PASAL 25

“Naik Banding ma Au tu Kesar!”

Dibahen si Paulus do teladan na denggan tikki mambela haporseaonna

Dibuat sian Ulaon ni Apostel 25:1–26:32

1, 2. (a) Songon dia do situasi na diadopi si Paulus? (b) Sukkun-sukkun aha do na massai penting taboto alusna?

DIPENJARA dope si Paulus di Kaesarea. Massai ketat do ibana dijaga. Dua taon sebelumna, holan piga-piga ari dope ibana mulak tu Judea nungnga tolu hali naeng dipamate halak Jahudi ibana. (Ul. 21:27-36; 23:10, 12-15, 27) Alai sahat tu saonari dang marhasil dope musuna i jala dang menyerah nasida. Saonari dibahen akka musu ma muse rencana. Alani i didok si Paulus ma tu si Festus gubernur ni Rom, “Naik banding ma au tu Kesar!”—Ul. 25:11.

² Dipasu-pasu Jahowa do keputusan ni si Paulus lao naik banding tu kesar? Massai penting do taboto alusna, alana hita pe paboahon barita na uli do di ari parpudi on. Jala gabe sitiruon do si Paulus tu hita tikki mambela haporseaotta.—Plp. 1:7.

‘Jongjong di Jolo ni Kursi Pengadilan’ (Ul. 25:1-12)

3, 4. (a) Boasa dipangido halak Jahudi asa diboan si Paulus tu Jerusalem, jala songon dia si Paulus selamat sian hamatean? (b) Songon dia do Jahowa patoguhon naposona saonari songon si Paulus?

³ Dung tolu ari si Festus gabe gubernur di Judea lao ma ibana tu Jerusalem.a Disi, dibege ibana ma akka malim kepala dohot akka halak Jahudi na sangap manudu si Paulus mangulahon na jahat. Ala baru dope ibana gabe gubernur, diboto nasida do pasti berupaya ibana mambuat roha ni rakyatna dohot sude halak Jahudi. Alani i didok nasida ma tu si Festus asa diboan si Paulus tu Jerusalem, jala disi ma ibana diadili. Alai sebenarna adong do rencana ni nasida na jahat. Naeng dibunu nasida do si Paulus tikki di pardalanan sian Kaesarea tu Jerusalem. Alai dang dioloi si Festus pangidoanna i. Didok ibana ma, “Suru hamu ma pamimpinmuna borhat rap dohot au tu Kaesarea, disi ma paboa hamu akka tuduhanmuna molo adong hasalaanna.” (Ul. 25:5) Sahali nai selamat do si Paulus sian hamatean.

⁴ Dipatogu Jahowa do si Paulus lao mandalani sude persidangan i. Dipatogu do ibana marhite Jesus. Marhite sada parnidaan didok Jesus do tu si Paulus, “Unang ho mabiar!” (Ul. 23:11) Saonari on pe adong do na menentang hita. Memang dang dipalua Jahowa hita sian sude tantangan i. Alai dilehon Jahowa do tu hita bisuk dohot gogo asa boi hita martahan. Pos do rohatta lehonon ni Debata do ‘lobi sian gogo ni sahalak jolma’ tu hita.—2 Kor. 4:7.

5. Aha do keputusan na dibahen si Festus tu si Paulus?

⁵ Piga-piga ari dukkon i, hundul ma si Festus di kursi pengadilan na di Kaesarea.b Jongjong ma si Paulus dohot akka halak na manudu ibana i di jolona. Lao menyangkal tuduhan ni nasida i didok si Paulus ma, “Dang adong na sala hubahen tu Patik ni halak Jahudi manang tu bagas joro manang tu Kesar.” Jadi sebenarna dang marsala si Paulus, jala boi do ibana dibebasson. Aha do keputusan ni si Festus? Ala naeng pasonakkon roha ni halak Jahudi ibana, didok ma tu si Paulus, “Olo do ho lao tu Jerusalem, asa disi ho diadili di jolokku taringot tu parsoalan on?” (Ul. 25:6-9) Dang masuk akkal keputusanna i. Alana molo dikirim si Paulus tu Jerusalem, gabe akka na manudu ibana i ma na gabe hakim, jala pasti dihukum mate do ibana. Jadi keuntungan politik do na dilului si Festus, dang na lao mambahen keadilan. Sebelumna adong do gubernur na songon ibana, i ma si Pontius Latus na menangani kasus ni Jesus. (Joh. 19:12-16) Saonari on pe adong do hakim na mangalului keuntungan politik, jadi dang heran be hita molo sipata dang adil keputusan ni pengadilan taringot naposo ni Debata.

