JONA
1 Makkatai ma Jahowa tu si Jona*+ anak ni si Amittai. Didok ma, 2 “Lao ma ho tu Ninive,+ kota na balga i. Paboa ma na lao hukumokku nama pangisi ni kota i. Ai nungnga huida hajahaton ni nasida.”
3 Alai tu Tarsis do lao si Jona. Lari do ibana sian Jahowa. Lao ma ibana tu Joppe jala dapotna ma disi kapal na naeng lao tu Tarsis. Digarar ibana ma ongkosna. Jala lao ma ibana marlayar rap dohot nasida tu Tarsis. Lari do ibana sian Jahowa.
4 Dung i diparo Jahowa ma alogo na massai gogo di laut i. Gabe masa ma badai na massai gogo sappe naeng lonong nama kapal i. 5 Gabe mabiar ma akka anak buah ni kapal i. Dijou nasida ma debata ni nasida be mangido asa diurupi. Jala disappatton nasida ma akka barang na adong di kapal i tu laut, asa lam neang kapal i.+ Alai anggo si Jona, di bagian partoru ni kapal i do ibana. Jala renges do ibana modom disi. 6 Dung i ro ma kapten ni kapal i mandapotton ibana. Didok ma, “Tarhona dope ho modom. Dungo ho! Martangiang ho tu Debatam. Anggiat asi roha ni Debata na sittong tu hita asa unang mate hita.”+
7 Didok akka halak na di kapal i ma, “Beta, tabahen ma undi,+ asa taboto alani ise on masa.” Dung i, dibahen nasida ma undi, jala tarpillit ma si Jona.+ 8 Didok nasida ma tu si Jona, “Paboa jo tu hami, alani ho do on masa? Aha do karejom? Sian dia do ho? Didia do hutam? Halak aha do ho?”
9 Didok si Jona ma, “Halak Heber do au. Jahowa Debata na di surgo i do na huhabiari.* Ibana do na manoppa laut dohot darat.”
10 Gabe mabiar ma akka halak na di kapal i. Ai nungnga dipaboa si Jona na lari do ibana sian Jahowa. Dung i didok nasida ma tu ibana, “Boasa dibahen ho songon i?” 11 Didok nasida ma muse, “Aha do na ikkon bahenonnami tu ho asa so badai on?” Ai nungnga lam gogo alogo di laut i. 12 Didok ibana ma, “Sappatton ma au tu laut on. Dung i so do annon badai i. Ai huboto do alani salakku do umbahen na masa on tu hamu.” 13 Marsitutu ma akka halak na di kapal i mandayung kapal i asa boi diboan tu darat. Alai dang tolap nasida, ai nungnga lam balga badai i.
14 Didok nasida ma tu Jahowa, “Ale Jahowa, unang ma pamate hami alani bawa on. Unang ma suru hami martanggung jawab ala hupamate hami halak na so marsala. Ai on do lomo ni roham ale Jahowa.” 15 Dung i diangkat nasida ma si Jona jala disappatton ma tu laut. Gabe so ma badai di laut i. 16 Mabiar situtu ma akka halak na di kapal i tu Jahowa.+ Dilehon nasida ma pelean tu Jahowa. Jala marjanji ma nasida lao manomba Ibana.
17 Dibahen Jahowa ma asa diboddut dekke na balga si Jona. Gabe di butuha ni dekke ma si Jona saleleng tolu ari tolu borngin.+
2 Sian butuha ni dekke i,+ martangiang ma si Jona tu Jahowa Debatana. 2 Didok ibana ma,
“Tikki susa au, jou-jou do au tu Jahowa, jala dialusi Ibana do au.+
Jou-jou do au sian bagasan* Kuburan* asa diurupi,+
Jala ditangihon Ho do au.
3 Disappatton Ho do au tu inganan na bagas, tu tonga-tonga ni laut,
Holan aek nama di sakalilingku.+
Jala diauppon galumbang ni laut na balga i do au.+
4 Dung i hudok ma, ‘Nungnga dipalao Ho au sian jolom!
Boi dope huida bagas jorom na badia i?’
5 Nungnga naeng mate au, ai holan aek nama di sakalilingku.+
Maup do au tu bagasan laut na bagas,
Jala dililit rumput laut do ulukku.
6 Lonong do au sahat tu dasar ni laut.*
Jala dihurung do au di bagasan gerbang ni kuburan* saleleng ni lelengna.
Alai dipakaluar Ho do au sian kuburan, ale Jahowa Debatakku.+
7 Tikki naeng mate au, holan Ho do na huingot ale Jahowa.+
Jala ditangihon Ho do tangiakku sian bagas jorom na badia i.+
8 Molo akka halak na manomba patung na so marguna, ditinggalhon do Ho. Hape sai dipatudu Ho do holong ni roham* tu nasida.*
9 Alai anggo au, dokkonokku do mauliate tu Ho jala lehonokku do pelean tu Ho.
Pasautokku do sude janjikku,+
Ai sian Jahowa do ro haluaon.”+
10 Dung i disuru Jahowa ma asa diutahon dekke i si Jona tu darat.
3 Makkatai ma muse Jahowa tu si Jona. Didok ma,+ 2 “Lao ma ho tu Ninive+ kota na balga i, paboa ma tu pangisi ni kota i barita na hupasahat tu ho.”
