3 Songon Dia do Carana Martangiang?

GODANG do agama na paboahon carana martangiang. Alai nasida holan mengutamahon sikap tubuh, hata-hata, dohot ritualna. Di Bibel dipaboa do dang i na terpenting. Taida ma alus ni Bibel taringot, “Songon dia carana martangiang?”

Dipaboa do di Bibel songon dia cara ni akka naposo ni Debata martangiang. Dang sarupa inganan ni nasida martangiang jala marragam do sikap tubuh ni nasida. Adong do na martangiang di bagas roha manang marsoara sesuai tu situasi ni nasida. Sipata martangiang do nasida sambil manatap langit manang marsomba. Dang hea dipakke nasida akka gombar, rosario, manang bukku doa tikki martangiang. Alai sian bagas roha ni nasida do nasida martangiang jala mamakke hatana sandiri. Aha do na mambahen ditangihon Debata tangiang ni nasida?

Songon na dipaboa di sukkun-sukkun sebelumna, tangiang ni nasida dipasahat holan tu Debata Jahowa. Alai asing ni i, adong do muse na ikkon taboto taringot tangiang. Penting do on, tajaha ma di 1 Johannes 5:14. Didok, “On do pos ni rohatta tu Debata: Manang aha na tapangido sesuai tu lomo ni rohana, tangihononna do hita.” Jadi ikkon sesuai do tangiangta tu lomo ni roha ni Debata. Aha do arti ni i?

Artina asa boi sesuai tangiangta tu lomo ni roha ni Debata, ikkon taboto do aha lomo ni rohana. Parsiajari ma Bibel. I do cara na penting asa taboto carana martangiang. Alai ikkon gabe pakar Alkitab nama hita asa ditangihon Debata tangiangta? Daong. Na dipangido Debata asa taboto do lomo ni rohana, taattusi jala taulahon. (Mateus 7:21-23) Ikkon sesuai do tangiangta tu na taparsiajari i.

Lam godang na taparsiajari taringot Jahowa dohot lomo ni rohana, lam porsea ma hita tu Ibana. Jala penting do haporseaon i tikki martangiang. Jesus mandok, “Molo porsea hamu, manang aha pe na dipangido hamu di bagasan tangiang, pasti jaloonmuna do i.” (Mateus 21:22) Na nidokna dison dang asal porsea. Alai porsea tu na so boi taida ala adong akka bukti na takkas. (Heber 11:1) Bibel marisi akka bukti na patuduhon Jahowa tutu do adong nang pe dang boi taida. Boi do Ibana taandalhon. Jala lomo do rohana mangalusi tangiang ni akka halak na porsea tu Ibana. Boi do tapangido asa dilehon tu hita haporseaon jala lomo do rohana mangalehon aha na tahaporluhon.​—Lukas 17:5; Jakobus 1:17.

Asing ni i, adong do muse na ikkon taboto taringot tangiang. Jesus mandok, “Dang adong na boi ro tu Damang i molo so marhite au.” (Johannes 14:6) Jadi, ikkon marhite Jesus do hita asa boi jonok tu Damang i, i ma Jahowa. Makana disuru Jesus do akka siseanna asa martangiang di bagasan goarna. (Johannes 14:13; 15:16) Alai dang na gabe tu Jesus hita martangiang. Na nidokna, i ma martangiang marhite goar ni Jesus. Alana molo dang marhite Jesus dang boi hita jonok tu Ama na sempurna jala badia i.

Hea do murid ni Jesus na jonok tu ibana manukkun, “Tuan, ajari ma hami martangiang.” (Lukas 11:1) Na disukkun nasida dison, dang taringot sukkun-sukkun na taalusi sebelumna. Alai na disukkun nasida, i ma taringot isi ni tangiang i. Songon on ma hira-hira na disukkun nasida, ‘Aha do na ikkon ditangiakkon hami?’