Las do Rohakku Dung Huboto Alusna sian Bibel

NGOLUKKU UJU I:

Tubu di Székesfehérvár Hungaria do au, i ma kota bersejarah na umurna lobi sian 1.000 taon. Sai lungun do rohakku molo huingot akibat ni porang dunia paduahon tu kota i.

Tikki gelleng, tinggal rap oppung doli dohot oppung boru do au. Holong hian do rohakku tu nasida, tarlumobi tu oppung boru i ma si Elisabeth. Alani ibana gabe porsea do au tu Debata. Mulai sian marumur tolu taon, sai martangiang do au rap dohot ibana tiap borngin mandokkon tangiang Ale Amanami. Alai dung marumur 20 taon pe baru huattusi aha lapatan ni tangiang i.

Halak oppung do na mangurus au tikki i. Alana karejo do omak dohot bapak arian nang borngin asa boi manuhor jabu. Alai molo ari Sabtu di minggu na paduahon, sai marpungu do hami sakeluarga jala rap mangan. Las hian do rohakku molo tikki marpungu songon i.

Di taon 1958, boi ma dituhor halak omak dohot bapak jabu. Ujungna rap tinggal ma au dohot halak i. Las hian do rohakku! Alai holan satokkin do las ni rohakki. Alana onom bulan dukkon i, mate ma bapak ala marsahit kanker.

Lungun hian ma rohakku. Martangiang ma au, “Tuhan, nungnga mangido au tu ho asa dipamalum Ho bapakku. Alana porlu do di au bapakki. Alai boasa ma dang dijalo ho tangiakku?” Sai sukkun-sukkun do rohakku, ‘Tudia do bapakki lao? Tu surgo do ibana? Manang naung mago nama ibana saleleng ni lelengna?’ Cemburu do au mangida dakdanak na asing na adong dope bapakna.

Saleleng martaon-taon, tiap ari do au lao tu kuburan ni bapak. Marsinggang ma au di jolo ni kuburanna jala martangiang, “Tuhan, tolong jo paboa tudia do bapakku lao.” Jala martangiang do au mangido asa diurupi mamboto tujuan ni ngolu on.

Tikki marumur 13 taon, marsiajar bahasa Jerman ma au. Alana menuruthu boi do dapottu alus ni sukkun-sukkunki di akka bukku na berbahasa Jerman. Taon 1967, sikkola di kota Jena ma au. Dung i pinda tu daerah Jerman Timur. Semangat hian do au manjaha akka buku filsafat Jerman, tarlumobi na mambahas taringot ngolu ni jolma. Nang pe godang na denggan di bukku i, alai dang dapottu dope alus ni sukkun-sukkunki. Jadi torus ma au martangiang.

SONGON DIA BIBEL PAUBAHON NGOLUKKU:

Taon 1970 mulak ma au tu Hungaria. Pajuppang ma au disi dohot si Rose na gabe istrikku. Tikki i pamaretta na komunis do na mamaretta di Hungaria. Dang leleng dung menikah, pinda ma hami tu Austria. Marcita-cita do hami naeng pinda tu Sydney, Australia, tu tempat ni tulangku.

Di Austria dapottu do karejo. Di sada tikki didok dongan sakarejokku ma tu au, boi do dapottu alus ni sude sukkun-sukkunki di Bibel. Jala dilehon ibana ma tu au piga-piga bukku na mambahas taringot Bibel. Pittor hujaha ma sude isi ni bukku i jala godang dope na naeng huboto. Jadi hubahen ma surat tu penerbit ni bukku i, i ma Saksi Jahowa asa dikirim halak i muse bukku tu au.

Pas ma sataon dung menikah hami, ro ma sahalak Saksi Jahowa tu jabunami. Diboan ibana ma sijahaon na hupesan. Jala disukkun ibana ma atik na olo do au marsiajar Bibel. Jadi huoloi ma! Semangat hian do au na marsiajar i. Alani semangatna, dua hali saminggu ma au marsiajar. Jala boi sappe opat jom sahali marsiajar!

Las hian do rohakku mamboto na huparsiajari sian Bibel. Misalna, tikki dipatudu nasida goar ni Debata i ma Jahowa sian Bibel bahasa Hungaria, gabe tarsonggot ma au. Alana nungnga 27 taon au lao tu gareja, alai dang hea dope hubege goar i dipakke di gareja. Jala dapottu do sude alus ni sukkun-sukkunki sian Bibel. Las do rohakku dung huboto alusna sian Bibel. Misalna, gabe huboto ma dos songon halak na modom do halak na mate i. Dang diboto manang aha. (Pjm 9:5, 10; Joh. 11:11-15) Asing ni i, huparsiajari do tong muse taringot janji ni Debata, “Dang adong be hamatean” di tano na imbaru. (Pgk. 21:3, 4) Sai tarpaima-ima do au boi pajuppang muse dohot bapakku di tano na imbaru. Alana “na lao dipahehe Debata do halak” naung mate.—Ul. 24:15.

Dohot do tong si Rose marsiajar Bibel. Holan di bagasan dua bulan, nungnga sae diparsiajari hami sada bukku parsiajaran Bibel. Torus do hami ro marpungu tu Bale Harajaon ni Saksi Jahowa. Jala salut do hami mangida nasida. Alana marsihaholongan, masiurupan, jala marsada do nasida.—Joh. 13:34, 35.

Di taon 1976, boi ma au dohot si Rose masuk tu Australia. Pittor dilului hami do Saksi Jahowa disi. Burju do tong nasida tu hami. Di taon 1978, gabe Saksi Jahowa ma hami.

LABA NA HUDAPOT:

Ujungna dapottu do alus ni sude sukkun-sukkunku saleleng on. Jala ala nga jonok saonari hubungakku tu Jahowa, gabe hira na marbapa ma au. (Jak. 4:8) Sai tarpaima do au naeng pajuppang dohot bapakku di tano na imbaru haduan.—Joh. 5:28, 29.

Di taon 1989, huputusson hami ma mulak muse tu Hungaria asa boi hami marbarita tu akka dongan, keluarga, dohot na asing. Nungnga lobi 100 halak na huurupi hami marsiajar Bibel. Jala lobi 70 halak sian nasida na gabe dohot manomba Jahowa, termasuk ma i omakku na huhaholongi.

Saleleng 17 taon, holan na mangido alus ni sukkun-sukkunku do isi ni tangiakku. Alai 39 taon dukkon i, asing do isi ni tangiakku. Sai hudok do di tangiakku, “Ale Amanami na di surgo, mauliate ma nungnga dialusi Ho tangiakku tikki gelleng dope au.”