Mangajari Angka Parbarita Harajaon

1-3. Aha do na diulahon Jesus asa lam tarsar barita na uli, jala aha do sungkunsungkun na ro tu rohanta?

SALELENG dua taon, marbarita do Jesus di Galilea. (Jaha Mateus 9:35-38.) Dibaritahon ibana do barita na uli taringot tu Harajaon ni Debata di kota, desa, dohot di sinagoga. Tudia pe ibana laho, torop do halak mandapothon ibana. Jesus mandok, ”Bidang do nian sisabion.” Alani i, dihaporluhon godang parkarejo.

² Aha do diulahon Jesus asa lam tarsar barita na uli i? Disuru ibana do 12 siseanna ”mamaritahon harajaon ni Debata”. (Luk. 9:1, 2) Ndang hea dope siseanna i marbarita. Alani i, diajari Jesus do nasida andorang so disuru marbarita, songon pangajarion na dilehon Jahowa tu ibana.

³ Sungkunsungkun do ra rohanta: Pangajarion na songon dia do dijalo Jesus sian Amana? Pangajarion na songon dia do dilehon Jesus tu angka siseanna? Diajari Jesus do siihuthon ibana marbarita saonari? Molo diajari, songon dia do i diulahon?

”Songon Pinodahon ni Damang tu Ahu, Songon I do Huhatahon”

4. Didia jala andigan do Jesus diajari Amana?

⁴ Tangkas do dipaboa Jesus, molo ibana diajari Amana. Tingki di tano on, didok ibana, ”Songon pinodahon ni Damang tu Ahu, songon i do huhatahon.” (Joh. 8:28) Didia jala andigan do Jesus diajari? Ra, dung ditompa Jesus nunga marsiajar ibana. (Kol. 1:15) Tingki di surgo, ndang taretong be sadia godang tingki na pinangke ni Jesus marsiajar tu ’guruna’, i ma Amana. (Jes. 30:20) Alani i, godang do parsiajaran na arga dijalo Jesus sian Amana taringot tu pangalaho, ulaon dohot sangkap ni Debata.

5. Aha do na diajarhon Jahowa tu Jesus taringot tu siulahononna di tano on?

⁵ Dung dapot tingkina, dipaboa Jahowa ma tu Jesus taringot tu siulahononna di tano on. Taparrohahon ma surirang na manggombarhon songon dia Jahowa na gabe Guru tu AnakNa. (Jaha Jesaya 50:4, 5.) Dipaboa di surirang i, didungoi Jahowa do AnakNa ”ganup sogot”. Digombarhon do Jahowa songon guru na mandungoi muridna laho mangajari muridna i. Sada karya referensi taringot tu Bibel paboahon, ”Jahowa . . . mamboan ibana tu singkola songon murid, dung i diajari ma ibana taringot tu marbarita na uli.” Di ”singkola” na adong di surgo, diajarhon Jahowa do tu Jesus taringot tu ’sidohononna dohot sihatahononna’. (Joh. 12:49) Dung i, diajarhon Jahowa do tu Jesus carana mangajari na asing.a Pangajarion ni Jahowa, mangurupi Jesus marbarita tingki di tano on. Ndang holan i, diurupi Jesus do muse siseanna asa denggan nasida di ulaon marbarita.

6, 7. (a) Aha do pangajarion na dilehon Jesus tu siseanna, jala songon dia do i mangurupi nasida? (b) Boasa dilehon Jesus pangajarion tu siihuthon ibana saonari?

⁶ Pangajarion sisongon dia do dilehon Jesus tu angka siseanna? Dipaboa di Mateus bindu 10, dilehon Jesus do tu nasida tudutudu na tangkas taringot tu marbarita, songon: didia nasida marbarita (ayat 5, 6), aha na laho dibaritahon (ayat 7), mangasahon Jahowa (ayat 9, 10), hata pamungka (ayat 11-13), molo ndang dijangkon (ayat 14, 15), jala molo marsitaonon alani barita i (ayat 16-23).b Pangajarion ni Jesus tu siseanna mangurupi nasida mamungka dalan marbarita na uli di abad na parjolo M.

⁷ Songon dia do di tingkinta on? Dilehon Jesus Raja ni Harajaon ni Debata do ulaon na ringkot tu siihuthon ibana. Ulaon i, i ma pasahathon ”barita na uli . . . di liat portibi on, laho mangkatindangkonsa tu saluhutna bangso”. (Mat. 24:14) Diajari Jesus do hita mangulahon ulaon na ringkot on? I do! Sian surgo, diparrohahon Jesus do siihuthon ibana asa diajari marbarita dohot mangulahon ulaon di huria.