6, 7. Boasa dipangido si Paulus naik banding tu kesar, jala songon dia halak Kristen saonari maniru teladan ni si Paulus?

⁶ Molo saut hian rencana ni halak Jahudi i boi do gabe mate si Paulus. Alani i ma dipakke si Paulus hakna sebagai warga negara Rom. Didok ibana ma tu si Festus, “Di jolo ni kursi pengadilan ni Kesar do au nuaeng jongjong, jala sasittongna ikkon dison do au diadili. Dang adong na sala hubahen tu halak Jahudi jala takkas do i diboto damang. . . . Naik banding ma au tu Kesar!” Biasana molo nga didok songon i dang boi be i diuba. Jala tarida do on sian hata ni si Festus na mandok, “Ala dipangido ho naik banding tu Kesar, borhat ma ho tu Kesar.” (Ul. 25:10-12) Saonari on pe tatiru do na diulahon si Paulus i. Olo do tapangido naik banding tu pengadilan na untimbo. Jadi tikki dibahen musu ‘akka aturan na mambahen hita susa’, tapakke do hukum lao mambela haporseaotta.c—Ps. 94:20.

⁷ Dung dua taon si Paulus dipenjarahon, baru pe dilean kesempatan tu ibana mambahen pembelaan di Rom. Alai sebelum berangkat ibana adong pejabat na asing na naeng pajuppang dohot ibana.

Reaksi ni akka halak na di pengadilan tu keputusan ni hakim. Sahalak donganta, akka pengacarana, dohot akka Saksi Jahowa na asing dang las rohana. Alai las do roha ni akka halak na so Saksi Jahowa, jala didok do selamat tu tim kuasa hukum ni nasida. — Naik banding do hita molo dibahen keputusan na so adil di pengadilan

“Hubahen do Nasa Gogokku lao Mangoloi” (Ul. 25:13–26:23)

8, 9. Aha do tujuan ni Raja Agrippa ro tu Kaesarea?

⁸ Dung didokkon si Paulus naeng naik banding ibana tu kesar, ro ma Raja Agrippa dohot itona si Bernike “manjuppangi” Gubernur Festus.d Di jaman ni halak Rom, biasa do akka pejabat makkunjungi gubernur na baru dilantik. Alai dang holan naeng mandokkon selamat nasida berkunjung. Berupaya do Raja Agrippa mambahen hubungan politik asa boi dimanfaatton ibana i di ari na naeng ro.—Ul. 25:13.

NAIK BANDING LAO MAMBELA IBADAT NA SITTONG

Sipata naik banding do Saksi Jahowa tu mahkamah agung lao memperjuangkon hak ni nasida marbarita. Ida ma dua contohna.

Tanggal 28 Maret 1938, dibatalhon Mahkamah Agung AS do keputusan ni pengadilan negeri. Dibebasson ma sekelompok Saksi na ditakkup ala mambagihon sijahaon di Griffin, Georgia, AS. On ma sada sian godang kasus naik banding tu mahkamah agung na berkaitan tu hak ni Saksi Jahowa marbarita.g

Kasus na asing, i ma kasus ni donganta si Minos Kokkinakis na di Yunani. Saleleng 48 taon, lobi sian 60 hali ibana ditakkup jala ditudu mamaksa halak pinda agama. Mangalanggar hukum Yunani do i. Dung 18 hali ibana ditakkup, baru pe diboan tu pengadilan. Dipenjara ma ibana martaon-taon, jala diasingkan tu akka pulo terpencil di Laut Aegea. Dung dipaboa vonis terakhir tu ibana taon 1986, naik banding ma ibana tu akka pengadilan na untimbo di Yunani alai talu do ibana. Jadi naik banding ma ibana tu Mahkamah Eropa untuk Hak Asasi Manusia (ECHR). Tanggal 25 Mei 1993, diputusson Mahkamah i ma nga dilanggar Yunani be kebebasan beragama ni donganta si Kokkinakis.