3 Dioloi si Jona ma na nidok ni Jahowa i,+ lao ma ibana tu Ninive.+ Kota na massai balga do Ninive.* Ikkon tolu ari ma mardalan pat lao makkalilingi* kota i. 4 Dung i masuk ma si Jona tu kota i, mardalan ma ibana sadari jala didok ma, “Opat pulu ari nai na lao dihancurhon nama kota Ninive on.”
5 Gabe porsea ma halak Ninive tu Debata,+ marpuasa ma nasida jala dipakke nasida ma abit goni. Sude do mambahen songon i mulai sian na poso sahat tu na matua. 6 Dung dibege raja ni Ninive barita na pinaboa ni si Jona i, turun ma ibana sian tahtana jala dibukka ibana ma pakkean ni raja na pinakkena i. Dung i dipakke ibana ma abit goni jala hundul ma ibana di ginjang ni orbuk. 7 Asing ni i, dibahen ibana ma muse boa-boa di saluhut kota Ninive na mandok,
“On ma keputusan ni raja dohot akka pejabatna. Dang adong nanggo sada pe jolma manang binatang, lombu, biru-biru, manang hambing na boi mangallang manang aha pe. Dang boi nasida mangan dohot minum. 8 Sude jolma dohot binatang, ikkon marabit goni do nasida, ikkon martangiang do nasida tu Debata sian nasa rohana jala muba ma nasida sian ulaon ni nasida na jahat dohot na kejam. 9 Atik boha muba sakkap ni* Debata na sittong jala dang jadi Ibana muruk tu hita asa unang mate hita.”
10 Diida Debata na sittong ma na binahen ni nasida, nungnga muba nasida sian sude hajahaton ni nasida.+ Gabe muba ma sakkap ni* Debata, jala dang saut be diparo Ibana jea tu nasida.+
4 Alai gabe sogo do roha ni si Jona jala massai muruk do ibana. 2 Martangiang ma ibana tu Jahowa, didok ma, “Ale Jahowa, on ma na huhabiari tikki di hutakku dope au. Alani i do lao au tu Tarsis+ di mulana i, ai huboto do Debata na burju do Ho jala parasi roha, lambat do Ho tarrimas jala gok do holong ni roha*+ na pinatudum, dang lomo roham parohon jea. 3 Saonari, bulus ma pamate au ale Jahowa. Ai tumagon nama au mate, dang olo be au mangolu.”+
4 Didok Jahowa ma, “Boasa ma gabe muruk ho tu Au?”
5 Dung i, lao ma si Jona sian kota i jala hundul ma ibana di sabola timur ni kota i. Dibahen ibana ma sopo-sopona jala hundul ma ibana disi lao mangida aha na lao masa tu kota i.+ 6 Dung i dibahen Jahowa ma tubu labu di ginjang ni sopo-sopo i, asa linggom si Jona jala asa lambok dihilala ibana. Gabe las ma roha ni si Jona alani labu i.
7 Di manogotna i, diparo Debata na sittong ma gilok-gilok lao manegai labu i, ujungna gabe malos ma i. 8 Tikki bissar mataniari, diparo Debata ma alogo na mohop sian timur. Lam posi ma mataniari i dihilala si Jona, sappe naeng pingsan nama ibana. Sai torus ma dipangido ibana asa mate ibana, jala torus ma didok ibana, “Tumagon ma au mate, dang olo be au mangolu.”+
9 Didok Debata ma tu si Jona, “Sittong do didok roham gabe muruk ho tu Au alani labu i?”+
Didok si Jona ma, “Ba muruk ma au attong. Sappe naeng mate nama au alani murukku.” 10 Alai didok Jahowa ma, “Asi do roham tu labu i, hape so ho na manuan i, jala dang ho na mambahen i tubu. Di bagasan saborngin do i tubu, jala di bagasan saborngin do i mate. 11 Lam boha ma so asi rohakku tu Ninive kota na balga i.+ Ai adong do disi lobi sian 120.000 halak na so mamboto dia na sittong dohot na sala,* asing dope binatang ni nasida na godang i.”+
Lapatanna, “Darapati”.
Manang “husomba”.
As. “sian butuha ni”.
Manang “Syeol”. Ida di Kamus.
As. “dasar ni akka dolok”.
As. “gerbang ni tano on”.
Manang “holong na manoktong”. Ida di Kamus.
Manang boi do “Jala dang setia nasida”.
As. “Ninive di jolo ni Debata”.
Manang “mandalani”.
Manang “Atik boha manolsoli”.
Manang “Gabe manolsoli ma”.
Manang “holong na manoktong”. Ida di Kamus.
Manang “dia tangan kanan dohot tangan kiri”.