ESTER

1 Tikki mamaretta Raja Ahasweros,* dirajai ibana do 127 provinsi,+ mulai sian India sahat tu Etiopia.* 2 Jala sian istanana di Susan*+ do Raja Ahasweros mamaretta. 3 Di taon na patoluhon ibana mamaretta, dibahen ibana ma pesta tu sude pejabatna dohot pegawaina. Jala dohot do ro akka tentara ni Persia+ dohot Media,+ akka na sangap, dohot akka pejabat provinsi. 4 Dipatudu ibana ma tu nasida hamoraon, hamuliaon, dohot hasangapon ni harajaonna saleleng 180 ari. 5 Dung salpu i, dibahen raja ma muse pesta saleleng pitu ari di alaman ni istanana. Dijou ibana do sude halak na di istana Susan,* mulai sian pejabat sahat tu pegawai biasa. 6 Adong do akka tiang na sian marmer di alaman i. Gattung do akka golang-golang na sian perak di tiang i. Diikkat ma horden na sian kain linen na bottar dohot kain katun na balau tu akka golang-golang i. Jala diikkat ma horden i mamakke tali na sian kain na bagak dohot kain wol na ungu. Lantena sian batu porfiria, mutiara, marmer na bottar, dohot marmer na birong. Jala adong do disi akka kursi na sian mas dohot na sian perak.

7 Diparade do massai godang anggur lao patuduhon hamoraon ni raja i. Dibahen ma i tu akka makkuk na sian mas jala marragam do akka makkuk i. 8 Dang ditottuhon raja sadia godang anggur na lao diinum ganup halak. Ai nungnga didok raja i tu akka pejabat na di istanana, manang ise pe boi do mangulahon lomo ni rohana.

9 Ratu Wasti+ pe mambahen pesta do tu akka borua di istana ni Raja Ahasweros.

10 Di ari papituhon las situtu ma roha ni raja ala manginum anggur. Dijou ma si Mehuman, si Bista, si Harbona,+ si Bigta, si Abagta, si Jethar, dohot si Karkas. Nasida ma pitu pejabat istana na mangurupi Raja Ahasweros. 11 Disuru raja ma nasida mamboan Ratu Wasti tu jolona. Disuru do Ratu Wasti mamakke tudung. Naeng patuduon ni raja do haulion ni ratu i tu sude halak dohot tu akka pejabat. Ai bagak situtu do ratu i. 12 Nang pe nungnga piga-piga hali akka pejabat istana manjou Ratu Wasti asa ro tu jolo ni raja, alai dang olo ibana. Gabe muruk situtu ma raja i tu ibana.

13 Dung i dipaboa raja ma parsoalan i tu akka penasehatna. Alana nasida do na mangattusi peraturan naung dibahen sian najolo. (Molo adong parsoalan, somal do raja manukkun tu halak na marbisuk na mamboto patik dohot aturan. 14 Jala na unjonok sian nasida tu raja, i ma si Karsena, si Jetar, si Admata, si Tarsis, si Meres, si Marsena, dohot si Memukan. Nasida ma pitu pejabat+ ni Persia dohot Media na boi langsung pajuppang dohot raja jala na untimbo jabatanna di harajaon i.) 15 Didok raja i ma tu nasida, “Nungnga dialo Ratu Wasti parettakku* na hupaboa marhite akka pejabat. Mangihutton hukum, aha do na ikkon bahenon tu ibana?”

16 Di jolo ni raja dohot akka pejabat, didok si Memukan ma, “Dang holan raja na dialo Ratu Wasti disi.+ Alai dohot do sude pejabat dohot sude halak na di provinsi na dirajai Raja Ahasweros. 17 Molo diboto akka ina-ina na dibahen ni ratu i, gabe dialo nasida ma annon suami ni nasida. Dohonon ni nasida ma, ‘Haru Ratu Wasti dang olo ro tikki dijou Raja Ahasweros ibana.’ 18 Jala dang pola salpu sadari on, molo diboto akka istri ni pejabat Persia dohot Media na dibahen ratu i, songon i ma dohonon ni nasida tu suamina. Gabe tubu ma parbadaan dohot sogo ni roha di keluarga ni nasida. 19 Molo denggan di roha ni raja i, bahen ma sada paretta na mandok dang boi be Ratu Wasti ro tu jolo ni Raja Ahasweros. Surat ma i jala tambai ma i tu hukum ni Persia dohot Media, asa toktong i marlakku.+ Dung i, lului ma borua na dumenggan gatti ni ratu i. 20 Molo dung diboto sude halak na di harajaonmon paretta ni raja i, pasangapon ni akka ina-ina ma suamina, mulai sian pejabat sahat tu rakyat.”

21 Las ma roha ni raja dohot akka pejabat mambege hata ni si Memukan. Dung i, diulahon raja ma na nidokna i. 22 Dibahen ibana ma surat tu sude provinsi di harajaonna.+ Jala dibahen do surat i mangihutton huruf dohot bahasa na dipakke di ganup provinsi. Didok do muse di surat i, suami do na gabe ulu di rumah tangga jala ikkon bahasa ni bangsona do na dipakke di rumah tanggana.

