SURAT NA PARJOLO SIAN SI PETRUS

1 Sian si Petrus apostel+ ni Jesus Kristus mandapotton akka na tarpillit na manoppang jala na marserak di Pontus, Galatia, Kappadosia,+ Asia, dohot Bitinia. 2 Dipillit Debata Ama i+ do hamu hombar tu sakkapna hian. Dipabadia do hamu marhite tondi parbadia+ asa gabe pangoloi jala ias hamu marhite mudar ni Jesus Kristus.+

Anggiat ma lam tamba asi ni roha ni Debata na massai balga i dohot hadameonna di hamu.

3 Tapuji ma Debata, Ama ni Tuanta Jesus Kristus. Ai marhite asi ni rohana na balga i ditubuhon do hita muse,+ asa lam pos rohatta tu janji+ ni Debata marhite haheheon ni Jesus Kristus sian na mate.+ 4 Dilehon Ibana do tu hita warisan* na so olo busuk, na so ramun* jala na so olo sega.+ Disippan do warisan i di banua ginjang lao tu hamu.+ 5 Ala porsea hamu, dilinggomi huaso ni Debata ma hamu asa dapotmuna haluaon na naeng dipapatar di ujung ni jaman on. 6 Alani i ma hamu marlas ni roha situtu, nang pe ikkon marsitaonon hamu satokkin alani marragam hasusaan.+ 7 Molo dung dipapatar Jesus Kristus,+ parohon pujian, hamuliaon, dohot hasangapon do haporseaonmuna+ naung taruji i. Ummarga do i sian mas na olo sega nang pe naung ditutung* mas i dohot api. 8 Nang pe dang hea diida hamu ibana, dihaholongi hamu do ibana. Nang pe dang diida hamu ibana saonari, dipatuduhon hamu do haporseaon tu ibana jala marlas ni roha situtu do hamu, i ma las ni roha na balga jala na so tarhatahon. 9 Ai pos do rohamuna dapotmuna haluaon i alani haporseaon.+

10 Haluaon i do na manat dilului jala diparsiajari akka panurirang.* Dipaboa nasida do taringot tu asi ni roha ni Debata na massai balga i na dipatudu Ibana tu hamu.+ 11 Sai dilului nasida do aha na lao masa tu Kristus+ jala andigan i masa. Ai nungnga dipaboa tu nasida marhite panogu-noguon ni tondi parbadia taringot tu sitaonon ni Kristus+ dohot hasangapon na lao jaloonna. 12 Dipaboa Debata do tu akka panurirang i, na tu hamu do nasida marhobas dang tu diri nasida. Nungnga dibege hamu barita na uli sian halak na paboahon i marhite panogu-noguon ni tondi parbadia na sian banua ginjang.+ Taringot i ma na dipaboa Debata tu akka panurirang i. Jala lomo situtu do roha ni akka suru-suruan mamareso i.

13 Parade hamu ma rohamuna asa marsitutu mangulahon akka ulaon.+ Jaga hamu ma pikkiranmuna asa toktong torang.+ Jala maima-ima ma hamu tu asi ni roha ni Debata na massai balga i. Jaloonmuna ma i molo dung dipapatar Jesus Kristus. 14 Songon dakdanak pangoloi ma hamu, unang be olo hamu dirajai sakkap ni rohamuna najolo tikki dang ditanda hamu dope Debata. 15 Alai songon Debata Nabadia na manjou hamu, badia ma hamu di sude parniulaonmuna.+ 16 Songon na nidok ni na tarsurat i, “Ikkon badia do hamu, ai badia do Au.”+

17 Molo martangiang hamu tu Ama i, marpangalaho ma hamu mardongan biar+ tu Debata saleleng manoppang hamu di portibi on. Ai diuhumi Ibana do sude jolma hombar tu pambahenanna+ jala dang marimbar jolma di Ibana. 18 Ai diboto hamu do, nungnga dipalua hamu sian dalan ngolu na so marlapatan naung dijalo hamu sian akka ompumuna.* Jala dang akka na olo sega songon perak manang mas na paluahon*+ hamu sian i. 19 Alai mudar ni Kristus+ na arga i+ do na paluahon hamu, na songon mudar ni anak ni biru-biru+ na so adong cacatna jala na ias. 20 Tutu, nungnga dipillit Debata ibana andorang so adong dope portibi on.*+ Alai dipapatar do ibana di ujung ni jaman on alani hamu.+ 21 Marhite ibana do hamu porsea tu Debata,+ na pahehehon ibana sian na mate+ jala na mangalehon hamuliaon tu ibana,+ asa porsea hamu jala pos rohamuna tu Debata.

