PARSIAJARAN 6
Aha do Pangkirimon tu Halak Naung Mate?
1. Aha do barita na uli tu halak naung mate?
Tingki di tano on dope Jesus, mate ma alealena na margoar si Lasarus. Nunga opat ari mate si Lasarus asa sahat Jesus di jabuna. Laho ma Jesus tu tanoman i raphon si Marta dohot si Maria, iboto ni na mate i. Jala ndang sadia leleng, marroan ma angka jolma tusi. Boi do tapingkiri songon dia las ni roha ni si Marta dohot si Maria dung dipangolu Jesus muse si Lasarus?—Jaha Johannes 11:21-24, 38-44.
Si Marta nunga diboto hian barita na uli taringot tu halak na mate. Diboto ibana do na pangoluon ni Jahowa do muse halak naung mate di tano on.—Jaha Job 14:14, 15.
2. Songon dia do panghilalaan ni halak naung mate?
Didokhon Debata tu si Adam, ”tano do ho jala ingkon mulak tu tano do ho”.—1 MUSA 3:19.
Sian tano do jolma ditompa. (1 Musa 2:7; 3:19) Jolma ndang pulik tondina pulik dagingna. Hita on daging na mangolu, ndang adong na tongtong mangolu ia dung mate hita. I do mambahen, ndang adong dipaboa si Lasarus aha na masa tingki mate ibana, alana halak na mate ndang diboto agia aha.—Jaha Psalmen 146:4; Parjamita Sian Si Salomo 9:5, 6, 10.
Dipasiaksiak Debata do jolma di api tingki mate? Bibel paboahon halak naung mate ndang diboto agia aha. Dibahen i, ndang tutu pangajarion taringot tu api naroko na paroaroahon Debata. Gariada, halak na dipasiaksiak di api sada hagigian do i di Debata jala na so hea adong di bagasan rohaNa.—Jaha Jeremia 7:31.
Tonton ma video Aha do na Masa tu Halak Naung Mate?
3. Boi do na mate manghatai tu hita?
Halak naung mate ndang boi manghatai manang marbinege. (Psalmen 115:17) Alai adong surusuruan na jahat, nasida boi manghatai tu angka jolma songon halak naung mate i. (2 Petrus 2:4) Diorai Jahowa do hita laho manungkun tu halak na mate.—Jaha 5 Musa 18:10, 11.
4. Ise do na laho mangolu muse?
Marjuta halak naung mate paheheonNa muse di tano on. Suang songon i godang halak ala so mananda Debata gabe mangulahon na geduk, paheheonNa do.—Jaha Lukas 23:43; Ulaon ni Apostel 24:15.
Angka halak na dipahehe gabe boi marsiajar hasintongan taringot tu Debata jala asa porsea tu Jesus laos mangoloi Ibana. (Pangungkapon 20:11-13) Angka halak na mulak mangolu muse jala mangulahon angka na denggan boi mangolu salelenglelengna di tano on.—Jaha Johannes 5:28, 29.
5. Aha do na taparsiajari taringot tu Jahowa sian haheheon?
Boi do mandapot panghirimon tu hangoluan halak na mate alana nunga disuru Debata, Jesus mate humongkop hita. Alani i, marhite haheheon, boi tahilala holong ni Jahowa dohot hinadenggan ni rohaNa. Dung dipahehe na mate, ise ma na parjolo naeng jumpangan muna?—Jaha Johannes 3:16; Rom 6:23.