SIULASON NI MAJALAH ON | BIBEL—DILINGGOMI ASA TONGTONG ADONG
Bibel Dilinggomi sian Paraloan
MASALAH: Godang do pemimpin ni politik dohot pemimpin ni agama mangulahon na maralo tu isi ni Bibel. Diorai do angka jolma mamangke, mambahen manang manerjemahon Bibel. Parrohahon ma on:
Hirahira taon 167 SM: Dipaksa Raja Antiochus Epiphanes do halak Jahudi mangkaporseai ajaran Junani, jala disuru ma asa ditutung sude salinan ni Angka Buku Heber. Sahalak sejarawan na margoar si Heinrich Graetz manurat, ”Disuru raja do angka pejabatna asa mangaribahi jala manutung sude gulungan ni patik na dapotnasida, jala dibunu do halak na mangambati ulaon on.”
Abad Pertengahan: Ala ndang mangajarhon ajaran ni Katolik, sogo do roha ni angka pemimpin ni Katolik tu halak na mangajarhon Bibel. Digoari ma nasida bidah, ala adong di nasida Surat na Badia na asing, asing ni buku Psalmen di bahasa Latin. Sahalak pemimpin ni gareja manogihon pigapiga baoa asa ”mangalului angka bidah . . . tu sude jabu dohot tu ruang bawah tanah. . . . Disegai do sude jabu ni bidah na jumpangnasida”.
Molo dipamago nasida sude Bibel, Hata ni Debata na adong di bagasanna pe mago ma.
Bibel terjemahan ni si William Tyndale na marbahasa Inggris, dilinggomi sian paraloan, nang pe si Tyndale sandiri dipamate di taon 1536
SONGON DIA BIBEL DILINGGOMI: Marsitutu do Raja Antiochus mangulahon sangkapna di Israel, alai adong do halak Jahudi di inganan na asing. Pigapiga sarjana paboahon, di abad na parjolo adong lobi sian 60 persen halak Jahudi tading di luat na asing. Disimpan nasida do angka salinan ni Surat na Badia di sinagoga. On ma na dipangke angka pinomparnasida dohot halak Kristen.—Ulaon ni Apostel 15:21.
Saleleng Abad Pertengahan, halak na lomo rohana mangantusi Bibel marsitutu manerjemahon jala manalin Surat na Badia nang pe mangadopi paraloan. Nang pe ndang adong dope mesin cetak di abad 15, nunga diterjemahon Bibel tu 33 bahasa. Di pudian ni ari, mansai godang ma Bibel diterjemahon jala dicetak.
HASILNA: Nang pe mangadopi paraloan sian raja dohot pemimpin ni agama, alai Bibel ma buku na gumodang dicetak jala diterjemahon. Buku on ma na gabe ojahan ni uhum dohot bahasa di pigapiga negara, dohot di parngoluon ni marjuta halak.