Nungnga jotjot Saksi Jahowa naik banding tu ECHR jala monang do hita di godang kasus. Dang adong organisasi na asing na songon Saksi Jahowa na boi monang di godang kasus mambela hak asasi di ECHR.

Adong do pihak na asing na mandapot manfaat tikki monang Saksi Jahowa? Sahalak pakar na margoar si Charles C. Haynes manurat, “Ikkon mandok mauliate do hita tu Saksi Jahowa. Dang soal sadia jotjot nasida dihina, diusir sian kota, bahkan dianiaya, torus do diperjuangkon nasida kebebasan beragama ni nasida, jala berkaitan do i tu kebebasanta beragama. Jadi molo monang nasida, hita sude pe monang do.”

g Ida ma keputusan ni Mahkamah Agung AS taringot kebebasan berbicara di Sedarlah! 8 Januari 2003, halaman 3-11.

⁹ Dipaboa si Festus ma taringot si Paulus tu si Agrippa, gabe naeng pajuppang ma si Agrippa dohot si Paulus. Marsogotna i hundul ma nasida na dua di kursi pengadilan. Nang pe penampilan ni halak i massai menarik diida akka halak, alai lebih menarik dope hata na naeng didok si Paulus.—Ul. 25:22-27.

10, 11. Songon dia do si Paulus patuduhon na direspek ibana si Agrippa, jala aha do na diceritahon ibana tu raja i?

¹⁰ Direspek si Paulus do Raja Agrippa. Mandok mauliate do ibana ala dilean kesempatan mambahen pembelaan di jolona. Didok si Paulus massai takkas do diboto Raja Agrippa sude adat dohot parsoalan ni halak Jahudi. Dung i didok si Paulus ma, “Sasittongna sian sekte Parise hian do au. Jala diboto damang do, gumodang do aturan ni sekte on sian sekte ni halak Jahudi na asing.” (Ul. 26:5) Jadi si Paulus naeng paboahon, sarupa do haporseaonna tu akka halak na manudu ibana i. Tarpaima do nasida saut janji ni Debata na dipaboa tu akka ompu ni nasida, i ma taringot haroro ni Messias. Dung gabe halak Kristen si Paulus, porsea ma ibana Jesus i do Messias. Alai tikki dipaboa ibana i tu akka halak, gabe diadili do ibana. Tertarik do Raja Agrippa mambege hatorangan ni si Paulus i.e

¹¹ Dipaboa si Paulus ma muse aha na hea diulahon ibana tu halak Kristen. Didok ma, “Najolo, didok rohakku ikkon bahenokku do manang aha pe lao mangalo siihutton Jesus halak Nasaret i. . . . Alani sogo ni rohakku, sappe lao do au tu akka kota na asing mangalele nasida [sisean ni Jesus].” (Ul. 26:9-11) Dang berlebihan hata ni si Paulus i, ala godang do halak mamboto na massai kejam si Paulus tu halak Kristen. (Gal. 1:13, 23) Jadi boi do ro tu roha ni si Agrippa, ‘Aha do na mambahen halak sisongon on boi berubah?’

12, 13. (a) Songon dia do si Paulus paboahon boasa ibana boi gabe halak Kristen? (b) Aha do lapatanna si Paulus manipaki tukkot bosi?