Mangajari Naposo ni Debata Marbarita

8, 9. (a) Aha do na tinuju ni Singkola Pangkobasion Teokratis? (b) Songon dia do parpunguan di parsitongaan ni minggu mangurupi hamu lam denggan di ulaon marbarita?

⁸ Nunga leleng organisasi ni Jahowa mangajari naposo ni Debata marbarita marhite kebaktian dohot parpunguan. Sada sian parpunguan i, i ma Parpunguan tu Parbarita. Alai, sian taon 1940-an, angka donganta na mangaradoti ulaon di kantor pusat patupahon pangajarion marhite angka singkola.

⁹ Singkola Pangkobasion Teokratis. Songon naung dipaboa di pasal 16, singkola on dipungka taon 1943. Holan asa denggan marjamita do na tinuju ni singkola on? Ndang holan i. Alai na rumingkot na tinuju ni singkola on, i ma mangajari naposo ni Debata asa boi mamuji Jahowa marhite ulaon marbarita. (Ps. 150:6) Sude donganta na dohot tu singkola on diajari asa lam denggan di ulaon marbarita. Saonari, pangajarion on dipatupa di parpunguan parsitongaan ni minggu.

10, 11. Ise do na boi dohot tu Singkola Gilead, jala aha do na tinuju ni parsiajaran na adong di singkola i?

¹⁰ Singkola Alkitab Gilead Menara Pengawal. Singkola Gilead na parjolo, dipungka di ari Senen 1 Februari 1943. Sian mulana, na tinuju ni singkola on mangajari angka perintis dohot angka pelayan sepenuh waktu na asing andorang so disuru nasida gabe misionaris tu negara na asing. Alai sian bulan Oktober 2011, singkola on diparade holan tu angka donganta naung dohot tu dinas sepenuh-waktu khusus, songon perintis istimewa, sintua kaliling dohot tungganeboruna, anggota Betel, dohot misionaris na so hea dope parsidohot tu singkola on.

¹¹ Aha do na tinuju ni parsiajaran na dapot di Singkola Gilead? Sahalak instruktur na marpengalaman mandok, ”Laho patoguhon haporseaon ni angka siswa marhite parsiajaran Bibel. Dung i, mangurupi nasida patuduhon parange na denggan na dihaporluhon tarlumobi tingki mangadopi hasusaan di inganan nasida marbarita. Jala, mangonjar roha ni nasida mangulahon ulaon parbaritaon.”​—Eps. 4:11.

12, 13. Aha do laba ni Singkola Gilead di ulaon marbarita di liat portibi on? Lehon ma tudosan.

¹² Aha do laba ni Singkola Gilead tu ulaon marbarita di liat portibi on? Sian taon 1943, lobi sian 8.500 halak diajari di singkola on.c Jala misionaris na sian singkola on nunga mangurupi ulaon marbarita di lobi sian 170 negeri. Dipangke angka misionaris on do pangajarion naung diparsiajari nasida di Singkola Gilead. Sitiruon do nasida di ulaon marbarita, jala diajari nasida do dongan na asing asa marhiras ni roha di ulaon i. Jotjot do angka misionaris on ditugashon tu inganan na otik dope parbarita.

¹³ Taparrohahon ma na masa di Jepang. Tingki Porang Dunia II, ndang adong na mangatur ulaon marbarita di Jepang. Bulan Agustus 1949, ndang sahat tu sampulu godang ni penyiar di Jepang. Alai, di ujung ni taon i, disuru ma 13 misionaris sian Singkola Gilead laho marbarita di Jepang. Di pudian ni ari, lam godang do muse na ro tusi. Mulana, angka misionaris on marbarita di angka kota na balga, dung i pinda ma nasida tu kota na asing. Marsitutu do nasida manjujui angka parsiajar Bibelna dohot donganta na asing asa gabe perintis. Godang do laba ni hiras ni rohanasida on. Saonari, adong lobi sian 216.000 penyiar di Jepang, jala hirahira 40 porsen sian nasida gabe perintis!d

14. Aha do na pinatudu ni angka singkola teokratis? (Ida ma kotak ”Singkola na Mangajari Parbarita Harajaon”)

¹⁴ Angka singkola teokratis na asing. Angka na dohot tu Singkola Dinas Perintis, Singkola Alkitab tu Pasangan Kristen, dohot Singkola Alkitab tu Saudara Lajang diurupi mambahen hamajuon di partondion, jala asa lam marhiras ni roha marbarita.e Sude singkola on patuduhon na diajari Raja i do hita asa denggan di ulaon marbarita.​—2 Tim. 4:5.

