Sukkun-Sukkun sian na Manjaha
Aha do maksud ni si Paulus tikki didok ibana, “Nungnga mate au molo mangihutton patik i?”—Gal. 2:19.
Didok si Paulus, “Nungnga mate au molo mangihutton patik i, asa boi au mangolu tu Debata.”—Gal. 2:19.
Piga-piga halak Kristen di huria Rom na di provinsi Galatia, terpengaruh tu ajaran na so sittong. Adong do sian nasida na mangajarhon, asa boi selamat sasahalak ikkon diihutton ibana do Patik ni si Musa, terutama taringot sunat. Alai diboto si Paulus do dang dipangido Debata be halak Kristen ikkon disunat. Alani i ma barani do si Paulus mandok na so sittong ajaran i. Jala dipapos ibana do roha ni halak Kristen di tikki i asa porsea tu tobusan ni Jesus Kristus. (Gal. 2:4; 5:2) Tikki paboahon taringot i ma disurat ibana Galatia 2:19.
Takkas do didok Bibel molo mate sasahalak, dang diboto agia aha. Jala manang aha pe na masa di sakalilingna, dang adong be pengaruhna tu ibana. (Pjm. 9:5) Jadi tikki didok si Paulus “nungnga mate au molo mangihutton patik i”, lapatanna dang berpengaruh be Patik ni si Musa tu ngoluna. Alai pos do roha ni si Paulus molo porsea ibana tu tobusan ni Jesus, boi ma ibana “mangolu tu Debata”.
Muba do situasi ni si Paulus alani Patik i. Boasa? Didok ibana, “Alani haporseaon tu Jesus Kristus do sasahalak didok mangulahon na sittong, dang ala mangihutton patik.” (Gal. 2:16) Jadi sabotulna, massai penting do Patik ni si Musa on. Didok si Paulus do tu halak na di Galatia, “Na lao papatarhon hasalaan do [Patik i] sahat tu na ro pinoppar na lao manjalo janji i.” (Gal. 3:19) Patik ni si Musa patuduhon, molo jolma dang sempurna jala dang adong na sanggup mandalatton sude Patik i. Jadi dihaporluhon jolma do pelean na sempurna. Jala Patik i do na manogu-nogu jolma tu “pinoppar na lao manjalo janji i”, i ma Jesus Kristus. Jadi molo marhaporseaon sasahalak tu Jesus Kristus, gabe boi ma ibana didok mangulahon na sittong di jolo ni Debata. (Gal. 3:24) Boi pe didok si Paulus songon i, ala marhite Patik i do ibana mananda jala marhaporseaon tu Jesus. Jadi “nungnga mate [si Paulus] molo mangihutton patik i” alai “mangolu tu Debata”. Lapatanna, dang Patik i be na mangatur ngolu ni si Paulus alai Debata nama.
Dipaboa si Paulus do muse taringot i tu halak Kristen na di Rom. Didok ibana, “Songon i ma na masa tu hamu akka dongan. Nungnga mate hamu di bagasan Patik i marhite daging ni Kristus . . . Nungnga mate be hita di bagasan Patik ni si Musa, alani i nungnga malua be hita saonari sian Patik i.” (Rom 7:4, 6) Tikki didok si Paulus hatana i di akka ayat on dohot di Galatia 2:19, dang na maksudna ibana mate ala mangalanggar Patik. Gariada nungnga malua be ibana sian Patik. Jadi dang Patik i be na mangatur ngoluna dohot ngolu ni halak Kristen. Alana, nungnga malua nasida marhite tobusan ni Kristus.