Lam tu Dengganna Marbarita—Manambai Trayek Majalah

Boasa Ringkot: Godang do halak lomo rohana manjaha majalahta alai ndang olo marsiajar Bibel. Ra lomo dope rohana di ugamona i manang ndang adong tingki nasida laho marsiajar. Alai molo nunga sai jotjot nasida manjaha majalahta gabe olo do ra nasida mamboto hata ni Debata. (1 Pet. 2:2) Adong do ra na dijaha nasida na hona tu rohana manang tu parngoluon na boi mambahen nasida boi gabe muba. Molo sai jotjot hita ro manjumpangi nasida nang pe holan satongkin, on mambahen nasida boi lam jonok tu hita jala hita pe boi mamboto aha do na dihaporluhon nasida. On boi mambahen nasida gabe olo marsiajar Bibel.

Songon dia mangulahon:

Ganup bulan, atur ma tingki laho mangalehon majalah Joujou Paboahon dohot Sadarlah! na baru. Manang boi do jumpangan muna di tingki na asing laho mangulas sada parsiajaran sian majalah i manang sian buku sisarhonon di bulan i. Surat ma asa boi ingoton.—Ida ma Panghobasion Harajaonta Januari 2014, alaman 3.
Ganup laho manjumpangi muse bahen ma panghobasion, unang holan manadinghon majalah sambing. Togihon ma parjabu i manghatahatai jala bahen ma songon dia asa boi maraleale tu nasida. On boi mambahen gabe olo nasida marsiajar.
Lului ma dalan asa boi mamungka parsiajaran Bibel. Molo adong sungkunsungkun ni na manjalo trayek majalah i, lehon ma buku na boi mangalusi sungkunsungkunna i ma buku na somal dipangke marsiajar Bibel jala ulas ma satongkin. Laho mulak sian i tadingkon ma sungkunsungkun na boi dialusi tingki ro hamu laho manjumpangi muse. Molo ganup pajumpang somal hamu mamungka panghataion dohot na jinumpanganmu jala dibungka hamu Bibel manang buku na dipangke marsiajar Bibel, hamu nunga mambahen parsiajaran Bibel. Hea do dilehon hamu buku Barita na Uli jala dipatuduhon hamu songon dia marsiajar Bibel tu na jinumpangan muna? Hea do dipatuduhon hamu video Boasa Ringkot Marsiajar Bibel? jala Songon dia do Parsiajaran Bibel i? Nang pe saonari sasahalak ndang olo marsiajar Bibel alai di tingki na naeng ro olo do gabe muba. Adong do lapatan ni on tu hamu molo diulahon hamu muse di tingki na naeng ro?

Ulahon ma On Saleleng Sabulan:

Surat ma angka ise na naeng bahenonmu gabe trayek majalah. Lehon ma tu nasida majalah na baru jala paboa tu nasida na laho lehononmu do muse majalah na baru di bulan na ro.