Dung Mamaretta Harajaon ni Debata “Gok ma Hadameon”

Dang leleng nai, saut ma na tapaima-ima. Mamaretta ma Harajaon ni Debata, mardame jala marsada ma sude jolma di tano on. Songon na didok di Psalmen 72:7, “gok ma hadameon”. Alai andigan do Harajaon ni Debata mamaretta tu tano on? Aha do na parjolo ikkon diulahon Harajaon i? Aha do na ikkon diulahon hamu asa boi gabe rakyat ni Harajaon i?

ANDIGAN DO HARAJAON NI DEBATA MAMARETTA TU TANO ON?

Didok Bibel adong do piga-piga na masa, na gabe “tanda” patuduhon naeng mamaretta nama Harajaon ni Debata tu tano on. Contohna, marporang ma bangso tu bangso, masa ma kelaparan, sahit, gempa, jala lam godang ma kejahatan.​—Mateus 24:3, 7, 12; Lukas 21:11; Pangungkapon 6:2-8.

Nungnga didok Bibel hian, “Alai boto hamu ma on, na ro ma tikki hasusaan di ari parpudi. Ai makkaholongi dirina sandiri ma jolma, holongan di hepeng, . . . dang mangoloi natorasna, dang diboto mandok mauliate, dang setia, dang marroha holong, dang olo mardos ni roha, paroa-roahon donganna, dang diboto mangorom diri, parmuruk-muruk, makkasogohon na denggan, . . . sombong, unlomo do rohana mangoloi giot-giot ni rohana sian apala mangoloi Debata.” (2 Timoteus 3:1-4) Memang sian najolo nungnga adong jolma na songon i sifatna. Alai saonari, hampir sude do jolma songon i sifatna.

Mulai taon 1914, saut ma akka tanda na dipaboa di Bibel. Godang do sejarawan, negarawan, dohot penulis mandok gabe lam sursar do keadaan ni portibi on mulai sian taon i. Misalna, adong sahalak sejarawan sian Denmark na margoar si Peter Munch manurat, “Dung terjadi perang dunia di taon 1914, gabe muba ma keadaan ni portibi on. Sebelumna, pos do roha ni akka halak pasti lam denggan keadaan ni portibi on, alai toppu ma i muba . . . godang ma terjadi bencana, gabe mabiar ma akka halak, marsogo ni roha, jala dang aman be dihilala akka halak.”

Alai unang pola putus asa hita. Alana sude na masa i patuduhon, lao mamaretta nama satokkin nai Harajaon ni Debata tu tano on. Sada barita na uli do on. Didok Jesus, di ari parpudi “dibaritahon ma barita na uli taringot tu Harajaon i di liat portibi on, asa saluhut bangso mambege barita i. Dung masa i ro ma ujungna”.​—Mateus 24:14.

On ma barita na uli na torus dipaboa Saksi Jahowa. Jala majalah ni nasida pe dibahen do judulna Joujou Paboahon Barita Harajaon ni Jahowa. Sering do majalah on mambahas taringot pasu-pasu na lao dihilala jolma di tano on molo nungnga mamaretta Harajaon ni Debata.

AHA DO NA PARJOLO IKKON DIULAHON HARAJAON I?

Adong opat na porlu taingot taringot Harajaon ni Debata:

1. Dang akka pamimpin saonari na lao gabe pamimpin manang wakil di Harajaon i.

2. Berusaha do akka pamimpin na di tano on mangalo Harajaon ni Debata asa tetap nasida memimpin.​—Psalmen 2:2-9.

3. Lao dihancurhon jala diropukkon Harajaon ni Debata ma sude pamarettaon ni jolma. (Daniel 2:44; Pangungkapon 19:17-21) Digoari ma porang na balga i Armagedon.​—Pangungkapon 16:14, 16.

4. Lao dipalua do sude halak na mendukung Harajaon ni Debata di Armagedon. Jala boi ma nasida mangolu di tano na imbaru. Di Bibel, didok do nasida “punguan bolon”. Alana olo do ra marjuta godang ni nasida.​—Pangungkapon 7:9, 10, 13, 14.

AHA DO NA IKKON DIULAHON HAMU ASA BOI GABE RAKYAT NI HARAJAON I?

Asa boi hita gabe rakyat ni Harajaon ni Debata, ikkon taihutton do sada pendidikan na penting. Pendidikan aha ma i? Songon on ma na didok Jesus di tangiangna tu Debata, “On do hangoluan na saleleng ni lelengna, ikkon tandaon ni nasida do Ho Debata na Sasada i, na sittong i dohot Jesus Kristus na sinurum.”​—Johannes 17:3.

Godang do manfaatna molo tatanda Debata Jahowa. Taida ma jo dua manfaatna. Na parjolo, molo tatanda Debata, lam togu ma haporseaotta tu Ibana ala nga godang taida bukti. Jala molo nga togu haporseaotta tu Debata, gabe pos ma rohatta tutu do adong Harajaon ni Debata i jala lao mamaretta do i satokkin nai tu tano on. (Heber 11:1) Manfaat na paduahon, gabe lam holong ma rohatta tu Debata dohot tu halak na asing. Ala holong rohatta tu Debata, gabe olo ma hita mangoloi hatana sian ias ni rohatta. Jala ala holong rohatta tu halak na asing, gabe olo ma hita mangihutton hata ni Jesus na mandok, “Aha na dihalomohon rohamuna bahenon ni halak tu hamu, ikkon songon i do bahenonmuna tu nasida.”—Lukas 6:31.

Songon sahalak bapak na burju do Debatanta. Lomo do rohana asa bahagia hita jala dapotta “hangoluan na saleleng ni lelengna” di ari na naeng ro. (1 Timoteus 6:19) Dang songon parngoluotta saonari na dihalomohon Debata tu hita. Alana godang do saonari halak na susa jala satonga mate do nasida lao memenuhi kebutuhanna. Jadi parngoluon na songon dia do na dihalomohon Debata? Saonari taida ma jo pasu-pasu na lao tahilala molo nga mamaretta Harajaon ni Debata tu tano on.