Dang Dioloi si Adam Dohot si Hawa Debata

Tikki sahalak ni si Hawa, adong ma sada ulok mandok tu ibana, ‘Tutu do didok Debata dang boi allangonmuna buah ni sude pohon na di taman on?’ Dialusi si Hawa ma, ‘Boi do allangonnami sude buah ni pohon na di taman on. Holan sada do na so boi. Molo diallang hami i, mate do hami.’ Didok ulok i ma muse, ‘Dang tutu mate hamu. Molo diallang hamu i, gabe songon Debata ma hamu.’ Tutu do na didok ulok i? Daong, gabus do i. Alai porsea do si Hawa tu ulok i. Ala torus dibereng si Hawa buah ni pohon i, gabe lam lomo ma rohana naeng mangallang i. Ujungna, dibuat si Hawa ma buah i jala dilehon tu si Adam. Sebenarna diboto si Adam do, molo dang dioloi nasida Debata pasti mate do nasida. Alai tetap do i diallang si Adam.

Dung botari, disukkun Jahowa ma si Adam dohot si Hawa, boasa dang dioloi nasida parettana. Alai, disalahon si Hawa do ulok i, jala disalahon si Adam do si Hawa. Alani i, diusir Jahowa ma nasida sian taman i. Dibahen Jahowa ma malaikat dohot podang na marapi manjaga taman i, asa unang boi nasida masuk tusi.

Didok Jahowa, dohot do hukumonna na manipu si Hawa. Sebenarna, dang ulok na makkatai tu si Hawa. Alana dang dibahen Jahowa ulok boi makkatai songon jolma. Attong, boasa boi makkatai ulok i? Adong sada malaikat na jahat na mamakke ulok i lao manipu si Hawa. Malaikat na jahat i, i ma Sibolis. Haduan lao dipamate Jahowa nama Sibolis asa unang boi dipengaruhi ibana akka jolma lao mangulahon na jahat.