PARSIAJARAN 10
Songon dia do Hita Mananda Ugamo na Sintong?
1. Holan sada do ugamo na sintong?
”Jaga hamu ma angka panurirang pargapgap.”—MATEUS 7:15.
Tu angka halak na manghaholongi Jahowa, Jesus patuduhon sada dalan, manang ugamo na sintong. Dipatudos ibana do i songon dalan laho tu hangoluan na salelenglelengna. Jesus mandok ’otik do halak na bongot’ sian dalan i. (Mateus 7:14) Holan sada do dijalo Debata ugamo i ma na marojahan tu hataNa. Sude na mangihuthon ugamo na sintong mardalan di dalan na dihalomohon Debata.—Jaha Johannes 4:23, 24; 14:6; Epesus 4:4, 5.
Tonton ma video Dijalo Debata do Sude Agama?
2. Aha do na dipaboa Jesus taringot tu halak Karisten sipaula?
”Dihatahon nasida do, naung ditanda Debata, alai disoadahon do Ibana di na niulanasida.”—TITUS 1:16.
Jesus paingothon na laho ro panurirang pargapgap mambahen ramun hakaristenon. Sian duru, halak i suman songon siihuthon ugamo na sintong. Gareja ni halak i mamparhatutuhon Karisten. Alai, toho do i sasintongna? Sian dia i taboto? Halak Karisten situtu patuduhon parange dohot parniulaan na denggan di jolo ni sude jolma.—Jaha Mateus 7:13-23.
3. Songon dia do boi tatanda angka siihuthon ugamo na sintong?
Ida ma lima tanda na di toruon:
Na mangihuthon ugamo na sintong mangargai Bibel, alana Bibel do Hata ni Debata. Diusahahon nasida do mangulahon prinsip-prinsip na adong di Bibel. Alani i, ugamo na sintong ndang songon angka ugamo na marojahan tu pingkiran ni jolma. (Mateus 15:7-9) Angka siihuthon ugamo na sintong diulahon do songon na ni ajarhonna.—Jaha Johannes 17:17; 2 Timoteus 3:16, 17.
Na mangihuthon ugamo nasintong pasangaphon goar ni Debata, Jahowa. Angka panurirang songon si Musa dohot si Daud mananda jala manjouhon goar i. (2 Musa 3:15; Psalmen 8:2) Nang Jesus dipasangap do goar ni Debata alana dipabotohon tu halak na asing. Diurupi ibana angka jolma laho mananda Debata jala mangajari nasida martangiang laho pabadiahon goar ni Debata. (Mateus 6:9) Di inganan muna, ise do na paboahon goar ni Debata tu angka halak?—Jaha Johannes 17:26; Rom 10:13, 14.
Na mangihuthon Jesus mambaritahon Harajaon ni Debata. Debata marsuru Jesus laho mambaritahon barita na uli taringot tu harajaon. Harajaon ni Debata i ma sada harajaon na mangalehon panghirimon tu sude jolma manisia. I do tongtong dibaritahon Jesus sahat tu na mate ibana. (Lukas 4:43; 8:1; 23:42, 43) I do asa didokhon siihuthon ibana ingkon mambaritahon sisongon i. Molo adong halak na ro manjumpangi hamu laho mambaritahon taringot tu Harajaon ni Debata, sian ugamo dia do nasida?—Jaha Mateus 24:14.
Na mangihuthon Jesus ndang parsidohot tu haportibion on. Mura do tandaonta nasida alana nasida ndang olo mangihuthon rumang ni politik manang paimbarhon jolma. (Johannes 17:16; 18:36) Asing ni i, ndang diulahon nasida pambahenan manang parange na geduk songon parange ni hajolmaon na di portibi on.—Jaha Jakobus 4:4.
Na mangihuthon Jesus marholong ni roha situtu do tu dongan sahaporseaonna. Hata ni Debata mangajari nasida laho pasangaphon sude jolma sian saluhut houm. Ugamo na so sintong jotjot parsidohot tu porang. Alai, siihuthon ugamo na sintong ndang diulahon sisongon i. (Mika 4:1-3) Gariada, siihuthon Jesus dilehon nasida do tingki dohot gogo nasida laho mangurupi dohot mangapuli sude donganna jolma.—Jaha Johannes 13:34, 35; 1 Johannes 4:20.
4. Boi do hita mananda ugamo na sintong?
Molo pandapot muna, ugamo dia ma na sude ajaranna sian Bibel, pasangaphon goar ni Debata, jala mambaritahon na holan Harajaon ni Debata sihirimon ni sude jolma manisia? Punguan dia ma na patuduhon holong jala ndang parsidohot tu parporangan?—Jaha 1 Johannes 3:10-12.