22 Ala nungnga badia hamu saonari marhite mangoloi hasittongan i, gabe sian ias ni roha ma* hamu makkaholongi akka dongan.+ Alani i, marsihaholongan ma hamu sian nasa roha.+ 23 Ai nungnga ditubuhon hamu muse,+ dang sian boni na olo busuk alai sian boni+ na so olo busuk do, i ma marhite hata ni Debata na mangolu jala na manoktong.+ 24 “Ai songon duhut-duhut do sude jolma jala songon bunga na di ladang do sude hamuliaonna. Malos do akka duhut-duhut jala marurus do akka bunga, 25 alai hot do hata ni Jahowa* saleleng ni lelengna.”+ Jala “hata” na nidokna, i ma barita na uli na dipaboa tu hamu.+

2 Alani i bolokkon ma sian dirimuna akka ulaon na jahat,+ manipu, roha na munafik, mangiburu, dohot hata na paroa-roahon na asing. 2 Songon poso-poso na baru tubu+ ma hamu na mauas tu susu na so marcampur, i ma hata ni Debata. Asa gabe magodang hamu jala mandapot haluaon.+ 3 Ai nungnga dihilala* hamu haburjuon ni Tuan i.

4 Ibana do batu na mangolu i na dibolokkon akka jolma,+ alai arga do ibana di Debata jala ibana do na pinillitna.+ Molo ro hamu tu ibana, 5 gabe batu na mangolu ma hamu. Bahenonna ma hamu gabe jabu+ na dipajongjong marhite tondi parbadia ni Debata, jala papulikonna ma hamu lao gabe malim ni Debata. Dung i, marhite panogu-noguon ni tondi parbadia, lehononmuna ma pelean+ na dihalomohon Debata marhite Jesus Kristus.+ 6 Ai didok do di Surat na Badia i, “Hupillit do sada batu parsuhi-suhi na arga jala hupeakkon ma i gabe fondasi di Sion. Jala manang ise na porsea tu ibana dang hea gabe maila.”+

7 Arga do ibana di hamu ala porsea hamu tu ibana. Alai di akka na so porsea, “batu na dibolokkon+ akka tukkang nungnga gabe batu parsuhi-suhi* na rumikkot”+ 8 jala “gabe batu na mambahen halak tartuktuk dohot batu na mambahen halak madabu”.+ Tartuktuk do nasida ala dang dioloi nasida hata ni Debata. Jala on ma ujung ni nasida. 9 Alai hamu do “bangso na tarpillit, akka malim na laos gabe raja, bangso na badia,+ bangso ni Debata,+ na paboahon taringot hamuliaonna”.*+ Ai Ibana do na manjou hamu kaluar sian na holom tu na tiur na mambahen longang roha.+ 10 Dang bangso ni Debata hian hamu, alai nungnga gabe bangsona hamu saonari.+ Dang dijalo hamu hian asi ni roha ni Debata, alai nungnga dijalo hamu asi ni rohana i saonari.+

11 Hamu akka dongan na huhaholongi, hupangido ma tu hamu asa toktong dipadao+ hamu dirimuna sian hisap-hisap ni daging na marporang mangalo hamu.+ Ai halak na asing jala panoppang do hamu di portibi on.+ 12 Toktong ma denggan pangalahomuna di tonga-tonga ni akka bangso.+ Asa molo didok nasida hamu mambahen na jahat, idaon ni nasida ma pambahenanmuna na denggan i.+ Alani i pujion ni nasida ma Debata di ari panguhumanna i.

13 Alani Tuan i, oloi hamu ma sude pamaretta.+ Oloi ma raja,+ ai untimbo do huasona sian hamu. 14 Oloi ma nang akka gubernur na sinuruna lao mambahen hukuman tu akka na mangulahon na jahat jala na mamuji akka na mangulahon na denggan.+ 15 Ai on do lomo ni roha ni Debata, ulahon hamu ma na denggan, asa boi pasoonmu hata-hata haotoon ni* halak na so marroha.+ 16 Akka halak na merdeka do hamu,+ alani i unang ma pakke hamu i gabe sidalian lao mangulahon na sala.+ Alai gabe akka hatoban ni Debata ma hamu.+ 17 Pasangap hamu ma sude jolma,+ haholongi ma sude dongan sahaporseaon,+ habiari ma Debata,+ jala pasangap ma raja.+

