Jahowa Patoguhon si Elia

Muruk do si Izebel ala dipamate akka nabi ni Baal. Disuru ma halak mandok tu si Elia, ‘Marsogot, ho nama dipamate songon nabi ni Baal i.’ Gabe mabiar ma si Elia jala lari ma ibana tu padang gurun. Martangiang ma ibana, ‘Jahowa, dang tolap be au. Pasombu ma au mate.’ Alani lojana, tarpodom ma si Elia di toru ni pohon.

Dung i ro ma malaikat mandungoi si Elia, lambok ma didok ibana, ‘Dungo ma ho jala mangan.’ Diida si Elia ma adong roti dohot aek. Dung sae mangan dohot minum, modom ma muse ibana. Didungoi malaikat i ma ibana muse, didok ma, ‘Mangan ma ho. Asa adong gogom mardalan.’ Mangan ma muse si Elia. Mardalan ma ibana 40 ari 40 borngin sahat tu Dolok Horeb. Masuk ma si Elia tu sada gua jala modom ma ibana disi. Didok Jahowa ma tu ibana, ‘Marhua ho tuson Elia?’ Dialusi si Elia ma, ‘Dang diulahon halak Israel be janjina tu Ho. Diruppakkon do mezbahmu, jala dibunu do akka nabim. Saonari naeng dibunu nasida do au.’

Didok Jahowa ma tu ibana, ‘Kaluar ma ho, jala jongjong ma ho di dolok on.’ Mulana ro ma alogo na gogo, masa ma gempa, jala ro ma api. Dung i, adong ma dibege ibana soara na nanget jala lambok. Kaluar ma ibana sian gua i jala ditutup ma bohina mamakke jubahna. Disukkun Jahowa ma boasa lari ibana. Dialusi si Elia ma, ‘Holan au nama na manomba Ho.’ Alai didok Jahowa ma tu ibana, ‘Daong, dang holan ho. Adong dope 7.000 nai halak Israel na manomba Au. Lao ma ho, pillit ma si Elisa gabe nabi na lao manggattihon ho.’ Lao ma si Elia jala diulahon do i. Menurutmu, olo do Jahowa mangurupi ho mangulahon lomo ni rohana? Taida ma muse akka na masa tikki musim kemarau di Israel.