2 Dung salpu i sude, tikki dang muruk be Raja Ahasweros,+ diingot ibana ma pangalaho ni si Wasti+ dohot paretta na dibahen taringot tu si Wasti.+ 2 Dung i didok akka pejabat na mangurupi raja i ma, “Ale tuan, bahen ma paretta lao mangalului akka anak boru na bagak lao di ho. 3 Pillit ma akka halak di ganup provinsi di harajaonmi.+ Suru ma nasida mamboan akka anak boru na bagak tu inganan ni akka borua* di istana Susan.* Suru ma si Hegai+ manjaga nasida. Ibana do kepala* di inganan ni akka borua dohot panjaga ni akka borua. Dung i suru ma nasida diurus asa lam bagak. 4 Jala dia ma anak boru na unlomo roha ni raja i, ibana ma bahen gabe ratu gatti ni si Wasti.”+ Lomo do roha ni raja i mambege hata ni pejabat i jala diulahon ma songon i.

5 Adong ma bawa halak Jahudi di Susan.*+ Goarna si Mordahai.+ Ibana anak ni si Jair, pahoppu ni si Simei, nini ni si Kis sian marga Benjamin.+ 6 Na ditakkup si Nebukadnesar raja ni Babel do si Mordahai sian Jerusalem. Jala diboan do ibana rap dohot halak na asing dohot ma i si Jekonya*+ raja ni Juda. 7 Si Mordahai do na mangurus si Hadasa,* i ma si Ester ibotona* i.+ Ai nungnga mate bapak dohot omak ni si Ester. Anak boru na bagak do ibana jala uli do rupana. Dung mate natua-tua ni si Ester, dibahen si Mordahai ma ibana gabe boruna. 8 Dung dipaboa paretta ni raja i, diboan ma godang anak boru tu istana Susan* jala si Hegai ma na manjaga. Dohot do si Ester diboan tu istana ni raja, jala si Hegai+ do na manjaga ibana.

9 Las do roha ni si Hegai mangida si Ester jala holong do rohana tu ibana. Diatur ibana ma asa adong na mangurus si Ester asa lam bagak+ jala diatur ma sipanganonna. Dipillit do pitu anak boru sian istana ni raja lao mangurupi si Ester. Jala dipapinda do muse si Ester dohot akka borua na mangurupi ibana i, tu inganan na dumenggan di inganan ni akka borua.* 10 Dang hea dipaboa si Ester tu na asing taringot tu bangsona+ dohot keluargana. Ai diorai si Mordahai+ do ibana paboa-boahon i tu na asing.+ 11 Alai, naeng diboto si Mordahai do songon dia si Ester jala manang aha na masa tu ibana di inganan ni akka borua* i. Alani i, mardalan-dalan ma ibana ganup ari di jolo ni alaman ni inganan i.

12 Margiliran do akka anak boru i ro tu jolo ni Raja Ahasweros. Nasida boi ro molo dung sae diurus saleleng 12 bulan. Saleleng 12 bulan i, diurus do nasida asa lam bagak, onom bulan mamakke miak mir,*+ onom bulan nai mamakke miak balsam*+ dohot akka miak na asing. 13 Manang ise naung sae mangulahon i, boi ma ibana ro tu jolo ni raja. Tikki naeng borhat ibana sian inganan ni akka borua* i tu istana ni raja, ikkon dilehon do sude na pinangidona. 14 Tikki borngin do anak boru i ro tu jolo ni raja. Dung manogot, lao ma ibana tu inganan na asing.* Si Saasgas do kepala* ni inganan i+ jala ibana do na manjaga akka gundik ni raja. Molo dang lomo roha ni raja tu anak boru i, jala molo dang dijou goarna, dang boi be ibana ro tu jolo ni raja.+

15 Dapot ma giliran ni si Ester boru ni si Abihail, iboto ni si Mordahai na dibahen gabe boruna+ ro tu jolo ni raja. Dang adong dipangido ibana agia aha, asing ni na nilehon ni si Hegai kepala* di inganan ni akka borua dohot na manjaga akka borua i. (Sahat tu tikki i, sude do marlomo ni roha mangida si Ester.) 16 Di taon na papituhon+ Raja Ahasweros mamaretta, diboan ma si Ester tu jolo ni raja di bulan na pasappuluhon, i ma bulan Tebet.* 17 Umholong do roha ni raja i tu si Ester sian sude anak boru na asing. Las do roha ni raja mangida ibana jala unlomo do rohana mangida si Ester sian akka anak boru na asing. Alani i, dibahen raja ma tudung tu ulu ni si Ester jala gabe ratu ma ibana+ gatti ni si Wasti.+ 18 Dung i, dibahen raja i ma pesta na balga alani si Ester. Dijou ibana do asa ro sude pejabat dohot pegawaina. Disuru raja i do asa dipalua akka jolma sian penjara* na di akka provinsi. Jala dibagi-bagihon ibana do godang hadiah lao patuduhon hamoraonna.