¹² Dukkon i didok si Paulus ma muse tu raja i, “Di sada tikki, borhat ma au tu Damaskus lao mangulahon i. Ai nungnga disuru malim kepala au mangulahon songon i disi. Di tonga ari, tikki di pardalanan dope au ale rajanami, ro ma cahaya na massai tiur sian langit. Uttiur do i sian mataniari. Turun ma i tu sakalilingku dohot tu sakaliling ni akka na mandongani au. Dabu ma hami sude tu tano, dung i hubege ma soara di bahasa Heber na mandok, ‘Saulus, Saulus, boasa dibahen ho na haccit tu au? Ho sandiri do na susa molo sai dialo ho au.’ Alai hudok ma, ‘Ise do ho Tuan?’ Dialusi Tuan i ma, ‘Jesus do au, na disiksami.’”f—Ul. 26:12-15.

¹³ Sebelum mandapot parnidaan si Paulus, “dialo” ibana do Tuan i. Di bahasa aslina sarupa ma i songon na manipaki tukkot bosi. Biasana dipakke do tukkot on lao menggiring binatang. Olo do adong binatang na sai mangalo tu parmahanna, jala sai manipaki tukkot ni parmahanna i nang pe gabe haccit dihilala binatang i. Suang songon i ma, parohon jea tu dirina sandiri do si Paulus tikki dialo ibana lomo ni roha ni Debata. Jadi uttung ma dipatuduhon Jesus dirina tu si Paulus asa dipadenggan ibana cara marpikkirna.—Joh. 16:1, 2.

14, 15. Aha do na diulahon si Paulus dung mandapot parnidaan ibana, jala aha do pengaruhna tu akka halak?

¹⁴ Massai balga do perubahan na dibahen si Paulus. Alani i didok ibana ma, “Ale Raja Agrippa, hubahen do nasa gogokku lao mangoloi parnidaan na sian banua ginjang i. Parjolo ma i tu halak na di Damaskus, dung i tu halak na di Jerusalem, tu sude luat Judea, dohot tu akka bangso na asing. Hubaritahon ma asa dipauba nasida roha ni nasida, asa mulak nasida tu Debata, jala asa diulahon akka ulaon na patuduhon naung muba nasida.” (Ul. 26:19, 20) Saleleng martaon-taon, didalatton si Paulus do tugas na dilehon Jesus tu ibana di parnidaan i. Hasilna, gabe bertobat ma akka halak na manjalo barita na uli i. Dipauba nasida ma pangalahona na so jujur jala manomba Debata ma nasida. Gabe warga negara na taat hukum jala na dame ma nasida.

¹⁵ Alai nang pe songon i, dang marlapatan na diulahon si Paulus i tu akka halak na mangalo ibana. Ai didok ibana do, “Alani i do ditakkup halak Jahudi au di bagas joro jala naeng dibunu nasida au. Alai ala diurupi Debata, boi dope au sahat tu sadari on marbarita tu sude halak, dohot ma i halak na sangap dohot na so sangap.”—Ul. 26:21, 22.

16. Songon dia ma hita boi maniru si Paulus tikki patorakkon haporseaotta tu akka hakim dohot pejabat?

¹⁶ Saonari on pe ikkon “sai rade ma [hita] mangalusi” sude halak na manukkun taringot haporseaotta. (1 Ptr. 3:15) Tikki tapatorang haporseaotta tu hakim dohot tu pejabat, tatiru ma cara ni si Paulus makkatai tu si Agrippa dohot tu si Festus. Respek ma hita jala tapaboa ma songon dia Bibel boi mambahen muba ngolutta dohot akka halak na manjalo barita na uli. Molo taulahon i, olo do ra gabe burju sikap ni hakim dohot pejabat i tu hita.

