Na Laho Masa di Ari na Naeng Ro

Hea do sungkun-sungkun rohamu boha ngolumuna di ari na naeng ro? Na laho mamora do hamu manang gabe pogos? Rap do hamu dohot keluargamuna manang ndang? Leleng do hamu mangolu manang mate poso do? Sian najolo, sungkun-sungkun do roha ni jolma taringot i.

Saonari, dibahen angka pakar do ramalan taringot na laho masa. Adong do ramalan i na tutu masa, adong na so masa, jala adong na so pas songon naung diramalhon. Umpamana taon 1912, si Guglielmo Marconi na mambahen komunikasi marhite radio mandok, “Di ari na naeng ro, ndang masa be porang ala nunga adong komunikasi marhite radio.” Adong muse agen ni perusahaan rekaman Decca. Taon 1962, ndang dipaloas ibana grup musik The Beatles mangarekam ende di perusahaan i. Didok rohana, ndang na laho terkenal be grup musik sisongon i.

Godang do na manungkun taringot ari na naeng ro tu datu dohot tu pakar astrologi. Asing ni i, di godang majalah dohot koran somal do dibahen ramalan bintang. Adong do muse na manungkun tu “na malo”, na boi manjaha kartu tarot manang garis tangan.

Najolo, godang do tong na manungkun tu datu. Piga-piga datu i, adong do sian angka pamimpin ni agama. Umpamana, si Kroesus, raja Lidia, mangalehon angka hadiah na arga tu sahalak datu di Delfi, Yunani. Disungkun ma datu i, aha na masa molo dialo ibana si Sirus, raja Persia. Didok datu i, molo dialo ibana si Sirus, taluhononna ma “harajaon na balga”. Ala porsea tu hata ni datu i, dialo si Kroesus ma si Sirus. Hape harajaon ni si Kroesus do na talu!

Jadi, ndang tangkas ramalan ni datu i jala gabe parohon jea. Songon si Kroesus, gabe marjea do ibana ala porsea tu hata ni datu i. Antong, boi do tahaporseai angka ramalan ni jolma?