18 Ikkon unduk do akka parkarejo tu tuan ni nasida mardongan biar ni roha.+ Dang holan tu tuan na burju jala na denggan marroha, alai dohot do tu tuan na kejam. 19 Ai las do roha ni Debata molo martahan sasahalak tikki dibahen na haccit tu ibana jala manaon hasusaan* ala dioloi ibana* Debata.+ 20 Aha ma labana molo martahan hamu dipukkuli ala mangulahon dosa?+ Alai molo martahan hamu manaon hasusaan ala mangulahon na denggan, las do roha ni Debata.+

21 Ai tusi do hamu dijou, ai Kristus pe marsitaonon do alani hamu.+ Ditadikkon do sitiruon tu hamu asa diihutton hamu bogas ni patna.+ 22 Dang mardosa ibana+ jala dang hea ibana margabus.+ 23 Tikki dileai ibana, dang dibalos ibana mangaleai.+ Tikki marsitaonon ibana,+ dang diancam ibana halak na mambahen sitaonon i.+ Alai dipasahat do dirina tu Debata na tigor* manguhumi.+ 24 Diboan ibana do akka dosatta+ di bagasan dagingna tikki dipakkuhon ibana tu hau i,+ asa dipalua hita sian akka dosatta jala mangolu lao mangulahon na sittong.* Jala “alani lukkana i do malum hamu”.+ 25 Ai songon biru-biru na lilu do hamu najolo.+ Alai saonari, nungnga mulak hamu tu parmahan i+ dohot tu na mangaramoti ngolumuna.

3 Songon i ma nang hamu akka istri, unduk ma hamu tu suamimuna.+ Asa molo adong sian nasida na so mangoloi hata ni Debata, gabe porsea ma nasida+ tu hata i alani pangalahomuna, so pola didok hamu manang aha. 2 Ai idaon ni nasida ma pangalahomuna na denggan*+ dohot unduk ni rohamuna. 3 Unang ma sian luar dipabagak-bagak hamu dirimuna, marhite mandandan obuk, mamakke perhiasan na sian mas,+ manang mamakke pakkean na arga. 4 Alai rohamuna i ma pabagak hamu marhite perhiasan na so olo sega, i ma roha na lambok jala na dame,+ ai i do na arga di Debata. 5 Ai songon i do akka borua na badia najolo mandandani diri nasida, i ma akka borua na marpos ni roha tu Debata. Unduk do nasida tu suami ni nasida. 6 Songon si Sara, dioloi ibana do si Abraham jala dijou do ibana tuan.+ Gabe akka boruna ma hamu molo toktong diulahon hamu na denggan jala dang talu tu biar ni roha.+

7 Songon i ma nang hamu akka suami, ikkon mangattusi do hamu tu istrimuna saleleng rap hamu. Sangap ma bahen hamu nasida,+ asa unang tarabbat tangiangmuna. Ai jolma na gale* do nasida, jala rap do nasida dohot hamu+ manjalo hangoluan silehon-lehon ni Debata.

8 Ujungna, saroha* ma hamu sude,+ sapakkilalaan, marsihaholongan, marasi ni roha,+ jala marserep ni roha.+ 9 Unang ma balos hamu na jahat dohot na jahat+ manang issak-issak dohot issak-issak.+ Alai balos hamu ma na jahat dohot na denggan,+ ai tusi do hamu dijou asa dapotmuna pasu-pasu.

10 Ai “manang ise na makkaholongi hangoluan jala naeng sonang, ikkon jagaonna do pamanganna sian na jahat+ jala unang ma dihatahon gabus. 11 Dipasiding ibana ma akka ulaon na jahat+ jala diulahon ma na denggan.+ Mardame ma ibana jala marsitutu ma asa toktong mardame.+ 12 Ai diparrohahon Jahowa* do halak na mangulahon na sittong* jala ditangihon do pangidoan ni nasida.+ Alai sogo do roha ni Jahowa* tu akka halak na mangulahon na jahat”.+