“Bahenonmu nama Au Gabe Halak Kristen” (Ul. 26:24-32)

17. Songon dia do tanggapan ni si Festus mambege pembelaan ni si Paulus, jala aha do persamaanna tu akka halak saonari?

¹⁷ Tikki dibege si Agrippa dohot si Festus pembelaan ni si Paulus i dipaboa nasida ma boha tanggapanna. Didok di Bibel, “Tikki na makkatai i si Paulus mangalehon alusna, gogo ma didok si Festus, ‘Nungnga rittik ho Paulus! Pagodangku do na diboto ho, gabe rittik ma ho dibahen!’” (Ul. 26:24) Sarupa do reaksi ni si Festus dohot akka halak saonari on. Didok nasida do fanatik akka halak na mangajarhon Bibel tu akka jolma. Bahkan akka halak na malo di portibi on pe, maol do porsea tu ajaran ni Bibel taringot haheheon.

18. Aha do alus ni si Paulus tu si Festus, jala songon dia do tanggapan ni si Agrippa tu pembelaan ni si Paulus i?

¹⁸ Alai didok si Paulus ma tu gubernur i, “Dang na rittik au, ale Festus na pinarsangapan. Sittong do na hudok on jala waras do au. Takkas do diboto ho taringot tusi ale Raja Agrippa, alani i do au barani paboahon i tu ho. . . . Ale raja Agrippa, porsea do ho tu na Sinurat ni Akka Panurirang? Pos do rohakku, porsea do damang tusi.” Didok si Agrippa ma tu si Paulus, “Tokkin nai bahenonmu nama au gabe halak Kristen.” (Ul. 26:25-28) Dang taboto tulus manang na dang hata ni raja i, alai on patuduhon menarik do pembelaan ni si Paulus i di raja i.

19. Boha do ujungna kesimpulan ni si Festus dohot si Agrippa taringot si Paulus?

¹⁹ Ditutup nasida ma pertemuan i, jongjong ma si Agrippa dohot si Festus. “Tikki lao kaluar nasida, didok nasida ma sama nasida, ‘Dang adong diulahon ibana na sala na mambahen ibana patut dihukum mate manang dipenjarahon.’ Didok si Agrippa ma tu si Festus, ‘Molo so dipangido ibana hian naik banding tu Kesar, sasittongna nungnga boi ibana dipalua.’” (Ul. 26:31, 32) Jadi diboto nasida do na so marsala si Paulus. Mungkin saonari nungnga lam denggan be pandangan ni nasida taringot halak Kristen.

20. Adong do gunana si Paulus mambahen pembelaan di jolo ni akka pejabat i?

²⁰ Alai kemungkinan dang gabe halak Kristen si Festus dohot si Agrippa. Jadi adong do gunana si Paulus mambahen pembelaan di jolo ni nasida? Adong. Ala diboan do si Paulus “tu jolo ni akka raja dohot tu akka gubernur” di Judea, dohot tu akka pejabat ni Rom na maol dijuppangi, gabe boi ma sahat barita na uli tu nasida. (Luk. 21:12, 13) Kesetiaan ni si Paulus i pe boi do patoguhon roha ni akka dongan asa tetap setia menghadapi tantangan.—Plp. 1:12-14.

21. Aha do hasil na denggan na boi tadapot molo torus hita barani marbarita?

²¹ Saonari pe pasti adong do hasil na denggan molo torus hita marbarita na uli nang pe menghadapi tantangan dohot ancaman. Gabe boi do hita marbarita tu akka pejabat na maol dijuppangi. Molo bertekun jala setia hita, on boi patoguhon akka dongan, gabe lam barani ma nasida paboahon barita na uli taringot Harajaon ni Debata.

SI PERKIUS FESTUS—GUBERNUR NI ROM

Holan di bukku Ulaon ni Apostel dohot di catatan ni si Flavius Yosefus do adong hatorangan taringot si Perkius Festus. Si Festus manggattihon si Feliks gabe gubernur di Judea hira-hira taon 58 M. Dua taon manang tolu taon dukkon i mate ma ibana, mungkin gubernur dope ibana tikki i.

