BAGIAN 24

Si Paulus Manongos Surat tu Angka Huria

Angka surat ni si Paulus mambahen hot organisasi Kristen

HURIA Kristen na baru jongjong manggohi sangkap ni Jahowa. Alai godang do hasusaan na ro tu nasida. Marsihohot do nasida tingki ro hasusaan sian luar ni huria manang sian bagas ni huria i? Buku na Badia na disurat marhata Junani, marisi 21 surat taringot sipasingot dohot na patoguhon haporseaon.

Sampulu opat sian angka surat i—i ma buku Rom sahat tu buku Heber—disurat apostel Paulus. Digoari ma hombar tu na manjalo—boi do goar ni jolma manang goar ni huria. Parrohahon ma angka hatorangan na diulas di surat ni si Paulus.

Sipasingot taringot pangalaho. Angka na mangulahon parmainanon, pangalangkup, dohot angka dosa na asing, ndang manean Harajaon ni Debata. (Galatia 5:19-21; 1 Korint 6:9-11) Ingkon marsada do saluhut sisomba Debata nang pe nasida ro sian sude bangso. (Rom 2:11; Epesus 4:1-6) Marlas ni roha ma mangurupi dongan sahaporseaon. (2 Korint 9:7) ”Sai martangiang ma hamu,” didok si Paulus. Dijujui do angka sisomba Jahowa laho pasahathon nasa na di rohana marhite tangiang. (1 Tessalonik 5:17 Bibel Siganup Ari; 2 Tessalonik 3:1; Pilippi 4:6, 7) Asa ditangihon Debata tangiangta, martangiang ma hita di bagasan haporseaon.—Heber 11:6.

Aha do na mambahen parsaripeon asa boi tongtong marlas ni roha? Ingkon dihaholongi tunggani doli ma tunggani boruna songon dirina sandiri. Ingkon patuduhonon ni tunggani boru unduk na sian roha maradophon tunggani dolina. Ingkon oloan ni dakdanak natuatuana ala on do na dihalomohon ni Debata. Ingkon togutoguon, ajaran ni natuatua do ianakhonna di bagasan holong mamangke prinsip ni Debata.—Epesus 5:22–6:4; Kolosse 3:18-21.

Peta na patuduhon didia inganan ni si Paulus manurathon angka surat

Pangantusion tu sangkap ni Debata. Marlaba do patik ni si Musa laho mangondingi dohot manogunogu halak Israel sahat tu na ro Kristus. (Galatia 3:24) Alai, ndang sude patik ni si Musa na ingkon siulahonon ni halak Kristen. Marhite surat na ditongos ni si Paulus tu halak Heber—manang Jahudi naung Kristen—dipatorang si Paulus do tu nasida patik dohot sangkap ni Debata naung digohi marhite Kristus. Godang na diulahon mangihuthon patik ni si Musa manogu nasida tu Kristus. Umpamana, pelean binatang manggombarhon tobusan ni Jesus, na boi paluahon jolma sian dosa. (Heber 10:1-4) Dung mate Jesus, salpu ma padan na parjolo i.—Kolosse 2:13-17; Heber 8:13.

Huria Kristen di abad na parjolo manangihon sada sian surat ni si Paulus

Tudutudu laho manguluhon huria. Angka baoa na mangaradoti huria ingkon marparange na denggan jala mangihuthon tudutudu na disurat di Bibel. (1 Timoteus 3:1-10, 12, 13; Titus 1:5-9) Ingkon marpungu do angka sisomba Jahowa dohot angka dongan sahaporseaon asa masipajujuan. (Heber 10:24, 25) Sude parpunguan ingkon parohon na denggan jala parohon pangajarion na uli.—1 Korint 14:26, 31.

Di Rom do si Paulus tingki ditongos surat na paduahon tu si Timoteus; di hurungan do ibana paima adong haputusan sian panguhum. Ndang piga na ro mangida ibana tusi. Diboto si Paulus do na laho masa tu ibana. Didok ibana: ”Nunga hupasidung paraloan na denggan i, nunga hupaujung parlojongonki; ramot hubahen haporseaon i.” (2 Timoteus 4:7) Dungkon i do ra, mate martir si Paulus. Alai, angka surat ni apostel on manogunogu angka na marsihohot tu Jahowa sahat tu sadarion.

—Dibuat sian Rom; 1 Korint; 2 Korint; Galatia; Epesus; Pilippi; Kolosse; 1 dohot 2 Tessalonik; 1 dohot 2 Timoteus; Titus; Pilemon; Heber.

ISE DO PINOMPAR NA DIJANJIHON I?

Dung mardosa si Adam dohot si Hawa, didok Debata ma tu ulok i: ”Jala bahenonku ma parbadaanmu dohot boruboru i, ro di pinomparmu tu Pinomparna. Ibana mangalisathon ulum, gabe pargutonmu tambihulna.” (1 Musa 3:15) Dipaboa di Bibel Sibolis ”ulok na robi.” (Pangungkapon 12:9) Hatorangan taringot Pinompar i, manang Sipalua na dijanjihon ni Debata, hahomion do saleleng marabadabad alai dipapatar sian tingki tu tingki di Bibel.

Hirahira 2,000 taon dung mardosa si Adam dohot si Hawa, dipaboa Jahowa molo Pinompar na dijanjihon i, ro sian pinompar ni si Abraham. (1 Musa 22:17, 18) Dung leleng, dipaboa apostel Paulus ma Pinompar na dijanjihon, i ma Messias, manang Jesus Kristus. (Galatia 3:16) Dos songon ayat di 1 Musa 3:15, marhite isara gombaran ’tambihul’ ni Jesus dipargut tingki mate ibana. Alai, dipahehe Debata do Jesus ”di bagasan tondi.”—1 Petrus 3:18.

Marsangkap dope Debata asa 144.000 halak dohot bagian na paduahon sian Pinompar i. (Galatia 3:29; Pangungkapon 14:1) Dipahehe nasida di bagasan tondi asa panean dohot Kristus di Harajaon na di surgo.—Rom 8:16, 17.

Ala naung Raja di surgo, ripashononna ma Sibolis dohot pinomparna, i ma halak na jahat na mangihuthon Sibolis. (Johannes 8:44; Epesus 6:12) Pamarentaon ni Jesus gabe parohon hadameon dohot las ni roha tu jolma na mangoloi Debata. I ma tingki dilisathon ’ulu’ ni ulok i jala dipasohot salelenglelengna.—Heber 2:14.