Tahaporluhon do Pangapulion

Hea do hamu madabu tingki dakdanak? Ra, lungka ma tangan dohot patmuna. Diingot hamu do songon dia omakmuna paiashon lungka i jala mambahen perban? Tingki tangis hamu, dihaol do hamu jala dipapos rohamu. Tingki dakdanak, sai adong do na mangurupi hita.

Alai dung magodang, lam susa do ngolunta. Lam godang parsoalan, jala maol mandapot pangurupion. Ndang boi sae parsoalan ni halak na magodang, molo holan diperban manang dihaol omak. Rimangi ma on.

• Hea do hamu marsak ala di-PHK? Mandele do si Julian tingki di-PHK, didok ibana ma, ’Songon dia ma ahu mangalehon keluargangku mangan? Hape, nunga leleng ahu karejo di perusahaan on. Boasa ma di-PHK ahu?’

• Ra, hansit do dihilala hamu tingki marsirang. Si Raquel mandok, ”Tingki ditadingkon tungganedolingku ahu 18 bulan naung salpu, hansit do huhilala. Ditostos ma rohangku di bagasan. Hansit daging, hansit muse pingkiran. Mansai ngeri do huhilala.”

• Ra, ndang marnamalum sahitmuna. Dihilala hamu do songon na dihilala ni si Job, na mandok, ”Nunga ngolngolan ahu. Loja ahu na mangolu on.” (Job 7:16, Bibel siganup ari) Ra sarupa do pangkilalaanmu songon si Luis, na marumur 80 taon na mandok, ”Huhilala, ndang leleng nai be ngolungkon.”

• Lam tahaporluhon do pangapulion tingki mate na tahaholongi. Si Robert mandok, ”Mulana, hira na so porsea do ahu tingki mate anakku alani kecelakaan pesawat. Alai lam leleng, hansit do huhilala. Songon na didok Bibel, tarsongon podang na manusuk ateate.”​—Lukas 2:35.

Si Robert, si Luis, si Raquel, dohot si Julian, mandapot pangapulion tingki marsitaonon. Didapot nasida do i sian Debata, Pargogo na so Hatudosan. Songon dia do Debata mangapuli roha? Olo do Ibana mangapuli rohamuna?