13 Sasittongna, ise ma na mambahen na jahat tu hamu molo marsitutu do hamu mangulahon na denggan?+ 14 Alai nang pe marsitaonon hamu ala mangulahon na sittong, dapotmuna do las ni roha.+ Unang ma habiari hamu manang aha na mambahen halak mabiar* jala unang ma ganggu rohamuna.+ 15 Pos ma rohamuna, Kristus i do Tuan jala badia do ibana. Sai rade ma hamu mangalusi sude halak na manukkun hamu taringot tu haporseaonmuna. Alai lambok ma alusi hamu+ jala sangap ma nasida bahen hamu.+

16 Marsitutu ma hamu asa toktong denggan panggora ni rohamuna,+ asa maila halak na mandok manang aha pe lao paroa-roahon hamu,+ dung diida nasida parniulaonmuna na denggan ala siihutton Kristus hamu.+ 17 Molo diloas Debata hamu marsitaonon ala mangulahon na denggan,+ tumagon ma i sian marsitaonon hamu ala mangulahon na jahat.+ 18 Ai Kristus na mangulahon lomo ni roha ni Debata pe, mate do ibana alani akka parjahat.+ Holan sahali do ibana mate ro di saleleng ni lelengna+ lao manobus dosa jala manogu-nogu hamu tu Debata.+ Mate dibunu do ibana,+ alai dipahehe lao mangolu di banua ginjang.+ 19 Dung hehe ibana, lao ma ibana marbarita tu akka suru-suruan na jahat na dihurung.+ 20 Nasida ma akka suru-suruan na so mangoloi tu Debata di tikki ni si Noak.+ Di tikki i, sabar do Ibana paimahon si Noak paturehon parau i.+ Otik do jolma di bagasan parau i, holan ualu halak* ma na malua sian banjir* i.+

21 Akka na masa di tikki i manggombarhon pandidion, na paluahon hamu nuaeng marhite haheheon ni Jesus Kristus. Pandidion i dang na lao paiasson pamatangmuna sian na kotor, alai lao mangido panggora ni roha na denggan do sian Debata.+ 22 Di sabola kanan ni Debata do Jesus+ dung nakkok tu banua ginjang, jala dipatunduk ibana ma akka suru-suruan dohot akka parhuaso.+

4 Ai nungnga marsitaonon Kristus i di pardagingon,+ alani i parade hamu ma dirimuna asa songon Kristus pikkiranmuna. Ai manang ise naung marsitaonon di pardagingon, dang ulahononna be dosa.+ 2 Alani i, sadia leleng nai pe ibana mangolu di pardagingon, lomo ni roha ni Debata ma ihuttononna+ dang lomo ni roha ni jolma.+ 3 Nungnga godang dipakke hamu tikkimuna najolo mangihutton lomo ni roha ni akka bangso.+ Diulahon hamu do ulaon ni halak na so umboto ila,* hisap-hisap ni daging, mabuk, marpestai sahat tu na mabuk,* martaru minum, jala manomba akka patung.+ 4 Gabe longang ma roha ni nasida ala dang dohot be hamu mangihutton parngoluon ni nasida na so hasea. Alani i, diissaki nasida ma hamu.+ 5 Alai hukumonna ma nasida hombar tu parniulaon ni nasida. Ai ibana do na manguhumi halak na mangolu dohot na mate.+ 6 Sasittongna, alani i ma umbahen na dohot dipaboa barita na uli tu halak na mate.*+ Asa molo diuhumi nasida di pardagingon mangihutton hukum ni jolma, boi ma nasida mangolu mangihutton panogu-noguon ni tondi parbadia di jolo ni Debata.

7 Alai nungnga jonok ujung ni saluhutna. Alani i, marroha ma hamu+ jala toktong ma ingot martangiang.+ 8 Na urrikkot sian saluhutna, marsitutu ma hamu marsihaholongan.+ Ai halak na marholong ni roha, rade do manalpuhon* hasalaan.+ 9 Rade ma hamu manjalo akka donganmuna, dang mardongan ungut-ungut.+ 10 Dilehon Debata do asi ni rohana na massai balga i tu akka naposona na burju marhite marragam cara. Alani i songon naposona na burju, pakke hamu ma silehon-lehon i lao mangurupi na asing.+ 11 Molo makkatai sasahalak, makkatai ma ibana songon na pasahatton hata ni Debata. Molo diurupi ibana donganna na asing, diulahon ma i mangasahon gogo ni Debata,+ asa sangap Debata+ di saluhutna marhite Jesus Kristus. Ai di Ibana do hasangapon dohot hamuliaon saleleng ni lelengna. Amen.

