Boasa Adong Orhanisasi ni Debata?

1. Boasa Debata manguluhon bangso Israel na jolo?

Debata manguluhon pinompar ni si Abraham gabe sada bangso jala mangalehon nasida patik na singkop. Didok ma nasida bangso ”Israel” jala dipillit Debata nasida laho mampartahanhon panombaon na sintong songon i nang mangulahon hataNa. (Psalmen 147:19, 20) Ala ni i, angka jolma sian nasa bangso boi mandapot pasupasu marhite bangso Israel.​—Jaha 1 Musa 22:18.

Debata mamillit bangso Israel gabe sitindangiNa. Angka na dihilala bangso Israel na jolo patuduhon adong do labana mangoloi angka patik ni Debata. (5 Musa 4:6) Alani i, marhite bangso Israel, angka bangso na asing boi mananda Debata na sintong.​—Jaha Jesaya 43:10, 12.

2. Boasa halak Karisten na sintong diuluhon?

Dipudian ni ari, ndang lomo be roha ni Debata tu bangso Israel. Jala, diganti Jahowa ma bangso i dohot ruas ni huria hakaristenon. (Mateus 21:43; 23:37, 38) Saonari on, halak Karisten na sintong manggantihon bangso Israel jala gabe didok ma nasida panindangi di Jahowa.​—Jaha Ulaon ni Apostel 15:14, 17.

Jesus manguluhon angka siihuthon ibana laho marbarita na uli laos mangajari halak sian nasa bangso. (Mateus 10:7, 11; 24:14; 28:19, 20) Di ariari parpudi on ma ujung ni parbaritaan i. On dope ulaon na umbalga sian na sai laon, Jahowa pasadahon marjuta halak sian nasa bangso tu panombaon na sintong. (Pangungkapon 7:9, 10) Diuluhon do halak Karisten na sintong asa marsiurupan jala marsiapoan. Di liat portibi on, rap mangulahon pangajarion na sian Bibel do nasida di parpunguan.​—Jaha Heber 10:24, 25.

3. Songon dia do mula ni orhanisasi ni Sitindangi Ni Jahowa di tingkinta on?

Hirahira di taon 1870, adong punguan na metmet na manangkasi Bibel i ma mulana dapot nasida angka hasintongan sian Bibel na saleleng on buni. Diantusi nasida ma molo Jesus nunga manguluhon ruas ni halak Karisten laho marbarita, ala ni i nasida mamungka ulaon mambaritahon Harajaon di liat portibi on. Di taon 1931, nasida mamangke goar Sitindangi Ni Jahowa.​—Jaha Ulaon ni Apostel 1:8; 2:1, 4, 11; 5:42.

4. Songon dia do Sitindangi Ni Jahowa diuluhon?

Di abad na parjolo, angka ruas huria ni karisten di godang bangso manjalo tudutudu sian punguan na mangaradoti orhanisasi na mangangkui Jesus ulu ni ruas huria. (Ulaon ni Apostel 16:4, 5) Suang songon i saonari on, di liat portibi on angka Sitindangi Ni Jahowa mandapot togutoguan ni Punguan na Mangaradoti Orhanisasi sian sintua na marparniahapan. Nasida mangaradoti angka kantor ni Sitindangi Ni Jahowa na adong di godang bangso na manalin, patupahon, jala mambagibagihon sijahaon tu parsiajar Bibel dibagasan lobi sian 600 hata. Jadi, Punguan na Mangaradoti Orhanisasi boi paradehon pangapulion jala tudutudu na sian Bibel tu lobi 100.000 huria di liat portibi on. Di sada huria, adong angka baoa na tarpillit gabe sintua, manang na mangaradoti. Dohot holong ni roha angka baoa on mamparrohahon punguan birubiru ni Debata.​—Jaha 1 Petrus 5:2, 3.

Angka Sitindang Ni Jahowa diuluhon laho mambaritahon barita na uli jala mambahen sisean. Songon angka apostel, marbarita na uli do nasida sian jabu tu jabu. (Ulaon ni Apostel 20:20) Nasida pe patandahon parsiajaran Bibel tu angka na marsitutu manghaholongi hasintongan. Alai, nasida ndang holan orhanisasi sambing. Nasida ruas na marsitogutoguan jala maramahon Ama na parholong. (2 Tessalonik 1:3) Ala na manomba Jahowa diuluhon laho pasonanghon Debata jala mangurupi angka na asing, nasida ma na martuaan di tano on.​—Jaha Psalmen 33:12; Ulaon ni Apostel 20:35.