia nasida diri ni nasida. Jala husuru ma dijaga nasida akka gerbang asa toktong badia ari Sabat i.+ Alani i, ale Debatakku, ingot ma na hubahen on. Asi ma roham tu au, ai massai balga do holong ni roha* na pinatudum.+

23 Jala di tikki i huboto ma godang do halak Jahudi na mangoli tu* boru+ ni halak Asdod,+ halak Ammon, dohot halak Moab.+ 24 Satonga sian gelleng ni nasida makkatai mamakke bahasa Asdod jala satonga nai mamakke bahasa ni akka bangso na asing. Alai dang diboto nasida anggo bahasa Jahudi. 25 Jadi hupasingot ma halak Jahudi i. Huburai ma nasida, huattuki,+ jala hujanggola ma obuk ni nasida. Dung i hudok ma tu nasida, “Marsumpa ma hamu di bagasan goar ni Debata na so lehononmuna borumuna tu anak ni nasida, jala dang boi hamu manang anakmuna mangoli tu boru ni nasida.+ 26 Ai dang i haroa na mambahen si Salomo raja ni Israel i gabe mardosa? Dang adong raja na songon ibana di tonga-tonga ni akka bangso na asing.+ Dihaholongi Debata do ibana.+ Dibahen do ibana gabe raja di Israel. Alai gabe mardosa do ibana alani akka istrina na sian bangso na asing i.+ 27 Boasa diulahon hamu dosa na balga on? Dang setia hamu tu Debata. Mangoli do hamu tu akka borua na sian bangso na asing.”+

28 Adong do sada anak ni si Joyada,+ i ma pahoppu ni Sintua Malim Eliasib+ na mangoli tu boru ni si Sambalat+ halak Horon i. Alani i, hupalao ma ibana sian jolokku.

29 Ale Debatakku sai ingot ma pambahenan ni nasida. Ai dang badia be dibahen nasida tugas ni nasida gabe malim. Jala dang diulahon nasida janji ni akka malim+ dohot halak Lepi.+

30 Hupabadia ma bangso i sian akka ulaon na roa na diulahon akka bangso na asing. Jala hulehon ma tugas ni ganup malim dohot halak Lepi.+ 31 Dung i husuru ma asa diboan akka soban+ di tikki naung ditottuhon jala asa diboan hasil panen na parjolo.

Ale Debatakku, sai ingot ma au jala pasu-pasu ma au.+