19 Tikki dipapungu na paduahalihon akka anak boru i,+ hundul do si Mordahai di gerbang ni istana ni raja. 20 Songon tona ni si Mordahai, dang dipaboa si Ester taringot tu keluarga dohot bangsona.+ Toktong do dioloi ibana hata ni si Mordahai songon tikki na rap i dope nasida.+

21 Tikki hundul si Mordahai di gerbang ni istana, diida ibana ma muruk si Bigtan dohot si Teres alani Raja Ahasweros, jala naeng dibunu nasida do raja i. Pejabat ni raja do nasida na dua, na karejo manjaga pintu. 22 Alai, dibege si Mordahai do i jala pittor dipaboa ibana ma tu Ratu Ester. Dung i, dipaboa ratu i ma tu raja na nidok ni si Mordahai i.* 23 Dipareso ma parsoalan i jala gabe diboto ma na sittong do na nidokna i. Digattung ma bawa na dua i tu hau. Jala disurat ma na masa i tu bukku sejarah ni harajaon i di jolo ni raja.+

3 Dung salpu i sude, naik jabatan ma dibahen Raja Ahasweros si Haman,+ anak ni si Hamedata halak Agag i.+ Jala dibahen ma untimbo jabatanna sian akka pejabat na asing.+ 2 Sude akka pegawai ni raja na adong di gerbang ni istana i marsinggang jala marsomba tu si Haman. Ai songon i do paretta ni raja lao pasangappon ibana. Alai dang olo si Mordahai marsinggang jala marsomba tu ibana. 3 Dung i disukkun akka pegawai na di gerbang i ma tu si Mordahai, “Boasa dang dioloi ho paretta ni raja i?” 4 Ganup ari do disukkun nasida si Mordahai, alai dang olo ibana manangihon nasida. Jala nungnga dipaboa si Mordahai na halak Jahudi do ibana.+ Dung i dipaboa nasida ma tu si Haman, lao mamboto pasombuon ni si Haman do na diulahon ni si Mordahai i manang na dang.+

5 Tikki diida si Haman na so olo si Mordahai marsinggang jala marsomba tu ibana, gabe muruk situtu ma ibana.+ 6 Dung diboto si Haman na halak Jahudi do si Mordahai, naeng dipamate ma ibana. Alai dang holan ibana naeng dipamate, dohot do sude halak Jahudi naeng dipamate ibana. Alani i, naeng dibunu ibana ma sude dongan sabangso ni si Mordahai na adong di harajaon ni si Ahasweros.

7 Di taon na pasappulu duahon+ Raja Ahasweros mamaretta, di bulan na parjolo, i ma bulan Nisan,* dibahen nasida ma Pur+ (i ma undi)* di jolo ni si Haman. Dibahen nasida do undi i lao manottuhon ari dohot bulan lao mangulahon paretta ni si Haman i. Jala tarpillit ma bulan na pasappulu duahon, i ma bulan Adar.*+ 8 Dung i didok si Haman ma tu Raja Ahasweros, “Ale rajanami, adong sada bangso na marserak di tonga-tonga ni bangsom+ di sude provinsi di harajaonmon.+ Asing do hukum ni nasida tu hukum ni sude bangso, jala dang dioloi nasida hukum ni raja. Dang denggan pasombuon ni raja nasida songon i. 9 Molo denggan di roha ni raja i, bahen ma surat na mandok asa dipamate nasida. Hulehon pe 10.000 talenta* perak tu akka pejabat asa dipamasuk tu inganan panimpanan ni arta ni raja.”*

10 Dung i dipalua raja ma cincinna*+ jala dilehon ma tu musu ni halak Jahudi, i ma si Haman,+ anak ni si Hamedata halak Agag i.+ 11 Didok raja i ma tu si Haman, “Ulahon ma lomo ni roham tu bangso i dohot tu perak* i. Ai nungnga hupasahat i tu ho.” 12 Dung i, dijou raja ma akka sekretarisna+ di ari na pasappulu toluhon di bulan na parjolo. Disurat nasida ma sude paretta+ ni si Haman. Dikirim ma i tu akka kepala ni gubernur, akka gubernur, dohot pejabat ni akka bangso. Jala dibahen do surat i mangihutton huruf dohot bahasa na dipakke di ganup provinsi. Disurat do i di bagasan goar ni Raja Ahasweros jala dicap ma i mamakke cincin ni raja.+

13 Dung i, disuru ma akka halak lao mamboan surat i tu sude provinsi di harajaon i. Di surat i, didok do asa dipamate sude halak Jahudi di bagasan sadari, i ma di ari pasappulu toluhon, di bulan Adar+ bulan na pasappulu duahon i. Dang adong na boi dipasombu mangolu, mulai sian na poso, na matua, dakdanak, dohot borua. Jala ikkon dibuat do sude arta ni nasida.+ 14 Dibahen ma isi ni surat i gabe hukum di ganup provinsi jala dipaboa ma i tu sude bangso asa boi nasida rade di ari i. 15 Disuru raja do asa hatop+ lao akka halak na mamboan surat i. Jala dipaboa ma paretta i di istana Susan.*+ Dung i, minum-minum ma raja dohot si Haman, hape nungnga gaor be kota Susan.*

