Na Didok Akka Halak Taringot Tangiang
“Molo martangiang au, hira na di labbungku do Debata. Jala tikki mandele au, hira na ditiop Ibana do tanganku.”—SI MARÍA.
“Dung 13 taon istrikku marsahit kanker, mate ma ibana. Sai huingot do martangiang tu Debata ganup ari. Jala huhilala ditangihon Ibana do arsak ni rohakku, gabe tenang ma huhilala.”—SI RAÚL.
“Hadiah sian Debata do tangiang i.”—SI ARNE.
Hadiah na massai arga do tangiang i di si María, si Raúl, si Arne, dohot halak na asing. Dihilala nasida molo martangiang, boi ma nasida makkatai tu Debata, mandok mauliate tu Ibana, jala mangido asa diurupi. Pos do roha ni nasida tu hata ni Bibel na mandok, “On do pos ni rohatta tu Debata: Manang aha na tapangido sesuai tu lomo ni rohana, tangihononna do hita.”—1 Johannes 5:14.
Alai godang do halak na so porsea tu na didok Bibel i. Contohna songon pengalaman ni si Steve. Didok ibana, “Tikki marumur 17 taon au, tolu ma mate donganku. Sada mate marlanggar, na dua nai maup di laut.” Didok ibana do muse, “Martangiang ma au tu Debata, hudok boasa ma masa on? Alai dang dapottu alusna. Jadi hudok ma di rohakku, ‘Boasa ma pola martangiang au?’” Suang songon i ma ala godang halak makkilala dang dialusi tangiangna, gabe dang porlu be dihilala nasida martangiang.
Adong muse alasan na asing na mambahen nasida mandok, dang marguna martangiang. Adong do na mandok, diboto Debata do sude, diboto Ibana do aha na tahaporluhon, aha masalahta. Jadi dang pola ikkon tapaboa pe, nga diboto Ibana sebenarna.
Na asing mandok, dang olo Debata mambege tangiang ni nasida ala adong na sala na diulahon nasida di tikki naung salpu. Songon na didok si Jenny, “Hira na so marguna do huhilala au. Nungnga huulahon dosa na balga, jadi huhilala dang olo be Debata mambege tangiakku.”
Boha molo hamu, hea do dihilala hamu songon i? Molo hea, boi do dapotmuna alus ni sukkun-sukkunmuna taringot tangianga di Bibel. Holan Bibel do na boi mangalusi sukkun-sukkun on:
Dibege Debata do tangiangta?
Boasa sipata dang dibege Debata tangiangta?
Songon dia do carana asa dibege tangiangta?
Aha do gunana hamu martangiang?
a Di Bibel adong do dipaboa godang tangiang ni naposo ni Debata, termasuk ma tangiang ni Jesus. Di akka bukku Heber manang na digoari Perjanjian Lama adong do lobi sian 150 tangiang disurat disi.