Aha do Manfaatna Molo Takkas Tatanda Debata?

Nungnga taboto be sian Bibel Jahowa do goar ni Debata, holong do sifatna na paling utama, jala nungnga taboto akka aha naung diulahon Ibana dohot na lao diulahon Ibana tu jolma. Godang nai dope na porlu taboto taringot Debata. Alai aha manfaatna molo taboto i sude?

Didok do di Bibel, “Molo dilului ho [Jahowa], juppangmu ma Ibana.” (1 Kronika 28:9) Molo marsitutu hamu asa lam takkas mananda Debata, dapotmuna ma hadiah na ummarga, i ma gabe ‘aleale ni Jahowa’! (Psalmen 25:14) Aha ma manfaat ni i tu hamu?

Toktong marlas ni roha. Didok Bibel, “Debata na marlas ni roha” do Jahowa. (1 Timoteus 1:11) Jadi molo jonok hita tu Debata jala tatiru Ibana, gabe las ma rohatta. Molo las rohatta gabe dame ma rohatta dohot pikkiranta, jala gabe lam sehat ma hita. (Psalmen 33:12) Asing ni i gabe tamba do las ni rohatta molo taihutton poda ni Debata asa dang mangulahon hasomalan na parohon jea, tajaga kesehatanta, jala mardame tu na asing. Boi ma tahilala hata ni panurat psalmen na mandok, “Marlaba do huhilala pajonokkon diri tu Debata.”—Psalmen 73:28.

Diparrohahon Debata ma hita. Marjanji do Jahowa tu akka naposona, “Lehonokku ma poda tu ho jala parrohahonokku do ho.” (Psalmen 32:8) Lapatanna, diparrohahon Jahowa do naposona ganup marsada-sada. Jala sai lehononna do akka na porlu di hita. (Psalmen 139:1, 2) Molo lam dipajonok hamu dirimuna tu Debata, boi ma hilalaonmuna sai didongani Ibana do hamu.

Denggan ma ngolutta di ari na naeng ro. Diurupi Jahowa do hita asa boi makkilala las ni roha saonari. Alai dang holan i. Marjanji do tong Jahowa lao mambahen denggan ngolutta di ari na naeng ro. (Jesaya 48:17, 18) Didok do di Bibel, “On do hangoluan na saleleng ni lelengna, ikkon tandaon ni nasida do Ho Debata na Sasada i, na sittong i dohot Jesus Kristus na sinurum.” (Johannes 17:3) Harapan on do na boi mangurupi hita asa ‘togu jala marpos ni roha’ nang pe godang sitaononta saonari.—Heber 6:19.

Godang nai dope manfaatna molo takkas tatanda Debata jala jonok hita tu Ibana. Boi do disukkun hamu taringot i tu sahalak Saksi Jahowa. Manang laho mangalului gumodang hatorangan, ida ma situs jw.org/bbc.