4 Dung dibege si Mordahai+ sude na masa i,+ diribak ibana ma abitna, dipakke ma abit goni jala dibahen ma orbuk tu uluna. Lao ma ibana tu tonga-tonga ni kota i, jala mangandungi ma ibana disi. 2 Alai holan sahat tu gerbang ni istana do ibana mardalan. Ai dang boi manang ise pe na marabit goni masuk sian gerbang ni istana ni raja. 3 Marlungun ni roha ma sude halak Jahudi na adong di sude provinsi+ alani paretta ni raja i. Marpuasa ma nasida,+ tangis jala mangandungi. Godang do na mamakke abit goni jala hundul di orbuk.+ 4 Ro ma pangurupi ni si Ester, borua dohot bawa* mandapotton ibana jala dipaboa ma na masa i. Gabe lungun ma roha ni ratu i. Dung i, dilehon ratu i ma abit tu si Mordahai asa unang dipakke ibana be abit goni i. Alai dang olo si Mordahai. 5 Dijou si Ester ma si Hatak, i ma sahalak kepala* di inganan ni akka borua. Ibana do na dipillit lao mangurupi ratu. Disuru si Ester ma ibana manukkun tu si Mordahai boasa dibahen ibana songon i jala aha do na masa.

6 Dijuppangi si Hatak ma si Mordahai tu tano lapang ni kota na di jolo ni gerbang istana. 7 Dipaboa si Mordahai ma sude na masa i tu ibana. Jala dipaboa ibana do sadia godang hepeng+ na dilehon si Haman tu inganan panimpanan ni arta ni raja lao pamatehon halak Jahudi.+ 8 Dung i dilehon si Mordahai ma surat tu ibana na marisi paretta lao mambunu sude halak Jahudi. Jala nungnga dipaboa paretta i tu sude jolma na di Susan.*+ Disuru si Mordahai ma asa dipatudu si Hatak surat i tu si Ester jala dipatorang.+ Disuru do muse asa lao si Ester manjuppangi raja mangido asa marasi ni roha raja i tu bangsona.

9 Lao ma si Hatak mandapotton si Ester jala dipaboa ma sude na didok si Mordahai tu ibana. 10 Dung i, disuru si Ester ma asa didok si Hatak tu si Mordahai,+ 11 “Adong do sada hukum na mandok, ikkon dipamate do bawa manang borua na masuk tu alaman na adong di bagasan istana ni raja+ molo dang dijou. Sude do pegawai ni raja dohot rakyat di provinsi ni harajaon on mamboto i. Alai, molo dibahen raja i do tukkot masna i+ tu ibana dang dipamate ibana. Hape au sandiri pe nungnga 30 ari dang dijou raja.”

12 Dung dipaboa tu si Mordahai na nidok ni si Ester i, 13 didok si Mordahai ma, “Unang dirippu ho ala keluarga ni raja ho, gabe malua ho tikki dipamate sude halak Jahudi. 14 Molo so olo pe ho makkatai tu raja, boi do sian na asing+ mangurupi halak Jahudi asa unang dipamate. Alai ho dohot keluarga ni bapakmu, mate ma hamu. Ai dang binoto, atik naeng paluahon halak Jahudi do umbahen na gabe ratu ho.”+

15 Didok si Ester ma tu si Mordahai, 16 “Papungu ma sude halak Jahudi na di Susan* jala marpuasa ma hamu+ alani au. Unang ma mangan manang na minum hamu saleleng tolu ari,+ arian nang borngin. Au pe marpuasa do rap dohot akka borua hatobanku. Nang pe mangalo hukum, hujuppangi pe raja i. Molo ikkon mate pe au, mate pe taho.” 17 Dung i lao ma si Mordahai jala diulahon ma sude na nidok ni si Ester i.

5 Di ari na patoluhon,+ dipakke si Ester ma baju harajaonna jala jongjong di alaman na adong di bagasan istana ni raja. Hundul do raja di tahtana jala di jolo ni tahta i do pintu masuk. 2 Tikki diida raja jongjong si Ester di alaman i, las ma rohana. Dibahen raja ma tukkot masna+ tu si Ester. Dipajonok si Ester ma jala dijama ma ujung ni tukkotna i.

3 Disukkun raja i ma tu ibana, “Aha na porlu Ratu Ester? Aha pangidoanmu? Molo dipangido ho pe satonga ni harajaokkon, lehonokku do i tu ho!” 4 Didok si Ester ma, “Molo denggan di roha ni raja, ro ma raja i rap dohot si Haman+ sadari on tu pesta naung huparade.” 5 Dung i, didok raja i ma, “Suru ma hatop ro si Haman, songon pangidoan ni si Ester.” Ro ma raja i dohot si Haman tu pesta naung diparade ni si Ester.