Mangajari Donganta Baoa Mangulahon Tanggung Jawab na Diparade tu Nasida

15. Songon dia do donganta baoa maniru Jesus mangaradoti ulaon di huria?

¹⁵ Taingot ma surirang ni si Jesaya taringot tu Jahowa na mangajari Jesus. Di surgo, diajari Jahowa do Jesus laho ”pasabam roha ni na loja”. (Jes. 50:4) Tingki di tano on, dipangke Jesus do na pinarsiajaranna i laho mambahen sonang roha ni ”angka na loja jala na sorat”. (Mat. 11:28-30) Songon Jesus, angka donganta baoa na mangaradoti ulaon di huria marsitutu mangurupi dongan na asing mangkilala dame ni roha. Alani i, dipatupa do angka singkola na mangurupi angka donganta baoa asa lam denggan mangaradoti ulaon di huria.

16, 17. Aha do na tinuju ni Singkola Pangkobasion tu Harajaon? (Ida surat na di toru.)

¹⁶ Singkola Pangkobasion tu Harajaon. Kelas na parjolo dipungka tanggal 9 Maret 1959, di South Lansing, New York. Dijou do sintua kaliling dohot parhobas asa dohot tu kursus on na dipatupa saleleng sabulan. Di pudian ni ari, kursus on diterjemahon sian bahasa Inggris tu bahasa na asing. Sian tingki tu tingki, diurupi do angka donganta baoa di liat portibi on mandapot laba sian kursus on.f

¹⁷ Taringot tu na tinuju ni Singkola Pangkobasion tu Harajaon, Buku Tahunan Saksi-Saksi Yehuwa 1962 (di bahasa Inggris) mandok, ”Di portibi saonari on, sahalak sintua di huria ni Sitindangi Ni Jahowa ingkon boi mangatur tingkina mangaradoti na ringkot di ngoluna, jala mangaradoti huria asa parohon pasupasu tu sude na di huria i. Alai ingkon marbisuk do ibana, ndang boi so sarihononna keluargana ala mangaradoti ulaon di huria. Angka baoa na mangaradoti ulaon di huria di liat portibi on mandapot laba sian Singkola Pangkobasion tu Harajaon. Singkola i, mangurupi nasida mangulahon ulaon di huria, songon naung ditontuhon di Bibel!”​—1 Tim. 3:1-7; Tit. 1:5-9.

18. Songon dia do sude naposo ni Debata mandapot laba sian Singkola Pangkobasion tu Harajaon?

¹⁸ Songon dia do sude naposo ni Debata mandapot laba sian Singkola Pangkobasion tu Harajaon? Boi do dame roha ni naposo ni Debata di huria molo sintua dohot parhobas mangulahon na pinarsiajaran ni nasida di singkola i. Tingki ro sintua manang parhobas laho patoguhon hamu, manang tingki rade nasida manangihon holso ni rohamu, songon dia do pangkilalaanmu? Tontu las do rohamu patuduhon pangargaion tu nasida. (1 Tes. 5:11) Pasupasu sian Jahowa do tu huria angka baoa na rade mangulahon i!

19. Singkola aha dope na pinatupa ni Panitia Pengajaran, jala aha do na tinujuna?

¹⁹ Angka singkola teokratis na asing. Panitia Pengajaran sian Punguan na Mangaradoti Organisasi, patupahon angka singkola na asing laho mangurupi angka donganta baoa naung dipillit mangulahon ulaon di organisasi. Angka singkola on mangurupi angka sintua di huria, sintua kaliling, dohot anggota Panitia Cabang asa lam denggan mangulahon ulaon ni nasida. Kursus na marojahan tu Bibel on, mangurupi nasida manjaga partondion, jala mamangke prinsip ni Bibel tingki mangaradoti birubiru ni Debata.​—1 Ptr. 5:1-3.

20. Boasa didok Jesus sude hita dipodai Jahowa, jala aha do na ingkon taulahon?

²⁰ Tangkas ma, molo Raja Messias mangalehon pangajarion na denggan tu siihuthon ibana. Sude pangajarion i ro sian Jahowa: Diajari Jahowa do AnakNa, dung i diajari Jesus ma angka siihuthon ibana. Alani i, songon na nidok ni Jesus, sude hita ”na pinodaan ni Jahowa”. (Joh. 6:45; Jes. 54:13) Marsitutu ma hita mamangke pangajarion na diparade ni Raja i tu hita. Jala na rumingkot, pangajarion i mangurupi hita manjaga partondion asa tongtong togu jala boi denggan mangulahon ulaon marbarita.