12 Hamu akka dongan na huhaholongi, unang ma sukkun-sukkun rohamuna molo masa tu hamu sitaonon na borat,+ hira na so hea masa sisongon i tu hamu. 13 Alai las ma rohamuna+ ala dohot hamu marsitaonon songon Kristus+ i, asa marlas ni roha situtu hamu tikki dipapatar hasangaponna i.+ 14 Las ma rohamuna+ molo dileai hamu alani goar ni Kristus i. Ai i do na patuduhon na adong di hamu tondi parbadia ni Debata na gogo i.

15 Unang ma adong sian hamu na marsitaonon ala mambunu, manakko, mangulahon na jahat, manang mangattoi na so ulaonna.+ 16 Alai manang ise na marsitaonon ala halak Kristen ibana, unang ma maila ibana.+ Toktong ma ibana pasangappon Debata huhut makkatindakkon goarna. 17 Ai nungnga juppang tikki naung ditottuhon lao manguhumi, parjolo ma i sian jabu ni Debata.+ Molo parjolo i masa tu hita,+ aha ma na masa tu akka halak na so mangoloi barita na uli sian Debata?+ 18 “Molo maol do malua akka halak na tigor marroha,* lam boha nama akka halak na so pasangappon Debata jala pardosa?”+ 19 Alani i, manang ise na marsitaonon ala mangulahon lomo ni roha ni Debata, toktong ma diulahon akka na denggan. Jala dipasahat ma dirina tu Sitoppa hita na setia i.+

5 Donganmuna sintua do au, huida do sitaonon ni Kristus i jala parsidohot do au manjalo hasangapon na lao dipapatar i.+ Mangelek-elek ma au tu akka sintua na adong di tonga-tongamuna: 2 Parmahani hamu ma biru-biru ni Debata+ na dipasahat tu hamu. Manat ma parrohahon hamu nasida songon tugas ni pengawas. Jala rade ma hamu mangulahon i songon lomo ni roha ni Debata,+ unang ma ala na tarpaksa. Sian ias ni rohamuna ma i ulahon hamu, unang ala naeng mangalului uttung.+ 3 Unang ma songon na mamaretta hamu tu biru-biru+ na dipasahat Debata tu hamu,+ alai gabe sitiruon ma hamu tu nasida. 4 Dung i, jaloonmuna ma mahkota hamuliaon+ na so boi sega i tikki dipapatar parmahan+ na sumurung i.

5 Songon i ma nang hamu akka bawa na upposo, unduk ma hamu tu akka bawa na uttua.*+ Alai sude ma hamu marserep ni roha maradoppon na asing. Ai dihasogohon Debata do ginjang ni roha, alai dipatuduhon Ibana do asi ni rohana na massai balga i tu halak na serep marroha.+

6 Patutoru hamu ma dirimuna tu toru ni tangan ni Debata na gogo i, asa dipatimbo Ibana hamu di tikki naung ditottuhon i.+ 7 Pasahat hamu ma sude holso ni rohamuna tu Ibana,+ ai diparrohahon do hamu.+ 8 Jaga ma hamu, toktong ma torang pikkiranmuna!+ Ai mardalani do musumuna Sibolis i songon singa na marauang mangalului siboddutonna.+ 9 Alo hamu ma Sibolis i marhite haporseaonmuna na togu.+ Ai diboto hamu do, akka dongan sahaporseaonmuna na di liat portibi on pe manaon sitaonon na songon i do.+ 10 Alai togu-toguon ni Debata na gok asi ni roha na massai balga i do hamu sahat tu ujungna. Ibana do na manjou hamu tu hasangaponna na manoktong i,+ asa marsada hamu dohot Kristus. Dung ditaon hamu satokkin hasusaan i, patoguonna,+ pargogoanna,+ jala pahotonna ma hamu. 11 Di Ibana ma hagogoon sahat tu saleleng ni lelengna. Amen.

12 Diurupi si Silwanus*+ do au mambahen surat na jeppek on tu hamu. Didok rohakku, sahalak dongan na setia do ibana. Hubahen do surat on lao patoguhon hamu, jala paposson rohamuna na tutu do asi ni roha ni Debata na massai balga i naung dipatudu Ibana tu hamu. Alani i, gomos ma i tiop hamu. 13 Sahat ma tabe sian donganta borua* na adong di Babel, na tarpillit songon hamu dohot sian anakku si Markus.+ 14 Denggan ma jalo hamu donganmuna na asing.

Dame ma di hamu sude, akka na marsada dohot Kristus!