6 Tikki manginum anggur nasida di pesta i, didok raja i ma tu si Ester, “Paboa ma aha na pinangidom, asa hulehon. Tung dipangido ho pe satonga ni harajaokkon, lehonokku do i tu ho!”+ 7 Dialusi si Ester ma, “On do pangidoakku, 8 molo lomo do roha ni raja i jala molo olo do raja i mangalehon pangidoakku, ro ma raja i rap dohot si Haman marsogot tu pesta na huparade. Jala marsogot ma hupaboa aha pangidoakku.”

9 Sonang jala las ma roha ni si Haman mulak sian i. Tikki na mulak i, diida ibana ma si Mordahai di gerbang ni istana ni raja. Dang jongjong si Mordahai jala dang adong dipatudu na mabiar ibana tu si Haman. Gabe muruk situtu ma si Haman mangida si Mordahai.+ 10 Alai ditahan si Haman ma mohop ni rohana jala mulak ma ibana tu jabuna. Dijou ibana ma akka donganna dohot si Zeres+ istrina. 11 Dipaboa-boa si Haman ma hamoraonna dohot godang ni anakna.+ Jala dipaboa-boa ibana do na dibahen raja i untimbo jabatanna sian akka pejabat dohot sian akka pegawai ni raja na asing.+

12 Didok si Haman ma muse, “Asing ni i, holan au do na dijou Ratu Ester mandongani raja i tu pesta na diparadena i.+ Dijou do au muse marsogot asa rap mangan dohot nasida.+ 13 Alai hurang do las ni rohakku saleleng huida dope hundul si Mordahai halak Jahudi i di gerbang istana ni raja.” 14 Dung i didok si Zeres dohot akka dongan ni si Haman ma, “Bahen ma tiang na timbona hira-hira 22 meter.* Jala manogot, dokkon ma tu raja asa digattung si Mordahai tusi.+ Dung i, lao ma ho rap dohot raja tu pesta marsonang-sonang.” Las ma roha ni si Haman mambege i, jala disuru ma asa dibahen tiang i.

6 Di borngin i, dang boi raja modom. Alani i disuru ibana ma asa dibuat bukku sejarah ni harajaon+ jala dijaha di jolona. 2 Disurat do na niulahon ni si Mordahai di bukku i. Dipaboa ibana do taringot si Bigtan dohot si Teres na naeng pamatehon Raja Ahasweros.+ Pejabat ni raja na manjaga pintu do nasida na dua. 3 Gabe disukkun raja i ma, “Aha do upa naung dilehon tu si Mordahai? Nungnga sangap ibana dibahen?” Didok pejabat na mangurupi raja i ma, “Dang adong dope na dilehon dohot na dibahen tu ibana.”

4 Didok raja ma muse, “Ise do na di alaman i?” Ai nungnga sahat si Haman di alaman na di luar+ ni istana ni raja. Naeng pangidoonna do tu raja, asa digattung si Mordahai tu tiang naung dibahen ibana.+ 5 Didok pejabat na mangurupi raja i ma, “Si Haman+ do na di alaman i.” Didok raja i ma, “Suru ma ibana masuk.”

6 Dung masuk si Haman, didok raja ma, “Molo naeng pasangapon ni raja sasahalak, aha do na ikkon bahenon tu ibana?” Didok si Haman ma di bagasan rohana, “Ise be huroha na naeng dipasangap raja i? Pasti au do i.”+ 7 Dung i, didok si Haman ma tu raja, “Molo naeng pasangapon ni raja sasahalak, 8 suru ma asa diboan baju harajaon+ na dipakke raja dohot hoda ni raja na mamakke perhiasan di uluna. 9 Dung i pasahat ma baju dohot hoda i tu sahalak sian pejabat ni raja na ussangap. Dipakkehon ibana ma baju i tu halak na naeng dipasangap raja i. Nakkok ma halak na naeng dipasangap i tu hoda jala mardalan di lapangan ni kota. Adong ma akka halak na mardalan di jolona huhut mandok, ‘On do na ikkon dibahen tu halak na naeng pasangapon ni raja!’”+ 10 Pittor didok raja i ma tu si Haman, “Hatop! Buat ma baju dohot hoda i. Ulahon ma sude na nidokmi tu si Mordahai, halak Jahudi na hundul di gerbang ni istana. Unang adong sian na nidokmi na so diulahon ho.”

11 Dung i dibuat si Haman ma baju dohot hoda i jala dipakkehon ma i tu si Mordahai.+ Dipanakkok ma si Mordahai tu hoda i jala mardalan di lapangan ni kota. Mardalan ma si Haman di jolona huhut mandok, “On do na ikkon dibahen tu halak na naeng pasangapon ni raja!” 12 Dung sae i, mulak ma si Mordahai tu gerbang ni istana ni raja. Alai pittor mulak do si Haman tu jabuna. Haccit hian ma rohana jala ditutup ma uluna alani ilana. 13 Dung i dipaboa si Haman ma na masa i tu si Zeres istrina,+ dohot tu sude donganna. Didok penasehatna dohot istrina ma, “Nungnga ussangap be saonari si Mordahai sian ho. Molo halak Jahudi do ibana, dang tolapmu be mangalo ibana. Talu nama ho.”

