Mangadopi Halak na Dipabali sian Huria

Mansai lungun do roha molo sahalak sian keluarga manang aleale, dipabali sian huria ala mangulahon dosa jala ndang marhamubaon. Sian caranta mangihuthon tudutudu taringot mangadopi halak na dipabali, patuduhon sadia balga holong nang pangargaionta tu Jahowa dohot tu aturanNa.a Taparrohahon ma pigapiga sungkunsungkun taringot on.

Songon dia do hita mangadopi halak na dipabali? Bibel mandok, ”Na so jadi saor hamu dohot halak na targoar dongan, hape parmainan do ibana, manang parangat, manang sioloi ajiajian, manang panginsahi, manang siparmabuk, manang pandobo pe; gari mangan rap dohot sisongon i, gari so jadi.” (1 Korint 5:11) Taringot halak ”na so mian di bagasan poda ni Kristus”, didok do, ”Unang ma jangkon hamu ibana tu jabu, unang ma tabi hamu! Gari na mangalehon tabi tu ibana, saor do tu angka ulaonna na jahat i.” (2 Johannes 9-11) Alani i, ndang boi hita mardongan manang mangkatai rap dohot halak na dipabali taringot partondion. Menara Pengawal No. 37, halaman 21 manang The Watchtower 15 September 1981, halaman 25 mandok, ”Umpamana, hata ’Horas’ boi do mamungka pangkataion dohot paralealeon tu sasahalak. Parsidohot do hita mangulahon on?”

Porlu do hita ndang marsiantoan be dohot nasida? Porlu. Na parjolo, on patuduhon na marsihohot hita tu Jahowa dohot tu aturanNa. Tapatudu ma na taoloi do Jahowa nang pe sipata maol mangulahon i. Holong tu Jahowa ma na mangonjar rohanta mangoloi sude parentaNa. Tapatudu ma molo uhumNa i patuduhon holong, hatigoran jala marlaba tu hita. (Jesaya 48:17; 1 Johannes 5:3) Na paduahon, molo ndang mardongan be hita dohot halak na so olo muba, tarondingi ma hita dohot huria sian parange na so denggan. Asing ni i, tongtong ma ias hurianta. (1 Korint 5:6, 7) Na patoluhon, molo marsihohot do hita mangulahon prinsip ni Bibel taringot halak na dipabali, boi do on marlaba tu halak na dipabali i. Molo taihuthon do na dibahen panitia pengadilan, boi do on mangonjar roha ni halak na dipabali asa mangargai pangurupion na dilehon angka sintua. Ala ndang boi be dihilala ibana mardongan dohot halak na dihaholongi, gabe diboto ibana ma naung balga dosana. Dung i, bahenonna ma hamubaon asa boi maraleale tu Jahowa.​—Lukas 15:17.

Songon dia do molo sisolhot dohot keluarganta na dipabali? Olo do gabe maol hita marsihohot tu aturan ni Jahowa molo sian keluarganta sandiri na dipabali. Antong, songon dia do hita maradophon sisolhotta na dipabali? Ndang sude situasi na laho taparsiajari di lampiran on. Alai taparrohahon ma adong dua situasi na jotjot masa.

Olo do halak na dipabali i sahalak sian keluarganta jala hita tading sajabu dohot ibana. Nang pe dipabali ibana, alai boi do taulahon ulaon na somal rap dohot ibana. Alai, taingot ma nunga dibahen ibana haputusan, na so parsidohot be mangulahon ulaon partondion rap dohot keluargana, na sahaporseaon. Alani i, anggota keluarga na marsihohot tu Jahowa unang ma mangulahon ulaon partondion rap dohot ibana. Umpamana, molo dohot halak na dipabali tingki panombaon na sasaripe, holan manangihon ma ibana. Alai, molo natuatuana dope na martanggung jawab tu na dipabali i [anak dibawah umur], marhak do natuatuana mangajari dohot maminsang ibana. Jala, denggan do molo dibahen natuatuana parsiajaran Bibel dohot ibana.b—Poda 6:20-22; 29:17.

Na asing, olo do ndang sian keluarganta halak na dipabali i jala ibana ndang tading dohot hita. Ra, porlu do mangkatai tu nasida tingki adong na mansai ringkot situtu, alai taingot ma unang pagodangku mangkatai tu ibana. Unang ma talului sidalian asa mangkatai tu sisolhot na dipabali na so tading sajabu. Molo marsihohot hita tu Jahowa dohot organisasiNa, taihuthon ma aturan taringot halak na dipabali. Molo diulahon on, boi do mangurupi halak na dipabali gabe mulak tu Jahowa.c—Heber 12:11.