Mukjizat di Laut Merah

Dung dibege si Firaun naung borhat bangso Israel sian Mesir, muba ma muse rohana. Didok ibana ma tu tentarana, ‘Parade ma kareta porang asa takejar nasida! Seharusna dang tapaloas nasida lao.’ Borhat ma si Firaun dohot tentarana mengejar halak Israel.

Ditogu-togu Jahowa do bangsona. Dibahen do tiang awan tikki arian, jala tiang api tikki borngin. Diboan ma nasida tu Laut Merah, jala disuru ma bangso Israel markemah disi.

Diida halak Israel ma nungnga jonok si Firaun dohot tentarana. Di jolo ni nasida laut, jala di pudi ni nasida pasukan ni Mesir. Didok nasida ma tu si Musa, ‘Mate nama hita! Tumagon hian do hami dang kaluar sian Mesir.’ Alai didok si Musa ma, ‘Unang mabiar hamu. Selamattonon ni Jahowa do hita.’ Porsea situtu do si Musa tu Jahowa.

Disuru Jahowa ma halak Israel asa ditorusson nasida pardalananna. Di borngin i, dipapinda Jahowa ma tiang awan i tu pudi ni halak Israel. Gabe golap ma di inganan ni halak Mesir, alai tiur do di inganan ni halak Israel.

Disuru Jahowa ma asa dibahen si Musa tanganna arah tu laut. Dung i, dibahen Jahowa ma alogo na massai gogo di bagasan saborngin i. Tarbola dua ma laut i, gabe songon dinding na timbo ma aek i di sabola kiri dohot di sabola kanan. Jala adong ma dalan na koring di tonga-tonga. Gabe boi ma mardalan marjuta halak Israel sian i.

Diihutton si Firaun dohot tentarana ma halak Israel sian dalan na koring i. Alai, dibahen Jahowa ma gabe sursar pasukan ni halak Mesir i. Marsegaan ma roda ni kareta porang ni nasida. Dung i didok akka tentarana i ma, ‘Lao ma hita sian on! Jahowa do na marporang mangalo hita.’

Didok Jahowa ma tu si Musa, ‘Bahen ma muse tanganmi arah tu laut.’ Pittor marsada ma muse aek i. Mate ma si Firaun dohot tentarana. Dang adong nanggo sada pe na selamat.

Di seberang ni laut i, marende ma bangso Israel mamuji Debata. Didok nasida do di ende i, “Marende ma au tu Jahowa, ai nungnga monang Ibana jala marmulia. Disappatton Ibana do hoda dohot akka tentara ni musu tu laut.” Tikki marende, manortori ma akka borua huhut maniop rebana. Marlas ni roha do nasida ala nungnga selamat nasida.