Aha do Lapatan ni Stres?

Stres i boi ro tikki adong beban pikkiranta. Jala godang do pengaruh ni i tu kesehatanta. Tikki stres, dikirim otak ma akka hormon tu sude bagian ni pamatangta. Gabe lam hatop ma detak jantung, gabe berpengaruh do i tu tekanan darah, gabe hosa-hosa, jala gabe tegang ma otot. On ma na tahilala asa rade pamatangta lao mangadopi situasi na mambahen hita gabe stres. Dung salpu situasi i, mulak ma muse pakkilalaanta songon na somal.

STRES NA DENGGAN DOHOT STRES NA BERBAHAYA

Stres i boi do ro tikki hita mangadopi tekanan manang mangadopi situasi na berbahaya. Mulana sian pikkiranta do i ro. Adong do stres na denggan. Boi do on mambahen hita gabe lam hatop karejo. Jala boi do stres on mangurupi hita asa lam denggan mangulahon akka rencana na tabahen. Umpamana tikki ujian, wawancara kerja, manang pertandingan olahraga.

Alai molo jotjot hita stres, berbahaya do on. Boi do hita gabe marsahit, mura-mura muruk, mura-mura tangis, mura-mura lupa, dang konsentrasi, jala sai busisaon. Gabe muba-uba ma sikapta tu halak na asing. Ala jotjot stres, gabe dilului ma cara na so denggan lao pasidikkon i. Umpamana gabe mabuk, mamakke narkoba, pagodanghu mangan, manang marisap. On boi mambahen sasahalak gabe depresi, palojahu, manang gabe tarpikkir lao manikkot.

Marasing-asing do pengaruh ni stres tu ganup halak. Alai boi do i gabe parohon godang sahit tu sude bagian ni pamatangta.