14 Tikki makkatai dope nasida, sahat ma akka pejabat istana disi. Jala diboan ma si Haman tu pesta na dibahen Ratu Ester.+

7 Dung i, ro ma raja dohot si Haman+ tu pesta na dibahen Ratu Ester. 2 Tikki minum anggur nasida di pesta na paduahon i, didok raja ma muse tu Ratu Ester, “Aha na porlu Ratu Ester? Aha pangidoanmu? Molo dipangido ho pe satonga ni harajaokkon, lehonokku do i tu ho!”+ 3 Didok Ratu Ester ma, “Molo lomo do roha ni raja i tu au, jala molo olo do raja mangalehon pangidoakku, palua ma au jala asi ma roham tu bangsokku.+ 4 Ai nungnga digadis hami.+ Lao dipamate do au dohot bangsokku, jala dang adong na boi mangolu.+ Dang pola boha dohonokku molo holan gabe hatoban bawa dohot hatoban borua hami. Alai molo dipasombu do hami dipamate, gabe rugi do raja alani i.”

5 Dung i didok Raja Ahasweros ma tu Ratu Ester, “Ise halak na barani mambahen songon i? Jala didia ibana?” 6 Didok Ratu Ester ma, “On do musu i, si Haman na jahat on.”

Gabe mabiar ma si Haman mangida raja dohot ratu i. 7 Ditinggalhon raja ma pesta i jala lao ma ibana tu taman ni istana. Jongjong ma si Haman jala dipangido ibana ma asa asi roha ni Ratu Ester tu ibana. Ai diboto ibana do hukumon ni raja i nama ibana. 8 Dung i, ro ma muse raja tu pesta i. Diida ibana ma si Haman di labbung ni si Ester jala ditiop si Haman do si Ester. Gabe didok raja ma, “Bah naeng perkosaonmu do ratu i di istanakku?” Dung didok raja songon i, ditutup ma bohi ni si Haman. 9 Didok si Harbona+ sahalak pejabat ni raja ma, “Nungnga dibahen si Haman sada tiang di jabuna. Timbona, hira-hira 22 meter.* Naeng digattung ibana do si Mordahai+ tusi, i ma halak na hea paluahon raja i.”+ Gabe didok raja ma, “Gattung ma si Haman tusi.” 10 Digattung nasida ma si Haman tu tiang naung dibahen lao manggattung si Mordahai. Dung i, dang muruk be raja i.

8 Laos di ari i, dilehon Raja Ahasweros ma sude arta ni si Haman,+ musu ni halak Jahudi i+ tu Ratu Ester. Jala ro ma si Mordahai tu jolo ni raja, ai nungnga dipaboa Ratu Ester na keluargana do si Mordahai.+ 2 Dibukka raja ma cincinna,*+ jala dilehon ma i tu si Mordahai. Ai nungnga dibuat cincinna i sian si Haman. Dung i, disuru si Ester ma si Mordahai mangurus sude arta ni si Haman.+

3 Ro ma muse Ratu Ester tu jolo ni raja. Marsinggang ma ibana tu jolo ni raja huhut tangis. Dipangido ibana ma asa disundati raja paretta ni si Haman halak Agag i taringot tu halak Jahudi.+ 4 Disurdukkon raja i ma tukkot masna tu si Ester.+ Hehe ma si Ester jala jongjong di jolo ni raja. 5 Didok ibana ma, “Molo denggan di roha ni raja i, molo asi do roha ni raja tu au, jala molo lomo do roha ni raja tu au, bahen ma surat na manundati paretta na disurat ni si Haman+ anak ni si Hamedata halak Agag i.+ Ai diparettahon ibana do asa dipamate sude halak Jahudi di sude provinsi di harajaonmu. 6 Tarpaida-ida au ma dipamate bangsokku? Jala tarpaida-ida au ma dipamate keluargakku?”

7 Dung i didok Raja Ahasweros ma tu Ratu Ester dohot tu si Mordahai halak Jahudi i, “Nungnga hulehon sude arta ni si Haman tu si Ester.+ Jala nungnga hugattung si Haman tu tiang,+ ala naeng dipamate ibana halak Jahudi. 8 Saonari, bahen ma surat di bagasan goar ni raja lao paluahon halak Jahudi. Cap ma surat i mamakke cincin ni raja asa sah. Ai dang adong na boi manundati surat na dibahen di bagasan goar ni raja jala naung dicap mamakke cincin ni raja.”+

9 Alani i, dijou ma akka sekretaris ni raja di ari paduapulu toluhon, di bulan na patoluhon, i ma bulan Sipan.* Disurat nasida ma sude paretta ni si Mordahai. Dikirim ma i tu halak Jahudi, tu akka kepala ni gubernur,+ tu akka gubernur dohot tu pejabat ni provinsi+ mulai sian India sahat tu Etiopia, godangna 127 provinsi. Dibahen do surat i mangihutton huruf dohot bahasa na dipakke di ganup provinsi. Songon i ma nang tu halak Jahudi.