Gubernur na malo jala na marbisuk do si Festus. Beda do ibana sian si Feliks gubernur na sebelumna dohot si Albinus gubernur na manggattihon ibana. Di awal pamarettaon ni si Festus godang do pangarampok di Judea. Si Yosefus mandok, “Dibahen si Festus do kegiatan khusus lao pasohon akka na mambahen gaor luat i. Ditakkup ibana do godang pangarampok jala godang sian nasida dipamate.” Saleleng masa jabatanna, dibangun halak Jahudi do tembok asa unang boi diida Raja Agrippa aha na terjadi di wilayah ni bagas joro. Mulana diparettahon si Festus do asa dibongkar tembok i. Alai alani pangidoan ni halak Jahudi, dipasombu ibana do asa diboan parsoalan i tu Kesar Nero.

Tegas do tindakan ni si Festus tu akka parjahat dohot pemberontak. Alai sipata dang adil ibana, asa boi tetap denggan hubunganna tu halak Jahudi, misalna tikki mangurus kasus ni si Paulus.

RAJA HERODES AGRIPPA II

Si Agrippa na dipaboa di Ulaon ni Apostel 25, i ma Raja Herodes Agrippa II nini ni si Herodes Agung. Bapakna do na menganiaya huria Kristen di Jerusalem 14 taon sebelumna. (Ul. 12:1) Si Agrippa II ma raja na parpudi sian keturunan ni si Herodes.

Taon 44 M, tikki marumur 17 taon si Agrippa mate ma bapakna. Tikki i, di Rom do ibana sikkola di istana ni Kesar Klaudius. Menurut penasehat ni kesar, paposohu dope si Agrippa lao mangarajai wilayah kekuasaan ni bapakna. Jadi dilantik ma sahalak gubernur ni Rom gabe gattina. Nang pe songon i, menurut si Yosefus, tikki di Rom si Agrippa dohot do ibana mangurus masalah ni halak Jahudi jala makkatai mewakili nasida.

Hira-hira taon 50 M dilantik si Klaudius ma si Agrippa gabe raja lao mangarajai Khalkis. Taon 53 M dirajai ibana ma Iturea, Trakonitis, dohot Abilene. Ditugasson do si Agrippa mengawasi bagas joro ni Jerusalem, jala marhuaso do ibana mamillit sintua ni malim Jahudi. Digattihon si Nero ma si Klaudius. Lam bidang ma dilehon wilayah na dirajai si Agrippa, termasuk wilayah Galilea dohot Perea. Di Kaesarea do si Agrippa pajuppang dohot si Paulus. Tikki i ro do ibana berkunjung rap dohot itona si Bernike na maninggalhon suamina, raja ni Kilikia.—Ul. 25:13.

Taon 66 M, gagal do si Agrippa pasohon pemberontakan ni halak Jahudi tu Rom. Gabe ibana do sasaran ni akka pemberontak i. Jadi bergabung ma ibana tu halak Rom. Dung marhasil dipaso pemberontakan ni halak Jahudi i, dilehon si Vespasianus, kesar na baru ma unggodang wilayah kekuasaan tu si Agrippa gabe upana.

a Ida ma kotak “Si Perkius Festus—Gubernur ni Rom”.

b “Kursi pengadilan”, i ma kursi na dibahen di atas ni panggung. Posisi na untimbo on patuduhon keputusan na dibahen hakim i ikkon dihormati jala dang boi diganggu gugat. Hundul do si Latus di kursi on tikki mangadili Jesus.

c Ida ma kotak “Naik Banding lao Mambela Ibadat na Sittong”.

d Ida ma kotak “Raja Herodes Agrippa II”.

e Dung gabe halak Kristen si Paulus, porsea do ibana Jesus i Messias. Alai ditolak halak Jahudi do Jesus jala dianggap ma si Paulus murtad.—Ul. 21:21, 27, 28.

f Adong do sahalak pakar ni Bibel na mengomentari hata ni si Paulus tikki dipaboa na borhat ibana “di tonga ari”. Didok, “Biasana molo dang buru-buru, istirahat do akka jolma molo nga tonga ari ala mohop do ari. Jadi sian on boi do taida, massai semangat do si Paulus menganiaya halak Kristen, sappe dang istirahat ibana di tonga ari.”