10 Disurat ma i di bagasan goar ni Raja Ahasweros jala dicap mamakke cincin ni raja.+ Disuru ma halak manaruhon surat i mamakke hoda ni harajaon,* asa hatop sahat surat i. 11 Songon on ma isi ni surat i: Dipaloas raja do sude halak Jahudi na di ganup kota marpungu lao mampartahatton diri ni nasida. Dipaloas do muse nasida pamatehon akka tentara, bangso, provinsi, borua, manang dakdanak na ro mangalo nasida. Jala dang boi dipasombu mangolu nanggo sahalak pe. Dung i, diloas do halak Jahudi mambuat arta ni nasida.+ 12 Diulahon ma paretta i di sude provinsi di harajaon ni Raja Ahasweros, di ari na pasappulu toluhon, di bulan na pasappulu duahon, i ma bulan Adar.*+ 13 Dibahen ma isi ni surat i gabe hukum di sude provinsi. Dipaboa ma hukum i tu sude bangso, asa sude halak Jahudi rade mangalo musu di ari i.+ 14 Disuru raja do asa hatop lao halak na mamboan surat i. Jala hoda ni harajaon do dipakke nasida. Dohot do hukum i dipaboa di Istana Susan.*+

15 Dung i lao ma si Mordahai sian jolo ni raja. Dipakke ibana do baju harajaon na sian linen na balau dohot na bottar. Dipakke ibana do jubah na sian kain linen na bagak jala na ungu.+ Jala dipakke ibana do mahkota mas na massai uli. Marsurak ma sude halak na di kota Susan* i alani las ni roha ni nasida. 16 Ai dang jadi be halak Jahudi dipamate. Sonang jala las situtu ma roha ni nasida. Jala sude ma halak pasangappon halak Jahudi. 17 Marpesta ma halak Jahudi di sude provinsi dohot kota na manjalo paretta dohot hukum ni raja i. Ai sonang jala las situtu do roha ni nasida. Godang ma halak na mandok dirina halak Jahudi,+ ai mabiar do nasida tu halak Jahudi.

9 Di ari na pasappulu toluhon di bulan na pasappulu duahon, i ma bulan Adar,*+ saut ma paretta dohot hukum ni raja.+ Naeng dipamate musu ma halak Jahudi. Alai dang songon i na masa, gabe halak Jahudi do na manaluhon nasida.+ 2 Marpungu ma sude halak Jahudi di akka kota na adong di provinsi na nirajaan ni Raja Ahasweros.+ Dipamate halak Jahudi ma sude musu na naeng mambunu nasida jala dang adong na boi manaluhon nasida. Ai mabiar do sude bangso mangida nasida.+ 3 Gabe sude ma halak mangurupi halak Jahudi, dohot ma i pejabat ni akka provinsi, akka kepala ni gubernur,+ akka gubernur, dohot akka pegawai na mangurus ulaon ni raja. Ai mabiar do nasida tu si Mordahai. 4 Nungnga marhuaso si Mordahai+ di istana ni raja jala lam tarbarita do ibana di sude provinsi. Ai nungnga lam balga huaso ni si Mordahai.

5 Dipakke halak Jahudi ma podang lao pamatehon sude musu ni nasida, jala dang dipasombu nasida mangolu nanggo sada. Dibahen halak Jahudi do manang aha lomo ni roha ni nasida tu akka musuna.+ 6 Dipamate halak Jahudi ma 500 bawa di Susan.*+ 7 Dipamate nasida do muse si Parsandata, si Dalpon, si Aspata, 8 si Porata, si Adalia, si Aridata, 9 si Parmasta, si Arisai, si Aridai, dohot si Waisata. 10 Nasida do anak ni si Haman, anak ni si Hamedata, musu ni halak Jahudi i.+ Nang pe dipamate anak ni si Haman na sappulu i, alai dang adong dibuat nasida artana.+

11 Sadari i, dipaboa ma tu raja sadia godang halak na dipamate di Susan.*

12 Dung i didok raja i ma tu Ratu Ester, “Haru di kota Susan,* dipamate halak Jahudi do 500 halak jala dipamate nasida do anak ni si Haman na sappulu i. Dang binoto dope aha na diulahon nasida di provinsi na asing.+ Molo adong dope pangidoanmu, lehonokku do i tu ho.” 13 Didok si Ester ma, “Molo denggan di roha ni raja i,+ paloas ma marsogot halak Jahudi na di Susan* mangulahon songon na diulahon nasida sadari on.+ Jala suru ma asa digattung bakke ni anak ni si Haman na sappulu i tu tiang.”+ 14 Diparettahon raja ma asa diulahon na nidok ni Ratu Ester i. Jala dipaboa ma i di kota Susan.* Dung i digattung ma akka bakke ni anak ni si Haman i tu tiang.

15 Marsogotna i, di ari na pasappulu opatton, di bulan Adar,+ marpungu ma muse halak Jahudi na di Susan.* Dipamate nasida ma 300 bawa na di Susan,* alai dang dibuat halak Jahudi arta ni nasida.

16 Halak Jahudi na di akka provinsi na asing pe marpungu do lao mampartahatton diri ni nasida.+ Dipamate nasida ma akka musu ni nasida,+ godangna 75.000 halak. Alai dang dibuat halak Jahudi arta ni akka musuna i. 17 Diulahon nasida ma i sude di ari na pasappulu toluhon di bulan Adar. Alai dang diulahon nasida be i di ari na pasappulu opatton. Marpesta jala marlas ni roha do nasida di ari i.

18 Alai anggo halak Jahudi na di Susan,* di ari na pasappulu limahon do nasida marpesta jala marlas ni roha. Ai marpungu dope nasida di ari na pasappulu toluhon+ dohot di ari na pasappulu opatton+ lao mangalo musu ni nasida. 19 Alani i, dibahen halak Jahudi na di kota na asing ma perayaan di ari na pasappulu opatton di bulan Adar. Marpesta, marlas ni roha,+ jala masileanan sipanganon ma nasida di ari i.+

20 Disurat si Mordahai+ ma sude na masa i. Dikirim ibana ma surat tu sude halak Jahudi na di sude provinsi di harajaon ni Raja Ahasweros, mulai sian na jonok sahat tu na dao. 21 Disuru ibana ma asa dirayahon nasida i ganup taon, di ari na pasappulu opatton dohot di ari na pasappulu limahon. 22 Ai di ari i dang ro be musu ni halak Jahudi mangganggu nasida. Di bulan i, muba do arsak ni roha ni nasida gabe las ni roha, jala lungun ni roha ni nasida+ muba gabe ari las ni roha. Marpesta jala marlas ni roha ma nasida di ari i. Masileanan sipanganon ma nasida jala dilehon ma hadiah tu na pogos.

23 Dioloi halak Jahudi do na sinurat ni si Mordahai. Jala olo do nasida toktong mangulahon perayaan songon naung diulahon nasida di ari i. 24 Ai naeng dipamate si Haman,+ anak ni si Hamedata halak Agag i+ do sude halak Jahudi, ala sogo rohana tu nasida.+ Dibahen ibana ma Pur,+ i ma undi* lao pamatehon halak Jahudi. Jala gabe mabiar ma sude halak Jahudi. 25 Alai tikki ro si Ester tu jolo ni raja, disurat raja ma paretta na mandok,+ “Tu si Haman ma masa hajahaton na lao bahenonna tu halak Jahudi.”+ Dung i, digattung ma ibana dohot akka anakna tu tiang.+ 26 Alani i do digoari perayaan i Purim, na sian hata Pur.*+ Dung dijaha halak Jahudi surat ni si Mordahai jala dung diida nasida na masa i, 27 ditottuhon nasida ma asa dirayahon na dua ari i ganup taon. Dohot do akka pinoppar ni nasida dohot halak na asing na gabe halak Jahudi mangarayahon i.+ Jala ulahonon ni nasida ma sude na disurat si Mordahai taringot tu perayaan i. 28 Ikkon ingoton ni nasida do perayaan na dua ari i. Jala sian tikki tu tikki ikkon dirayahon do perayaan i di ganup keluarga, provinsi, dohot kota. Dang boi lupa halak Jahudi mangulahon Perayaan Purim. Ikkon toktong do diulahon pinoppar ni nasida perayaan i.

29 Dung i, dipakke Ratu Ester, boru ni si Abihail dohot si Mordahai halak Jahudi i ma huaso ni nasida lao mambahen surat na paduahon taringot tu Purim. 30 Dikirim ma surat i tu sude halak Jahudi na adong di 127 provinsi+ di harajaon ni Raja Ahasweros.+ Lambok jala boi do dihaporseai isi ni surat i. 31 Surat i patoguhon Perayaan Purim na ikkon dirayahon di tikki naung ditottuhon. Nungnga sapandapot halak Jahudi dohot akka pinopparna mangulahon i+ mangihutton paretta+ ni si Mordahai dohot Ratu Ester. Asing ni i, ikkon marpuasa+ jala martangiang+ do nasida dohot pinoppar ni nasida. 32 Gabe sah ma Perayaan Purim i+ dung dibahen Ratu Ester paretta i. Jala disurat ma i di sada bukku.

10 Dibahen Raja Ahasweros ma kerja paksa akka halak na di luat i dohot akka halak na di pulo.

2 Sude ulaon ni si Mordahai,+ akka na denggan dohot na jago tarsurat do i di bukku sejarah+ taringot tu akka raja Media dohot Persia.+ Disurat do muse disi hasangapon na dilehon tu si Mordahai+ dung naik jabatan ibana dibahen raja. 3 Dukkon Raja Ahasweros, si Mordahai halak Jahudi i ma na untimbo jabatanna. Sangap jala lomo do roha ni halak Jahudi tu ibana. Toktong do diulahon si Mordahai na denggan asa sonang jala dame ngolu ni bangsona dohot pinoppar ni nasida.